دلالـة كـبـرى

Post: #1
Title: دلالـة كـبـرى
Author: انعام عبد الحفيظ
Date: 02-12-2009, 10:54 AM
Parent: #0

فكرة البيع والشراء عموماً تكون للحوجة إما للتخلص او الإقتناء
للجميع نعلن هذه البوست دلالة كبرى لكل من يريد بيع بوست من بوستاته
وعليه يتم بيع البوستات المشتراه بواسطتنا في الدلالة للعايز يشتري
من شروط الدلالة ان لا يكون البوست له علاقه بالأوضاع السياسية في بلادنا
والبلاد المجاورة لأنو بصراحة معظم تلك البوستات أصبحت ليست ذات قيمة تذكر
فلا يوجد نقاش هادف ولا حوار ولا منطق وبإختصار اصبح إختلاف الرأي مع الآخر
يؤدي الى الشتيمة والتجريح لذلك حفاظاً على سلامتكم النفسية
آثرنا عدم وجود مثل تلك البوستات هنا في هذه الدلالة
عليه ستكون الدلالة لبيع البوستات ذات القيمة الإنسانية العالية
والتي ترتقي بنا وبقيمتنا كـ بني آدمين وبتكون دسمة وجميلة
تقبل طلبات الشراء مقدماً (يعني ممكن يجي زول يقول داير يشتري بوست
محمد المرتضى بتاع ناسنا مثلاً وود المرتضى يكون ما داير يبيع
بس بنحتفظ بطلبات الشراء إمكن يجي يوم عليهو ويقوم يقول عايز يبيع)هههههههه

من يود البيع او الشراء عليه دفع رسم وقدره واحد بوست دسم لا يرد ولا يكمّل عليه
ـــــــــــــــــــــــــــــــ
ملحوظة (1): تقبل بوستات مأرشفة
ملحوظة (2): لا تقبل بوستات مهكرة

Post: #2
Title: Re: دلالـة كـبـرى
Author: ود الخليفه
Date: 02-12-2009, 11:05 AM
Parent: #1

تاخدي كم وتطلعي من البوست دا؟؟؟

طوالي برفع العموله بتاعتي 25%

كدي شوفي دا بعمل كم وما بنختلف

السنيــــــــــــــــــــن

Post: #4
Title: Re: دلالـة كـبـرى
Author: انعام عبد الحفيظ
Date: 02-12-2009, 11:31 AM
Parent: #2

Quote: تاخدي كم وتطلعي من البوست دا؟؟؟

ود الخليفة بآخد منبر بكري كلو هههههههههه

Quote: كدي شوفي دا بعمل كم وما بنختلف

ياخي دا بوست تحفة بس!!!

بجيب بجيب ما تستعجل ليهو ههههههههه

Post: #3
Title: Re: دلالـة كـبـرى
Author: najma
Date: 02-12-2009, 11:13 AM
Parent: #1

انعام
Quote: فكرة البيع والشراء عموماً تكون للحوجة إما للتخلص او الإقتناء

ده شنو يابت ده ضحكتينى

عليه ستكون الدلالة لبيع البوستات ذات القيمة الإنسانية العالية
والتي ترتقي بنا وبقيمتنا كـ بني آدمين وبتكون دسمة وجميلة

غايتو كان بوست ناسنا لمحمد المرتضى عرضو انا حاجزه من هسع خصمتك بالنبى
التحية لناسنا ولمولانا لمحمد المرتضى

Post: #5
Title: Re: دلالـة كـبـرى
Author: انعام عبد الحفيظ
Date: 02-12-2009, 11:47 AM
Parent: #3

Quote: Quote: فكرة البيع والشراء عموماً تكون للحوجة إما للتخلص او الإقتناء

ده شنو يابت ده ضحكتينى

يا نجمة قصدت بالعبارة تكون فكرة البيع عموماً

للرغبة في التخلص من شئ ما والشراء لإقتناء شئ ما

Quote: غايتو كان بوست ناسنا لمحمد المرتضى عرضو انا حاجزه من هسع خصمتك بالنبى
التحية لناسنا ولمولانا لمحمد المرتضى

بقى فيها خِصيم نبي !!!

يا نجمة خصيم النبي ما بناباهو لكن الفيك إنعرفت هههههههههه

إنتي ما قريتي الشروط يعني ما تجي تشتركي في الدلالة ويدك فاضية

Post: #6
Title: Re: دلالـة كـبـرى
Author: محمد عبد الماجد الصايم
Date: 02-12-2009, 12:10 PM
Parent: #5

عندي بوست كشف ما جايب حقو!
الجماعة زاغـــو بالكشف بتاعو

Post: #7
Title: Re: دلالـة كـبـرى
Author: Faisal Elrasheed
Date: 02-12-2009, 12:14 PM
Parent: #6

Quote: عندي بوست كشف ما جايب حقو!
الجماعة زاغـــو بالكشف بتاعو

ود الصايم انت دي شنو البلاوي القالو سويته دي؟؟

ـــــــــــــــــــــ

انعام: التلفون وقع والارقام راحت ... اتصلي .. المواضيع نجضت

تحياتي للجميع

Post: #9
Title: Re: دلالـة كـبـرى
Author: محمد عبد الماجد الصايم
Date: 02-12-2009, 12:22 PM
Parent: #7

Quote: ود الصايم انت دي شنو البلاوي القالو سويته دي؟؟

فيصل ..
الاتهامات التعسفية دي ما بتنفع معانا
هووووووي

ميكـ لاين .. وشتت تاني ما تعاين

ومالكـ ما جيت دفعت في الكشف؟
غايتو ناس عليها جنس قوة عين!

Post: #15
Title: Re: دلالـة كـبـرى
Author: Faisal Elrasheed
Date: 02-12-2009, 12:29 PM
Parent: #9

Quote: فيصل ..
الاتهامات التعسفية دي ما بتنفع معانا
هووووووي

والله سمع اضاني دي...

وبعدين دي معلومات مستقاة من مصادره ( حلوه مستقاة دي) انا زاتي عجبتني ههههههههههههههههههه

Quote: ومالكـ ما جيت دفعت في الكشف؟
غايتو ناس عليها جنس قوة عين!

والله جيت ودفعته لكن الظاهر انتو عملتو كبري في الزول المسكين داك هههههههههه

المهم: وين السيد العريس حميده ..

ـــــــــــــــــــــــ

Post: #18
Title: Re: دلالـة كـبـرى
Author: سمرية
Date: 02-12-2009, 12:32 PM
Parent: #7

Quote: انعام: التلفون وقع والارقام راحت ... اتصلي .. المواضيع نجضت

كدي اتصلي سريع ، وبالمرة اتصلي علي عشان اسألك ياتو مواضيع النجضت دي ... ( وش شمشار )

كان مواضيع المنبر العام فكلها نجيضة ومستوية ... وقربت تحرق !!

البوستات الفاضية تنفع ؟

بس اول مرة اعرف ان التلفون لما يقع الارقام بتروح ... اوعي تكوني صدقتي الحنك دا ؟؟

Post: #24
Title: Re: دلالـة كـبـرى
Author: Faisal Elrasheed
Date: 02-12-2009, 12:49 PM
Parent: #18

Quote: بس اول مرة اعرف ان التلفون لما يقع الارقام بتروح ... اوعي تكوني صدقتي الحنك دا ؟؟

يا سمرية

الواحد في البلد ما يقدر يحنك معاكم اصلو ..وشوشوكتيره ملخبته

Quote: كدي اتصلي سريع ، وبالمرة اتصلي علي عشان اسألك ياتو مواضيع النجضت دي ... ( وش شمشار )

والله لقيت شمارك تقول سوق العشره

ــــــــــــــــــــــــــ

انعام : زي ما قلته ليك في التلفون الموضوع ده سر ( وش غياااااظ)

Post: #26
Title: Re: دلالـة كـبـرى
Author: سمرية
Date: 02-12-2009, 01:16 PM
Parent: #24

يا فيصل ، الحنك دا بقى ما بشلينا فينا .. خاصة فيما يخص التلفونات ..

عندنا فيها خبرة وخيط طووويلة !

غايتو نصيحة لو داير تحنك ابعد من حنك التلفون والعربية .. وزواج فلان صاحبك

Quote: والله لقيت شمارك تقول سوق العشره

العشرة بتصلح المشية ...
عُشرة شنو انا شماري مستورد من اجود انواع الشمار في الصين !

بالمناسبة انعام اتصلت علي ... قبال ما تتصل عليك ( وش مادد لسانه )

Post: #30
Title: Re: دلالـة كـبـرى
Author: انعام عبد الحفيظ
Date: 02-12-2009, 01:35 PM
Parent: #26

Quote: بالمناسبة انعام اتصلت علي ... قبال ما تتصل عليك ( وش مادد لسانه )

هبة؟؟؟؟ ما ممكن تكوني شمشارة وغياظة كمان !!!

حرام علي ياخ فيصل دا لسه بيني وبينو مصالح مشتركة ياخ

Post: #36
Title: Re: دلالـة كـبـرى
Author: Faisal Elrasheed
Date: 02-13-2009, 10:19 AM
Parent: #26

Quote: بالمناسبة انعام اتصلت علي ... قبال ما تتصل عليك ( وش مادد لسانه )

كضاااابة ( وش مغيوظ)

Quote: يا فيصل ، الحنك دا بقى ما بشلينا فينا .. خاصة فيما يخص التلفونات ..

والله صدقيني ما حنك ... اسأليها كان انا بتاع حنك .. ود الصايم الحايم تحت داك شنو ( وشوش كتيره بتقرقر)

المهم...

حنكي طلعتيه ضارب .. نجيكم بالخطه ب

Post: #28
Title: Re: دلالـة كـبـرى
Author: انعام عبد الحفيظ
Date: 02-12-2009, 01:23 PM
Parent: #18

Quote: كدي اتصلي سريع ، وبالمرة اتصلي علي عشان اسألك ياتو مواضيع النجضت دي ... ( وش شمشار )

هبة لكن لقيت شمارك مبالغة لكن!!!

بعد تلفوني معاك إتأكدتي انو المواضيع نجضت؟

ربنا يستر غايتو من الحساد هههههههههه

ــــــــ
المواضيع دي صفقة تجارية يا جماعة هههههههههههه

ـــــــــــــــــــ
كدى سيبينا من المواضيع وورينا مشاركتك في الدلالة وين البوست بتاعك؟؟؟

Post: #25
Title: Re: دلالـة كـبـرى
Author: انعام عبد الحفيظ
Date: 02-12-2009, 01:04 PM
Parent: #7

Quote: انعام: التلفون وقع والارقام راحت ... اتصلي .. المواضيع نجضت

فيصل اتصلت ومافي رد

ــــــــــــــــ
جبتا لينا الشمشرجية ياخ ههههههههه

Post: #8
Title: Re: دلالـة كـبـرى
Author: azhary awad elkareem
Date: 02-12-2009, 12:18 PM
Parent: #6

يا عمك ..
بمناسبة الجماعة الناموا بالكشف ديل..

قال ليك واحد أمو ماتت أصحابو ضربو الكشف
لما أبوهو مات جاب ناس الهدف..

إنعام لك التحية..

Post: #10
Title: Re: دلالـة كـبـرى
Author: محمد عبد الماجد الصايم
Date: 02-12-2009, 12:24 PM
Parent: #8

Quote: قال ليك واحد أمو ماتت أصحابو ضربو الكشف
لما أبوهو مات جاب ناس الهدف..

أبو الزهــور يا عمكـ
هسي أنا بشاور في نفسي
عاوز أجازف البوست دا بي وضع اليد!

غايتو انعام إلا تعمل معاي
مفاوضات في الدوحــة!

هنين نحن ولا هينين؟

Post: #11
Title: Re: دلالـة كـبـرى
Author: محمد عبد الماجد الصايم
Date: 02-12-2009, 12:25 PM
Parent: #10

البوست الرايح دا حق منو يا جماعة

Post: #12
Title: Re: دلالـة كـبـرى
Author: محمد عبد الماجد الصايم
Date: 02-12-2009, 12:26 PM
Parent: #11

البوست دا سيدو منو ولا نجازفو!

يا جماعة حنكوركـ كتير ولا شنو!

Post: #16
Title: Re: دلالـة كـبـرى
Author: azhary awad elkareem
Date: 02-12-2009, 12:29 PM
Parent: #12

يا عمك جازفو..
وسجن سجن غرامة غرامة..

وبعدين ستو زولة أختنا ماعندك أى مشكلة..
أى كتاحة تقوم بنتدخل وبنجيب ليها الأجاويد..

بس بلاى عشان الونسة تحلوة وكدة جيب لينا معاك (الرهط)
ولو ما لقيتهم ممكن نتعوض الله (بالباقين)

Post: #34
Title: Re: دلالـة كـبـرى
Author: انعام عبد الحفيظ
Date: 02-12-2009, 02:06 PM
Parent: #12

Quote: البوست دا سيدو منو ولا نجازفو!

يا جماعة حنكوركـ كتير ولا شنو!

ديل يا ود الصايم بكونوا الناس البجي يكتبوا مواضيع

ويمشوا يختفوا فترة ويجوا جاريين يلاحقوا في المداخلات

Post: #33
Title: Re: دلالـة كـبـرى
Author: انعام عبد الحفيظ
Date: 02-12-2009, 02:02 PM
Parent: #11

Quote: البوست الرايح دا حق منو يا جماعة

ود الصايم هوووووي رايح شنو

أمنع الشغب ياخ (وش أخدر مدووووور)

Post: #47
Title: Re: دلالـة كـبـرى
Author: انعام عبد الحفيظ
Date: 02-14-2009, 09:58 AM
Parent: #11

Quote: البوست الرايح دا حق منو يا جماعة

رايح؟؟؟؟ هههههههههههه

ود الصايم بالله خلي الإشاعات المغرضة دي

وساعدنا جيب لينا بوست سمح ياخ

Post: #17
Title: Re: دلالـة كـبـرى
Author: انعام عبد الحفيظ
Date: 02-12-2009, 12:30 PM
Parent: #10

Quote: غايتو انعام إلا تعمل معاي
مفاوضات في الدوحــة!

هنين نحن ولا هينين؟

ود الصايم؟؟؟؟؟هههههههههههههه

بعملها بعملها لكن مافي الدوحة ياخ

بشاور المستشارين بتاعني وبرجع بقول ليك وين

ـــــــــ
ريحتني ياخ بالمفاوضات دي الواحد يلقى ليهو

مساعد رئيس في صمة خشمو هههههههههههههه

ــــــــــــــــــ
ود الصايم إلتزم بشروط الدلالة أول وما تجي يدك فاضية ياخ

Post: #13
Title: Re: دلالـة كـبـرى
Author: omer osman
Date: 02-12-2009, 12:27 PM
Parent: #8

ممكن اشارك ؟

هكذا قال احد المتصلين على برنامج في التلفزيون والبرنامج على الهواء مباشرة فما كان من المذيع الظريف

الا وان يقول لهو (طيب متصل ليه لو ماعاوز تشارك)

بالمناسبة ممكن نشتري ؟

Post: #42
Title: Re: دلالـة كـبـرى
Author: انعام عبد الحفيظ
Date: 02-13-2009, 10:26 PM
Parent: #13

Quote: بالمناسبة ممكن نشتري ؟

يا عمر عشان تشارك او تشتري عليك

تجيب عدد واحد بوست بالمواصفات المذكورة

وفي إنتظارك

Post: #14
Title: Re: دلالـة كـبـرى
Author: محمد أبوالعزائم أبوالريش
Date: 02-12-2009, 12:27 PM
Parent: #8

Quote: ملحوظة (2): لا تقبل بوستات مهكرة

أخخخخخخخخ .... كدة ما ظبطت!

طيب البلاوي العندنا دي نوديها وين؟

Post: #20
Title: Re: دلالـة كـبـرى
Author: Faisal Elrasheed
Date: 02-12-2009, 12:40 PM
Parent: #14

ود الصايم

انا اكتشفته انو عندك نظره توسعية امبرياليه واستعماريه مما يؤدي لاستعمال النظرية الاحتلالية

ههههههههههههههه

ـــــــــــــــــــــــــــــ

امرق من البوست ياعمك قبل ما يجوك اليونميد

Post: #21
Title: Re: دلالـة كـبـرى
Author: Muna Khugali
Date: 02-12-2009, 12:40 PM
Parent: #14

نعومي..

انا عندي مائده مستديره قديمه شويه..
غير المائده المستديره السودانيه ديك..
وعندي 5 كيزان المونيوم..
وعندي راديو فيه مسجل من زمن البساطه والاصرار علي الاتقان داك..مخزنه فيهم المعلومات..

كدي خليني افتش في شنو تاني وارجع ليك..

غير كده اقبلي حاجاتي دي في الدلاله..

Post: #51
Title: Re: دلالـة كـبـرى
Author: انعام عبد الحفيظ
Date: 02-14-2009, 10:56 AM
Parent: #21

Quote: انا عندي مائده مستديره قديمه شويه..
غير المائده المستديره السودانيه ديك..
وعندي 5 كيزان المونيوم..
وعندي راديو فيه مسجل من زمن البساطه والاصرار علي الاتقان داك..مخزنه فيهم المعلومات..

دي كلها عناوين بوستات يا منى؟؟؟؟ هههههههههههه

تعالي لينا ويدك فيها بوست دسم من النوع الإنتي عارفاهو داك

Post: #46
Title: Re: دلالـة كـبـرى
Author: انعام عبد الحفيظ
Date: 02-14-2009, 09:38 AM
Parent: #14

Quote: Quote: ملحوظة (2): لا تقبل بوستات مهكرة

أخخخخخخخخ .... كدة ما ظبطت!

طيب البلاوي العندنا دي نوديها وين؟

ابو الريش بالله بوستاتك دي بعيد بعيد ههههههههههه

نحنا حددنا مواصفات البوستات وقلنا غيرها ما بيلزمنا

كدى اعمل مراجعة سريعة للمنبر وأكيد ح ترجع لينا ويدك فيها بوست دسم

Post: #31
Title: Re: دلالـة كـبـرى
Author: انعام عبد الحفيظ
Date: 02-12-2009, 01:43 PM
Parent: #8

Quote: بمناسبة الجماعة الناموا بالكشف ديل..

قال ليك واحد أمو ماتت أصحابو ضربو الكشف
لما أبوهو مات جاب ناس الهدف..

ههههههههههههههههههههه مبالغة لكن

Quote: إنعام لك التحية..

أزهري تحيتك ما بناباها لكن الفيك إتعرفت

يا جاعة طلعتونا من موضوع البوست ياخ

عايزين نشتغل ونجمّع للدلالة يا جماعة

Post: #19
Title: Re: دلالـة كـبـرى
Author: انعام عبد الحفيظ
Date: 02-12-2009, 12:36 PM
Parent: #6

Quote: عندي بوست كشف ما جايب حقو!
الجماعة زاغـــو بالكشف بتاعو

ود الصايم جيب بوست المشاركة في الدلالة

وبعدين تعال جيب البوست الزاغو بكشفو الجماعة

بس ما يكون الجماعة ديل (تمبس) ههههههههه

Post: #22
Title: Re: دلالـة كـبـرى
Author: azhary awad elkareem
Date: 02-12-2009, 12:41 PM
Parent: #19

سمرية لكن ما بتبالغى فى الشمشمرة(وجه متشمشر برضو)..
أها قلتى لى المواضيع نجضت..
يا سلام ياخ ..
والله الواحد لما إتكيف من الحكاية دى..
مع إنو مع عارفين المواضيع شنو ولا نجضت متين ولا نجضت كيف..

Post: #23
Title: Re: دلالـة كـبـرى
Author: omer osman
Date: 02-12-2009, 12:46 PM
Parent: #22

Quote: انا عندي مائده مستديره قديمه شويه..
غير المائده المستديره السودانيه ديك..
وعندي 5 كيزان المونيوم..
وعندي راديو فيه مسجل من زمن البساطه والاصرار علي الاتقان داك..مخزنه فيهم المعلومات..

مني + انعام

اشترينا بالجملة وعلى اعلي سعر في الدلالة.

Post: #29
Title: Re: دلالـة كـبـرى
Author: سمرية
Date: 02-12-2009, 01:32 PM
Parent: #23

Quote: وعندي 5 كيزان المونيوم..

5 كيزان مرة واحدة يا منى ؟؟

كر علي ، ومن بتين الكلام دا ؟

وقاعدين معاك في حوش واحد .. ؟

لا حوووووولا يا منى ، غايتو ما قايلاك كدا ، والله قوية !

5 كيزان ... الله يعينك .. بس ما اظن تلاقي زول يشتري ..

قدام ولا جداد ؟

وما تقولي لي الالمونيوم مدتو منتهية زاتو ،

غايتو لو سمعتي نصيحتي حاولي تتخلصي منهم قبل الاسبوع الجاي ... دا لو سمعتي نصحيتي !

وازيك ياخ

Post: #48
Title: Re: دلالـة كـبـرى
Author: osman righeem
Date: 02-14-2009, 10:25 AM
Parent: #29

Quote: غايتو لو سمعتي نصيحتي حاولي تتخلصي منهم قبل الاسبوع الجاي ... دا لو سمعتي نصحيتي !

غايتو نصيحة هبه دي جليها
ديل بعد اسبوع اسبوعين
حيكونو صنف نادر و منقرض
يجب المحافظه عليه
ويمكن يعملوا ليهم محميه ( كوشه )طبيعية

Post: #64
Title: Re: دلالـة كـبـرى
Author: انعام عبد الحفيظ
Date: 02-15-2009, 09:58 AM
Parent: #23

Quote: مني + انعام

اشترينا بالجملة وعلى اعلي سعر في الدلالة.

يا عمر ما تستعجل ياخ البيع لسه ما بدأ

Post: #27
Title: Re: دلالـة كـبـرى
Author: سمرية
Date: 02-12-2009, 01:23 PM
Parent: #22

ازهري يا صديقي ...

كان شوووفت انعام اتصلت وقالت المواضيع نجضت تب ، بس محتاجين زول ينزلها من النار ...

لانها سخنة شديد ،، تقدر تساعد ؟؟

نجضت متين ما مشكلة ، نجضت كيف ما مشكلة ..

المشكلة انبوبة الغاز الكملت دي ؟؟

بالمناسبة المواضيع حسب ما عرفت من انعام ياها البوستات ديييك ذاتها ..

Post: #32
Title: Re: دلالـة كـبـرى
Author: الطيب شيقوق
Date: 02-12-2009, 01:57 PM
Parent: #27

انعام

وانا عندى بوست بعنوان السمحة ام ولدى اها رايك انساني ولا سياسي يعني ممكن اصرو واتلهم بيهو السوق؟

بختك يا انعام حيمورة اقدلي ساى ليلة القدر جاتك عدييييييل. تاني زولا مريض ما بتشحدى ليهو فد مداخلة واحدة من بوستاتك الانسانية الكتيرة دى تغطى تكاليف زراعة كليتين .

انعام انا عندى ظن انت ذاتك بتغني وبتشتتي من المنبر العام ذاتو

طيب عندى سؤال واحد بس لو امكن

الدلالة كم يوم وهل ممكن احتساب اى بوست انساني جديد قبل قفل المزاد؟

Post: #35
Title: Re: دلالـة كـبـرى
Author: khaleel
Date: 02-12-2009, 02:09 PM
Parent: #32

نعومي

المنبر الليلة كله

اوكامبو سيجارة جنبو

غايتو داليا حافظ فكت الاحتقان ببوست لذيذ

شوفيهو لينا بكم

وزي ما قال ادروب (اسمع بوستك دها تبيع)

Post: #62
Title: Re: دلالـة كـبـرى
Author: انعام عبد الحفيظ
Date: 02-15-2009, 09:54 AM
Parent: #35

Quote: غايتو داليا حافظ فكت الاحتقان ببوست لذيذ

شوفيهو لينا بكم

كدى اول جيب لنك البوست يا خليل عشان نشوفوا

مع إني عارفه بوستات داليا بتجيب

Post: #60
Title: Re: دلالـة كـبـرى
Author: انعام عبد الحفيظ
Date: 02-15-2009, 09:14 AM
Parent: #32

Quote: وانا عندى بوست بعنوان السمحة ام ولدى اها رايك انساني ولا سياسي يعني ممكن اصرو واتلهم بيهو السوق؟

كدى يا ود شيقوق جيب البوست هنا اول

Quote: الدلالة كم يوم وهل ممكن احتساب اى بوست انساني جديد قبل قفل المزاد؟

لما قلت بوستات إنساني لم أقصد البوستات التي تنادي

بمساعدة الغير من المرضى وذوي الحاجات

قصدت بوستات بها مواضيع تضيف لنا ولإنسانيتنا مزيد من المعرفة

والدلالة مستمرة وليس لها زمن محدد

تحياتي يا الطيب

Post: #37
Title: Re: دلالـة كـبـرى
Author: Faisal Elrasheed
Date: 02-13-2009, 10:23 AM
Parent: #27

Quote: بالمناسبة المواضيع حسب ما عرفت من انعام ياها البوستات ديييك ذاتها ..

ما قلته ليك ... الشغل ده تقيل الا يكون عندك عضوية في جمعية الشمشارين الملكية حتن تعرفيه

ــــــــــــــــــــــــــــــــــــــــ

هبيش : وين ود الصايم ... الواحد يعمل العمله ويزوغ .... جهجتونا ظاتو

Post: #38
Title: Re: دلالـة كـبـرى
Author: Faisal Elrasheed
Date: 02-13-2009, 10:27 AM
Parent: #22

Quote: سمرية لكن ما بتبالغى فى الشمشمرة(وجه متشمشر برضو)..
أها قلتى لى المواضيع نجضت..
يا سلام ياخ ..
والله الواحد لما إتكيف من الحكاية دى..
مع إنو مع عارفين المواضيع شنو ولا نجضت متين ولا نجضت كيف..

يا ابو الزهور

صدقني سمرية دي حا توديك التوج ... ما سمعته المثل البقول( خذو الشمار من افواه ايه؟؟ طبعا كلك نظر) مثل صيني
يلا ارجع للايه ديل عشان تستلمه ناااعم هههههههههه

ـــــــــــــــــــــــــــــ

عندي تلاجه بتشتغل بالجاز للبيع؟؟

Post: #39
Title: Re: دلالـة كـبـرى
Author: طارق جبريل
Date: 02-13-2009, 10:41 AM
Parent: #38

يا انعام كيفنك
عايز ابيع البوست دة بي راس مالو

مرات اقول ديهو كلمة تزعلو..

Post: #40
Title: Re: دلالـة كـبـرى
Author: ناهد بشير الطيب
Date: 02-13-2009, 10:51 AM
Parent: #39

الا ون

الا دو

الا ترى

Post: #41
Title: Re: دلالـة كـبـرى
Author: osman righeem
Date: 02-13-2009, 02:00 PM
Parent: #40

انا عايز اشتري بوستات بقال
قبل ما يتلم علي بورداب الخرطوم
اكلة اللحوم
اما بوستات بقال بعد زيارة الفاشر
معية الرئيس ما تلزمني

يلا يا سيد الدلاله
بللا ممكن تعمل يافطه احذروا النشالين

Post: #43
Title: Re: دلالـة كـبـرى
Author: أحمد الشايقي
Date: 02-14-2009, 07:24 AM
Parent: #41

أنعام يا انعام,

كيفك يا زولة انتي

البوسـت دا في الرســوم مدفوع مقدماً,

إهــداءات العيــــد ( حبـــي القديـــم)

لغاية ما اجيب ليك بوست الدلالـة

سجلونا يا ناس وأدونا رقـم

أحمد الشايقي

Post: #74
Title: Re: دلالـة كـبـرى
Author: انعام عبد الحفيظ
Date: 02-16-2009, 12:42 PM
Parent: #43

Quote: سجلونا يا ناس وأدونا رقـم

احمد الشايقي سلامات

انت من اوائل الناس المسجلين في الدلالة

ومنتظرين مشاركتك معانا

Post: #73
Title: Re: دلالـة كـبـرى
Author: انعام عبد الحفيظ
Date: 02-16-2009, 10:44 AM
Parent: #41

Quote: انا عايز اشتري بوستات بقال

رغيم!!!

بوستات بقال لكن هي داخلة معانا في الدلالة؟؟؟

غايتو لو بوستاتو السياسية ما معانا

بس لو زي دا ممكن ندخلو الدلالة

شرح بالتفصيل كيف تحمل اغنية وتضعها بالمنبر ؟؟ ادخل هنا اتعلم !!!

Post: #72
Title: Re: دلالـة كـبـرى
Author: انعام عبد الحفيظ
Date: 02-16-2009, 10:24 AM
Parent: #40

Quote: الا ون

الا دو

الا ترى

ناهد!!!!

تكوني قاصد الكلام الفوق دا على بوستيك دا؟؟؟

لأنو دخل الدلالة عندنا ههههههههههههههه

السر شنو البيخلى الجماعه البيقعدوا فى الحدائق اتنين ات...وا... فى النجيله كده

Post: #68
Title: Re: دلالـة كـبـرى
Author: انعام عبد الحفيظ
Date: 02-15-2009, 12:33 PM
Parent: #39

Quote: يا انعام كيفنك
عايز ابيع البوست دة بي راس مالو

مرات اقول ديهو كلمة تزعلو..

معقول يا طارق ياخ !!!

دا بوست بجيب جيب هههههههه

أصبر عليهو بس

Post: #52
Title: Re: دلالـة كـبـرى
Author: انعام عبد الحفيظ
Date: 02-14-2009, 11:51 AM
Parent: #22

Quote: سمرية لكن ما بتبالغى فى الشمشمرة(وجه متشمشر برضو)..
أها قلتى لى المواضيع نجضت..
يا سلام ياخ ..
والله الواحد لما إتكيف من الحكاية دى..
مع إنو مع عارفين المواضيع شنو ولا نجضت متين ولا نجضت كيف..

يا أزهري غايتو شمشرتكم بالطريقة دي

ح تودي بوستينا دا شمار في مرقة ساي

عالم صعبة وجنها شمشرة ونجاض مواضيع هههههههههههه

Post: #53
Title: Re: دلالـة كـبـرى
Author: انعام عبد الحفيظ
Date: 02-14-2009, 11:55 AM
Parent: #52

يا جماعة شوفوا البوست دا وقدروا براكم

والتحايا موصولة لـ عامر تيتاوي والمتداخلون معه في البوست

ليل الشجن والشوق فى الغنا السودانى

Post: #44
Title: Re: دلالـة كـبـرى
Author: هيثم درار
Date: 02-14-2009, 08:19 AM
Parent: #1

Quote: ملحوظة (1): تقبل بوستات مأرشفة
ملحوظة (2): لا تقبل بوستات مهكرة

يعنى ممكن البوستات المخورة

انا عندى كمية من البوستات فى الخور ينفع؟؟؟

Post: #45
Title: Re: دلالـة كـبـرى
Author: Yassir Bainwi
Date: 02-14-2009, 09:36 AM
Parent: #44

انعام سلام
Quote: بشاور المستشارين بتاعني وبرجع بقول ليك وين

انا بصفتي كاحد المستشارين حقنك بقول ليك ود الصايم ما دايرين معاهو ايي تفاوض
لا في الدوحة ولا ابشي ولا ابوجا زاتو
خليهو يجري لاوكامبو لوعايز نحن غايتو ما ساعلين فيهو

( وجه جنو صواطة التقول ع . ع )

Post: #49
Title: Re: دلالـة كـبـرى
Author: omer osman
Date: 02-14-2009, 10:42 AM
Parent: #45

Quote: يا عمر عشان تشارك او تشتري عليك

تجيب عدد واحد بوست بالمواصفات المذكورة

وفي إنتظارك

عاوز اشتري بوست (اعدام ضابط شرطة في الخرطوم)

Post: #50
Title: Re: دلالـة كـبـرى
Author: tmbis
Date: 02-14-2009, 10:54 AM
Parent: #45

لله يا محسنين ..
لله ..
(ساعدوووونا يا جماعة)
أنعام ..
( ست الريد ) ...( بقت نساية )
البوست دا عزيز جدا علي .. بدليهو لي بي بوست رايح مني اسمو ( حصــريا في أغسطس ).
بالعدم.. بدليهو بي (عـدة) لو في أمكانية ..
بالعدم خالص .. بدليهو بي محمد الصايم ..

ملحوظة:
نحن لا نبيع القلوب .. ولا نستبدل الريد .. لكن الله في ..

Post: #54
Title: Re: دلالـة كـبـرى
Author: Faisal Elrasheed
Date: 02-14-2009, 12:13 PM
Parent: #50

Quote: (ساعدوووونا يا جماعة)

تمبس ياخ انت زول عجيب .. العبارة دي والله لقد اثارت في شجونا وزكريات
تذكرت ونحن نسير كالسيل الجارف خارجين من الجامعة قبل المغيب
سائرين في جماعات وركبانا وكأنها مظاهرة سلمية(طبعا)
فعندما نصل الي تقاطع شارع الجمهورية وقاعة غردون يبدأ السيل في الدخول الي ذلك الشارع الضيق
والذي يؤدي الي ميدان القبه الخضرا(الامم المنتحرة سابق)

طبعا انت عارف الكبسيبة حقت ناس النيلين.. الناس كلها ماشه ورا بعض
وهم يوسوسن مع الجكس.. ولمن ترخي اضانك تلقي ده يحنس وداك يحنسوهوا .. وديك مقفله القزاز ..وفي النوع اللماها الشارع بس مع العالم ديل ..

المهم

ساعدوووونا يا جماعة دي كنت بسمعه عند الاقتراب من موقف امدرمان القديم
جنب الجامع الكبير
كانت ترددها فتيات صغيرات او كبيرات لغاية الليله انا ما عارف اعمارهم .. لانه اشكالهم مقارنه مع اصواتهم واصرارهم
بتديك انطباع مخلوط (دي ما تحكها معاي شديد)

المهم كانت اصواتهم متشابهة وكأنهن مدربات عليها .. واخريات يحملن اطفالا دائما هم من المعوقين اوالمصابين بالشلل او هكذا بدا لي

لا ادري هل من كن يحملنه علي حجورهن أهم اولادهم ام اخوانهم ام ماذا؟؟
المهم
كان الصوت مؤثرا وقويا يعتصر القلب

ثم تقوم جحافل المودعين بتوصيل الجكوس الي الموقف والاطمأنان علي انهن وجدن كراسي في تلك البصات المكتظه
ومن ثم الوداع الحار وكأنك لن تري من ودعتهم مره اخري ذلك بعد ان تدس في يد الكمساري حفنة من الفكة ولا تنسي ان تشير لها بأنك قد غطيت تكاليف الرحله ( قايل نفسه قطع ليها فرست كلاس في البريتش ايرويس)

وتجد المتكبكبين ينتظرون مغادرة البص او الحافله.. ومنهم من يجازف ويتم جميله ويصل لحدي الثورات مقدما لا موصلا
وكنت اعرف صديقا يصل حتي الثوره 18 وهو يسكن الامتداد مربع... ويعود اخر الليالي منهكا من التقديم والونسه حتي اصبح يعرف كل كماسرة خط امدرمان وما جاورها

ــــــــــــــــــــــــــــــ

يا اخوانا معليش كان شطحته... كنت داير اتمطه في الموضوع لكن تمبس شايفه حمر لي

كمان عندي ليك حصريا: شمار ناس المورده في النيلين والمشكوشين والمشوكشات هههههههههه

Post: #55
Title: Re: دلالـة كـبـرى
Author: مريم عزالدين صديق
Date: 02-14-2009, 01:48 PM
Parent: #54

انعام الحبيبة

كل سنة وانتى طيبة

وكل عيد حب ونظل احباب

جيت اسلم وبرجع ليك

Post: #56
Title: Re: دلالـة كـبـرى
Author: خالد ماسا
Date: 02-14-2009, 02:26 PM
Parent: #55

طق خاااص

الوريفه انعام

كل سنة وانتي طيبة

ده بوست .....

Post: #57
Title: Re: دلالـة كـبـرى
Author: انعام حيمورة
Date: 02-14-2009, 02:45 PM
Parent: #56

انا عايزة أبيع وبدفع تأمين 2%

دا التأمين

كيف تكتشف وتعالج السرطان - رسالة ايميل

والبوست العايز البيع عندي و اتنين لو دفعوا كويس ببيع ليهم ..

منى خوجلي ...

و

ناهد بشير الطيب ..

نساء في ذاكرة المنبر .... التقيتهم بالمحبة

نعومتي كل سنة وانتي طيبة وحقك برة ...

Post: #58
Title: Re: دلالـة كـبـرى
Author: azhary awad elkareem
Date: 02-14-2009, 03:06 PM
Parent: #57

Quote: وكنت اعرف صديقا يصل حتي الثوره 18 وهو يسكن الامتداد مربع

والله يا فيصل الرشيد عادى..نحنا كان عندنا ناس ساكنين برى بيوصلوا معاهم ناس أمدرمان فى طريقهم..

Post: #59
Title: Re: دلالـة كـبـرى
Author: Faisal Elrasheed
Date: 02-15-2009, 08:26 AM
Parent: #58

Quote: ..نحنا كان عندنا ناس ساكنين برى بيوصلوا معاهم ناس أمدرمان فى طريقهم..

ازهري

كان كده اخير ناس الامتداد

ـــــــــــــ

وين اسياد البوست

Post: #61
Title: Re: دلالـة كـبـرى
Author: الطيب شيقوق
Date: 02-15-2009, 09:25 AM
Parent: #59

Quote: لما قلت بوستات إنساني لم أقصد البوستات التي تنادي

بمساعدة الغير من المرضى وذوي الحاجات

مسكينة انعام حيمورة انا فاكر تجي الاول لكن بت عبد الحفيظ حسادة ساااى سوتك الطيش

لكن يا بت حيمورة بيني وبينك عجبتني ليك عشان كل مرة شابكاني عمو عمو

Post: #77
Title: Re: دلالـة كـبـرى
Author: انعام عبد الحفيظ
Date: 02-16-2009, 01:58 PM
Parent: #55

Quote: انعام الحبيبة

كل سنة وانتى طيبة

وكل عيد حب ونظل احباب

جيت اسلم وبرجع ليك

لكِ كل الحب يا مريوم يا صديقتي العزيزة

Post: #63
Title: Re: دلالـة كـبـرى
Author: tmbis
Date: 02-15-2009, 09:54 AM
Parent: #54

يعني يا انعام ما لقيتي لينا البوست دا ..؟
..
يا فيصل ,, والله تخيل لما كتبت الجملة دي جاتني ليك نفس المحلات القلتها دي .. .. ونفس الأصوات .. لكن ما كنت قايل انو في زول بقدر ينقش المسالة دي ..
بلاي كنت بتقدم برضو .. والله فعلا العالم اصبح قرية صغيرة ..

Post: #65
Title: Re: دلالـة كـبـرى
Author: حمور زيادة
Date: 02-15-2009, 10:08 AM
Parent: #63

يا انعام ..
مطلوب بوست في حدود صفحتين بعنوان طارد للشنبات لكنو مليان جكس من جوه و فيو خاصية الوجوه الضاحكة و القلوب النابضة*
مستعد للدفع كاش

ــــــــــــ
*الافضلية لبوستات الصفحة الخمستاشر من المنبر لزوم الاختباء من الحاقدين

Post: #66
Title: Re: دلالـة كـبـرى
Author: ALZOLZATOO
Date: 02-15-2009, 10:21 AM
Parent: #63

العزيزة انعام

انا عندي بوستات بيت عذابة بس مافي حاجة بتشبه التانية كل ملاية لونها براهو وكل سرير حديدو براهو

والصحن مطفق والحلة لونها كالليل البهيم ، لكن بضمن ليك الجودة والقوة وبديك ضمان تلاته شهور مع حسن

الاستعمال والتصرف ، اها تشتري ولا نجيب العسكري

بس حاسبي من الحاجات المباعة في الدلالة دي مرات بتكون مسروقة ومرات ضاربة

مرة من المرات زمان كان في دلالة تحت الشجرة في سوق الخرطوم بالقرب من فندق اراك ( دلالة البوليس ) تباع فيهو الاشياء المسروقة والتي بحوزة الشرطة ولم يظهر لها صاحب اها الحاجات كلها في الكومر والجماعة طالعين فوق وبيرفعو حاجة حاجة والناس تبدا المزاد اها وحاتك رفعو ليهم فيديو واحد قال سبعة جنيه بالجنيه القديم طبعا المهم وصل عشرين جنيه عشرين جنيه عشرين جنيه يستاهل قالوا يستاهل وضربو جرس طوالي الواحد بيمشي يستلم الحاجة من الكومر وبيجي يدفع القروش وياخد وصل اها صاحبنا ناولوهو الفيديو وكان خفيف الظاهر مافيهو اي حاجة من جوه قال ليهم ده مافيهو مكنة اها واحد من العساكر الفوق الكومر قال ليهو هو في فيديو بي عشرين جنيه لوول اها صاحبنا قام نطه من البيعه ودفعوهو 20% حقة النطة . لووول يكه

طولنا عليكم

زاتووووو

Post: #67
Title: Re: دلالـة كـبـرى
Author: Faisal Elrasheed
Date: 02-15-2009, 11:59 AM
Parent: #63

Quote: يا فيصل ,, والله تخيل لما كتبت الجملة دي جاتني ليك نفس المحلات القلتها دي .. .. ونفس الأصوات .. لكن ما كنت قايل انو في زول بقدر ينقش المسالة دي ..
بلاي كنت بتقدم برضو .. والله فعلا العالم اصبح قرية صغيرة ..

تمبس

يمين والله انا كنت مرافق سااااكت
ورفقه مأمونه كمان ... ونسه+كباية شاي مدفوعه القيمة وبث

المشكله انو في ناس كانو جادين شديد... في الحته دي

Post: #76
Title: Re: دلالـة كـبـرى
Author: انعام عبد الحفيظ
Date: 02-16-2009, 01:14 PM
Parent: #45

Quote: خليهو يجري لاوكامبو لوعايز نحن غايتو ما ساعلين فيهو

دا شنو يا ياسر أوكامبو عدييييييل كدا ؟؟؟

(وش خايف شديد) ههههههههههههه

Post: #69
Title: Re: دلالـة كـبـرى
Author: انعام عبد الحفيظ
Date: 02-15-2009, 12:40 PM
Parent: #44

Quote: يعنى ممكن البوستات المخورة

انا عندى كمية من البوستات فى الخور ينفع؟؟؟

هيثم هو بالله مع الهكر لسه في خور؟؟؟

ــــ
الإجابة قعطاً لا

Post: #70
Title: Re: دلالـة كـبـرى
Author: Faisal Elrasheed
Date: 02-15-2009, 12:45 PM
Parent: #69

Quote: قعطاً

انعام .. ده رندوك وين ده

ههههههههههههه

Post: #71
Title: ساعدونا يا جماعة
Author: محمد أبوالعزائم أبوالريش
Date: 02-15-2009, 02:19 PM
Parent: #1

فيصل الرشيد ...

Quote: ساعدوووونا يا جماعة دي كنت بسمعه عند الاقتراب من موقف امدرمان القديم
جنب الجامع الكبير
كانت ترددها فتيات صغيرات او كبيرات لغاية الليله انا ما عارف اعمارهم .. لانه اشكالهم مقارنه مع اصواتهم واصرارهم
بتديك انطباع مخلوط (دي ما تحكها معاي شديد)

المهم كانت اصواتهم متشابهة وكأنهن مدربات عليها .. واخريات يحملن اطفالا دائما هم من المعوقين اوالمصابين بالشلل او هكذا بدا لي

لا ادري هل من كن يحملنه علي حجورهن أهم اولادهم ام اخوانهم ام ماذا؟؟
المهم
كان الصوت مؤثرا وقويا يعتصر القلب

أديني الأمان وما تذكر الحكاية دي كانت سنة كم .... وممكن بعدها نعيد معاك الذكريات.

ياخ البنات ديل كأنهم دارسات علم أصوات. كانوا بيشكلوا كورال حقيقي.

______
أنا ما سمعتهم .... حكوا لي بيهم

Post: #75
Title: Re: ساعدونا يا جماعة
Author: Faisal Elrasheed
Date: 02-16-2009, 12:55 PM
Parent: #71

ابو الريش يا لذيذ

Quote: أديني الأمان وما تذكر الحكاية دي كانت سنة كم .... وممكن بعدها نعيد معاك الذكريات.

يا عمك خش شمال وما تتردد .. الكلام ده كان قبال كم سنة كده عارف (وش متغاتت)

Quote: كانوا بيشكلوا كورال حقيقي

هو كان كورال نصاح..

Quote: أنا ما سمعتهم .... حكوا لي بيهم

ده حالتو حكو ليك بيهم ... والله لكن لقيتك انس العاقب في تحليل ايدلوجية الاصوات والانفلاتات السمعية في المواقف المزدحمة

تشكرات يا حبوب