العميد يوسف عبد الفتاح يعود للأضواء عبر منصب حكومي جديد

بعد أن قضى عدة استراحة المحارب بين ليبيا والسودان، عاد العميد يوسف عبد الفتاح
إلى معانقة المناصب الحكومية مرة أخرى فعين قبل فترة في منصب لا أدري ما هو بالضبط
لكنه على شاكلة رئيس لجنة تفقيس بيض النعام أو ما شابه ذلك، وقضى في ذلك المنصب بضع
شهور، لم يجد فيها الأضواء على النحو الذي يحبه، فخرج علينا أمس عبر لقاء في قناة
الشروق بنيو لوك في منصب مستشار الوالي ورئيس لجنة ترقية السلوك الحضري..
مستشار الوالي دي عرفناها لكين لجنة ترقية السلوك الحضري دي شنو؟
وطالما كانوا عاوزين يعينوهوا مستشار لوالي الخرطوم كان أولى أن يعينوهوا مع الوالي
السابق المتعافي لزوم يكون ليهو صانع ألعاب وكده..
أشك في أن هناك لجنة تسمى لجنة ترقية السلوك الحضري لكنني أصدق أنه رئيس لهذه اللجنة
الملجنة، وما تعيينه رئيساً لهذه اللجنة الخنفشارية إلا مجرد تسخين على الخط لمنصب أكبر،
مكافأة له على صبره وإخلاصه للثورة منذ انطلاقتها قبل عشرين عاماً..
باركوا لرامبو المنصب الجديد وترقبوا معي تعيينه في منصب أرفع بعد شهور قليلة..

ودقر يا عين..
ونحن جينا وكيّة للمابينا..
وما اتعشينا وعروسكم شينة..

اخونا نصرالدين
لطالما سألت نفسي عن معني (توحيد أهل القبلة)
التي كان يرأس منظمتها يوسف عبدالفتاح في الفترة الماضية..


هل يحتاج أهل القبلة للتوحيد؟؟
أم هي تلك المناصب (الخنفشارية) ؟؟

Quote: لطالما سألت نفسي عن معني (توحيد أهل القبلة) التي كان يرأس منظمتها يوسف عبدالفتاح في الفترة الماضية.. هل يحتاج أهل القبلة للتوحيد؟؟ أم هي تلك المناصب (الخنفشارية) ؟؟

سلام يا محمد عمر
والله أول مرة اسمع بهذه المنظمة..
لكن برضو المفروض ما ننسى جهود الرجل في تلك المنظمة،
فلولاه لكنا صمنا رمضان مع ليبيا وعيّدنا الضحية مع سلطنة عمان..

يا رامبو يا اخ ما تقول حاسدنك وكده
بس يا ليت جماعتك ديل يتكرموا علينا بعضوية أي لجنة من اللجان إياها
إن شاء الله لجنة تبريد الهواء السخن أو لجنة تسخين الهواء البارد
ما فارقة معانا..

فوق علشان خاطر رامبو

لقد اثبت يوسف عبدالفتاح - بحق - انه (حزاء طمبوري ) اصلي

واضح إنو الجماعة عندهم (Dirty Game) جديد جايبينو ليهو

سؤالنا للسيد رامبو
المدينة الرياضية وصلت لحدي وين ؟؟؟؟

قايتو كان وصلت النص بنقدم اقتراح يعينوه

في رأس لجنة عشان يسقف على كدا

يا حبيب
ده مش بتاع من أراد أن تثكله أمه لكان مطارد تجار الخرفان بالهليكوبتر؟؟
كويس أن جابو بعد عيد الضحية
ياخ ده كمل جاز الهليكوبترات كلها



ياخ وين البوست بتاع يا حليل حرامية زمان؟؟
نحنا لسه منتظرين



ملحوظة:
البوست المذكور أعلاه ليس له علاقة باعادة تعيين يوسف عبد الفتاح

Quote: ودقر يا عين.. ونحن جينا وكيّة للمابينا.. وما اتعشينا وعروسكم شينة..

** ودالبشير..
** صباحك خير..
## نود أن نفيدكم أنه طبقاً لنظام وتكتيك إستراحات المُحاربين :-
** تكون العوده من الإستراحه لمنصب أعلى مماكان عليه المُحارب المُستريح وذلك لإكمال الطابق الخامس ,, أو إكمال المزرعه وجلب أبقار من هولندا..
## بعض المُحاربين المُستريحين تكون العوده بغرض تحسين وضعه الإقتصادى لتكوين خميره تساعده فى تنمية وضعه خارج البلاد غيظاً للعباد..
** شفت الكلام الواضح والمافاضح .... عشان تبطلو الحساده وماتعاينو لرجل الجداده .. والجماعه وصلوا وعشا مافى وعروسنا زينه ,, وعندنا تحت الطبع :- فتاوى يوسف عبدالفتاح لتحسين حلة المُلاح..
** مع كتاب آخر هديه مجانيه عند شراء الاول :- رامبو العظيم وهيبة التنظيم فى العهد الفخيم..
(ودام الود بيننا)
(ابو محمد فؤاد)

ياجماعة الخير براحة علي الراجل ،، ذهبت فجر هذا اليوم للمطار برفقة أحد الأشقاء تقريباً الثالثة صباحاً وعند صينية المركز الطبي الحديث جوار مبني جهاز الامن والمخابرات لم أصدق عيني عندما رأيت العميد يوسف عبد الفتاح وبرفقته عدد كبير من العمال يهذبون الشارع ويدهنون الأرصفة،، تخيلوا الثالثة صباحاً،، والله علي ما اقول شهيد..بعد توديع شقيقي في المطار رجعت للمنزل في بحري حوالي الرابعة والنصف صباحاً أملاً في الحصول علي قسط من الراحة للعودة مرة أخري للعمل (في شارع المطار)،، وللمفاجأة وحوالي الثامنة صباحاًوعند مروري بذات الشارع وجدت العميد يوسف عبد الفتاح مرةً أخري في ذات الموقع برفقة العمال وهو في أتم النشاط والحيوية (وأنا فاتح عين ومغمض الأخري) وقد إكتسبت الأرصفة حلة غاية في الجمال،، هذه مشاهدة للزملاء الأفاضل في المنبر عكستها لكم مجردة وأترك الحكم علي الرجل لكم ..
تخريمة: أتمني أن يجد الأخ نصر الدين البشير الإجابة لتساؤله حول ورئيس لجنة ترقية السلوك الحضري.. !!
تحياتي

للامانة كدة الراجل ايام ازمة العيش اول ايام الانقاذ كنا بنلقاهو من الدغش بدري حارس الافران ويشرف علي توزيع الخبز بنفسه منعا لبيعه بالسوق الاسود