قطفتو نَداكِ من حرفاً بِقالي ضنين ...

حكيتِك لي القمر والنيل

وكت إتلاقو في طيف الظِلال بي الليل

وهَجس خاطِر حفيف الدوح

وإتوسد دواخلي البوح

وبدت ربابة الأحزان تنقر في جِراح الروح

حكيتِك يا رِميش العين

ويا طَرف الصباح الزين

ويا وعداً رِِجيتو سِنين

قطفتو نَداكِ من حرفاً بِقالي ضنين

عملتَ أطياف غُناكِ ضَرا

واسيت حدي بي حد الصباح حدين

سرت رعشة تذمر ليلِك الياسمين

غِشاني نسِيم أغاني الريف

وقمر الصيف

طريق عَمران مجمَّل بي حُجا الجدات

مشيتو وريف

حكيتِك يا أمان القيف

ويا خيمة مقيل الطيف

ويا وعد الصباح الهيف

حكيتو غَمام زمن جيتِك

مع المطر البِرُقو عزاز

أسافر في الرياح الشايلة نومي خزاز

أحاحي رويحتِك الشفافة

في غيماً دعاشو رذاذ

أفتش ليك في العِينة السِيُولا هَزاز

وكت ضلت خطاي مفاز

حكيتِك يا حقيقة مجاز

حكيتِك يا أغاني لُذاذ

حكيتِك يا حنين الروح

دموع مكسورة فاقدة ملاذ

حكيتِك ...

عروة ،،،

عروة
يا أخي الله يصبحك بالخير

شعر رائع ومتميز

من الصباح فتشت لي حاجة أدخل أقراها أو أكتب فيها
والله لم أجد غير هذا الجمال

الله يديك العافية

وخليك قريب

عادل التجاني

Quote: عروة يا أخي الله يصبحك بالخير شعر رائع ومتميز من الصباح فتشت لي حاجة أدخل أقراها أو أكتب فيها والله لم أجد غير هذا الجمال الله يديك العافية وخليك قريب عادل التجاني

جانا عادل التجاني
قلنا الدنيا ما زالت بخير أهو في ناس بتقرأ وتنبسط ...
وسعيد سيدي بهذه الإطلالة الصباحية من جميل تطريزك لحرفي ..
عافاك الله من كل شر ..
وتقبل تحياتي وتقديري
عروة ،،،

يا شقيق ..

هذي الروح مرهقة ..
معلولة ولهى بالله داويها ..

ـ
أمطرنا و أروي ظمأنا ..

ــ

بالمناسبة كيفكم مع المطر ..

الشقيق دهب
تحاصرني هذه الأيام وسط هذه الأكوام من السحب ذكريات الأيام الخوالي بالزقازيق حينما كنا صحبة وأخوان نجاب ..
أواه على تفرق الشمل .. وضياع أيام كانت بالأمس بين اليدين وباتت اليوم حلماً يرجوه الغريب ..
دوماً تربطنا أمومة أرض محبة .. وموعد مع الفجر الجديد ..
:
:

يشجيني هذا البوح من هذا الشاعر عندما يقول :

( يا ليل الصب متى غده ؟ اقيام الساعة موعده
رقد السمار فأرقه أسف للبين يردده
فبكاه النجم ورق له مما يرعاه ويرصده
كلف بغزال ذى هيف خوف الواشين يشرده
نصبت عيناى له شركا فى النوم فعز تصيده
وكفى عجبا أنى قنص للسرب سبانى اغيده
صنم للفتنة منتصب أهواه ولا أتعبده
صاح والخمر جنى فمه سكران اللحظ معربده
ينضو من مقلته سيفا وكأن نعاسا يغمده
فيريق دم العشاق به والويل لمن يتقلده
كلا لا ذنب لمن قتلت عيناه ولم تقتل يده
يا من جحدت عيناه دمى وعلى خديه تورده
خداك قد اعترفا بدمى فعلام جفونك تجحده
إنى لأعيذك من قتلى وأظنك لا تتعمده
بالله هب المشتاق كرى فلعل خيالك يسعده
ما ضرك لو داويت ضنى صب يدنيك وتبعده
لم يبق هواك له رمقا فليبك عليه عوده
وغدا يقضى أو بعد غد هل من نظر يتزوده
يا أهل الشوق لنا شرق بالدمع يفيض مورده
يهوى المشتاق لقاءكمُ وصروف الدهر تبعده
ما أحلى الوصل وأعذبه لولا الأيام تنكده
بالبين وبالهجران فيا لفؤادى .. كيف تجلده )

عروة ،،،

Quote: حكيتِك يا رِميش العين ويا طَرف الصباح الزين ويا وعداً رِِجيتو سِنين قطفتو نَداكِ من حرفاً بِقالي ضنين عملتَ أطياف غُناكِ ضَرا واسيت حدي بي حد الصباح حدين

الأخ العزيز / عروه ...

تحية ملؤها التقدير والاحترام ؛؛

دعني في البداية أرحب بك معنا في هذا المنتدى الذي يجمله أخي عروه أن يرفد بأمثالكم من أصحاب الحس الصادق واليراع المعبر التريان ...

النص حقيقة في منتهى الروعة والجمال .. والمفردات مترعة بالحنية والصدق .. وأرجو الا تعتبر ما أقول مجاملة فأنا بصراحة لا أعرف للمجاملة سبيلاً في هذا المجال ...

بصراحة أخي عروه أطربني جداً هذا الشعر .. ويبدو أنه من "زول ممكون وصابر" .. زادك الله جمالاً وروعه ..

وبالله كتر لينا من زي ده ...

مع خالص حبي وتقديري ؛؛

Quote: الأخ العزيز / عروه ... تحية ملؤها التقدير والاحترام ؛؛ دعني في البداية أرحب بك معنا في هذا المنتدى الذي يجمله أخي عروه أن يرفد بأمثالكم من أصحاب الحس الصادق واليراع المعبر التريان ... النص حقيقة في منتهى الروعة والجمال .. والمفردات مترعة بالحنية والصدق .. وأرجو الا تعتبر ما أقول مجاملة فأنا بصراحة لا أعرف للمجاملة سبيلاً في هذا المجال ... بصراحة أخي عروه أطربني جداً هذا الشعر .. ويبدو أنه من "زول ممكون وصابر" .. زادك الله جمالاً وروعه .. وبالله كتر لينا من زي ده ... مع خالص حبي وتقديري ؛؛

الأخ الحبيب إدريس محمد إبراهيم
سلام وتقدير
ألف مرحب بيك وجزيل الشكر على هذه المقابلة الواجة زي ضو الرتينة ..
ويسعدني أن أجد من لا يتناول الحديث في أمر الإبداع عموماً من منظور المجاملة .. لأن القصد من الرأي والرأي الآخر هو الوصول للتجويد..
قلت لي ( ممكنون وصابر ) ..
وكيف لا ... وها أنا أعيش محنة فراق الشمل عن من أحب ؟!!
:
:

كتبت ذات مرة :

في انتظار الرجعة منتظرين وحاتك

طلة النسمة البتمسح آهة الشوق لي غلاتك

وروعة القمرة البتشعل نورها من ضو أمسياتك

ونبقى مشتاقين وحاتك

يا حنين دفقة كلامنا

المشاعر الفينا ذاتك

والأماسي الخالية منك

مشتاقة لي أيام صلاتك

ونبقى مشتاقين وحاتك

يا ربيع همس الكلام

الحروف بي لهفة جات تترجى فيك

والغناوي الفينا تسأل عن حنينا الشايلة ليك

والطيور الراحلة في ضل الغيوم لو شفتي كيف تتهاتى بيك

والمطر لملم سحابو ولى راحل عن بلاداً ماها فيك

وصادقوا الريح التولول من فراقك وتشتهيك

ورحلوا في الليل الموالفك وشالوا هم الشوق إليك

ونبقى مشتاقين وحاتك ونبقى منتظرين عينيك


عروة ،،،

Quote: ويسعدني أن أجد من لا يتناول الحديث في أمر الإبداع عموماً من منظور المجاملة .. لأن القصد من الرأي والرأي الآخر هو الوصول للتجويد..

أخي الحبيب / عروة ...

يبدو بلا شك إننا موعودين منك بالكثير المثير من جميل القول .. وقلما يجانبني الصواب في مثل هذه التوقعات ...

بمناسبة (المجاملة) أخي عروة فأود أن أقول لك إنه كان من حسن الطالع أن عملت في بداية حياتي العملية بوزارة الخارجية السودانية وكان رئيسي في المكتب الأديب المبدع / عبد القدوس الخاتم .. حيث كان له برنامج في الإذاعة السودانية اسمه (ثقافة سودانية) ... وصفحة أسبوعية في أحد الصحف اليومية بعنوان (أدب) ... أستفدت من هذا الرجل كثيراً ... ومن مقولاته التي لا أنساها لي ذات نهار (أن الأدب كالدين .. لا مجال للمجاملة فيه) ... شفت كيف بالله يا عروة روعة هؤلاء ...

Quote: قلت لي ( ممكنون وصابر ) .. وكيف لا ... وها أنا أعيش محنة فراق الشمل عن من أحب ؟!!

ياخي مالك عايز تثير فينا المواجع ... ولا أدري لماذ تذكرت الآن بعض ما كتبت (زمان يا عروه) حيث قلت:

أواه يا نبع الحنان الصافي يا مد البقاء ...
جرحي المقيم يحزني .. عشقته أوعية الدماء ...
ينمو رفات الزكريات يقص أجنحة الرجاء ...
ويحشرج الأمل الجميل .. يموت عفور الضياء ...


وحدي أنا ...
نصلاً من الحزن الزري بكبد أقنية الهناء ...
ظمأ يحدق بالسحاب الزرق يبتهل السماء ...
جرحاً طواه الذل والإلحاح أضناه إزدراء ...
يا أنت أزمعت الرحيل .. والزاد حفنة كبرياء ...



ياه يا عروة .. لقد أيقظت زكريات حميمة من ثباتها يا صديق ...

مع خالص حبي وتقديري ؛؛؛

Quote: طريق عَمران مجمَّل بي حُجا الجدات مشيتو وريف حكيتِك يا أمان القيف ويا خيمة مقيل الطيف ويا وعد الصباح الهيف حكيتو غَمام زمن جيتِك مع المطر البِرُقو عزاز

اخى العزيز عروة
اولا حبابك ويا هلا بيك وعذرا ان لم التقيك من قبل
وفى الحالتين انا الخسرانة
حكاويك غنا وغناك حجا
وبين الاتنين دفا الطيبين
وسماحة السمحين
ودعوات الزينين
عمق المفرده عندك متوسده القيف
تريانه ورويانة محنة وطيبة اهلنا القبيل
اهديك الدهشة فى قرآءة اولى لك
واكيد لى عودة باذن الله
شكرا مارقة من الجوف
لروعة ونضارة الحروف
تحياتى
اسماء الجنيد

قطفتو نداك من عينيك
ورسمك ياندي الياسمين
بحر في سكتك ممدود
بسأل مرة في نفسي
وفي روحي وفي الماشين
مكانك وين وعنوانك
ودرب الالفة ليك بي وين
وجنب اسمك كتبت اسمي
وخليت للزمان اسمين
علي نفس المكان ذاتو
أريت يا انت لو طليت
بتلقي حروفنا لللذكري
عشان تعرفنى ما اتناسيت
انا العمري مانسيتك
وبيك طول العمر غنيت ..


شاعرنا عروة يامطرة حروف
تسلم مشاعرك

هند محمد
سلام

( ليت هنداًأنجزتنا ما تعد وشفت أنفسنا مما نجد )

كتبت ليك حرفين على درب شابك
حرف مستني من باكر حنين
وحرف محتار إلملم بعضو من بابك
حكاية القول ..
طرق حرفي على بابك !!

عروة ،،،

Quote: كتبت ليك حرفين على درب شابك حرف مستني من باكر حنين وحرف محتار إلملم بعضو من بابك حكاية القول .. طرق حرفي على بابك !!

الله يسلمك ويديك العافية
وعليك انا بالخيال طليت
رسمت زمانك الليلة
كتبت حروفك الحلوات
دا لما طريتها ياحليلها
شكر محنة وتسلم حروفك

Quote: اخى العزيز عروة اولا حبابك ويا هلا بيك وعذرا ان لم التقيك من قبل وفى الحالتين انا الخسرانة حكاويك غنا وغناك حجا وبين الاتنين دفا الطيبين وسماحة السمحين ودعوات الزينين عمق المفرده عندك متوسده القيف تريانه ورويانة محنة وطيبة اهلنا القبيل اهديك الدهشة فى قرآءة اولى لك واكيد لى عودة باذن الله شكرا مارقة من الجوف لروعة ونضارة الحروف

الشاعرة أسماء الجنيد
يلا هلا ومرحب
ولزاماً علينا أن نتتبع أصدقاء الحرف أينما حلوا ..
يسكرني الحرف الشجي المترع بالحنين ..
مشيت معك رحلة شدر الهشاب لي ضل السحاب ...

( شدر الهشاب ..

اتشابا لي ضل السحاب

داير المطر ..

خايف اليباب ..

شاف ليه غيمه .. قال سراب .

ماظن تمطر كوم تراب ..

فجأة انهمر ..من غير حساب ..

بل الندى وعطر هضاب ..

بكت السماء..

رحل الرهاب

دنت الطيور من

الضباب ..

ركت تحت رسمت رحاب

رحل اليباس رحل الخراب ..

شدر الهشاب فرهد طرب

من تانى بى عودة الشباب

جدع صميغاتو ورقص..

رقصة غريب عاد للوطن بعد الغياب ) أسماء الجنيد ،،،
:
:
ما عليك .. فأنتِ عندي ..

معذورة يا مطر الندى

لو كان غناك

نازراهو شان النيل فِدى

روح الحروف من سر غمامك

لابس وشاح ريدك ِردا

وطلة الشمس البتشرق من عيونك

راجية من شرقك نِدا

شان تشوف روعة النيل المجرتق

بي شوق غناك وكوم قصايد

ممتدة في جواك مدى ..

معذورة يا مطر الندى

ومعذور معاك كل الحنين الفي غناك

البيهو حرفك كم شدا

وخليك كدا

منتظرة لي موسم تباشير الخريف

والليل إناغم رشة المطر الهِِدا

ولما الصباح أنوارو لاحت في المدى

تلقيني مستنيك مع الأمل الفَراش

ومتلفحك نسمة دعاش

ومسدار غنا رفرف مع الصمت الصدى

واتظللك غيمة فرح جابت المرح

خلت مسافة الخطوة ليك مخضرة يانعة مفرهدا

وخليك شمس خجلانة من بينات السحاب

شان تسقي عتمات الدروب بي نور هدى

واتظللك نيمة وعبير

وأشواق تطير

فرحانة بي وعد الندى

مطرانة بي مطر الندى

عشمانة في المطر البدا

واتظللك

طلة صباح لابسة الوشاح

فاردة الضفائر بي انشراح

واتظللك

هودج رحيل لي الشوف بدا

جاب الفرح لي قليب بيسأل عن حبيبتو وإنشدا

معذورة يا مطر الندى

ومعذور معاك كل الحنين الفي غناك

واتظللك في الليل نسيم

مازج سلاف نيلا حميم

قالع عبير مطرا وسيم

واتظللك

في الصيف ندى

معذورة يا مطر الندى

ومعذور معاك كل الحنين الفي غناك


عروة ،،،

Quote: وحدي أنا ... نصلاً من الحزن الزري بكبد أقنية الهناء ... ظمأ يحدق بالسحاب الزرق يبتهل السماء ... جرحاً طواه الذل والإلحاح أضناه إزدراء ... يا أنت أزمعت الرحيل .. والزاد حفنة كبرياء ...

الأخ العزيز إدريس محمد إبراهيم
سلام يغشاك
يا لروعة التصوير للوحدة
مزج بين النصل والظمى والجرح والغاية تصوير لحالة نفسية كانت تسيطر عليك ساعة ولادة هذه الكلمات ..
أزاحت هذه الأبيات الكثير عني هذا من جانب ..
ومن آخر ما خاب حدسي وأنا من أول ما رأيت حديثك عن شعري أيقنت أنك من أصدقاء الحرف فأهلاً بك ..

عروة ،،،

Quote: معذورة يا مطر الندى ومعذور معاك كل الحنين الفي غناك البيهو حرفك كم شدا وخليك كدا منتظرة لي موسم تباشير الخريف والليل إناغم رشة المطر الهِِدا ولما الصباح أنوارو لاحت في المدى

ياعروة الشفيف

ضللتنى الغيم الوريف
الكابى ضلو مع الضهر
وشحتنى خضرة خريف
رويانة مويتو من المطر
نواروا كاسى قفا الصريف
فراشو نايم فى الزهر
قدمتنى سيرة عريس
جرتق ملفح قرمصيص
سيفا مرصع بالدرر
وفرحة الام البتكبر
بى جناها الفى الحكر
وسط خالاتو يكبر
عريسا شالو اخضر
هز ضرعاتو ونتر
رصاص بنادقوالما فتر
ضوا ساحاتنا وبهر
وزغروتة الخية البتحضر
والفرحة بيك يا عروة تعمر

تسلم يا ود ملوك النيل
يعلم الله الجمت لسانى وسمرت قلمى مشدوه فى نضميك المارق من الجوف
تسلم يا السمح من البداية ويا الرزين حتى النهاية
وبجيك صاده بى مهلة
شكرا ضاوية من حروفك يا سقف الاهل
تحياتى
اسماء الجنيد

Quote: ضللتنى الغيم الوريف الكابى ضلو مع الضهر وشحتنى خضرة خريف رويانة مويتو من المطر

كان رحيلي من الغمام

يالسمحة ليك عنوان محبة

وكان رذاذي البشتهيك

بي شهقة الإلفة العليك

تلقيه شبا

وكان عشق

ما بين حنيك وبين دعاشي

طربان حد ما تأخد الكلمات

من رذاذ جواي ماشي

وحد ما إقيف الشوق

وإتعدى الحواشي

لامن أشوفك قادلة بي حس إرتعاشي

إزيد جواي خاطر ريد

أزيد الدفقة لي المطر المراشي

عشان اقدر أفك بي خصلة الشِعر إنكماشي

أنا المطر البنقط من عيونك

بي كل حنين تلقيني هاشي

وليك باشي ..

عروة ،،،

Quote: ومعذور معاك كل الحنين الفي غناك

شرف لنا ان جمعتنا بكم يوما تلك الايام الجميلة

نفاخر بك النجوم

Quote: شرف لنا ان جمعتنا بكم يوما تلك الايام الجميلة نفاخر بك النجوم

الأخ الصديق الحبيب
جلال عثمان
سلام وشوق

( عادت بك الأيامُ للنهر العجوز فهل غرست على جوانبه أشتياقك للرجوع ؟!)
تعرف يا جلال
أن عاطفة البوح للماضي والتباكي حق مشروع لكل إنسان سوي بداخله النبض الجياش حباً وتفاعلاً مع الآخرين .. بالأمس بكى امرؤ القيس واستبكى من معه .. فصارت ( الدخول وحومل ) تحرك فينا الشجن الأليم مما حدنا للبوح ذات مرة :

وذاك الليل الذي أرخي عليك سدوله بأنواع الهموم

مالي أراك اليوم في لجته تحوم

وسألت هاتيك النجوم عن هودج الحبيبة بأي صحراء يقوم

ما دلّك النجم الخواء ولا اجابتك التخوم ...

الريح هذا الليل تأتيك من كل ناحية كلوم

حزناً علي هودجٍ قسراً أحاطته السموم !!

فالحنين يا صديقي كعاطفة مجردة شيء تحتاجه الدواخل من النفوس السوية وبه تستقيم وتغسل نفسها من الهم والكدر وسادية الحياة المعاصرة .. إذاً هو الانفلات من الواقع إلى زمان عشناه في مكان ما نسيناه..

تقبل تقديري لهذا الفخر منك ..

عروة ،،،

Quote: أنا المطر البنقط من عيونك بي كل حنين تلقيني هاشي وليك باشي ..

وبى بشاشتك قمرنا طلا
وفى دريبك خيرنا هلا
ياكا انت ود فريقك
السماح خبران طريقك
والحنين دائما بريدك
بى حنانك احتويتنا
ويعلم الله كم شفيتنا
فى غناك ترياق هوانا
وفى صفاك انغام غنانا

شكرا ليك يا ود القبائل على النظم الجميل
ويا ود امى ما بقدر اجاريك
الشكر ليك نمة ودوباااااااااى

Quote: وبى بشاشتك قمرنا طلا وفى دريبك خيرنا هلا ياكا انت ود فريقك السماح خبران طريقك والحنين دائما بريدك بى حنانك احتويتنا ويعلم الله كم شفيتنا فى غناك ترياق هوانا وفى صفاك انغام غنانا

البشاشة منك وين تفوت

ساعة القمر ارسم ملامحك في البيوت

بتشابى ليك

وإتناطا ولفي الداير إجيك

كايس مقيل في ضل حروفك

ضل القمر لو عارفة كان بتضلا بيك

وحتى القمر أنوارو تسطع من وشيك

وفي الليل على رمل البيوت

تلقيني يوت

مستني من حرفك خيوط

تنسجني من جواك فرح

تسرقني من حرفك شعاع

تحملني في رمشك ضياع

تسقيني من روعة بهاك

تسكرني يوت

:
:

بتنا العزيزة لك التحية
عذراً على كل هذا الكلام الكثير
وذلك لأن الأمر عندي يكون هكذا ..

أنا ما الشعر إحساسو في أعماقي ماش

زي طولة النفس البجبدو

لامن أحسو جاي في نسمة دعاش

أو في طلة القمر البيأخد ضو من قمراً حنين جواي عاش

أنا ما الشعر وراني سر الانكماش

لامن تقوم الموية تسرق روعة الطول المطرز في قماش

وتكشف السوءة القبيل غطيتا بي الوهم المعاش

أنا ما الشعر لامن إجيني بعيشو بي كل الحواش

عروة ،،،

Quote: أنا ما الشعر إحساسو في أعماقي ماش زي طولة النفس البجبدو لامن أحسو جاي في نسمة دعاش أو في طلة القمر البيأخد ضو من قمراً حنين جواي عاش أنا ما الشعر وراني سر الانكماش لامن تقوم الموية تسرق روعة الطول المطرز في قماش وتكشف السوءة القبيل غطيتا بي الوهم المعاش

اخى العزيز الشفيف الوريف عروة

انت يادخرينا يا ود القبائل
ود اماتنا القبيل
الخيرك دوم بقالنا سايل
شارب من بطون النيل
حاشاهو طبعك ماهو مايل
جدودك اهل النوبة والتهليل
زادهم فى العلم طائل
خلاويهم ضى سواد الليل
نورهم متل البروق شايل

اخى الحنين ود بطن الامات اسعدتنى ايما سعاده ورجعتنى للزمن الجميل
والكلمه الرصينة والمعنى العميق
كنت وما زلت تبسط الدهشة امامى يوما بعد يوما
اهديك كل المعانى الجميلة
واهديك عمق الدهشة النابعه منك وليك
واتمنى ان نتواصل فى درب الكتابة الطويل
زادنا اللكمه النبيلة والاحساس الصادق والمعنى العميق
عمق اصالتنا وتراثنا الثر بمكنوناته النادرة
لك الشكر اطنان
ومزيدا من التواصل ان شاء الله
شكرا أردب محنة