قليل من الشعر للإسترخاء

تجارب شعرية قديمة من زمن الشباب والرومانسية قلنا
نشارك بيها نهدي حالة المنبر شوية

قصة غريب
..................
في ليل غريب،
فيهو القمر
سالك طريقو
علي المغيب ،
طوت النجوم
عقد الزفاف
وبدت تغيب،
نزل الظلام
سدَر لبس
توبو العجيب.
.........
قاعد وحيد....
انسان سجين
بين صبوة الذكري
وزمن كسَر
مقاديف الحنين .
.............
في ليل عجيب .......
والكون عوالم محزنة
والحزن ينتح في الوريد
الشوق جراحات مزمنة
الدمع نازل من جديد
والاهة جرعة مسكَنة
الذكريات تبدي وتعيد

وكتين خلاص
طفح اللَهيب
بديت اغيب!!!!
شفت الافق
ممتد هناك
تحت الظلام
راقد شحيب ،،،
إشتعل جواي صراع،،
هم والتياع،،،
بين الهواجس والضياع
انطلق في الريح شراع
حزني المهيب .
بديت اغيب ..!!!
بين الخيال والاحتمال
بنسج خيوطي من الرمال
وسرحت في عالم غريب!!!!
شفتك معاي في روض ظليل
في زي وشاح ابيض جميل
بديت اهيم في دنيتك
بديت احسَك زي نغم
داعب مشاعري ودوزنه
مرات احسَك زي نسيم
بدد مخاوفي وهدنه
الليلة ما جاني الربيع
طاف بصحاري ولونه
غمرني طيفك من سلام
هدهد رويحتي وطمنه

لكني يا حلمي ومناي
فجأة انكسر ايقاع هناي
ورجعت لي ليلي المريب
.................
نامت فوانيس الشوارع ،،
بين المخاوف والظنون
تاه في السكون
نبض المضارع ،،،
بين الاسي وفرط الشجون
اشتعل جمر المواجع ،،
بين الودار والانتظار
إنسان وحيد
قاعد بيحكي مع الجدار ،،
وكتين خلاص زاد اللَهيب
خرجت ببحث عن حبيب
تحت المطر
تحت الظلام
والدنيا زيف ،،،
تعب القلب
هدَ النزيف ،،،
سندت رأسي علي الرَصيف
وبكيت عليك مطر الخريف
وبكيت عليك مطر الخريف

قمر العشا
.............

وين بتلقي ....
ابكيهو يا عمري الشقي
وين بتلقي .....
قمر العشا
السابني ومشي
خلَ العيون متعطشه
شايله الدموع حرقة حشا
................
كان الوداع
يوم الضياع
موكب ضحايا والتياع
...............
ولف قليبي وفات نسي
خلاني سابح في الاسي
سارح مع طيفو المسا
......................
يوم جاني طيفو مع المنام
بإحترام قال لي سلام
مني انفرط عقد النظام
مطر الدموع سبق الكلام
حمي الغرام صلت العظام
لو شفتو كيف الابتسام
فرة بسيمو مع الظلام
كيف البرق وسط الغمام
.............................
ياعيوني من بعد الدموع
اذريه دم
يا قلبي اغرق في الالم
يا ليلي طول
علك فصول من السأم
شنو الفضل .......
بعد القمر سابني ورحل
....................
كان منيتي وشوق دنيتي
راجيه بحلم ومنتظر .
كان شمعتي
الشالت معاي
ليل دمعتي
وطول السهر .
كان كلمتي
وسر غنوتي
الضوَت دروبي
علي الشعر .
كان سلوتي
في ليل عذابي وبلوتي
ومر الاَمر.
كان لي غمام
ودعاش مطر
عزَ السموم
والدنيا حر .
كان وكان
لامن يضيق بي المكان
وقسي الصبر .
ابكيهو يا عمري الشقي
قمر العشا
وين بتلقي