لهذا يدافع هؤلاء باستماتة عن الحكومة والمؤتمر (العامل ) وطني....

الحكومة الحالية (سمك ، لبن ، تمر هندي ) وجدت مناصرة قوية لردعها صوت الشعب من جهات متعددة ولكنها في نفس الوقت (متفرقة ) . قوى تستهر بصوت (ترمومتر الثورة ) وهنا اعني من تظاهر من افراد الشعب. دافع عنها الكثيرون ولكنهم يمثلون فقط مصالحهم الشخصية .... نعم فالحكومة الآن تجاوزت عهد ( الثورة ) بعد أن تخلى عنها عرابها في مفاصلته الشهيرة . ما يجمع كل المناصرين هو مصالحهم الشخصية وطموحاتهم التي ترتبط ببقاء الحكومة . ليس هناك اي وازع اخلاقي يجعل شخصاَ سوياً يناصر حكومة لغتها العنف وشفرتها القتل وممارستها النهب المنظم . يتخندق هؤلاء المأجورون عن اول خط دفاع (يتيحه ) الوضع الرهن وهو أن الشعب قد ملّ من الاحزاب الكبيرة ولعمري هذا هو ( الهبل ) والعبط بعينه . الاحزاب ليست اشخاص كما هو الجسم الهلامي المسمى المؤتمر الوطني . الاحزاب هي افكار وخطط عمل تلبي مطالب وطموحات مختلف قطاعات الشعب وتصب في مصلحة الوطن .
لن نقل اننا سئمنا ما تقومون به (ساء ما تفعلون ) فهو يمثلكم/ن ويمثل مصالحكم/ن الشخصية سواء كان وظيفة- منصب او النفوذ والقوة الوهمية التي يوفرها بقاء هذا النظام . لن يبقى النظام اكثر مما بقى عليه ، اما عنكم/ن اقولها وبصدق (لكم في بقايا مايو بعد ثورة ابريل اسوة حسنة ) .


نواصل

لم تعد هناك مساحة لمغرر به باسم الدين او باسم الصوملة، لان فرية الدين لم تعد تنطلي علي اي احد
واصيح المواطن الامي الذي لا يجيد لا القراءة والكتابة عرضة لضحك عليه باسم الشعارات التي علي شاكلة هيي لله 0000اما الصوملة وخراب السودان فهم المسؤلون عنه اذ ان صوملة السودان ماثلة امامنا ، اذ كيف تكون الصوملة وبلد في طريقها للتقسيم ، بلد اصبحت تتناوشها القبلية من كل صوب ، والاهم من المهم هو غياب القانون وامتيازات قبيلة الحكام من اصغرهم لاكبرهم ، لذلك تجد اهل الحظوة من المنتفعين وأمراء
السلطة(علي وزن امراء الحرب في الصومال ) تجدهم يتقاطرون في نصرة الاستبداد ولن تعوذهم المبررات 000
الا ان ساعة الحساب اتية لامحالة وليس لذلك نرجوهم ركوب قطار الشعب 000والا سوف يتجاوزهم لا محالة
ولك ودي وتقديري

ايام ( التغرير ) وهي الايام التي كان الاعلام الكيزاني يتشدق في كل الساحات بالآية ( بأسهم بينهم شديد تحسبهم جميعاً وقلوبهم شتى ذلك بأنهم قوم لا يعقلون) ليصف بها المعارضة واحزاب المعارضة . الغريب الآن هذه الآية تنطبق عليهم بحذافيرها بعد التدقيق في جسدهم الهلامي المؤتمر الوطني والذي جذب اليه كل شذاذ الآفاق وطالبي السلطة والذين لا يتورعون من فعل اي شيئ للوصول الى اهدافهم ونزواتهم الشخصية . ايام التغرير كان الهدف من الدعاية المطلقة للانقلابيين وضع حاجز نفسي في المقام الأول يتم به كسب وقت حتى تدعم حكومة آنذاك اركان حكمها. اما الآن الجموع الكثيرة من ( المصلحجية ) الذين يدعمون الحكومة همهم الأول والاخير المصلحة الشخصية .

كلما زاد الخناق على الحكومة تزداد صلفاً وغرورا .. تعتقد ان (الأمن ) والجيوش المجيشة من المغفلين والمستفيدين يحمونها ولكن لعلمهم (هؤلاء ) أول من سيقفز من السفينة الغارقة. ولكن هذه المرة لن يسلم كل من لطخت يداه دماء الشرفاء من هذا الشعب او سرق مالاً او حتى تمتع بالمحسوبية ... القوائم جاهزة ..فقط في انتظار حلم الشعب الذي لن يتأخر طويلا ....

Quote: الحكومة الحالية (سمك ، لبن ، تمر هندي )

ده يا أسامة يا أخوي إسمه تكبير الوعاء ليسع مختلف توجهات الشعب

Quote: وجدت مناصرة قوية لردعها صوت الشعب

إذا قاصد الصوت الطلع في مسيرة الإثنين إثنين ،تكون بتضحك على نفسك

Quote: نعم فالحكومة الآن تجاوزت عهد ( الثورة ) بعد أن تخلى عنها عرابها في مفاصلته الشهيرة

ياهو ده تكبير الماعون القلتو ليك

Quote: ما يجمع كل المناصرين هو مصالحهم الشخصية وطموحاتهم التي ترتبط ببقاء الحكومة

Quote: جذب اليه كل شذاذ الآفاق وطالبي السلطة

Quote: الجموع الكثيرة من ( المصلحجية ) الذين يدعمون الحكومة همهم الأول والاخير المصلحة الشخصية .

البتتكلم عنهم ديل يا اخوي هم الشعب
لو الشعب كله بقى صاحب مصلحة في الحكومة ، المشكلة وين؟

إنت بتقول الشعب مع المعارضة وأنا أقول مع الحكومة
أنا دليلي المسيرة الهزيلة الطلعت، إنت دليلك شنو؟
ما تقول لي قمع وإرهاب وكلام من النوع ده
الشعب السوداني عندما ينتفض لن يأخذ الإذن من الحكومة
ولن يردعه القمع والقتل، موش كم علبة بمبان وسوط

Quote: لم تعد هناك مساحة لمغرر به باسم الدين

كلامك صحيح يا إبراهيم
خطاب الانقاذ الديني قل
وأصبح المؤتمر بوتقة تجمع كل السودانيين باختلاف مشاربهم لمصلحة واحدة هي السودان والسودان فقط

أسامة يا أخوي
أنا والله ما عندي اي مصلحة شخصية مع الإنقاذ
ولا أنادي بالدولة الدينية
أها تصننفني مع ياتو فرقة
لا أرضى أن تصنفني بالمغفل أو الما فاهم ،لأني أفهم ما يدور بدرجة كبيرة
أنا مقتنع تماماً إنو الإنقاذ هو الحل لمشكلة السودان
وإنو السودان موعود بخير وفير يطمأن أولادنا إنهم ح يعيشوا في رغد وطمأنينة وسلام
لك كل الود والتحية
آمل أن تشغل مخك لا قلبك وتفكر بروية ،وح تجينا في النهاية، إذا كنت مخلصاً لبلدك ومستقبلها

شكراً للأخ ابراهيم على ايراده بعض النقاط والتي تدعم الخط الرئيسي للموضوع .

اما اخونا الشفيع (خسارة اسمك )

فنصيحتي لك ان (تسك ) مصلحتك مع المؤتمر الوطني لأنه لك مصلحة في بقائها ..
اما عن ان كل الشعب كما ابنت انت اصبح (مصلحجي ) دي قولها لي زول ما عندو حديدة .

لو فعلا كما تقول ان الشعب يناصر الحكومة فلتدع حكومتك مسيرة واحدة لا تمجدها تخرج بدون محاصرتها بالعسس وحرس (الثورة ) .

اسلوب الضحك على الذقون لا يجدي .... حكومة لا تسمح بخروج مسيرة سلمية ..كيف لها ان تقبل بانتخابات نزيهة ....

نسيت اقول ليك اناما عندي قنبور ...
وبعدين حاول تعمل تحديث لقاعدة بياناتك مافي حاجة اسمها (الانقاذ ) في حاجة اسمها حكومة المؤتمر الوطني .

Quote: آمل أن تشغل مخك لا قلبك وتفكر بروية ،وح تجينا في النهاية، إذا كنت مخلصاً لبلدك ومستقبلها

لو كنت انت مخلصاَ لبلدك لما ساندت القتلة . اما عني فدعني في (وهمي ) .

Quote: في حاجة اسمها حكومة المؤتمر الوطني .

بل حكومة الوحدة الوطنية ....

Quote: اما عني فدعني في (وهمي )

ما ح أخليك يا أسامة يا أخوي ، عندي أمل تقلب وتجي معانا بي جاي زي ما أنا قلبت!

بعدين يا أخوي كان تشكرني برضو مع الأخ/إبراهيم، لأنو الغرض من البوست حسب ما أظن هو محاورة وإقناع من هم بالطرف الآخر

ثم إنت ما رديت على نقاطي دي:

Quote: إنت بتقول الشعب مع المعارضة وأنا أقول مع الحكومة أنا دليلي المسيرة الهزيلة الطلعت، إنت دليلك شنو؟ ما تقول لي قمع وإرهاب وكلام من النوع ده الشعب السوداني عندما ينتفض لن يأخذ الإذن من الحكومة ولن يردعه القمع والقتل، موش كم علبة بمبان وسوط

ورجعت تعيد في إسطوانة المعارضة المشروخة بتاعة قمع المسيرة وخلافه
سؤال:
ألم يكن الغرض من المسيرة هو إسقاط الحكومة؟
وكيف تصرح حكومة لمسيرة هدفها إسقاطها وكمان تحميها؟
وياتو معارضة البتستأذن الحكومة في الخروج بانتفاضة؟

لك الود إخي

الشفيع اخوي

كيف حالك، ومبروك القلبة، تصدق دي اول مرة اشوف واحد يهنوه عشان اتقلب، غايتو زمان كنا بنهني البقلب هوبة،، علي العموم عندي حاجة محددة عاوز ارد عليها وهي:

Quote: ألم يكن الغرض من المسيرة هو إسقاط الحكومة؟

اولا الكلام ده ما صحيح، الهدف المعلن لمنظمي المسيرة، والذي عبر عنه السيد / باقان اموم، هو تقديم عريضة للبرلمان لأجازة القوانين المعلقة،،، لو عندك معلومة اكيدة عن انو الهدف كان اسقاط النظام، الحقنا بيها سريع

مودتي

كيفك يا المنصوري يا أخوي
كدي مر على البوست ده ولو ما كفاك بنزيدك
اخيرا الحزب الشيوعي يعترف بان الهدف هو اسقاط النظام (يوجد مستند)

ما تقلب معانا يا زول
زي ما كان دالي بقول "الناس النضاف في الآخر كلهم ح يجونا"
منتظرنك
تحياتي

الشفيع اخوي

سلامات:

Quote: ما تقلب معانا يا زول

وهل يختلط الزيت بالماء ؟؟

Quote: زي ما كان دالي بقول "الناس النضاف في الآخر كلهم ح يجونا"

عشان كده انا عشمي فيك اصلو ما انقطع

محبتي

(الأخ ) الشفيع

Quote: ألم يكن الغرض من المسيرة هو إسقاط الحكومة؟ وكيف تصرح حكومة لمسيرة هدفها إسقاطها وكمان تحميها؟ وياتو معارضة البتستأذن الحكومة في الخروج بانتفاضة؟

حكومتك دي موش قالت عاوزة انتخابات ديمقراطية ؟ اها الديقراطية دي عندها ممارسات يعني ما بتعزل منها الدايرو وتخلي الما دايرو .. المسيرة ممارسة للديقراطية وسؤالك التاني لو الحكومة فعلا عندها اخلاق بتشوف الناس دي دايرة شنو وبعدين بترد عليهم موش تمنعم من الاساس من ابداء رأيهم . الديمقراطية ليست فقط صناديق اقتراع .

وبعدين انت (قلبت ) من وين يا كافي البلاء ؟

اما عني فكما قلت لك دعني في (وهمي ) . انا ما بفكر في روحي بس بفكر في الناس الغلابة الما لاقية تأكل ولا تشرب (الا تبقى مؤتمر وطني ) .

البديل البديل

وين؟

Quote: البديل البديل وين؟

الانتخابات دي لشنو ؟ شوف البنفع معاك .

Quote: انا ما بفكر في روحي بس بفكر في الناس الغلابة الما لاقية تأكل ولا تشرب (الا تبقى مؤتمر وطني ) .

طيب ما تبقى مؤتمر يا أسامة
الوعاء كبير ويسع الكل

الأخ اسامة سلامات

Quote: خطاب الانقاذ الديني قل وأصبح المؤتمر بوتقة تجمع كل السودانيين باختلاف مشاربهم لمصلحة واحدة هي السودان والسودان فقط أسامة يا أخوي أنا والله ما عندي اي مصلحة شخصية مع الإنقاذ ولا أنادي بالدولة الدينية أها تصننفني مع ياتو فرقة لا أرضى أن تصنفني بالمغفل أو الما فاهم ،لأني أفهم ما يدور بدرجة كبيرة أنا مقتنع تماماً إنو الإنقاذ هو الحل لمشكلة السودان وإنو السودان موعود بخير وفير يطمأن أولادنا إنهم ح يعيشوا في رغد وطمأنينة وسلام لك كل الود والتحية

أرجو أن تسمح لى بأن أقول لك انك فعلاً ما فاهم

ارجو أن تشير الى أى نجاح حققته الانقاذ فيما يخص الانسان السودانى

كما ارجو الا تنظر للبنايات والكبارى والطرق التى انشئتها الانقاذ وتقول لى ما شايف الا نجازات

أظنك توافقنى بأن عموم الشعب السودانى ما زالت تحت مظلة الفقر والجهل والبطالة

تدنى التعليم وازدادت الأمراض من ملاريا وفشل كلوى وسرطانات وايدز عافاك الله

ما زالت مئات الآلاف من المواطنين مشردين من غير مأوى فى دارفور وغيرها

شبح الانفصال ما زال يهدد الجنوب

وما زال القمع والارهاب هو ديدن النظام

بيع الاراضى للمستثمرين من غير أى شفافية والمحسوبية ساعد فى تفاقم الازمة

وانت كمغترب أنا على يقين بأنك مهما أمتلأت حقائيبك من الدراهم والدولارات

تظل عاجزاً عن مواجهة غلاء الأسعار وأيضاً تعانى من الجمارك والضرائب

كما أرجو أن تتذكر بأن هذا النظام قد أنعم عليه الله بنعمة البترول

فلو كان قد أحسن ادارة عائدات النفط لرأينا التغيير الحقيقى فى حياة الأنسان السودانى

ولقلت البطالة والتشرد فى كل اصقاع الوطن

وعلى العكس لم يستفيد النظام من ألاموال الطائلة من الذهب الاسود أو غير الأسود

ولأول مرة فى تاريخ السودان سمعنا ببيع مشروع الجزيرة

ذلك المشروع العملاق والذى لو خصصنا له دخل البترول لمدة شهر واحد لانقلبت الموازين

ولأصبحنا سلة غذاء العالم بحق وحقيقة

نحن فعلاً شعب طموحاتنا هزيله ولمجرد أن أن راينا شوارع زلط لم تنفذ بطريقة سليمة وانشأتها شركات

كل همها استلام الشيك وبعض الكبارى والمشاريع التى تمت على عجل واصبحنا نستقى معلوماتنا من

الفضائية السودانية التى برعت فى تضخيم المنجزات حتى تنامى الظن فى دواخلنا بأننا دولة نامية قوية

تسير على سلم الرقى بعد الصافات

والسدود (حتى الآن لا أحد يعلم ماذا يدور فى مروى وما أدراك ما مروى ولكن بغير شك ما زال التيار الكهربائى متذبذب رغم غلاء الفاتورة)

الخطاب الدينى فعلاً قل ولكن يمكن أن يعود فى أى وقت

ولقد سمعت بهيئة علماء السودان وجاهزيتها لأصدار الفتاوى والمراسيم حسبما يتماشى ومصلحة النظام

يمكنك أن تؤيد النظام وهذا حقك ولكن تقول الطريق ممهد لأطفالنا للرفاهية والعيش فى اطمئنان

وما شابه ذلك فأظن هذا افتراء وكلام بعيد عن الواقع المرير الذى ينكوى بناره المواطن المغلوب


أرجو أن أكون مخظئ فيما قلت

ولك كل الود

Quote: أرجو أن تسمح لى بأن أقول لك انك فعلاً ما فاهم

لا ما ح أسمح ليك يا حسن حماد يا أخوي

Quote: ارجو أن تشير الى أى نجاح حققته الانقاذ فيما يخص الانسان السودانى

لا تحصر وما ذكرته انت هنا براهو كفاية

Quote: كما ارجو الا تنظر للبنايات والكبارى والطرق التى انشئتها الانقاذ

لماذا؟

Quote: أظنك توافقنى بأن عموم الشعب السودانى ما زالت تحت مظلة الفقر والجهل والبطالة

ده غير صحيح على الاطلاق
كدي قارن بين اوائل التسعينات والآن
زمان كان الناس لو وجدوا وجبة واحدة يحمدوا ربنا
الآن وأنا قادم من السودان أول أمس ،الناس تأكل ثلاتة وجبان ونص ،وكمان أي زول شايل موبايل

Quote: تدنى التعليم

Re: حين تكون الحقيقة ( رقــــم ) مسيرة التعليم فى الان...اذ ( 1989 - 2009م )

Quote: وازدادت الأمراض من ملاريا

كلامك ده ما صاح

Quote: وفشل كلوى وسرطانات وايدز

ده صحيح

Quote: ما زالت مئات الآلاف من المواطنين مشردين من غير مأوى فى دارفور وغيرها شبح الانفصال ما زال يهدد الجنوب

لن ألوم الإنقاذ في ذلك

Quote: وما زال القمع والارهاب هو ديدن النظام

no comment

Quote: بيع الاراضى للمستثمرين من غير أى شفافية والمحسوبية ساعد فى تفاقم الازمة

جذب الاستثمار في حد ذاته انجاز ، ماذا تقصد بالشفافية؟

Quote: وانت كمغترب أنا على يقين بأنك مهما أمتلأت حقائيبك من الدراهم والدولارات تظل عاجزاً عن مواجهة غلاء الأسعار وأيضاً تعانى من الجمارك والضرائب

بنصبر ونحتسب عشان أجيالنا القادمة

Quote: كما أرجو أن تتذكر بأن هذا النظام قد أنعم عليه الله بنعمة البترول

إنتو ما قلتو البترول ده نصب ساي من الانقاذ ،وهي بتخدر بيهو الشعب زي النميري
أها في ذمتك ده براهو ما انجاز؟

Quote: فلو كان قد أحسن ادارة عائدات النفط لرأينا التغيير الحقيقى فى حياة الأنسان السودانى

التغيير موجود لمن يحسن النظر
أسأل نفسك بالله :ليه الشعب ما ثار وانتفض ضد الانقاذ عندما كان بيمر بي أحلك الظروف والحصار وضنك العيش ، الشعب يعلم بي إنو موعود برغد العيش والطمأنينة

Quote: ولأول مرة فى تاريخ السودان سمعنا ببيع مشروع الجزيرة ذلك المشروع العملاق والذى لو خصصنا له دخل البترول لمدة شهر واحد لانقلبت الموازين ولأصبحنا سلة غذاء العالم بحق وحقيقة

لا أملك معلومات كاملة عن هذا الموضوع

Quote: أرجو أن أكون مخظئ فيما قلت

فعلاً أنت مخطيء أخي حماد

ولك كل الود

Quote: اسلوب الضحك على الذقون لا يجدي .... حكومة لا تسمح بخروج مسيرة سلمية ..كيف لها ان تقبل بانتخابات نزيهة ....

ديل من ذعرهم اذا خرج المعاشيون يطالبون بسرعة صرف مستحقاتهم ظن الظلاميون انهم ساعون لقلب نظام الحكم.
وانهالوا عليهم بالضرب.

اذا عدل عمر لنام كما نام عمر.

الشفيع أخوي ناس اللا وطني كل يوم يزيد قبحهم ويكبر جرمهم رئيس مطادر ومتهم ويفر منه الرؤساء كما يفر النصيح من الأجرب ، يا زول حكومة اللا وطني وصلت بها الوقاحة أن ينعدم قوت المواطن ويصبح مجرد ذكريات وأحلام ، تعرف كم ثمن كلفة لقمة عيش مواطن يعول 4 أطفال ؟ طبعا الذرة بقت في خبر كان بعد أن وصل سعر الجوال فوق ال 150 ألف ، شوال الويكة 450 ألف ، شوال اللوبيا 300 ألف ، السكر 160 ألف غلاء لم يشهد له التاريخ القريب والبعيد مثيل ، عطالة ، فقر ، بؤس ، بيوت ودواوين أصبحت خاوية .. قرى تهجرت بالجزيرة والغرب والشمال ، من تدافعون عنهم مجرمون ضالون حبهم للسلطة والجاه والمال وجشعهم لا يحده حدود ... لا رحمة فيهم لأنفسهم ناهيك للمواطن ، الكرة الآن بين المواطن واللا وطني ... هل تصدق أن أحدا بالجزيرة مثلا بعد أن فقد أرضه وهلك زرعه ونسله وفقد مصدر قوته سيختار طوعا أحدا من هذه الشرذمة ؟؟؟ قال كباري وسدود وبترول ، تعرف كم سعر لتر البنزين بالسوق حاليا ، وكم متر الكهرباء حتى بعد كذبة الرئيس بالتخفيض ؟؟؟ أغلى بلدان الدنيا غلاء وبؤساء بعد الصومال السودان ..
يازول وجعكم كبير بحجم وطن نساءل الله أن يخلصنا من شرور اللا وطني
الشفيع ابراهيم
مزارع الجزيرة

الشفيع أخوي
أنا ما قلت إنو كل شيء تمام ومافي مشكلة
أنا بقول إنو الأمور تتحسن للأفضل
والمستقبل مبشر بكل خير

الشعب مرَّ بي أوقات أسوأ من دي بي كتير جداً جداً أول ايام الإنقاذ وصبر عليها
الناس بتطلع للمستقبل
وصدقني البشريات كتيرة جداً جداً
والسودان موعود بي خير وفير إذا حصل استقرار سياسي "و ح يحصل قريب بإذن الله"
تحياتي و تفاءل يا أخوي الشفيع