Post: #1
Title: دايرة قطعة ارض في السودان!
Author: ensana
Date: 12-09-2009, 00:27 AM
كسوداني مغترب اذا اردت شراية قطعة ارض في السودان، ما هي المعاير الازم تضعها في الاعتبار
من ناحية الاسعار و المنطقة الجيدة و المنطقة الواعدة...
من ناحية الخدمات ...
ارجو ان نتشارك في المعلومات في هذا الموضوع لاهميته لكل مغترب و لغياب قاعدة المعلومات في الانترنت مثلا
خلونا كمان نتحدث عن كيفية ادارة "بنا" البيت و الشخص بعيد و مغترب> هل توكيل شركات متخصصة يضمن الجودة و الاسعار؟
و ما رايكم في المشاريع الموجودة ك الياسمين و سارية و غيرها؟
ارجو ان نتشارك التجارب يا جماعة لتعم الفايدة
|
Post: #2
Title: Re: دايرة قطعة ارض في السودان!
Author: سمندلاوى
Date: 12-09-2009, 00:46 AM
Parent: #1
الاخت العزيزة الغايبة انسانة
تحية ليك وعيدك سعيد ومبارك
والقابلة على امنياتك الطيبة
مرور للتحية والسلام
..................
اما مايخص قطعة الارض , فاخوك
تعبان فى الحتة دى شديد
ربنا يسهل ليكى
بالتوفيق
|
Post: #3
Title: Re: دايرة قطعة ارض في السودان!
Author: Hala Hassan
Date: 12-09-2009, 09:08 AM
Parent: #2
الاخت إنسانة،،،
تحية طيبة،،
ما عندى فكرة كبيرة عن موضوع الاراضى،
لكن يا ريت لو توضحى حدود إمكانياتك و الموقع المفضل للشراء،،،
حسب علمى فى مخططات جارى فيها البيع،،
مثال مخططات شركة سوقطرة أو الجهاز الإستثمارى للتأمينات الإجتماعية،،
|
Post: #4
Title: Re: دايرة قطعة ارض في السودان!
Author: حذيفه ابراهيم الكباشي
Date: 12-09-2009, 09:21 AM
Parent: #3
قطعه ارض في موقع فخم جدا (قاردن ستي مثلا..اجزاء من المنشيه الرياض) 1000دولار للمتر
قطعة ارض في موقع استثماري علي شارع كبير في الخرطوم(1000دولار للمتر)
قطعة ارض في موقع واعد(بعد سنه سنتين تعمل قروش) على اطراف كبري الحلفايه الجديد 700جنيه للمتر
شمبات الصافيه المغتربين قطعه600متر 300 الف الي 250 الف جنية
احياء شعبيه نظيفه 70الف 80 الف 90 الف 100الف
...
|
Post: #6
Title: Re: دايرة قطعة ارض في السودان!
Author: Hala Hassan
Date: 12-09-2009, 09:38 AM
Parent: #4
حذيفة،
دايرة لى شقة إيجار،،،
كيف معاك؟؟؟؟؟
|
Post: #5
Title: Re: دايرة قطعة ارض في السودان!
Author: عاطف عمر
Date: 12-09-2009, 09:36 AM
Parent: #1
Quote: كسوداني مغترب اذا اردت شراية قطعة ارض في السودان، ما هي المعاير الازم تضعها في الاعتبار
من ناحية الاسعار و المنطقة الجيدة و المنطقة الواعدة...
|
سلامات يا إنسانة الإنسانة
دحين ما شايفة السؤال كدا واسع شديد ؟؟؟
قطعة أرض في السودان ؟؟
السودان دا ولاياتو بس ستة وعشرين ولاية ( أكان ما يكونوا زادوهم )
وأكيد من ولاية لولاية الأسعار فرق السماء للأرض
لكن
ما دام بتتكلمي عن ( المشاريع الموجودة ك الياسمين و سارية و غيرها ) إذاً أغلب الظن أن سؤالك يخص ولاية الخرطوم
وفي ولاية الخرطوم
أسعار أراضي الخرطوم تختلف عن أسعار أراضي بحري تختلف عن أراضي أمدرمان
وفي الخرطوم ذات نفسها ( كمثال )
أسعار الأراضي تختلف باختلاف الدرجة وكمان المساحة ومرات ( الإسم )
وعلى ذلك قيسي
إذاً
إما أن تحددي منطقة أو مناطق محددة مفضلة لك ليتم السؤال عن الأسعار فيها
أو تكوني محددة مبلغ معين لشراء الأرض ليتم ترشيح منطقة أو مناطق في حدوده
موضوع البناء سوف يأتي لاحقاً تبعاً للأرض ومساحتها ودرجتها
|
Post: #7
Title: Re: دايرة قطعة ارض في السودان!
Author: حذيفه ابراهيم الكباشي
Date: 12-09-2009, 09:53 AM
Parent: #5
Quote: حذيفة،
دايرة لى شقة إيجار،،،
كيف معاك؟؟؟؟؟ |
ههههههههههههههاااااااااااااايييييييييييي
انا ما سمسار
لكن عامل سيرفي ما بطال..
طيب
في نوعين من الشقق
شقق جيده
وشقق فخمه
الشقه الجيده ايجار ما بين1000 الي 1600
الشقق الفخمه مابين2000 جنيه الي 2000دولار
..
|
Post: #9
Title: Re: دايرة قطعة ارض في السودان!
Author: Hala Hassan
Date: 12-09-2009, 10:01 AM
Parent: #7
يا حذيفة،
بالسيرفى بتاعك دة،
أنا أقترح تتوكل و تدخل السوق،،،،
| Quote: الشقق الفخمه مابين2000 جنيه الي 2000دولار |
الشقق الفخمة دى ب 2000 دولار،،
نظام سمارت هاوس ولا شنو؟؟؟
لا يا عم،
أنا يكفينى شقة ديلوكس (يا ريت جديدة)،
فى منطقة بقول ليك عليها بعدين،،،
يعنى كل شروطى:
أن تكون نظيفة جدا،و بس،،،
بكم؟؟؟
|
Post: #10
Title: Re: دايرة قطعة ارض في السودان!
Author: حذيفه ابراهيم الكباشي
Date: 12-09-2009, 10:14 AM
Parent: #9
طبها يا بنت العم...كلامك دا دبينس على حاجات كتيره
لكن شقه معقوله غرفتين +هول+ حمام او حمامين.. في منطقه معقوله شمبات الصافيه المغتربين المهندسين اركويت المعمورة
ما بين 1200 الي 1600
تقريبا
..
|
Post: #11
Title: Re: دايرة قطعة ارض في السودان!
Author: محمد عبدالقادر سبيل
Date: 12-09-2009, 11:03 AM
Parent: #10
ياخوانا انا عندي قطعة ارض اشتريتا مباشرة من ناس صندوق التأمينات الاجتماعية
في موقع مميز اسمه مخطط غزة - درجة اولي ناصية فاتحة على ميدان
بمساحة 420 متر
الموقع في الخرطوم شرق اللاماب بحر ابيض وشمال حوش مدرعات الشجرة وغرب النزهة ( خدمات متوفرة كهربا وشوارع )
المطلوب 250 ألف جنيه كاش وفورا ( ما مزنوق )
العرض ساري حتى نهاية العام بالجد ( بعد داك حسب السوق )
_________________
اللهم لا تجعل الدنيا اكبر همي ولا مبلغ علمي
|
Post: #12
Title: Re: دايرة قطعة ارض في السودان!
Author: Hala Hassan
Date: 12-09-2009, 11:14 AM
Parent: #11
عبد القادر سبيل،،
| Quote: المطلوب 250 ألف جنيه كاش وفورا ( ما مزنوق |
هل المخطط دة ما زال جارى فيه البيع؟؟؟
و الكلام دة حقك إنت و لا دة سعر السوق؟؟؟
|
Post: #18
Title: Re: دايرة قطعة ارض في السودان!
Author: Mohammed Haroun
Date: 12-09-2009, 11:42 AM
Parent: #12
(المطلوب 250 ألف جنيه كاش وفورا ( ما مزنوق ))
250 ألف جنيه سوداني = 250 مليون جنيه بالحساب القديم
250000000 جنيه ÷ 4100 جنيه = 60976 جنيه استرليني
60976 استرليني × 1.6 دولار = 97562 دولار
يعني يا أخونا سبيل عاوز في أرضك اليباب دي مبلغ 100 ألف دولار.
يعني بصراحة 100 ألف دولار ممكن تجيب بيت سمح في الثورة ولا أمبدة ولا الدروشاب للناس العاديين زي حلاتنا.
يا باشمهندسة هالة مشتاقين كتير .... إنت شغالة سمسارة بتاعة إيجارات ولا شنو؟؟
يا حذيفة أفتنا في أمرنا .... عاوزين بيت عادي جاهز ممكن في المستقبل نعمل عليهو تعديلات ... لآنو ماعندنا زمن للبناء.
تحياتي
|
Post: #19
Title: Re: دايرة قطعة ارض في السودان!
Author: Hala Hassan
Date: 12-09-2009, 11:46 AM
Parent: #18
ياااااا محمد هارون،،
سلامات و أخبارك؟؟
الظاهر المشغوليات باعداكم شديد،،
الله يكون فى العون،،،
| Quote: يا باشمهندسة هالة مشتاقين كتير .... إنت شغالة سمسارة بتاعة إيجارات ولا شنو؟؟ |
بريئة يا بيه،،،
بس الايام دى السماسرة معذبنى و مجهجهنى شديد،،،
ما عارفة غيرهم الحل شنو؟؟؟
تحياتى لحامد و الاسرة،،،
|
Post: #14
Title: Re: دايرة قطعة ارض في السودان!
Author: Abureesh
Date: 12-09-2009, 11:22 AM
Parent: #11
عن إذنك يا إنسانة..
المداخلات دى توضح إنو المثقفين الســودانيين يرون الســودان على أنه الخرطوم..
أخونا عاطف عمر الذى عنده الرؤية القومية.. شكرا يا باشمهندس
فلا غرو إذا إنعدام التنمية وإنتشار التخلف فى الأقاليم.
* مشيت الســودان لقيتو بخير والشـوارع أسفلتت والمطار حديث لأخر درجة
* الســودان عال العال يا جماعـة.. ثم صـور عمارات وبيوت راقية وشوارع من العاصمـة
* السـودان إتملا ركشـات
ويمكن أخذ عينات لا نهائية من هـذا المنبر.
|
Post: #21
Title: Re: دايرة قطعة ارض في السودان!
Author: Hala Hassan
Date: 12-09-2009, 11:53 AM
Parent: #14
ابو الريش،
سلامات كتيرة،،
Quote: المداخلات دى توضح إنو المثقفين الســودانيين يرون الســودان على أنه الخرطوم..
أخونا عاطف عمر الذى عنده الرؤية القومية.. شكرا يا باشمهندس |
لو سمحت لى هنا،
يمكن فعلا دى الرؤية عند سكان العاصمة البيسافروا لبرة،،
وفى إعتقادى إنو دة ما إختزال،
لكن الحنين إلى البيت بيقابلوا حنين إلى الوطن كلو،،
و بالمناسبة إحنا ما برانا الممكن نرمز للخرطوم بالسودان،،
عندك (إخوانا) المصريين يرمزون للقاهرة بـ (مصر)،،
و حتى المصريين فى المحافظات الاخرى مالإسكندرية مثلا،
بقولوا نازلين (مصر)،،،
دة تسمى شنو؟؟؟
_____________________
وبالمناسبة،
موضوعنا ما نسيناه،،،
|
Post: #13
Title: Re: دايرة قطعة ارض في السودان!
Author: Hala Hassan
Date: 12-09-2009, 11:16 AM
Parent: #10
يا حذيفة،
Quote: لكن شقه معقوله غرفتين +هول+ حمام او حمامين.. في منطقه معقوله شمبات الصافيه المغتربين المهندسين اركويت المعمورة
ما بين 1200 الي 1600 |
إذا الأسعار القالوها لى للفى بالى صحيحة،،،،
شكرا للمعلومة،،،،
|
Post: #15
Title: Re: دايرة قطعة ارض في السودان!
Author: محمد عبدالقادر سبيل
Date: 12-09-2009, 11:34 AM
Parent: #13
Quote: هل المخطط دة ما زال جارى فيه البيع؟؟؟
و الكلام دة حقك إنت و لا دة سعر السوق؟؟؟ |
والله ما عارف يا هلا
انا الحين بر البلد
اشتريت قبل 5 شهور وكان الباقي شوية ويخلصوا
بيني وبينك اشتريت ب 171 ألف وقلبي قال لي بتستاهل هسع تكون ربع ملياردير بالقديم( عشان العقارات رجعت فجأة ترتفع تاني )
بتسألي الظاهر عليك مشترية معانا
غايتو السنة الجاية حا اتمنى 300 ألف ( وما مستعجل الفورة الف)
_________________
اللهم اني اعوذ بك من الطمع والجشعوالهلع
|
Post: #23
Title: Re: دايرة قطعة ارض في السودان!
Author: Hala Hassan
Date: 12-09-2009, 11:59 AM
Parent: #15
الاخ عبد القادر،
Quote: والله ما عارف يا هلا
انا الحين بر البلد
اشتريت قبل 5 شهور وكان الباقي شوية ويخلصوا
بيني وبينك اشتريت ب 171 ألف وقلبي قال لي بتستاهل هسع تكون ربع ملياردير بالقديم( عشان العقارات رجعت فجأة ترتفع تاني )
بتسألي الظاهر عليك مشترية معانا
غايتو السنة الجاية حا اتمنى 300 ألف ( وما مستعجل الفورة الف) |
أبدا والله،
ما محظوظة،،،
لكن إذا أشتريت بالرقم دة،
إنتظر شوية السعر فعلا ممكن يرتفع،،
بس حسب علمى،
لازم المخطط يكون أنتهى البيع بتاعو و نزل السوق،،،
الله يوفقك،،،
|
Post: #16
Title: Re: دايرة قطعة ارض في السودان!
Author: حذيفه ابراهيم الكباشي
Date: 12-09-2009, 11:34 AM
Parent: #13
لكن يا هاله اذا عندك رغبه في قطعه وماعايزا تدفعي كتير
انا بنصحك بي منطقه ممتازة جدا وواعده واستراتيجيه بي صورة مذهله واظن والله اعلم انو اسعارا معقوله لكن اتوقع انا تتضاعف بعد عام او اقل
هي المنطقة الواقعه جوار كبري الحلفايه الجديد
..
|
Post: #17
Title: Re: دايرة قطعة ارض في السودان!
Author: ashraf mukhtar
Date: 12-09-2009, 11:39 AM
Parent: #16
الاخ حذيفة
جهة امدرمان من كبري الحتانة
بكم ؟
|
Post: #20
Title: Re: دايرة قطعة ارض في السودان!
Author: حذيفه ابراهيم الكباشي
Date: 12-09-2009, 11:49 AM
Parent: #17
Quote: الاخ حذيفة
جهة امدرمان من كبري الحتانة
بكم ؟ |
ماعندي فكرة والله
..
|
Post: #25
Title: Re: دايرة قطعة ارض في السودان!
Author: شكرى سليمان ماطوس
Date: 12-09-2009, 12:11 PM
Parent: #17
الأخت/ إنسانة و ضيوفكم لكم التحية و السلام...
أسعار الأراضى بيتحكم فيها الكثير منها المنطقى و اللامنطقى ...
أنصح بشراء قطعة الأرض فى موقع متوسط، لكن بشرط ألا يقل البناء عن 3 طوابق ...
بنظرية طابق للإستخدام الحالى من الأسرة ( بمساحة تكفى لأسرة متوسطة= 3غرف، صالة، صالون و منافع)
و طابق إستثمار (يحدد نوعه موقع الأرض: صالة عرض، دكاكين، مخازن بضائع، شقق، ...)
و طابق يستثمر حالياً على أن يستغل فى المستقبل حين تمدد الأسرة ( شقق) ...
أنسى مواد البناء التقليدية(حديد+أسمنت+حصى=خرسانة) لأنها عبء ثقيل و مستحيل !!!
أدخلى عالم البناء الحديث و بقلب قوى،
أتمنى أن تكونى من ذات إختصاص يتيح الإطلاع على تجارب ناجحة،
أسألى الناس العايشة فى الغرب عن مواد بناء البيوت التى يقطنوها،
بدأت تظهر هذه المواد فى دول الخليج: منها وحدة سكنية لشركة بروة القطرية فى الدوحة (حيث نقيم)
كذلك بداية ظهور أبنية فى السودان من مواد غير تقليدية !!!!!!!!!!!!!
أنا فى نفس المركـــــــب و شـــــــــــــــــدى الشراع
زورى
إستخدام الهياكل الحديدية فى البناء بدل الخرصانة : ما الفرق ؟؟
إستخدام الهياكل الحديدية فى البناء بدل الخرصانة : ما الفرق ؟؟
إستخدام الهياكل الحديدية فى البناء بدل الخرصانة : ما الفرق ؟؟
ستجدى بأن صاحب الحوش (مهندس بكرى صاحب سبق و تجربة= يلا نسأله)
مهندس شكرى
[email protected]
009745723216
التعديلات لإضافة لنك موقع البوست
إستخدام الهياكل الحديدية فى البناء بدل الخرصانة : ما الفرق ؟؟
ش
|
Post: #27
Title: Re: دايرة قطعة ارض في السودان!
Author: محمد عبدالقادر سبيل
Date: 12-09-2009, 12:15 PM
Parent: #17
Quote:
قطعة ارض في موقع استثماري علي شارع كبير في الخرطوم(1000دولار للمتر)
قطعة ارض في موقع واعد(بعد سنه سنتين تعمل قروش) على اطراف كبري الحلفايه الجديد 700جنيه للمتر
شمبات الصافيه المغتربين قطعه600متر 300 الف الي 250 الف جنية
|
محمد هارون
كلام حذيفة الفوق دا كلو ما شفتو وللا قعدت حسبتو
بس جيت على حتة ارضي دي وخششتني وول ستريت
ياخ المتر عندي بطلع معاك باقل من 600 جنيه
في قلب الخرطوم الجديدة ( سمعت بمنتجع المتعافي المخطط الذي يضم ابراج وحدائق واسواق في كل مساحة السوق الشعبي القديم وسبق الخيل الحايتشال والمصانع والمدرعات الحايرحلوها زي ناس المفرقعات )
يعني المستقبل هنا في حتتنا دي بالتحديد سيتي سنتر
اكرب بطنك واشتر ساي وما حا تندم بعد سنتين تلاتة
اما انا زول مسيكين
داير ابيع القطعة دي واتم عليها اشتري لي بيت شعبي وفي حتة زي الصحافة صالحة ام بدة الثورة بتاع
_______________
لا اله الا انت سبحانك اني كنت من الظالمين
|
Post: #22
Title: Re: دايرة قطعة ارض في السودان!
Author: Hala Hassan
Date: 12-09-2009, 11:56 AM
Parent: #16
يا حذيفة،،
أنا دايرة شقة (بيت ... لأ)،،
لكن كتر خيرك برضو ما قصرت،
أحول الموضوع لإنسانة،،،
لكن وصيتى ليك شخصيا،،،
Quote: Quote: الاخ حذيفة
جهة امدرمان من كبري الحتانة
بكم ؟
ماعندي فكرة والله |
ما تستعجل،،
فكرة ناجحة لبيزنس موفق بإذن الله،،،،
|
Post: #24
Title: Re: دايرة قطعة ارض في السودان!
Author: معاوية عوض الكريم
Date: 12-09-2009, 12:09 PM
Parent: #22
حذيفة يا دفعه ..
شوف لى معاكـ قطعة كده قدر حالى
ناوى العرس تب السنة الجايه ..
|
Post: #26
Title: Re: دايرة قطعة ارض في السودان!
Author: Abureesh
Date: 12-09-2009, 12:14 PM
Parent: #22
معذرة تانى يا أخت إنسانة، وأتمنى أن تجدى ما تريدين.. وبالسعر المناسب.
Quote: و بالمناسبة إحنا ما برانا الممكن نرمز للخرطوم بالسودان،،
عندك (إخوانا) المصريين يرمزون للقاهرة بـ (مصر)،،
و حتى المصريين فى المحافظات الاخرى مالإسكندرية مثلا،
بقولوا نازلين (مصر)،،،
دة تسمى شنو؟؟؟
|
فى سواق بص من ودمدنى يقول ماشى الســودان؟
ممكن يقول المعيلق المعيلق المعيلق، أو حيصا حيصـا حيصـا.. لكن الســـودان السـودان الله اعلم.
هـذا اسم تأريخى للقاهرة، وفى (داخل) مصر القاهرة معروفة بإسـم مصـر, وهـذا الأسم الذى منه أخذت باقى الدولة هـذا الأسم
وحين قال الفران (اهبطوا مصـر) فكانت هى القاهرة اليوم وليست كل مصر.
المهم...
الوقع يبرهن أن كل الطبقة المثقفة لا تعرف (عمليا) من السودان سوى الخرطوم.. وبقية الأقاليم (مناطق شدة).. وكمان الحكومة معترفة
وتدفع بدل مناطق شدة واللا بدل شـدة ما عارف، فى الوقت الذى فيه كل السودان يجب أن يكون متساويا، وبالنسبة للخريجين يوضحوا ليهم
إنو دى كلها بلادكم، ما فى مناطق شـدة ومناطق دلع.. ومن الذى جعلها مناطق شـدة؟ الم تكن الحكومة المركزية بحجب التنمية عن الاقاليم؟
|
Post: #28
Title: Re: دايرة قطعة ارض في السودان!
Author: د.محمد حسن
Date: 12-09-2009, 12:36 PM
Parent: #26
اولا بالنسبية لمغترب يتمتع بدرجة من الوعي
لافرق بين قطعة ارض في نمولي اوحلفا او الخرطوم
حيت ان في كل هذه المناطق هناك غياب للدولة وبالتالي انعدام الخدمات الحقيقية
ثانيا : اسعار الاراضي في الخرطون غير حقيقية لسببين
1- عصابات غسيل الاموال ساعدت بشكل كبير جدا في غلاء اسعار الاراضي والعقار بالخرطوم
2- منسوبي المؤتمر الوطني استحزذو على كثير من القطع في المواقع الاستثمارية وبدأو في رفع اسعارها بالتعاون مع عصابات غسيل الاموال وبعض البنوك
3- اشتري شقتين في القاهرة بتمن قطعة ارض في اقصى اصقاع العاصمة
واحدة اسكن فيها
وواحدة أأجرها مفروش
لو المغتربين صرفوا النظر عن العقار في السودان
الاسعار قد ترجع لمستواها الطبيعي
|
Post: #29
Title: Re: دايرة قطعة ارض في السودان!
Author: بكري عباس علي
Date: 12-09-2009, 12:52 PM
Parent: #28
الاخت انسانه
تحياتي
مررت بتجربة شراء قطعة ارض والبناء استغرقت ما يقارب الخمس اعوام كلفتني جهدا ووقتا واعصابا وعرقا وبالطبع مالا كثيرين والحمد الله اكملت الان
ونكن نصيحتي لكي ولمن يرغب ان يبني في السودان وهو بالخارج ان يستبعد هذا الخيار لانه يعني معاناة كبيرة
عليكم بشراء بيوت جاهزة حتي وان كانت تكلفتها عالية شوية لانو مواد البناء والعمالة في السودان دا فلم طويل
لم احتك بشركات المقاولات وكل ما اعرفه عنهم انهم يضاعفون لك تكلفة البناء مرتين
لي عودة
تحياتي
|
Post: #30
Title: Re: دايرة قطعة ارض في السودان!
Author: بابكر عثمان مكي
Date: 12-09-2009, 12:59 PM
Parent: #28
*
|
Post: #31
Title: Re: دايرة قطعة ارض في السودان!
Author: ensana
Date: 12-26-2009, 07:55 PM
Parent: #30
سلام يا جماعقالو اسعارالاراضي نازلة الان ة
طيب يا جماعة بالنسبة للبيوت القديمة ،الاصحابها دايرين يبيعوها، من وين الزول ممكن يحصل علي اخبار البيع دي؟
|
Post: #32
Title: Re: دايرة قطعة ارض في السودان!
Author: Ahmed musa
Date: 12-26-2009, 08:41 PM
Parent: #31
والله يا إنسانة البورد ده تسأل فيه عن حاجة
غينك تطلع ... أها اختي في موقع إسمه رُماة الحدق شوفيه في قوقل
أو شوفي نيلين دوت كم ...بتلقي فكرة عامة
وياريت بكري أبوبكر يعمل ينا لينك ما في البورد لكن في الموقع
زي جزء كدة متخصص في المسائل دي البيع والشراء والمباني والمستشفيات يساعد سودانيي الخارج
البقى الموقع جزء من مصادر معلوماتهم الهامة
|
Post: #33
Title: Re: دايرة قطعة ارض في السودان!
Author: ensana
Date: 12-27-2009, 11:14 AM
Parent: #32
شكرا ليك اخ احمد
فعلا في نقص في المعلومات بالنسبة للعقارات في السودان ، و بالتالي بنتج عنه عمليات نصب علي المغتربين
لو بكري فعلا اضاف الخدمة دي حيكون مشكور
انا بقترح انو الناس تعتمد علي تبادل الخبرات في الوقت الحالي و تقوح " بتنقيح" شركات العقارات في السودان
مثلا في اعلان لشركة اسمها سوقطرة في زول سمع بيها؟
|
Post: #35
Title: Re: دايرة قطعة ارض في السودان!
Author: ensana
Date: 12-27-2009, 11:14 PM
Parent: #34
شكرا اخ سمير علي اللنكات
في اي زول عنده فكرة عن مشاريع النفيدي ؟و هل في اي بيوت معروضة للبيع عندهم؟
|
Post: #36
Title: Re: دايرة قطعة ارض في السودان!
Author: omar arbab
Date: 12-27-2009, 11:33 PM
Parent: #35
| Quote: طيب يا جماعة بالنسبة للبيوت القديمة ،الاصحابها دايرين يبيعوها، من وين الزول ممكن يحصل علي اخبار البيع دي؟ |
ensana
سلام
هنا بتلقي كل شي انشاالله
http://www.kulshe.com/kulshe/129/posts/1/3/54658.html
|
Post: #37
Title: Re: دايرة قطعة ارض في السودان!
Author: معتصم الطاهر
Date: 12-28-2009, 00:18 AM
Parent: #31
الشعبية بحرى
150 الف للقطعة مساحة 300 متر ..
|
Post: #38
Title: Re: دايرة قطعة ارض في السودان!
Author: معتز مقبول
Date: 12-28-2009, 00:33 AM
Parent: #37
يااخوانا انتو جادينQuote: اما مايخص قطعة الارض , فاخوك
تعبان فى الحتة دى شديد
ربنا يسهل ليكى
بالتوفيق[/B] |
لو جادين كلمونا ونحن في الانتظار
|
Post: #39
Title: Re: دايرة قطعة ارض في السودان!
Author: معتصم الطاهر
Date: 12-28-2009, 00:33 AM
Parent: #1
Quote: كسوداني مغترب اذا اردت شراية قطعة ارض في السودان، ما هي المعاير الازم تضعها في الاعتبار
من ناحية الاسعار و المنطقة الجيدة و المنطقة الواعدة...
من ناحية الخدمات ...
ارجو ان نتشارك في المعلومات في هذا الموضوع لاهميته لكل مغترب و لغياب قاعدة المعلومات في الانترنت مثلا |
أفضل المناطق فى ام درمان هى مربعات ابو سعد ( 18 و 19 شرق- و مربع 46 البستان) - حدود 100 الف .. للقطعة مساحة 420 -450 م م الدوحة ( 200- 250 الف)
فى الخرطوم مربعات الازهرى و شرق النيل ( 90 الى 120 الف)
فى بحرى المناطق درجة اولى و الشعبية ..
فى مدنى حنتوب المنطفة من الكبرى حتى كلية التربية حنتوب.. و الدرجة . و الاندلس و الزمالك و الواحة و المنيرة ..(60- 80 الى 100 الف)
كوستى و ربك
( ربك مربعات 17 - 18- 37) و 9 -8- 12)
كوستى ( النصر المرابيع و الاندلس)
| Quote: خلونا كمان نتحدث عن كيفية ادارة "بنا" البيت و الشخص بعيد و مغترب> هل توكيل شركات متخصصة يضمن الجودة و الاسعار؟ |
أفضل ان يكون لك استشارى ومقاول معتمد .. يمكن مدك بأسماء الشركات و المكاتب خارج هذا الموقع ..
.| Quote: ما رايكم في المشاريع الموجودة ك الياسمين و سارية و غيرها؟ |
الاجابة فى قراءة مواقعهم و سأرسل لك هواتفهم لو اردت .
.
|
Post: #40
Title: Re: دايرة قطعة ارض في السودان!
Author: sourketti
Date: 12-28-2009, 04:48 AM
Parent: #39
المكان الامثل لحل مشكلة منزل أو شقه لمغترب خارج البلاد هو صندوق الاسكان والتعمير ...وهو أصلاً كان يتبع للاسكان البيع بالاقساط طبعاً أو بالكاش ...والخيارات متعددة وأنت بعيد عن هموم المقاولين والمراقبين والمواد والعمال ....إلخ
المواقع متنوعة وممتازة والشروط معقولة وميسرة...
لمن أراد زيادة معرفة لديهم موقع بالنت ...
وفقكم الله وأسكنكم جناته
|
Post: #42
Title: Re: دايرة قطعة ارض في السودان!
Author: Ammar Elyas Babiker Hassan
Date: 12-28-2009, 04:54 AM
Parent: #41
الاخت انسانة
سلامي وتحياتي
هناك نقاط مهمة لابد من وضعها في الحسبان...
اولا بالنسبة للموقع: -
1. مدي قربه من الدائرة التي تتحركين فيها (مكان العمل..الاهل..سهولة وجدوي الاستثمار....الخ لان الحركة في الخرطوم صعبة جدا ).يعني لو كنت من سكان شرق النيل .. الخرطوم شرق بري ناصر الرياض المنشية فمنطقة الفيحاء مناسبة جدا حسب سكني فيها لمدة ثلاثة سنوات.
2. طبيعة المنطقة التي ترغبين فيها (شعبية ..وسط.. راقية).
بالنسبة للمساحة فتعتمد علي: -
1. عدد افراد الاسرة (زايد هل الاسرة الممتدة من داخل الخرطوم أم من الولايات..لانو دي حساباتها مختلفة).
2. طبيعة الحياة التي تعودت عليها الاسرة (مثلا لو كنت تسكنين الشقق لفترة طويلة فلن تهتمي كثيرا للمساحة).
3. الميزانية الموضوعة (يعني لو اشتريت مساحة كبيرة سيراميك ساي نفسك يقوم).
بالنسبة للبناء ولا جاهز: -
لو عندك امكانية متابعة شخصية (حتي لو تأخذي اجازة سنة) فافضل تشتري قطعة وتبنيها علي مزاجك، اما غير ذلك فوالله الا تعرشي من البيم الارضي كما تقول النكتة.
ايضا انصحك باجازة مناسبة قبل ما تشتري لو لم تذهبي للسودان لمدة اكثر من ثلاثة سنين لان البلد تغيرت كثيرا.
عموما اتمني لك التوفيق
|
|