** خروف العيد** قصيدة شية جمر بس**

القصة وما فيها إنو عندنا خالنا إسمو محمد فضل المولى وبلقبوهو بي أبو الشباب وبختصرو اللقب لي (شبو) اشترى خروف ماكن وسمين عشان يضحي بيهو السنة دي .. اها بعد وصل البيت وشايل الخروف منزلو من العربية قوم يا الخروف أنطحو وأجري .. وهاك يا سك .. والحلة كلها تتفرج..طبعاً بس مسلسل أمريكي لحدي ما قبضو الخروف وجابوهو تاني.. عندنا خالنا (بدر الدين حمزة) زميل بورد بس الباسوورد بتاعتو رايحة وانشغل بي جري الدنيا حلف إلا يكتب ليهو قصيدة بي لسان(شبو) تعبيراً عن حالة(شبو) النفسية.. تعالو نشوفها:

خروف العيد

رجعت البيت سعيد نشوان
وقلت أفرّح الحبان
فتحت الباب بكل تحنان
وناديت(ريم) ندهت(حنان)
أصلي اليوم رجعت سعيد
وجبت معاي خروف العيد
وكان ما بعرف الخرفان!!
ونفس الخلقة ..خلقة ضان!!
كنت أقول دة ياهو حصان
ولو ما قرون وقولة(باع)
وكسوة ...صوف
تقول دة أسد وتمرق(صوف)
خروف في وصفو ما مألوف
وما بسوقوهو(بالمعروف)
ومدفوع فيهو حزمة(ألوف)
وأكيد.. أكيد في سالف الأزمان
جدك كان ضحية جدنا (إبراهيم)
وجبتك تفدي(مؤمن) و(ريم)
بهجة وفرحة للأخوان
ولمة ونسة للجيران
تضحّك فيني غسالين..
وجزارين.. وسيد دكان؟؟!!
صحيح إنك خروف وبهيم
توسّد(شبّو) وجه اديم
تفرّج فيني ستة حريم
... وجوز حجاج؟؟
وناس (حمودي) و (محمود تنو)
و(بت الريم) و (ود التاج)؟؟
أنا الباريس كستني عطور
وأنا الغنّالي كل(عصفور)
تحطّم يدي والإحساس؟؟
تفرّج فيني كل الناس؟؟
جزاك يا جاني يوم العيد
بصفيك من وريد لي وريد
وأوريك معنى (سلخ الشاه)
صباح من قومة النباه
لا بعرف كبير أخوان..
لا فيك حتة للديدان..
وجلدك فروة للضيفان
كرشك(علقة) للصارقيل
ودمّك بس بسيبو يسيل
لأنو حرام (وذاتو تقيل)
كوارعك ذاتها بشويها..
وعيونك برضو بقليها..
وقرنك شلتو عندي شعار..
مربوط أعلى باب الدار..
لكل خروف وزول حقار..
...
ولو ما النار بتكويك كي..
كنت أكيد أكلتك ني..

هشام استمعت للقصيدة من الصديق بدر الدين صباح اليوم بالتلفون وكان الوعد أن يرسلها لي بالإيميل ... لنشرها هنا وفي الصحف ... لذا أطالب بحقي الأدبي ... في نشرها ... يعني تقول البوست ده بالإشتراك مع . (ز . ز) أو (z.z) ... القصيدة في غاية اللطف ... والجمال .... وبدر الدين لمن لا يعرفه شاعر مجيد ... ومتمكن ... ويكتب الشعر الجيد منذ فترة طويلة ... ولكنه عازف عن الإعلام كمظعم مبدعي بلادي الحقيقيين وهي فرصة لمناشدة بكري لإرجاع الباسويرد لبدر الدين رغم علمي بكسله ... وضعف علاقته مع التقنية بشكل عام وإن كانت له بعض المساهمات هنا في البورد أوان وفاة شقيقه العزيز ميرغني محمد أحمد ... وليتك هشام تأتي لنا ببعض قصائد بودي وهم إسم الدلع لشاعرنا المرهف ... لدي لخاصة ...

أستاذ زهير...
كل سنة وإنت طيب .. والقابلة بي خروف سمين وامين وأبو الرخا كمان .. بس ما بنطح زي خروف (شبو) دة .. خروف هدي ورضي .. بجي شايل سكينو براهو .. ويقول ليك تعال أضبحني..
الحقيقة انا برضو ضرب لي (بترو) دة برضو اسم الدلع عندنا هنا .. وقرا لي القصيدة في التلفون وكتبتها معاهو في ورقة وقلم .. ووريتو إني حانشرا ليهو هنا في البورد.. وبعد انتهيت رجعت ليهو بالتلفون. ووراني بعد داك إنو اتكلم معاك وقلت ليهو نفس الكلام بس شكلي سبقتك.. لكن ما مشكلة برضو نحفظ ليك حقك الأدبي..

يا جماعة القصيدة بالاشتراك مع (ز.ز) أو (z.z) كيف كدة معاك.. عارفك محامي وممكن تلحقني الغتس..(كيف دي معاك؟؟)

....

بدر الدين زول جميل ..جميل جداً .. ومرهف لي أبعد الحدود.. وعندو قصائد رائعة حد الروعة .. بس ما لاقية حقها من النشر.. زي علاء الدين أخوهو برضو..
واوعدك وإنت معاي ممكن نفتح بوست ليهم الاتنين.. نخت فيهو قصائد الاتنين .. ونخلي الناس براها تحكم.. وتستمتع..

http://بدر الدين زول جميل ..جميل جداً .. ومرهف لي أبعد ... الدين أخوهو برضو..

بدر الدين وعلاء الدين وخالهم الجميل والراقى عبدالعظيم الذى كان يقدم من إسكندرية لزيارتنا بالزقازيق ، سبق لى زيارتهم بكوستى وكان لديهم فرح أحد أخوالهم من آل التوم على ما أذكر وهم من تجار سوق كوستى ، لم تنقشع دهشتنا ببدر حتى أدخلنا علاء فى عوالم من الدهشة ، نظم بدر الدين الكثير من الأشعار وتغنى له سيف الجامعة بقصيدة ( أحمد الحق البِقوّى وأحمد الناس البهاتو ...... من وهج نفَسو البيضوى لى وليداتو البتتاتو ) .

عقب التخرج تم الإتفاق بين بدر الدين والعريبى النجيض عبد الله محمد شمس الدين على فتح مكتب بمدينة رشاد ، راهنتُ أن بدر الدين بشاعريته لايقوى على هجر أهله بعد تجربة الدراسة بالزقازيق وقد صدق حدسى ، بينما مضى القصير المكير عبدالله إلى هناك فترافع وزرع أوان الخريف حين تغلق المحاكم أبوابها، لك التحية يا هاشم وعبرك لآل حمزة الكرام