مداعبة و تهنئة بين مك و مك نص شعري

هذه القصيدة من الاخ ابراهيم محمد احمد المك الي صديقة الاستاذ احمد المك بمناسبة الزواج و التهنئة مني ايضا للعروسين

Quote: مداعبة وتهنئة للغالي الأستاذ الموسيقار المبدع / أحمد المك ولعروسته الفنانة الأصيلة أفراح الشعب .. ولكل معجبي فنها الراقي .. وألف مبرووووك... ياخ إحترس.. البت دي ما بت للعرس البت دي جهجهت العباد هرست قلوب الناس هرِس والبت دي أفراح الشعوب رقة وجمال في أحلى حِس والبت تغني لكل زول شان تسعد الزول التَعٍس البت كنار عند الغروب لملم غناهو وقت نِعِس والبت نكن ليها احترام محتشمة في أجمل لِبس فنانة أسرت كل زول بس الظروف لو تنعكِس؟ كم من ملحن غنى ليك لمن نشف ريقو وييبس وكم من مجهجه هاتا بيك لما انحلج فوَت تِرس اشمعنى ود المك يخم افراحنا فجأة ويختلس نشكيك لي قاضي الغرام ياريت يسوقك للحبِس قالوا الملحن زول رقيق !!! كيفن يكون فـك مفترس؟ أنا لو حضرت القصة دي تب ما بكون إنسان سلس لو كنت (بتهوفن) عديل أو كنت (موزارت) منبعث أنا كنت بعمل ليك دقار تب ما يتم هذا العِرس بس إنت انعم بالنعيم وخلينا في النار نندفـس والمغسة شقت ناس كتار وانا برضي منك متمغِس أنا من سمعت القصة دي.. ما ضقت نوم أنا من أمس حردان فطوري أبيت غداي وانا في عشاي ما لي نفِس وناس فرشوا عزوهم عديل وسمع بي شاعر فِطِس نصبر نقول قسمة ونصيب والصبر سلوى المُنتكٍس هيا يا شباب ...الاحتساب ما تخربوا الموت بالرفس والبركة في (عافيتنا) ديك.. و(العافية) زايغة من الدرِس والبركة في (نانسي) العسل بس خوفي باكر تتلحس مبروك عليك يا أغلى مك دا كلام حسود ما تكترث والله تستاهل قمر ... وفي رواية تستاهل شمِس حبيت اهازرك يا ظريف من فيض فنونك اقتبس وأنا زول رقيق زيك تمام لكني ساي عامل شرٍس وفِرحنا ليك بالجد كتير مبروك عليك المارسيدس (أفراحنا) .. مبروك ياقمر أوووعِك تقولي لشعري (بِس) ----- المك .. برضو