Post: #1 Title: التوربينات سفروها الأُردن! Author: عبد الله الشيخ Date: 10-14-2009, 10:21 AM Parent: #0
خط الإستواء عبد الله الشيخ التوربينات سفروها الأُردن! المشكلة ليست في مكاوي الذي إستفرد بمعاش (رئاسي) وهو الذي تجاوز في وظيفته سن المعاش الإجبارى والإختياري!.. المشكلة هي أن مكاوي- لا يمكن، ولا يستطيع ـ أن يكتب أسمه في قائمة المفصولين تعسفياً لانه (بالطبع) ضد هذه القائمة منذ ان قامت قيامة الانقاذ والى ان تموت!.. ولا المشكلة في بزوغ نجم أسامة، فهو نجم من زمان، نجم ظاهر مثل (النحول) على كمال ترباس الذى ما زال يغنى( النحول على جسمى ياحبايب ظاهر .. أسبابى الحب الطاهر !.. المشكلة هى أن الإنقاذ ستوقعنا في تخليط إذا قلنا أن هذا النجم الكهربائي هو الآن سيد البلد! الى جانب الهلال سيد البلد قبل وبعد مازيمبي!! فهل يحتاج هذا الهلال الى (جرح تاني) بسلب إسم الدلع منه واسباغه على شخصيات كهربائية ياترى؟!.. عشنا قبل الإنقاذ وبعد الإنقاذ، وقرينا في الجغرافيا أن خزان سنار تم إنشاؤه في عام 1925م.. أنا شخصياً قريت الثانوية في سنار.. يوم واحد (من ذات الايام) ما سمعت إنو توربينات الخزان باظت أو عصلجت أومحتاجة للصيانة!.. فهل تحتاج الانقاذ قريباً الى إستدعاء مكاوي من ترويقته المعاشية وتسأله: متين بقت للصيانة؟؟ متين ركبنا توربينات سد مروي لحدي ما نجي الليلة نصينا؟!. بسم الله ما شاء الله.. قرينا أخبار السد والرد، وقرينا كتب السدود الفاخرة الطباعة.. (يا ريت لو تطبعوا زيها لهذا الجيل الرسالي فى الجامعات)!.. قرينا وشفنا الصور ومشينا شفنا الخزان.. والكلام دا يا( اخوان)! ما تم سنة!!.. قلتم لنا أن كهرباء السد دخلت الشبكة، وأن كهرباء السد هي نهاية الفقر في السودان!.. بعد دا كلو جيتو وقلتو التوربينة عيانة!.. و يعنى لازم يعني يا (أخوان) ،(ترسلوها الأردن) عاجلاً كدا ، وقبل ما نشوف الرحط بتاعا؟!.. ونحن الذين ، و(أولاد الذين) !! قبل الإنقاذ وقبل سد مروي كانوا منورين؟؟.. عليك امان الله كنا منورين!، فلا الإنقاذ هي من ركب محطة بري الحرارية، ولا هي من بنى خزان جبل أولياء، ولا هي من قام بتعلية خزان الروصيرص!.. الكهرباء دي دحين ياها كهربة زمان العملوها الإنقليز ، والله شيتاً تانى؟.. هل يحتاج (إنقاذها) الى انقلاب ، هل يحتاج توصيلها لبيوت الناس الى فصل الراجل المسكين للصالح العام؟!.. ام ان كهربا ( سالب موجب) هذه تحتاج ايضاً الى مصفوفة زي مصفوفة اتفاقية سلام؟!.. نسأل عن هذا وذاك ونحن نعرف (بعض الإجابة).. إن كهبائياتكم يا ( اخوان) سواء اكانت للرد او لغيره تذكرني بقصة العروس المربوشة التي أعيدت إلى بيت أبيها (معززة مكرمة) قبل آذان الديك!!.. وإذا عرف السبب بطل العجب!!..ومن الأهمية بمكان القول ،، أنا (شخصياً) أتحدث ليل نهار عن إنقطاع الكهرباء بعد توصيلة الرد والسد، وأنا لا عندي ثلاجة موز!، ولا عندي مكيف صحراوي !! لكن .. عوجه مافى يا اخوان .. نور رب العالمين موجود ،، (القمر ضاحك يغني) ولمبة (النقتود) قاعدة!.. جكوا جكتكم إنتو.. على ابناء الإنقاذ أن يتعاهدوا على إنشاء قائمة شبيهة بقوائم المفصولين تعسفياً من السكة حديد، والمشاريع المروية، والمطرية، و كذلك من (النادي الكاثوليكي)، وليكن فى اول القائمة د. الترابى ، ومكاوى فى اسفلها!! .. فقد قرأنا أمس خبراً يقول ان نائب رئيس محلية المناقل عبد الباقي علي عوض الكريم نعي المؤتمر الوطني بالجزيرة ورهن عودته إلى النادي الكاثوليكي بعودة المؤتمر الوطني إلى "سيرته الأولى"!.. وتخيلوا معي عودة الإنقاذ إلى سيرتها الأولى!!.. يا قوم!.. وأيم الله!!.. لقد صدق أعمى المعرة حين قال:ـ (غير مجدٍ في ملتي وإعتقادي.. نوح باكٍ ولا ترنم شادِ...). وشبيه صوت النعي إذا قيس بصوت البشيرِ في كل نادِ..)!!..
Post: #2 Title: Re: التوربينات سفروها الأُردن! Author: MOHAMMED ELSHEIKH Date: 10-14-2009, 10:36 AM Parent: #1
ان شاء لي لي معك كلام(حديث) آخر بس اخلص القدامي دا
سنيرنا الظريف عبد الله الشيخ متعك الله بالصحة والعافية.. يا اخي والله دي كتابة قمة في الروعة والجمال والسخرية الساحرة.. السد ده المفروض يضاف إلى عجائب الدنيا السبعة.. بالله عليك ما تحرمنا من هذه الدرر وهذه السخرية الجميلة..
لكن .. عوجه مافى يا اخوان .. نور رب العالمين موجود
Post: #8 Title: Re: التوربينات سفروها الأُردن! Author: عبد الله الشيخ Date: 10-14-2009, 01:58 PM Parent: #6
اي والله يا اسعد الريفى .. نور رب العالمين .. لا بيقطع ، لا فيهو فواتير ..!
Post: #10 Title: Re: التوربينات سفروها الأُردن! Author: عبد الله الشيخ Date: 10-14-2009, 03:04 PM Parent: #5
طبعا يا سلمى .. اذا رجعت الانقاذ سيرتها الاولى حتكون جاوبت على السؤال ( من اين جاء هؤلاء) بث.. دى براها فايدة...! وأهو .. نكون لقينا اجابة على واحد من الاسئلة ...! طيب .. يعنى عشان نلقى اجابة على كل سؤال لازم يضطروا الى انزال رفاق مكاوى واحد بعد الآخر من ضهر الكومر؟
Post: #11 Title: Re: التوربينات سفروها الأُردن! Author: عبد الله الشيخ Date: 10-14-2009, 03:07 PM Parent: #3
ايوه .. يا درديري.. سفروها الاردن .. يعنى التوربينات حتخضع لنظام العلاج بالداخل وبس؟؟ التوربينات دى يا صاحبى زيها وزي العضوية الكاثوليكية .. لازم تحظى بـ ( عناية مكثفة)...!
Post: #7 Title: Re: التوربينات سفروها الأُردن! Author: عبد الله الشيخ Date: 10-14-2009, 01:55 PM Parent: #2
يا محمد الشيخ .. قبل ما تخلص (القدامك دا) .. نحن جاينكم فى الشريق وفى سد الشريك.. عشان نشوف ( كهربتكم ) كيف!!
السد العالى توربيناتو شغالة اربعين سنة دون توقف وبعدها جابو توربينات المانية هزت قواعد السد الإسمنتية وكادت تدمر السد العالى... خزان مروى توربيناتو ما شغالة من اصلو... يبدو ا انهم اشترو "تور" بين بدل "توربين" ونسوا يشتروا البقر مع " التور" بين...
هتف انصار السد... الرد.. الرد... بالكهربا والسد ولكن الرد بقى: الرد الرد.. بالسد بالسد (لكين بدون كهربا)... الله يسد نفسهم... ومن حقنا ان نهتف بالسد النحس سديتو النفس...
لم اكن اعلم ان التوربينات ايضا بيعالجوها فى الأردن!!! ومن لم يمت بالسد مات بغيره... دة ربنا لو حاجات...
شكرا عبدالله على الخبرية الظريفة (خبرية دى بالأردنى بالمناسبة)..
Post: #17 Title: Re: التوربينات سفروها الأُردن! Author: عبد الله الشيخ Date: 10-14-2009, 05:00 PM
فتحى البحيرى .. كتر خيرك .. بس خلينا نشوفك .. ..لما الكهربا تقطع وراسك يسخن تكتب اى حاجة .. فنحن قوم لا نفكر الا لما تسخن!!
Post: #16 Title: Re: التوربينات سفروها الأُردن! Author: عبد الله الشيخ Date: 10-14-2009, 04:57 PM Parent: #14
ومن لم يمت بالسد مات بغيره... دة ربنا لو حاجات... ده ربنا لو حاقات يا قدع..! نور الدين ( من لم يمت بالسد مات بغيره) ؟ دى حقتك .. ولازم تشوف ناس الملكية الفكرية يسجلوها باسمك.. فهذه العبارة لاتقل عن بيت المعري.. اشكرك ..
Post: #19 Title: Re: التوربينات سفروها الأُردن! Author: عبد الناصر الخطيب Date: 10-14-2009, 08:44 PM Parent: #18
أستاذنا / عبد الله الشيخ ------------------------------------------
أنت فاكر كلامك ده نكته تصدق ممكن تحصل عادي في 1997 م كنت بشتغل في بورسودان وفي مره صادفني في رصيف الميناء الشمالية قطارات من سكك حديد السودان ( رؤس ) قالوا مودنهم يعمروهم في ( أيران )
عمروهم ولا باعوهم الله أعلم مع أنو الاسهل كان يجو الناس البعملوا عّمرة للماكينات دي بعدتهم السودان وكت عدمنا البعرف يعّمر !!!!
أسهل بكتير من ما يسفروا القطارات ( أيران ) شحن وقومه نفس
حصلت ياود الشيخ وللأسف ما نكته ........ بلدنا النكته كترت
والله يستر كتب قبل كم يوم زميلنا عبد الحكيم نصر عن الوزراء الكتار البشير زاد الولايات وكتر من الوزراء كيتا في عبد الحكيم بكرة نقراء مرسلين التوربينات تتعمر في الصين
مرات بتخيل لى السودان ده السائقوا سارح بس الله ساتروا يعمل حادث يجيب كثافتوا
Post: #38 Title: Re: التوربينات سفروها الأُردن! Author: عبد الله الشيخ Date: 10-15-2009, 11:31 AM Parent: #19
يعنى لسه كثافتنا ما جات يا عبد الناصر؟ وسواق لى شنو ؟ وعشان يودينا وين؟ عشان ينقذنا ؟ والله عشان ننقذوا ؟ ( السيناريو ما واضح) وخايف برضو يطلع ليك السواق بعد بعبصة السويتش .. ويقول ليك ( هي لله)!! سلام يا عبد الناصر ، ومحبة ..
بالمناسبةحكاية الأردن دي ما سخرية و ازيدك علم انو في سنة (اول التسعينات) واحدة في توربينات بحري الحرارية جديدة لنج وبعد شهرين تلاته اتعوج العمود بتاعها (اللهو الكرنك شافت). اها بعدين ما في طريقة الا يودوه راجع لي بلد المنشأ واظن يوغسلافيا قامو جابوه و شحنوهو بي طيارة نقل عسكري سي ون ثيرتي وكلف بضعة ملايين من الدولارات. وقالو كان نتيجة لخطأ تشغيلي لواحد من المهندسين وكانت هناك زنقة كهربائية شديدة.
بعدين خزان الشريق دا يلقو ليهو موية من وين . تتصور الموية كلها بتاعة مشروع الجزيرة ودوها حزان مروي لتشغيل التوربينات و نسو مشروع الجزيرة و يقال ان الذرة هناك قد ماتت بالعطش لأنو مافي موية ,كل الموية تم حشدها في مروي لمنازلة اوكامبو و ليمت أهل العوض و أهل الحسن (ديل نحن) بالجوع.
والله قصة الأردن دي ، رغم مجازيتها وأنك قصدت بها وضع التوربينات (الصحي) إلا أنها في (التمانيات) يا مولاي، مبالغه يا عبدالله، لكن صدقني ، عندما يتم التعامل مع المشاريع المصيرية بالهوى السياسي ، كما هو دأب نظام اللنغاز ، فإن النتائج الكارثية هي الوليد الأوحد. الكل كان يدرك الحقيقة المحزنة ولكنها بعض من استهتارنا بمصائرنا ولا نلومن إلا أنفسنا أن بقينا نتفرج لعشرين عاما ( وما زلنا يا كتاب "الدجل" في الصفحة الأولى). صدقني يا عبدالله ، سيبقى الحال كما هو عليه لعشرين أخرى.
Post: #43 Title: Re: التوربينات سفروها الأُردن! Author: عبد الله الشيخ Date: 10-15-2009, 01:14 PM Parent: #22
Quote: بالمناسبةحكاية الأردن دي ما سخرية و ازيدك علم انو في سنة (اول التسعينات) واحدة في توربينات بحري الحرارية جديدة لنج وبعد شهرين تلاته اتعوج العمود بتاعها (اللهو الكرنك شافت). اها بعدين ما في طريقة الا يودوه راجع لي بلد المنشأ واظن يوغسلافيا قامو جابوه و شحنوهو بي طيارة نقل عسكري سي ون ثيرتي وكلف بضعة ملايين من الدولارات. وقالو كان نتيجة لخطأ تشغيلي لواحد من المهندسين وكانت هناك زنقة كهربائية شديدة.
بعدين خزان الشريق دا يلقو ليهو موية من وين . تتصور الموية كلها بتاعة مشروع الجزيرة ودوها حزان مروي لتشغيل التوربينات و نسو مشروع الجزيرة و يقال ان الذرة هناك قد ماتت بالعطش لأنو مافي موية ,كل الموية تم حشدها في مروي لمنازلة اوكامبو و ليمت أهل العوض و أهل الحسن (ديل نحن) بالجوع.
والله يا ود الشيخ لم تقل إلا الحقيقه... تم بعمل منظم افشال الموسم الزراعي في مشروع الجزيره من اجل توليد الكهرباء في السد الجديد..... ومن متوسط حوالي 400 الف فدان في الماضي تقلصت المساحه الي الي 30 الف فدان فقط.... وملخص الخبر بتاع الراي العام التحت هنا ده معناه اعلان بإنهيار المشروع تماما ومزارعين الجزيره بعد ده يشوفوا ليهم صرفه...... كان الله في عونهم... ربك يلطف
Quote: في تطور خطير : تقلص مساحة القطن إلى (30) الف فدان بمشروع الجزيرة ودمدني - تقرير: حامد محمد حامد الراي العام 14/10/09 في تطور خطير ومفاجيء كشف المدير العام لمشروع الجزيرة البروفيسور صديق عيسى عن تقلص المساحات المزروعة بالقطن في هذا الموسم الزراعي الى ادنى مساحة يشهدها المشروع طيلة تاريخه عبر (84) سنة إذ بلغت المساحة (30) ألف فدان قطن. وتفيد متابعات (الرأي العام) انه حتى في بدايات السنوات الأولى للمشروع في العشرينات من القرن الماضي رغم محدودية المساحة الكلية المصممة زراعتها بالمشروع ترواحت المساحات المزروعة بين (100) الف فدان (126) الف فدان قطن بينما ارتفعت بدخول المراحل الأولى لامتداد المناقل 58 / 1962م الى (358) الف فدان قطن، كما ازدادت المساحات المزروعة الى نصف مليون فدان في اوائل السبعينيات إلاّ ان موسم التكثيف والتنويع (1975/74) رفعت مساحات القطن إلى (603) الف فدان وتعتبر هذه اكبر مساحة قياسياً بعمر المشروع. وفي فترة الثمانينيات انخفضت المساحة الى (357) ثم ارتفعت الى نحو (400) الف. وتشير (الرأي العام) الى ان فترة التسعينيات شهدت هبوطاً ملحوظاً في زراعة القطن بالمشروع وتراوحت النسبة بين (99) ألف فدان الى (135) الف وارتفعت المساحات في موسم 2004/2003 إلى (178) الف فـدان إلا ان السـنوات الاربع (2008/2004) تدنت المساحات الى (99) ألف فدان ثم الى (89) ألف. إلا ان الموسم الخامس الحالي 2009م انخفضت المساحة الى ثلاثين ألف فدان بعد احجام المزارعين عن زراعة القطن والتركيز على زراعة المحاصيل النقدية السريعة العائد منها الخضروات والذرة الرفيعة وذلك بعد تراكم الديون عليهم لتبلغ (340) مليون جنيه مستحقة الدفع لوزارة المالية الاتحادية بجانب مطالبة ادارة مشروع الجزيرة بديون مستحقة تبلغ (600) مليون جنيه، كما ان للادارة ديون على جهات اخرى. إلى ذلك قال فريزو القطن بمشروع الجزيرة لـ (الرأي العام) هذا الموسم يمكن حلجه في اقل من اسبوعين وبهذا تظل المحالج الثلاثة للمشروع بمارنجان والحصاحيصا والباقير بلا عمل وحول الموقف الحالي بعد الاختناقات التي شهدها الموسم الزراعي من حيث تراكم الاطماء بقنوات الري واحجام شركات الحفر من العمل بسبب التمويل قال المدير العام لمشروع الجزيرة لـ (الرأي العام) ان البنك الزراعي السوداني أوفى بما اتفق عليه في ابرام اتفاقية مع اتحاد مزارعي الجزيرة والمناقل وبشهود مدير عام المشروع بان يتكفل البنك الزراعي بسداد استحقاقات شركات الحفر لتطهير قنوات الري ويبلغ حجم الطمي المتراكم (615) مليون متر مكعب وسيدفع البنك مبلغ (600) مليون جنيه على اساس ان تخصم من المزارعين من بند رسوم المياه. وقال المدير العام إن الموقف الصيفي تحسن كثيراً وان أكثر من (50%) من المساحة الكلية البالغة (600) الف فدان. وفي ذات السياق اعلن مصدر ماذون بوزارة الري والموارد المائية ان عدداً مقدراً من آليات شركات الحفر دخلت اقسام الري في الغيط وعددها (23) قسماً، وأكد ان وزارة الري مستعدة لتوفير مياه الري لزراعة (400) الف فدان قمح في اطار تنفيذ البرنامج الشتوي. وقال الامين العام لنقابة العاملين بمشروع الجزيرة كمال النقر لـ (الرأي العام) بعد انفضاض اجتماع عام للعاملين بحث معطيات المرحلة الجديدة بناء على مذكرة رفعها هجو قسم السيد عضو المجلس الوطني ورئيس اللجنة الزراعية بالمجلس سابقاً الى نائب رئيس الجمهورية طالب فيها بوقف تمليك المنازل للعاملين وتكوين لجنة لمراجعة قانون 2005م مواد وتطبيقاً وطالب هجو بحفظ الاصول الثابتة والمنقولة وكشف الامين العام لنقابة ان هجو قسم السيد في مرحلة سابقة طلب شراء معدات وآليات مصلحة الهندسة الزراعية بالمشروع.
Quote: و ازيدك علم انو في سنة (اول التسعينات) واحدة في توربينات بحري الحرارية جديدة لنج وبعد شهرين تلاته اتعوج العمود بتاعها (اللهو الكرنك شافت). اها بعدين ما في طريقة الا يودوه راجع لي بلد المنشأ واظن يوغسلافيا قامو جابوه و شحنوهو بي طيارة نقل عسكري سي ون ثيرتي وكلف بضعة ملايين من الدولارات. وقالو كان نتيجة لخطأ تشغيلي لواحد من المهندسين وكانت هناك زنقة كهربائية شديدة.
حقيقة (2) فى العام 1990 تم فصل عشرات من مهندسى اكهرباء العاملين ببحرى الحرارية و برى للصالح العام و هؤلاء كانوا قد تلقوا التدريب و التأهيل فى ايرلندا و غيرها للعمل على محطتى بحرى و برى . ________ ثم نسمع حديثا عن الشفافية و الامن و العدالة و المشروع الحضارى بل و النزاهة و التأهيل ..و الخطة الاستراتيجية كمان !!
ممكن جدا شوية سيراميك و عمارة المونيوم تعجبك لكن مطرة مطرتين بتكشفك و ممكن جدا سد و كبرى يعجبك لكن توصيله و اتنين بتكشفك (من اغانى التراث)
الرجل الرائعة كتاباته، المدهشة بصماته... حرّم ما فضل لي إلا أخلع عليك بردة الكتابة الساخرة المشبعة بروح الفن والأدب!
Quote: (القمر ضاحك يغني) ولمبة (النقتود) قاعدة!..
يا جني... بالله فيه واحد يقدر يصور الحال أكثر من خيالك المجنون..؟
لمبة النقتود دي ما سمعت بيها منذ ما يقرب الأربع عقود، يا لك من قديم الذاكرة، مستجد الخيال!
ما علينا سوى أن نردد...
الله يخرب بيت أوكامبو....
Post: #29 Title: Re: التوربينات سفروها الأُردن! Author: Deng Date: 10-15-2009, 07:03 AM Parent: #28
عبد الله الشيخ.
ودوها الاردن علاج؟
بالمناسبة. وين أخونا ود الباوقة؟
Post: #52 Title: Re: التوربينات سفروها الأُردن! Author: عبد الله الشيخ Date: 10-15-2009, 05:18 PM Parent: #29
سلام يا دينق .. سؤالك مباغت جداً.. حسب تصريحاتهم انهاعيانة ( التوربينات).. لكن احتمال ما يكون علاج .. احتمال تكون (جراحة تجميل)!.. يا دينق .. اختصرت كل الكلام فى ( مسكول)!! عافى منك..
Post: #30 Title: Re: التوربينات سفروها الأُردن! Author: جعفر خضر Date: 10-15-2009, 07:10 AM Parent: #28
يا عبد الله الشيخ التوربينات ودوها الأردن ! البترول ودوه وين ؟!
Post: #60 Title: Re: التوربينات سفروها الأُردن! Author: عبد الله الشيخ Date: 10-16-2009, 03:34 PM Parent: #32
يا المسافر.. هى مسافرة وخلاص .. تجى .. ما تجى .. تزوغ .. تحج .. المهم يا مسافر انهم سفروها الاردن .. ولحدى ما ربنا يفرجا دبر حالك ..بس اوع تكون ممتحن او خاشى معاينة .. الناس ديل ما بتنجح فى معايناتهم لو بقيت ( البيهقى)..!
Post: #67 Title: Re: التوربينات سفروها الأُردن! Author: عبد الله الشيخ Date: 10-16-2009, 04:28 PM Parent: #30
Quote: قلتم لنا أن كهرباء السد دخلت الشبكة، وأن كهرباء السد هي نهاية الفقر في السودان!.. بعد دا كلو جيتو وقلتو التوربينة عيانة!..
الرائع عبدالله الشيخ
يا اخي البلد دي ماشة بالكضب. وما يدهشني حتى الثمالة ان البعض الذي نحسبه (فاهما) يتسابق ليبشر بالفشل و يغني له.
الشيء بالشيء يذكر، ايام ذروة تصدير السكر (بضم السين، مع تحياتي للبنى حسين) كنت في مكتب الرجل الثاني في وزارة التجارة والصناعة فجاءه رهط من كبار مسئولي الوزارة فقالوا له انهم في مشكلة. اليمن طلبت ان تشتري من سكر السودان و نحن لا نملك اي كمية لبيعها لهم. فقال لهم الرجل : بيعوا لليمن من المخزون الاستراتيجي و اشتروا لينا من البحر.
وبعد كم يوم كدا اشوف ليك التلفزيون ينقل مشاهد تصدير السكر لليمن ولم يعرض مشاهد استيراد السكر حتى اليوم.
المهم دعاية وخلاص.
اسمح لي اشكر منان و عسكوري لانهم من اوائل من نبهنا الى اكذوبة السد.
يعني يا عبدالله الشيخ ما نفرح ولا نفرخ اهلنا في الجزيرة والخربت تلاجاتهم في ألتي والتكينة بأنو الكهرباء ستعود من الأردن معافاة صحيحة ؟؟؟ نحن ناس قريحتي راحت ...شالوا الموية من حواشاتنا وختفوا البسمة من أباءنا ولوحوا لنا بعصيهم في غناء جميل بمكبرات الساوند سييستم وسط فورة لبن الجماهير الهتيفة ( القد القد تاني ما بنسد ,,السد السد كضب مو جد)
Post: #34 Title: Re: التوربينات سفروها الأُردن! Author: عبد الله الشيخ Date: 10-15-2009, 11:04 AM Parent: #33
عبد الرحمن حلاوى .. انت بى جدك ؟ .. انت بى صحك؟ فه ناس لوحوا ليكم بالعصى فى احتفالات باذخة ؟ وطيب .. ليه مانقولها فى التلفزيون؟ بينى بينك الجماعة ديل عراضين جد.. ورقاصين جد .. !! وكضبابين جد!!..
Post: #42 Title: Re: التوربينات سفروها الأُردن! Author: عبد الله الشيخ Date: 10-15-2009, 12:37 PM Parent: #31
تعال يا (زول واحد نفتح ملف السكر ( بضم السين) .. مع تحياتى لعسكورى ومنان
Post: #69 Title: Re: التوربينات سفروها الأُردن! Author: عبد الله الشيخ Date: 10-16-2009, 04:33 PM Parent: #31
وبعد كم يوم كدا اشوف ليك التلفزيون ينقل مشاهد تصدير السكر لليمن !!!
يا (زول ) احتمال يكون رسلوهو للحوثيين.....!
Post: #50 Title: Re: التوربينات سفروها الأُردن! Author: عبد الله الشيخ Date: 10-15-2009, 05:10 PM Parent: #28
الله يخرب بيتك يا اوكامبو .. هكذا قال عبد الاله وهكذا قال كارلوس .. طبعاً نحن مع رأى مشايخنا .. سلام لك يا عبد الاله .. عشان زى الحركات دى نحن لسه خاتين لمبة النقتود (حرس البيت) .. كلم الجماعة .. الازيار بتاعة مشكيلة وتمبس لازم يحافظوا عليها .. اقول ليك .. النبرو زاتو عايزين نحتفظ بيهو .. حلق الساقية برضو حننكتو نجيبو .. الاروتى .. وحبل الالس والمرحاكة والكنتوش زاتو قاعد فى التكل .!
Post: #49 Title: Re: التوربينات سفروها الأُردن! Author: عبد الله الشيخ Date: 10-15-2009, 04:39 PM Parent: #26
شكرا يا كارلوس .. صحى .. كلو من اوكامبو .. الرد على اوكامبو جاب (هوا).. وحيجيب تلاقيح ..!
Post: #65 Title: Re: التوربينات سفروها الأُردن! Author: عبد الله الشيخ Date: 10-16-2009, 04:02 PM Parent: #25
ممكن جدا شوية سيراميك و عمارة المونيوم تعجبك لكن مطرة مطرتين بتكشفك و ممكن جدا سد و كبرى يعجبك لكن توصيله و اتنين بتكشفك (من اغانى التراث)
........ والله يا اسعد زمن ما ضحكت زى الضحكة دى ....! قلت لى السراميك خش اغانى التراث ؟
Post: #48 Title: Re: التوربينات سفروها الأُردن! Author: عبد الله الشيخ Date: 10-15-2009, 04:30 PM Parent: #24
الاخ احمد محمد بشير .. شكراً على كلماتك الطيبة وعلى رفعك البوست انا شايف انو احسن يقروا برضو.. !!
Post: #46 Title: Re: التوربينات سفروها الأُردن! Author: عبد الله الشيخ Date: 10-15-2009, 04:24 PM Parent: #23
صديقى جلال عثمان .. ما شايف صاحبنا محمد الشيخ بيسأل (موية سد الشريق حيجيبوها من وين)؟ ياريت لو تلقى ليهو اجابة بين هذه الاحصائيات تقبل شكرى وتقديرى ..
Post: #41 Title: Re: التوربينات سفروها الأُردن! Author: عبد الله الشيخ Date: 10-15-2009, 12:18 PM Parent: #20
موية سد الشريق حيجيبوها من وين ؟ سؤال وجيه يا ود الشيخ .. لكن حقو نسالهم توربينات سد الشريق جنسيتها شنو؟
Post: #36 Title: Re: التوربينات سفروها الأُردن! Author: عبد الله الشيخ Date: 10-15-2009, 11:18 AM Parent: #18
اشرف عبد الودود.. لاحظ السدود ماشه .. اظنهم ما حيقيفوا الافى العيكورة ، لانو ما معقول يبنو خزان بين سنار و الروصيرص .. عليه احسن تألفوا هتافات جديدة لانو هتافات زمان ما جابت حقها .. ... والهتاف اصلاً ما بيجيب "مريسة لينين".. طيب .. نقع وين؟ تحياتى
كل ما فتحو مركز صحي أو جسير صغيرون أو شوريع مجلط بشوية زفت كمبلو وعرضو ...جنس حت
Post: #39 Title: Re: التوربينات سفروها الأُردن! Author: محمد المرتضى حامد Date: 10-15-2009, 11:43 AM Parent: #36
واحد من (أخوانا) إياهم جمعتنا به دعوة وأراد أن ينصحنا بتنويع أفكارنا حول إيجاد حل للمسألة الإقتصادية فقال : يا اخوانا حاولوا (شتتوا) أفكاركم وحا تلاقوا حل ، قالها دون أن يطرف له جفن وما عنى في حديثه مزحا. هسه أنا بقول ليك يا عبدالله حاولوا شتتوا أفكاركم وفجِّغوها وتبنوا الفكره الوارده في الفيديو كليب أدناه رغم أنها ستفضي بنا عما قريب لتشكيل كوراس مع محمد سلاَّم و...قام يتعزز الليمون. بمناسبة الليمون ، النظام الحالي دا من تيت سموهو الفريد في عصرو.
العزيز عبدالله الشيخ سلام نحن زمان قلنا في البورد ده من 2002(الارشيف) كان شبتكو كهرباء من مصر طوالي لحدت الخرطوم عبر الشمال كان احسن
قامو عملو سدهم دا والغريب خلو الابراج لحدت دنقلا بس...نكاية بالحلفاويين البقو حركة شعبية
يعني هسه...لوكان الابراج وصلت حلفا...كنت رسلت ليهم وصلة التلفزيون العندي دي...عشان يسرقو كهرباء من مصر بدون جمرة خبيثة...ويهتفو السد السد الرد الرد...منو العارفو السد العالي ولى سد مروي
والله يا حليل اهلنا بين كرمة كريمة بقت قصة الكهرباء عندهم اغنية هاشم ميرغني الله يرحمه غيب وتعال لا لقيناك وفرحنا لا نسيناك واسترحنا .... انا خايف يجرو السد ذاتو بكراكة يمشو يصلحو في الصين
ونهر الاردن... انا من زمان فهمت انو الموضوع سد نفس بث
Post: #56 Title: Re: التوربينات سفروها الأُردن! Author: MOHAMMED ELSHEIKH Date: 10-16-2009, 09:53 AM Parent: #55
Quote: حقيقة (2) فى العام 1990 تم فصل عشرات من مهندسى اكهرباء العاملين ببحرى الحرارية و برى للصالح العام و هؤلاء كانوا قد تلقوا التدريب و التأهيل فى ايرلندا و غيرها للعمل على محطتى بحرى و برى . ________
Post: #57 Title: Re: التوربينات سفروها الأُردن! Author: Deng Date: 10-16-2009, 11:01 AM Parent: #56
يا جماعة.
يمكن تكون التوربينات دي مشت تشارك في مظاهرة كيزانيية في عمان عنوانها:
نجاح لتجربة تشغيل توربينات سد مروي بالتنسيق مع هيئة الكهرباء أكدت مصادر خاصة لـ (آخر لحظة) أن تجربة تشغيل واختبار توربينات محطّة توليد سد مروي قد تمّت بنجاح في وقت متأخِّر من ليل الإثنين الماضي، دون حدوث أي تأثير على الإمداد الكهربائي بالبلاد. وذكرت ذات المصادر أن الاستشاري شركة (لامير) الألمانيّة والمقاول الفرنسي شركة (الستوم) قد أشرفا على الاختبارات الروتينيّة. وأفادت متابعات (آخر لحظة) أن تنسيقاً تاماً قد جرى ما بين محطة توليد سد مروي ومركز التحكُّم بالهيئة القوميّة للكهرباء حال دون حدوث إظلام تام بالبلاد، بعكس ما كان قد جاء في بيان صادر يوم الأحد الماضي من الهيئة القوميّة للكهرباء، أشار إلى وصول خبراء أجانب، وهو ما وصفته مصادر (آخر لحظة) بالحديث العاري من الصحة والمجانب للحقيقة. وتشير (الصحيفة) إلى أن البيان المشار إليه كان هو القشّة التي قصمت ظهر العلاقة بين إدارة السدود وهيئة الكهرباء في عهد مديرها المقال المهندس مكاوي محمد عوض. اخر لحظة العدد رقم: 1146 2009-10-15 ________________ عقبال بيكى نفرح يا زينة نشرب شرباتك و نوقد شمعاتك
Post: #71 Title: Re: التوربينات سفروها الأُردن! Author: عبد الله الشيخ Date: 10-16-2009, 04:38 PM Parent: #57
يا جماعة.
يمكن تكون التوربينات دي مشت تشارك في مظاهرة كيزانيية في عمان عنوانها:
الرد الرد، الرد بالسد ... دينق.. طبعاً هم الآن نسوا موضوع الرد بالسد .. صدقنى الموضوع دا ما بيطروهو خالس .. يكونوا ماشين الاردن عشان يؤكدوا تأييد السودان لخالد مشعل؟
Post: #59 Title: Re: التوربينات سفروها الأُردن! Author: عبد الله الشيخ Date: 10-16-2009, 03:28 PM Parent: #55
الاخ صلاح اسماعيل .. العملية سد نفس.. دا صحى .. لكن نفس منو؟ نفسنا نحن ؟ أم نفس عصام احمد البشير ؟ ام نفس اوكامبو؟ ( أفرز)!!
الانسدت نفسي انا..طلعت من السودان سبتمبر 89 خليت الكهربا قاطعة والمجاري الموجوده مسدوده...الناس تقول ارجع السودان بقي سمح ....والله السودان سمح بسماحة اهلنا المساكين... دي سنه 2009 والحال .. ما عارف اقول شنو...لكن بامانه كلماتك صادقه وحسك نبيل وقلبك صافي....
الكلمة...هي امر التكوين...
بهزم الخوف وارضي بيك اقول الم الباقي مني مع الفضل منك معاي ارجع اجيك.. عشرين سنه كل يوم بسأل عليك... متابع اخبارك علي صوت الاذاعات الجرايد ومنتظر بسمة وشيك.. لسه نايم في سرير تحته المخاوف وبالصبر فارد لحاف داسي حلمك في عنيك... كاني قاعد في السرير جنبك وخاتي ايدي في جبينك وبقري ليك... واقري ليك.. ومنتظر تفتح عيونك او تحرك بس ايديك او تقول اسمك تأشر للحروف يتجمعن.. واو طا ونون اسمك وطن اسمك وطن
بهزم الخوف وارضي بيك
صلاح خليفه اسماعيل 10-16-2009
Post: #76 Title: Re: التوربينات سفروها الأُردن! Author: عبد الله الشيخ Date: 10-16-2009, 06:13 PM Parent: #75
وانا برضو بقول ليك تعال راجع .. يعنى خلينا ليهم السلطة والثروة .. نقوم نخلى ليهم الواطا زاتا؟ يا زول تعال .. عشان تسمع ( ورا ورا ).. نحن محتاجين الى ادلجة اغنية ورا ورا لتكون فى مصاف الاغنيات( الوطنية).. من 89 مافى حاجة اتعملت ، باقى ليك دا مو ياهو ورا ورا زاتا؟.. لكن برضو ( صغارك مشتهين ترجع ).. تحياتى لك يا صلاح .. انا احس بغربتك ( المجيدة ) ..
Post: #68 Title: Re: التوربينات سفروها الأُردن! Author: عبد الله الشيخ Date: 10-16-2009, 04:31 PM Parent: #54
يجرو السد ذاتو بكراكة يمشو يصلحو في الصين ...
فكرة برضو ممكن ينفذوها .. الله يستر .. تحياتى لعادل امين .
Post: #64 Title: Re: التوربينات سفروها الأُردن! Author: عبد الله الشيخ Date: 10-16-2009, 03:58 PM Parent: #51
شكلها(التوربينات ) دي ما شه سياحة .. emad altaib
احتمال برضو .. يعنى نظام :
(إنجازات و إجازات ).. ؟؟ عفارم عليك ..
Post: #63 Title: Re: التوربينات سفروها الأُردن! Author: عبد الله الشيخ Date: 10-16-2009, 03:50 PM Parent: #39
شتتناها يا ود المرتضى .. بس ورينا .. موية الليمون زاتو يجيبوها من وين ؟ محمد الشيخ بيقول انهم دفروا موية الجزيرة عشان يدورو التوربينات .. وزى ما شايف التوربينات عصلجت .. دى زى حكاية تلقى البييبسى ما تلقى الباغة ، تلقى الباغة ما تلقى المواصلات !
Post: #62 Title: Re: التوربينات سفروها الأُردن! Author: عبد الله الشيخ Date: 10-16-2009, 03:42 PM Parent: #18
اشرف .. بعد علاج التوربينات لازم تعملوا هتافات تانية .. عشان تكونوا مواكبين شوية ..
أغلب الظن حا يشوفا فايز الطراونه لأنو قالوا بتسخن سريع ونحن من هنا بنهدي ليها أغنية: يا نسيم ارجوك روح لها وحييها.
Post: #78 Title: Re: التوربينات سفروها الأُردن! Author: عبد الله الشيخ Date: 10-16-2009, 06:33 PM Parent: #74
يا ود المرتضى .. طالما انك وباختيارك دخلت باحة الشعر الغنائى .. فمن الافضل ان نغنى لهذه التوربينات اغنية الكابلى التى تقول : ( يا قمر دورين ... أنا شفتك وين )!.. خاصة وانها ما دورت فى اكتر من (دويرتين) تقريباً وتقريباً دى لازم نقولا عشان ما نظلم الجماعة !! .. وخلالهما كانت تدويراتها بره الشبكة !!.. وفى ذات السياق ممكن تتذكر الكابلى برضو فى رائعته: (يالحلة تنورى يا حلة تنورى .. إنتى حاشاك تتغيرى )!! بما انه فى النهاية قال ( شتتى الشبال كترى .. ويا عيونى إتصبرى).. !!.. بهذا المقطع ( يا عيونى اتصبرى)!!يكون شاعرنا قد ( تكهن ) بعدم عودة التوربينات الى التدوير نهائياً فى رائعته ( مروى)..!! إذ الشاعر وبعضمة لسانو قال انه شاف فيها كل جديد...!! شفت كيف يا صاحبى ؟
Post: #77 Title: Re: التوربينات سفروها الأُردن! Author: عبد الله الشيخ Date: 10-16-2009, 06:21 PM Parent: #73
انا عاجز عن الشكر .. ولولا بعض ( العزة بالاثم ) لقلت ان شعورى بهذا الاطراء يشبه شعور اوباما حين تم اختياره للفوز بجائزة نوبل .. Magdi Ahmed Elsheikh والباشمهندس بكرى معاً...
أولاد الشيخ سلمى, عبد الله ومجدي من ود الشيخ سلام. ولأخي ود حامد(حلوة دي يا مرتضي) بس عندي سؤال يا عبدالله في قصيدة مروى سالفة الذكر اين تقبع الرمزية في : دا الشال السيدة وخل حرم حرم دا خلوها ليه؟
Post: #80 Title: Re: التوربينات سفروها الأُردن! Author: عبد الله الشيخ Date: 10-16-2009, 07:32 PM Parent: #79
محمد الشيخ ..
والله انتو يا المغتربين دايرين تدخلونا فى ( الشبك).. ياود الشيخ .. غرقوك بى سد الشريق دايرنا نحن نتكلم فى السياسة (بالداخل)،، وانت قاعد فى السعودية تاكل لي فى البتيخ؟.. لكن .. برضو .. ( نساهم معاكم فى الاجابة على هذا السؤال ( الحار).. طبعاً سمعت إنو شالوا مكاوى .. صاح ؟.. ( وطيب)؟؟.. برضو ما قادر تتذكر ( شفيق).. ياراجل .. شفيق اللى .. اللى كان بيمشى فى الشارع!؟..
يا خي هناك امبراطورية في الهيئة المركزية تحتاج لي ثورة زي الأنتفاضة , وشيل مكاوي انا متأكد لا بيودي ولا بيجيب و الله دا خاتنو كبش فداء لتبييض الوجه وما بعيد يكون هناك اتفاق معاه أو حتى باقتراح منو حتى يتم تجهيز موقع جديدله. بعدين ياخي انتو في الداخل مش رفعوا منك الرقابة " القبلية"؟ طيب خايف مالك ما هو موقفك تمام. نحن والله بي بتيخنا دا الواحد ممكن في اقل سفرة لل"داخل" كدى ممكن يقطعوا حبوبة ابو صليب ميتين رزقك ذاتو
تعرف يا عبدالله ملاحظتك في مكانا الكابلي مهتم بكل مصادر الإضاءة فقد غنى كم دمعه سالت فوق خدود الشمعة. تكون شمعة مروي يا أبو عبده؟
Post: #83 Title: Re: التوربينات سفروها الأُردن! Author: عبد الله الشيخ Date: 10-17-2009, 11:07 AM Parent: #81
مش رفعوا منك الرقابة " القبلية"؟ طيب خايف مالك ما هو موقفك تمام. نحن والله بي بتيخنا دا الواحد ممكن في اقل سفرة لل"داخل" كدى ممكن يقطعوا حبوبة ابو صليب ميتين رزقك ذاتو .......
يا ود الشيخ هنا وهناك كلو يا هو ( الكوراك)..
Post: #84 Title: Re: التوربينات سفروها الأُردن! Author: حمور زيادة Date: 10-17-2009, 11:24 AM Parent: #83
