Post: #1
Title: اقالة مدرب المنتخب الوطني قسطنتين بقرار جمهوري
Author: بكري الخير
Date: 10-12-2009, 08:34 AM
Parent: #0
ليلة امس وبعد مباراة السودان ومالي في تصفيات الامم الافريقية المباراة الغريبة الاطوار نمت مغبون علي مدرب المنتخب الوطني الذي اوصلنا الي هذه الدرجة من الهرجلة الكروية بعدما كنا نسير الي الامام
غالبني النوم في بداية الامر وعندما نمت حلمت بأن الشارع السوداني كله في الشارع يهتف ضد هذا القسطنتين فاذا بعمر البشير يصدر قرار جمهوري باقالته وترحيله الي بلاده
حينها فقط لا ادري لماذا تزكرت اغنية العطبراوي يا غريب يلا لي بلدك ؟؟؟
|
Post: #2
Title: Re: اقالة مدرب المنتخب الوطني قسطنتين بقرار جمهوري
Author: قلقو
Date: 10-12-2009, 08:57 AM
Parent: #1
الأخ بكرى
بالله عليك من هو اولى بالطرد والأقالة أهو المدير الفنى قسطنطين ام اولئك اللأعبين المدللين والمدلعبن الذين تخاذلوا عن الألتحاق بالمنتخب الوطنى رفضا منهم لسياسة الأنضباط التى فرضها عليهم المدير الفنى للمنتخب .
وكيف تواتى الجرأة المدير الفنى ليفرض على كباتننا الكبار الأنضباط وهم ابطال افريقيا الذين كأنهم لم يأتوا محملين بتسعة اهداف من غانا دون ان يفتح الله هليهم بهدف يحفظ ماء الوجه؟ كيف يفعل ذلك قسطنطين بكباتننا وهم ابطال كأس العالم الذى لم يلعبوا فيه طوال تاريخهم؟ لقد ظن كباتننا بأنهم صاروا انصاف آلهة وفى الحقيقة هم افشل من الفشل ذاتو,
لقد ظنوا بأنهم قد صاروا موضعا لحسد لاعبى البرازيل والأرجنتين وايطاليا والمانيا.
حقا رحم الله امرئ عرف قدر نفسه,لكن كباتننا العظام لايعرفون ذلك .
عليك الله يابكرى خليك حقانى شوية وما تطعن الفيل فى ضلو.فأسباب فشلنا الكروى واضحة وضوح الشمس ومادايرا ليها درس عصر.
لكن صدقنى لا المدير الفنى الحالى ولا الذين سبقوه سبب من اسباب فشلنا.
مع تحياتى.
|
Post: #3
Title: Re: اقالة مدرب المنتخب الوطني قسطنتين بقرار جمهوري
Author: أحمد ابراهيم عثمان
Date: 10-12-2009, 09:04 AM
Parent: #2
و الله يا الاخو لو كان اللاعب امس هلال ولا مريخ كان جونا بفضيحة
الزول خقق افضل ما يمكن وفق الامكانيات المتاحة و اللعيبة المنضبطين
|
Post: #6
Title: Re: اقالة مدرب المنتخب الوطني قسطنتين بقرار جمهوري
Author: معاوية عوض الكريم
Date: 10-12-2009, 10:00 AM
Parent: #3
Quote: و الله يا الاخو لو كان اللاعب امس هلال ولا مريخ كان جونا بفضيحة
الزول خقق افضل ما يمكن وفق الامكانيات المتاحة و اللعيبة المنضبطين |
خالف تُذكر ولا شنو ؟
قوم لف عليك الله
|
Post: #4
Title: Re: اقالة مدرب المنتخب الوطني قسطنتين بقرار جمهوري
Author: Hisham Ibrahim
Date: 10-12-2009, 09:04 AM
Parent: #2
Quote: فاذا بعمر البشير يصدر قرار جمهوري باقالته وترحيله الي بلاده
|
دا حصل متين ؟؟
الغريبه !
بعد ما نتمردغ في الفضـيحه يجي القرار ! يبهدلنا أكتر !
مصطفى الأغا قال : هذي شغله طويلة !! وجر نفس
نحنا نقول ونجر شنو ؟؟؟
هشام
|
Post: #5
Title: Re: اقالة مدرب المنتخب الوطني قسطنتين بقرار جمهوري
Author: Sayed Bekab
Date: 10-12-2009, 09:19 AM
Parent: #4
قسطنطييييييييييييييين اذهب بلا رجعه
|
Post: #7
Title: Re: اقالة مدرب المنتخب الوطني قسطنتين بقرار جمهوري
Author: moaz elsir
Date: 10-12-2009, 10:31 AM
Parent: #5
(احسن مدرب ) و (افشل لعيبة)
(يجب ان سيتمر) و (يذهب اللعيبة الصعاليك)
معاذ
|
Post: #8
Title: Re: اقالة مدرب المنتخب الوطني قسطنتين بقرار جمهوري
Author: Adam Mousa
Date: 10-12-2009, 11:17 AM
Parent: #7
Quote: (احسن مدرب ) و
(يجب ان سيتمر) |
|
Post: #9
Title: Re: اقالة مدرب المنتخب الوطني قسطنتين بقرار جمهوري
Author: طلحة عبدالله
Date: 10-12-2009, 12:05 PM
Parent: #7
استغرب والله في اللذين مازالوا يلقون باللائمة على مدربي المنتخب ..
طابور من المدربين محليين واجانب تولوا قيادة هذا المنتخب
فذهبوا كلهم وبقي هذا المنتخب ينتقل من هزيمة لهزيمة
فهل كل هولاء مخطئين والصاح هم اخوان هيثم مصطفي وقلق وعلاء الدين يوسف ..؟؟
أري ان المدرب الحالي مدرب جيد وعارف شغلو كويس والدليل تسريحو لكل
لاعب غير منضبط دون النظر لأسمو المصنوع صناعة من صحافة المدرجات .. وهذا لوحده إنجاز يستحق عليه
البقاء للأبد في قيادة منتخبنا الذي حوله بعض نجوم الورق للاوطني .
اتمني والله ان يتم جميلو ويلحق باللاعبين المطرودين من المنتخب المتلاعب علاءالدين
يوسف الذي ظل يمارس هويته العبيطة في نيل البطاقات الحمراء أينما ذهب .
|
Post: #10
Title: Re: اقالة مدرب المنتخب الوطني قسطنتين بقرار جمهوري
Author: حيدر بشير
Date: 10-12-2009, 02:36 PM
Parent: #9
لماذا لا نبدأ من الصفر و نأتى بلاعبين صغار السن للمنتخب القومى و نربى فيهم روح الإنضباط و لتكن لمدة عشر سنوات ثم بعدها نجنى شيئآ من الثمر
لقد صبرنا لأكثر من خمسين عامآ لم يتحقق حلمنا فى اللعب بكاس العالم فماذا يضيرنا لو صبرنا عشرة سنين أخرى
أما بدلال اللاعبين الذى نراه الآن و عدم الإنضباط وضعف الإدارة فلن نجنى شيئآ
فى تقديرى الشخصى أن هذا المدرب وإن لم ينجح فى إحراز نتيجة إيجابية إلا أنه قد بدأ الإعداد لنشر ثقافة الإنضباط من اللاعبين وهذا إنجاز ما بعده إنجاز
|
Post: #11
Title: Re: اقالة مدرب المنتخب الوطني قسطنتين بقرار جمهوري
Author: Mohamad Shamseldin
Date: 10-12-2009, 05:04 PM
Parent: #10
قسطنطين من أفشل المدربين الذين دربوا الفريق القومي…
1. أصله قبرصي و لا أدرى ما علاقة قبرص بكرة القدم.... و كان هناك مدرب حراس مرمي... و لو في واحد بيعرف فريق قبرصي يورينا...
2. خبراته في نيبال و الهند و أشباهها…. سمعتوا بالفريق النيبالي ؟ و ملاوي خسر 6 مباريات و فاز في 2
3. من ضمن خبراته مساعد مدرب لفريق ولاية نيويورك .... أول مرة أسمع بالفريق ده...
4. راجل متواضع الخبرات...
5. راتبه متواضع لانو الرخيص برختصو....
6. الجدية و الصرامة التي يدعيها لانو كيسو فاضي فلازم يشوف ليهو حاجة... و ما جابت نتيجة .... طيب لو الجدية وحدها تكفي ..ممكن نجيب خفير مستشفي بدلو...
7. كثيرا لا يحضر المؤتمر الصحفي ...فاكيها في روحه...
8. من أكثر المدربين الذين قذفهم الجمهور بالحجارة و القارورات الفاضية ... مكروه من الجمهور و اللعبية ...
9. الراجل ده كفيلو شداد و وافق عليهو الوزير محمد يوسف و هم المسئوليين عن ما أصابنا بسببه
|
Post: #12
Title: Re: اقالة مدرب المنتخب الوطني قسطنتين بقرار جمهوري
Author: abdalla osman
Date: 10-12-2009, 08:22 PM
Parent: #11
| Quote: نحنا نقول ونجر شنو ؟؟؟ |
نخت الخمسه فوق الاتنين لامن شداد يقتنع
|
Post: #13
Title: Re: اقالة مدرب المنتخب الوطني قسطنتين بقرار جمهوري
Author: سيف الدين عوض
Date: 10-12-2009, 11:33 PM
Parent: #12
Quote: لماذا لا نبدأ من الصفر و نأتى بلاعبين صغار السن للمنتخب القومى و نربى فيهم روح الإنضباط و لتكن لمدة عشر سنوات ثم بعدها نجنى شيئآ من الثمر
لقد صبرنا لأكثر من خمسين عامآ لم يتحقق حلمنا فى اللعب بكاس العالم فماذا يضيرنا لو صبرنا عشرة سنين أخرى
|
لابد من مدراس سنية.... تعمل علي تعليم المهوبين اصول لعب كرة القدم...
لم تعد المهوبة فقط كافية داخل المستطيل الاخضر ...صناعة النجوم تتم بالتمرحل ..
وليس بين صحفات الجرائد ...واعمدة المشجعين ..
|
Post: #14
Title: Re: اقالة مدرب المنتخب الوطني قسطنتين بقرار جمهوري
Author: عبدالله كع
Date: 10-13-2009, 06:52 AM
Parent: #13
السلام عليكم يا ساده
هل الفترة كانت كافيه عشان يعمل قسطنطين من الفسيخ شربات ؟؟؟
واذا كانت الفترة - حقيقة - كافيه اذن تدريب قسطنطين للمنتخب - باااااااااااااااااطل و فااااااااااااااااااااااااااااااااااشل!
وان كانت الفترة غير كافيه لعمل الشربات من الفسيخ - فيكون عمر البشير تدخل فيما لايعنيه وبالتاكيد سوف يسمع ما لايرضيه -
وبيني وبينكم قسطنين فاشل ( البجي السودان ) واللعيبه قمة في الفشل ( لانهم سودانين )والاتحاد السوداني فاشل ( شداد سوداني ) .. ونحنا برضو فاشلين .... قاعدين ننظر ساكت ( لاننا سودانين ) والاعلام سبب كل الخراب ( اعلام سوداني ) والجمهور فاشل - طبعا جمهور سودانس
ودولة السودان الشقيق فاشلة فشلا زريعا في كرة القدم -
وبعد ده بنحب السودان لدرجه الدروشه !!
دروشه .............
|
Post: #15
Title: Re: اقالة مدرب المنتخب الوطني قسطنتين بقرار جمهوري
Author: الفاتح يوسف العبيد
Date: 10-13-2009, 07:47 AM
اعتقد يجب ان نعطي المدرب حقه في الاشادة -- الفريق السوداني قبل سنة والفريق به كل النجوم --هيثم مصطفي والعجب وسفاري وعمر بخيت وقلق ومعز -- اخذ علقة ساخنة في مالي وانهزم 5- صفر -- المنتخب ليس له وجيع -- هيثم مصطفي يعتذر من المنتخب ويلعب ثاني يوم مع الهلال -- قلق لديه سوابق عده لتمرده عن النتخب ونفس الشي بنطبق علي معز -- لعيبه الهلال والمريخ فوق القانون اللعب للهلال والمريخ اهم من المنتخب ويتم هذا بدعم اداري القمة وصحافتهم -- اتذكر في الماضي البعيد وزمن الكرةالجميلة والمنتخب في طريقة الي اكرا 1963 لنهئيات افريقا وتوفي والد اللاعب جعفر قاقارين اصر قاقارين ان يذهب لاداء ضريبةالوطن وذهب مع المنتخب مع احزانه وقدم افضل مستوياته -- وحادثة اخري في نهائيات افريقيا 1970 حينما اصطدم سمير صالح ونجم الدين حسن وسالت الدماء الغزيرة من راسيهما واصر نجم بمواصلة اللعب بعد تغير سمير وفقدان المنتخب اي فرصة للتغير لعب نجم الدين وهو مربوط الراس والدماء علي راسة في خط الوسط بعد ان تم ارجاع بشارة والدحيش لخط الظهر ولقد كانت ملحمة انتهت بانتصار السودان ووصوله لنهائي وفوزه بكاس افريقيا
اعتقد فريق ينهزم من مالي 1- صفر ويلعب ناقص هذا ليس بساهل وكذلك هزيمة من غانا بغانا 2- صفر وهزيمة من بنين 1- صفر كل هذه الفرق دائما في ارضها تفوزعلي السودان باكثر من هدفين
|
Post: #16
Title: Re: اقالة مدرب المنتخب الوطني قسطنتين بقرار جمهوري
Author: عثمان جلال الدين
Date: 10-13-2009, 09:36 AM
Parent: #13
1. الحل النهائي يكمن في العودة لنظام جهاز الأشبال بالأندية لتفريخ اللاعبين المشبعين بالموهبة والتدريب حيث أن نظام المراحل السنية الحالي لم تنج عنه أي ايجابيات ظاهرة، علماً بأنه يتولى تدريبهم مردبين ليس لهم مؤهلات أو مجموعات مختلفة من الرياضيين.
2. الوضع الراهن للمنتخب تسببت فيه بشكل كبير الصحافة الرياضية (غير الموضوعية) بانحياز كتاب المريخ للاعبيهم وتحاملهم على المدرب لابعاده للعجب ومن ثم وقوفهم مع قلق في مشكلته مع المدرب وابعاده لسفاري لعدم الانضباط وكذا فعل صنوهم من مشجعي الهلال (كتابه) بتهجمهم على المدرب لفرضه سياسة الانضباط وابعاده للمعز وعمر بخيت مما شجع غيرهم من من رغب المدرب في الاستعانة بهم لدعم الشباب المنضبط بخبرتة من أمثال هيثم مصطفى وقلق في وقت سابق وبالتالي غابت الروح المعنوية أو قتلت (بضم التاء) عن الالعبين بفعل صحافة المشجعين.
لا أدري لماذ يكره الرياضيين في بلادي مبدأ الانضباط والتجديد ولماذا يتدخلون في الشأن الفني؟؟
العودة للأشبال بأسس وضوابط مناسبة هو الحل المستقبلي..
احتراماتي..
|
Post: #17
Title: Re: اقالة مدرب المنتخب الوطني قسطنتين بقرار جمهوري
Author: Mohamad Shamseldin
Date: 10-14-2009, 01:02 AM
Parent: #16
| Quote: العودة للأشبال بأسس وضوابط مناسبة هو الحل المستقبلي. |
عثمان
و الأشبال ديل يتمرنو في ياتو ميدان...
اذا كان حكومتنا الرشيدة باعت أي ميدان أو سهلة.....في الخرطوم
ما يجي واحد يقول الاقاليم و الهامش و هلمجرا...
الكورة في الخرطوم و مدني و بورتسودان.... و الباقيين عليهم مراعاة فروق الوقت
.......
ده تفكير بتاع دولة مستقرة و عندها تخطيط !!! علي بال ما الاشبال يصلو و يبقو في المنتخب يمكن يجي واحد يقلبها.....
ما قبل كده ناس شيخ إدريس كباشي مشو كويس... و عملو التيم بتاع ناس خالد أحمد المصطفي .... لكن بعد داك ما مشت...
يا جماعة ليبيريا كان فيها حرب ... لقطهم جورج ويا و عمل منهم تيم زي العجب
دايرين واحد يعمل لينا تيم بالموجود...و مدرب يتفهم نفسية اللاعب السوداني
الحكومة ما عاوزة تجيب مدرب زي الناس و حتي ال 25 الف دولار شايفاها كثيرة
اري أن تجربة الاحتراف افادت كثيرا ..و لو عندنا كم لاعب مشو احترفو في اوربا ... نكون قطعنا نصف الطريق
|
|