أرجو المساعدة ، بأن تبحثوا معي عن شقّة للإيجار بالرّياض .

واللهِ يا جماعة فتّشتَ لمّن تعِبْت وما لقيت لَيْ شقّة أتَّاوا فيها مع شُفّعي .
مواصفات الشّقة الدَّايرا بسيطة جدًّا :
- غرفتين وحمّامين وصالة .
- قريبة من رياض أطفال ومدارس .
- بحدود عشرة ألف ريال بالسّنة مع المكتب ( معليش دا البقدر عليهو ) .
- الأحياء القريبة من شغلي ( شغّال في مخرج 17 ) :
الخالديّة ، العزيزيّة ، الدَّار البيضاء ، النّسيم .
وحين العثور عليها ، هاكن دا تلفوني :
0507825418

وجزاكم الله خيرًا .
أخوكم / محمَّد زين .
__________________-
واللهِ لَيْ قريب الشهرين بفتِّشْ .

يا جامع يا رقيب


كيفك محمد زين وتحياتي للأسرة

أهلا بيك يا طارق ، وكيف حال الوالدة ، عساها وبقيّة العقد بخير .
إيدك معانا ، المسافة بِعدتْ علي ياخ ، قلت أقرِّب شويّة من الشّغل .
تحيَّتي .

( * ) .

Quote: الخالديّة ، العزيزيّة ، الدَّار البيضاء ، النّسيم

طبعا بعشرة ما بتلقى فى الاحياء دى
لانها جديدة وبيوتها واسعة,,,,نحن ساكنين ب12 بس ما بتنفع لاسر كبيرة
بس يلقو ليك رياض اطفال وين,,,ممكن الواحد يدفع الفرق عشان يكسب جيرتك
عموما ربك يهون,,,,بنرمى عيناوتلفونك بطرفنا

محمد زين ...

الزول الزين ... كيفك ... علك طَيِب ...


مِن حول في الرِياض كِبيدي إتْفَتَفَتْ ...
تسمع قِليبي يِِدُق يِقولك فَتْ ... فَتْ ...
يِمْه مِن نوحي نور عِيوني إتْخَتْفَتْ ...

نُناشِد جمعِيات المحس/السَكود/دُنقُلا بِمُساعدة الأخ محمد زين

Quote: طبعا بعشرة ما بتلقى فى الاحياء دى ، لانها جديدة وبيوتها واسعة.

صدَقْت واللهِ ، حالتي اتقطَّعتا فيها يا أبقوتة ، هههه .

Quote: ,,,,نحن ساكنين ب12 بس ما بتنفع لاسر كبيرة

أُسرتي ما كبيرة ، هم فقط : فَدْ شافعتين وشافع بس ، في أيِّ زاوية بقُعْدوا رايقين بدون زَوْبعة.

Quote: بس يلقو ليك رياض اطفال وين,,,

غايتو ، ربّك يهوِّن .

Quote: ممكن الواحد يدفع الفرق عشان يكسب جيرتك

أصيل يا أبقوتة ، وكأنّك قد فعلت ما بدأ منك من قول.

Quote: عموما ربك يهون,,,,بنرمى عيناوتلفونك بطرفنا

كتّر خيرك يا أبقوتة وما بتقصّر ، وإن بقيتن لقيت ، أدَّني تلفون.
وعارفك ما بتقصِّر .


___________________________________

* الحبيب أبقوتة ياخي توّهتني بي صورة معتصم دي ياخي ، وكنت فاكرك معتصم عشان كِدَة ردّيت على اعتبار إنّك معتصم ، شكرًا لي حبيبنا وأُستاذنا / اسماعيل محمّد عبّاس ، النّوّهني على الرَّبكة دي ، وصدقو القالو : " الشّوف بالقلب ما بالعين " .والتَّحيّة عبركما لحبيبنا / معتصم دفع الله .

محمد الذين السلام عليك .

ما عايز احبطك ولكن ... سوف تفرج من حيث لا تحتسب -
قبل رمضان يا خي انا ((امنته)) صاحب العمارة قالو فضو البيت - ولاحولة ولا قوة الا بالله العلي العظيم
لفيت الرياض من شمالها لجنوبها ومن شرقها الي غربها - لم اجد شقه بنفس مواصفاتك امكن اقلة كمان - ونفس الملبغ - تعبته جد والله - ما في نهائي - .... والحمد لله لقيت الشقه بمواصافة تمام واقلة من العشرة زاته والحمدلله -
لازم تعمل دعاية قويه يا محمد لكل اهلك ومعارفك ومعارف معارفك وصدقاءك واصدقاء اصدقاءك بانك دابر شقه - وعن طريق الدعايه بتلقي الفي مرادك وكمان حا تختار وتنقي - وانسي الجري وراء مكاتب العقار والكلام الفاضي -

توقع تلفون ..

Quote: محمد زين ... الزول الزين ... كيفك ... علك طَيِب ...

أهلا بالحبيب / عزّام ، كيف حالك ، وعلّك بخير ، والعيد أُمبارك عليك.

Quote: مِن حول في الرِياض كِبيدي إتْفَتَفَتْ ... تسمع قِليبي يِِدُق يِقولك فَتْ ... فَتْ ... يِمْه مِن نوحي نور عِيوني إتْخَتْفَتْ ...

تسلم واللهِ يا عزّام من كلّ شر وبلاء . وعادبعد الشّعر دا أكّان ما لقيت لَيْ شقّة في الرياض ياني النَّاطي عليكُن في الدّوحة ، وإن شاء الله أداوم من هناك ، هههههه .

Quote: نُناشِد جمعِيات المحس/السَكود/دُنقُلا بِمُساعدة الأخ محمد زين .

كمان يا عزّام ما تقول عندي حبّوبتًا لي محسيّة اسمها ( بتّ الشيخ إدريس ) ، يعني أنا منّكُن وفيكُن .
وما بتقصّروا واللهِ ، التّحيّة لي أهلي المحس قاطبة .

Quote: محمد الذين السلام عليك . ما عايز احبطك ولكن ... سوف تفرج من حيث لا تحتسب - قبل رمضان يا خي انا ((امنته)) صاحب العمارة قالو فضو البيت - ولاحولة ولا قوة الا بالله العلي العظيم لفيت الرياض من شمالها لجنوبها ومن شرقها الي غربها - لم اجد شقه بنفس مواصفاتك امكن اقلة كمان - ونفس الملبغ - تعبته جد والله - ما في نهائي - .... والحمد لله لقيت الشقه بمواصافة تمام واقلة من العشرة زاته والحمدلله - لازم تعمل دعاية قويه يا محمد لكل اهلك ومعارفك ومعارف معارفك وصدقاءك واصدقاء اصدقاءك بانك دابر شقه - وعن طريق الدعايه بتلقي الفي مرادك وكمان حا تختار وتنقي - وانسي الجري وراء مكاتب العقار والكلام الفاضي - توقع تلفون ..

والله يا عبد الله طمّنتني ، يطمنوك أولادك إن شاء الله ، ياخي أنا كنت هامّي من قروشي الشّويّة دي وكنت خجلان علي شَوَاها دا ( من شويّة ) ، وقلت ياخي ما أظن ألقى بيها حاجة تسكّنّي .
الله يخلّيك يا عبد الله .
وفي رَجَاك .


________________________
* أها يا عبد الله ، لو لقيتا بي أقلّ من عشرة ، دا عاد ما يوم المُنى ، علي الأقل الباقي بنقُلْ بيهو العفش .

أشكر الأخ العزيز / عاطف يوسف علي ، أخ زميل المنبر / علاء الدين يوسف ، له التّحيّة.
لاتّصاله ولي بحثوا معايْ في موضوع الشّقّة .
أشكرك يا عاطف جزيل الشكر ، وإن شاء الله ربّك يهوّن القواسي .

الاخ محمد زين تحياتي

اتفاوض مع ابوقوتة دا امكن اشوف ليك حل
ناس الشفيف ديل ناس عليا ولي فوق

ياهندسة تحياتي
ساكت ساي مابتقول للزول جدادك سرب

الحبيب محمد زين

دي الرياض حالتها طيب لو في جده كان سكنت مكة وداومت في جده

ياجماعة الروضة والنسيم والملز ولا حتي النظيم دي مشكلة شنو دي ومالو الإيجار أرتفع كده !

في العدم أسكن وادِ لبن أهو بقي في كبري معلق

‘‘‘‘أقول ليك أطلب نقل جده،،،،

،،،،أبوقصي،،،،

*

وهذا أضعفةالإيمان..

الاخ محمد طلبك فيه شوية عدم معرفه بى عقارات الرياض نادر جدا تلقى غرفتين
مع 2 حمام كلامى لى الحمامين لان كل الشغل الان تجارى على العموم انا ساكن الدار البيضاء
وشغال فى مخرج 17 يعنى انت جارى فى العمل وحا اجتهد اكلم ليك المكاتب الجنبى فى الدار
البيضا والعزيزيه لكن قصةحمامين مع غرفتين دى صعبه انا شغلى فى مجال المعدات الثقيله
لكن بعرف حاجات الرياض رسلى تلفونك شكرا

يا شاب
شنو ما كنا متفقين
السكن: جدة
والعمل: الرياض



تحياتي للأولاد
وربنا ييسر الأمور
وتظبط


ما مشيت علي الجماعة
ما أديناك درب
مالك فكيتو

Quote: الاخ محمد زين تحياتي اتفاوض مع ابوقوتة دا امكن اشوف ليك حل ناس الشفيف ديل ناس عليا ولي فوق ياهندسة تحياتي ساكت ساي مابتقول للزول جدادك سرب

شكرًا ليك يا ود البوش ، والتّحيّة لي حبيبنا ( أبو قوتة ) ، وغايتو ربّك يسهّل ويهوِّن ، وغايتو أخونا ( حُمِّيدة ) الله يدِّيهو العافية ، ما قصّر وقام بالواجب .

Quote: الحبيب محمد زين دي الرياض حالتها طيب لو في جده كان سكنت مكة وداومت في جده ياجماعة الروضة والنسيم والملز ولا حتي النظيم دي مشكلة شنو دي ومالو الإيجار أرتفع كده ! ‘‘‘‘أقول ليك أطلب نقل جده،،،، ،،،،أبوقصي،،،،

أبا قصي كيف حالك ، علّك والأسرة شُداد .
يا راجل الرّوضة والملز أنا ما بقرِّب عليهِن خالص خالص ، ياخي ديل إيجاراتُن نار الله الموقدة ، ياخي ديل لو حصّلت ليك فيهُن مُلحق سااي يمكن يقولو ليك بي 16 ألف .

Quote: في العدم أسكن وادِ لبن أهو بقي في كبري معلق

وإتّ قايل أنا هسّة المارقني شنو ، ما أنا زاتي ساكن في حدّ الواطة ( بعد الشِّفاء ) ، وفي البُعُد زَيُّوا وزَيْ وادي لبن البتقصدوا دا ، وعليك أمان الله الشغل أحصِّلو في نُص ساعة والحالة دي الشّارع فااااضي من سيّارات ودوامي ببتدي السّاعة خمسة صباحًا ، وشارع الشّفاء ( ديراب ) فيهو تعديلات ليها تلات سنوات ما انتهت ، وزحمتو وحات الله تطفِّش الما بطفش ، لكين المشكلة الأساسيّة عندي هي إنُّو الحي السّاكن فيهو دا ما فيهو رياض أطفال .
غايتو أكّان أعيتني الحيلة ياني الجايي ليكُن في جدّة ، هو أنا لاقيكم وين ؟ ، ما تقول زمااان شالوني معاهم ناس ( البيك ) في المنطقة الغربيّة عندكم وقالو عايزِنِّي أشتغل معاهم في قسم ( ضبط الجودة ) ، لكين أخوك رفض ، عشان ما كانت عندي فكرة أوّليّة عن ( البيك ) ! ، ولي اللّيلة بَنْدُب في حَظِّي !! .
تحيّتي لك وللأسرة ، ومَنْ بجانبِك .

الحبيب محمد زين الشفيع .. سلام يا دفعة ..



نفتش ليك بالشرقية ينفع :)


مودات كمية

Quote: * وهذا أضعفةالإيمان..

أشكرك أيُّها الحبيب أزهري ، وإن شاء الله – كما تقول جدّاتُنا - تتعلّى ما تدلّى ، وربّك يسهِّل القواسي .
تحيّتي لك .

***

Quote: الاخ محمد طلبك فيه شوية عدم معرفه بى عقارات الرياض نادر جدا تلقى غرفتين مع 2 حمام كلامى لى الحمامين لان كل الشغل الان تجارى على العموم انا ساكن الدار البيضاء وشغال فى مخرج 17 يعنى انت جارى فى العمل وحا اجتهد اكلم ليك المكاتب الجنبى فى الدار البيضا والعزيزيه لكن قصةحمامين مع غرفتين دى صعبه انا شغلى فى مجال المعدات الثقيله لكن بعرف حاجات الرياض رسلى تلفونك شكرا .

الحبيب خالد المحرب .
أنا كنت ساكن في الدّار البيضا لي زمن ولفّيتا مكتب مكتب ، لكين يا خالد الإيجارات الرخيصة موجودة ولكنّها بتحتاج علاقات ، أمّا ناس المكاتب فزَيْ ما معروف فهم دايمًا برفعو السّعر ، أها يا خالد أنا إيجاراتي الفاتت دي كلّها وعلى مدار سبع سنوات ما حصل أجّرت من مكتب عقّار، أنا قاعد أأجّر من صاحب العقّار مباشرةً ، يعني بكون مِرَكِّب شُفَّعي معايْ في العربيّة وحايم داخل الحارات ولمّن نشوف لينا شقّة ما فيها مكيِّفات ( فتحة المكيف فاضية ) ، بنقوم طوّالي ندُق باب أو جرس ناس العمارة ، والبجيني مارق منّهُن بستفسر منّو ، إذا كانت الشّقّة للإيجار أم لا ؟ . أها دي الطّريقة القديمة الكنت قاعد أأجِّر بيها وطبعًا اكتشفت فيها حاجات كتيرة إنّو كتير من أصحاب العقّار ما بِدُّو ناس مكاتب العقّار شِقَقُنْ ، واكتشفت أيضًا إنُّو ناس العقّار بحاولو يزوِّدو سعر الإيجار عشان صاحب العقّار ينبسِط مِنَّهُن ويزوِّد ليهُن حِصّتُن ، كمان اكتشفتَ حاجة سامية جدًّا وهي إنُّو بعض أصحاب العقّارات على خُلُق عالي جدًّا وما شغّالين بي حكاية زيادة الإيجارات ، وأهمّ حاجة عندهُن إنّو الشخص الْبِجِي يأجِّر مِنَّهُن دا يكون شخص في حالو وما بِتاع مشاكل وحاجات من هذا الْقبيل ، أها أخوك مِعَوِّل على الأخيرة دي شديد ( ههههههه ) ، وغايتو كانت طريقة جميلة والواحد بلاقي فيها صاحب الشّقّة مباشرة دون مكتب ، أمّا مكتب العقّار فكنت أمشي مع صاحب الشّقّة لأيِّ مكتب قريب عشان نكتب عندو عقد الإيجار وندِّيهو ( مائة ريال أو خمسين ريال ) .
شفتَ كيف يا خالد ، وعمومًا في الدّار البيضاء عندي أبناء عمومتي من شندي أكّان بتعرفُنْ ، ناس شيخ ( نَصّار صالح الخضر ) لو بتعرفو ، وهو معروفٌ ومشهورٌ عندهم كونه يُحفِّظُ النّاسَ القرآنَ الكريم بالقراءات العشر في أحد مساجد الدّار البيضاء ، وكنتُ - أيّام سكني هُناك - أجلس في حلقاتِهِ لأقرأ وأتلوَ على يديه القرآن في حلقاتِهِ المسائيّة، وأخبرت معظمهم بأن يبحثوا معي في الشأنِ ذاته ، والآن ربِحْتُ أحدًا مثلك ، وخذ عندك ، فذا تلفوني : 0507825418.
لك التّحيّة يا خالد .

Quote: *** يا شاب شنو ما كنا متفقين السكن: جدة والعمل: الرياض تحياتي للأولاد وربنا ييسر الأمور وتظبط ما مشيت علي الجماعة ما أديناك درب مالك فكيتو

**

أهلا بيك أيّها القريب الحبيب / بلّه ، عساك والأُسرة بخير ، كيف الشّباب ( العزّابة ) إن شاء الله ما يكونو عاملين جوطة .
تحيّاتي عبرك إلى العزيز / البرير ، وأخبرْهُ أنَّ أضعافَ الودِّ منِّي له ، وأيضًا ذكِّره - كما يقولُ أهلونا قديمًا - بأنّ : ( الْعَقَبَكْ لاقاك ) .

أمّا ما يخُصُّ مَتْن حديثِك أسفلًا ، فوَ اللهِ يا بلّه خِفْتُ أن أشغِلَهم بهمومي ، والنّاس كما تعلم في ذا الزّمن ، كلٌّ منه يُثْقِلُهُ حملُ هَمِّه.
وبالجنبة كِدَة : أخوك واللهِ مِضَيِّع تلفون الأُستاذة والأُستاذ ، فياخي رسِّلو لَيْ في رسالة ينوبك ثواب ، وبالمرّة كِدة تلفون أنور برضو أدِّيني ليهو .
مودّتي الْكبيرة .

Quote: الحبيب محمد زين الشفيع .. سلام يا دفعة .. نفتش ليك بالشرقية ينفع :) مودات كمية

ما خابتْ جيرةُ مَن جاورك يا حيدر يا صديقي ، كمان ما تقول عندنا معرضين في الدّمام تابعات للوطنيّة الشّغّال أنا فيها ، وكتير من المرّات بمشي هناك عشان أعمل معايرات لأجهزة التّبريد والقياس والمراجعات الدّاخليّة للمعارض ، أهو الواحد يتنقل عليكُم وبالمرّة يجلس بجانبكم.
ولك من الحبّ أضعاف ما تحمِله لي .

أخوي محمد زين
سلامات وربنا يهون عليك .. والحقيقة المسألة كلها توفيق وحظوظ وربنا يوفقك ..
أنا ساكن في أم الحمام وأظنها بعيدة عليك وكتيرة كمان ...
سؤال بسيط .. يا أخوي نصار صالح ده ياهو زميلنا الكان بيدرس معانا في معهد الكليات وبعدين ترك الدراسة بداعي أن الدراسة تدعو إلى الاختلاط وإن الاختلاط يدعو إلى الفجور وإن الفجور يدعو إلى النار؟؟؟
والله تخيل كلنا حسدناه لكن لم تواتينا الجرأة للسير في طريقه ... بالله لو سمحت رقم جواله . أو أديه رقمي 0558502979
ولك تحياتي ودعواتي لك بالتوفيق ...

رينا يوفقك يامحمد زين

أطيب التحايا والسلام .

Quote: أخوي محمد زين سلامات وربنا يهون عليك .. والحقيقة المسألة كلها توفيق وحظوظ وربنا يوفقك .. أنا ساكن في أم الحمام وأظنها بعيدة عليك وكتيرة كمان ...

وعليكمُ السّلام أخي الكريم / عبد الباقي الْجيلي ، أحسنتَ قَولًا ، فهي كما أشرت بعيدةٌ جدًّا عَنِّي ، لكنّها ليست بالْبُعدِ الَّذي أمتلكه الآن ، فأنا أسكنُ غربَ الشِّفاء ، ثمّ لكَ أن تتخيّل بُعْد المسافة عن مكان عملي مخرج 17 ، فهيَ أبعدُ من مسافةِ حَيِّك الَّذي أشرتَ إليه.

Quote: سؤال بسيط .. يا أخوي نصار صالح ده ياهو زميلنا الكان بيدرس معانا في معهد الكليات وبعدين ترك الدراسة بداعي أن الدراسة تدعو إلى الاختلاط وإن الاختلاط يدعو إلى الفجور وإن الفجور يدعو إلى النار؟؟؟

معقولة ياخي دا سؤال بسيط ، دا سؤال كبير ياخي ( ههههههه ) .
بالتَّأكيد ، هُوَ ذاكَ يا صديقي ، درس معهد الكليّات التّكنولوجيّة ، ولا علمَ لي بما أنبأتني به عنه من خَبر ، فأنت أعلمُ به منِّي في قولِهِ ذاك كونكَ درستَ معه في ذات الْجِهةِ التي أشرتَ لها ، لكنَّ الَّذي أعلمُهُ في خبرِه ، أنَّه رجُلٌ على خُلُقٍ ودين ، حافظًا كتابَ اللهِ بقراءاتِهِ الْعشر ، إمامًا لأحدِ مساجدِ حيّ الدار البيضاء ، ويعمل بتدريس القرآن فيه مساءً . ولعلّك ما إن تَتجاذبْ أطرافَ الحديثِ مع أيِّ إمامٍ ( من الشَّباب ) من أئمَّةِ مساجد أحياء الدَّار البيضاء والعزيزيّة وما تلاها من أحياء ، إلا وتجده يُخبرك بأنَّهُ قد حفظ القرآنَ الكريم على أيدي شيخ ( نصّار ) ، وأحسبُه رجلًا عَلَمًا ومن الأخيار هناك ، إذْ لا أزيد .

Quote: والله تخيل كلنا حسدناه لكن لم تواتينا الجرأة للسير في طريقه ... بالله لو سمحت رقم جواله . أو أديه رقمي 0558502979 ولك تحياتي ودعواتي لك بالتوفيق ...

قوْلُكَ ليسَ حسدًا يا صديقي ، وأعتقدُ أنَّك تقصِدُ ( الْقِبْطة ) ، كماأشكر لك حسنَ دعائك لي ، وسأُوافيكَ برقمِهِ على تلفونك قريبًا إن شاء الله .
وكتّر خيرك يا عبد الباقي ما قصّرت .
تحيّتي لك .

Quote: رينا يوفقك يامحمد زين أطيب التحايا والسلام .

الأُخت الأديبة / سميّة الحسن طلحة .
كلّ عام وأنتِ في خيرٍ ونعمةٍ وصحّة .
ويسمع منّك ربّنا يا سميّة ، وحات الله يا سميّة في الأيّام الفاتتْ دي لفّيت لمّن فِتِرْتَ من الْكُواسَة ، حتّى نِعْلاتْ كِرعين عربيْتي حَفَّنْ من الْجري ، وغايتو ربِّك يهوِّن ، وقريبًا عند صديقي العزيز ( حُمِّيدة ) الْخبر الْيَقين.
تحيّتي .

محمد زين معليش والله ما شفت البوست ده قبل كده
وإن شاء الله ابحث معاك
اديها صنه بس

Quote: ‘‘‘‘أقول ليك أطلب نقل جده،،،، ،،،،أبوقصي،،،،

والشقة جاهزة , ربنا يجمعكم في بيت الهناء والسرور


...............................................حجر.

محمَّد زين
اتصل بي في الرقم دا 8:30 مساء اليوم

بالنسبة لحي النسيم

0506422928
تحياتي

Quote: محمد زين معليش والله ما شفت البوست ده قبل كده وإن شاء الله ابحث معاك اديها صنه بس

شكرًا ليك يا هاشم ، وعارفك بتقوم بالواجب .
وما عليك بنَدِّيها صَنّة كبيرة كمان .
تسلم ، والتَّحيّة ليك وللعيال.

Quote: Quote: ‘‘‘‘أقول ليك أطلب نقل جده،،،، ،،،،أبوقصي،،،، والشقة جاهزة , ربنا يجمعكم في بيت الهناء والسرور ...............................................حجر.

اللّهمّ آمين يا حجر ، شكرًا على الدّعوة الطّيبة ، وإنْ بقيتَن ما اتوفّقت في الرّياض ، ياني الْقاطعْ عليكُنْ ، وهاك يا قهوة نُصّ البلد ، وهاك يا وردي وهاك يا أُورفلي .
التّحيّة عبرك لي حبيبنا أورفلي ، باللهِ عليك سلّم ليْ عليهو .

Quote: محمَّد زين اتصل بي في الرقم دا 8:30 مساء اليوم بالنسبة لحي النسيم 0506422928 تحياتي

أشكرك أُستاذ صالح عبده آخويْ ، تمّ تدوين التّلفون ، وأبشِرْ اللّيلة بتّصِل عليك .
سَلِمْت من كلّ شرّ .
تحيّتي .

Quote: طبعا بعشرة ما بتلقى فى الاحياء دى لانها جديدة وبيوتها واسعة,,,,نحن ساكنين ب12 بس ما بتنفع لاسر كبيرة

أب قوتة يا الحبيب... ما تشُوفلِي جنبكم إن بقيت ساكن (الخالدية) أماني تكون خدمتني خدمة... لأن شغلي في طريق الإمام علي بن أبي طالب (عليه السلام) قدام للنفق ناحية مخرج (17)... وساكن منفوحة (جبرة) شُفت إشارة البطحاء والفرزذق والخرج بتعمل فيي شنو؟؟؟ مع العلم أن الأُسرة مكونة من (عريس أنا أبو الحُسين وعروسة أُم الحُسين)...

أستاذ الشفيع... نسأل الله يسهل ليك وتجمع ويجمعنا نحن كمان...

وانا غايتُو كان لقيت في الخالدية بتنازل ليك عن شقتي دي رخييييييييصة وجديدة سراميك!!!

للجميع قواسيب مودتي...


أبو الحُسين...

أها يا جماعة فُرجتْ والْحمد لله .

وبحمدِ اللهِ وفضلِه وجدتُ ما أبحث عنه مساءَ أمس .
أشكرُ كلَّ مَن عبرَ من هُنا ، وكُلّ مَن وقف إلى جانبي واهتمّ بأمري ، أوِ اتّصل مُساندًا وباحثًا معي في الشأن ذاته .
تحيّتي لكم .



__________________

* أبا الْحسين كيف حالك يا رجل ، وربّنا يجمع ليك زَيْ ما جمع لينا .

حمدا لله على السلامة
أها ما تنسانا من كرامة الشقة يا قريبي

سعيد بالبجوارك ,,,,,,,,,,,

جعله الله منزل سعد وراحة بال

ود الزين حمد الله علي السلامة و موفق يا شيخ إن شاء الله

Quote: حمدا لله على السلامة

واللهِ يا طارق ، في واحد صاحبي شديد وفاضل جدّا من إخوتنا المصريين ، إسمو ( منصور ) ، وقديم جدّا بالدّار البيضاء والنّاس كلّها بتعرفو ، وهو يعمل ( فرّان أو طاولَجي زَيْ ما بنقول ، وكما يقول أخي الأصغر / عوض كونه يعمل في ذات المهنة) بأحد مخابز الدّار البيضاء ، وأنا كنت زمان طوّالي بجيهو ( أتونّس معاهو ) لمّا يكون فاضي ، أها طال بي العهد وما شفتو ، لأنّي لمّا كنت بجي ليهو ما كنت بَلِم فيهو وجماعتو قالو لَيْ ( سافر مصِر إجازة ) ، أها قبل تلاتة أيام وأثناء ما أنا لافّي للإيجار شفتُو في الفرن ، وقمت غِشِيتو في شان أسلِّم عليهو ، أها قام سألني ، فينك يا محمّد ، أها حكيت ليهو إنِّي بفتِّشْ لَيْ لي إيجار من مُدّة ، قام أخد تلفوني وأخدتَ تلفونوا وبعدها قالَّيْ : يومين كِدة وكلِّمني ، أها قلت ليهو خير إن شاء الله ، واتوادعنا ، أها عليك أمان الله أكان أشوف ليك جوّالي أمس بعد العصُر ينقُر ، أها لقيتو ليك صاحبي منصور المابغباني قد قام بي بالواجب " هكذا واللهِ يا طارق تمّتْ الأُمور " .

Quote: أها ما تنسانا من كرامة الشقة يا قريبي

بالنّسبة للكرامة ، ربّك يهوّن إن شاء الله يا طارق .
ولك التّحيّة .

Quote: سعيد بالبجوارك ,,,,,,,,,,, جعله الله منزل سعد وراحة بال

وأنا يُسْعِدُني مرورك دائمًا يا عمّار ، ونسيم حرفِكَ كذلك أيُّها المحترم ، فكم من أُناسٍ لا تعرفهم ، لكنّ حروفَهم تأسرُك حُبًّا فيهم دونَ أنْ تراهم ، ما يجعلُكَ تتخيّل نقاءَهم ، وأنتَ أحدُ أُؤلئك النّفر يا صديقي .
احترامي لكَ أجلّ وأعظم من مفرداتي القصيرة الَّتي تراها الآن.

أخوك / محمّد زين .
______________________

يا صاحب


مبروك


الجار


والدار


ربنا يسعدك

وإن شاء الله

ماترحل

تاني


40


،،،،أبوقصي،،،،

Quote: ود الزين حمد الله علي السلامة

الْعزيز / سيِّد (لم أعلمِ الاسم الَّذي يليه ، فخشيتُ أن أكتُبَه خطئًا ، فالتزمتُ كتابةَ اسمِك الأوّل فقط ) .

كيف حالك وعساك بخير .

Quote: وموفق يا شيخ إن شاء الله

أشكرُ لك مرورَك يا رجل ، وليتني كما تَظُنُّ يا صديقي ، وتجدُني في إحْدَى كتاباتي واصفًا أحدَ أقاربي الصّالحين فيها ، قائلًا فيه :


رَحْبَ الذِّراعْ ،
بيْتُهُ مَوْطِأَ أكْنَافٍ وَقَـدَم ،
.... لكنَّ امْرَأتَهُ بخيلة !.
إذْ لا يَنامُ من اللَّيْلِ إلا أقَلّـه ، فيُزْعِجُني صَوْتُ مِسْبَحَتِهُ الطَّويلَةِ حينَ تتهادَى بيْنَ أصابِعِه ،
فَأُرَاهُ جميلًا حينَ يَعْبُدُ اللهَ ، وأُرَاني غريبًا حينَ أعْبُـدُ النَّـوْم .

أرَأيْتَ كيفَ أبْدو ، فأنا مُجَرَّدُ أخْطاءٍ تَمْشي يا أخي ، لكنَّ حُسْنَ ظَنِّكَ بي يجعلُني أتوقُ لما هو أفضل وأحسن .
تحيّتي لك أبدا .
أخوك / محمَّد زين .

محمد الزين ود الشفيع الرجل الزين

تحايا ضخمة

ألف حمد لله و شكر على أن أراح عقلك و بدنك من عناء البحث و أن أتم لكم الإستقرار .. فجعله الله دار خير و بركة ... آمين

سأحكي لك حكاية غريب تشبه قصة ( مسمار جحا )

سكنت في بيت كبير بإحدى أحيءؤ الرياض كان يسكنه قبلي زول من أزوالنا
و بما أن البيت كبير و به ( مستودع ) فقد رجاني أن أحتفظ له فيه ببعض الأغراض التي لن يجد لها مكانا في بيته الذي إنتقل إليه قسرا بسبب ظروف العمل
ثم ذات ليلة باردة بعد أسبوع .. بعد أن هجدتْ العيون و إستكانت الأجساد و تكلْفتْنا بالبطاطين و أشياء أخرى .. سمعنا قرع الباب و و رنة الجرس معا بإلحاح و إصرار متواصلين...
فقلت لا بد أن الأمر جلل
فهرعت للباب .. فإذا بالساكن القديم و زوجته ..
خير إن شاء الله
معليش .. بكرة عندنا عزومة و عاوزين الحلة الكبيرة و أسياخ الشية
ثم تكررت زيارتهما و في كل مرة يأخذان غرضا ..
و بما أن الأغراض كانت كثيرة .. فقد قمت بإخراج كل الأغراض لهما عند آخر زيارة لهما

فتمتم الرجل : دي شنو قلة الذوق دي ؟
( تخيل ... قلة الذوق بقتْ معكوسة )

أها أوعك تخلي الساكن ال قبلك يخلي حاجة وراه في الشقة الجديدة .. حتى لو حديد ستاير أو صندوق بيبسي فاضي

دمتم

سيد عبدالرحمن بيكاب من سكان حي الناصرية و المعذر سابقا تحياتي لك ياود الزين و حمد الله علي السلامة.

محمد زين ...

صباح/مساء الخير

عاوِز عِنوانك الألِكْتِروني لو سمحت ... عِنواني : [email protected]