Post: #1
Title: لبتين الكلام دا حيستمر يا ناس؟
Author: د.نجاة محمود
Date: 10-09-2009, 06:07 PM
الرجاء مراجعة هذا البوست
حواء الطقطاقة..أول من تغنت للإستقلال.وأول أمراة تستقبل ... حياة) يلا نوثق ليها
يا لؤي يا عزيز بالمرة كدا كمل جميلك ... أبحث عن أغاني ب...وت الصحوة او الصفوة
البورد دا انتهى بسبب هذه السلوكيات
تفتح بوست تهنئة يجيك واحد ناطي يحرف البوست
تفتح بوست غناء يجيك واحد يحرف البوست
تفتخ بوست ترجمة يجيك واحد يحرف البوست ويشتمك ويتهمك تهم قاطعها من راسو
لقد تم توقيف مصطفى محمود من قبل في تتلحه للاخرين
وعدم احترامهم
واغراق المنبر
ولكنه يبدو انه ارجع دون ان يتوب ويقلع عن هذا السلوك المشين
وهو تخريب البوستات واقحام مواضيع لا دخل لها بموضوع البوست
والاغراق بنفس الكات اند بيست
الحرية لنا ولسوانا
شعار جميل فيه فسحة لكل انسان
الرجاء ادانة هذا السلوك والمطالبة بوضع لائحة تمنع تخريب البوستات
والفصل لمن يفعل ذلك..
|
Post: #2
Title: Re: لبتين الكلام دا حيستمر يا ناس؟
Author: mayada kamal
Date: 10-09-2009, 06:27 PM
Parent: #1
يا دكتورة نجاة
انتي بتسالي في منو
ياخي ديل عندهم حصااااااانة من بكري شخصيا
انا ميادة كمال لمن نزلت بوست بدين فيه سلوك محمود مصطفي دا
تم حذف البوست
لمصلحة من يتم ذلك
|
Post: #3
Title: Re: لبتين الكلام دا حيستمر يا ناس؟
Author: د.نجاة محمود
Date: 10-09-2009, 06:33 PM
Parent: #2
نشوف الموضوع دا حيتخلى كيف
ونشوف بكري حيتصرف كيف
البوستات دي يجب ان تحترم ولا تحرف
ولا يهاجم الشخص بدون سبب ظاهر
البورد دا لازم يتصلح حالو
ما اتصلح الناس حتخليه ويفقد الكثير الكثير
|
Post: #4
Title: Re: لبتين الكلام دا حيستمر يا ناس؟
Author: mayada kamal
Date: 10-09-2009, 06:42 PM
Parent: #3
يا دكتورة والله بتحرثي في بحر
|
Post: #5
Title: Re: لبتين الكلام دا حيستمر يا ناس؟
Author: عمران حسن صالح
Date: 10-09-2009, 07:03 PM
Parent: #4
سلام يا د. نجاة ..
والله أنا عندي سؤال بسيط شايلو من زمان معاي ..
حايم معاي زي إسمي ده ..
الزول بكرِه فيهو الآخرين ليه ؟؟
أنا والله ما بكره لكن عندما أرى مداخلات زميل الحوش د. مصطفى بتوتر لأنو بلقاها شايتة لفت . والله من حق الناس يتداخلو معكـ لأنه شي عام بس يا ريت مُداخلتكـ ما تكره الناس فيكـ .
بس .
|
Post: #6
Title: Re: لبتين الكلام دا حيستمر يا ناس؟
Author: Muna Khugali
Date: 10-09-2009, 11:41 PM
Parent: #5
الترصد وتحويل البوستات لطريق غير المرسوم له ..
سلوك مرفوض وغير كريم..
فالنربأ بأنفسنا عن مثل ذك الفعل الغير طيب..
|
Post: #7
Title: Re: لبتين الكلام دا حيستمر يا ناس؟
Author: Dalal Ezzaldin
Date: 10-10-2009, 00:07 AM
Parent: #6
شئ مؤسف .. مهما بلغ الانسان من غضب وكره مالازم يغيب عقله ويرجع ليهو في تصرفاته
او يكون لايملكه اذاً ..
|
Post: #8
Title: Re: لبتين الكلام دا حيستمر يا ناس؟
Author: Salah Abdulla
Date: 10-10-2009, 00:38 AM
Parent: #7
دكتورة نجاة ، سلام
وما قلتي الا الحق ، فهذا المدعو مصطفى محمود حالته تدعو للرثاء
بالامس القريب تم توزيع عدد واحد تهمة (تمجيد حكومة) لموسيقار سوداني
فجاء دكتور الغفلة مهرولاً وقام بمنتهي السخف وقلة الاحترام
بوصف ذلك الموسيقار بالـ(مسطول) !!
قال معارض قال ..
|
Post: #21
Title: Re: لبتين الكلام دا حيستمر يا ناس؟
Author: Ishraga Mustafa
Date: 10-11-2009, 10:40 AM
Parent: #8
Quote: الترصد وتحويل البوستات لطريق غير المرسوم له ..
سلوك مرفوض وغير كريم.. |
| Quote: بالامس القريب تم توزيع عدد واحد تهمة (تمجيد حكومة) لموسيقار سوداني |
والاتهامات المجانية التى توزع يمين وشمال
لمجرد انو الآخر اختلف معاك... يبقى طوالى كوز وبتاع امن
ولاّ شيوعى كافر بالله والرسول
المشكلة فينا- فى فهمنا وتعاملنا مع الآخر
بعدين النضال ده حدوه ماهنا... ولا بيكون بالطريقة دى
طريقة النبلة اللى بتنيش اى طائر حر فى خبط اجنحته,
وبسأل معاك يادكتورة بيان لبتين؟!!!!
|
Post: #9
Title: Re: لبتين الكلام دا حيستمر يا ناس؟
Author: صلاح عباس فقير
Date: 10-10-2009, 00:42 AM
Parent: #7
Quote: الحرية لنا ولسوانا
شعار جميل فيه فسحة لكل انسان
الرجاء ادانة هذا السلوك والمطالبة بوضع لائحة تمنع تخريب البوستات
والفصل لمن يفعل ذلك.. |
سلوك هذا العضو المحترم، فعلاً لافت للنظر، وهو لا يراعي في ذلك مشاعر الآخرين ولا حقوقهم!
وأنا الّذي يثيرني أكثر، أنه يجعل من صورة مانديلاً شعاراً له في البروفايل!
بينما سلوكه -أي هذا الأخ- في المعارضة يتنافى تماماً مع الرمزيّة التي يمثلها نلسون مانديلا في عالمنا المعاصر،
باعتباره مناضلاً كبيراً، ورمزاً من رموز التسامح!
فأرجو من الأخ الكريم أن يتأمل في صورة بروفايله، وينظر خاصة إلى ابتسامة مانديلا البيضاء،
لعله يستفيد منها شيئاًً!
ولا نطلب منه طبعاً أن يكفّ عما يراه معارضةً، ولكن أن يمارسها بشرف واحترام لإخوانه في المنبر!
|
Post: #10
Title: Re: لبتين الكلام دا حيستمر يا ناس؟
Author: حيدر حسن ميرغني
Date: 10-10-2009, 04:42 AM
Parent: #9
الا يعتقد اخونا د. مصطفى ان من يلاحقم/ن بمداخلاته الغريبة يرون في تصرفه هذا نفس اعتقاده الموضح بأعلاه
|
Post: #11
Title: Re: لبتين الكلام دا حيستمر يا ناس؟
Author: saadeldin abdelrahman
Date: 10-10-2009, 05:17 AM
Parent: #10
اتمنى الدكتور المناضل يظهر بجسارته المعهودة
في هذا البوست و يعلمنا نحن الأجيال الصغيرة
كيف لا نخشى في الكفاح لومة لائم.
كجامة
|
Post: #12
Title: Re: لبتين الكلام دا حيستمر يا ناس؟
Author: محمد إبراهيم علي
Date: 10-10-2009, 07:02 AM
Parent: #11
هي عادة سودانية بحتة تغيير الموضوع وحرف المسار
الاسوأ من ذلك الترصد واغراق البوست بما يضر ولا ينفع
العنف اللفظي سلوك مستشري في البورد وليس له ضابط يشكمه تمارس فيه الشتيمة على عينك يا بكري ولا من مجيب
شخصيا اختلف مع الاخت ميادة واتغاظ منها في بعض البوستات ولكن هناك مسافة من الاحترام تحفظ لها فهذا خيارها وهي مسؤولة عنه فكما لي خياراتي واختياراتي فهي كذلك كتفا بكتف
لن تذهب الانقاذ بذهاب الكيزان من هذا المنبر ومن يعتقد غير ذلك فهو واهم
اجابة لسؤالك دكتورة نجاة (حيستمر هذا السلوك فللاسف دعاة الديمقراطية لدينا يتمسكون بالقشور فقط ولا يمارسون هذه الديمقراطية التي تقبل الرأي الاخر ومقارعته بالحجة وليس بالاغتيال الشخصي (والنط في الحلق) من حق ميادة وليس ميادة وحدها ان تبتدر موضوعاتها وتمشي بها الى نهايتها التى خططت لها وحدها ومن حقها ايضا الدفاع عن نفسها ضد قاطعي البوستات
فنصيحتي لك ولميادة وللكل البلاقيك متشمر لاقي عريان)
|
Post: #13
Title: Re: لبتين الكلام دا حيستمر يا ناس؟
Author: tmbis
Date: 10-10-2009, 08:18 AM
Parent: #12
والله يا دكتورة لكن مبالغـة ..
ياخ بقيتي بتاعت حملة توقيعات قرقرقر ..
نحن لينا زمن بنناهض ضد بوستات التوقيعات .. لحدت ما بقينا ناشطين عديل كدا .. والمرة الفاتت في واحد قال لي يا عدو المناضلين .. والله اتكيفت ليك منو جنس كيف .. لحدت ما قربت افتح لي بوست لي تمجيد الذات ...
يا دكتورة (بليز) ما تهزي لينا قناعاتنا النضالية (وتضربي التأمين) بتاعنا في محور من المحاور ياخ ناس مصطفى ديل نحن بنفتش ليهم بالفتاشة .. تجي تعملي ليك حفلة شواء وفق الإعلان العالمي لحقوق الإنسان ..؟
أنا ما بوقع معاكم عديل كدا .. والله إنتو محظوظين بكتب معاكم زي مصطفى دا .. وشاحد الله ربي يعمل ليكم ابديت للقائمة القديمة بتاعت كيزان المنبر .. أنا أول واحد ح أوقع ليكم فيها ..
Quote: لقد تم توقيف مصطفى محمود من قبل في تتلحه للاخرين
وعدم احترامهم
واغراق المنبر
ولكنه يبدو انه ارجع دون ان يتوب ويقلع عن هذا السلوك المشين
وهو تخريب البوستات واقحام مواضيع لا دخل لها بموضوع البوست
والاغراق بنفس الكات اند بيست
|
.. عارفه يا دكتورة .. كلامك دا خطير جدا .. وإنت دقستي في مكمن الخطورة حقتو ..
قولي لي كيف ..؟
كلامك دا يا ستي .. بعتبر بمثابة فتح خطوط لممارسة نفس الفعل المشين (بحقارة) شديدة
عارفه ..؟ حسع صاحبك دا ومعاهو اتنين تلاتة كدا شايفم الأيامات دي عاملين ليهم جمعية .. عارفه حسع دي يكونوا محتفلين .. عارفه تلقيهم وزعوا منشورات عديل كدا عن هزمية الكيزان من قبل المناضل الجسور .. الخطير الذي طلع روح كيزان المنبر بي مداخلاته النارية واصلاهم سعيرا من نيران كيبورده المتعدد البيستات .. واقتباساته السريالية التي يجيد وضعها في مواضيع بعينها ..
يا دكتورة .. ما تعولي على بكري ابوبكر إنو يشوف الفيل ويطعنو .. بكري بي صراحة بيحب الاكشن .. واحتمال كبير جدا بعد فترة يعمل ليهو سينما ..
|
Post: #14
Title: Re: لبتين الكلام دا حيستمر يا ناس؟
Author: حيدر حسن ميرغني
Date: 10-10-2009, 04:13 PM
Parent: #13
لعناية د. مصطفى محمود
|
Post: #15
Title: Re: لبتين الكلام دا حيستمر يا ناس؟
Author: Emad Abdulla
Date: 10-10-2009, 05:40 PM
Parent: #14
سلام يا نجاة ..
من الله خلقني لا بحب أشيل جواي من زول , لا بنصح و أوعظ زول .
لكن مصطفى ده أنا لو لقيتو .. بس من نص قورتو أعضيهو ليك زي ما بيعضي الناس بالسخف النضالي البيسوي فيهو ده ..
كرهتنا ياخي , كرباجك ده لامي بيهو في الناس من طرف و نازل تمحط .. ياخ .
و لغتك كمان كعبة و مكعوجة ( كان إنقليزي كان عربي ) .. و في المرات العامل فيها بتعرف رندوك الشارع بتبقى لي بس زي " الزوحي " ..
بتعرف الزوحي ؟؟
أنا ياخي قرفان أكتر منك الحاصل في البلد ..
كلنا قرفانين و زعلانين و مهمومين و دايرين نغير كل الكلام الفاضي و الظلم الحاصل ده الليلة قبال باكر ..
و كل زول في الناس دي شيخ بي طريقتو العندو ليها فهم و منهج و آلية ....
لكن إنت ياخوي سويتا شينة يعلم الله . ريحة الفهم مافيهو خطك الإنت ماشي فيهو ده ..
شغلك بس ياهو أم قللو و فيها وللا نفسيها .
هسه دخلت فيني جن إني أتلحك .. أها كده كويس ؟؟
تبقى عليك حكاية التسوي كريت في القرض , تلقاهو في جلدها ..
عشان تعرف الله واحد و تجيك نفسيات و تضوق الموت يا تارك الصلاة .
الله يرضى عليك بس ياخ .. أرحمنا .
|
Post: #16
Title: Re: لبتين الكلام دا حيستمر يا ناس؟
Author: حمزه بابكر الكوبي
Date: 10-10-2009, 07:37 PM
Parent: #15
صلاح عباس فقير
Quote: وأنا الّذي يثيرني أكثر، أنه يجعل من صورة مانديلاً شعاراً له في البروفايل!
بينما سلوكه -أي هذا الأخ- في المعارضة يتنافى تماماً مع الرمزيّة التي يمثلها نلسون مانديلا في عالمنا المعاصر،
باعتباره مناضلاً كبيراً، ورمزاً من رموز التسامح!
فأرجو من الأخ الكريم أن يتأمل في صورة بروفايله، وينظر خاصة إلى ابتسامة مانديلا البيضاء،
لعله يستفيد منها شيئاًً! |
حينما خرج مانديلا من السجن كان الجميع يتوقع ان ينتقم من جلاديه ولكن لانه انسان واعي
وفضل مصلحة شعبه ..............مد يده بيضاء لهولاء الجلادون ............................
لك حق ياصلاح ان تستغرب فاين امثال مصطفي محمود من الزعيم ماندلا ؟؟؟؟؟
|
Post: #17
Title: Re: لبتين الكلام دا حيستمر يا ناس؟
Author: tmbis
Date: 10-11-2009, 08:42 AM
Parent: #16
يا جماعة المشكلة ما الدكتور دا ..
المشكلة الكبيرة جدا في الناس الطارحـة نفسها برضو مناضلة .. وهي في الحقيقة دمها تقيل جدا في كتاباته النضالية ..
ناس دمها تقيل في كتاباته حتى لو دخلت في محل عزاء شان تشيل الفاتحـة ..
يللا .. النوعية الدمها تقيل في الكتابة دي .. لقت في الزول دا (جنينة) .. تشبكو ليك .. يا مناضل .. يا خطري .. ويوما ما سيزهر الدوم .. إلخ ..
منها الواحد يكتب بي اسم النضال .. ومنها يعتقد نفسو إنو زول مهم .. ومنها يعمل فحص دم ..
وصاحبكم دا ما يصدق .. ويستمر في نفس المسلسل ..
حسع عليكم الله .. لو فعلا البورد دا جادي وبيخدم في قضايا مصيرية .. ومنبر للتغيير .. زي الزول دا ومعاهو الناس الدمها تقيل دي بخليها ..؟
ويجو يشبكوك والله ناس (الأمني) حجبو الموقع .. ياخ دا محجوب من يومو .. طالما زي الدكتور دا مطلع .. (نقط .. نقط) الناس ..
غايتو الانتخابات دي كان عملوها الكترونية .. من الموقع دا بس .. والله معارضتكم دي ما تجيب ولا التكتح ..
كلنــا عمر حسن أحمد البشير .. كلنا نافع .. كلنا قوش .. كلنا الطيب مصطفى .. كلنا المؤتمر الوطني ..
بالمناسبة:
المغالطني في إنو بكري بحب الأكشن .. منــو..؟
|
Post: #18
Title: Re: لبتين الكلام دا حيستمر يا ناس؟
Author: ابوبكر يوسف إبراهيم
Date: 10-11-2009, 08:58 AM
Parent: #17
[B] الأخن / الدكتورة نجاة
السلام عليكم ورحمة الله وبركاته
وسلام على روحك الطيبة
سؤال مشروع وعلينا أولاً أن نقدم مصلحة الوطن العليا فوق كل شيء وحينما نختلف يجب أن لا نختلف على الثوابت والخطوط الحمر فالبعض منا لا يحترم الخطوط الحمراء ومصلحته الشخصية الآنية أهم من الوطن وأهله .. علينا العودة إلى الرشد الفكري والوطني وأن لا ننقاد وراء من يريدون بنا شراً ( فالإستقلال) جاء بجهاد وكفاح فكيف نرهنه لمن كان يستعمرنا بالأمس ؟!
|
Post: #19
Title: Re: لبتين الكلام دا حيستمر يا ناس؟
Author: saadeldin abdelrahman
Date: 10-11-2009, 09:04 AM
Parent: #17
| Quote: ويوما ما سيزهر الدوم .. |
البزهر ده اللالوب..
الدوم يتكاثر خضريا يا عدو المناضلين!
|
Post: #20
Title: Re: لبتين الكلام دا حيستمر يا ناس؟
Author: mahmed alhassan
Date: 10-11-2009, 09:14 AM
Parent: #17
Quote: فأرجو من الأخ الكريم أن يتأمل في صورة بروفايله، وينظر خاصة إلى ابتسامة مانديلا البيضاء،
لعله يستفيد منها شيئاًً! |
|
Post: #22
Title: Re: لبتين الكلام دا حيستمر يا ناس؟
Author: د.نجاة محمود
Date: 10-11-2009, 04:19 PM
Parent: #20
سلامات جميعا يا احبة
شكرا على المرور
يا ميادة يوما ما سيزهر الدوم وعينك تشوف
المنبر دا فيه ناس تمام يرفضون العوج
لكم جميعا كل محبة وشكر للمرور في دع موضوع الحرية لنا ولسوانا
|
Post: #23
Title: Re: لبتين الكلام دا حيستمر يا ناس؟
Author: مهيرة
Date: 10-11-2009, 07:06 PM
Parent: #22
Quote: الترصد وتحويل البوستات لطريق غير المرسوم له ..
سلوك مرفوض وغير كريم..
فالنربأ بأنفسنا عن مثل ذك الفعل الغير طيب.. |
تمام يامنى وتسلمى يانجاة
تحياتى
|
|