Post: #1
Title: ال قلبو طيب ... ديمة ليه خسران ؟
Author: ابو جهينة
Date: 10-08-2009, 09:37 PM
( جاء حزيناً و محبطاً و لسان حاله يقول : بعد مراجعة حياتي كلها ، يبدو أنني لا بد أن أصير شيطاناً في لبوس إنسان .. أو أنساناً بداخله يعربد إبليس بحرية ... لأن الطيبة في هذا الزمان تأتي في كثير من الأحيان بنتائج عكسية .. هذه تجربتي بكل أمانة)
طيّبْتُ خاطره ... و ها أنذا أنقل ما دار بيننا و أهمها هذا السؤال في بداية النص و نهايته :[/B
***
يا دنيا ...
ليْ زمن حيران ..
عاوزك بس تديني فَدْ برهان
ال قلبو طيب ... ديمة ليه خسران ؟
أنا في الحوبة دي لِيْ سنين و دنين ..
ولّا ياهو دة جزا الطيبين؟
من ورا الطيبة ياما شِرِبْتَ لامِن بقيت رويان
و من عكْس الطيبة دي شفتَ من العجب ألوان
قولي يا دنيا
أديني بس للسبب عنوان
بكوسلو و أروحلو وين ما كان
ديمة..بكون ياني الدخري ..أخو الأخوان
حمال أسية ... و عشا البايتات ,, و عشا الضيفان
برضو بلقى الطعنة بي ضَهَر الطعنة
و نِيتي البيضا مقلوبة مَظَنَّة
ليه بس كدة ؟
و المشكلة ما بقدر أكون غير كدة
حِنيِّن و قلبي طيب .. و زول طيبان
تكفيني فرحة زولا كان تعيس حزنان
عمايلي وراها لا أذى لا مَنْ ... لا بدور شكر لا عرفان
لا بلْهث ورا الشهرة .. ولا كايس رُتْبة أو نيشان
و الغريبة في الأمر ... يا دنيا بني الإنسان ...
في ناس بيقولوا الكلمة .. و أتاري وراها الكلام كيمان
و أنا كليمتي ياها المرقتْ ... موزونة بي ميزان
زي شوكة البوصلة .. شمال يعني شمال
جنوب معناتا جنوب .. بدون لف ولا دوران
سِتْ ريدي مرة قالت لي : أنت عايش برة الزمن
خلي الشك دستورك الأول ... الزمن دة مالو ضمان
الزمن؟؟
شنو ذنب الزمن ؟؟؟
الإتغيرو هم يانا نحن ... نسِل آدم و حوا
والبرّة من جوفنا ... ما مِتْل الدافنِنُّو من جوة
والعداوة السافْرة بقت بي لون الريدة و الخُوة
يجوطوا الدنيا فوق و تحِتْ .. يختوا اللوم على الشيطان
تاني يا دنيا :
برْجع أسألك كمان و كمان
ال قلبو طيب ... ديمة ليه خسران ؟
|
Post: #2
Title: Re: ال قلبو طيب ... ديمة ليه خسران ؟
Author: ابو جهينة
Date: 10-09-2009, 01:35 PM
Parent: #1
ال قلبو طيب ... ديمة ليه خسران ؟
|
Post: #3
Title: Re: ال قلبو طيب ... ديمة ليه خسران ؟
Author: عوض أبوجديرى
Date: 10-09-2009, 06:38 PM
Parent: #2
العزيز ابوجهينة
التحية والاحترام لك دائما...
وانا ايضا اردد
| Quote: ال قلبو طيب ... ديمة ليه خسران ؟ |
تخيل رغم تعقيدات الحياة وقسوتها وميزانها المختل تجد إناسا ملئين بالطيبه والسماحه وكثيرا
من الزهد لحب الناس ‘ تجدهم يحبون دون مقابل وينتمؤن للعلاقات الانسانية دون مقابل‘ تجدهم شفافين
فى التعاطي مع الاخرين................................... وما ادراك ماالاخرين؟
واردد معك ال قلبو طيب...ديمة ليه خسران
لك سلامي
يسعدني التداخل فى بوستاتك أستاذ ابوجهينة واتمني ان تتوثق العلاقة خلال هذا المنبر او خارجه
لك محبتي دائما
|
Post: #4
Title: Re: ال قلبو طيب ... ديمة ليه خسران ؟
Author: ابو جهينة
Date: 10-10-2009, 02:03 PM
Parent: #3
الأخ الكريبم عوض أبو جديري
سلام ماكن و تحايا كبيرة
أولا أشكرك على المرور الذي يسعدني دائما
Quote: تخيل رغم تعقيدات الحياة وقسوتها وميزانها المختل تجد إناسا ملئين بالطيبه والسماحه وكثيرا
من الزهد لحب الناس ‘ تجدهم يحبون دون مقابل وينتمؤن للعلاقات الانسانية دون مقابل‘ تجدهم شفافين
فى التعاطي مع الاخرين................................... وما ادراك ماالاخرين؟ |
دة كلام تمام
الطيب و أصلو معدنه طيب مهما حصل ليهو برضو بيبقى طيب ... فقط يحتج زي زولنا دة ثم يرجع لطبيعته الأولى.
أتشرف كثيرا بمرورك أخي عوض و دمت
|
|