من هو الأولى بمناشدة البشير لدعمه يا صحافة الزمن الردئ وبطانة السوء!!سراج أم خليفة!

Quote: ونسة حزينة مع زول رقيق جدا الشاعر الغنائى محجوب سراج : اما قبل : عربة الصديق وليد محمد خالد ما قصرت معنا ... فقد تبرع بها لتوصيلنا لهذا المشوار الذي شاركنا فيه الصديق الفنان غدير ميرغني لحبه الشديد لهذا الشاعر الرقيق .. اذن فقد نجحنا في الوصول الى منزل الشاعر محجوب سراج ... نحن الآن في وسط الحارة (18) بالثورة .. فسحة الجامع الكبير .. شاب سألناه : وين بيت محجوب سراج ؟ اجابنا متسائلا : الشاعر ؟ .. جاري .. يلاكم اوصلكم انا الخير .. وذهبنا حتي وصلنا الى بيت من الجالوص طرقنا الباب. صوت من الداخل .. منو ؟ الخير : انا الخير يا خالة نعمات .. حوش واسع عليه ثلاثة سراير حديد بلا مراتب .. الغرف مظلمة .. الا من لمبة واحدة في الحوش .. شابة لم تأبه لنا .. تقدمتنا خالة نعمات زوجة محجوب سراج حتي وصلنا الى سرير محجوب واقف مد يده في اتجاه غير اتجاهنا همس لنا الخير : اصلو عميان .. في اقصي الحوش سرير آخر عليه شاب نائم ذهلت .. هل صحيح هو محجوب سراج الذي نقصده ام هو شخص آخر يحمل ذات الاسم .. قطع هذه التساؤلات صوته العميق : مرحب حبابكم .. شرفتونا .. زمن ما جوني ناس زيارة ..ثم عرفناه بأنفسنا .. خليفة من الصحافة .. قاده الخير لندخل الى غرفته .. سريرين ودولاب من الفورمايكا ابوابه بلا مفاتيح .. تربيزة متوسطة واخري صغيرة .. لحظات صمت يكسرها هو بتكرار ترحابه بنا ولعله شعر بحرج موقفنا .. ثم بدأت عملي معه . * استاذنا محجوب جينا نسمع رحلتك الجميلة مع الشعر والفن ؟ - والله انا طبعا اتخرجت من الثانوي قبل حوالي خمسين سنة . * انت من مواليد ام درمان ؟ - ايوه ياخي مواليد ام درمان حي العرب. * اتولدت سنة كم ؟ - اتولدت سنة 1938م وقريت في ام درمان لغاية الثانوي اتخرجت من المؤتمر الثانوية سنة 1957م .. بعدها طوالي مشيت ابحث عن شغل وصادف اني اشتغلت في الكهرباء والمياه سنة 1958م في المصلحة اتعرفت فيها بالفنان السني الضوي .. * كنت بتكتب شعر وقتها ؟ - كنت بكتب شعر فصيح ما شعر غنائى ونشاطي كان في الجمعيات الادبية في المؤتمر الثانوية. * ................؟ - انا والسني في نفس الوقت داك اشتغلنا في مجلة الصراحة وبقينا نقدم فيها اعمالا فنية .. والسني كان بعزف وابتدأ يلحن لي من اشعاري .. * هو اول من لحن ليك ؟ - لا اول زول لحن لي هو صالح سعد فنان قديم ربنا يرحمه وده كان في بداية الستينات. * بتتذكر الاغنية ؟ - في القطار انا قلبي طار يوم حبيبي ودعتو .. مسجلة في الاذاعة بي صوتو. * السني بدأ معاك شنو ؟ - انا كنت بكتب شعر ما للفنانين لكن هواية عندي السني بدأ بتصفح الاعمال البكتبها لقي فيها جانب غنائى وهو كان يعزف على العود قال لي انا حألحن الحاجات دي وفعلا ابتدأ من اوائل الستينات يلحنها ويديها للفنانين . * وبديتو مع منو من الفنانين ؟ - أدينا ابراهيم عوض ليه بتسأل عني تاني واغنية مين قساك مين قسى قلبك .. والاغنية الثالثة قصدني ما مخليني راخصني ما مغليني يا قلبي يا معذبني .. بعدين ادينا صلاح بن البادية اغنية الجرح الابيض ودي لقت رواج كويس. * مستحضر كلماتها ؟ - دقيقة اتذكرها ليك (بعد لحظات) لو نعيم الدنيا عندك احرميني لو جحيم الآخره ملكك عذبيني يا ضناي ياوهج اشواقي الحبيسة جرح اصبح ما بسيل لو تجرحيني .. وصلاح ده برضو غنا لينا اول حب وآخر حب حبك نار وكله ودار منه بقول انا آه يا رب .. * لكــن انت مرتبط كثير بي الفنان صلاح مصطفي ؟ - اتعرفت بي صلاح مصطفي وهو كان يادوب ناشئ سجل اغنية للاذاعة ويعزف في البيت وبلحن يحاول يخلق من نفسو فنان اديتو عددا من الاغاني ولحنها وقدمها للناس. * حبة شوق ؟ - ايوه اغنية حبة شوق واغنية الماضي والحاضر البقول فيها : انت لو فكرت تتذكر غرامك وتبكي ماضيك البعيد برضي زيك كنت عاشق وكانت ايام عمري عيد يا سلام .. وغنا لي ما بغيرني صدودك عني ما بحولني غرورك يوم سيب نيران الشوق تحرقني واملأ ليلي عليا هموم غناها لي صلاح مصطفي هي احسن اوادعك وتودعني مادام حبك بيضيعني * عثمان حسين ما اديتو حاجة ؟ - تصادف مرة لاقيتو في الاذاعة قال لي انا عملت لحن جميل لي كلمات عوض احمد خليفة لكن اللجنة ما اجازت الكلام دايرك لو بتقدر تعمل لي كلمات لي اللحن ده وسمعني. اللحن كان جميل وعجبني وكتبت ليه كلمات ؟ - ايوة عملت ليه : احبك احبك الي ما لا نهاية واغنيك حنين وشوقي وهوايا لانك حبيبي وغاية رجايا * وتاني اديتو شنو ؟ - لا غير دي ما غنا لي شئ لكن ثنائى العاصمة غنوا لي من زمن ما كانوا ثلاثة كان معاهم الحويج الله يرحمه اتوفي وهسة برضو ابودية اتوفي ربنا يرحمه. غنوا لي عددا من الاغاني ذي حيرت قلبي معاك خليتو بيك مشغول يا احلي من ضماك ما بصح عذابو يطول وتاني اغنية : يا حبيبي وانت غايب قلبي وراني العجائب ، مره شاكي ومره باكي وعمري ماحسيتو طايب. وبرضو اغنية : مهما تصدي عني ومهما زعلتي مني برضي بحبك يا حياتي * ده كلام عملتو في الستينات ؟ - لغاية الثمانينات بتلقي فيه جزء. * الاغنية القدمتك للناس ولفتت الانتباه لشاعر اسمو محجوب سراج ؟ - أغنية اول حب وآخر حب لصلاح ابن البادية . * واجمل اغنياتك في حسابك انت ؟ - اغاني كلها مقربة لي نفسي ومحبوبة ولكن في حاجات استغرقت وقتا في كتابتها ذي الجرح الابيض لصلاح ابن البادية . * لسة بتكتب شعر ؟ - لا وقفت من ما اتأثروا عيوني ديل . * طيب خلينا نتكلم عن حالتك الصحية .. انت مالك عندك شنو ؟ - مشكلتي عيوني .. قبل ستة سبعة سنين عميت عديل .. وده خلاني ما اكتب شعر واقعد في البيت ما اشتغل وما عندي دخل ولا امكانيات وغايتو. * والاسرة كبيرة ؟ - الحمد لله ثلاثة اولاد وتلاتة بنات واحدة منهن اتوفت الله يرحمها .. والباقي بتين وثلاثة اولاد .. منهم ولدين وبت عندهم قصور في النمو العقلي وبت واحدة اتزوجت وبقي معانا الصادق بس هو البعولنا مع المعاش بتاعي. * نحن مشينا فتشناك في حي العرب ؟ - انا اصلا كنت ساكن في حي العرب في بيت ورثة كانت فيه 60 متر حقتي وهبتها لي خالتي بعتها بعد ما طلعت لي قطعة ارض في الحارة دي بنيتها جالوص بي ثمن الـ 60 متر في حي العرب. * قبيل قلت لينا مافي زول يزورك ؟ - ايوه .. * الزملاء الشعراء واتحادكم والفنانين والمسؤولين ؟ - ولا واحد منهم جاني لا شعراء لا فنانين لا مسؤولين . * قاعد تلومهم ؟ - والله ما بلومهم ظروفهم امكن تكون صعبة. تدخل هنا خالة نعمات تحمل زجاجات البارد وجاءت منفعلة كأنها كانت تنتظر هذا القدوم لتفضفض : كدي يا ولدي هسة انتو براكم شفتو الحال .. ونحنا بنثق في عيونكم ده حالة شاعر اسمو محجوب سراج ؟ راقد عميان مافي زول جايب خبرو .. والله كنا متعشمين في الحكومة .. اولادو مجدعين في السراير دايرين العلاج .. . معاشو كله .. 100 الف بس الولد الوحيد الشغال الصادق سائق ليه ركشة ما حقتو .. البجيبها كلها بنتعشى بيها .. وعمك ده سقناه مستشفي بر الوالدين كشفوا عليه وديناه المغربي كشفوا عليه وقالوا بتعالج وبشوف بس العملية دايرة قروش لكن يا للاسف .. * انتبهنا فاذا الشاعر محجوب سراج يبكي ؟ ـ كدي يا خالة نعمات مشكلة العيون ليه ما تابعتوها ؟ - يا ولدي انا مشيت اى حتة الثقافة والفنون وناس الشعراء في واحد منهم جا لقي اولادي واقعين مع المرض اداني عشرة الف جنيه كتر خيرو. * تقرير العيون شنو؟ - عندو ضغط في العين بعدين ناس المغربي قالوا دايره عملية بتاعة الضغط وقالوا ممكن يعملوا قرنية للعين الثانية لكن العملية دايرة قروش وايدنا ما واصلة خشمنا يا ولدي. * البعولكم الصادق ؟ - ايوه ومرات انا بسوي شباشب ابيعها لكن مافي سوق ومرات كمان ناس يجيبوا لي جلابية جلابيتين رجالية اعمل ليها عمود والقي لي فيها قرشين تراها تساعد. * ...............؟ - ناس المصنفات كانوا بدونا 75 الف في الشهر لكن بعد ما اتغير علي الماحي جابو مدير مالي جديد بدلوا واظنها موظفة قاموا وقفوها مننا كانت الـ 75 الف بتجيب لي دقيق وزيت وكده يعني بتساعدني والله لكن الحمد لله وقفت هسة كلو كلو . * اردنا ان نغير دفة الحديثة لان الاستاذ مازال يبكي ؟ - ليه ما عملت ديوان ؟ - والله يا ابني جمعتها كلها في دفاتر وفلسكاب ووديتها للاخ الصديق التجاني الحاج موسي كان الوقت داك في الهيئة القومية للثقافة والفنون لكن بعد فترة قالوا الاشعار دي ضاعت وخلاص اتعوضنا الله فيها. * كتبت شنو في الخالة نعمات ؟ - كتبت ليها : ذي عينيا وغالية عليا دي العاجباني مشاعر حية. * ضحكت الخالة ومسحت دمعتها ؟ - قلت لها : اهو مسجلة انت في وجدان الناس. - قالت : والله يا ولدي امنيتي هو يفتح بس .. لكن اقول ليك حاجة سر غايتو البتعرس ليها شاعر حتجن كلمهن كلهن. (وضحكنا كلنا). * يعني هسة مافي شعر يا استاذ ؟ - والله يا ابني بجيني واقعد اردده بس لغاية ما انساه اكتبو كيف ؟ وتعرف ذي الحصلت جفوة غير متعمدة بيني والشعر. * ممكن تسجلو علي جهاز تسجيل ؟ - «يضحك» هو انحنا لا راديو لا تلفزيون تقول لي مسجل. * يعني ما قاعد تسمع اذاعة ؟ - من وين انا ما بتحرك من البيت وهنا ما عندنا راديو او تلفزيون (تتدخل الخالة نعمات) الصادق بكتب شعر. * اجزتو انت كشاعر ؟ - الصادق شاعر جيد ورانيا اختو برضها شاعرة . * منو البعجبك من الشعراء ؟ - حسين بازرعة شاعر مافيه كلام. * آخر حاجة بترددها من شعرك شنو ؟ - جاتني خاطرة قبل فترة بقول فيها : اتمني اسعد في الحياة اصلو الشقا في الناس وهم اصوات تقول لي عيش هواك واصوات تجرعني الألم غردت بي حب الحياة اصدق غنا واجمل نغم وسبحت ضد الموج سنين انا في الوجود قبل العدم موج المظالم والعذاب لاقاني ذي طير الرخم احمل احباي وعناى فوق الجبال اعلى القمم * رسالة للرئىس والمسؤولين ؟ - ياخي الجماعة ديل مشغولين خلاص .. لكن بس نقول لهم كان مافيها ازعاج اتوصوا بيننا خير والله لو انا الليلة ما محتاج لي الالف جنيه ما بكلفهم. اما بعد : هذه تراجيديا سودانية ... بطلها شاعر رقيق سكن في وجداننا وهذا ذاته الذي يديننا ويجرمنا ويحق لمن هو بلا هذا الجرم ـ جرم صمتنا عنه ـ ان يرمينا بحجر قاتل .. او يدفعنا للوقوف امام المحكمة كلنا .. سادة وشعب. *** سيدي الرئىس : لم يحدثونك عنه ولو فعلوا لكان هو اول باب تطرقه في برنامجكم بين الراعي والرعية ولكنه مازال رعيتكم ومازلتم سيدي الرئىس الراعي له ولأمثاله .. سادتي وزراء الثقافة الاتحادية والولائىة عشمنا فيكم كبير .. يا مجتمع .. تحركوا نحو هؤلاء الذين يعطون من دمائهم ويموتون في صمت فقط لاننا لا نسمع صرخاتهم المكتومة. سيدي الشاعر الرقيق املنا في الله كبير ان يستجيب لحالتكم من يهمه الامر ومن بيده الامر وحتي يتم ذلك سنواصل في تذكيرهم لعلهم كما قلت مشغولين. * اهدي هذا الحوار الحالة للزميل بألوان عثمان شبونة فقد ظل يكتب عن محجوب سراج وهو الذي حرضني بكتاباته تلك للبحث عنه وها انذا افعل ... عزيزي الغاضب الشقيق شبونة نعم لم يسلم الشاعر من النسيان الطويل ولعنة المرض ولؤم الراهن .. ولكن ماعسانا نفعل ..؟؟؟؟؟

جنى

عرفته عن طريق محجوب شريف

عندما أهدى عملا له سنة 82


لمثل محجوب سراج تقام التماثيل


حق محجوب سراج يجب أن يصله في سريره


يمكن حساب حقه كما يلي:

عشرات الأغاني من أشعاره

له فيها حق المؤلف

copyright

له نسبة قد تصل ثلث العائد من كل شريط يطبع

أو سي دي أو فيديو أو حفلة تردد فيها أي من هذه الأغاني

وفي كل مرة يتردد ذلك


عنده حقوق عند كل إذاعة
وشركة صوتيات
وكل دكان يبيع التسجيلات الغنائية

من واجب كل فنان يردد أغانيه

أن يحرر له شيكا كل فترة



من واجبنا هنا في سودانيزأونلاين

أن نسخر هذا الفضاء الإسفيري

لننظم حملة لتكريم المبدع محجوب سراج

ولهذا أدعو من هذا البوست


ليه بتسأل عني تاني

مين قساك مين قسى قلبك

قصدني ما مخليني

الجرح الابيض

اول حب وآخر حب

حبة شوق

اغنية الماضي والحاضر

ما بغيرني صدودك عني

احسن اوادعك وتودعني

احبك احبك الي ما لا نهاية

حيرت قلبي معاك خليتو بيك مشغول

ذي عينيا وغالية عليا



أغان شكلت وجداننا


الباقر موسى

الغالي جني
ده يا هو الحال ( والله الواحد ما حيقدر يكتب اي شي )

اتمنى ان يتذكر الفنان والملحن السني الضوي وعدد من الفنانين
ان لمحجوب سراج حقوق في رقابكم فلتقفوا معـــه ..
اتمنى ان تتبنى منظمة رد الجميل مبادرة تجاه هذا الشاعر الجميل
اتمنى
اتمنى
اتمنى
اتمنى
اتمنى
اتمنى
اتمنى

والله ماساة حقيقية
وعيب
عيب كل من يهضم حقوق هذا المبدع
وغيره

ياريت قانوني فالح يتولي مطاردة حقوق الشاعر المبدع سراج

سوال:
هل يوجد لدينا قانون لحقوق الاداء مثلما في كل العالم؟
(اعمال عظيمه كهذه يجب ان تضمن معيشه رغدة له)


غايتو مغص بس

*

Quote: * قبيل قلت لينا مافي زول يزورك ؟ - ايوه .. * الزملاء الشعراء واتحادكم والفنانين والمسؤولين ؟ - ولا واحد منهم جاني لا شعراء لا فنانين لا مسؤولين . * قاعد تلومهم ؟ - والله ما بلومهم ظروفهم امكن تكون صعبة

يا الله

`

أخونا جني

ألفيس بريسلي وفي مدينة ممفيس حيث أقيم يحج ألأمريكان لبيته من كل فج عميق لا لشيئ ! فقط لأن الحكومة ألأمريكية إعتبرته شخصية قومية كما ألعلـم ألأمريكي. فتأمل!!

فوق من أجل محجوب سراج الساعر الرقيق.

ياجنى ...أمثال سراج رجالٌ كُثر يملأون حوارى وأزقة وظلال الاشجار فى السودان فى كل أصقاعه القاصيه والدانيه ...
لم يعد الزمان زمان الأولى والأحق ولو كان لربما صلُح الحال وإستقامت الخُطى ...
خليهم مستورين ربنا يلطف بيهم...
مع تحياتى واطيب أمنياتى...
سوركتى

الأخ جني تحياتي

دعنا نقارن كم هم أمثال محجوب سراج ؟؟
وكم هم أمثال محمد الأمين خليفة ؟؟

وبعد كل هذا يأتيك صحفي ليناشد الرئيس للتدخل في دفع كم وثمانين مليون ذهبت في عمل تجاري بين البنك والعميل.

السودان دا أصابه الجن عدييييل كدا!!!!!!!!!


بحيراوي

فوق
ماذا لو كانت منظمة سودانيز اونلاين الخيرية
خرجت من طور التنظير الى حياة الناس المحتاجة لدعمنا
لهم فل نتبنى علاج الشاعر محجوب سراج ...

أخونا جني

أرجو أن تتبنى مقترحنا ود الجمام وأنا وآخرين

ببدء حملة من أجل محجوب سراج

يمكن أن تفتح بوستا آخر بعنوان مخصص للحملة

أفضل أن تأتي منك بدلا من فتح أكثر من بوست

من أكثر من شخص حول نفس الموضوع


مع تقديري

الباقر

http://www.mazika.in/singer2132-song41064

Quote: أخونا جني أرجو أن تتبنى مقترحنا ود الجمام وأنا وآخرين ببدء حملة من أجل محجوب سراج يمكن أن تفتح بوستا آخر بعنوان مخصص للحملة أفضل أن تأتي منك بدلا من فتح أكثر من بوست من أكثر من شخص حول نفس الموضوع مع تقديري

ود الجمام والباقير ومجسن وسوركتى وكل الاحباب الذين مروا من هنا

لان نضئ شمعة خير من ان نلعن الظلام
ا
اقترح التحرك من بعض سودانيز اونلاين فى العاصمة تسجيل زيارة لمنزل الشاعر وتلمس شكل المساعدة العاجلة التى يحتاج لها وافادة بقية العضوية ومن ثم يمكننا التحرك فى شكل مجموعات فى كافة دول المهجر للمساهمة بصفة عاجل!
جدة امرها ساهل ويلا رمضان شهر خير!
جنى

معكم في كل ما تقرروه، فمن منا لم يطرب لهذا المبدع الرقيق.
تحياتي يا جني

شيئ مؤسف والله

لكن الأكثر أسفاً أنه ليس هو الحالة الوحيدة

هنالك مبدعين في كافة مجالات الإبداع والرياضة ومنهم من أثري

حياة السودانيين طيلة عود من الزمان والآن يعيشون أسوأ الظروف

المشكلة ما مشكلة مبدع واحد بل مشكلة أكبر من ذلك لذا يفضل لو الناس

فكرت في حلول جماعية وشيئ منتج أكثر من الحلول الفردية بمعني أن الضغوط

الإعلامية علي إتحادات الشعراء والفنانين والمؤسسات الثقافية والمحليات فكلها بها

بنود يمكن لو فعلتها أن تصرف حوافز شهرية مقدرة لكل مبدع أقعده المرض أو كبر السم

الأخ / جنى وزوار البوست الكرام ، تحياتى .......


شىء مؤلم أن نتعايش مع حكومه تقتل الإبداع والمبدعين بمنتهى
القسوه التى تصل لدرجة الإهمال الكامل .

أثنى إقتراحك بعمل شىء من داخل سودانيز لهذا الشاعر العملاق.


.


.


.

Quote: - ليه ما عملت ديوان ؟ - والله يا ابني جمعتها كلها في دفاتر وفلسكاب ووديتها للاخ الصديق التجاني الحاج موسي كان الوقت داك في الهيئة القومية للثقافة والفنون لكن بعد فترة قالوا الاشعار دي ضاعت وخلاص اتعوضنا الله فيها.

معقوله بس ...... يا التجانى

الذيين عرفون ابجديا ت الاعلام يعرفون تكلفة البث الاذاعى للدقيقة والواحد وكم تساوى قيمة بيعها وما هو الكسب والمردود المادى للاعلانات الناتجة عن ازدياد مستمعى الاذاعة والتلفزيون بسبب ما تقدمه هذه الاجهزة لمواد بث راقية تساهم فى استقطاب اكبر عدد من المستمعين الشئ الذى يرفع قيمة الدقيقة الاعلانية!
وحيث ان شاعرنا محمود سراج هو من احد هؤلاء القامات السامقة التى ساهمت فى اثراء الوجدان السودانى بهذا الكلم الجميل الذى يساهم فى تشذيب وتهذيب النفوس بارساء قيم الحب العذرى والعفاف والاخلاص
والوفاء وخاصة نحن فى زمن الفيديو كليب الذى يوشك ان ينقل ممارسة الحب لا تاوهات المحبين! وبما ان شعرنا الرقيق والذى صاغ القلائد والفرائد والخرائدة المذكورة عاليه والتى ظلت تبثها الاذاعة منذ نهاية الخمسينات الى يومنا هذا وستظل تبثها طالما بقيت الاذن تعشق ش\انها شان العين والقلب والعقل فان الاذاعة السودانية وشقيقها الصغر التلفزيون مدانان لهذا العملاق لن يوفيه اى مقابل مادى!
ااى جحود وأى نكران!الويل لامة تنسى تاريخها وتتنكر لحداتها وعظمائها!
جنى

`

يا جنى مالك علينا العصر ده

ما تقلب علينا المواجع

والله فى حالات فى السودان تبكى

بالله زى التجانى حاج موسى ده مش المفروض بشنقو فى شارع عام

يعنى كان ممكن قروش الديوان تعالجو تخليهو يشوف

استهتار قمه يحرق دي.. السودان..

شوف العمليه بتكلف كم وختها هنا وانكرب وخت ليك رقم حساب والله كريم

Quote: الولد الوحيد الشغال الصادق سائق ليه ركشة ما حقتو .. البجيبها كلها بنتعشى بيها ..

العزيز جني
أرجو التكرم باخطار الباشمهندس بكري بالأمر ..والشروع في جمع التبرعات .
ومعا من أجل رقشة لأسرة الشاعر الرقيق محجوب سراج .

جني العنوان ما واضح بالنسبة لاهمية الموضوع ..


التحية للشاعر الفذ محجوب سراج ونتمنى له الشفاء وتمام الصحة

أحمد الصديق

500 ريال سعودي

أو 350 ألف سوداني

وين رقم الحساب؟؟

شكرا جني على تبني مقترح الحملة

أقترح لها إسم

"ألف أهلا .. محجوب سراج"

تشمل حفل غنائي لصالحه

والعمل على طباعة ديوانه

وجمع مبلغ - يستلمه شخص يحدده - لعلاجه

وأشراك مجموعة الفنانين والشعراء في الحملة


الباقر موسى

بعض الوفاء لمن جملوا حياتنا وصاغوا وجداننا
جنى

لكي لا ننسى

Quote: أرجو التكرم باخطار الباشمهندس بكري بالأمر ..والشروع في جمع التبرعات . ومعا من أجل رقشة لأسرة الشاعر الرقيق محجوب سراج .