رسالة إلى الشاعر الصديق

فلتخترق هذه الرسالة كل الحدود وجدران السجون والزنازين لتصل إلى العملاق الشامخ كشموخ جبل البركل ألى العطاء الذى أعطى بلاحدود إلى هذا الرجل الذى ظل صامد كصمود النيل إلى الشاعر الصديق محجوب شريف فل تصل إلى مركز عبد الكريم المرغنى.


محجوب غرد قول
خلى الشمس تطلع
أصلوا الزمن غدار
والطغمه ما بتشفع
والشعب عاوز نور
عشان يقوم يطلع
بالله غرد وقول
خلى الشمس تطلع
لايهمك الترباس
والسونكى والمدفع
خبر جميع الناس
الظلو ليه حدود
والحق يوم بيطلع
نخلاتنا ما بتشيل
راجية النهار يسطع
ومى حديثها كتير
راجية الحبيب يرجع
محجوب غرد قول
نعلم الشفع
ونعلم الجابين
ان الوطن غالى
وكيف العدو بيركع
ونعلم العمال
فلاحنا والتربال
كيف الزرع يطلع
وكيف نبنى جسر متين
وكيف نبقى يد واحدة
وكيف الحقوق تنصان
وكيف الشمس تطلع
بالله غرد وقول
بكرة النهار بيسطع
وطننا يبقى جميل
وحقوقنا تتوزع
ويبقى الشمال جنه
ويبقى الجنوب أروع
محجوب غرد قول
خلى العدو يرقع
و سودانا يبقى جميل
وحقوقنا تتوزع
ويبقى الشمال جنه
ويبقى الجنوب أروع