وتــــر الحـــــزن -قصيدة-

وتر الحزن شبّا
و الليد تدافر الليد
خاطر الفرح عبّا
بحر العواطف ريد
يا قلبي ليه تحتار
القسمة ما بي الليد
اخترتا تمشي براك
بي الدرتو ابقى سعيد

قيفك حضن للشوق
شوقا يودي بعيد
ملهوف و قلبي عليك
و الله حزني شديد
يبس الحلق في الجوف
انكبى فينا الخوف
مسخت ليلي العيد
هجرت عيونا الشوف
ما بين قعاد و وقوف
حتّا فرحنا بليد

يا وتري شن معناك
لوما بتزيد تغريد؟
ايه ابقى معنى الحب
لو ما بسبقو الريد؟
يا وتري خلي النم
يمسح نزيف الدم
وقتين رموكا شهيد
شد الدواخل هم
بيتين عزاب و ندم
زيد الوجع تشريد
اسقي القوافي وهم
ما يبقى فيها فهم
خليها في التسهيد
من الوحل ننحل
ايد الحزن تنشل
ان شاء الله ايدا ايد
خيط الفرح ينسل
من بين خدودنا خصل
خرزا حرير و جريد

يا وتري شد الحيل
ما تبقى ديمه عنيد
حبك سكن بي الحيل
حوّل دواخلي نشيد
من كوستي خلي هواك
يمطر جبال توتيل
ام در تزغرة شوق
ترقص اعالي النيل
يغشى الفرح ملكال
يكبر يعبي النيل
يتهادى للخرطوم
فرحا يدافر السيل
من باره لي كسلا
مدني وجزيرة الفيل
كادقلي يا دار فور
غنّت فرحنا قبيل
من حلفا لي نمولي
سنار و حمدالنيل
فاتت علي الكرمك
من شندي شاده الخيل
ما تنسي يا رمبيك
موسم فرحنا تقيل
خلي البلد ترقص
طربا يهد الحيل
لي عزة قولي خلاص
ودعنا عهد الليل
والله ما ناسيك
ولدك و جمل الشيل
فارسا يواسي الصف
وقت الصفوف بتميل
منك بشيل حسي
شبهي و ببقى اصيل
شمسك تبق جواي
تخجل كهارب الليل
تغشى البيوت بيت بيت
تضوي الفرح قنديل
اتقصّر المشوار
و الخطوة صبحت ميل

و انحنا بيك نكبر
و نظرنا يقوى حديد
وتكوني انتي ملاذ
قبله و تكوني وريد
تلفينا نفخر بيك
تبقيلنا انتي السيد
يدينا بيك تبني
تجدع بعيد لي بعيد
و نغني عزة هواك
نحنا الجنود وعبيد
نحنا الجدود العز
خرزا يضوي الجيد
تلفينا نفخر بيك
تبقيلنا انتي السيد
تبقيلنا انتي السيد


لندن

27.08.04

Quote: من كوستي خلي هواك يمطر جبال توتيل ام در تزغرة شوق ترقص اعالي النيل يغشى الفرح ملكال يكبر يعبي النيل يتهادى للخرطوم فرحا يدافر السيل من باره لي كسلا مدني وجزيرة الفيل كادقلي يا دار فور غنّت فرحنا قبيل من حلفا لي نمولي سنار و حمدالنيل فاتت علي الكرمك من شندي شاده الخيل ما تنسي يا رمبيك

عبد الله :
لك التحايا.. وأنت تحمل وجع البلد في مهرجان المدن جميعها هذا..
تحياتي ..وعميق ودي..

الحبيب ايهاب الطيب
كيفك با حبيب و ان شاء الله دايما طيب؟
دايرنك هنا دابما معانا قريب
تسلم يا العشى و يسلم ابوك الطيب

شكرا ايهاب على حضورك المتواصل و دمت لنا و حرفك الندي و يسلم البلد
لك ودي و قلبي الكبير

الاخ عبدالله
او شوقي

كما عرفتك .. كلماتك رنانة وانيقة ..

Quote: قيفك حضن للشوق شوقا يودي بعيد ملهوف و قلبي عليك و الله حزني شديد يبس الحلق في الجوف انكبى فينا الخوف مسخت ليلي العيد هجرت عيونا الشوف

تسلم ومزيد من النور

الحبيب عمك تنقو
اهلا بيك و شكرا احضورك الجميل و شكرا الى تشجيعك و حسك الدافي فانت دوما تزرع في نفوسنا الفرح لك الشكر و كل الود

انت جميل ياعبد الله

ســــــلام
استاذي العزيز موصلي
لك التحية والشكر وشكرا على حلاوة الطلة و اهلا بك يا من يزرع الفرحة في نفوسنا و يعلمنا كيف نحيا بالكلمة و نعشق النغم

من خاطر الفرح تدي المعاني الزوق
منك نبتدي و منك بنطلع فوق
يوسف يا وهج همس الحروف الشوق
ليك مني السلام ليك التهاني بروق

Quote: يا وتري شن معناك لوما بتزيد تغريد؟ ايه ابقى معنى الحب لو ما بسبقو الريد؟ يا وتري خلي النم يمسح نزيف الدم وقتين رموكا شهيد شد الدواخل هم بيتين عزاب و ندم زيد الوجع تشريد اسقي القوافي وهم ما يبقى فيها فهم خليها في التسهيد من الوحل ننحل ايد الحزن تنشل ان شاء الله ايدا ايد خيط الفرح ينسل من بين خدودنا خصل خرزا حرير و جريد

................................
شوقى ما اروع كلماتك وما أصعب الاجابه على سؤالك لوتراحتار معك
وما بين التغريد وحيرة الوتر يجف الدمع فى المآقى ويبدا بكاء الدواخل

Quote: من خاطر الفرح تدي المعاني الزوق منك نبتدي و منك بنطلع فوق يوسف يا وهج همس الحروف الشوق ليك مني السلام ليك التهاني بروق

جانا الفرح طالع من نغمة اوتارك
فى صوت حنين دافى اتجلى مسدارك
النغمه تتهادى تتدخل فناء دارك
أشعار تفتش ليك بس جهز الحانك

تسلم يا ابو عبده
ولا عدمناك ابدا

قيفك حضن للشوق
شوقا يودي بعيد
ملهوف و قلبي عليك
و الله حزني شديد


من تاني عاد الشوق
ينسج حروفك ويرفع مسيره الروح جواك لفووق

كتاااب والنص جميييل جداا
شكرا عبد الله وداعه

وتر الحزن دندن
جواك صباح العيد
سحب الشجن صبن
وكان الخريف رعيد
بدر السماء اتلون
دافر ظلام الريد
نجمات حنان خبن
اسرار دواخل الغيد
ودمعاتك اتكبن
يا شوقى دون ترديد

توما .. واصلى ابداعاتك ايتها البالتوكيه المتمرده

الاخت العزيزة توما
لكي مني السلام ولك التحية
شكرا لكي عزيزتي زشكرا مطر لي سماحة الطلة و شكرا الى حرفك الندي وهمسك الحنين و:

ومن تاني عاد الشوق
عاد فرحي القبيل فرحة قليب معشوق
انشرّ الامل بسمت عيونا بروق
بي جيتك نطيب نشفى ونحلق فوق

شكرا توما و دام حرفك ندي نداوم حروف اسمك و ما بقدر اقوا اتنين
لوووووووووووووول

ســــلام حبيبنا اوسلي و مرحبتين كيمو
شكرا لك عزيزي وشكرا على طلتك الحلوة التي نسعد بها و شكرا سحب وشكرا مطر لي حرفك الشجي و حسك النقي وانت تعطر سماواتي باحلى الكلام شكرا لك مدمنا مدن البكاء وفيا لها و ممعنا في تضاريسها لك
ودي وقلبي الكبير

بعجبني البكا يا اوسلي في مسدارك
الخلاك تهج ترحل تفارق دارك
روحك سمحة زي اصلك و عالي منارك
المولى الكريم يرعاك ازيد مقدارك

Quote: من الوحل ننحل ايد الحزن تنشل ان شاء الله ايدا ايد

أما آن لهذا الحزن أن يرحل من دواخلنا؟
عزيزي وداعه لقد لامس وترك الحزين ـ وهو يصدر عن إنفعال صادق ـ مشاعرنا وهي مدمنة على الآهات، ودغدغ في خلجاتنا أحاسيس تهفو للفرح الآت
الله يخضر ضراعك،
ولا تبخل علينا بهكذا أعمال، تعكس حالنا الآن الذي هو إلى زوال .... حتما إن شاء الله

Quote: بعجبني البكا يا اوسلي في مسدارك الخلاك تهج ترحل تفارق دارك روحك سمحة زي اصلك و عالي منارك المولى الكريم يرعاك ازيد مقدارك

فى البكاء يا قطيم
جيلانى كان استاذى
كت انت المدير
قبال يكون ميلادى
فوق درب الحسان
ياشوقى انت تنادى
حسك وانقرش
جعريك يفوت لا غادى



مرحب كمال ودا يا شوقى قريبى وقريب عطيابى
يعنى البحر خلفك والعدو قدامك والعجاجه رابطه حولك