شوق الشوق -قـصيـدة-

احبتي غلبني الشوق و قلتا اجي اكشحو ليكم هنا اصلو حالتي بقت صعية خلاص
لكم الود و كل المودة والسلام.




الشوق مداهو الشوق
جوة الحلق مربوط
منضوم مجرتق ريد
اتخاتفنوا خيوت
من الطبيعة تشيل
حس صوتك المكبوت
يا امي كيف الحال
اشتقتا لي البنوت
لي اللمة جوة البيت
الصفقة و الزغروت
لي شارع الحلة
لي الما بنوها بيوت
لي الناموا تحت الضل
ما عرفوا شدر التوت
لي الباتو جيعانين
و القاسموا الكتكوت
في حبة القمحة
وسابوا الرزق مختوت
في مخزن السلطان
و الداروا في الملكوت
انا شوقي لي القاعدين
لي البي السهر ممعوط
و الشالوا صبرم توب
ما لبسو ورق التوت
لي الشبعوا ما ماكلين
لي الاكلوا حس الصوط
فوق الحشى المغلوب
بالمرة عدموا الصوت
تموها موية حق
والحق سطر مفطوط
من دفتر الاحساس
الفينا كان مفروط
و الليلة كيف النيل؟
يا امي كيف النيل؟
دا الكان زمان مبسوط
ما شفتو كشّر يوم
لا في مراكبوا بجوط
يا امي مشتاق ليك
شوق الحشى المزلوط
مشتاق لي ريحة الطين
للبورة و المحروت
قوليلي اوصل كيف
باقي الدرب عكنوت

يا امي مشتاقين
ليك التحية تفوت
طيبين وجد سائلين
عنك بنسال يوت
و ان كان سؤالك لي
كيفن نهارنا بفوت

بنقولوا مستورين
وتوب الستر مبهوت
كيفن سترت الحال
ان كان عرقنا زيوت
ان كان بناكل ذل
كيفن نجيب القوت؟
نتوضى نار الشوق
والشوق حلف ما يموت
و ان كان يصلح الحال
و الله نحنا نموت
وتكوني انتي وشاح
جوة الفرح منحوت
بس سيدي سيد الهم
حكّم علينا الموت
و ان قلنا ما بنموت
بدينا بطن الحوت
نكتب علي الصلصال
مشوار املنا شخوت
نرسم جبين الخوف
خطين علي المسكوت
و السم يبل الجوف
و الجوف مكجنه موت
يتمدّا في الكرعين
يدي الكرش شلوت
وياخد من المألوف
يبقالنا برضو سكوت
وان مرة قام اضحك
ببقى الضحك مخفوت



عبدالله وداعه الامين
لندن08.12.2004

Quote: لي النامو تحت الضل ما عرفوا شدر التوت لي الباتو جيعانين و القاسموا الكتكوت في حبة القمحة وسابوا الرزق مختوت في مخزن السلطان و الداروا في الملكوت انا شوقي لي القاعدين لي البي السهر ممعوط و الشالوا صبرم توب

Quote: و الليلة كيف النيل؟ يا امي كيف النيل؟ دا الكان زمان مبسوط ما شفتو كشّر يوم لا في مراكبوا بجوط يا امي مشتاق ليك شوق الحشى المزلوط مشتاق لي ريحة الطين للبورة و المحروت قوليلي اوصل كيف باقي الدرب عكنوت

Quote: يا امي مشتاقين ليك التحية تفوت طيبين وجد سائلين عنك بنسال يوت و ان كان سؤالك لي كيفن نهارنا بفوت بنقولوا مستورين وتوب الستر مبهوت كيفن سترت الحال ان كان عرقنا زيوت ان كان بناكل ذل كيفن نجيب القوت؟ نتوضى نار الشوق والشوق حلف ما يموت و ان كان يصلح الحال و الله نحنا نموت وتكوني انتي وشاح جوة الفرح منحوت

Quote: بس سيدي سيد الهم حكّم علينا الموت و ان قلنا ما بنموت بديما بطن الحوت نكتب علي الصلصال مشوار املنا شخوت نرسم جبين الخوف خطين علي المسكوت و السم يبل الجوف و الجوف مكجنه موت يتمدّا في الكرعين يدي الكرش شلوت وياخد من المألوف يبقالنا برضو سكوت وان مرة قام اضحك ببقى الضحك مخفوت

الأخ الشاعر الانسان عبدالله

تسلم يا رائع في زمن ضائع. وفي انتظار المزيد من ارض الضباب.

مع حبي و تقديري

حدث الأشواق عن لهفي عليك..
كي تعلم الأشواق أني
مذ عرفتك
لم تعد تقوى على شوقي إليك..


_________
جميلة يا عبدالله ورائعة،
مثلك..

Quote: والليلة كيف النيل؟ يا امي كيف النيل؟ دا الكان زمان مبسوط ما شفتو كشّر يوم لا في مراكبوا بجوط

انها تهويمة شوق صادق تسافر بنا الى حيث المراكب والمراكبية..
والمزارع والمزراعية.. والجروف المنشرة على مدالبصر ..

وكذا تلك الشواطئ الممتدة عبر بلادي الحبيبة من أقاصي
الشمال وحتى مخارج جنوبنا اللاهث خلف سلام قد يأتي وقد لا يأتي !!!!.

لك التحية أخي عبدالله .

التجلة لكل أم .

والسلام لكل ذرة رمل في وطني المختطف !!!!!!!!!!.


خضر عطا المنان

ماأجملها
قصيده تقرأ الحال بواقعيه وصدق
محفوف بخيال فنان

استاذي العزيز يوسف الموصلي

لك التحية و الاجلال قدر صفاءك وروعتك ايها الجميل سعيدة بك حروفي و سعيد انا بوجودك من حولي شكرا لك و شكرا لتشجيعك وروعة حسك الندي
لك خيوط الندى محبة
ولك القلب شريان رحيق
و شكرا للطلة الحلوة و لك التحايا بروق و الشكر مطر.

عبدالله

ألأخ العزيز عبد اللة
لم أتشرف بلقائك بعد
ولكني أشهد بأنك ود بلد أصيل شفاف ومرهف
أمتعنا بكلماتك الراقية المعبرة
جزاك الله خيرآ ودمت لنا

أخوك راشد الحاج