Post: #1
Title: وصوني عليك - قصيدة-
Author: عبدالله وداعه الامين
Date: 02-21-2005, 07:34 PM
وصوني عليك اجراسك مرة
انقر عصب الوجع الساكن
في عينين الضحكة الحلوة
وافرش ليك القلب مساكن
شان اتلقى الشوق من ايدك
زي عيدية الزول الساكن
بي الايجار في بال الذكرى
وبحلم يزرع قلبو اماكن
للحبان في حوش ابنيهو
يجمع شمل الريد الساكن
وصوني عنيك لي عيونك مرة
ارسم ريح الغيم الماطر
ادي الريح مفتاح الغنوة
التهدي غناي الديمة مشاتر
نبض الحال البفضح ريدك
رغم الضل الختّا الساتر
بين انفاس الشوق الطول
والاحساس الجبر الخاطر
واتمناك تبقيلو الخطوة
بين البال والقلب العاطر
وصوني عليك قلبين اتلاقوا
بين الغيم والمطر النازل
يوم اتلموا الريد و الالفة
دون ميعاد او حتى عوازل
وصدقو انو الالفة بتنفع
لو العشره بتبقى منازل
للحبان وقتين اشتاقو
وشوقم يغلب حال العازل
زي السكة تخون اللهفة
ويبقى مصير اللهفة مهازل
عبدالله وداعه الامين
لندن 22.02.2005
|
Post: #2
Title: Re: وصوني عليك - قصيدة-
Author: Balla Musa
Date: 02-21-2005, 07:53 PM
Parent: #1
الأخ عبد الله
تحياتى لك بعدد روف هذه الكلمات الرائعة
تحيات أجنحتها روح هذاالجمال الذى تنثره هنا و أتمنى أن يجد من يستنشق عبيره فى هذا المنبر الملئ بالأشواك.
إستمر فى غسل و تعطير هذه المعانى الجميلة.
Quote: وصوني عليك قلبين اتلاقوا
بين الغيم والمطر النازل
يوم اتلموا الريد و الالفة
دون ميعاد او حتى عوازل
وصدقو انو الالفة بتنفع
لو العشره بتبقى منازل
للحبان وقتين اشتاقو
وشوقم يغلب حال العازل
زي السكة تخون اللهفة
ويبقى مصير اللهفة مهازل
|
|
|