Post: #1
Title: غياب - قصيدة جديدة -
Author: عبدالله وداعه الامين
Date: 08-18-2005, 10:58 AM
كان غبتا منك ببقا فيك
ماتكوني بس فيني الغياب
يا فاردة بي ليل الشجن
مكحولة زي مدن السراب
برجاكي فوق ضل الامل
بتحدى بيك وهج السحاب
يا غبته جواكي الفرح
يا كنتا في نبضك عزاب
بس كوني بي انتي الوهج
وابقيلي شوق كل الصحاب
يا شاتله جواي الفرح
وحنينة زي مطر التساب
اقراكي بس وريني كيف
واجيكي بس من ياتو باب؟
***
كان غبتا منك ببقى بس
جواكي وافضل مشتهيك
و وراكي زي ضلي السرح
يوم جيتي يا اجمل شريك
فرحانة بي فرح المطر
والموية بتسابق جريك
شلتك معاي موجة عشم
ومحنة حلوة فرحتا بيك
بعتزى بيك تحتك ارض
يا خوفي من خوفي الوشيك
انو الغمام يروي الارض
وانا في غمامي يضيع وشيك
والسكة تنكر من وراي
خطوي الزمان ساسق مشيك
***
كان غبتا منك فيك بغيب
شايلك معايا محل محل
سافرتا بيك كل الدروب
وقطعتا بيك سكك الوحل
لاغيمة هدت حيلي يوم
لا هزّا احساسي المحل
لا مرة مليت من مشيك
لا حفيت اشواق الامل
فرحانة بيك روحي السهت
واطانشت روح الملل
يا سارقة من عيني النعاس
وحنينة زي كل الاهل
شيليني في كفك بجيك
قبال يشيل كفي الوجل
عبدالله وداعه الامين
لندن 03.08.2005
|
Post: #2
Title: Re: غياب - قصيدة جديدة -
Author: عبدالعظيم عبدالله
Date: 08-18-2005, 11:14 AM
Parent: #1
الاخ: عبدالله وداعة الامين
لك التحية على الابداع والروعة وربنا يخليك لينا للابداع
|
Post: #3
Title: Re: غياب - قصيدة جديدة -
Author: نادية عثمان
Date: 08-18-2005, 02:53 PM
Parent: #2
بَصَدِّقَــك
تخدع قِليبي البيكَ هام.. وتُوهمني بالحب والهيام
تفرشْ لِي أشواكك ورود.. تعلن حروبك هي السلام
والغريبة بصدِّقك
رغم صدك والخصام.. واللسان الكذبو سابق للكلام
القليب الدَّمُّو نازف.. والعيون أبت المنام
إلاَّ برضو بصدِّقك
خلاص بسيبك للخيال.. وأعيش رهين الاحتمال
لو ترضى يوم مبروك علي.. ولو ثُرْتَ يبقى الاشتعال
والغريبة بصدقك
مخلوق مُحَنَّن بالجمال.. وحارِمني من فرح الوصال
بكيت عشانك واكتويت.. شان أحظى بالحب الحلال
وقلبي راضي يصدِّقَك!!!
القاهرة .. نادية عثمان مختار
|
Post: #5
Title: Re: غياب - قصيدة جديدة -
Author: altahir_2
Date: 08-18-2005, 03:06 PM
Parent: #3
Quote: وحارِمني من فرح الوصال
بكيت عشانك واكتويت.. شان أحظى بالحب الحلال |
انتى ما شبه الدموع
انتى ماشبه العذاب
انتى ما ياكى الحنينة
العذاب فارق طريقنا
بـــــــــــــس صديقنى .
دى مارقة من ياتو وجعة يا استاذة نادية
يسعدنى لو ارسلتى لى النص كامل عشان اكون اول تعامل بيننا
|
Post: #6
Title: Re: غياب - قصيدة جديدة -
Author: نادية عثمان
Date: 08-18-2005, 06:09 PM
Parent: #5
المبدع الرائع ضياء
Quote: دى مارقة من ياتو وجعة يا استاذة نادية
يسعدنى لو ارسلتى لى النص كامل عشان اكون اول تعامل بيننا |
دى طالعة من وجع الروح !!
تسلم ويسعدنى التعامل معاك يارائع
النص امامك فى هذا البوست كاملا ان اردت نقله والا فاذا احببت ارسل لى ايميلك لارسله لك واتمنى جدا ان اسمع وأرى لحنك الجميل يلتف حول جسد هذه القصيدة ويرقصها رقصة الكمبلا العتيقة قريبا جدا !!
|
Post: #9
Title: Re: غياب - قصيدة جديدة -
Author: عبدالله وداعه الامين
Date: 08-19-2005, 05:47 AM
Parent: #3
العزيزة جدا وصنو الحرف نادية
شكرا لكي ولكلامك الجميل وانتي تدهشين لحظاتنا يحرفك الانيق
سعيد بك ولكي عظيم امتناني وشكرا كتير
يديك راجع
لكي التحايا والود
عبدالله
|
Post: #8
Title: Re: غياب - قصيدة جديدة -
Author: عبدالله وداعه الامين
Date: 08-19-2005, 05:44 AM
Parent: #2
الاخ العزيز عبدالعظيم
لك مودتي وكل التحايا وشكرا لمرورك الجميل
سعيد بك وربنا يخليك كمان
لك الحب وكل الروعة
عبدالله
|
Post: #4
Title: Re: غياب - قصيدة جديدة -
Author: altahir_2
Date: 08-18-2005, 02:59 PM
Parent: #1
ابــــــــــــــــــــــــــــــــــداع يا شوقى (عبدالله) . رهيب والله
|
Post: #7
Title: Re: غياب - قصيدة جديدة -
Author: altahir_2
Date: 08-18-2005, 06:40 PM
Parent: #1
اها يا نادية دى الايميل [email protected]
انى خيرتك فاختارى كل تحسيه من ابدعاتك لاغزلها حروفا من نغم
|
Post: #10
Title: Re: غياب - قصيدة جديدة -
Author: عبدالله وداعه الامين
Date: 08-19-2005, 05:49 AM
Parent: #7
الحبيب ضياء
لك مودتي وشكرا حد السماء
سعيد بك دوما ولك خالص الود
عبدالله
|
Post: #11
Title: Re: غياب - قصيدة جديدة -
Author: نادية عثمان
Date: 09-07-2005, 07:45 PM
Parent: #10
عبد الله سلام
ايدك معاى نرفع كل بوستاتنا الجميلة عن الشعر !
|
Post: #12
Title: Re: غياب - قصيدة جديدة -
Author: عبدالله وداعه الامين
Date: 09-07-2005, 09:13 PM
Parent: #11
Quote: عبد الله سلام
ايدك معاى نرفع كل بوستاتنا الجميلة عن الشعر ! |
الاخت العزيزة نادية
والله كنتا بكوس فيكي وست البنات في البوست بتاع ست البنات
جيت لقيتك بي جاي والله بت حلال
اها انا صنقرتا وراجيكي
يلا تعالي ابدي
لكي مودتي وتحياتي
عبدالله
|
Post: #13
Title: Re: غياب - قصيدة جديدة -
Author: عماد شمت
Date: 09-08-2005, 02:44 PM
Parent: #12
المبدع دوماالاستاذ عبدالله وداعه ليك التحيه.. وللاستاذ ناديه التحايا
في الروعه والدوحه الجميله.. ابدو لينا الكلام الحلو وننحن نتاوق
من بعيد لبعيد. كما عوتونا دائما الخير والحب والجمال .
بالمناسبه الاخ ضياءالدين رجل فنان لا اعرفه ولا يعرفني الا من
خلال هذا المنبر ولكن يشهدالله حكي لي الاخ الفنان عمر احساس
بان ضياءالدين رجل فنان وموهوب . انشاء الله نسمع نغم جميل ..
وكلكم تلبسوا توب العافيه دوما
|
Post: #14
Title: Re: غياب - قصيدة جديدة -
Author: عبدالله وداعه الامين
Date: 09-08-2005, 04:22 PM
Parent: #13
الاخ الحبيب عماد شمت
لك ايها الغالي كل مودتي واحترامي وسعيد بيك حد السماء ايها الحبيب
شكرا لك ولجمال روحك فانت دوما تزرع فينا كل الدهشة وعظيم الود وشكرا لطلتك التي دوما تسعدني .
تسلم حبيبنا ويديك الف عافية ولك التحايا قطوف
عبدالله
|
Post: #15
Title: Re: غياب - قصيدة جديدة -
Author: نادية عثمان
Date: 09-08-2005, 09:28 PM
Parent: #14
عبدالله
سلاااااااااااااام
ارفع لى البوستات الفيها كل القصائد حقت ابداكى من وين واحد واتنين وتلاتة
ضرررررررررررررورى
سمح
|
|