Post: #1
Title: ينصر دينك - قصيدة متمردة
Author: عبدالله وداعه الامين
Date: 08-21-2005, 07:33 PM
Parent: #0
ينصر دينك
ودين ابو اهلك ذاتو
ودين ميتين ميتينك
ياخي بحبك جد من جوه
ومهما اقول تلقاني مدينك
يا عولاق الشوق الساكن
في الانفاس خليني ادينك
يا الفجرتا الحب الساهي
ويالصحيت جوايا طنينك
فرتق عقد الريد يا سادن
للبهواك وتركتو سجينك
اقطع وهج الشوق بي وشك
ياخي تعال ادينا سنينك
اعطن وش الناس التسال
في الافراح نسيها انينك
مرمط ايد الشوق الخدرت
في الاعياد واديها رنينك
شوفا دوام عن حالك تسال
وخايفة تكون فطسته معينك
يا موهوم بي وهم الحاضر
وشايلة الدنيا محنة يدينك
سجم امات القلب الرادك
لو بيكوس ويخلي معينك
العن يوم الشوق العفن
وما اداني معاني تصينك
ياني بريدك مهما اكابر
يالرسيت جوايا حنينك
ومهمه اقول يا سيدي بحبك
ويا محتال بس الله يعينك
تقدر تخدش مر احساسي
وفي الاشواق تلقاني رهينك
ومحتاج ليك لو عترت ايدك
فوق الريد سكرت رجلينك
خامة رماد قلبينا الحرقو
في الاشواق رسمت خدينك
وينصر دين ميتين ابو اهلك
ودين ميتين ابو ام ميتينك
وينصر دينك
عبدالله وداعه الامين
لندن 15.08.2005
|
Post: #2
Title: Re: ينصر دينك - قصيدة متمردة
Author: Abureesh
Date: 08-21-2005, 07:39 PM
ينصـر دينك على دين أبو أهلك يا وداعـة.
|
Post: #4
Title: Re: ينصر دينك - قصيدة متمردة
Author: عبدالله وداعه الامين
Date: 09-09-2005, 11:13 PM
Parent: #2
الاخ الحبيب ابو الريش والله اسف في تاخري على الرد عليك ولك العتبى
شكرا لك ولمرورك الجميل وينصر دين اهلك ذاتو
تسلم حبيبنا
كل الود
عبدالله
|
Post: #3
Title: Re: ينصر دينك - قصيدة متمردة
Author: altahir_2
Date: 08-21-2005, 07:49 PM
تسلم يا شوقى . كان كده نسكن سودانيز او لاين ونهجر البالتوك . ولا شنو الرأى
|
Post: #5
Title: Re: ينصر دينك - قصيدة متمردة
Author: عبدالله وداعه الامين
Date: 09-09-2005, 11:15 PM
Parent: #3
الحبيب ضياء
تسلم انتا ويديك العافية
شكرا للمرور واسف برضو والله البوست دا نسيتو
شكرا لك حبيبنا وسعيد بيك يا وهج الشمس
لك ودي وكل التحايا ولك الحب
عبدالله
|
|