سودانيس أونلايـن...عينك حمرا وشراره....وما بترضى الحقــــــــاره

THE ADVANTAGE OF THE RED COLOR

صديق من أحد متابعى البورد الظرفاء إتصل بى يسأل..لماذا رفع بوست..الإسلام المفترى عليه والكيل بمكيالين..شكرا بكري..شكرا أحرار البورد وأختفى؟؟ قلت له أن البوست لم يرفع وأن عليه أن يبحث في الصفحات المنطوية وأن لا يركز على الصفحات الأولى فقط..رد ممازحا..والله ياخى بوستاتك دائما قرايتها تقطع النفس..دائما دايره الواحد يغطس وراها ويفتشها..إنت الظاهر عليك هلالابي...رددت عليه..وما دخل الهلال والمريخ في الموضــوع؟؟؟رد علي كيف ياخي إنت ماعارف..وأكمل بالإنجليزية
This is the advantage of the red color
لم أفهم ما يقوله فضحك وقال: إنت ما عارف إدارة البورد مريخابيه؟؟؟؟؟..قلت له أنني لا أعرف أي فريق يشجعون ولا أرى أن لذلك علاقة بالبورد..ثم من أين له أن يعرف ويقرر أنهم مريخاب؟؟؟ رد على..ياخي إنت ماشايف اللون في البورد؟؟؟ قلت له أن الألوان في البورد متعددة ومختلفة وليس هنالك لون لهلال أو مريخ؟؟ قال...إنت ماشايف لون نجمة المريخ في عنوان البورد؟؟؟رديت بالنفي فقال....شوف لون حرف ال أو في سودانيس أونلاين...أحمر...دا لون نجمة المريخ ..نظرت إلى كلمة سودانيس أونلاين فاذا بحرف ال أو به اللون الأحمر كما قال فقلت له أن لا ينسي أن حرف ال أو بداخله دائرة لونها يميل إلى الصفرة يجعل حرف ال أو يتخذ شكل العين الجاحظة التي تذكرني بحكاية زمر زمر أب عيونا حمر..التي كانت تحكيها لنا جدتي عليها رحمة الله في ما تحكيه من حكايات المساء فنذهب إلى فراشنا ونحن نرتجف من الرعب.. وربما كان ذلك يرمز إلى أن البورد عينه حمراء وشراره ..وما برضى الحقاره ..ثم أنني لا أشجع أي من الفرقتين....قال..خلاص مادام ماك هلالابي ما حتفرق معاك...شجع المريخ..قلت له أنني أعشق الكرة ولا زلت ألعبها مع أطفالي وأصدقائي كل ما سنحت لي فرصة إلا أنني لا أحب التحيز إلي فريق دون آخر لما يجره ذلك من مشاكل ومناكفات ليس من ورائها فائدة..ويكفيني أن أشجع الفريق القومي واللعبة الحلوة أيا كان مصدرها....رد على..خلاص خليك مع اللعبه الحلوه وخليك غاطس..وأقطع نفسنا بي بوستاتك الغاطســـه......وبعد....إذا كانت الحكاية هلال ومريخ ولون نجمه حمراء وهلال إزرق...أين يذهب الغبش أمثالي من عشاق الفريق القومي واللعبة الحلوة؟؟؟ أقترح أن يكون هنالك
ADVANTAGE OF NO-COLOR

الزاكي عبد الله الزاكي

دلع نفسك

نيل
حلوة ،، لكن ما وصلت كده
تحياتي

جيمس..صباح الخير
الما وصلت ياتا فيهن الحكايه وللا الفكــره؟؟؟؟؟؟

الح ك ا ي ة

صباح الخير يا باش
خلاص نقترح يخلو ال أو خاطف لونين
lOoOOoOoooOooOoOoOooOLZ
كيف معاك

برضو بدل مريخ ممكن تكون يسارية
مش؟
الاحتمال وارد
مرة كدا حضرتا فيلم يوسف شاهين
داك بتاع الابن الضال
يلا جابو البطل جارى
كدا على
حاجة حمرة و ارضيتها صفرة كدا
وقالو يعنى دى نهاية مفتوحة
يعنى الاشتراكية هى البتنقذ العالم
الا ترى انا من زمان بقول انه ليه السودانين منقسمين
هلال مريخ و يسار ويمين
وليه كل اصحابى الشيوعين
مريخاب
شكرا يا نيل على الاستبانة

والله ياخي عنوانك ماشي شمال

وكلامك جوة ماشي يمين

ورينا وين الشرار والحمار


وبكلامك انت حاولت الحقارة والجماعة ادوك في راسك

الاخ الزاكى
تحيةطيبة
اصلو الهلالاب فى البورد ديل مريخاب معقدين يحسبون ايى نجمة هى العدو وفى واحد هلالابى حصل ليه حادث حركة بعد مبارة الهلال والمريخ الفاز فيه المريخ على الهلال فى سيكافا زمان لمن جاؤ ناس الاسعاف قال ليهم انتو منو قالو ليه نحن الهلال الاحمر .زعل وقال ما بركب معاهم شالو بالقوة وبعدين شغلو المسجل وجاك ابراهيم حسين يغنى نجمة نجمة الليل نعدوا صاحبنا مات فى السكة بالغيظ
*******
واهديك اغنية شعبية يمكن الناس نسوها"اليلة يا ناس وين هلالكم وينو...انا "مريخى "هاداك ظهر

حاجة تخجل والله

البوست بتاعك قلعوه منك قلع...تجي تقلب الحكاية هلال مريخ ياخي ماتكون واضح وتبطل اسلوب مخاطبة الكفيل ده
والنفاق
واحد يقلعو بوستو حمرة عين ويجينا كمان يعتذر ويتكلم عن العين الحمرا الادوها ليهو عالم ما بتختشي

الباشمهندس الزاكى

والله ياخوى دى حكاية عديييييل كده

لكن انت الجبتوا لى نفسك براك ياخوى

زمان قالوا شنو

ولا سيبك من قول ناس زمان ده

هسع الامور بقت ماشه كيف

امريكا هى الكل فى الكل

ومن ليس معنا فهو ضدنا

ده ياهو منطق الزمن ده

والما عاجبو (زى ما قالوا) يحلق حاجبو

انا المحيرنى حلق الحاجب بجيب شنو يعنى ؟؟؟؟

حكم (بكسر الحاء) يا باشمهندس

الأخ قرشـــو
تحياتي

والله طبعا حكاية الكل في الكل دي ما عندنا عليها إعتراض وراضنها وماشبن جنب الحيطه ..وعلى قدر حالنا لا بنزاحم زول ولا حنزاحم زول إن شاء الله..لكن شوف المسأله إبتدأت بي واقعه طريفه مع صديق أوردتها عنها كإستراحة خفيفه فاذا بها تتسبب في توتر أعصاب الأخ كبسيبه فيتعرض لي بالإساءه في بوست اسكت عنه حياءا من الأخ كبسيبه إذ لم يسبق لى أن تلاسنت معه ولن يحدث ذلك إن شاء الله ..وكذلك حياءا من البورد وأهله فيصر على ترديد الإساءة في بوست آخر كأنه يستعديني أو يجرني إلى معترك تعلم أننى لا أحبه ولن أنجر إليه..تحياتي

الأخ كبسيبــه
تحياتي
ياخي هون عليك وبالراحه شويه ما تكبسنا كدا أول حاجه أنا ماحاولت حقاره ولا دا طبعي

Quote: حاجة تخجل والله البوست بتاعك قلعوه منك قلع...تجي تقلب الحكاية هلال مريخ ياخي ماتكون واضح وتبطل اسلوب مخاطبة الكفيل ده والنفاق واحد يقلعو بوستو حمرة عين ويجينا كمان يعتذر ويتكلم عن العين الحمرا الادوها ليهو عالم ما بتختشي

ثانيـــا البوست ما قلعوه ومافي حاجه هنا إسمها قلع..البوست يا عزيزي موجود في الصفحة الأولي تحت ماكتبته أنت بخمسة بوستات...وباستك العافيه إن شاء الله
ثالثا......أنا لست بمنافق..وليس لي كفيل أنافقه لو تعلم..ثم أنني ولله الحمد أختشي لدرجة أنني أحترت بماذا أرد على هجومك دون سابق عداء أو تعدى مني علي شخصك..وعموما مشكور وجزاك الله ألف خيـــر
الزاكي عبد الله الزاكي

اخوى الزاكى
انت عارف لمان عاينت للدويرة بتاعت اونلاين كنت قايلها صينية حركة تظبت حركة المرور يمينا ويسارا لكين التفسير الديالكتيكى بتاعك قلب كل المفاهيم العندى خاصة انى كنت فى يوم من الايام هلالابى،وده طبعا ايام جاب الهلال جكسا الحريف وانهى الصراع بى قون نظيف لكين بعد مابقت اربعات وخمسات القصة باظت وقلنا احسن نقعد فى الاحتياطى
على كل حال انا شايف فى لون ازرق كتير فى العناوين الرئيسية الايام دى وده طبعا بيعمل شوية تعادل بس المشكله حتكون مع القراقير وربنا يكون فى عون اخونا بكرى

سلامات
استاذ الزاكي
شكرا جزيلا علي الحكاية الظريفة
وبالمناسبة المريخاب والهلالاب مشاكلم محلولة طيب الناس الفلوتر زيي ديل يمشو ويين ياجماعة
يعني انا ماعاوز اشجع مريخ ولا هلال اعمل شنو

والله البوست ده كنت قايل ح ألقى فيه كلام واااااضح
خاصة وإنو مختوت فوووووق ، لكن يظهر ما استوى لسع
كبسيبة مستعجل يسخنو عشان ينجض، والزاكي يرخي في النار
وبمناسبة النار يا الزاكي الوارد في

Quote: ...وباستك العافيه إن شاء الله

الكلمة الأولى دي كلمة ملحقة بضمير ولاّ حرف جر ملحق بكلمة
هههههه ههايييييا
وهوي أنا بضحك بس، وإنت الخليتنا نفتش الغاطس والغميس

دكتوره بيـــان
ســلامات
شايفك مشيتي بعيد ولفيتي شمال....الحكايه ما فايته هلال مريخ تقومي توديها يسار ويمين؟؟؟؟؟يعني حتفتحي لينا طاقه كبيره أنا ما قدرها...ودي الحاجه الوحيده الما بفهم فيها...ربنا يستر
الزاكي

الاخوان عادل أمين؟؟؟ايهاب ...بشري سليمان...ود رمليه ..الشاعر
ســـلام
أقول ليكم سر؟؟؟؟ أبو يوسف هلالابي من النوع البكاتل مكاتله..والمكضب يشوف لون وصلات المواضيع في أعلى الصفحة

ياودرمليه اعمل ليك فريق براك وخلاص،واللاماعندكم جيران؟