يا إدارة البورد..يا أنا ..يا ناس شرير وجيمس وأهل العوض في البورد دا

يا إدارة سـلام
أكيد تكونوا لاحظتوا(ودي حاجه في ذمتكم) إني من ما دخلت البورد العامر دا..ماحصــل يوم إتكلمت في السياسه أو قلت البغله في الإبريق أو قلت الديك طلع فوق طربيزة العده ولا أي حاجه من الحاجات البتودي الواحد في ستين داهيه..وطبعا دا لعدة إعتبارات..منها إنو أنا راجل على قدر حالي ومابفهم في السياسه عشان إتكلم فيها..وكمان عندي وليدات داير أربيهم..عشان كدا ساكت لى كم سنه... مابتكلم..بس عندي مشكله واحده..في حاجات تانيه ما بفهم فيها زي الكلام المقنن في أمور الصحه والتعليم والنور والمويه لكن برضو بتكلم فيها ما عارف ليه؟؟؟يمكن شلاقة ترابلــه..أو يمكن عشان بخاف من الملاريا والمدارس الكنبها واطه والنور الغايب وفاتورته حاضره والمويه الرضينا بيها بي طينها وهي ما رضت بينا...عموما الجماعه ديل عرفوا نقطة الضعف دي وإستغلوها..وقرروا يتآمروا على...ليه؟؟ والله ماعارف..الظاهر عاوزين يأكدو نظرية المؤامره عشان بعض الناس مكضبنها..قبل كدا أهل العوض دا إتكلم عن الضرايب والزفارات وجرجرني كان عاوز يوديني في داهيه بس ربك ستر...وجيمس هسع جاب خبر الحريقه بتاعة محطة بري وأتاريه متفق مع الشرير يجرجروني عشان اتكلم..والشرير دا أصله من زمان مداقرني وجاري وراي..هسع لو تلاحظوا في بوست حريق بري..كل ما أقفل الموضوع يقوم ينكتوا معاي تاني وكل مره أنا اسخن زيــاده والحكايه دي نهايتها شنو الله أعلم وحمدوا في بطن الجماعه والجماعه ديــل..وعموما أنا بديكم يومين بس...يا ترفدوني من البورد دا..ويا كمان ترفدوا الجماعه ديل بعد ما تحققوا معاهم يمكن الشبكة تكون كبيره وفيها غيرهم...وللا كمان تكتبوهم تعهــــد ما يتحرشوا بي ويستفزوني تاني
منتــدى النيــــل

يا نيل يا نيل
انت متفق مع اب جضيمات ولا شنو؟
كمان جابت ليها تحرش واستفزاز
علييييك الله القعد يستفز منو؟
وكمان تطلع من مهندس مسئول...دي كبيره...وين الهندسة والعمل )
بالأصول؟؟؟ )
انت عارف بتتكلم عن منو؟
ده المهـ نـ د س هــيــثـــــم

وبعدين ده تحرش منك عديييل للمـهـــندس هــــيـــثــــم

انا عموما ما قلت حاجة لسع لكن بحاول اقرأ الشيء الذي اخفيته بين سطورك

وبعدين انا قاااعد هنا يا فيها يا ...... اها كيف معاك

يا جيمس
ولسع ما قلت حاجه؟؟؟إنت هسع ماك داير تولعها وليعة بري ذاتها..أنا خايف منك ومن الشرير وقريبي أهل العوض تقوم تحرش على واحد تاني؟؟؟وبعدين أنا ما بتحرش بي زول...وعموما كلامي عن الموضوع خليهو ..كلامي إن شاء الله طاير....إنت رأيك شنو؟؟؟؟؟؟
بعدين أوعك تجيب لي سيرة اب جضيمات دا...دا كمان لاقيني زول الله ساكت...ياع لي ما خلى حاجه...مش الصعيدي قالوا باعو ليهو الترماي؟؟..دا ياسيد باع لى حاجات كتيره...دفار الصحافه زلط..شارع الجمهورية...عمارة الكويتيه...وكان على وشك يبيع لى طياره من ناس سودانير..بس الظاهر راجيها تطلع من العمره
منتـــدى النيــــــل

اخوي الزاكي
لمن اتكلمنا زي كلامك دة سمعنا وسمعنا وفي الآخر جرينا واطي

القصة مش هندسة القصة عاوزة ليها ( لوبي )
فاحسن ليك شكل ليك لوبي مع اي ناس تعرفهم وانا اولهم ونعمل لينا لوبي مدنكل كدة ونشوف لينا كم واحد من الناس الدايشين اللافين ومالقين ليهم ضل
وباقي الكلام علشان سري شوية حاقولو ليك في التلفون احسن علشان ما ناس بكري يسمعوا

سلام

باشمهندس غريبه سلام
أنا من هسع جاري واطي...بعدين اللوبي دا كان ياهو اللوبي الفي بلدنا أنا ما قاعد آكله...عندي قولون عصبي...أخير ما نحاول نمرق من دائرة التهميش..ويا بخت من بات مهمش وما همش

حبيبنا الباشمهندس الزاكى

لك التحيات وطيب الامنيات

ياخوى والله الحكاية بقت لا عايزة سياسة ولا يحزنون حتى انا المسكين ده بقيت انضم ساكت بلا تابلت..

لكن بالله وزير ومهندس يقول الهناى والبتاع وما عارف شنو زى البتكلم ليه عن لعبة طفل اتكسرت ... ياخى الناس بلا كده كهربتهم قاطعة وحالتهم حاله كمان تتحرق محطة حرارية ما يقدر يدى الناس تقرير مفيد ...

لكن فعلا اللوم على اخونا جيمس ده هو البنكت لينا المحن والمشاكل من وين ما عارفه.

غايتو يا زول اقول ليك قوله الناس الاشرار ديل باين راسمنها وانت احسن حاجة تكتل ليهم الدش فى ايدهم وتخليهم لى الله ..
اذا الحكومة الناس بياكلو حق الشعب بتقول خليناهم لى الله..

خلاص دى فيها كلام كمان؟؟؟


لك تحياتى

حبيبنا قرشو
صباحاتك بيض
يعني باقي ليك ابلع موقفي دا واشرب عليه كوز مويه وأسكت؟؟؟؟ياخي والله الناس ديل بتوكوني كان قعدت في البورد دا...هم ما بسكتو وأنا إنت عارفني تربال طربش..من ما تجي سيرة المويه وللا النور والمدرسه والشفخانه عفاريت الدنيا كلها تنطط قدامي وأتلبش وأقعد أكتب وانضم ..وأنضم واكتب..وبعدين ياخوي العرب قالوا ..مقتل الرجل بين فكيه...وبعدين بلدا وزيرها ما بيعرف يتكلم...ناسها الغبش الزي حالتي دي يسووا شنو؟؟؟..وجيمس الظاهر ربط في وداير يودرني..هو كان داير يتكلم خليه يتكلم في الحاجات الأنا ما بعرف إتكلم فيها زي السياسه مثلا..غايتو..خلاص نعتبر البوست دا تقفيل للملف وإن شاء الله ما يفتحوه تاني ويناوشوني...قول آميـــن

يا باشمهندس صباحك خير
غايتو المرة الجاية غمض وتعال البورد
بعد كم يوم الساعة عشرة وربع عندي بوست عن شبكة المجاري بمدينة أم طرقا عراض وارتباط ذلك بـ أوناسيس و ديك تشيني

أهل العوض ..لعلك طيب ياخوي
والله الظاهر عليك داير تقلعني من عرقي.....ياخي ليه بتحكي الذكريااااات..آخر مره شفت فيها مجاري بتتحفر هناك..أيام كنت صغير بلعب في التراب..وكان كل الغبش قادرين ياكلوا كباب...هسع والله ما لاقين التراب..يازول ودعناكم الله..أنا البجيبني هنا شنو....خلونا ناكل عيش ونربي وليداتنا

منتــــدي النيـــل

باين عليها الاجازه قربت
loOoOoOoOoOoOoOoOoOLZ
هسه انا حالتي قلتا قبل ما امشي اجدد الجواز مافي غيرك
استنصحو

إيهاب سلام
الله يعينك على تجديد الجواز.......حلاقه عديل...وصلعه كمان..ضريبه...زكاه..دفاع..قناه فضائيه...كانت قناة جونقلى زمان..ويمكن تكون ظهرت حاجات جديده كمان..ديل ناس مجددين.بعد ما ترجع من الضرائب..قصدى السفاره...طمنا عليك