بسم اللة الرحمن الرحيم ..الي وزير شئون العاملين بالخارج

بسم اللة الرحمن الرحيم

10/03/2003 الاثنين


الموضوع : الا فراج الموقت


سعادة / وزير شئون العاملين بالخارج المحترم

التحية والتجلة لشخصك الفاضل وكثير الشكر ان تفضلتم سعادتكم بحل هذه القضية التى تهم كل مغترب فى بلاد المهجر ألا وهى المعاناة التى يكابدها حتى يستطيع العودة لوطنه بالاجازات بسيارته الخاصة والتى تتلخص فى
الاتى:
كانت الاجراءات المعمول بها قبل يناير 2003
1- دفع مبلغ تتراوح قيمته بين 400 ريال و1000 ريال تأمين مسترد حسب نوع السيارة .
2- دفع مبلغ 538 ريال لشئون العاملين بالخارج.
3- اذن تسليم سيارة 100 ريال .

والان فوجئنا باجراءات تعسفية تزيد من معاناتنا حيث أصبح المطلوب :
1- دفع مبلغ تتراوح قيمته بين 420 ريال و1200 ريال تأمين مسترد حسب نوع السيارة.
2- دفع مبلغ 725 ريال لشئون العاملين بالخارج.
3- اذن تسليم سيارة 100 ريال .
4- 220 ريال تأمين طرف ثالث.
5- دفع مبلغ 500 ريال لشركة القادسية والطيار مقابل دفتر افراج مؤقت والا لن تستطيع شحن السيارة وذلك دون ان تقدم الشركة اى خدمات فى المقابل , وتطالب الشركة بشهادة غرم من كفيل المغترب موثقة من الغرفة التجارية وفى حالة عدم تمكن المغترب من الحصول على تلك الكفالة , تقوم شركة الطيار بعمل الكفالة مقابل مبلغ أضافي 200 ريال سعودى .
سعادة الوزير :
نعرفكم باننا قمنا بالاتصال بسفارتنا بمدينة الرياض وعرفنا من خطابكم برقم و خ/ ق /23 , بتاريخ 8/1/2003 الصادر من الامين العام لشئون العاملين بالخارج والذى أوضح فيه بالعمل على نفس النظام القديم للافراج الموقت .
( علما بان اخواننا المغتربين المصريين يقومون بدفع 200 ريال فقط للافراج الموقت )
نناشدكم بالله العظيم ان تجدوا حلا لتلك المشكلة التى زادت من معاناتنا طالما قد أوفينا بكل التزاماتنا
الضريبية تجاه وطننا وأن تقدموا لنا الحماية من تلك الشركات التى لاتقدم ادنى خدمة للمغترب .
وتفضلوا سعادتكم بقبول شكرنا وتقديرنا وجزاكم الله كل خير.

مقد مه

عصمت عمر محمود وخالد البدري

_____________ __________

معلمين بشركة أرامكو السعودية الرياض
ص. ب : 41772
رمز بريدى 11531 الرياض

أخونا نايل 1
بعد التحية والتقدير
معقول كدا دا ما سفر بالسيارة ولا صارت افراج مؤقت
دي صارت نهب عدييييييل كدا
ومع سبق الاصرار والترصد كمان

ياباشمهندس كيف احوالك
ماتجو نبحت ونشوف القادسية دى حقت منو وبعدين نحاول نفهم يمكن القادسية دى تكون الشركة المكلفه بصيانة وتوسعة شارع بورتسودان الخرطوم....تعالوا نحسب :
500ريال ْفى 700 جنيه فى 500 سيارة اسبوعيا فى 52 اسبوع
تساوى
9,100,000,000
تسعة مليار ومائة مليون جنيه
ارزاق

القادسية حقت اخت علي عثمان محمد طه او اولاد اختوا علي ما اعتقد

هذه هي القصة ولانوا وكالة الطيار اخدوا منها توكيل الخطوط قاموا عملوا ليها ترضية بالموضوع دا

وما تنسوا ناصر الطيار عمل مسجد كبير في السودان بعد ما شبع من الخطوط

الاخ نايل
تحياتي

شوف ياحبيب قال ليك اسال مجرب ولا تسال وزير .... وحيث اني من المجربين ( من تجربة وليست من جرب ... ولو التانية برضو واردة من ما قابلت ) لووول ... افضل حاجة تعملها تنسي موضوع الوزير دا نهائي عشان ما يقولوا عليك راجل خيالي وكدا .. وبما ان الوزير حيعمل ( اضان جلد ) وما حيشتغل بيك ..فسوف تدفع كل الجزية وكل المطلوب وراسك فوق رقبتك ..ويضبحوك وعينك تشوف .. وسوف تتعب جدا من شارع بورسودان الي الخرطوم ولو اطال الله في عمرك ووصلت سوف تذهب مباشرة الي المنطقة الصناعية بدلا من ذهابك الي اهلك وسوف تقضي كل الاجازة بين لداحة الميكانيكي وقطع الغيار الغير متوفرة وحيث انه لايوجد تشليح للسيارات سوف تذهب الي الدلالة ولن تجد ما تبحث عنه عند اكبر حرامي سيارات هناك ..وسوف ترسل لي معارفك في السعودية ليرسلو لك المطلوب وبرقم القطعة سوف يشترهوا لك من الوكيل وسوف تصلك ولكن سيقوم الميكانيكي بتركيبها خطأ لذلك ( اوصيك تجيب قطعتين ) واحدة للتجربة وواحدة للتركيب .... ولا يفوتني ان اذكرك بانك وبعد خروجك من ميناء سواكن ..لا تفرح لانك سوف تدفع جزية عند كل مدخل مدينة وهذا ما يسمونه رسوم طريق .. .. ووصية اخيرة ما تمشي بي سيارة الماني ولا امريكي وتخليك سوداني خالص وتمشي بي كرسيدا ( كرسيدا وسيجنال 2 وصابونة لوكس ) عشان ما تتعب مع الميكانيكي او مع جماعة الرسوم في الميناء ....

هذا جزء فقط من تجربتنا التي اجربتنا وافلستنا ..

نتمني لك رحلة سعيدة وميمونة امنة وموفقة في ارض الوطن السعيد

وعلي قول البوارداب : ان عدتم عدنا ...لووووول


تنقو

الأخ الكريم / نايل
القادسية وبدر وكل الأسامى الأسلامية هى ستار للنصب والأحتيال بإسم الدين والدين برئ منهم وربنا يرينا فيهم يوم كيوم عاد وثمود وكان الله فى عون مغتربى الخليج ونحمد الله لاإفراج مؤقت ولا قناة الخرطوم وربنا ينتقم منهم دنيا وآخرة
مع الود

الإخوة الأعزاء حمزاوي..البعيو..مهاجر.. عمك تنقو وود كسلا
لكم عاطر التحايا وصادق الود...ورمضان كريم

كما تلاحظون فأن الخطاب موجه من أخوين عزيزين قمت بنشره نيابة عنهم إذ أنهم من رواد البورد ولكنهم ليسوا أعضاء...الجدير بالإشارة إن خطابهم هذا أرسل إلي جريدة الصحافة وكان مصيره سلة المهملات..وأطمئن الأخ عمك تنقو بأنني متكافي شر الجماعه ديل من زمان ..لأنه أحمد الله ما عندي حق عجله رالي مش عربيه..وأحمد الله دفارات الصحافه وعد حسين ما حوجتني للوزير الهمام وحتي كان إنعدمت الدفارات والركشات والبورداب هنا إشتروا لي عربيه ووصلوها لغاية بورسودان أنا برميها البحر عشان ما أخاطب أي من القابعين وراء مكاتب هذه الوزارة أو الأمانة الديكورية..لأني أولا ما معترف بيها زيها زي حاجات كتيره ودمامل كبيييره ماليه جسد البلد...وتانيا لأني ما حاري فيهم ولا في الجابهم خير..وكفايه لغاية هنا...خلونا نربي وليداتنا وسط أهلهم

****

يا نايل يعني ننسي الموضوع ده
طيب الزول العندو اسرة مكونة
من سته افراد وما عندو تذاكر
مدفوعة...ده يخلي السودان...

ما العربية بتريح من التذاكر
والظاهر بي كلامكم ده حق العربية
وحق التذاكر بمدفعن كتر

إنت ما عندك خبر؟؟؟؟هسع في باصات الرياض - الصحافه زلط ..الله يخلي النقل الجماعي..أحسن من جهاز شجون المغتربين