شكرا لكم أحبتي - هوامش على دفتر الدقشــــــه

شكرا لكم أحبتي - هوامش على دفتر الدقشــــــه


03-13-2004, 12:25 PM


  » http://sudaneseonline.com/cgi-bin/sdb/2bb.cgi?seq=msg&board=247&msg=1188282243&rn=0


Post: #1
Title: شكرا لكم أحبتي - هوامش على دفتر الدقشــــــه
Author: nile1
Date: 03-13-2004, 12:25 PM

الأخوات والإخوة الأعزاء LADIES FIRST
السلام عليكم ورحمة الله

الحمد لله الذي قدر فشمل قدره بلطفه وعنايته ..حمدا كثيرا طيبا كما يحب ويرضى جلت قدرته..ثم لكم أيها الأحبة جميعا من هرع إلى منزلي مستفسرا ومن هاتفني ومن خط هنا أحرفا ستظل منقوشة في قلبي ما عشت..لكم الشكر مقرونا بصادق الدعوات بأن يحفظكم جميعا وأهلكم وأحبابكم من كل سؤ.

في يوم الحادث لم أستعمل سيارتي للذهاب إلى العمل إذ مر على بعض الزملاء وأخذوني معهم في سيارتهم وأعادوني حوالي الساعة الثالثه وخمسة وأربعون دقيقة عصرا..وعند وصولي أمام المنزل قررت أن ألقي نظرة على فيوزات السيارة إذ لاحظت في ذلك الصباح أن عزم دوران الإستارتر لم يكن يكفي لتشغيلها ولذلك تركتها وذهبت في سيارة زملائي ..فتحت كبوت السيارة وعرض الزملاء وهم أثنان البقاء لمساعدتي فشكرتهم وقلت لهم أن الأمر لايحتاج فذهبوا و بعدهم بثوان نزل إبني محمد إلي الشارع ووقف معي امام السيارة سألته عن سبب نزوله إلى الشارع فقال إنه ذاهب إلى اليقالة..طلبت منه أن يذهب إلى البقالة فتحرك متجها إلى البقالة في الناصية المقابله وماهي إلا عشر ثوان فقط وسمعت صوت إرتطام قوي جدا ولم أدر إلا ومقدمة سيارة تمر فوق مقدمة سيارتي أخذة معها كم من الحديد لم أتبينه وصدمتني مقدمتها في جانبي الأيسر قاذفة بي حوالي ثلاثة أمتار على أسفلت الشارع ولما كانت قد صدمتني وكأنها مقلعة أثر إرتطامها برصيف الشارع فقد واصلت إرتفاعها لحوالي مترين ونصف أو ثلاثة أمتار ثم إرتطمت بجدار المبني وهبطت على مصطبة ممتده على طول المبني تفتح عليها أبواب محلات خياطة وأنحشرت بين باب أحد المحلات وأنبوب إطفاء الحريق ..والحمد لله كانت الإصابات عبارة عن رضوض وكدمات في كتفي وذراعي ويدي اليسرى والفخذ والرجل إضافة إلى سحجات وخدوش في مختلف أنحاء جسمي..عانيت من تورم كتفي وذراعي ويدي اليسرى سبب لى ألما ليومين ولكن الحمد لله زال التورم وليس هتالك إلا ألم في مفصل الكوع ورسغ اليد اليسري..وأحمد الله كثيرا بأنه لا إبني ولا زملائي كانوا متواجدين لحظة وقوع الحادث وهذا من لطف الله سبحانه وتعالي بنا.

هــــوامش على دفـتــــــــر الدقشـــــــــــــة
حليل الغبش :
لحظة سقوطي كانت مجموعة من أصحاب المحلات الواقعة أسفل العمارة يقففون أمام أبواب محلاتهم مذهولين من أكروباتية الحادث بتفرجون ولم يحاول أحدهم أن يتقدم ليتفقد جارهم الواقع أمامهم على الأسفلت ولما كان موقع سقوطي مفابل شبابيك الشقة التي نسكنها فقد كنت حريصا على أن أقف خوفا من أن تطل زوجتي أو أحد أطفالي فيراني ويصاب بصدمه..أشرت اليهم بيدي أن يأتي أحدهم ويحركني من مكاني فلم يتحرك أحد منهم ..كنت أود لو يتقدم أحدهم فأطلب منه وأوجهه لكيفية التأكد من أن ظهرى وحوضي سليمين قبل أن أحاول الوقوف..طبعا هذه من أساسيات المعاينة الأولية للأسغاف الأولي لمصابي الحوادث قبل تحريكهم حتي لا تتفاقم حالتهم إذا كانوا مصابين في العمود الفقري.....شفتوا نصاحة الترابله؟؟؟؟......مش كدا يا أطباء البورد؟؟؟؟ عموما مننا تستفيدوا يا بورداب..أخيرا قررت أن أن أجري الفحص بنفسي وليكن ما يكون ولما كنت ملقيا على الأرض وأنا على ظهري ..فقد بدأت برفع رجلي اليمنى قليلا قليلا ولما إرتفعت ودون ألم إستمريت في طي ركبتي اليمني تجاه صدري ثم بدات نفس الشئ مع اليسري فما كان من الجماعة إياهم إلا أن جفلوا ودخل أعلبهم إلىمحلاتهم..ظنا منهم إن السوداني بيرفس لي خراج الروح..تم هذا بسرعة...وسرعان ما نزل إبني خالد وهرع معه ثلاثة من أبناء السودانيين وأحد الإخوة السعوديين وبدأوا في مساعدتي على النهوض والإتصال بالشرطة والأسعاف...عندها تذكرت أهلنا الغبش الذين يهبون للنجدة في مثل هذه المواقف ويندفعون بدون تردد للمساعدة.

أمانه ما كان داير يروح راجل:
بعد إسعافي وأخذ الصور الإشعاعية والتأكد من سلامتي..دخل الغرفة جندي المرور وسألني: مين فيهم كان مسرع؟؟
سألته بدوري: مين فيهم هم مين؟؟؟؟؟ قال: أيش صار بالضبط؟؟؟ أجبته : بأنني كنت أقف أمام سيارتي فصدمتني سيارة تبينت بعد سقوطي أنها ليموزين ....قال: يازول هم إتنين واحد سعودي سايق كابرس والتاني راعي ليموزين باكستاني....صدقوني رغم الألم الممض في كل أتنحاء جسمه ضحكت لخاطرة سريعه برقت في ذهني..سألني الممرض وهو سوداني..بسم الله...يازول البضحكك شنو وإنت مبهدل كدا؟؟؟؟قلت له: والله حكايتي حكاية..الناس بقولوا فلان إتفرق دمه بين القبايل أنا دمي كان حيتفرق بين الشعوب....
السياره same ..same تياره:
كنت بالمستشفي وقد تولى سكان الحي من السودانيين الله لا يحرمنا منهم لا في في المنافي ولافي بلد الكل شئ مافي ...وقد حكوا لي ما دار بين ضابط النقطة والسائق الباكستاني
الضابط: يا صديق....إنت ليش تسوق سياره ما فيها فرامل؟؟؟؟؟؟
السائق: لا والله يا مهمد…هذا سيارة جديد..وفرامل ممتاز
الضابط: طيب لما سيارتك جديده وفيها فرامل كنت عميان عن الرجال اللي بغيت تذبحه..ليش ما وقفت الله لا يبارك فيك؟؟؟
السائق: مهمــد….لو سياره يمشي في تريق أنا يمسك فرامل…بس سياره سوي same same تيــــــــاره وفرامل مافي فايده أنا أيش يسوي؟؟؟؟؟
بيني وبينكم فعلا السيارة كانت same ..same طيــاره...الراجل دقشني وهو مقلع..أي والله مقلع...مع إنه شال الرفرف اليمين بالكامل ونص المكنه الفوقاني ووشها كلو بي كبوتو ومروحتو وعدة مويتو..لكن صدقوني الكفر اليمين نضيييف ما اتهبش..طبعا مع السرعه الرهيبه ضرب في ارصيف وجاني مقلع..بس كان ناقص مضيفات معاهو.
عمـــــر الزهور...عمر الغرام:
زميــــل عزيز جدا وهو مصري جاء ليطمئن على قال لى: حمدله ع السلامه يا زعيم ..دانت أنكتب لك عمر جديد..قلبت مقولته في رأسي بسرعة البرق..فقلت له: أنا ضيعت عمري القديم هنا...وإن شاء الله عمري الجديد دا ما بضيع منو يوم هنا ..حأمشي أعيشو في السودان..لم تكن هذه نكتــه فقد أضعنا أجمل سنوات عمرنا هنا وجلنا يعاني من إعاقة نفسية تحتاج لأعادة تأهيل في السودان....فعلا قررت أن أعيش عمري الجديد في السودان وعن قريب إن شاء الله ح أهترش ليكم من السودان....نعيش عمرنا الجديد هناك..لكن ياتري..نعيشو ..نعيشو..؟؟؟؟يا ترى بنخارج هناك؟؟؟؟والشيبات ديل نوديهم وين؟؟؟؟وحنعرف نتكلم هناك تاني؟؟؟؟نتكلم يعني نتكلم....عارف ياود قاسم؟؟؟؟ما تفتينا ياخي.
سالمين وغانمين:
عمة لنا صادف وجودها في زيارة للرياض..جاءت متاثرة...المهم أنها وجدتني بخير..بانفعال قالت لي: والله يا وليدي ..كنا قعد نقول إن شاء الله تجوا سالمين وغانمين..هسع بقينا نقول إن شاء الله تجوا سالمين..غانمين دي بقت مافي.

هذه بعض الهوامش على دفتر الدقشــة..أما سؤالكم عن التامين ولكي مان بتاعة تماضر فتلك هوامش ومسرحية أخري ستضحكون وتبكون لفصلها الأول في آن واحد.... لا أريد أن أشغل بها حيزا في البورد ولكن إذا كانت تماضر وكنتم عازمون على معرفتها فستكون لي عودة.
مني ومن المدام والأولاد كل الشكر وكل الود لكم جميعــا..ونسأل الله أن لا يحرمنا منكم ومن عطفكم ومودتكم.

Post: #2
Title: Re: شكرا لكم أحبتي - هوامش على دفتر الدقشــــــه
Author: Tumadir
Date: 03-13-2004, 12:48 PM
Parent: #1

والله الف حمدالله على سلامتك..

يا باشمهندز..

وقد راعنى منظر السياره المقلعه فى ارتفاعك..وتجاهك حتى كش بدنى..وزاد حزنى..وانت من ود مدنى؟؟


المهم طربت لاسلوبك البديع..وسماحة روحك وانت تحاول ان تتماسك حتى لا "تشفق" اهل بيتك..والتحية لمحمد الجسور..الصغير وهو يزود عن ابيه.."وما ظلم"

اما الحلقه الهامه من المسلسل والتى قد تعود بسببها غانما للبلد..فـــ افوو؟؟ فى زول ما داير يسمعها؟؟ هلا هلا


لك تحياتى وسمدالله على الحلامه ..تانى وثالت

Post: #3
Title: Re: شكرا لكم أحبتي - هوامش على دفتر الدقشــــــه
Author: bayan
Date: 03-13-2004, 01:02 PM
Parent: #2

سلامتك الف سلامة
ولله سعداء بهذا الزخم الجميل
ربنا يديك العافية يحفظك من كل شر
وشكرا على هذا الابداع

Post: #5
Title: Re: شكرا لكم أحبتي - هوامش على دفتر الدقشــــــه
Author: HOPEFUL
Date: 03-13-2004, 01:38 PM
Parent: #3

لك كل السلامه والعافيه يا قريبي
وقدر ولطف
وربنا يعوضك خير

الحوادث هنا مأساويه دائماً وذلك بسبب السرعه العاليه وما يصاحبها من استهتار الشباب صغار السن..

ومعظم الوفيات وبارقام عاليه جداً تكون بسبب الحوادث

وللأسف لا تستطيع المساعده كما يجب في حالة الحوادث ..
لعدة أسباب ..
أهما في حالة الاسعاف الخاطئ للمصاب يتم مساءلتك مسائله قانونيه عنها .. وهذا ما يجعل الناس يتهيبون الاقتراب من المصابين الي حين حضور الاسعاف.. وكم من مصاب قد نزف حتى فارق الحياة والناس جامده لا تقوى علي فعل شئ وكان من الممكن أن يقوم احد الحضور بفعل امر بسيط يتدارك به المقدار العالي لنزيف المصاب .

وحتى يكون هذا الأمر ممكناًاتمنى أن يعي كل الناس الطريقه التى تفضلت بها عن الاسعافات الاولية في حالة الحوادث حتى يعلم الناس كيف يتصرفون في حالة حدوث الحوادث لا قدر الله..

مره اخرى الف حمد لله علي السلامه ..
وربنا يوفقك في قضاء عمرك الجديد بين الأهل والاصدقاء بعيداً عن الحوادث النفسيه .. ودشدشه الكفلاء


تحياتي

Post: #8
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-13-2004, 02:18 PM
Parent: #3

أختنا العزيز د. بيـــان
تحياتي
إفتقدناك كثيرا
Quote: وشكرا على هذا الابداع

قصدك إبداع الزول الخلا العربيه تطير بدل ما تمشي في الزلط وللا طيرتي أنا في الزلط زي سبت دودو؟؟؟؟...يعني كم دقشه كدا وأطلع لي كتاب..عموما لسع حالة الهضربه ما راحت أصبري يومين تلاته وارجع قارئ أغبش أغبر زي ما كنت....تحياتي للأسرة الكريمة

Post: #7
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-13-2004, 02:04 PM
Parent: #2

الأخت العزيزه تماضـــــر
تحياتي

Quote: سأعود لا إبلا وثقت
ولا بكفي الحصيد روائعا
مدوا بساط الحب وأغتفروا الذنوب
وباركوا هذي السنين الضائعه

(دا ود المكي وللا الفيتوري؟؟؟)

والله نحن خايفين من زي دا وعموما كان خفنا وللا ما خفنا الزارعها الله في شارع الزلط بتقوم...أصلو الرجوع غانم ساهل وممكن باذن الله لكن المسأله زي مسألة الصعود إلى القمه ماها مشكله المهم البقاء في القمه....أنا عارف ناس كتار مشوا غانمين ورجعوا تاااااني بس غايمين.
الفصل الأول في مسرحية التأمين..طبعا ربنا ستر ودمي ما إتفرق بين القبايل..بس حقي إتفرق بين الشعوب 75% من الخطأ على السعودي و25% على الباكستاني..مش ياهو الفريق؟؟؟؟المهم أنا عاااااارف الخمسه وعشرين في الميه بلقاهالأنو الباكستاني مؤمن على عربيتو وكمان عااااااااارف إنو الخمسه وسبعين في الميه كان الطريفي لقى جملو بلقاها..العربيه الكابرس سايقها ولد.. تين إيدجر وما مؤمونه وطلعوه بكفالة أبوه...المهم مشيت ناس البوليس أدوني نمرة تلفونو وقالوا لي تبلغه يجي عشان نحل الموضوع...شفتي كيف ..هنا تمشي تبلغ خصمك عشان يجي..الراجل قال لي ما جايي وما مفاضي وما مقتنع إنو ولدي غلطان...مشيت قلت ليهم الكلام دا.. ضربوا ليهو تلفون ووروه الطريقه الصحيحه للإعتراض على قرار المرور وحنسوهو عشان يجي باكر ويقدم الإعتراض وتتشكل لجنه عشان تشوف الكان داير يكتلني أكتر من التاني منو...وبعدين لما اللجنه تقرر ممكن يرفعها لى حته تانيه..ودخلت نمله وأخذت حبه وخرجت..ودخلت نمله وأخذت حبه وخرجت..ودخلت نمله وأخذت حبه وخرجت..ودخلت نمله وأخذت حبه وخرجت
..لغاية ما أقول حقي برقبتي...وأقول عوضي على الله.....أحمدوا ربكم يا تماضر وياناس الغرب...وعوض يا اهل العوض

Post: #4
Title: Re: شكرا لكم أحبتي - هوامش على دفتر الدقشــــــه
Author: abas
Date: 03-13-2004, 01:37 PM
Parent: #1

الاستاذ نايل

الف حمد لله علي سلامتك

وتاني صلح الفيوزات بعيد من الشارع

ربنا قدر ولطف

Post: #9
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-13-2004, 02:24 PM
Parent: #4

الأخوان ود قاسم جمال الزاكي
شكرا لإهتمامكم وإتصالكم..لكن ياود قاسم شارع الزلط النضيف دا كان بدقشونا فيهو ويصلحوا بينا عربياتنا ويدزنا حقنا مافي مشكلة المصيبه دقشه وخراب ديار؟؟

الأخ عباس
عليك أمان الله الشارع أنا ما جيت جنبو...العربيه واقفه في مواقف مخصصه للوقوف قدام العماره...عموما حأشتري عربيه ما فيها فيوزات عشان ما أتشبر وأعاين ليها...ويكون أحسن لو مافيها راديتر ومروحه وأنوار وتصادم ورفارف عشان ما يتسلط عليها واحد تاني ويكسرهم

Post: #6
Title: Re: شكرا لكم أحبتي - هوامش على دفتر الدقشــــــه
Author: ودقاسم
Date: 03-13-2004, 01:52 PM
Parent: #1

الزاكي
حمدا لله على السلامة
وربنا يحفظك من كل شر ويخليك لي وليداتك وأهلك والناس اللي بتحبك ،،
بس بقوليك خليك هنا خليك وبلا تفارق ،،
موتة في ظلط نضيف أخير من موتة في العكلابة ديك ..

Post: #10
Title: Re: شكرا لكم أحبتي - هوامش على دفتر الدقشــــــه
Author: AlRa7mabi
Date: 03-13-2004, 02:32 PM
Parent: #1

الأخ الزاكي

آ زول حمدلله بالسلامة

قلت لي الجماعة وقفوا يتفرجوا عليك ساااكت
ديل ناس شمكارات ساكتي باقي لي

أجر وعافية يا الزاكي ..

بس اسمع .. أنا جبت ليك زول عندو مواضيع جميلة خلاص
وهسي معاي موضوع جاهز ، آها لما تبقى انتا طيب وجاهز قول لي عشان
اشوف ايميلك بي وين وافكوا ليك
رايك شنو؟؟؟؟؟

رحمابي

Post: #11
Title: Re: شكرا لكم أحبتي - هوامش على دفتر الدقشــــــه
Author: دورنقاس
Date: 03-13-2004, 02:46 PM
Parent: #10

الاخ الزاكى


حمدلله على السلامة من الدقشة

Post: #12
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-14-2004, 07:04 AM
Parent: #10

الأخ الرحمابي
لك تحياتي وصادق ودي
و...إنت وين؟؟؟؟؟
مرحبا بالأخ ومشاركاته أرسلها على أي من العناوين التالية:
[email protected]
[email protected]
[email protected]
[email protected]
وما عاوز أعاتبك لأنو عتابك يملأ قفف...تحياتي

Post: #13
Title: Re: شكرا لكم أحبتي - هوامش على دفتر الدقشــــــه
Author: Tumadir
Date: 03-14-2004, 07:23 AM
Parent: #12

الزاكى

امشى اشتكيه لمكتب الحركه..قول ليه الحركه العملها ليك دى ما ظريفه..زى ما عمل المسطول.


وطالب زول قروش والزول وعدو يرجعها ليه وخالف المواعيد وحاجات تغيظ زى دى..مشى مكتب الحركه..لما سالوهو من الداقش والمدقوش قال لا مافى حادث..فى غلاط بتاع قروش..قالو ليه بس ده مكتب الحركه..قاليهم عارفو..لانو الحركه العلمها لى دى ما ظريفة...

تانى سلامتك

Post: #14
Title: Re: شكرا لكم أحبتي - هوامش على دفتر الدقشــــــه
Author: سجيمان
Date: 03-14-2004, 08:17 AM
Parent: #13



الف الف حمد الله على السلامة

قدر ولطف



لكن ما قلت لي... السيارة..... السيارة موديل كم؟

Post: #15
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-14-2004, 09:58 AM
Parent: #14

الأخ سجيمان
سلمك الله من كل شر
ما وضحت لي العربيه ياتها العربيات كتاااار
الدول العربيه..جامعه الدول العربيه...القوميه العربيه..الهويه العربيه..الوحده العربية..النكسه العربيه..الخيبه العربيه..ديل كلهم موديلات أقدم من الكسره..إترموا في الكوشه من زمااااان
والعربيتين الدقشو بعض وواحده منهن فشت غبينتها من التانيه ودقشتني أنا موديلاتهم ما عارفها كويس..إنت قايل هم أدوني فرصه عشان أعاين وللا شهدوني؟؟؟؟؟؟
أما عربيتي الله يرحمهافكانت..كانت موديل 1998 بس بعد الحادث بقت ما بتشبه أي موديل..حنحاول نفتش ليها أي وأقرب ملامح ننسبها ليها ولو ما نفعت حنوديها مع العربيات الفوق...والعوض على الله

Post: #16
Title: Re: شكرا لكم أحبتي - هوامش على دفتر الدقشــــــه
Author: الجندرية
Date: 03-14-2004, 10:26 AM
Parent: #1

حمد لله على السلامة

Post: #17
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-14-2004, 11:01 AM
Parent: #16

الأخت الجندريه
أهديك صادق الود والتحايا العطره
شكرا على الأهتمام وربنا يحفظ الجميع...إنتي ما ناويه تجينا؟؟؟؟؟

Post: #18
Title: Re: شكرا لكم أحبتي - هوامش على دفتر الدقشــــــه
Author: THE RAIN
Date: 03-14-2004, 11:28 AM
Parent: #1

حمدا لله على سلامتك يا أخانا العزيز الزاكى

والأمنيات بالعافية والصحة والسعادة بإذن الله دائما ليك

ودمت طيبا

أبوذر

Post: #22
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-14-2004, 12:56 PM
Parent: #18

الأخ THE RAIN

شكرا لك على مشاعرك الطيبة..وأسأل الله أن يحفظك من كل مكروه

Post: #19
Title: Re: شكرا لكم أحبتي - هوامش على دفتر الدقشــــــه
Author: الجندرية
Date: 03-14-2004, 12:15 PM
Parent: #1

لينا الشرف والله
لكن قصدك وين ؟
ما اهو نحن هنا وجينا برضو

Post: #21
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-14-2004, 12:55 PM
Parent: #19

الأخت الجندريــــه
تحياتي


تجينا هنا..أدخلي

Post: #20
Title: Re: شكرا لكم أحبتي - هوامش على دفتر الدقشــــــه
Author: falcon
Date: 03-14-2004, 12:42 PM
Parent: #1

الاخ نايل
حمد لله علي السلامة و اجر و عافية انشاء الله
لقد مررت بتجربة مماثلة في شهر رمضان الماضي
و متخيل الحاله التي تمر بها
و جرجرة التأمين و المرور و درب النمل اياه
و الحاله انا في الحادث كان الخطأ عليه 100%
لكن شهر ما خلصت من امشي و تعال
الله يعينك علي برود ناس المرور

سلامتك مرة اخري

Post: #23
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-14-2004, 01:01 PM
Parent: #20

الأخ فالكون
سلمك الله من كل شر
أنا لسع ما وصلت جرجرة التأمين قبل شويه إتصلوا ناس المرور وقالوا لي تجي يوم الأحد الجايي الساعه تمانيه صباحا عندك لجنه ولو ما جيت قضيتك تسقط...تصور...اللجنه كونوها عشان الولد السهودي حملوه 75% وبتاع الليموزين الباكستاني حملوه 25% من المسئولية وأبو الولد محتجي على النسبه دي..عشان كدا مشكلين لجنة مرور عشان تعيد النظر في تحديد المسئوليات وما عارف أنا دخلي شنو فيها...يمكن كمان دايرين يحملوني نسبة من الحادث لا أيدي ولا كراعي...الله أعلم دايرني لي شنو

Post: #24
Title: Re: شكرا لكم أحبتي - هوامش على دفتر الدقشــــــه
Author: Ahlalawad
Date: 03-14-2004, 01:11 PM
Parent: #23

الأخ المهندس الزاكي
ياخ حمدلة على السلامة .. ربنا يبارك لك في عمرك ..
كنت عايز أقول ليك الجاتك في مالك سامحتك
لكن لأنك مغترب ، أعتقد أن المغترب الجاتو في مالو ما سامحتو
خطاك الشر
وألف سلامة

Post: #25
Title: Re: شكرا لكم أحبتي - هوامش على دفتر الدقشــــــه
Author: ابو يسرا
Date: 03-14-2004, 01:41 PM
Parent: #24

الف سلامة ياقريبي
ونحن واهللك فى السودان بانتظارك بالاحضان
بلادك حلوة ارجع ليها
صدقني اخى الزاكي انا من ما وصلت السودان اعاني وبرضو مرتاح من عذاب الغربة لقد وجدت نفسي وانا فى احضان العشيرة
الف سلامة وهلا بيك

Post: #26
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-14-2004, 02:23 PM
Parent: #25

الأخ أبو يســـرى
شكرا على إهتمامك والحمد لله جات في الحديد
تحياتي للخالات العزيزات بس ما تجيب ليهم سيرة الحادث أبدا..الناس هناك لسع تعبانه..تحياتي

Post: #27
Title: Re: شكرا لكم أحبتي - هوامش على دفتر الدقشــــــه
Author: nadus2000
Date: 03-15-2004, 11:15 PM
Parent: #26

حمدلله على السلامة والجاتك في غربتك سامحتك
(غربتك بالغين وليس بالعين)
وبالمناسبة قريت كلامك دا قلت والله طلعت نصيح ولما قريت

Quote: فعلا قررت أن أعيش عمري الجديد في السودان وعن قريب إن شاء الله ح أهترش ليكم من السودان....نعيش عمرنا الجديد هناك..لكن

قلت والله أكيد محتاج لإعادة كشف وإكس ري....

Post: #28
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-16-2004, 08:16 AM
Parent: #27

الأخ العزيز نادوس
تحياتي
Quote: قلت والله أكيد محتاج لإعادة كشف وإكس ري....

صديق عزيز جدا لما قرأ كلامي
Quote: فعلا قررت أن أعيش عمري الجديد في السودان وعن قريب إن شاء الله ح أهترش ليكم من السودان....نعيش عمرنا الجديد هناك..

إتصل من أمريكا منزعج جدا للحادث وللكلام دا..الراجل كان هنا معانا لفترة طويله ورجع السودان قبل كم سنه غانم جدا..حاول يعمل بزنس بس دخل في تجربه رهيبه لأنه ما عندو ضهر..وخسر كل شئ وفي النهايه ساق زوجته ووليداته وهاجر أمريكا..المهم دار بيننا حوار طويل وكان معترض على مجرد التفكير في المسأله دي..وقال لي عديييل..
Quote: إنت ما نصيح ولللا شنو؟؟؟إنت متأكد الحادث دا ما عمل ليك إرتجاج في المخ؟؟حقو ترجع الدكتور تاني عشان يعيد فحصك؟؟والمدام رأيها شنو؟؟؟؟.

..قلت ليهو موافقه..قال لي ..
Quote: ياخوي المساله ما ما مسألة حادث..إنت تسوق المدام وتمشي تشوف ليك فقير يطبكم الإتنين...وللا أقول ليك..أحسن تمشو الطائف....

الطائف طبعا فيها مستشفي المجانين.....وبعدين
يا ترى دا إرتجاج في المخ وللا جن عدييييل؟؟؟؟

Post: #29
Title: Re: شكرا لكم أحبتي - هوامش على دفتر الدقشــــــه
Author: tiger18
Date: 03-16-2004, 11:14 AM
Parent: #1

الاخ المهندس الزاكي
الحمد لله الذي لايحمد علي مكروه سواه
الف حمدالله علي السلامة
وربنا يحفظك واسرتك

Post: #30
Title: Re: شكرا لكم أحبتي - هوامش على دفتر الدقشــــــه
Author: أبو ساندرا
Date: 03-16-2004, 12:16 PM
Parent: #1

غايتو بس انا المقسوم لي اللوم معاك ، وما تشوف شر . وألف حمدآ لله على السلامة

Post: #31
Title: Re: شكرا لكم أحبتي - هوامش على دفتر الدقشــــــه
Author: nile1
Date: 03-16-2004, 02:00 PM
Parent: #30

الإخوة الأعزاء Tiger وأبو ساندرا

شكرا على مشاعركم الطيبه وربنا يحفظكم جميعا ويرد غربتكم سالمين وغانمين