Post: #1
Title: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:31 PM
Parent: #0
كنت علي شفا شبحةٍ من السبيط .. والنخلةُ السافرةُ في العُلوِ تتلفّت
بجريدها وتساقط ما نضج من تمرها لصبيةٍ يراقبون المكان في حزرٍ
خشية بسطونة عم عبد الساوي الذي كنا ننتهكُ حرمة جنينيتهُ ، لنسرق
من رطبها ما يسدُّ رمقنا في ذلك اليوم الغائط .
وفي الخاطر علقة ساخنة ظفر بها رفاقي الأشقياء ، ولم أنجو منها إلا بسبب الحصانة الدبلوماسية التي كنت أتمتع بها !
من والدي الذي كان يجودُ ببغاثِ الجنيهاتِ من طرّاداتٍ و ريالات لكلٍ من لم يستطع أن يسدّ رمق حقّة سعوطهِ من رمتالةِ القوم !
لم أكن أعرف ساعتها أن الذي لا تشتريهُ طرّادة يشتريه الجنيه !
ففي ذلك الزمن كان الريال وليٌ من أولياءِ الله الصالحين ! أما الجنيه فلم يكن أقل مكانةً من نبيٍ يمشي في الأسواق !
يأتمر بأمرهِ (تعاريف) من الأتباعِ والمريدين !
صدّتني النخلة بعفّة ! و أنا أحاول ان أجزّ سبيطتها بالخنجرِ الصدئ ، فكانت تدافع عن شرفها البازخ بوخذاتِ أشواكها المؤلمة ، ولكن ...
قبل أن أتم عملية نحرها جعلني صياح رفقتي الأشقياء أشعر بالفزعِ !
الليلاااااااااا ...
أجّراكُم داك طـهَ ... أجّراكُم داك طه !!
نواصل ...
غلطة طباعة وكدة
|
Post: #2
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:34 PM
Parent: #1
كانوا يخوفوننا من طه ود عبد الساوي الذي كانوا يتهموننه بالجنونِ وشرب الخمر ، يقولوا ليك طه السكران !
و أيضاً من عبد الرحيم ود إزيرق الأطرش الذي كان يضرب سجارة الكبنقا ويقود أمامه مليشيا من الأهالي المساكين وهو يزأرُ في قوةٍ :
دينكم ذاتو .... الوسخ بجيب القمل ، والجوع بسوي الصرعة ... والكلام بالمناسبات !
وما أن يلمح والدي المزهو بجودةِ إنتاجِ البطاطس هذا العام ، إلا ويغير لهجة خطابهِ الحاد!
جبارة جبربر جبابيرو ... جيب طرّادة ! والكلام بالمناسبات !!
وكانت هذه الطرّادة قادرة علي أن تحفظ سلامة هؤلاءِ المساكين.
حاولتُ التشبّث بغصنٍ ما ، ولكني لم أجني سوي قرف النخلةَ مني ، وجسدي الضئيل يهوي من عِليٍ بإتجاهِ الأرض المبتلة، ويتناثر الوحل في كل الأنحاء لقوةِ إرتطامي بالأرض ، ولكني نهضتُ مثل حمل الخريف و أنا أسابق بسطونة طه ود عبد الساوي بإتجاهِ الممر الضيق الذي صنعناه في السور الشوكي الذي كان يحيط بالجنينة ، وعندما عبرتهُ كان يلاحقني غصن شوك صغير كان يمسك بالعرّاقي الدبلان الذي أرتديه في لؤمِ غصنِ شجرةِ سدرٍ متهوّر !
.... أمكم يا أولاد الغلفاء !!!
طه ود عبد الساوي يكيلُ لنا السباب البذئ ، والغريب أن الشئ الذي كانوا يسبوننا بهِ ، الآن يطالبون أمهاتنا بهِ ، و يوجعون دماغهن صباح مساء بالختانِ الفرعوني، وهذا الكلام لا يشكّ دماغهن مقدار قشّة كبريت!
شعرنا بالظمأ لكثرةِ ما أكلنا من تمر ، فقصدنا النهر ونحن نلهثُ من شدة العطش ،و مع أننا كنا أنصاف مراهقين ولكن أشياءنا و أفكارنا كانت في غايةِ البساطة ، نتعاملُ بعفويةِ مع أكثر الأمور مدعاةً إلي التساؤل
فلم تكن تثيرنا سيقان النسوة وهن يرفعن جلاليبهن حتي لا تبتل بالماء
وهن يخضن في الوحلِ حتي يركبن في مركب بخيت ليقلّهن إلي الشرق
فقد كان الجنس في نظرنا قلّة أدب !!
نواصل ...
|
Post: #3
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:36 PM
Parent: #2
فقد كنت أذكر حديث عم حسن مع إبنه الطاهر حين سأله :
يابا يابا إنتوا جبتونا كيف ؟؟؟
ها الطيرة دة جبناكم بي شنو بلا قِلّة الأدب !!
فكلنا كان يسأل عن مقدارِ قلّة أدب أبيه مع أمه ، تلك التي أتت بهِ إلي الحياة!!
أنتبهنا إلي أن الوقت كان عصراً قريب الغيبة !
فكان لابدّ أن نسدّر بإتجاه الحلة ، فمنا من كان ينتظرهُ الحليب ، و آخر لا يسمح وضع أسرته الديني بأن يصلي المغرب جماعة في خلوةِ أولاد عبد الوهاب الخمسة الما بحملوا اللمسة !
أنا كنت زاهداً في الذهابِ إلي الخلوةِ هذا المساء ، فلم يكن تمرّداً علي الدينِ فحسب ! ولكن في الحقيقةِ كنت أخشي سياط الفكي الذي حتماً كان سيعمل بوصيةِ والدي الذي أعطاهُ تفويضاً أبوياً بابوياً !
ليكم اللحم ولينا العضم ...!
وأنا لم أحفظ سورة تبارك بعد ، والفكي لن يتنازل عن حقهِ التأريخي الشرعي في لحمي هذا المساء !
نواصل ...
|
Post: #4
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:38 PM
فأتجهنا غرباً صوب الحلة ونحن نعبر أحواض البرسيم والبصل والذرة ، ولم ننسي أن نسرق الكثير من القناديلِ الناضجة حتي نشويها في الطريق
وعندما وصلنا إلي زريبة جدي المفتاح وجدنا الحاجة سعيدة وهي تحتطبُ تارةً ، وتارةً تجمع ما جادت بهِ أشجار السدرِ من نبقٍ شهي !
فلم نشأ أن نغافلها فقد كانت آمرأة أجوادة وبنت أصول للحد البعيد
وفي الجانبِ الآخر من الزريبة وجدنا بعض الفتيات ينهشن في عظامِ شجرةِ طلحٍ أستشهدت بفأسِ فاعلٍ جائر !
لم نكن نعرف أجمل من بنات الفَزَع !
أما هردبيس الفتوات فقد كان يتركن لغسيل العدة و قش الحيشان!
أغراني وجود عرفة في الجانبِ الآخر من مزبحةِ الطلحة بالإقترابِ قليلاً
فدنوتُ منها و أنفاسي تشتجر ، و أنا أحاول أن أحتطب من جسدها الأخضر ، حتي تبيّن لي الخيط الأسود من الخيطِ الأبيض من الفستان !
و أنا أحس أنها وخذتني بشوكةٍ في قلبي البكر ، لشدة ما أثارت جزوة مراهقتي الجديدة !
نواصل ...
|
Post: #5
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:39 PM
Parent: #4
فقد كانت هذه المرة الأولي التي أشاهدها من غير التوب بعد أن أثمرت وبلّغت الرسالة الأنوثية ، فمنعوها من إرتداء الطرحة في الشارع!
أذكر حين كانت عرفة تلعب معنا عِدّة عِدّة قبل سنواتٍ ثلاث في مهمل زقاقات الحلة ، ولكنهم منعوها من لعبة عِدّة عِدّة و أمروها بغسيلِ العدة
بعد تلك الحادثة التي سمع بها كل الأهالي !!
كنتي وين يا سنيحة؟؟
كنت مع ناس ياسين يا حبوبة بنلعب عِدّة عِدّة !
تلعب كراعك شلل أنشاء الله الوداك شنو للمساخيت ديل ؟
والله يا حبوبة ما سوينا حاجة كعبة ، بس ياسين قال لي تعالي نلعب عرسان عرسان وسوّينا قِلّة الأدب !
نواصل ....
|
Post: #6
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:41 PM
Parent: #5
نعم لم يحدث شئٍ بعدها !!
أنا دقوني دق العيش ، وعرفة دقوها دقة السرق ما مرق !
هي ... لكن قطعت قلبي لكن !! جيت بتين ؟؟
هسة دة آعرفة قلت أرجاكي بعد تفزعي أشيِّلك الحطب !
كان يردعني الشوك من الإقترابِ أكثر و أنا أرتدي هذه السفنجة المُتعبة
أما عرفة فقد كانت تنتعل الحزاء الزيزي الأسود المميز ، فجلستُ مرابطاً حتي بدأت نيران الطليقة في معانقة السماء و رفقتي يتربصون بقناديلِ عيش الريف في حزرٍ ويقلبونها بطرفِ العصا حتي تستوي
فذهبت لكي أحصل علي نصيبي ولم أنسي عرفة طبعاً !
نواصل...
|
Post: #7
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:41 PM
Parent: #6
وبعدها لم تمضي دقائق حتي أكملن الفتوات فزعهن و بدأت حزم الحطب في التكوُّر وصوت أذان الجامع القدامي يلعلعُ في السماء!
لم أنسي أن أمتع نظري في صدر عرفة وهو يساقط عليّ من ثمرهِ و أنا أعاونها في رفعِ حزمة الحطب علي وقايةِ رأسها المستديرة!
وبعدها أتجهنا إلي مضاربِ الحلة لا يعنينا شئ ، ولا تثقلنا الهموم ولا نتأبط حزمة وجع ، وكل الحياة في نظرنا ، سادِر ومُتدلِّي !
قندول عيش ريف ، و جغمة موية..
حزمة حطب ..
و عرفة ....
وقلة أدب تمارس ببراءةٍ و طُهر
لم نكن نعرف أن الذي لا يشتريه الجنيه ،، يشتريه الجنيه الإسترليني !
نواصل ....
|
Post: #8
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:42 PM
Parent: #7
كنت أنا وكثير من الجُهال الذين يضيقون زرعاً بهذه التسمية التي كانت تطلق علينا كنايةً عن الصِغَر ، نبحث عن إجابات لمتّسعٍ من الأسئلة التي تنهشُ عظام طفولتنا ، ولاسبيل لمعرفة تجبر كسر أفكارنا !
يطلقون علينا جُهالاً ونحن في المهد لا نقدربعد علي فكِّ خط حلمة ثدي أمهاتنا !
ولا تفارقنا هذه التسمية حتي بعد أن نبدأ في طرحِ مشاريعنا وعرضحالاتنا عن الأمور الجنسية !
كيف أتينا ؟؟؟
ولماذا لا يتركوننا نفتح شوالات السكر الجديدة طالما هم كانوا يكتحون ليلاً نهاراً كلما أصابهم حيرقان جنسي طارئ ؟؟!
فيرهقوننا بالمشاويرِ البعيدة !
يا ياسين .... يا قاشرين أمشي جيب لي نص رطل سكر من دكان أبو شامة ، عشان سُكّرو سمح ؟؟؟!
لم أكن أدري أنهم أختاروا دكان أبو شامة لبعدهِ إلا بعد يزداد عدد الورثة الشرعيين في باقي ثروة أبي التي تسؤُ صحتها يوماً بعد يوم بفعلِ ذهاب الطرّادات والجنيهات إلي حُقق سعوط رمتالة القوم وتوالي فشل المواسم الزراعية بفعلِ الآفات و رداءة الري !
فلا أجزم أبداً أن سكر دكان أبو شامة كان خالي من الكوليسترول !!
نواصل ....
|
Post: #9
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:44 PM
Parent: #8
ولكن هذه الأسئلة التي كنت أحاول أن أقل أدبي و أفك (تِكّة) سراويلها
كنت أخشي أن أكتشف تحتها غابة من السراويل!
فبدأت في البحث عن طرقِ أخري لنزع فتيل هذه التكّة .... بدافع شيطوني من إبن حرامٍ شرعي و صحيح النسب !
نواصل ...
|
Post: #10
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:46 PM
Parent: #9
فما ذالت تفلق ذاكرتي وتحدث بها جرحاً بمقدارِ أربعة غُرَز ، ذكري زواج عم حسنين ذلك الرجل الخمسيني من نفيسة العزباء ، الذي بعد أن أكتملت مراسمه و أختلا بها وليته لم يفعل ، ونحن نسترق النظر ولا نجد ثمة شهاباً رصدا في ذلك الزقاق الخلفي ونحن نتحلق حول الشباك الخشبي القديم لنحاول أن نفك تِكّة الأسئلة التي كنا لا نعرف لسراويلها منفذاً آخراً ، إلا خُرم هذا الشباك القديم،
والعم حسنين يختصر كل الطرق ويسد أمام نفيسة كل السُبُل والمنافذ ويقول لها :
نفيسة أختي .. لاكي صغيرة ولاكي جاهلة ،دحين أنستري و أنعدلي سااااااكت !
نفيسة أنسترت و أنعدلت !!
و أنا
عفيت منها عفواً يدخلا الجنة !!
نواصل ...
|
Post: #11
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:46 PM
Parent: #10
أما أنا ورفقتي فقد تمكنا من فك تِكّة أول سروال سؤال !
وبعدها عرفنا أن هذا المجتمع البشري عبارة عن سروال ، إذا تمكنت من فك تِكّة سروال ، تداعت لك باقي السراويل بالعري و البشتنة !
!!!!!!!!!!!!!!!
|
Post: #13
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:48 PM
Parent: #11
والله بعد وصلت حتة السراويل دي
إحتمال كبير ما أواصل !
واصلوا إنتوا
|
Post: #39
Title: Re: بخصوص قِلّة أدب ناس زمان .. وثيقة إتهام !!
Author: عمر علي حسن
Date: 10-10-2009, 06:09 PM
Parent: #13
يا (ولد) ! شنو قلة الحيا دي ؟
ناس زمان مازالوا أحياء وفي حلوقهم غصة لأن العلم بالشيء لم يأتهم الا في حصة الأحياء في السنة الثانية الثانوية ......
وكان (الغباء) يقود بعضهم لسؤال امه أذا ولدت له أختا: "عرفتوها بت كيف؟"
سرد ممتع وآسر أخرجنا الي سوح لاتعرف نور الشمس .. الله يَجازيكا يامطيميس ..
عمك العجوز الذي ماعاد يستلقي علي وسادة من (أدب) الزمن الجميل
|
Post: #12
Title: Re: بخصوص قِلّة أدب ناس زمان .. وثيقة إتهام !!
Author: حيدر بشير
Date: 10-09-2009, 03:47 PM
الاخ حبيب نورة
لك التحايا
سرد جميل وشيق ومتشوقين الى قراءة المزيد
فهذا ما كان عليه حالنا فى الصغر
متابعين و ربنا يديك الصحة و العافية
|
Post: #14
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 03:50 PM
Parent: #12
حيدر
تسلمي حبيبي
يديك العافية
وبرجع ليكم بعد مشيوير كدة
شكرن كتيرن!
|
Post: #16
Title: Re: بخصوص قِلّة أدب ناس زمان .. وثيقة إتهام !!
Author: باسط المكي
Date: 10-09-2009, 03:57 PM
Parent: #14
حبيب الحبيب
واصل ونستنا في غربة يعلم بيها الله
واصل
|
Post: #17
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 06:43 PM
Parent: #16
باسط يا حبيب
ربنا يبسطك دنيا و آخرة
ياخ كلنا
قهر وفراق أهل
الله يستر ياخ
|
Post: #15
Title: Re: بخصوص قِلّة أدب ناس زمان .. وثيقة إتهام !!
Author: khaleel
Date: 10-09-2009, 03:55 PM
Parent: #12
حبيبو حكاي والله
وتذكرت ود موسي عندما كان صغيرا وهو جالس علي بطن والده ويساله ببراة
يابا يابا انتي (الثماء ) دا مصنوع من حديد
ورد ووالده بجلافة
يا ولد الغزالة (....... امك) ابوك السماء شافو
|
Post: #18
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 06:46 PM
Parent: #15
| Quote: يابا يابا انتي (الثماء ) دا مصنوع من حديد |
يا خليل الخليل
زكرتني برضو حتة أنو الله ياهو الساكن في القمرا!
مرات في تضاريس كدة في سطح القمر
بتظهر نص الليالي القمرية
وقت السمر
بتظهر شكل معين كدة
كنا بنسأل أنو دة ربنا
ولسة ياما في الجراب يا حاوي
برجع وقت فضي أفضفض هنا
شكرن كتيرن!
|
Post: #19
Title: Re: بخصوص قِلّة أدب ناس زمان .. وثيقة إتهام !!
Author: baha eassa
Date: 10-09-2009, 07:08 PM
Parent: #18
ياحبيب كيفك؟ انت حتنزل روايتك هنا ولاشنو؟
|
Post: #23
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 10:40 PM
Parent: #19
| Quote: ياحبيب كيفك؟ انت حتنزل روايتك هنا ولاشنو؟ |
رواية شنويا بهاء
دي بس حاجة كدة من طرف القلم
مع رمال البحر في إسكندرية
تسلم ياخ
|
Post: #20
Title: Re: بخصوص قِلّة أدب ناس زمان .. وثيقة إتهام !!
Author: عمران حسن صالح
Date: 10-09-2009, 07:21 PM
Parent: #18
تواصل شنو يا المطموس  إنت ما كمَلتَ القصة كلها ..
متعتني يا منعول ..
|
Post: #21
Title: Re: بخصوص قِلّة أدب ناس زمان .. وثيقة إتهام !!
Author: عمران حسن صالح
Date: 10-09-2009, 07:31 PM
Parent: #20
فعلاً 
وحصري دي ليس في العبارات الراقية ، ولا في كلام أهلنا الجميل المحشور وسط القصة في أماكنه تماماً ، ولا في الحبكة يا حبيب نورة ..
بل في الأسئلة الكتيرة الموجودة في هذا النص الفخم .. أسئلة مربوطة بالقصة بصورة ذكية حد الدهشة !!
أخونا المتمرد على بقول عن أبيه قوله : نحن ربتنا العناية الإلهية والصدفة
أشكركـ حتى تستغيث
|
Post: #25
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 10:46 PM
Parent: #21
وحصري دي ليس في العبارات الراقية ، ولا في كلام أهلنا الجميل المحشور وسط القصة في أماكنه تماماً
الحصري لسة جايي في السكة
وبعد العشاء مافي إختشاء
أنا أخوك يا أشة
أشة كبريت ؟ هيييييكه
|
Post: #22
Title: Re: بخصوص قِلّة أدب ناس زمان .. وثيقة إتهام !!
Author: خالد المحرب
Date: 10-09-2009, 07:32 PM
Parent: #20
الاخ حبيب نورة السرد جميل واصل وتلفونك الجديد وصلنى ..
|
Post: #26
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 10:48 PM
Parent: #22
| Quote: الاخ حبيب نورة السرد جميل واصل وتلفونك الجديد وصلنى .. |
المحرب الجميل
و إتصالك كان أحلا و أجمل
ودايماً أنت الأجمل
ربنا يخليك يا رب
ويقدرني علي جمايلك
كن بخير
وشكرن كتيرن!
|
Post: #24
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-09-2009, 10:44 PM
Parent: #20
Quote: تواصل شنو يا المطموس إنت ما كمَلتَ القصة كلها ..
متعتني يا منعول .. |
الفلانيات يا قريبك
انت شفت حاجة
أمانة ما حبوبة بس كان قمت للحكي
|
Post: #27
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-10-2009, 12:15 PM
Parent: #24
عودة محتملة ...
|
Post: #28
Title: Re: بخصوص قِلّة أدب ناس زمان .. وثيقة إتهام !!
Author: Nadia Elsir
Date: 10-10-2009, 12:35 PM
Parent: #27
ما تخليها مؤكدة الله يخليك !
سلامات من ارض الوطن و مشتاقين و سؤال عن الحال و الاحوال
بالمناسبة مشيت اسكندرية و الا لسه؟
|
Post: #29
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-10-2009, 12:39 PM
Parent: #28
نادية الجميلة
أخبارك أيه يا زولة
والله دي جيتي من إسكندرية
و حاولت أوصل ليكي الفلاني
لكن دقيقة بحكي ليك بيهناك
شكرن كتيرن!
|
Post: #31
Title: Re: بخصوص قِلّة أدب ناس زمان .. وثيقة إتهام !!
Author: Tagelsir Elmelik
Date: 10-10-2009, 12:45 PM
Parent: #28
I love it
I am enjoying this story
|
Post: #33
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-10-2009, 12:50 PM
Parent: #31
الملك
أخبارك شنو يا جميل
تسلم وكتر خيرك يا حبيب
بس المرة الجاية تعال لي بي الجلابية والمركوب !
شكرن كتيرن!
|
Post: #30
Title: Re: بخصوص قِلّة أدب ناس زمان .. وثيقة إتهام !!
Author: Faisal Elrasheed
Date: 10-10-2009, 12:40 PM
Parent: #27
بل قل عودة اكيده
امتعنا يا حبيب
|
Post: #32
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-10-2009, 12:47 PM
Parent: #30
فيصل
سأعود لمعانقة النص من جديد
سأنقب عن بعض مافي الجراب
أنتظر منكم الجديد
شكرن كتيرن!
|
Post: #34
Title: Re: بخصوص قِلّة أدب ناس زمان .. وثيقة إتهام !!
Author: Faisal Elrasheed
Date: 10-10-2009, 01:11 PM
Parent: #32
Quote: فيصل
سأعود لمعانقة النص من جديد
سأنقب عن بعض مافي الجراب
أنتظر منكم الجديد
شكرن كتيرن! |
الحبيب
هي ذكريات ووميض خواطر
فدعنا نتمتع بهذا الاخراج المموسق
اعجبني تصويرك لمذبحه الطلح ... كان الله في عون تلك الشجرة
واصل فقد اثرت فينا شجونا
واصل قبال اقوم عليك ادعيك لوووول
مودتي واحترامي
|
Post: #35
Title: Re: بخصوص قِلّة أدب ناس زمان .. وثيقة إتهام !!
Author: ابو جهينة
Date: 10-10-2009, 01:17 PM
Parent: #34
واصل
الحجل بالرجل
|
Post: #36
Title: Re: بخصوص قِلّة أدب ناس زمان .. وثيقة إتهام !!
Author: bushra suleiman
Date: 10-10-2009, 01:32 PM
Parent: #35
الحبيب ..
فك السراويل كلها يا جميل ..
ان شاالله ما تنعقد ليه تكه .
|
Post: #42
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-10-2009, 07:11 PM
Parent: #36
Quote: الحبيب ..
فك السراويل كلها يا جميل ..
ان شاالله ما تنعقد ليه تكه . |
بشري سليمان
ياخي تكة تكة
السروال نفكوا
ههههههههه
أخبارك أيه يا جميل
عندي جنس حكاوي
بس خلوني أفضي و أديها نفضة
|
Post: #37
Title: Re: بخصوص قِلّة أدب ناس زمان .. وثيقة إتهام !!
Author: حامد محمد حامد
Date: 10-10-2009, 01:33 PM
Parent: #35
حبيب نورة ياخى وينك ..قربت انزل بوست اقول اين اختفى حبيب نورة , بس بوثيقة الاتهام دى اخذت براءة كاملة ..... ياخى ده جنون عديل كدة. واصل ياخى.
كن بخير
|
Post: #38
Title: Re: بخصوص قِلّة أدب ناس زمان .. وثيقة إتهام !!
Author: حامد محمد حامد
Date: 10-10-2009, 01:38 PM
Parent: #37
| Quote: يابا يابا إنتوا جبتونا كيف |
بمناسبة السؤال دة ..اليك ما جاءنى عبر الايميل من اجابة متطورة شيئا ما
طفل لبناني سأل أبوه : بابا بابا ، أنا كيف إجيت على الدنيـا ؟
الاب: بس تكبر يا بابا بخبرك
الطفل: بابا بليييييييييييييييييزخبرني هلأ
الاب: طيب إسمع ، بس تزوجت إمك ، رحت أنا وياها على
Internet café
وفي الكافي نت أبوك عمل للماما
Connected
ساعتها إجت الماما عملت
Download
من الـ
Flash Memory
تاعت البابا
ولمـّا انتهى بابا من
Uploading
اكتشفنا إنو ما إستخدما الـ
Firewall And Antivirus
ولإنو فات الأوان وما قدرنا نعمل
Cancel OR Delete
بعد تسع شهور إجانا
Virus
اللي هو انت يا بابا
|
Post: #44
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-10-2009, 07:16 PM
Parent: #38
Quote: وفي الكافي نت أبوك عمل للماما
Connected |
ههههههههههههههههه
أحلا نيت كافيه
ياخي دة الساعة فيه بكم؟
شكيت محنك يا حامد
|
Post: #43
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-10-2009, 07:14 PM
Parent: #37
| Quote: حبيب نورة ياخى وينك ..قربت انزل بوست اقول اين اختفى حبيب نورة , بس بوثيقة الاتهام دى اخذت براءة كاملة ..... ياخى ده جنون عديل كدة |
حامد يا عسل
والله حبيب نورة لسة بدافر
وبواصل في مشاويرو اليومية من المرج إلي حلوان
ولسة محطات المترو بتمصمص في صفق الليمون
قرفانة من غربتوا
أخبارك أيه
عازمك فطور عند عبده النِتِن !
شكرن كتيرن!
|
Post: #41
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-10-2009, 07:09 PM
Parent: #35
أبو جهينة الجميل
أزيك يا ريس
بسوقكم معاي
بس وريني وين محطاتك
شكرن كتيرن!
|
Post: #40
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-10-2009, 07:07 PM
Parent: #34
Quote:
الحبيب
هي ذكريات ووميض خواطر
فدعنا نتمتع بهذا الاخراج المموسق
اعجبني تصويرك لمذبحه الطلح ... كان الله في عون تلك الشجرة
واصل فقد اثرت فينا شجونا
واصل قبال اقوم عليك ادعيك لوووول
مودتي واحترامي |
فيصل الرشيد
الذكريات شجرة نتسلقها بقردية بين الحين والآخر
ولكن ياخ ما تجوا تتشعبطوا معاي
بمد ليكم فرِع
و أنا بإذن الله ح أواصل
شكرن كتيرن!
|
Post: #45
Title: Re: بخصوص قِلّة أدب ناس زمان .. وثيقة إتهام !!
Author: بله محمد الفاضل
Date: 10-10-2009, 09:21 PM
Parent: #40
والله
الله بحاسبك في الشرقة والبكى السويتن فيني ديل
يا مسخوت
كتابة
رغم جمالها
إلا أنها
ملغومة
الدخول إليها والغوص في تفاصيلها
واجترار الذكريات الموازية
ووووو
جميعها تجعلك في أحوال باسمة ملتبسة
الله يجننك
|
Post: #46
Title: Re: بخصوص قِلّة أدب ناس زمان .. وثيقة إتهام !!
Author: عمار عبدالله عبدالرحمن
Date: 10-10-2009, 10:10 PM
Parent: #45
يحرق ديشك
عيوني طشطشت ,
لكن في حكي زي دا , ما خسارة نضبف للنضارة طبقة تاني ,,, خليها تبقى قعر قزازة ,,,
|
Post: #48
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-11-2009, 11:30 AM
Parent: #46
Quote: يحرق ديشك
عيوني طشطشت , |
عموري
ديشي وديش أسيادي ظاتم
كيفنك يا جميل
والله تقول شنو انا ذاتي مطشش يا قريبك
شكرن كتيرن لجمالك ياخ!
|
Post: #47
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-11-2009, 11:27 AM
Parent: #45
Quote: الدخول إليها والغوص في تفاصيلها
واجترار الذكريات الموازية
ووووو
جميعها تجعلك في أحوال باسمة ملتبسة
الله يجننك |
بلة يا بلة
خليك قريب الليلة عندي مزاج هترشة
بس برد عليكم
و بديها كباية شاي حمرا
وسجارة من نفس اللون
دقيقة بس
هسة بجي !!
|
Post: #49
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-11-2009, 11:41 AM
Parent: #47
نواصل الحكي
أعلنت فرقة موسيقي الخرفان عن موعد الإحتفال بعيد الأضحي الدموي
وغافلني إحساس بروس بأني نبوذٌ إجتماعياً !
فلن أتباهي بجلابيةِ العيد هذا العام أمام صحبتي ورفاقي
كل ما أعرفه أن كساد محصول البطاطس هذا العام في سوق الخضار هو السبب !
تعلمت أن لا أبكي و أنا أفتقد الكساء الذي يفقدني مكانتي الإجتماعية رونقها
ولكني وجدت في سب الدين متنفساًً
وبرعت في ذلك الشئ !
وكان يكفيني أن أقود شرزمة من الأوغاد الصغار أمامي و أنا ألهب ظهور أمهاتهم
بسياطِ سبابي !
وبالكاد منعت لساني بأن لايدنّس شرف أمنا حواء !
لم أكن وحدي الذي لا تطربهُ ألحان فرقة موسيقي خرفان الضحية !
ولكن أبي الذي كان يحب رجلاً آخراً
رجلاً مثلهُ !!!
أسمه أبو فاطمة !
كان أبي في أشد حالات حزنه لأن كساد موسم البطاطس هذا العام
جعل أوراق النقد تفرّ من محفظته
فلن يسكر هذا العام من مريسة حاجة زمزم
ست الموية المقدسة !
وكل ما أعرفه عن ذلك الرجل الذي يقاسم أمي فراشها دون أن نثأر لها!
أنه كان مدمن خمور روحانية !
أما أمي فقد كانت تصبر علي فجورهِ الديني
وهو يأتيها كل عام
ينتعل صلعةً مباركة
ومسبحة
ونص عرق من موية حاجة زمزم!
بل وتدعونا للإحتفالِ به
وأن نكتب علي شفا باب بيتنا
يا داخل هذا الدار صلي علي النبي المختار !!!
نواصل ....
|
Post: #50
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-11-2009, 11:51 AM
Parent: #49
لم يشـأ أبي أن يهدر كرامة الخروف
ويستبيح مكانته الدينية
فأراد لها حسن الخاتمة وهو يكبِّر ليلحقهُ بزمرةِ الخرفان الصالحين
وحسن أولئك زبيحاً !
أنا
شعرت بساديةٍ غريبةٍ و أنا أخال أن هذا الخروف بدل أن يردد آخر ألحانه
باع .. باع ... باع !
كنت أشك أنه يقول
وداع .... وداع ..... الوداع
أودع أودع أودع كيف أفارق أفارق أفارق كيف !!!
لم تكن هذه الحفلة أوفرنايت
ولم يكن الخروف يملك تصريحاً بالغناء بعد صلاة العيد
ولم نكن من الذي يتركون الدم مسفوكاً علي عتبةِ الباب
حتي نثبت لغيرنا من السابلة والجيران
أننا كنا من المضحين
الذين لا يمنعون الكانون
فأخذت أكيل التراب علي علي الدم
حتي لا يترك بصماته علي أحزية الذين يرفعون أذان العيد مباركةً و تبريكاً
وبعدها بدأت أتخلص من حنقي علي أبي
ومن كساد موسم البطاطس هذا العام
وكل ما أعرفه عن عيد الأضحي
تنتهي فرحته بإنتهاء مراسم الشواء !
وبعدها ينتهي العيد بلحمهِ وشرّهِ
ويبدأ رمتالة القوم في البحث عن موطأ قدم في صف الرغيف!
و تسترد قدرة الفول مكانتها الطبيعية كمضادٍ حيوي هام !
نواصل ...........
|
Post: #51
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-11-2009, 12:01 PM
Parent: #50
...
أكتشفت فجأة هذا الصباح
أنني أصبحت نصف رجل !
عندما بدأت أحلامي في نصب الفخاخ الجنسية المتعددة!
فوقعت في شراكها دون أدري
كنت أضجر بعد هذه الحادثة الشهيرة من أمي عندما أسمعها تقول
نادوا الشفع ديل للفطور !!!
كنت أود أن أحردها قبل أن أعلن عقوقي للطفولة!
و أكتشفت أن كل بنت في الحلة كانت حبيبتي
ولم أك أعرف طريقة مختصرة لإعلان هذا الحب المشروع المكتوم المنبوذ
إلا أن أبعث لهن مراسيلي في كل الحيطان
أنا أحب عرفة
التوقيع ياء !
أما باقي الحروف الأبجدية فقد كنت أتسلّي بمضاجعتها في أحلامي وعاداتي السرية!
كنت أجني ثمار صدورهن التي حان قطافها
وكأنني أتشفي من أبي ومن كساد محصول البطاطس في ذلك العام
بلادتي في الرسم لم تمنعني أن أقل أدبي فنيّاً علي عرفة !
و أنا أصورها في سور منزل أستاذ عبد المجيد الذي كان يتمتع بخيرات الإعارة في البحرين
أصورها وهي ترزح تحت إنتدابي الجنسي!
كنت أحس و أنا أرسمها بالفحم والطبشير
بأني أتحدي جميع السلطات الإجتماعية المتزمتة
و أتحرر من سلطة أبي
و أنعتق من طفولتي!
كنت أرسمها لكي أستقِل !
نواصل ......
|
Post: #53
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-11-2009, 12:14 PM
Parent: #51
نجح موسم التفاح
في صدور طالبات المرحلة المتوسطة!
و أصبح لديهن ما يفخرن بهِ
إذا ما غنت الفنانة صديرا عام في الدارة وخلت ناس فلانة حيارا!
أصبحن يطربن أكثر عندما يسمعن ود البدوي
وهو يغني في حفلات الحنة
النهد المعمر والدهب المجمر
أنا يا ناس الله لي الليلااااااااااااا !
بنات المدرسة المتوسطة وهن يرتدين التنانير والبناطلين التي كنا نسميها علب الصلصة
صلصة سعيد أظنها!
يتحاشين النظر إلي رسوماتي العارية في هذا السور الشهير
و أنا أعرف أنهن يخبئن الثورة في أجسادهن المناضلة
ولكن يمنعهن الخجل الزائف من مجرد إلقاء نظرة
ونحن نتلصص علي مؤخراتهن في الطريق إلي المنازل
هذه الرسومات كانت بمثابة شراك حمراء
كنت أنصبها في غفلةٍ من السابلة والمتسكعين
ولكنها كانت كافية للإفصاح عني
هذا ما كنت عليه !
ولكن تقاليد القرية التي كانت تجبرني علي التواري صمتاً
فوجدت ضالتي في سب الدين !
وتدخين البرينجي
الذي خارج للتو من سجنه وعقدته التأريخية
كسجائر للمشاطات!
بعد أن تعزّز البينسون
وصار البحاري والروثمان حكراً علي سكان الرقاع الخرطومية
أما الذين يتشعبطون في البصات البيد فورد
ويتشعلق معهم دجاجهم
بسفنجاتهم و شقيناتهم ومخاليهم و آمالهم
( الشقيانة) للحضر الحاضرة تعني حزاء تموت تخلي
الذين يحجون البقعة المباركة
فحسبهم سجائر البرنجي
تماماً مثل مشاطات الزمن الغابر
وهن ينفقن الوقت في القطيعة و الونسة والجبنة
وتسريحة السودان قفل !
|
Post: #52
Title: Re: بخصوص قِلّة أدب ناس زمان .. وثيقة إتهام !!
Author: حافظ حسن ابراهيم
Date: 10-11-2009, 12:07 PM
Parent: #50
حبيب نورا و حبيب الكل ....
مين علمك لعق الجراح؟؟!!! ...
واصل يا حبيبنا و انا ليك بالمرصاد يا قليل أدب و جميل
|
Post: #54
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-11-2009, 12:18 PM
Parent: #52
حافظ يا حفيظ
سانتظر لحظات أكث هترشة
لكي اعود أكثر هضربة
فقط كن علي العهدِ جميلاً
خلينا نحلحل تِكّة الزمن السمح
شكرن كتيرن!
|
Post: #55
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-11-2009, 12:29 PM
Parent: #54
عودةٌ محتملة ...
ربما !
|
Post: #56
Title: Re: بخصوص قِلّة أدب ناس زمان .. وثيقة إتهام !!
Author: مجدي عبدالرحيم فضل
Date: 10-11-2009, 12:30 PM
Parent: #50
الحبيب ونورة
والتككو !!أفكك من زمة لستك سروال دمورية
ياخي نص في نص أردافه شايله دوائر صدرقمرية
كمل النص بدون النص التحتااااني حق قِلّة أدب زمان
لو ما أخاف الكضب أقول السجارة حمرا ما الشاااي
واصلـــ
متابعين ومتشوقين لبقيت النص يستحق المتابعه
،،،،أبوقصي،،،،
|
Post: #57
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-11-2009, 12:35 PM
Parent: #56
Quote: والتككو !!أفكك من زمة لستك سروال دمورية
ياخي نص في نص أردافه شايله دوائر صدرقمرية
كمل النص بدون النص التحتااااني حق قِلّة أدب زمان
لو ما أخاف الكضب أقول السجارة حمرا ما الشاااي |
أبو قصي يا الماك ني
ياخي أولاً بالتبادي وينك وكيفنك!
نعلك طيب ياخ
أنا عارف شوية كدة مشغول اليومين ديل
بجي بتوكل علي كباية شاي حمرا
وسجارة أحياناً لايهم لونها
و بهترش شوي
وببقي مارق
لكن هسة الحاجات زاحماني كتير
بحاول أركز شوية كدة
وبرجع أكتر هترشة
شكرن كتيرن!
|
Post: #58
Title: Re: بخصوص قِلّة أدب ناس زمان .. وثيقة إتهام !!
Author: حامد محمد حامد
Date: 10-11-2009, 03:01 PM
Parent: #57
قلة ادب...!!!!
ولسع كمان اقعد بارى لى عبده النتن والجحش
يلا ...يلا طلع كل المستخبى وانا اللى فاكرك ....... تانى ما بمشى معاك.
واصل وقفت مالك
|
Post: #59
Title: Re: بخصوص قِلّة أدب ناس زمان .. وثيقة إتهام !!
Author: Abdelmuhsin Said
Date: 10-11-2009, 03:34 PM
Parent: #58
حبيب نوره سلامات و شكرا للصدفه الحلوه
|
Post: #60
Title: Re: بخصوص قِلّة أدب ناس زمان .. وثيقة إتهام !!
Author: عوض أبوجديرى
Date: 10-11-2009, 06:49 PM
Parent: #59
سلام يا مبدع
نحن على وشك الهبوط .....!
_______________________________________
توقع مني سلك!
|
Post: #61
Title: Re: بخصوص قِلّة أدب ناس زمان .. وثيقة إتهام !!
Author: عبد المنعم ابراهيم الحاج
Date: 10-11-2009, 07:08 PM
Parent: #60
صعلوك
ده شنو دا يامسخوت
انت أقعد طرطش في الكلام كدا
لامن تجيب ضقلا (....)
ابو جديري سلامات
ـــــــــــــــــــــــــــــــــــــــــــــــــــــ
أوعك تحكيلم عن الرعية
|
Post: #72
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 01:47 PM
Parent: #61
Quote: صعلوك
ده شنو دا يامسخوت |
منعم يا جميل
يا مان والله جنس حاجات حصلت علي
شي حاضروا
وشي نجِر ساكت
بس خليك قريب
|
Post: #62
Title: Re: بخصوص قِلّة أدب ناس زمان .. وثيقة إتهام !!
Author: جعفر محي الدين
Date: 10-11-2009, 07:25 PM
Parent: #60
شكرا يا حبيب نوره على هذا الحكي القليل الحياء
كان العنوان أن يمنعني متعة النظر الحلال إلى نصك المحرم هذا .
كيف تسنى لك حمل كل تلك الأسئلة وفوق ذلك مشقة البحث عن إجابات غير شافية لها
ماذا سنفعل مع هذه الأسئلة بعد أن أصبحت السراويل تغلق باللستك الصيني والذي استغرق عشرون عاما من الحبكة
منتظرين باقي الهترشات
ـــــــــــــــــــــــــــــــــــــــــــــــــ
طلب صغير كتر من الذال وقلل من الزاء يا حبيب
|
Post: #63
Title: Re: بخصوص قِلّة أدب ناس زمان .. وثيقة إتهام !!
Author: طارق ميرغني
Date: 10-11-2009, 07:50 PM
Parent: #62
| Quote: لو ما أخاف الكضب أقول السجارة حمرا ما الشاااي |
ابدا والله انا بافتكر بالعكس ....
حبيب نوره يا مدهش .... حليت سراويل احباطاتنا.....
|
Post: #64
Title: Re: بخصوص قِلّة أدب ناس زمان .. وثيقة إتهام !!
Author: سلمى الشيخ سلامة
Date: 10-11-2009, 09:02 PM
Parent: #63
شكرا على الادب العالى
|
Post: #65
Title: Re: بخصوص قِلّة أدب ناس زمان .. وثيقة إتهام !!
Author: آدم صيام
Date: 10-12-2009, 08:04 AM
Parent: #64
يسألني الله! لولا الإبداع الماركيزي!
قربت أقول كلام مساخة
الحبيب نورة فضاياتنا السوادنية شحيحة من تسطير هكذا تبدعات
فأرجو التريث ريثما نلتقط مخاخيتنا
|
Post: #66
Title: Re: بخصوص قِلّة أدب ناس زمان .. وثيقة إتهام !!
Author: هشام الطيب
Date: 10-12-2009, 11:13 AM
Parent: #65
حبيب نورة يامُدهش
والسَراويل التي أُحكِم رَبطُها بدأت تتمزق بفعل وخزات قلمك المسنون بحدة..
ممتعة كتاباتك يافردة ..
|
Post: #67
Title: Re: بخصوص قِلّة أدب ناس زمان .. وثيقة إتهام !!
Author: Hisham Manssor
Date: 10-12-2009, 12:30 PM
Parent: #66
سلام
ابداع ما فى كلام
|
Post: #68
Title: Re: بخصوص قِلّة أدب ناس زمان .. وثيقة إتهام !!
Author: مطر قادم
Date: 10-12-2009, 12:43 PM
Parent: #67
Quote: انت شفت حاجة
أمانة ما حبوبة بس كان قمت للحكي |
قوم سداري.......قوم صوف
|
Post: #80
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 02:49 PM
Parent: #68
| Quote: قوم سداري.......قوم صوف |
أبو الأمطار يا حنين
ياخي وينك قاطع الخبر
وحاة الله مشتهيك
كدي حاول أظهر لي
|
Post: #79
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 02:46 PM
Parent: #66
Quote: حبيب نورة يامُدهش
والسَراويل التي أُحكِم رَبطُها بدأت تتمزق بفعل وخزات قلمك المسنون بحدة..
ممتعة كتاباتك يافردة .. |
هشومي
السراويل ياخ مافي ليها أيي داعي
أول حاجة نستر عري أرواحنا
كن علي العهد
جميلاً!
|
Post: #78
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 02:44 PM
Parent: #65
Quote: يسألني الله! لولا الإبداع الماركيزي!
قربت أقول كلام مساخة
الحبيب نورة فضاياتنا السوادنية شحيحة من تسطير هكذا تبدعات
فأرجو التريث ريثما نلتقط مخاخيتنا |
آدم صيام يا جميل
ربنا يجبر بي خاطرك يا جميل
ومنتظر منك الكتير
وخليك قريب
وياما في الجراب يا حاوي
شكرن كتيرن!
|
Post: #83
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:04 PM
Parent: #65
*
|
Post: #77
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 02:40 PM
Parent: #64
| Quote: شكرا على الادب العالى |
سلمي يا سلامة
وانا بشكرك علي الحضور الراقي الأنيق
كيفنك يا جميلة
كوني بخير
|
Post: #76
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 02:35 PM
Parent: #63
Quote: ابدا والله انا بافتكر بالعكس ....
حبيب نوره يا مدهش .... حليت سراويل احباطاتنا.....
|
طارق ميرغني الجميل
تسلم يا غالي
وسعدت بي مرورك
|
Post: #73
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 01:53 PM
Parent: #62
| Quote: ماذا سنفعل مع هذه الأسئلة بعد أن أصبحت السراويل تغلق باللستك الصيني والذي استغرق عشرون عاما من الحبكة |
أبو الجعافر
ياخي عليك الله ما كان أحسن يخلوها لينا تِكَك؟
أو سراويل مية وحداشر !!
لا حولاااااا جنس أرشيف علي مبالغ فيه
|
Post: #75
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 02:28 PM
Parent: #62
Quote: طلب صغير كتر من الذال وقلل من الزاء يا حبيب
|
أمرك
عيوني ليك يا حبيب
|
Post: #71
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 01:30 PM
Parent: #60
| Quote: نحن على وشك الهبوط .....! |
أبو جديري الجميل
ياخي ربنا يجيبك بالسلامة
في إنتظارك يا عسل
بس الرقم غيرتوا
هاك الجديد
0020111405817
|
Post: #70
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 01:26 PM
Parent: #59
| Quote: حبيب نوره سلامات و شكرا للصدفه الحلوه |
عبد المحسن يا جميل
و أنا بشكر اللحظة نفسها
فيما يبدو نحن بنتشارك الحب
أخبارك أيه يا مان
خلينا نطمأن عليك
شكرن كتيرن!
|
Post: #69
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 01:18 PM
Parent: #58
بي أدب !!
حامد ياخ صاحبك الرطاني بهاء
ما صدق بقي كويس
وعمل لي يوسف عبد الفتاح
ياخ كرهتونا بين السرايات ذاتو
|
Post: #74
Title: Re: بخصوص قِلّة أدب ناس زمان .. وثيقة إتهام !!
Author: حامد محمد حامد
Date: 10-12-2009, 01:53 PM
Parent: #69
Quote: وعمل لي يوسف عبد الفتاح
|
يعنى ما جاء بنفسه وعزاك فى افراح الشعب
غتيت صاحبى دة
معليش يا حبيبو وانت حتلقاها من وين ....!!! كفارة والله ما عارف اقول شنو ..غايتو افراح وخطفوها
|
Post: #81
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 02:51 PM
Parent: #74
| Quote: معليش يا حبيبو وانت حتلقاها من وين ....!!! كفارة والله ما عارف اقول شنو ..غايتو افراح وخطفوها |
حامد
ياخ عليك الله أخطف رجلك وتعال
كلها فركة كعب بي طيارة الساعة أربعة شوق
|
Post: #82
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 03:20 PM
Parent: #81
نواصل الحكي ....
بدأ والدي المراهق السياسي بحسن نية سازجة
في موالاة رموز الجبهة الاسلامية القومية
لفح جلابية الترابي من غير ما يفهم
أعتقد أنهم بدأوا في إستقطابه عندما أدركوا أنه من قياديي القرية الأكثر سزاجةً
فيسهل عليهم عن طريقه تعبئة كروش صناديق الإقتراع
التي أصابتها الأنيميا وفقر الدم
بدأت تلتف حوله مجموعة من أسراب ذباب المصلحجية
والقوادين
ومن ضمنهم المحامي المغمور
والذي صار فيما بعد زعيماً للمعارضة أيام الجمعية التأسيسية
ومن ثم نائباً للبرلمان السوداني
في سجموقراطية الكيزان الحالية
بعد ان أنقلب علي شيخهِ وعرّابه شيخ حسونة
في ذلك الوقت كانوا يتهمون الأخ منصور المفتاح بالشيوعية
أبي و زمرة من رمتالة القوم
الذين ينفقون الوقت في دكان كمال الدين
فراقت لي هذه الفكرة تماماً
فجعلت أكب وجهي علي مجامر كتب لينين وماركس و خروتشوف
يا عمال العالم أتحدوا
البقرة التي يملكها صاحبها تدر من اللبن أكثر من البقرة التي تملكها الحكومة !
آيات شيوعية كنت أصلي بها العشم والخلاص
في بداية أيام تصوفي الماركسي
تلك الأيام التي جعلت فيها من موسكو كعبةٌ بيضاء
أحجها في اليوم ألف مرة
حبي لوالدي جعلني في حيرةٍ من أمري
وما بين تمردي و تصوّف أبي و أستقامته
ولد تناقض اللحظة
نواصل....
|
Post: #84
Title: Re: بخصوص قِلّة أدب ناس زمان .. وثيقة إتهام !!
Author: خالد العبيد
Date: 10-12-2009, 11:24 PM
Parent: #82
حبيبه سلام
وتحياتي
الوكت ده كلو قاعد متفن في الواطة
قلت الولد ده لابد ليه بي مصيبة
مواصل معاك
جمعت النص في "فولدر" واحد
وبقراك بي مزاج رايق
|
Post: #98
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:44 PM
Parent: #84
Quote: حبيبه سلام
وتحياتي
الوكت ده كلو قاعد متفن في الواطة
قلت الولد ده لابد ليه بي مصيبة
مواصل معاك
جمعت النص في "فولدر" واحد
وبقراك بي مزاج رايق |
خالد العبيد يا جميل
ياخي أتشرفت بوجودك هنا
كتر خيرك يا حبيب
وخليك قريب
لسة ياما في الجراب يا حاوي
شكرن كتيرن!
|
Post: #85
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:27 PM
Parent: #82
مذكرات مراهق!!!!
آآآآء أسد .... ماء مسح ... فاء فقُر هاء واو لام الألف ياء ياسين ود الحاجة زكية ..... وحمامات المدرسة الثانوية يتطاوف بين صفاها ومرواها ما بين زائغ من حصة الكيمياء ... و آخر الله يعلم مافي صدره من نوايا بزيئـــها و بريئـــها ......
كنت في الحمام رقم 8 الما عندو باب شكلِ بوفيه مفتوح !! بحاول تصليح ( الكركاســـة) عشان كنت متوقع الجلد في الحصة الجاية كالمعتاد... كما حدث في اليوم السابق عندما أمسك أستاذ التربية الاسلامية رواية ( عبير) العاطفية في يدي... وباقي التلامذة يرددون آيات سورة الانفال في خشوع تام وهذه كانت مرحلة.
|
Post: #86
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:28 PM
Parent: #85
المغامرون الخمسة ...... والشياطين التلتاشر ..... ومثلي الاعلي (أدهم صبري ) رجل المستحيل ..... مغامرات السندباد البحري
أربعة عشر رجلاً ماتو من أجل صندوق !!! الليث الأبيض ... غرندايزر و باقيرا .... بوجي و طمطم و أبو الحروف .... الكابتن ماجد ..... و بوكيمون.......!! كل هذه اللافتات تضامنت وشكلت (فولترون) مع أنسياب شخوص مثل العم (تنقو) في مجلة الصبيان
وميكي وسمير بداخلي !!!
لم أكن أبحث عن أمي كما في الفقرة الأولي من قانون الكلاب المشردة ... وبالتأكيد لم أكن أبحث عن فضولي !!
|
Post: #87
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:29 PM
Parent: #86
لم أكن أبحث عن أمي كما في الفقرة الأولي من قانون الكلاب المشردة ... وبالتأكيد لم أكن أبحث عن فضولي !!
بل كنت أصر أن أبقي أغبشــاً غباشةً لا يدانيها الفول المدمس ولا جحش عمر السماني ( الديراوي ) ... فيما تعدني أمي بالوعيد والخبت الشديد و الضريب شقاق العناقريب!! لو ما أستحميت عشان كدة كرهت ليك الطشت و الليفة و الصابون وحجر الكرّاش...!!!
ونشأت بيني وبين الجلسرين علاقة غير متصالحة.. فقد كان يؤلمني في الجضوم و الشلاضيم والكراع أم شقــّاً يدخل الضب ....!
نواصل ...........
|
Post: #88
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:30 PM
Parent: #87
السندريلا سعاد حسني ..... ليلي علوي .... أميتاب باتشان .... سلفستر ستالون ........ أبراهومة الديسكو .... منتخب التانغو الارجنتيني ...... أبرز ملامح ( غاليري) حيطة الأوضة التي كان يشاطرني رائحة بولها أخواني التلاتة .......
وأبي بصوته الوقور ينتذعنا من وسادة أحلامنا بشدة ... للذهاب لأداة صلاة الفجر ... انا كنت أتفنّن في أساليب الخداع والزوغان لدرجة أني كنت بدفق موية الابريق علي الأرض و أمسح جبهتي بحفنة من التراب........ داعياً الله انا يجعلها صلاةً مقبولةً وان يجعل من عنقريبي صعيداً طاهراً ........!
نواصل..........
|
Post: #89
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:31 PM
Parent: #88
صياح بياع الترمس .... و أم بلينا ست الدندرمة .... التومة بت حسن أزاعة الحلة المحلية والناطقة الرسمية باسم (كونغريس) الجبنة و برلمان المشاط! .... ود الضو بياع الجزلين ....... الجامع الورا .... ودكان كمال الدين ..... كلها قيم تصنع بداخلي أوركسترا من شفيف التعلق بلوحة المكان الصوتية ..... و أضيف للصورة بعداً ثالثاً ......! ريحة التراب و ضل الشجرة ... همس القمرة وموية النيل والليل و المطرة.........! سلطة اللاأنعتاق وصولجان التبعية المطلقة ... وبروج مشيدة من الولاء الأعمي لدستور وتشريعات الرقيب الاجتماعي ...!
نواصل......
|
Post: #90
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:32 PM
Parent: #89
بدأت أتمتع بمزايا أستقلالية أكثر ... وتمدد هامش الحرية قليلا .. و أخالني كنت عدواني مع اولاد الشارع التاني .... اما صبيان الحلة الورا ! فقد كانت العلاقة الشحمة والنار .........
لا أنسي مطلقاً اول مرة أتعلمت فيها الحديث و لبست القميص ..!
أمي قالت لي مودنّك الدلالة؟؟؟
تفتحت مساماتي شوية كدة...و أكتشفت أني ود سمح !!
صاحبي معتذ تروتسكي أتجاوز بمهارة حتة انو الصلعة عاهة مستديمة وعائق حضاري .... وقال لي في فصاحة : عليك الله انا ذاتي ما سمح؟؟؟؟؟؟؟؟؟؟؟؟؟؟؟؟؟؟؟؟؟؟؟؟
نواصل ..........
|
Post: #91
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:33 PM
Parent: #90
يا ود أمي سمح قلمك وسمح فهمك .....! و بعدها طبقت كتاب البلاغة وكراس التاريخ ومشيت درس العصر وانا ممسح بي نص باقة زيت الملاح !! كنت بلمع و برقش والشارع الكبير دة ملان أشكال أشكال ..... عوض ظط ...... السراج العوير..... التيمان عمر وخالد ..... حنان بت عثمان ... وبت جيراننا الحلفاوية .....و امونة كانت ماشة فصل الأعادة........
ياااااااااااااااااااااااااااااه الزمن داك نورة كانت تمبوشـــة وحلمها صغمبروتي !!!!! حتة كرميللا وحجوة تهدهد من حبوبة !
ما تمت ستة ....... وكانت حتتتتتتة الا شعاعا بضوي الحتة !!
شتلة منقاية و رشة مطراية ........
ياااااااااااااااااااااااااه نورة كانت جُغـــمة برتكـــــــان !
تغشي حلقك زي حلاوة قطن .... وتفوتك وانت بتتكــرّف جغمة برتكان ..........!!
نواصل ........
|
Post: #92
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:36 PM
Parent: #91
امونة كانت بتكاويني بي صدرها المليان .... كلما أشوفا وهي في وسط العيال زي الجامع نص الحلة .........
كنت بباريها في الصفا والمروي
لمن جينا راجعين من الدرس... أدتني اول قدّوم غير شرعي في حياتي ... وبعديها أكتشفت أني و جدع أوي ...... طبعاً تكلنا ليك القديديم دة في الكهربة القاطعة دي !! الشئ الذي أكسبني عذراً شرعياً لعدم أداء صلاة الفجر صبيحة اليوم التالي .....!
نواصل ...........
|
Post: #93
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:36 PM
Parent: #92
بدأت اكره الرحلات التي تنظمها المدارس و الأسر الي منتزه المقرن العائلي وجنينة الحيوانات ....... والمتحف وبيت الخليفة والخزان ... أجدها سخيفة و طفولية ومافيها أيي موضوع ..... أحب أن أستقل عن هذا الجو الغير مشحون بالأثارة والأنطلاقة !!!
الجو الذي لايضخ ( الأدرينالين ) في عروقي ...
نواصل..........
|
Post: #94
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:37 PM
Parent: #93
أصبحت آخذ أدوار أكثر بطولية في الحلة .....و أزكر اني يوم أقتحمت ميدان الكورة و انا أكورك ...: عرقلة عرقلة !!!
الليلة يا ألعب و تدوني الفنيلة نمرة 10 يا ما ح تتلعب؟
حتي تبرع واحد من أصحابي لاقناعي قائلاً :
حركات الشفع دي شنو هسة؟؟ وطوالي مرقت من الميدان عشان ما أطلع شافع في نظرو .........!
نواصل..........
|
Post: #95
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:38 PM
Parent: #94
الفاضل سعيد .... محمود سراج .... عمر الخضر .... وبالتالي بت قضيم ..
أبو قبورة ... فرقة الأصدقاء .... ليالي الحلمية .... الشهد والدموع ... القبضة الحديدية..
وزحمة من التفاصيل الميلودرامية ... ساعدت في حقن شراييني بهجين من طرق الأفصاح
عن أنماط الحياة الانسانية ... مع أمكانية التلوُّن والتقولب مع أنسيابية المعايشة
أو عدمها ... كل هذا في أطار ما يعرف ب( سيسولوجيا) المسرح و التحليل النفسي
البالغ الدقة لشخصيتي... ومدلولاتها وطرق التحايل والألتفاف والتقليد
والمحاكاة و التغمّص ... ومحاولة أداء الأدوار الصعبة وسبر الأغوار العميقة
في زمن كانت فيه القمرة مارقــة للريبــا والتـلاف !!!!
ولا تؤمن بازدواجية السلطــة ..! حتي في در الأضواء و أستحلاب النهارات المسائية !
النجـــوم أيضاً كانت لها فلسفــــة خاصة ... فقد كانت تستعين بمليشــيات الثريا
غير آبهــة بجنـجـويد الليالي القمرية ...!
وجوه الناس مألوفة وطيبة ... لم تعفِّرها أتربة الهجرات
ولا كتاحــــــــة الحيكومات !
نواصل............
|
Post: #96
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:39 PM
Parent: #95
هذه المنعطفات صنعتني.... و انما يولد الأنسان من نطفــة تعترف وتقر بالمصادفة
وانا كنت كذلك .... محض صدفــة!
أنا أعلم بأنني مجرد زول... طول عمري حاسس بي كدة....
الجمال جلابية ربنا .... والعارف عزو مستريح... و في كريستيان ديور....
انا معاي جلابية ربنا ....
معتز تروتسكي دة كافر واللا شنو !!!!!
نواصل............
|
Post: #97
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-12-2009, 11:40 PM
Parent: #96
يا زمن انت عولاق واللا شكلك كدة؟؟
أحساسي وانا بنضرب في القفا
ودة كان لأول مرة!
بت جيراننا الحلفاوية ما راعت الخوة ولا العشرة
وانا بي كامل عظمتي وصولجاني
في أنتخابات أتحاد المدرسة
منفوخ بي المنصبين
السكرتير الثقافي و الرياضي
تحلف تقول راجل مرتين!
الواحد لمن يحس الاحساس للمرة الأولي حاجة رهيبة جدا!
ياااااااه الخيانة كان شئ فظيع ساعتها
لكن كان برضو شعور ممفيد جدا
يعني أهو قدرت أعرف انو الدنيا دي بي وشين
وعرفت أني ممكن ٌأقدر أواجه الصدمات واللكمات
اول درس في حياتي قدمتوا لي بت جيراننا الحلفاوية
it takes 2 to tango
لكل فعل رد فعل طبعاً وانا ما أتعودت أسيب حقي
خصوصاً في مسألة الكرامة
عليك الله كرامة شنو و سماية شنو في بلد الهجايم دي ؟؟؟
في جزئية تانية ح أضطر أحكي ليكم عن قصة التار البايت
مع بنت جيراننا الحلفاوية !
قد نواصل .....
|
Post: #99
Title: Re: بخصوص قِلّة أدب ناس زمان .. وثيقة إتهام !!
Author: doma
Date: 10-13-2009, 09:51 AM
Parent: #50
حبيب نوره عامل راسك المقودس دا
مخسم بي ابو فاطمه الذال جنب الواحد ضرستني بالزينات
|
Post: #100
Title: Re: بخصوص قِلّة أدب ناس زمان .. وثيقة إتهام !!
Author: أميرة فاروق عبد العال
Date: 10-13-2009, 10:13 AM
Parent: #99
Quote: ما تمت ستة ....... وكانت حتتتتتتة الا شعاعا بضوي الحتة !!
|
غايتو (الحتة) دي الزول ممكن يلف فيها
يوم بحاله، ما يملها..
كلام عجيب يا ياسين..
لكن بالجد حكاية (الذال) و (الزاي) ديل شنو؟
|
Post: #101
Title: Re: بخصوص قِلّة أدب ناس زمان .. وثيقة إتهام !!
Author: عبدالله ود البوش
Date: 10-13-2009, 10:58 AM
Parent: #100
تحياتي يا حبيب نورة يا بنضورة ( الطماطم قالو غالية )
زماااااااااان انتشرت عبارات معاكسة بين الشباب زي :
سنة ولا اموت انا
سنة يا تتي
زنقد حمامكم بدي ولا بنقد
تتي حمامكم بدي ولا بعضي
اها عمك حبيب الله ود الباع جملو قال لبتو :
الايام دي الاولاد لبقولوا للبنات :
زنقد حمامكم بدي ولا بنقد
لو في واحد قال ليك كدا قولي ليهو :
حمامننا بضبح جخخخخخخخخخخ واشار بكف يده اليسرى
وهي في وضع سكين على مفصل كفه اليمنى ( هو اصلو اعسر )
وفي نفس اليوم همزة ولدو كاوش بت العرب البجو بنزلو في الباجور
لمن جات تشتري ليها نص وقية بن وصابون من دكانن
وقال ليها تتي حمامكم بدي ولا بعضي وعرف انها لم تفهم كلامو
وطوالي مسكا باسا وهي لم تحرك ساكنا وكرر البوسة مرة ومرتين وتلاتة
واخيرا لمن زهجت منو قالت ليهو :
ها جنا ها زح مني لاغادي انا منقايتك
حاشية :
بدينا بالطماطم وانتهينا بالمنقة( صدفة بس )
|
Post: #106
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-13-2009, 01:31 PM
Parent: #101
Quote: وفي نفس اليوم همزة ولدو كاوش بت العرب البجو بنزلو في الباجور
لمن جات تشتري ليها نص وقية بن وصابون من دكانن
وقال ليها تتي حمامكم بدي ولا بعضي وعرف انها لم تفهم كلامو
وطوالي مسكا باسا وهي لم تحرك ساكنا وكرر البوسة مرة ومرتين وتلاتة
واخيرا لمن زهجت منو قالت ليهو :
ها جنا ها زح مني لاغادي انا منقايتك |
ود البوش
عليك الله شوف البساطة دي
هسة البت لو قلت تشاغلا بتقول ليك هات من الآخر
أكسب زمنك يا عمك
وكدة
لكن شوف بساطة ناس زمان
والبراءة العجيبة دي ياخ
هسة البت لو عاينت ليك في عينك
تعرفك داير شنو منها
غايتو جنس هوايل
شكرن كتيرن علي المرور الرائع
|
Post: #102
Title: Re: بخصوص قِلّة أدب ناس زماپE.. وثْْة إتهاپE!!
Author: dardiri satti
Date: 10-13-2009, 11:11 AM
Parent: #100
Quote: أما أنا ورفقتي فقد تمكنا من فك تِكّة أول سروال سؤال !
وبعدها عرفنا أن هذا المجتمع البشري عبارة عن سروال ، إذا تمكنت من فك تِكّة سروال ، تداعت لك باقي السراويل بالعري و البشتنة !
|
إنت الموديك للتكك شنو؟؟
ما دا الحيلحقك ود الأقاريق
Prometheus
المشى يتفولح لمن جابوا خبره.
بالمناسبة ،
إنت نورة الإنت حبيبها دي
لمتين حتفضل حبيبها؟؟
خلاص ياخي عرسها وريحنا.
بس القصاص الناجح لازم يكون وناس زيك كدا .
واصل بالله ، في إتجاه حلحلة التكك دا!!
لأنك بالطريقة دي حتطلع بلاوي كتيرة.
تحياتي
|
Post: #103
Title: Re: بخصوص قِلّة أدب ناس زماپE.. وثْْة إتهاپE!!
Author: حامد محمد حامد
Date: 10-13-2009, 12:03 PM
Parent: #102
Quote: معتز تروتسكي دة كافر واللا شنو !!!!!
|
لا اراه كافرا بالتنس بل عاشق ماهر ....له التحاياالنواضر كما يحب ان يقول
|
Post: #108
Title: Re: بخصوص قِلّة أدب ناس زماپE.. وثْْة إتهاپE!!
Author: حبيب نورة
Date: 10-13-2009, 01:39 PM
Parent: #103
Quote:
لا اراه كافرا بالتنس بل عاشق ماهر ....له التحاياالنواضر كما يحب ان يقول |
حامد يا جميل
ياخوي صاحبك باع الفكرة الجمهورية
هسة بقي حايم في مطارات القلوب
زي التقول رايح ليه نبض
هاك الشريان دة
|
Post: #107
Title: Re: بخصوص قِلّة أدب ناس زماپE.. وثْْة إتهاپE!!
Author: حبيب نورة
Date: 10-13-2009, 01:36 PM
Parent: #102
Quote: إنت الموديك للتكك شنو؟؟
ما دا الحيلحقك ود الأقاريق
Prometheus
المشى يتفولح لمن جابوا خبره.
بالمناسبة ،
إنت نورة الإنت حبيبها دي
لمتين حتفضل حبيبها؟؟
خلاص ياخي عرسها وريحنا.
بس القصاص الناجح لازم يكون وناس زيك كدا .
واصل بالله ، في إتجاه حلحلة التكك دا!!
لأنك بالطريقة دي حتطلع بلاوي كتيرة. |
درديري السكنوك في ضميري
أعتبروا تكسير تلج قاصد منو أشكرك علي المكالمة الذوق
ودة أصلوا حال الناس الفوق
يا حبيبو
في كمية بتاعة تِكَك أنا لو حلّيت تكة واحدة
تداعت باقي التكك بالعري والفضيحة
لكن معصور شوية
ونيت ماعندي
بجي بكتب سريع كدة من راسي
و في النهاية بكتشف إعاقات كتيرة في الحروف
خصوصاً الذ ز
لكن يا أخوي هسة بكتب لي حرفين تلاتة
شكرن كتيرن!
|
Post: #105
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-13-2009, 01:22 PM
Parent: #100
Quote: غايتو (الحتة) دي الزول ممكن يلف فيها
يوم بحاله، ما يملها..
كلام عجيب يا ياسين..
لكن بالجد حكاية (الذال) و (الزاي) ديل شنو؟ |
مشكورة يا فاروقية علي المرور الراقي
والمرة الجاية بشوف ليكم حكاية ذا ذنب
وزا زرافة دي
شكرن كتيرن!
|
Post: #104
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-13-2009, 01:19 PM
Parent: #99
ماما دومة
كيفنك ياخ
والله ما فتحت النصيبة دة
راجيك وحلفتي بالتهينك و تقطع دلاقينك كان تجي
بركة الشوفة ياخ
|
Post: #109
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-13-2009, 01:54 PM
Parent: #104
في حقبة شهدت الكثير من التغييرات والمتغيرات العقلية والبدنية
بدأت أحس أنني يجب أن أتمتع بإستقلالية أكثر
لم أعاد أخاف من السهر خارج البيت حتي انصاف الليالي
وتوخّي الحذر و أنا أتسلق الحائط حتي أدخل
دون ان تفجأني أمي و أنا أحاول أن أتلمس طريقي إلي سريري
و تنفجر في وجهة كعبوة ناسفة
ويصحوا الجيران علي صوتها المرتفع
فيما يبدو أنني بدأت أشم رائحة إبطي الفكري المستقل
الشئ الذي يمنحني هامش من الحرية يجعلني لا أبالي بتهديد أمي بالويلِ والثبور
كنت وين يا ساجمين جايي تتلبّد زي الحرامي ؟
يمة ياخ أنا شافع ؟
كرهتونا دين حياتنا !!
لماذا أشعر بذلك النوع من الإرتياح وأنا أسب الدين ؟؟
هذا الدين الذي ماذلنا نتعلق بحبالهِ أينما حللنا
ومع ذلك نتذمّر منه!
كانت هذه الوثنية الجديدة تشعرني بالرضا!
فوجدت ضالتي فيها
لا ذلت أذكر حديث حبوبة صديقي خطاب
حاجة آمنة وقد ضاقت زرعاً مننا
ونحن نركل الدين في القفا سخطاً
الله لا غزا فيكم بركة يا شويعيين !
أعتقد أن دعوة حبوبة آمنة الأكثر سخطاً وجدت أبواب السماء مفتوحة
فماذلنا منزوعي البركة حتي يومنا هذا
أنا أنفق الوقت في التسكعِ في عواصم الدنيا السفلي
وصديقي خطاب سمعت أنه أصبح من الساهرين
علي راحة عصابة النظام الحاكم
نواصل ...........
|
Post: #110
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-13-2009, 02:04 PM
Parent: #109
في هذه الفترة بدأ الدين يلعب معي أستغماية غريبة !
ضلّ طريقه إلي
وقد أكون أهتديت ألي غيره!
فما عاد هذا الأفيون يشبع رغبتي في التفكير
أو البحث عن طريقة أخري للحياة
أصبحت مولعاً أكثر بجميع الطرق الإلحادية
أرفع راياتها
و أدق طبولها
و أقيم لها الأعياد والمواسم !
و صفني أكثرهم تذّمتاً كأحد حيران الشيطان الأوفياء
فلم أكثر معه الجدل
لم أزد علي قولي والله الشيطان دة ما شفت منو حاجة !!
و أنا أردد في نفسي
لو عثرت بغلة في العراق وصاحت أين معتصما!
ومعتصم دق الطناش منها و سد دي بي طينة ودي ذااااتة بي طينة
السبب الشيطان
وحتي حالة العقم التي أصابت دجاجة حاجة زكية
و أنقطعت عنها البيضة الشهرية
وحتي كمان ثقب طبقة الأوزون
برضو السبب في نظر هؤلاء الملائكة المرتزقة
الشيطان
ولا أحد غيره !
|
Post: #111
Title: Re: بخصوص قِلّة أدب ناس زمان .. وثيقة إتهام !!
Author: doma
Date: 10-13-2009, 02:05 PM
Parent: #109
احححي منك الزول لو لم فيك بس المفراكه فوق مفاصل الاصابع
لوووول
قلت اخير تقلبها ذالات ؟؟!!
ارجع اكتبها زينات اخير
|
Post: #112
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-13-2009, 02:16 PM
Parent: #111
Quote: احححي منك الزول لو لم فيك بس المفراكه فوق مفاصل الاصابع
لوووول
قلت اخير تقلبها ذالات ؟؟!!
ارجع اكتبها زينات اخير |
ماما زينب
عليكي النبي هو لو في مفاريك كان دة بقي حالنا كدة
علي فكرة الفلاني ما شغال عندي
بحاول أظبطوا
عايز أشمشر معاكي حبة
|
Post: #113
Title: Re: بخصوص قِلّة أدب ناس زمان .. وثيقة إتهام !!
Author: doma
Date: 10-13-2009, 02:20 PM
Parent: #112
| Quote: عايز أشمشر معاكي حبة |
غايتو ا الا لو عندك شمار كارب
شمار ضارب ما بخارج معاي
|
Post: #114
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-13-2009, 02:30 PM
Parent: #113
يختي انا شماراتي كلها في السلك
نص عمرك ضايع
هسة بديك فرصة تانية
لكن تاني وين تلقيها
|
Post: #115
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-14-2009, 03:41 PM
Parent: #114
*
|
Post: #116
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-14-2009, 08:11 PM
Parent: #115
نواصل الحكي ...
في المرحلة الثانوية بدأت في الإنفتاح علي العالم الخارجي
أحسن أن هذا الكتكوت الذي يسكن بيضتي
بدأ يبحث عن حقه الطبيعي في المكاكاة!
دهاليز فكرية متعددة كانت تنتظرني لأفض عزريتها
كانت فيما يبدو تعبث بتِكّة سروالي عدة آراء جامحة
تقِل أدبها معي
وتسخر من ذكورتي
فقررت أن أتخلص من سروالي الحديدي و أتعرّي !
أعترف أنني كنت مراهقاً خجولاً إلي حدٍّ ما
وكانت جرئتي فقط تكمن في خطاباتي
فعندما أكتب
تسكنني روح مريم الشجاعة !
خطاباتي
و دفاتر مذكراتي !
هي التي كانت تفضحني
فقد كنت أكتب تقريباً جميع الرسائل الغرامية لغالبية أصدقاء الدراسة
الموقف الطريف الذي ما زلت أذكره
هي مجموعة الخطابات التي وجدتها مع ميمي
تلك الأنثي التي عبرت سرير أحلامي
فقد كانت كل الخطابات بخط يدي
و تحمل توقيع عشاق مختلفون
بالإضافة إلي خطابي الشخصي !
حرقت ميمي الخطابات أمامي
و بصقت!
وغادرت سريري
وتركتني بلا سروال !!
|
Post: #117
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-14-2009, 08:23 PM
Parent: #116
كانت غالبية الخطابات تكتب علي طريقة
السلام عليكم و رحمة الله تعالي وبركاته
كيف حالك و أحوالك في هذه المدة الطويلة التي
لم أراكي فيها
إنشاء الله تكوني بخير وصحة جيدة
كما أنا بخير و مبسوط أربعة و عشرين قيراط !
!!!
فقررت أن أحرّر الجنس الكتابي من هذه الرتابة والملل
و أغير جلدها
و أخلع جميع سراويلها
فلم يكن غريباً إنهم أتهموني بالشذوذ
ولكني كنت ضد المثلية الفكرية
كنت أريد أختبر بعض جيناتي
في بوتقة أستروجين أنثي
وفي هذه الفترة الإبداعية المكثفة
والمكتّفة أيضاً
كنت أكتب لرفاقي الدفاتر الغرامية
بمقابل مادي بسيط
كل ما احتاجه دفتر عاري
ورسومات وصور أكثر عرياً
وقلم يمارس فحولته علي هذه الأوراق العزراء!
نواصل .....
|
Post: #118
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-14-2009, 08:31 PM
Parent: #117
أوراق عارية حملت توقيعي
ضلّت طريقها إلي أستاذة اللغة الإنجليزية في مدرسة البنات
الأستاذة الساخنة التي تحمل توقيع الفرعون المصري
كنا نطرب للكنتها المسلسلاتية ونحن نتلصص علي حصة الأنقليزي المسائية
وتثير حنق سروالي وهي تتسكع ما بين السبورة
والكنبة الأخيرة
وساعتها كنت أتمني أن أكون من سكان خط 100 غرب الشهير وسط سكان الكنبة الأخيرة
تفاجأت بها في بيت خالتي وهي تهرِّب المنهج المدرسي ألي البيوت
تحت ستار الدروس الخصوصية
شعرت أن هذه التِكّة تخنق سروالي
وكنت أحتاج أن أتنفس!
و بدون سابق إنذار وجدتني من عشاق اللغة الإنقليزية
و أنا كلي شوق لتصفح هذا الدكشنري !
|
Post: #119
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-14-2009, 08:33 PM
Parent: #118
برجع ليكم للدكشنري
|
Post: #121
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-17-2009, 03:58 PM
Parent: #118
Quote: أوراق عارية حملت توقيعي
ضلّت طريقها إلي أستاذة اللغة الإنجليزية في مدرسة البنات
الأستاذة الساخنة التي تحمل توقيع الفرعون المصري
كنا نطرب للكنتها المسلسلاتية ونحن نتلصص علي حصة الأنقليزي المسائية
وتثير حنق سروالي وهي تتسكع ما بين السبورة
والكنبة الأخيرة
وساعتها كنت أتمني أن أكون من سكان خط 100 غرب الشهير وسط سكان الكنبة الأخيرة
تفاجأت بها في بيت خالتي وهي تهرِّب المنهج المدرسي ألي البيوت
تحت ستار الدروس الخصوصية
شعرت أن هذه التِكّة تخنق سروالي
وكنت أحتاج أن أتنفس!
و بدون سابق إنذار وجدتني من عشاق اللغة الإنقليزية
و أنا كلي شوق لتصفح هذا الدكشنري ! |
نواصل الحكي...
أستاذة اللغة الأنقليزية تتغلغل فيني ببطء
ولا أدري كيف واتتني الجرئة لكي أفكر فيها أبعد من هذا المنهج المدرسي
ولكنها أحست فيني نبوغاً في مادة تفهمها هي
لم أفكر في أن أفك تكّة سروال هذا الدكشنري الأنيق مطلقاً
ولكن المصادفة هي التي فعلت !
في ذلك المساء الموحش
و سقط يناير يقول يا غربتي
ويفعل ما يفعل في الجضوم والتلاليش
و أنا أتأبط الملاية الثقيلة معي و شقوق أرجلي يتخذها الضب سكناً و مأوي !
الديكشنري في مشواره اليومي إلي الداخلية
داخلية معلمات مدرسة البنات
المكان شديد الوحشة
بفعل شجيرات العشر المتفرقة
التي بفعل ظلمة هذا الليل
تظهر وكأنها أشباح مخيفة ...
نواصل ....
|
Post: #122
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-18-2009, 08:33 PM
Parent: #121
نواصل الحكي ....
الشوارع خلت إلا من نباح كلاب
وقمرة طفلة تئِنُّ في ضعف
وتطلب الحليب من سما لا يشبعولا يغني من جوع
الدكشنري فيما يبدوا كان خائفاً من هذه العتمة
فبدأ يقترب مني رويداً رويداً
وأنا مراهقتي لا تحتمل أنفاساً أكثر إلتصاقاً
من دكشنري بنوايا أستعمارية
فأظنها سكنتني بداعي الخوف
أو بفعلِ الوحشة
وكيفما أتفق
فلن أنسي أبداً تلك الحميمية المشتهاة
ولكن..
فيما يبدو ينبغي أن لا أكثر من تفاصيل هذا اليوم
مع أنه يحاصرني من زمن بعيد
آخر ما سمعتهُ من أخبار
أعتزل هذا الدكشنري المناهج المدرسية
وبدأ يتفرّغ لإنجاب صغار التلاميذ
و إلي إشعارٍ آخر
قد نواصل الحكي
|
Post: #120
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-16-2009, 02:49 PM
Parent: #99
*
|
Post: #123
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-23-2009, 02:39 AM
Parent: #120
وياما في الجراب يا حاوي
فقطن كونوا معنا
القحة ولا صمة الخشم
|
Post: #124
Title: Re: بخصوص قِلّة أدب ناس زمان .. وثيقة إتهام !!
Author: قاسم المهداوى
Date: 10-23-2009, 02:54 AM
Parent: #123
اولا ازيك
ومشتاقين
بخصوص قلة ادب ناس زمان ...
بخصوص قلة ادب كمنجات زمان برضو ؟؟؟
قاسم المهداوى
|
Post: #125
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-23-2009, 03:10 AM
Parent: #124
مهداوي
كمنجات وسط البلد
خليهن في الحرية
لكن نحن بنشجع جامايكا
وفي روايةٍ أخري فنزويلا
سيبك من المعبد البوذي يا عم
|
Post: #126
Title: Re: بخصوص قِلّة أدب ناس زمان .. وثيقة إتهام !!
Author: قاسم المهداوى
Date: 10-23-2009, 03:14 AM
Parent: #125
Quote: لكن نحن بنشجع جامايكا
وفي روايةٍ أخري فنزويلا
سيبك من المعبد البوذي يا عم |
يا ود نورة معزرة حبيب نورة
عارف انتا بقيت خطير و... كل المصطلحات الزوغانية
قاسم
هامش راجع الماسنجر
|
Post: #127
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 10-23-2009, 03:33 AM
Parent: #126
رجعنا المسينجر
وبرضو رجعنالك
وكيف نرفض رجوع القمري لي .....
|
Post: #128
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 11-02-2009, 11:39 PM
Parent: #127
غداً سأواصل الحكي
عن السراويل التي تعبت في حلحلة تِكّك أفكارها
فترقبوني ....
|
Post: #129
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 12-11-2009, 02:43 PM
Parent: #2
قلنا نرجع تاني للموضوع دة
|
Post: #130
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 12-11-2009, 03:49 PM
Parent: #129
هو الغريب عليكي شنو؟؟؟
تتسائل خالتي نعمة في إستنكار!
في ليلة دخلة نعمات بتها في زواجها الثاني عندما رأتها تتصنع الخجل
!!
والله صحي الغريب عليها شنو؟
أخاف أن أخدش حياءكم العام
و أبقي في نظركم حمور زيادة المفتري عليه
ولكن,,,
تمت كلفتت مراسم الزواج الغير معلن
إلا للأقارب
والجيران
و أهل الشمار والمشورة
نعمات عيارا فلت!!
عبارة كنت أسمعها في مجالس القهوة النهارية
والمشاط
وانا
وانا بسعل في روحي
يا ربي عيارا فلت يعني شنو؟
لحدي ما في يوم سمعت الخبر الأكيد!!
انتي يا عشة
نعمات بت خالتي نعمة دي
ما فضحتنا!!
قالوا لقوها في بيت العزابة!
بتسوي فوق شنو!!
المرا دى لازم نسترا الله لا غزا فيها بركة
وكان
تم عقد قرانها للمرة الثانية
وعرسا العوض الطويرة
و شيلوهو القفة كما يقولون دون أن يدري المسكين
...
بعد خمسة سنوات
وفي إطار جلسة نميمة ذكورية
سمعت أنوا حاج ناصر
شيلوهو قفة نعمات
بعد ما زرّوها في بيت آخر من بيوت العزابة
بعد طلاقها من العوض الطويرة بي ستة شهور!
|
Post: #131
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 12-11-2009, 03:58 PM
Parent: #130
بفضي و أديها نفضة
و أحكي ليكم عن قصة السريرة وحوة الطرشاء
علي فكرة
توجد تِكّة سروال
|
Post: #132
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 12-12-2009, 01:56 AM
Parent: #131
نرجع لحكاية السريرة
وحوة الطريشا
|
Post: #133
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 12-13-2009, 07:03 AM
Parent: #132
السريرة المجينينا
لم تكن تبالي أبداً
حوة الطريشا في الغرفة المجاورة تشغل حنكها بقرطاس تسالي
تسالي حاجة زينب
والزمن
عصراً قريب الغيبة
المكان
بيت حوة الطريشا
أو بيت الكل كما يحلو لسكان الفريق تسميته
العنقريب القابع في أقصي الغرفةكان يطقطق من ثقل النهزي
وحوة الطريشة سادة دي بي طينة
ودي ذاااتة بي طينة
أما أنا فقد كنت في جولة تفقدية
أقوم بها يومياً
مع إني حبوبتي التي كنت أساكنها
وأقاسمها حتي طنوب اللبن
التي تجود به معزتها الوحيدة
كانت تمنعني من الكواسة واللواصة
و
فجأةً
يا ربي دة شنو؟
دفرت الباب الخشبي القديم
لاجد السريرة
وقد حلّت تِكة الحياء
ولم تراعي حرمة البيت الذي كان لا يفرغ من الضيوف
إلا في اوقات نادرة
تماماً مثل هذا اليوم الذي كانت فيه الحلة مشغولة بسماية بدور
أقنعتني السريرة بورقة من فئة الخمسة جنيهات
حتي أكتم الخبر
وفعلاً
قبضت القروش
ولكن زاع الخبر وعم القري والحضر
ولكن كانت هذه نقطة ضعف
تمكنت من إستغلالها جيداً
في أيام مراهقتي الأولي
ويا لها من ورقة رابحة!!
|
Post: #134
Title: Re: بخصوص قِلّة أدب ناس زمان .. وثيقة إتهام !!
Author: الفاتح شلبي
Date: 12-13-2009, 10:41 AM
Parent: #133
حبيب نورة يا إبداع ياخي بقلة أدبك فضحتنا نحن ذاتنا
يحق لي أقول ليك " أدبسيس " Adubsees
|
Post: #135
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 12-13-2009, 04:57 PM
Parent: #134
الفاتح شلبي
تسلم يا حبيب
وفي الكثير من الحكاوي والطرف والمواقف الساعدت في تشكيل
حياة الكثيرين
وانا بنقلا بمنتهي الدقة والأمانة
تسلم كتير يا جميل
شكرن كتيرن!
|
Post: #136
Title: Re: بخصوص قِلّة أدب ناس زمان .. وثيقة إتهام !!
Author: الرفاعي عبدالعاطي حجر
Date: 12-13-2009, 05:20 PM
Parent: #1
> نتابع .
|
Post: #137
Title: Re: بخصوص قِلّة أدب ناس زمان .. وثيقة إتهام !!
Author: حبيب نورة
Date: 12-13-2009, 05:41 PM
Parent: #136
تسلم يا حبيب
خليك قريب
شكرن كتيرن!
|
|