يا خالتي نجاة إنتوا السنة دي ما خبزتوا ؟ لا دقيقنا قصّر ! أجي كيف ما خبزنا ؟ عاد لا خلينا بسكويت لا ناعم ! يقصِّر الملح يا يمة ! هو بالصّح العيد واقع جمعة ؟ لا ياخوي أظنهم بفطرونا مع ناس السعودية إنتي يا خالتي عليك الله مالكم ما خبزتوا ؟؟ هو آ جني خبيز شنو وجدّك حاج الطاهر دي أول سنة لي
ياااااه ! يا لهُ من رحيل ذلك الذي غافل جدي الطاهر ، وهو في عين حبوبة نصرة لسة صغير وجاهل ، لدرجة أنها كانت تُمنِّح بالقرع والسيف ساعة وفاته التي لم نكن نفهم ما تعني! وتكيلُ علي رأسها من هبُّود صاج العواسة في حسرة واللدايات ينظرن إليها شذراً وهي تعوسُ من جردلِ دموعها الفطيرة جردلين كسرة ! وتجولُ في الحوش الكبير مثل قرقريبة مطرطشة أثقل كاهلها كثرة عجين الحزن ، فظلت تردد مثل حجر طاحونة هجرتهُ الفتريتة فأخذ يصيحُ ملتاعاً :
الليلة يا مُرواد عماي ،،، الليلة يا عشاي
حاج الطاهر الذي لم يستأذنهُ عزرائيل مطلقاً ، ولكنهُ باغتهُ حين صلاة ، كإستدعاءٍ عاجلٍ من سلطةٍ علويةٍ لايوقة ! وكان بينهُ وبين عرس خالتي الصغري مسيرة خمستاشر صباح فأتسجم و أترمّد البيت الكبير حسرةً
أحيييي أحييي أحييييي ووووب علي لا عقدت لي ووووب علي لا ضبحت لي ووووب علي لا سلخت لي
خالتي الصغري تردح مولوِلة في الحوش و تفنجط كدحشة ديراوية مكلوفة و معلوفة ، وقد ألتصق بأرجلها المكتنزة بقايا دخان جادت به قريحة الحفرة التي كانت لا تستطيع الصبر علي سخونتها وهي محبوسةٌ للعرس ! فتفِرُّ منها نصف عارية غير عابئة بنظراتنا البريئة ونحن نشغلُ أفواهنا بقندول عيش ريف حار ، وخالتي نجاة تحاولُ أن تعيدها إلي جهنم الطلح وهي تقولُ في سخط: ها الغبيانة دي !!! صحي الما بتعرف تتدخّن بتحرق ميتينا !!! خالتي خالتي إتي ميتينا يعني شنو ؟؟؟ ياولد أمشي تمشي مكسّر ومحسّر !
أحيييي يا أبوي يا البتملآ العين و بتكفي الدين أحيييي يا المُتّ في صلاتك أحييي يا الهمّلت بناتك !!
نعم لم ينجو جدي الطاهر من كمين عزرائيل ، وتركنا نتحاوم في صيوان العزاء المنصوب في الفسحة الكبيرة في شبه عوارة و تبلُّد ! ماذلتُ أذكره وهو يجوبُ الأُفق مُصنقعـاً يُنقِّبُ عن الهلال باسطاً كفهُ اليسري علي جبهتهِ ، حتي تقيهُ لسعة شمس الأصيل! أت يا حاج النزير .. الشهر دة كبييير ،خلي بالك الناس ديل صوّمونا غلت ! يا الطاهر أت شن خبّرك ؟ يعني إت بتشوف أكتر من الحكومة ؟ ها زول ها علي اليمين الهلال الشافتوا عيني دة هلال يوميييين ؟ يقولها وهو يمعط لحيتهُ المعشكبة في عدم إكتراث ويبصق سفّة مدردمة ، وكأنهُ يقول : طّظ في الحكومة ،، الشهر دة كبييير الناس ديل خلّي بالك حسابهم فارق!!
لم أكن أعرف أن جدي الطاهر ذهب و أخذ معهُ معني العيد! إلا بعد أن تبدّلت جميع مظاهر الإحتفال في المنزل ، ورأيت خالتي نجاة وهي مخنوقة بالعبرة ! أنظر إليها و ألمح المغسة مكنكشة في عيونها التي تخشي أن تدركها دمعة فتسجد في تبروقـة البكاء ! فتدفس دموعها في الارض وتحثو عليه بعض تراب المقشاشة التي تطيب بها خاطر الحوش االمكشر عن ترابو الطيني الذي هجرته الرمال!! ولسة مكرفون الجامع الكبير يلعلع بقوة
الله أكبر ... الله أكبر .... الله أكبر لا إله إلا الله الله أكبر الله أكبر ولله الحمد
إتي يا خالتي نجاة ما خبزتوا وكمان مافي لقيمات نشرب بيه الشاي ؟
الله أكبر الله أكبر الله أكبر
مكرفون الجامع يترجم ما يدور في صدري غيري يعدوا بجلابيتهِ الفرطاقة الأسموكين ، وهو يستعجلُ المصليين حتي يحومُ جميع بيوت الحلة للمعايدة ! العيد مبارك عليكم ! علينا وعليكم إتبارك ، إنشاء الله القابلة عريس! بعضنا يا حسرة يستحم بدمعهِ ، ويسرِّح شعرهُ معطاً ونتفاً ، وهو ينزوي بلا جلابية فرطاقة أسموكين ، ولا قطعة حلوي أو كعكة تمنحُ نفسيتهُ البريئة حفنة عيدية ! لم أستطع تحمّل فكرة إرتداء جلابية العيد الفات ! فقد هريتُ لحمها في صلوات الجمعة وأعراس الحلة ! ولم أكن أفهم أن هنالك عيدٌ بلا عيد !! كل ما أعرفهُ عن العيد هو جلابية أسموكين فرطاقة وقطعة حلوي! ونحن ما خبزنا وكمان ما ودّوني لي شيخ الذاكي الترزي الوحيد في الحلة و مؤذن الجامع القدامي
الله أكبر الله أكبر الله أكبر لا إله إلا الله الله أكبر الله أكبر ولله الحمد
حزمة من الأعياد مرّت علي و أنا لم أرتدي جلابية أبي الفرطاقة الأسموكين ، ولا أدري كم أنفقت أمي من الدقيق لتصنع خبيزاً آكلهُ أنا ! كم عدد الريالات التي حصدها رفاقي وهم يجوبون طرقات الحلة وسكر الكعك يملأ خشومهم طفولةً و أعياداً ؟؟ تري كم عدد المرات التي عدت وانا بعيد عن طوطحانية عم فرج الله!! يا تري كم بالونة طرشقت في غيابي و أنا أفتقد توبيخ خالتي نجاة التي تخاف صوت طرشقة البالونات وهي تنتهرني: يا ولد عمي يعميك !! حزمة من الأعياد غادرتني و أمي تُسرفُ في الدعاء ولا رجوع .. ولكنها هل تدري أن العيد للبعيد وجع قلب ؟؟ هل تدري أننا نيمّم وجوهنا شطر الحائط ونحن ندسُّ البكاء من عيون الغربة التي أخترناها جبراً، وبدلاً عن المعايدة نطلق حمائم هواتفنا لنعزِّي أنفسنا في البعيد !
ولكن أين المفر ؟
يااااااه يا بلد
العيد مبارك عليكم
الله أكبر ... الله أكبر .... الله أكبر لا إله إلا الله الله أكبر الله أكبر ولله الحمد
ياااواد انت ولد "بارع"...تعرف كام وتلاتين سنة والعيد الفي البلد الكان زماااان رهاب رهاب .. العيد هنا اها الصلاة والخطبة يمكن للمسلمين من جنوب اسيا وهم الغالب في المسجد الذي اصلي فيه وترجع لتعيد علي الشوية الفي في البيت وبعديين هاااك موبايلات وزمان تلفونات شي كوالالمبور وشي ايطاليا وشي امريكا ويمة في الخرتووم وشي كايرو ووووووو بس ...
الغربة قطر بيقيف في محطة فترة طويلة لحد ما تتعود علي المحطة او يتخيل ليك انك اتعودت عليها وربما يغيب عنك مكانك الاصلي ولكنه يبقي ساكن جواك تسافر ليهو انت بطريقتك علي سرج خيالك وقت ما عايز ..التكييف مع المحطة ضروري لان العمر زمن ان راح ما بيرجع ...
عيدك مبارك وباكر اجمل ويمكنك انت تجعله دائما اجمل واجمل وخد جرعات منشطة بسفرك بخيالك الي مكانك الاصلي ..
Quote: الغربة قطر بيقيف في محطة فترة طويلة لحد ما تتعود علي المحطة او يتخيل ليك انك اتعودت عليها وربما يغيب عنك مكانك الاصلي ولكنه يبقي ساكن جواك تسافر ليهو انت بطريقتك علي سرج خيالك وقت ما عايز ..التكييف مع المحطة ضروري لان العمر زمن ان راح ما بيرجع ...
عيدك مبارك وباكر اجمل ويمكنك انت تجعله دائما اجمل واجمل وخد جرعات منشطة بسفرك بخيالك الي مكانك الاصلي ..
يااااااه يا أبو بكر
عليك الله كم صينية خبيز مرقت علي الفرن وانت بعيد ؟ كم شيّالة أتخاتفوها شفع الحلة ما شناة طبع
حبيب نورة ... ات يا ولد مجنون ؟ ده شنو البتسوى فيهو ده ؟ ذاكرة متقدة .. و حرف ينساق كما يراد للعامية ان تحضر و تتجلى ... احساس مرهف .. و فكر يتقد ليمزج بين الفرح و اللوعة و الحزن .. لولا انك مسخوت و بتجيب الهواء لى روحك بى جنس قولك :
Quote: حاج الطاهر الذي لم يستأذنهُ عزرائي مطلقاً ، ولكنهُ باغتهُ حين صلاة ، كإستدعاءٍ عاجلٍ من سلطةٍ علويةٍ لايوقة !
استغفر الله يا ولدى ... عليك النبى اكان ما عدلتها ما تمسخ علينا الكلام السمح ده ..
Quote: يا ولد مجنون ؟ ده شنو البتسوى فيهو ده ؟ ذاكرة متقدة .. و حرف ينساق كما يراد للعامية ان تحضر و تتجلى ... احساس مرهف .. و فكر يتقد ليمزج بين الفرح و اللوعة و الحزن
Post: #12 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-17-2009, 02:22 AM Parent: #11
up
Post: #13 Title: Re: خـالتي نجـاة ... السـنة دي خبزتوا ؟؟؟ Author: د.نجاة محمود Date: 09-17-2009, 02:36 AM Parent: #12
بالجد انت مسلط
بعد دا الا نتنازل عن المهر. بالطريقة دي حندفعليك..
رحم الله امواتنا وكل سنة وانت طيب
Post: #14 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-17-2009, 03:02 AM Parent: #13
Quote: بالجد انت مسلط
بعد دا الا نتنازل عن المهر. بالطريقة دي حندفعليك..
رحم الله امواتنا وكل سنة وانت طيب
الله يخليك لي كل سنة وانتي طيبة معليش بكتب بالماوس بجيكي صاد المهر بدفعوا تالت ومتلت بس رضاك علي
شكرن كتيرن!
Post: #15 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-17-2009, 06:33 AM Parent: #14
صحو الذكري المنسية!!!
Post: #16 Title: Re: خـالتي نجـاة ... السـنة دي خبزتوا ؟؟؟ Author: doma Date: 09-17-2009, 07:57 AM Parent: #15
ههههههههههها وحات ربي مسلط تصدق لي كم يوم بشم ريحه كعك امي الاتوسدت البارده قبل 39 سنه بالله شوفوا الزمن دا بجري كيف يا حليلنا كله جروره من عمرنا . حبيب نوره يا العشاء اب لبن وكت فيها دفع متلت ومربع ما ترقع حبوبتك دومه خالتك نجاه نسابتها يتطاقشوا
Post: #17 Title: Re: خـالتي نجـاة ... السـنة دي خبزتوا ؟؟؟ Author: هواري نمر Date: 09-17-2009, 08:39 AM Parent: #16
Quote: هل تدري أننا نيمّم وجوهنا شطر الحائط ونحن ندسُّ البكاء من عيون الغربة التي أخترناها جبراً، وبدلاً عن المعايدة نطلق حمائم هواتفنا لنعزِّي أنفسنا في البعيد !
ياااااااااااااااااااه بالغت مع الكتابة.. وعصرت علينا شديد.... ولكن؟؟ مرقت الفي قلوبنا ,كاتمنه و مندسي....
اقول شنو....بس؟؟
كل سنة و انتو طيب ولي كل الناس عيد مبارك..و ربنا يحقق الاماني.. ويديكم الصحة و العافية
ياحبيب نورة.... ياخي ليك مودة خاصة... يعلم الله
Post: #19 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-17-2009, 09:10 AM Parent: #17
Quote: ياحبيب نورة.... ياخي ليك مودة خاصة... يعلم الله
شدييييييد يا زول يا عسل كلامك فرحني
لو ما مشاق الكتابة بالماوس كان هترشت شويتين معاك
Post: #18 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-17-2009, 09:04 AM Parent: #16
Quote: ههههههههههها وحات ربي مسلط تصدق لي كم يوم بشم ريحه كعك امي الاتوسدت البارده قبل 39 سنه بالله شوفوا الزمن دا بجري كيف يا حليلنا كله جروره من عمرنا . حبيب نوره يا العشاء اب لبن وكت فيها دفع متلت ومربع ما ترقع حبوبتك دومه خالتك نجاه نسابتها يتطاقشوا
يا امي دومة وحياة ديني وايماني بموت فيك قبل الامن السوداني والله انتي احلي زولة في اشنا دنيا ربنا يخليك لي وانساء الله نتشاوف لكن برضو خالتي نجاة حاجزاني من زمن كنت شبل في سودانيز
زولة عزالة شدييييييد والعيد مبارك عليك !!
Post: #20 Title: Re: خـالتي نجـاة ... السـنة دي خبزتوا ؟؟؟ Author: doma Date: 09-17-2009, 09:29 AM
Quote: لكن برضو خالتي نجاة حاجزاني من زمن كنت شبل في سودانيز
زولة عزالة شدييييييد والعيد مبارك عليك
لوووول اها عاد كان كدي النصلح علاقتي مع دكين عشا البايتات . وعلينا وعليك يتبارك يا حبيب .
Post: #21 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-17-2009, 09:53 AM Parent: #20
امي دومة انساء الله تتعلي وما تتدلي غشوتين في اليوم !!
وحيدة صباح ووحيدة عشية انا الله رضيان علي اسفيريا الليلة علي اليمين كان ارضي عليكن الاتنين نسابةالسرور يا يمة
بس ياختي ما فيها خبيز عريس !!!
شكرن كتيرن!
Post: #22 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-17-2009, 10:34 AM Parent: #21
Quote: لم أكن أعرف أن جدي الطاهر ذهب و أخذ معهُ معني العيد! إلا بعد أن تبدّلت جميع مظاهر الإحتفال في المنزل ، ورأيت خالتي نجاة وهي مخنوقة بالعبرة !
شفته يا حبيب نوره .. جدك الطاهر ركن .. متين وانهده .. وطعم العيد .. يتحول .. وخالتك نجاة ..وووووووواجعه .. والقال بنسى كذاااب .. والفراق ..مر مر مر .. طعمه في حلقي ..
استعغر الله استغفر الله .. انشاء أمي .. واختي .. وجدك الطاهر .. وكل أمواتنا في صحبة حبيبنا ومصطفانا .. سيد الاولين والاخرين .. سيدنا محمد صلى الله عليه وسلم
Post: #24 Title: Re: خـالتي نجـاة ... السـنة دي خبزتوا ؟؟؟ Author: Kamal Karrar Date: 09-17-2009, 11:37 AM Parent: #23
حبيب نورة...
والله من تفيتنك في الواطة في البرفايل عرفتك من هناك...
آزول أنت حكايتك شنو؟؟
جارينا من آبري لكعك وبالعكس...
لكن بصراحة لقتك كتّاب (بالتاء) مش بالضاد...
حبيب نورة أقول ليك كلام...
كل سنة وأنت طيب... والسنة الجاية خبيز خالتك نجاة
إن شاء الله يكون بي مينينو!!!
تسلم يا أخي
Post: #25 Title: Re: خـالتي نجـاة ... السـنة دي خبزتوا ؟؟؟ Author: doma Date: 09-17-2009, 12:09 PM Parent: #24
العزيز ود الزينين والله شفت مداخلتك في بوست الجنا المسلط دا قلت ادخل ابارك ليكم العيد الوليدات وامهم والاهل كلهم علهم طيبين وبخير وعيدكم سعيد وترجوه لامين وتامين
Post: #28 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-18-2009, 03:06 AM Parent: #25
Quote: العزيز ود الزينين
أريدك أمي
الله يجبر بي خاترك ويديك الصحة وطولة العمر
الدعا البتدعاه ليك لو جلّي يحججك
تسلمي لي انا
Post: #35 Title: Re: خـالتي نجـاة ... السـنة دي خبزتوا ؟؟؟ Author: Kamal Karrar Date: 09-18-2009, 12:43 PM Parent: #25
Quote: شفته يا حبيب نوره .. جدك الطاهر ركن .. متين وانهده .. وطعم العيد .. يتحول .. وخالتك نجاة ..وووووووواجعه .. والقال بنسى كذاااب .. والفراق ..مر مر مر .. طعمه في حلقي
ربنا يصبرك يا زولة وربنا يجعل مثواهم الجنة
وعيد سعيد والسنة الجاية تتحقق كل أمنياتك
Post: #29 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-18-2009, 07:41 AM Parent: #26
Post: #30 Title: Re: خـالتي نجـاة ... السـنة دي خبزتوا ؟؟؟ Author: Marouf Sanad Date: 09-18-2009, 09:53 AM Parent: #29
Quote: ها زول ها علي اليمين الهلال الشافتوا عيني دة هلال يوميييين
وفي رواية اخرى ود يومين :)
ايدو موبارا ألينا أليكم
Post: #31 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-18-2009, 10:08 AM Parent: #30
يا معروف
ياخي تسلم والعيد مبارك عليك
بالرغم من الحزن الساكن فينا
علينا وعليك إتبارك
شكرن كتيرن!
Post: #32 Title: Re: خـالتي نجـاة ... السـنة دي خبزتوا ؟؟؟ Author: abubakr Date: 09-18-2009, 10:23 AM Parent: #31
يا حبيب .. وجودك في مصر يوفر لك بعض من طقوس العيد السوداني لو اتجهت الي الجنوب المصري.. يعني تسوييلك اصحاب نوبيين تركب معهم قطار العيد الاشهر في افريقيا والذي ينطلق من الاسكندرية ليصل اسوان قبل العيد .. وجودك في القاهرة يبعدك قرونا عن ذلك ...
Post: #33 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-18-2009, 10:37 AM Parent: #32
Quote: يا حبيب .. وجودك في مصر يوفر لك بعض من طقوس العيد السوداني لو اتجهت الي الجنوب المصري.. يعني تسوييلك اصحاب نوبيين تركب معهم قطار العيد الاشهر في افريقيا والذي ينطلق من الاسكندرية ليصل اسوان قبل العيد .. وجودك في القاهرة يبعدك قرونا عن ذلك ...
Post: #43 Title: Re: خـالتي نجـاة ... السـنة دي خبزتوا ؟؟؟ Author: Sidgi mattar Date: 09-20-2009, 00:21 AM Parent: #42
الحبيب حبيب
عيدك سعيد
يا زول اها ابشر بقسم معاك البسكويت دا
مودتى
Post: #44 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-20-2009, 00:27 AM Parent: #43
ياخ انشاء الله تسلم يا يا صدقي
علي اليمين انت أرجل منك يدوهو طلقة
كتر خيرك وبارك الله فيك ياخوي
شكرن كتيرن!
Post: #45 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-20-2009, 00:28 AM Parent: #44
وكمان يا صدقي ما برجعك ساهي
دي العيدية يا حبيب
Post: #46 Title: Re: خـالتي نجـاة ... السـنة دي خبزتوا ؟؟؟ Author: آدم صيام Date: 09-25-2009, 09:17 AM Parent: #45
Quote: يا الله يا أبو بكر العيد ياخ بقي يوم بشيل ليه هم
حليل العيد البفرّح قلب
هسة يمين بالله يوم العيد أكتر يوم الواحد ببكي فيه
يحرق ميتين الغربة ياخ
حبيب نورة يا أخي إنت كتابتك دي بوين لحلة فوق؟! بس الرهف الزيادة بسوي ليك غرغرينة غربة
عليك الله شوف كتابتك الرطيبة جابت أصدق مودة وأحلم تداعي:
Quote: بالجد انت مسلط
بعد دا الا نتنازل عن المهر. بالطريقة دي حندفعليك..
Quote: ههههههههههها وحات ربي مسلط تصدق لي كم يوم بشم ريحه كعك امي الاتوسدت البارده قبل 39 سنه بالله شوفوا الزمن دا بجري كيف يا حليلنا كله جروره من عمرنا . حبيب نوره يا العشاء اب لبن وكت فيها دفع متلت ومربع ما ترقع حبوبتك دومه خالتك نجاه نسابتها يتطاقشوا
كده خليني أعيد عليكم بجملة الإيمان!
Post: #47 Title: Re: خـالتي نجـاة ... السـنة دي خبزتوا ؟؟؟ Author: حبيب نورة Date: 09-25-2009, 10:18 AM Parent: #46