ميكائيل وخناس و أنا ونورة النسخة الهولندية!!

يا ود يا نورة مشِّط للبت جواك تسريحة النفس الطالع ونازل .... نازل وطالع ... زي مرجيحة ’’ ولمّة شفع يوم العيد ... حتة شوكولاتة بتملآ خشيمي طفولة .. بالونة تطرشق ودنيا تفرق لي حلمين ...
وكوراك يمة ... يا قاشرين يا قاشرين
تعال يا مخلقن تاني بتملا هدومك طين ... ولو ما الدنيا قبايل عيد...
كان الليلة تشوف يا خملة كلاماً شين !

الأخ نورة كانت بت أم لعاب حسب تصوري .
. مع أنو ربنا كان شايف أنها شتلة منقــة كاملة التطور!
كل زول حر فوق رأيو ! ...
نورة كانت بتغشي حلقي زي جغــمة برتكان ترطب حيرقان المسام ...
أكتشفت أنها بتخوني مع ( ميكائيل) عشان مرة لقيتوا بقشقش في خدينا بي منديل غيم
....! مع انو حافظ علي شرفا ...
لكن كنت بغير من المطرة عشان خايف ان يبلغ السيل الزّبي
وانا في زمن لايوجد فيه صانع المراكب نوح والذي صار فيما بعد نبيّــاً شهيراً !
جاتني ليك عقدة المطر وفوبيا الهطول ,,
ولما (ميكائيل) شعر أنو نورة قليبا معاي قرر أنو يخت الكورة واطـة
.. ويقضي بقية عمرو في غابة أستوائية ,, أنا بقيت أسرح مع القماري ...... ما أخير من المنفي الأختياري ؟؟

نورة دي كان كلمتكم وجع لذييييييذ .. بتوكل عليه في كل المواني
سافر معاي السند والهند مع أنو الشجن أحتواني
والحزن رماني في ظرف رسالة وكتب العنوان ( مثلث برمودا)
ألا الأمل كان بتشرنق من جديد ... مرات بحس بي آلام وضوع
تاريها عملت الطلق الأصطناعي عشان أتولد في عينيها (قاشرين ) تاني
حسب تصور يمة الأفتراضي لشافع ود حرام ...!

وابدا اراجع في الصور والسور ... نورة والقلم وطعم الحتة زمان يا ناس
وواحد يسأل ! لسة ما بقيتوا تلاتة ؟
كيفن عاد و (ميكو) رابط رحم غيمة أمل باكر
؟ كيفن نبقي والموية بقت تُشفط جيولوجياً والنخيل معدل وراثياً والبقرة هولندياً ...
والبني آدم هندسة جينات وفياجرا في معمل توليد ؟؟؟
انا حافظ سورة نورة لكن (ميكائيل) لازم يحفظ صورة الماعون ولازم ولازم

عشان نورة يرجع ضي وتتعملق الرؤيا في حلم سغمبروتي يشيل (قاشرين)
وكل الناس ... مسخوت ومستحمي في نيل حليب .. نورة حلابة اللبيني
فطمتني علي حلم مُبستر ! والممكن جدول دموع سريع الذوبان
علمتني الرضاعة الطبيعية من شرايينا !
مدّت علي الحبل السري ووهطتني رحم المنية ,, بس كان الحلم حلمين
وأمتد الجرح جرحين وقالوا فصالوا في عامين !
حال أتنين سمحين فاردين العشم ضواي لكن حجر الزمان ما بلين
يا نورة وين قاشرين؟ .

غبشة ومكندكة بي تراب طيبة ضمير
أو بعضِ من كل الحريق الكامن في حواس الزهرة
التي أكتواها أشتهاء القبل .
لما الرحيق مات في طريق موبؤ بأحذية السابلة الأغبياء
وكما يقول الأنبياء
أنثي تبشر بالخلاص
والذي رفع السماء عيناكي نارٌ من قصيد
فنقولُ ويحكِ !
كفاكي قوافياً
لتجيبَ شعراً .... هل من مذيد ؟؟؟

انا والنجم وخناس ونورة النسخة الهولندية
يتوسطنا براد شاي احمر يطبطب علي صداع كيفنا ببرمكية مضيافة ...
والمزاج الثانوي العالي يشوشر علي مؤشر اللحظة
بمحطات خارجية يبرطع أثير هترشاتها بجنكيزخان جديد ..
يعلن بشدة وضع أفكارنا تحت الأنتداب التتـاري

كلنا في الهم شرقُ ... خناس تبكي صخرا..
والنجم بعد ان كان ود حشا القمرة أصبح مصنع زخيرة
ونورة النسخة الهولندية بي وشها حاسدة وراصدة خايفة من أفكار هجين!
انا برضو نوراي مشروع نخلة ( فريزين) ! عشان كدة أتغابيت فيها العرفة
منو معاي يا خناس ؟
معاك نورة فان دار فار
أها يا فار أتدفق حار الوداك البلاد الواطية دي شنو ؟؟
قصدك الأراضي المنخفضة يا سجم , مشيت عشان جودة المراعي فيها
الله يستر عليك من بقارة لاهاي قالوا جنهم شكية !
انت صحي القالتوا فيك خنساء !؟؟
عليك الله خليني منها هي التانية ,,
قالوا ليك شدة ما مقلقصـة ومفلهمة لمن تجي تصحي الشفع الصباح من النوم بتقول ليهم :

قفا نبكي من ذكري سريرٍ ومرتبة
بسقط اللوي وشدُّوا الملايــــات المكركبة

آآآي يا أنت والليل كلو تكتب في الدوبيت لي صخر
أنا ؟؟؟ يبقي لي بي أمر قبض ومذكرة توقيف كان كتبت شي
وووب علي اللبن فار و أتدفق (أوكامبو) بطلقني قصدي راجلي !!

ثم عدنا ثلاثةٌ
أوصدنا باب الحلم بمفتاح أنقليزي .. خناس يأسرها ترباس من الدموع
والنجم يلفهُ ألف باب ٍ وباب ..
والولية أمستردام تركض ورا ( دون كيشوت ) من نوع آخر
يحطم بسيف من عشر كل طواحين الآمال الوهم
ومع ذلك أذكرحديثنا غربئذٍ ونحن نحلم بالوصول
رايكن شنو لو كل زول فينا أتكلم عن الشجن حسب منظورو؟

فلانات أمستردام قالت لي الشجن مجاعة وجدانية
أو حالة صيام نفسي في الغربة خصوصاً أذا كان صيام من غير سحور بي كاس حليب
بخليك شاعر بي أعراض فطام قسري من ثدي الوطن !
أها يا حليمة السعدية ! رأيك شنو في غربة المشاعر؟؟
قالت لي دي رضاعة بي البزازة أخير منها فك الريقة من أيد مربية فلبينية
سألت النجم والأسي فرد علي بفلسفة :
الشجن في الغربة حالة كسوف كلي للفرح !
اما خناس فقالت:
الشجن دمعات بسقن عيون حبان
الغربة زي سكين بطعن قفا الخلان
انشاء الله بكرة نعود نتلاقي في السودان
الدمعة في الغربة هي والجروح سيان

أما انا بري أنو الشجن أحساس (بَروس ) ما عارف جنسو الوجداني
بتختلط فيه أنساب المشاعر
مولود غير شرعي ... لكن بعترف بي أُبوَّتُـو ولا يحتاج الي أختبار
(الدي أن تي ) أو ما يعرف بالحامض النووي ..!

.

فتحي

أحيي تضامنك الصامت
مع نورة
النسخة الهولندي