Post: #1
Title: أم !!!
Author: حبيب نورة
Date: 05-06-2009, 06:58 PM
Parent: #0
الكلام أهداء لوالدة الأخ طارق المكي
ولي الحاجة زكية
ولي كل الأمهات
ـــــــــــ
بتمد الضو من بطن الليل ... بتخلي النيل طعموا السكر
ماعونك يمة حضور الغيم جايب المطرة!
شان فيكي الفال وحلم بكرة وفيكي السترة !
ماعون ساساق في الحلة ... ما بغرف ألا الزِّلة !
أتوكلي يمة علي الله ... أنشاء الله وليدك يتعلّي وما يتدلّي !
نفسي حنينك يبقي الغيمة .... يبقي مواسم فرحة جديدة
يشحد منك ضل القمرة وضي الزهرة
يطلب أيد النيل والنخلة... سبيطة و جدول ونشوة شجرة
يشاغل فيها النيل بي حنينوا و يغمز عينوا !
يقول يا يمة المركب وينوا ؟؟!
وين الضفة ؟ وين الموج الطاهر عفــة ؟
وينها غناوي الزمن الألفة؟!
يا نعناع الزمن الطيب معاه قرنفل وحبة قِرفة !
نفسك طعموا الليل السكر
وضحكة غيمة وقمراً يسطع شافلوا نجيمة
نفسك شوق النيل لي مركب ... حنين أمواجوا و لهفة شيمة !
و أنتي هناك ... بطلب برضو عفوك ورضاك
أريتني جناك ! ساعة قلية بُنّك بدري أريتني حداك
بطلب ليك الحج والجنة ...لما الليل الحالك جنَّ
وطارق..... يلقي الفال والحنة !!
يانا ولادك ونحن قصادك من تبينا
نحن بعادك بيه شقينا ..!
آآآه يا حسرة !!!
بطراك في حلة مفروكة وقرنين شطة و طرقة كسرة !
وبراد شاي في نص الحوش نتونس بيه مع القمرة !
بطراك في طلة علي الجيران
مرقة تربالي علي المسرة
بطراك في سجدة ومصلاية
شايفك في سورة وفي آية
شايفك في مقطع دوبيت شايفك في قدلة غناية
لمة حيران فوق نار قرآن
في لوح ومصاحف ودواية
شايفك شاية و شايفك راية!!!
ـــــ
ختاماً ربنا يديك الصحة والعافية
واللا أقول ليك
أسمحي لي أديكي الدعوة الحبيبو نورانية المستجابة
ربنا ينجيكي و يغطيكي و يخليكي و يهنيكي و يضاريكي و يعليكي وما يدليكي ومحل ماك دايرة يوديكي
|
Post: #2
Title: Re: أم !!!
Author: حبيب نورة
Date: 05-06-2009, 07:05 PM
Parent: #1
من بوست مرسل الي الحاجة زكية
تضامنا مع القضية وكدة
أتدفّق فوقي شوية شوق ....... ومرقت خطاي دافراني اللهفة ووجع
الاّهة الغربة الكربة.......... لداحة الهم الواصل الركبة.....
اصلوا الحال بطّال يا ناس ..... جاطتني مغايس زمن الترحال....
وما كضّبت ولا أتلفّتة....... كاسن عيني للباب الحنين!!!
وحلفت يمين ....... أغشي أقرب دكان اتصالات .... أضرب شوقين
للبلد الفيها النيل مترامي...... وجادع فوق جيدا مســاير عيش الريف
وصفق اللوبيا ......
البلد الزرعت فيها نجوم الليل جريد الضي فوق رمل الضلمة ... وزرعت
في الجرف الناهد....طين النور...
البلد الفيها النيل ضكران...... وفاتح بيت ضيفان المطرة ..بليلة وكسرة
وسترة حال....
كان في جيبي زي عشرة دقايق .... وشوقي حوالي تلتمية دولار
قالدت الحاجة .... ولحست رجول الفال أتبرّك .... وبعد ما شربت سلام
الشوق البكري!!! .... تاوق حلقي بفتّش طعم البركة وكيف الحال !!!
رذاذالدمعة الهم .....شرق السماعة ...ولون المر ياناس في لهاتي...
وسعلت الحاجــّةزكية ....من العيشة .... وناس الشارع...... رطل السكر ..
غنماية شايا ....وحاجة بتول مشــاطة الحلة الوداعية ....... فطور الشــّفع
وحق الحصــّة ال في العصــرية....
الحاجــّة اصلوا ما دســّت علي ..... قالت لي يا ولدي .... القريشات
ضايعات بين تزكرة البصات ..... وبين مسوح البنيات ..... اسكت ساهي
يا ولدي ......عــاد جـــوبــاك حــياة في الدايــــات !!!
جوباك حياة ...!!؟؟؟ دة شنو يا أمي الحاجة ؟؟ دة الزمن المـر ...اليوم
ما بسـر ... الديمة بضــر.... كر يا يمة....معقولة الايام بقت كدي ؟
قالت لي سجم خشــمك يا الغبيان .... كدي تعال السودان وشوف الحاصل
أندست دمعة ومرقت تاني.... وفاتت لوعة وجات تتقدّل في عبراتي...
فتحت شرفة حزنك مشهد...شفت النيل الازرق بنزف...وجـــوة الابيض
لون الدم الاحمر مركب....من غير مجداف سايقاهُ الشيمة...وبطن النيل
حامل بي الحرام...كيفن تلد الموجة الاخضر....البلد الطيب يا ناس مات
شكل الغصــّة وطعم المأساة.....................وزي ما قالت حاجة زكية
عاد جــوباك حـــياة....في الدايـــــات!!
|
Post: #3
Title: Re: أم !!!
Author: baha eassa
Date: 05-06-2009, 07:31 PM
Parent: #2
Quote: جوباك حياة ...!!؟؟؟ دة شنو يا أمي الحاجة ؟؟ دة الزمن المـر ...اليوم
ما بسـر ... الديمة بضــر.... كر يا يمة....معقولة الايام بقت كدي ؟
قالت لي سجم خشــمك يا الغبيان .... كدي تعال السودان وشوف الحاصل
أندست دمعة ومرقت تاني.... وفاتت لوعة وجات تتقدّل في عبراتي...
فتحت شرفة حزنك مشهد...شفت النيل الازرق بنزف...وجـــوة الابيض
لون الدم الاحمر مركب....من غير مجداف سايقاهُ الشيمة...وبطن النيل
حامل بي الحرام...كيفن تلد الموجة الاخضر....البلد الطيب يا ناس مات
شكل الغصــّة وطعم المأساة.....................وزي ما قالت حاجة زكية
عاد جــوباك حـــياة....في الدايـــــات!! |
بمبن انت مبدع شديد .. ماشاء الله
|
Post: #4
Title: Re: أم !!!
Author: ناجية مصطفى
Date: 05-06-2009, 09:27 PM
Parent: #3
الكلام أهداء لوالدة الأخ طارق المكي
ولي الحاجة زكية
ولي كل الأمهات
الولد الغالى حبيب نورة
وحبيبى أنا, وحبيب حاجة زكية , وحبيب كل الناس
إنشاء الله ربنا يغطيك ويخليك ويضاريك ويعليك ما يدليك مع نورة يهنيك
وكل الدايرو يسهلو ليك ... . وربنا يخلى ليك الحاجة زكية ويخليك ليها
أمين يارب العالمين
لك خالص الود وعظيم الأشواق
|
Post: #6
Title: Re: أم !!!
Author: حبيب نورة
Date: 05-06-2009, 10:19 PM
Parent: #4
أمي!
شهيقاً وزفير
مبتدأ وخبر
ونسمة حنين تتحدي أعصاري!
الأمومة أحساس جواي شارب من نيلك
منديلك
قشقش دمعة
وصادر وجعة
وخلاني أغنيلك!
بناديلك؟؟
لا بنده ليك!
Quote: وحبيبى أنا, وحبيب حاجة زكية , وحبيب كل الناس
إنشاء الله ربنا يغطيك ويخليك ويضاريك ويعليك ما يدليك مع نورة يهنيك
وكل الدايرو يسهلو ليك ... . وربنا يخلى ليك الحاجة زكية ويخليك ليها
|
ربنا يسمع منك
ويديك الفي مرادك
دعوة من قلب أبيض
انشاء الله من خشمك لي باب السماء
|
Post: #5
Title: Re: أم !!!
Author: حبيب نورة
Date: 05-06-2009, 10:12 PM
Parent: #3
بهاء عيسي
ياخي ربنا يديك العافية
ويخلي ليك كل عزيز علي قلبك
|
Post: #7
Title: Re: أم !!!
Author: حبيب نورة
Date: 05-06-2009, 11:25 PM
Parent: #5
ينجيني من جور الزمان
...........!!
|
Post: #8
Title: Re: أم !!!
Author: tarig almakki
Date: 05-07-2009, 07:01 AM
Parent: #7
أخوي
إذيك وكيف الحال ؟
إنشالله طيب .. بتمناك بي خير
وصحة وعافية وهنا
كل السمح ليك .. آمين
لغاية هسي ما عارف أرد بي شنو
لكن شكراً لي أمي ذكية العلمتك تكون ناجية بهذه المحبة
وعلمتك تكون أخوي بكل الجمال اللفاني هنا ده
محبه وريد لذكية وإنت
زوادة محبة تكفيك لرحة حول المطلق
الشي الأنا عارفو
إني لازم أستوطن هنا
في هذا البوست الجهجاه
وأحاول
|
Post: #9
Title: Re: أم !!!
Author: حبيب نورة
Date: 05-08-2009, 00:22 AM
Parent: #8
ود أمي !
....!!
أو تلك التي أدعوها بعض أقوالي أمام الله
ولسان الحال بقول
مصابيح السما السابع عميانة في ضجـّة ضلام خوفك ... سجين في بعدك بعاني شقايا مع لوعة قليب بكـّاي وآآآه من زول بقاسي هناك بفتش ليكا يا راحل و آه من قسوة الأسفار و ظلم المرسي و الساحل و آآه من روح بكت حسرة و لسة تغني و تجامل.....
| Quote: لكن شكراً لي أمي ذكية العلمتك تكون ناجية بهذه المحبة |
ودة الكلام البجيب حيرقان الروح
وفي نفس الوقت
بداوي الخاطر المجروح
تعال كل يوم نجي نقول كلمتين
والجنة تحت أقدام الأمهات!
|
Post: #10
Title: Re: أم !!!
Author: حبيب نورة
Date: 05-08-2009, 08:27 PM
Parent: #9
سنعود!!
|
Post: #11
Title: Re: أم !!!
Author: tarig almakki
Date: 05-09-2009, 08:34 AM
Parent: #10
عدنا
من بوست سابق في الربع الثالث للعام 2008 بعنوان الأم
يا ذات الأسماء الحسنى
علني أحصيهاإسماً إسما
الأم , الحنون , الرؤوم , العطوفة , الحبيبة , الجميلة , الطيبة , القلقة , الأنيسة , الودودة , الدافئة , العالمة , اللطيفة , العفيفة , الشريفة , الطاهرة , الوديعة , الشفوقة , الكريمة , الحانية , الشامخة , المعتدة , الصلبة , المساهرة , المرحة , الفاضلة , الرائعة , الشفيفة , العزيزة , الإنسانة , الملهمة , اليانعة , الواهبة , المتفهمة , المرضعة , المطبطبة , ذات الحس الصادق , الراضية , المؤمنة , الحامية , المحتملة , المنصفة .............
إلا كل أم بدءاً بالأم التي في كل مساحاتي
ناجية بت مصطفى
تلكم التي أرهقت أكثر مما أرحت
وأغضبت أكثر مما أرضيت
ولا ذالت ترضيني ولا تغضبني
وتريحني ولا تتعبني
أتمناك بكل خير يا أم
أتمناك كما يحب الله لعبادة الصالحين أهل الجنة أن يكونوا
دومي بخير يا أم فأنا لا طاقة لكلماتي بوصفك
أعف عني وأرضي عني وأبقاك الله لأسعدك ولتدعي لي
أحبك
وللسيرة بقية
والأمومة باقية إلى أن يرث الله الأرض وما عليها
|
Post: #12
Title: Re: أم !!!
Author: عواطف ادريس اسماعيل
Date: 05-09-2009, 01:33 PM
Parent: #11
ست الحبايب يا حبيبة
يا حنينة وكلك طيبة
يا رب يخليكي يا أمي ..
زمن سهرتي وتعبتي ليالي
ولسة برضه دلوقتي
بتشيلي الهم بدالي
أنام وتسهري وتباتي تفكري
وتصحي من الآذان وتيجي تشقري
يارب يخليكي يا أمي
ست الحبايب يا حبيبة ..
|
Post: #14
Title: Re: أم !!!
Author: حبيب نورة
Date: 05-09-2009, 06:26 PM
Parent: #12
توووووووففففففي
ربنا يخليها ليك
قولي آمين
علي فكرة
قاعدة تغتسي وين
مع بلة؟؟؟!
|
Post: #13
Title: Re: أم !!!
Author: حبيب نورة
Date: 05-09-2009, 06:23 PM
Parent: #11
ودأمي
Quote: الأم , الحنون , الرؤوم , العطوفة , الحبيبة , الجميلة , الطيبة , القلقة , الأنيسة , الودودة , الدافئة , العالمة , اللطيفة , العفيفة , الشريفة , الطاهرة , الوديعة , الشفوقة , الكريمة , الحانية , الشامخة , المعتدة , الصلبة , المساهرة , المرحة , الفاضلة , الرائعة , الشفيفة , العزيزة , الإنسانة , الملهمة , اليانعة , الواهبة , المتفهمة , المرضعة , المطبطبة , ذات الحس الصادق , الراضية , المؤمنة , الحامية , المحتملة , المنصفة .............
|
عليك الله بعد دة في كلام؟
ولا كلمة!!!
|
Post: #15
Title: Re: أم !!!
Author: الق هاشم
Date: 05-09-2009, 07:27 PM
Parent: #13
اولا عذرا ...............
لم اري هذا البوست من قبل..........
عذرا حتي افيق من حبك حبيبتنا وغاليتنا الحاجه زكيه...
ومعزتك لم اري هذا البوست من قبل..
عذرا قبله ارسلها تطرز جبينك المزدان بالوقار والصلاة ...
اقبلك واستفيض معزة في قلبي لك يا حبيبه..
احبك وانتي تعلمين يا حنينه..
|
Post: #16
Title: Re: أم !!!
Author: حبيب نورة
Date: 05-09-2009, 11:05 PM
Parent: #15
ألق الجميلة
Quote: اولا عذرا ...............
لم اري هذا البوست من قبل..........
عذرا حتي افيق من حبك حبيبتنا وغاليتنا الحاجه زكيه...
ومعزتك لم اري هذا البوست من قبل..
عذرا قبله ارسلها تطرز جبينك المزدان بالوقار والصلاة ...
اقبلك واستفيض معزة في قلبي لك يا حبيبه..
احبك وانتي تعلمين يا حنينه..
|
الكلام دة مكانوا علييين
أحبك حتي مطلع الأمر
رجاءاً صليني!!!
|
Post: #17
Title: Re: أم !!!
Author: حبيب نورة
Date: 05-10-2009, 07:25 PM
Parent: #16
ألي جميع الأمهات
.........
منتهي العرفان
|
Post: #18
Title: Re: أم !!!
Author: ابو جهينة
Date: 05-10-2009, 07:44 PM
Parent: #17
Quote: نفسي حنينك يبقي الغيمة .... يبقي مواسم فرحة جديدة
يشحد منك ضل القمرة وضي الزهرة
يطلب أيد النيل والنخلة... سبيطة و جدول ونشوة شجرة
يشاغل فيها النيل بي حنينوا و يغمز عينوا !
يقول يا يمة المركب وينوا ؟؟!
وين الضفة ؟ وين الموج الطاهر عفــة ؟
وينها غناوي الزمن الألفة؟!
يا نعناع الزمن الطيب معاه قرنفل وحبة قِرفة ! |
دعوات كل الأمهات الطيبة لك
|
Post: #19
Title: Re: أم !!!
Author: حبيب نورة
Date: 05-10-2009, 07:52 PM
Parent: #18
أبو جهينة يا حبيب
شكرن كتيرن
فقط شاهدوا المقطع ...
مقطع جميل
شكرن كتيرن!
|
Post: #21
Title: Re: أم !!!
Author: حبيب نورة
Date: 05-10-2009, 08:15 PM
Parent: #20
تسلم يا عمران
أنا كلي ليك يا حبيب
وبغشاك بيهناك
|
Post: #22
Title: Re: أم !!!
Author: حبيب نورة
Date: 05-29-2009, 09:38 PM
Parent: #21
طارق المكي
بت الشيخ
وامنا
سلام
|
Post: #23
Title: Re: أم !!!
Author: Siddig A. Omer
Date: 05-29-2009, 10:00 PM
Parent: #22
أذكر فى بداية العام 1974....."طبعاً" الزمن "داك" ما كنتم..... اتذكر أخى التشكيلى الفنان لقمان عبد الله دفع الله.... ونحن زوابغ....نتلمس حياتنا القادمة....ترعانا عيون الرحمن و عيون والدته.... وتغمرنا "بكعكة" فوز الهلال على المريخ... وكنت هلالابى و لقمان مريخابى "قح" و اظنه الى الآن....و قد زينتها بشعار الهلال....
سألتها: يا والدة .......بجهل الطفل...."لكن لقمان دها ما ولدك"....قالت لى " ما أنت ذاتك ولدى"......
من يومها لم ارى الا أم لقمان فى كل أم....
لك الحب و الاحترام والتقدير....مقأل يستحق الوقفة عنده كما عودتنا دائماً.... يا عزيز....لك التقدم......أمنية...طيبة من القلب.....
صديق- الدوحة
|
Post: #24
Title: Re: أم !!!
Author: رغيم عثمان رغيم الحسن
Date: 05-30-2009, 00:58 AM
Parent: #23
حبيب نوره تسلم بوست موفق جدا جدا جدا جدا
وربنا ينولنا جميعا رضا الوالدين ويحفظم من كل شر
رغيم ولد فتحية
|
Post: #26
Title: Re: أم !!!
Author: حبيب نورة
Date: 05-31-2009, 02:12 AM
Parent: #24
رغيم يا زول يا طيب
ربنا يسلمك
ويخلي لينا أمنا فتحية
ويديك الفي مرادك
شكرن كتيرن!
|
Post: #25
Title: Re: أم !!!
Author: حبيب نورة
Date: 05-31-2009, 01:53 AM
Parent: #23
صديق
Quote: سألتها: يا والدة .......بجهل الطفل...."لكن لقمان دها ما ولدك"....قالت لى " ما أنت ذاتك ولدى"......
من يومها لم ارى الا أم لقمان فى كل أم....
|
آآآآآآآآي يا صديق
المحنة
المحنة هي البتجر الواحد
وين ما كان
انا تربية حبوبات
أتعودنا نقول لي أيي أم زول قريب مننا
أو زول بنعزو
او زول ساكت
فوق الله
نقول يا أمي
يمة
عليك الله شوف كمية المحنة دي؟؟
ونحن ذاتو دايرين أكتر من كدة شنو؟؟؟
|
Post: #27
Title: Re: أم !!!
Author: حبيب نورة
Date: 06-24-2009, 10:43 PM
Parent: #25
أم !!!
|
Post: #28
Title: Re: أم !!!
Author: سارة كرودى
Date: 06-25-2009, 12:50 PM
حبيب نورة سلام .. ..
ربنا يخلى ليك والدتك ونوره وله هم حاجه واحده ..
ونهدى الاغنية من خلالك لى كل ام .. ..
يايمة يافيض الحنان الماكمل
يايمة يابدرى السبع دايما يهل
يايمة يانور الصباح وقتين يطل
يايمة يابحر الموده وقتين يفيض
يايمة ياشعلة امل زادت وميض
يايمة يانغما حنين بالشوق يرن
اتذكرك يايمة فى الدغش النسايمو يهبهبن
قايمه الصباح متكفكفى شايلى الحليله على المراح
يايمة رسلى لى عفوكى ينجينى من جور الزمان .. ..
كن بخير .. ..
|
Post: #29
Title: Re: أم !!!
Author: حبيب نورة
Date: 06-26-2009, 01:06 AM
Parent: #28
سرورة
ياخي تسلمي
وتشكري علي الكلام الحنين دة
أم!!!
كدي أتأملي في الكلمة دي
و أبكي!!
علي سدر حنين
يا روعة كلماتك
ألف شكر!
|
Post: #30
Title: Re: أم !!!
Author: محمد سنى دفع الله
Date: 06-26-2009, 06:04 AM
Parent: #29
لي حق الدخول
فكل ام ذكرت هنا
هي امي
وامي ستونا بت سلمان عاشة فيكم
كلكم اولادها
|
Post: #31
Title: Re: أم !!!
Author: حبيب نورة
Date: 06-28-2009, 05:26 AM
Parent: #30
السني
تسلم
وربنا يرحم الحاجة
والله فعلاً أمنا
وما تنساها من صالح الدعاء
انشاء الله الجنة عِدل
|
|