Post: #1
Title: في مدينة جدة كـبشـــــور أهم من الســفير زاتو ( هاجر كباشي وقدورة في جدة)
Author: حبيب نورة
Date: 03-24-2004, 05:01 AM
في سهرة جداوية رائعة .... أستمتعت فيها كثيراً ووجدت نفسي اعود للسودان بدون تأشيرة ولا غشوة للمطار
وكانت بمناسبة ختان ابناء أحد أصدقائي وأحيا الليلة الفنان الاول للجالية التشادية والسودانيين في المملكة العربية
السعودية متوكل كبشور والفنانة الصاعدة هاجر كباشي و نجم الشباب عبد القادر الشهير بي قدورة........
و انا بأعتباري واحد من الطيور المهاجرة أجد نفسي محتاج كتير لمثل هذه الليالي السودانية ... لانها بتجدد دماء الانتماء
للبلد والناس والحياة السودانية .... و الملاحظ لطريقة التعايش في السعودية بلقي انو في شوية كبت ملموس...لكن بالنسبة للسودانيين عموماً و الذين يعيشون في مدينة جدة بصفة خاصة في شوية تجاوز للحتة دي...و زي ما بقولوا جدة غير.. يعني بتختلف
عن بقية المدن السعودية...
اما بالنسبة لأوجه الختلاف بتتمركز في هامش الحرية والنشاطات الفنية
والاجتماعية والسياحية ومن هنا أحاول لملمة موضوعي.
قبل فترة كنت في حفل زفاف كريمة القنصل التشادي في جدة واكتر حاجة كانت بتدفعني للذهاب حب استطلاع فطري وميل للتنقيب داخل
حاجات الشعب التشادي الاقرب لنا كسودانيين في كثير من المعتقدات و
العادات والتقاليد ... اول حاجة لفتت نظري انو التشاديين بسمعوا فقط
الغناء السوداني لو حبينا نتناسي الثقافة الفرنكفونية الفرنسية.. يعني
وانت داخل بيت تشادي بتلقي سيد خليفة و ابراهيم عوض ومحمود عبد
العزيز وعاطف السماني وهاجر كباشي... لكن هنا في المملكة وجدت
ان المطرب الشاب كبشور هو الاشهر والاكثر جمهوراً يعني ممكن
تلقي مليون تشادي ما بعرف وزير الثقافة في بلدوا لكن ما بتلقي واحد
ما بعرف كبشور... يعني هو الكل في الكل....
قابلت الاخ الفنان ( كبشــة) كما يحلو لمعجبيه... وسألته عن الكثير و
أبرز ردوده في نقاط كانت هي اهم ما تحصلت عليه .. وهو بيري
انو الناس عايشة هموم كتيرة جداً ومحتاجة لي جرعات سودانية كل فترة عشان ما تحس بي الغربة ومشاكل الاغتراب.. وانا حسيت انو
واثق من نفسوا شديد ..غير كدة عارف هو بعمل في شنو وعايز شنو
وبقدم في شنو.. وبقول أيوة الفن في السودان بختلف شديد عن الفن هنا
بمعني انو انا كشاب محتاج لي غناء يرجعني لي البلد واكتر حاجة بتخلي السوداني يفكر في بلدوا الغناء بالطريقة دي لاننا كلنا بنحب
الحاجات البتزكرنا مهيرة وعشة وفاطنة... وانا شايف نجاح العمل
الذي اقوم به من خلال اعداد الناس في حفلاتي العامة والاسرية...
قلت له... ممكن يكون نجاحك جايي من خلال حضورك المسرحي و
ايضاً من خلال الرقصات التي تقدمها.. ورد علي قائلاً بالتاكيد حكاية
الرقص في المسرح دي مهمة وانا بعتبرها ملح العمل الفني والجمهور
عايز كدة.
احترمت رأيو وما بقدر اقول حاجة اكتر من كدة..ممكن اكون ضد
نوعية الغناء دة وممكن تكون جواي شوية عدوانية تجاه الطريقة دي
لكن في النهاية يبقي احترام الاخر مفروض علي الجميع....
المطربة هاجر كباشي وقدورة قدرت اطلع منهم بي نفس الفهم تقريباً
مع اختلافات بسيطة ... لانو هاجر أنثي و بتغني زيها و زي ايي بنت
في السودان.. و قدرت تعمل قاعدة كبيرة و أرتفعت اسعار أرتباطاتها
وحفلاتها.. وللعلم هي حالياً في المملكة لأحياء حفل زواج احد السودانيين في مدينة وجدة وقد يطيب لها المقام وتمكث قليلاً هنالك...
وخلاصة الموضوع انو لكل أنسان طريقة ولونية خاصة يقوم بأنتهاجها
في الحياة.. قد تنجح هذه الطريقة.. وقد تفشل.. وفي النهاية يبقي المتلقي
هو سيد الموقف المعني بالأمر..ولن نستطيع ان نفرض ذوقنا علي انسان... ولو لا اختلاف الاذواق لبارت السلع كما نعلم...
وقبل الختام أحب أن ألقي الضؤ علي اّراء بعض جمهور الحفلة
وعندما سألت ( ابو معزة) قال انو كبشور يعتبر من معالم مدينة جدة
بالنسبة للسودانيين!!! أما ( مجدي) صاحب الثلاثين عاماً والغير متزوج فقد قال لي: والله كبشور دة انت مستهون بيه لكن انا في نظري
هو اهم من القنصل والسفير زاتو!! علي الاقل هو بقدر يرجعك السودان... هسة تمشي السفارة يشبكوك ضرائب وزكاة ودمغة جريح
يكرهوك في السودان زاتو.....
أما (نوال) فقد قالت لي : هسة عليك الله الغنا دة مالوا؟؟
و ( عبد الرحيم) فقد قال لي غاضباً: بالله عليك الله هسة دة مستوي
والله الواحد لو ما خايف من اللوم ما يجي حفلة فيها الناس ديل ويا
حليل عشة الفلاتية والكاشف وابراهيم العبادي..وووووو....
ونشوف رايكم شنو!!!!
|
Post: #2
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-24-2004, 06:04 AM
Parent: #1
واحد قال لي في الخاص انت بتعمل في دعاية لي كبشور
اللهم لا تصيبنا ولا تقطع نصيبنا
هو محتاج لي دعاية مني
|
Post: #4
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: د.كرار التهامي
Date: 03-24-2004, 06:30 AM
Parent: #2
حبيب الحبيب
ارسل لنا الشريط لاجراء الفحص الذوقى ...علماء الطب البديل قالوا الموسيقى ترفع مستوى المناعة فى الجسم وتقلل من تواتر الاحماض الامينية التى تهرش شرايين الناس المهمومين (روحوا عن انفسكم ساعة بعد ساعة فأنها تصدا كما يصدا الحديد) ومؤكد الواحد لمايطلع من عتالة البورد ورفع الاثقال الفكرية محتاج لساعة راحة مع كبشور حتى لو كان فى العصر مروره
تحياتى
|
Post: #6
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-24-2004, 06:54 AM
Parent: #4
يا دكتور عليك الله شريط شنو
ما قلنا ليك الفلاني دة بمر بي مرحلة نقاهة وكدة
يا كافي البلا انت لا قريت لا باريت؟
لكن يا زول الكلام الكبار كبار دة بتجيب فيه من وين؟
تتجازي عديل كدة
اما بالنسبة للبتاعة
الليلة وين البي العصر مرورو
هسة عليك الله في مرور العصر المرور كلو من صباح الرحمن
|
Post: #3
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: Soumeta
Date: 03-24-2004, 06:21 AM
Parent: #1
وألله أنا إطرشني بي كبشور ده يا حبيب نورة،،
نحن هنا ناس سامي ساي يعني علي حسب وصفك ما فرق كتير من كبشور و إمكن إكون مطابق لي هاجر كباشي،، أخو قدورة ود أمو و أبو،،لوول،، لكن بس ياهو زي ما قلت البلد واسعه و المغناواتيه المطلوبين ما كتار ،، و أقصد بالمغناواتيه المطلوبين ناس،،
العربيه و قلبا بيّ العربية،، و مرقت حية،، أفعي،،
قلبا يمين العربيه،، و قلبا شمال،،
و ناس،،
حنانه والنسي أهلو ما نسانا،،،
حنانه و الناس دي ماله هاجرانا،،
حنانه صفقتكم مالا تعبانه،،،
دق الباب بي شده وجريت لي مستعده،،
كنت قايلو حبيبي لقيتو سيد العده،،
لكن خليني أجي أمسك المايك و أغني ،، جن ليلي و هاجت أعراضي،، وألله ما يجوني إلا في الحالات الإنعداميه للمغنواتيه الكبار،، ناس حنانه،،
كدي لو أمكن نزل حاجه لي كبشور ده نسمعو لي الدنيا و الزمان،،
سوميتا
|
Post: #7
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-24-2004, 06:58 AM
Parent: #3
سوميتا معقولة بس
ياخي الراجل دة مشهور جدا
خسوساً في الاوساط الشبابية
ياخي دة يوسف عبد الفتاح كان
ما عندو شغلة غيروا
مباريهو من حفلة لي حفلة
يصادر الساوند ويرفع العدة
لكن الاغنية ما شرط والله
حنانا النسي اهلوا من نسانا الليل
دقّ الباب بي شدّة وانا جريت مستعدة
قايلاهوا محبوبي لقيتوا سيد العدة
والنبق النبق النبق
هههههههههههههههه
اها عليك الله شوفي جنس الكلام دة
كلام سمح خلاص وبجسد الواقعية في
السريالية وهكذا يعني
|
Post: #16
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: Soumeta
Date: 03-25-2004, 05:15 AM
Parent: #7
أها أنا لسع فاتحه خشمي و حارسه أسمع كبشور،،
بلاي هو كان في وزير إسمو كبشور؟ كان كده أنا رايح لي كلو،،
و يا حبيب نورة كان عندك لي كبشور غنية فوق فوق فوق ،، إكون تمام معاي قالو الرذم الفي الغنيه دي بيثبت للشباب إذا كان الفنان مقتدر ولا لأ،،،و تاني برضو قالو ،، قلبا،،قلبا،،قلبا،،قلبا،،
عدلا،،عدلا،،عدلا،، عدلا،،
ما عارفه لو أنا كتبت الرقم المطلوب بيهو تكرار الكلمه ولي لأ لكن بس محاوله تشبب،،
يالا سريع أنا حارساك من أُمبارح،،
سوميتا
|
Post: #17
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-26-2004, 03:06 AM
Parent: #16
سوميتا كيفنك... عليك الله من امبارح حارساني
والله عاد جنس شمار عليك... عارفة انا كنت
منتظر الزول دة يوفي بي وعدوا ويعمل القعدة
الكاربة وللمعلومية جاية معاه هاجر كباشي
والشغلانة زي اسرية كدة يعني مافي طريقة للضهب
برانا ومن غير شوشرة وساوند وبعديها انا بسجل
ليك اغنية بمرافقة الباقة والجردل وانشاء الله
حيعجبك الاداء وجهزي نفسك الطرب ماشي عليك
|
Post: #22
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: Soumeta
Date: 03-27-2004, 05:54 AM
Parent: #17
sre3 wala b7rad,,,
khlaas ma dayra zato 
ma kbashor ma kolo ma hajir kabashi zata..
bas
soumeta
|
Post: #21
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-26-2004, 06:14 AM
Parent: #16
حارساني وين هسة
وانا لي سنة منتظرك
|
Post: #5
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: سجيمان
Date: 03-24-2004, 06:43 AM
Parent: #1
حبيب نورة
انت كبشور دا مش كان وزير؟.....لا حول الله.... طوالي جا عمل فيها فنان في جدة؟...والله غايتو جنس سلبطة
|
Post: #8
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-24-2004, 07:01 AM
Parent: #5
لوووووووووووووووووووووول
شكيناك علي الله يا سجيمان
يا عمووووووو انا ما قلت ليك من زمان
انت خلاس خرفت و انتهيت
هسة جايي تقول لي كبشور الوزير
ياخي دة حاجة تانية خالس
يعني ممكن تعتبروا أمبراتور أديل كدة
|
Post: #9
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: سجيمان
Date: 03-24-2004, 07:06 AM
Parent: #8
حبيب نورة
Quote:
يعني ممكن تعتبروا أمبراتور أديل كدة |
و..... رقوهو كمااااااااان؟
|
Post: #10
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-24-2004, 07:09 AM
Parent: #9
هههههههههههههههههههههههه أأأأأأأأأأأأي ياخ
والله غير الخرف العليك كمان ماك متابع التعديلات
الوزارية ؟؟ استغفرتك يا مالك روحي
ياخي دة هسة مندوب السودان السامي في مجلس الفن
في الرديف...اها دي كا تقول لي ما عارفة
عاد تكون باااااااااااااالغت وشذّيت أديل كدة
|
Post: #11
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: Al-Shaygi
Date: 03-24-2004, 07:24 AM
Parent: #1
والله فعلاً جدة غيييييييييييييييييييييييييييير...
...
|
Post: #12
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-24-2004, 07:26 AM
Parent: #11
يا زول جدة غير وبس
في جدة كل خير
وااااااااااااااااااااا مصيبتي حليل حنان النيل
وااااااااامغصتي رحل تلوت الليل
|
Post: #13
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-24-2004, 07:35 AM
Parent: #12
مزيد من التفاصيل في أعدادنا القادمة
بعد ما اكون سمعت كلام الاخت هاجر كباشي
كلو وكلام قدورة وبعديها نجي نشوف اخر
الحكي حيكون شكلوا شنو؟؟ وممكن كمان
نلقي لينا واحد اخو بنيات ينزل لينا
اغنية كدة من طراز العربية وتقوم بينا
|
Post: #14
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: willeim andrea
Date: 03-24-2004, 09:18 AM
Parent: #1
الحبيب حبيب نوره..... بالله المره الجايه لما يكون في حاجه زي دي ما تنسي تقوووووووووووووول عووووووووووووووووووووووووووووووووووووووووووووووووووووووك وتلقاني جنبك طوالي زي ما قلته فعلا محتاجين للترفيه السوداني الخالص ووالله لينا منو سنين وجعل الله ايامك وايام الكل كلها افراح في افرح ودمته
|
Post: #18
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-26-2004, 03:11 AM
Parent: #14
وليم أندرية سمح بكلمك
لكن انت وين ياخ
ما تكون في سابع ارض
وعايزني اكلف نفسي واجيك
لكن يا اخوي البرنامج دة
لو الناس عرفته بتجيب لينا
هوا باااااارد وانا صحتي
ما بتستحمل للمعلومية
|
Post: #15
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: wadaldeem
Date: 03-24-2004, 12:51 PM
Parent: #1
حبيب نورة
الخائن الله يخونو
|
Post: #19
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-26-2004, 03:13 AM
Parent: #15
ود الديم يا حبيب
كيفنك يا غالي
وين الغيبات والله
الشوق كميااااااااات
اها شنو الخائن الله
يخونو والكلام دة
ما طول عمرك بتجيب
لي في الخبارات دي
وما خليت ليك حفلة
ما غشيتها هسة حاسدنا
علي شوية الطرب دب
لكن مسعول من الخير
وين عشة مشاكل؟؟؟
|
Post: #20
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-26-2004, 03:42 AM
Parent: #19
من الاشياء التي أعجبتني في الرجل.. فهم بسيط وواضح
لشكل المرحلة التي يعيشها... ودعائم الاستمرارية
وا كثر جملة كانت بتطلع منه... يا ياسين انا بعرف
الناس عايزة شنو...بقرأ الشعور دة في عيونهم وانا
طالع المسرح او انا بغني في اغنية معينة........
وانا احب أنوّه انا لست مع او ضد انا اناقش فقط
وحقيقة انو كبشور أهم من السفير او الوزير دة
كلام ورد في جملة واحد من الشباب السمعت منهم
اما عن الجالية التشادية فحدث ولا حرج لا أعتقد
انوفي زول بقدر يملأ مكانتو....أجماع بالكامل...
|
Post: #23
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: طارق اسماعيل
Date: 03-27-2004, 02:01 PM
Parent: #20
هكذا يصنع الهوس الدينى التفسخ
والتفسخ يخلق الهوس الدين
لذلك عندنا في السودان من المبدعين كبشور وقدوره
ومن المفكرين الترابي والكارورى
اللهم لا اعتراض في حكمك
ازمتونا وانا مازوم مازوم.......
|
Post: #24
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-27-2004, 09:26 PM
Parent: #23
يا طارق اسماعيل يا حبيب
ياخي تشكر علي المداخلة اللزيزة
وشكلك ملان فهم ونضمي
اها بالنسبة لي شكل ولوجك جواة الموضوع
انا حسيت زي العندك رغبة في شخبطة حروفك
شان تشرّح واقع مريض ووجع ساكينا من زمان
الترابي يا طارق انا عمري ما وقفت معاه
دي نقطة انا قاصد بيها حاجة معينة لكن
احب اقول ليك انو نفس الشخص دة عندو قدرة
علي استعمال القلم والمسطرة والاستيكة بي
درجة اجادة غريبة جداً .. وانا وانت من نفس
علبه الهندسة دي لقينا بلد كاملة ماشة في
نفس الخط المرسوم من قريب عشرين سنة وما
قدرنا نمرق لي برة مع اننا بنكره حصة الحساب
وجداول الضرب والقسمة علي اتنين والنتيجة دايما
صفر كبير شمال حاجة بقت مافيشة اسمها الخريطة
و بلد المليون وجع مربع؟؟؟
القصة كلها بتقول نحن ضدو لكن مجبورين نصفق ليه
لو جوانا شجاعة كاملة
بالنسبة لي كبشور انا لقيت نفسي زي المقتنع بي
فهموا للحكاية كلها حتي لو كان رأيي مغاير
لكن الزول جاب اطروحاتو وانا منطقي قبل الشغلانة
دي... وموضوع البوست دة انا جبتوا من كلام واحد
قال لي كبشور دة اهم من السفير زاتو لانو علي الاقل
بقدر يرجعنا السودان وبزكرنا بي الاهل
|
Post: #25
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 03-27-2004, 10:00 PM
Parent: #24
بالمناسبة يا طارق اسماعيل
الكاروري والله ما بعرف عنو ايي حاجة
انا بعرف كبشور بس   
|
Post: #26
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: صديق الموج
Date: 03-28-2004, 02:30 AM
Parent: #1
بعدين عندو اغنيه وانا بعتبره اغنية الالفيه بقول فيها:
دايراك دايرك ياابشره .....دايراك فى طريق يوم داك
بعدين خلى لى بالك من دايراك دى يعنى ..ما دايرك
دايراك..ياسلام يا اخى دى تقمص للدور الى حد التلاشى..
يا اخى سفير شنو وبشير شنو ده احسن فنان فى السودان كلو.
ولى قدام بالضره بالضره بالضره بالضره،،،،،،
|
Post: #27
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 04-01-2004, 09:31 PM
Parent: #26
ايوة يا صديق الموج تقمّص للدور لدرجة التلاشي
والذوبان في معين الفرح حد الانسكاب والزحف الي
اقصي حدود الدهشة.......سفير شنو ياخ؟؟؟؟؟؟؟؟؟
|
Post: #28
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 04-03-2004, 07:51 AM
Parent: #27
في تلاشي اكتر من كدة؟؟
|
Post: #29
Title: Re: في مدينة جدة كـبشـــــور أهم من الســفير زاتو ( هاجر كباشي وقدورة في جد
Author: حبيب نورة
Date: 04-13-2004, 10:22 PM
Parent: #28
الصفقة مالها تعبااااااااااانة؟؟؟
|
|