جـوبـاك حـيـاة فـي الدايـــات!!!!

أتدفّق فوقي شوية شوق ....... ومرقت خطاي دافراني اللهفة ووجع

الاّهة الغربة الكربة.......... لداحة الهم الواصل الركبة.....





اصلوا الحال بطّال يا ناس ..... جاطتني مغايس زمن الترحال....

وما كضّبت ولا أتلفّتة....... كاسن عيني للباب الحنين!!!

وحلفت يمين ....... أغشي أقرب دكان اتصالات .... أضرب شوقين

للبلد الفيها النيل مترامي...... وجادع فوق جيدا مســاير عيش الريف

وصفق اللوبيا ......





البلد الزرعت فيها نجوم الليل جريد الضي فوق رمل الضلمة ... وزرعت

في الجرف الناهد....طين النور...





البلد الفيها النيل ضكران...... وفاتح بيت ضيفان المطرة ..بليلة وكسرة

وسترة حال....



كان في جيبي زي عشرة دقايق .... وشوقي حوالي تلتمية ريال!!

مديت عليّ السلك .... وعرضت فوق دلوكــة الارقام !! .... وفي البطان

أنجلدت تلتاشر سوط !! ..... قدر مسافة الشوق بين جبرة ... وجدة ..



قالدت الحاجة .... ولحست رجول الفال أتبرّك .... وبعد ما شربت سلام

الشوق البكري!!! .... تاوق حلقي بفتّش طعم البركة وكيف الحال !!!



رزاز الدمعة الهم .....شرق السماعة ...ولون المر ياناس في لهاتي...

وسعلت الحاجــّة نورة ....من العيشة .... وناس الشارع...... رطل السكر ..

غنماية شايا ....وحاجة بتول مشــاطة الحلة الوداعية ....... فطور الشــّفع

وحق الحصــّة ال في العصــرية....



الحاجــّة اصلوا ما دســّت علي ..... قالت لي يا ولدي .... القريشات

ضايعات بين تزكرة البصات ..... وبين مسوح البنيات ..... اسكت ساهي

يا ولدي ......عــاد جـــوبــاك حــياة في الدايــــات !!!





جوباك حياة ...!!؟؟؟ دة شنو يا أمي الحاجة ؟؟ دة الزمن المـر ...اليوم

ما بسـر ... الديمة بضــر.... كر يا يمة....معقولة الايام بقت كدي ؟

قالت لي سجم خشــمك يا الغبيان .... كدي تعال السودان وشوف الحاصل

أندست دمعة ومرقت تاني.... وفاتت لوعة وجات تتقدّل في عبراتي...

فتحت شرفة حزنك مشهد...شفت النيل الازرق بنزف...وجـــوة الابيض

لون الدم الاحمر مركب....من غير مجداف سايقاهُ الشيمة...وبطن النيل

حامل بي الحرام...كيفن تلد الموجة الاخضر....البلد الطيب يا ناس مات

شكل الغصــّة وطعم المأساة.....................وزي ما قالت حاجة نورة

عاد جــوباك حـــياة....في الدايـــــات..............................................

المزيد من الجوباك !! في الايام القادمةترقبوا معنا

الاخ حبيب نورة

(البلد الزرعت فيها نجوم الليل جريد الضي فوق رمل الضلمة ... وزرعت

في الجرف الناهد....طين النور...)
يا سلام عليك
تسلم

حبيب نوره ما كل هذا الالق الذى يتوسد يراعك
الذى ينثر هذه الحروف الجميله تسلم يا حبينا نحن برضو
موش نوره براها
ـ
ـ
لكن والله الواحد بغران من التحكره بتاعتك دى ايدك العافيه
كل الود

صادوح !!
ما كل هذا الحنين الذي يتصدّر حروفك؟
أتراها شمساً أخري جاءت لكي تفرض علينا
صلاة الشوق ؟؟ أذن ترجل وقدني معك الي
سدرة المنتهي و أأمر لنا ربك لكي يخفف
علينا هذه الخمسين شجرة وزفّة مطر...
لا نستطيع ان نشرع النوافذ لكل هذه المشاعر

يا بنت يا نيل
كنت فقط أخشي عدم حضورك في شراييني !
ولكن خاب مطري وحالفهُ الهطول يديك
العافية يا ست الذوق يا بنت النيل

جوباك حياة

ما أجمله من حنين

سارة


حنيني أليك
و
ليل الغربة أضناني


وكلام كتير حبيت اتاوق جواتي
وتاكيت النيل موجات وببحر ليك
تشكرات أفندم تشكرات
لذيذ المرور الأنيق

حبيب نورا..
اتدفق فينا شوية شوية..
عشان الوجع الموت والشوق
ورهافة القلب الما بتستحمل كلمة ريد معجون بالصدق الدافي
اليانع وحافي
زي كلماتك دي..

سامية بكري
وووووووب انا
نجضتيني الله ينجضك

Ya habeeb Nora
Da kalam zai al assal

أحمد البشير
يديك العافية
جبرت بي خاطرنا
تسلم والله

حبيب نوره

روعه وفى انتظار المزيد

تحياتى

بلدي يا حبوب
مشتاقين ياخي
وينك انت يا الحبيب
والله الشوق لهيب
فيك الخير