Post: #1
Title: وجع وجع حبيب نورة رجع
Author: حبيب نورة
Date: 05-25-2006, 08:13 AM
Parent: #0
حالة أشراك بي قصايداً كافرة بيك
مصابيح السما السابع عميانة في ضجـّة ضلام خوفك ... سجين في بعدك بعاني شقايا مع لوعة قليب بكـّاي وآآآه من زول بقاسي هناك بفتش ليكا يا راحل و آه من قسوة الأسفار و ظلم المرسي و الساحل و آآه من روح بكت حسرة و لسة تغني و تجامل.....
يا بت كدي ما تجيبي بوسة عربون ..لي أيي حاجة عشان أقدر أواصل مسير...
كافرين بي وعداً يبقي سراب ...... شايلنو عقيدة معني غناكي و بصمة صوتك ... يوم فتنا مداينك ما كان أشراك ! كانت هجرة نجدد فيها الشوق الأصبح دينـنا .. ودينك !!
مين ينكر أنو غرامنا صلاة ؟ حاولت أبداك يا نافلة قصيدة .. يا أخضع ليك يا أنتي سجود .... وما أتمنيت دمعاتك فرض ... دقات صدرك صوت الأزان و بقيت قدامك بين قوسين ... يا أعبي مسامك شوق و حنين .... يا أبعد منك ناقص دين!!
الفكرة أنك تلغي اشياء الغياب و أنا زي برشح ليكي غيمة , تمحي وجعك و الهزيمة ... لما يتعود سحابك يهرد دواخل السنبلة و انت لسة في شبابك .... برضو موج النيل نزيف يتفجر يبل ريق الوطـة
يجرح بلادك بالخضار ... لما تقسي و تجور الصحرة و تجدع فيكي تياب المحل القاسي و تكشف حالك برضو بتعدل فينا المطرة و تنبت شجرة و شجرة و شجرة ....
يا بنت يا انا... مين اللي قال أنو أنحيازك ما عقيدة ؟؟؟ مين اللي قال أنو أحتشادك فيني ما حاجة من أمر السموات و القدر؟ كذب اللي قال أنو لي غيرك بتكمل مراهقة الكواكب والقمر ..
ياخي المسافة البيني بين جواك تلاشي .. ما قلت ليك انو أنصهارك جوة المصارين أنتماء ...او نبوة جاية من السماء...
و يا صبية خلي بالك من العوينات النبيــّة ... خليها تهدي الناس للحنين المستقيم!!
خلي العوالم مؤمنة بيك وبي رُسُل العيون .... أحدٌ أحد .. ما درنا غيرك أنتي حد .. ما شلنا ريدك نزوة في آخر العمر جوانا ليك وهج الجمر ... مادام حنينك باقي في الأعماق قضية أيه الغريب انو الغرام يصبح هوية ....؟
تاوقت عليك في شارع الروح .... و مزجت بنبضك شكل الفكرة و دم الدم ... وانا بين عشمين ... يا أحمل ليك جواي الحلم .... يا يهدم صمتك حرف القول ... العشق ... الهم.
جواة أنفاسك شايفني مشيت .. الخطوة بتفرح يوم تغشاك .. وتعيد ترتيب أيقاع نبضاتك في أحشائي .. وما دُرت أسقاطك ... حاولت أرشح ملحمة صوتك ... و أنتي بترفلي في ملكوتك ... وحتي أظن يا غالية بقيت أتواصل مع غيباتك ... لما بعادك يبقي وصال... نكون يا مدهشة نحن وصلنا تماس الوجعة الصبحت شهد .....
\أديتك معني تكوني قصيدة في دنيا نشاز و رسمتك لوحـة بي لون الروح .... ما سبتك قدام زمناً أشتر....... أتعبتي جبينك قبلة شمس
بس ما تحملي انتي الهم الليل ... الليل الهم....
ما تبقي الخوف الصد ... خلي غرورك يسطع نورك يملآ الفجــًة شعاع النجمة ....دفّقي في شرياني شموسك ...ما تخلي ضلامك يغشي دماي .. انا أصلو وريدي بجدًِف فيه المركب شوق ... ما خايف يوم جور التيار .... جزر الأخطار ... ليالي العتمة و ولفح النار ... يا بت يا زورق عز الموج......
انا بحلف بيك بي كل جنوني العاقل ...الجرح الفيني العالي هتافو و لسة بناضل ...... بي أعلي نزيفو!! .... بي بخرس صوتو الدم الأبيض لا مدفع طب العالم كلو ! تلقاهو منوسر في الأسوار ... ما بخش سياط جور السجانة و الظلم الساكن في الزنزانة و كلام العسكر لا رهبة زول مأسور في دفتر ..مكتوب بي حبر الرصاص و أزيز الدم الأحمر ...
أعلنت أشراكي بي كل مشاعر خاينة جبانة .... أيماني ضعيف بي قولاً ما بفضح عشق النيل لي بنتـاً نخلة... وانا كافر بي لغةً نكرت حبك!
مسكينة عيوناً جاتك مبتهلة ... لا فهمت غيرك معني... لا عرفت بعدك قِبلة !! لا سجدت يوم في مصلّي... الا عشان بنتاً نخــلة!
كافرين بي وعداً يبقي سراب .... وانا شايلو عقيدة معني غناكي وبصمة صوتك ..... ولسّاتي هناك راجيك في شارع الروح قدام الخاطر... وعارف مشكلتك..... كعبة ......لكن مُشــرّفة...
و أفهميها زي ما عايزة!!
|
Post: #2
Title: Re: وجع وجع حبيب نورة رجع
Author: omer almahi
Date: 05-25-2006, 08:26 AM
Parent: #1
مرحب اخي حبيب نورة
والله مشتاقين
ياخي انت راجل كتاب شديد
والله ما قاعد افوت ليك بوست
بالله عليك تاني ماتغيب
قيلي
|
Post: #3
Title: Re: وجع وجع حبيب نورة رجع
Author: حبيب نورة
Date: 05-25-2006, 08:37 AM
Parent: #2
هلا وغلا
تشكرات أفندم تشكرات
علي المجاملة اللطيفة
والله فعلاً الواحد كان شوية بعيد من الناس
لكن برضو الغياب ليه مزاقو
أقل حاجة تخلي سفرك حتي لو أسبوع أقلو
و برضو شالت الريح الجناح
عموماً ما قصرت
تسلم
|
Post: #4
Title: Re: وجع وجع حبيب نورة رجع
Author: ضرغام حسن ابو نورا
Date: 05-25-2006, 09:00 AM
Parent: #3
تحياتى حبيب نورة
شدنى الكلام الجميل الكاتبو دة
اتحفنا بالكثير نحن فى انتظارك.
خالص محبتى......
|
Post: #10
Title: Re: وجع وجع حبيب نورة رجع
Author: حبيب نورة
Date: 06-04-2006, 07:29 AM
ضرغام
ياخي فيك الخير
ربنا يعليكا و يغطيكا و ينجيكا
ومحل ماك داير.........يوديكا
|
Post: #16
Title: Re: وجع وجع حبيب نورة رجع
Author: عبد العظيم احمد
Date: 06-06-2006, 03:26 AM
ازيك ياحبيب نورة صاحبك الماركيزى عبدالعظيم
مشتاااااااااقيييييييين
|
Post: #20
Title: Re: وجع وجع حبيب نورة رجع
Author: حبيب نورة
Date: 07-11-2006, 06:41 AM
Parent: #16
عبدو
أزيك يا ماركيزي
ياخي والله أتلومت عديل كدة
مرحب بيك والله بيجاي
ح أضطر أعيد صياغة الكتير يا زول
بس خلي مواعيدك حضور
تسلم يا سيد الذوق
و كتير الشوق
|
Post: #5
Title: Re: وجع وجع حبيب نورة رجع
Author: تولوس
Date: 05-25-2006, 03:52 PM
Parent: #1
| Quote: انا بحلف بيك بي كل جنوني العاقل ...الجرح الفيني العالي هتافو و لسة بناضل ...... بي أعلي نزيفو!! .... بي بخرس صوتو الدم الأبيض لا مدفع طب العالم كلو ! تلقاهو منوسر في الأسوار ... ما بخش سياط جور السجانة و الظلم الساكن في الزنزانة و كلام العسكر لا رهبة زول مأسور في دفتر ..مكتوب بي حبر الرصاص و أزيز الدم الأحمر ... |
يازووول ان مجنون ...
لهذا النص رؤيتان ...
الاولي صباحية
والثانية ... بعد الغرووب بقليل
يعني بالواضح كده انت شاعر ومجنون ...
كل محبتي
|
Post: #6
Title: Re: وجع وجع حبيب نورة رجع
Author: Dr. Moiz Bakhiet
Date: 05-25-2006, 04:44 PM
Parent: #5
الغالي حبيب نورا،
يا سلام على الروعة الشاربة من نفس الفرح
لون المغيب..
ويا سلام على شمس المحبة النازلة في سور المدن
لهفة حبيب..
ويا سلام على الضو المسافر بين حنينك
شوق رهيب..
....
....
ويا سلام على عودتك موشحاً بالندى ومطرزاً بالجمال
ومضمخاً بأنهار العذوبة
ألف شوق ليك حبيبنا
حبيب نورا
|
Post: #7
Title: Re: وجع وجع حبيب نورة رجع
Author: bayan
Date: 05-25-2006, 11:39 PM
Parent: #6
ابو النسب
يا سلام والله ابداع.. وبهذا البوست السمح والكتابة الجميلة
اعلن انني انا بيان قد تنازلت بكامل قواي العقلية
عن خاتم الجنيه والتوب والسفنجة
حقات ام العروس..
اما بعد
وين مختفي كدا؟
|
Post: #18
Title: Re: وجع وجع حبيب نورة رجع
Author: حبيب نورة
Date: 07-04-2006, 02:37 PM
Parent: #7
دكتورةبيان
والله خايف حروفي تظلم عالي المقام
عشان كدة ح أكتفي بي قولة سلام
يديكي العافية بت أمي
|
Post: #13
Title: Re: وجع وجع حبيب نورة رجع
Author: حبيب نورة
Date: 06-04-2006, 08:08 AM
Parent: #6
دكتور معز
أزيك يا أبو (علاء)
شكراً لهميم الهطول
اذا كانت الكلمات محرِّضة علي لذّة البوح الشفيف
وعفواً ان تقاصرت دونك أقلامنا
و أستحال الشهد الكلام
تشرفنا بمرورك العذب
وبك تجددت الآمال في الحلم السعيد
|
Post: #11
Title: Re: وجع وجع حبيب نورة رجع
Author: حبيب نورة
Date: 06-04-2006, 07:46 AM
Parent: #5
يا تولوس
والله بي كرِت!! لكن شديدة و بتسلم عليك
المطرة صابة والشغلانة بايظة جداً
مع أننا فترنا من 20 ألف وانت ماشي
باقي الحيكومة بقت مقابلانا
نمرق من الزنزانة نخش السجانة
والمصيبة أننا برااااااااااااااانا
تسلم يا الهميم..... تسلم
|
Post: #8
Title: Re: وجع وجع حبيب نورة رجع
Author: Tabaldina
Date: 05-27-2006, 02:10 AM
Parent: #1
..
.
Quote: الفكرة أنك تلغي اشياء الغياب و أنا زي برشح ليك غيمة ، تمحي وجعك و الهزيمة ...
لما يتعود سحابك يهرد دواخل السنبلة و انت لسه في شبابك ....
برضو موج النيل نزيف يتفجر يبل ريق الوطـةيجرح بلادك بالخضار ... |
العزيز حبيبها؛
كيفكـ ونورا!!؟
لقد ادمنت الغياب يا هذا
ونحن فى ظل وجيع سموم حرف الساسة والعهر هنا
نبحث عن ظلال نستظل بها من هذا ( الغيظ)
دوماً نفتقدكـ والرسم بالكلمات..
عوداً حميداً
ولتبق بيننا دوماً القاً..
مودتى؛
|
Post: #9
Title: Re: وجع وجع حبيب نورة رجع
Author: معتز تروتسكى
Date: 05-28-2006, 03:00 AM
Parent: #8
I’M ALIVE
because u r here
|
Post: #12
Title: Re: وجع وجع حبيب نورة رجع
Author: shazaly gafar
Date: 06-04-2006, 08:02 AM
Parent: #9
Quote: أديتك معني تكوني قصيدة في دنيا نشاز و رسمتك لوحـة بي لون الروح .... ما سبتك قدام زمناً أشتر....... أتعبتي جبينك قبلة شمس
بس ما تحملي انتي الهم الليل ... الليل الهم....
ما تبقي الخوف الصد ... خلي غرورك يسطع نورك يملآ الفجــًة شعاع النجمة ....دفّقي في شرياني شموسك ...ما تخلي ضلامك يغشي دماي .. انا أصلو وريدي بجدًِف فيه المركب شوق ... ما خايف يوم جور التيار .... جزر الأخطار ... ليالي العتمة و ولفح النار ... يا بت يا زورق عز الموج...... |
أهلاً ..أهلاً .. أهلاً
حبيب نورا
هل أنت عائدٌ من أعماق الروح تبشِّر بالقصيد ؛
أم مسافرٌ فى سماوات الشعر تحلِّق بالنفوس ؟
كُن - كما كنت - كلمةً خضراء ..هنا
|
Post: #14
Title: Re: وجع وجع حبيب نورة رجع
Author: عبدالله وداعه الامين
Date: 06-04-2006, 11:47 PM
Parent: #12
يا مدسوس في بال الذكرى
وشاري نعاسك في عينينا
لا جيناك جواكا ونهتف
من جوانا براك بتجينا
زي الدم تتمدد عنوة
وزي الغنوة الجوه دفينة
تمرق من مترار الالفة
وتدخل تاني وترجع لينا
شايله الشوق في ايده تسبّح
رغم الحال البفضح دينه
وحال الليد الفيك و بتنكر
انو زمان من دينك دينه
وانو هواك من جوه بيشهق
وبملى زفير الشهقه الفينا
رغم الشوق الديمة بقصر
يملى لحاف الغربة الشينة
كل الشوق ليك حبيبة والتحايا وباقات ود
|
Post: #23
Title: Re: وجع وجع حبيب نورة رجع
Author: حبيب نورة
Date: 07-11-2006, 07:04 AM
Parent: #14
عبد الله وداعة
ياخي والله مافيش أجمل من كدة
Quote: يا مدسوس في بال الذكرى
وشاري نعاسك في عينينا
لا جيناك جواكا ونهتف
من جوانا براك بتجينا
زي الدم تتمدد عنوة
وزي الغنوة الجوه دفينة
تمرق من مترار الالفة
وتدخل تاني وترجع لينا |
طبعاً لا تعليق!!!!!
|
Post: #22
Title: Re: وجع وجع حبيب نورة رجع
Author: حبيب نورة
Date: 07-11-2006, 06:59 AM
Parent: #12
شاذلي جعفر
تسلم والله علي الكلام اللطيف
والله تكفيني محبتكم دي
مع أنها زيادة شوية
لكن دة من أصلكم الطيب
عشان كدة ما تلوموني لو وقعت في ريدكم
تستاهلو المطرة زاتة
و أمطرت لؤلؤاً من نرجسٍ وسقت ورداً وعضّت علي العنابِ بالبردِ
|
Post: #19
Title: Re: وجع وجع حبيب نورة رجع
Author: حبيب نورة
Date: 07-04-2006, 02:52 PM
Parent: #8
تبلدينا
الف مرحب وشوق
|
Post: #21
Title: Re: وجع وجع حبيب نورة رجع
Author: حبيب نورة
Date: 07-11-2006, 06:50 AM
Parent: #8
تبلدينا
ياخي والله شوق قنقليزاية للمطرة
أحبك بعيد و أحبك حدايا
بريدك وحاتك من زمن القراية
كلامك حجايا
وصوتك حجايا
وجيتك حجايا
وحجايا وكلاماً كتير بزود أسايا
سلامات يا غالي
|
Post: #15
Title: Re: وجع وجع حبيب نورة رجع
Author: Elmosley
Date: 06-05-2006, 12:02 PM
Parent: #1
مرحب بالزول الجميل والجميل الزول
|
Post: #17
Title: Re: وجع وجع حبيب نورة رجع
Author: توتي فروتي
Date: 06-06-2006, 12:09 PM
Parent: #15
سلامات واشتيقات
وبرافوا عليك يا جميل يا مدلل
|
Post: #25
Title: Re: وجع وجع حبيب نورة رجع
Author: حبيب نورة
Date: 07-11-2006, 07:19 AM
Parent: #17
توووووووووووووتي
والله انا أصلو ما مصدق
يا زول يا فضيحة
تتجازي عديل كدة
دي عملتها كيف يا مان؟
والله الليلة عيد
زارنا النبي وكمان في الحوش الكبير
بحاول أطفي شمعة أعمل أيي حاجة بالمناسبة دي
برافو عليك انت دة!!!
|
Post: #24
Title: Re: وجع وجع حبيب نورة رجع
Author: حبيب نورة
Date: 07-11-2006, 07:10 AM
Parent: #15
أستاذنا الموسيقار يوسف الموصلي
انت تحديداً ما محتاج تكتب حروف
انت جيتك غيمة جوة السماوات تطوف
وحقيقة أفتقدتك كتير
ياخي عايزين مزيكة تعيد ترتيبنا
ما كلموك أنو الوجدان خلاس لحق أمات طه؟
ألحقنا و أفزعنا بالجديد البشبهك
شبيهك في الخلوق معدوم يا حبيب
|
Post: #26
Title: Re: وجع وجع حبيب نورة رجع
Author: معتز تروتسكى
Date: 07-26-2006, 12:53 PM
Parent: #24
|
Post: #27
Title: Re: وجع وجع حبيب نورة رجع
Author: حبيب نورة
Date: 07-27-2006, 06:56 AM
Parent: #26
~*¤ô§ô¤*~تروتســكي~*¤ô§ô¤*~
|
Post: #28
Title: Re: وجع وجع حبيب نورة رجع
Author: أحمد الشايقي
Date: 07-28-2006, 08:14 AM
Parent: #1
حيبب نويرة
مرحبا بسلامة العودة
افتقدناك يا حبيب
من للمعاني الدقيقة غيرك
مرحبا مرة اخرى
أحمـد
|
Post: #29
Title: Re: وجع وجع حبيب نورة رجع
Author: حبيب نورة
Date: 07-30-2006, 01:00 PM
Parent: #28
الشايقي
ربنا يجبر بي خاطرك زي ما جبرت بي خاطري
تسلم والله كلك ذوق.......!!!!!!!!!!!!!
|
|