يا نسـوان !!! صحي الأختشو ماتو!!!!

أول التبادي شدتني ريحة الخُمرة الشهية ... قلت عادي يا ود بتحصل في أرقي العائلات ...شارع النيل في الوقت دة كان في منتهي الهدؤ .... لمحت الأريكة الموضوعة بعناية قبالة الشاطئ فتجاوزت مصدر الرائحة الختيرة حتي أمتع نفسي بسجارة حمراء تسر الناظرين .... لزوم الشاعرية و كدة !
أتنين كانو .... راجل يسير بخطوات أنقازية مدروسة ومعاه واحدة لابسة توب ربطة من طراز (ندي القلعة) كان كفيل بشرح جغرافية الجسد كلو ... لم أهتم بالشغلانة شديد ... خفت الكلام يجيب كلام وبعدين موساد النظام العام و كدة...
عبد القاااااااااااااااااااااااادر !!!!!
لا حولاااااااااا الكلمة دى وبي نفس الأيقاع ما بقولها الا واحد من الشلة أيام القراية أم دق أصلاً هي مصطلح خسوسي كنت بطلقوا عند مرور واحدة من أياهن ... البنات الشايلات هموم الدنيا كلها وراهن ... وما ساعلات ..... في الحقيقة أتفاجأت... الملامح ما غريبة علي لكن دي تطلع منو ؟؟؟؟
قول معاي انا شفتك وين؟
حتي المساحة الزمنية للتفكير ما كانت كافية ... الرجل يرمقني بنظراته الأنقازية الظالمة وكمان ماكلة حق الناس ...... والزولة أختصرت التلاتة أمتار التي تفصلنا ... وليه تفصلنا ؟؟ منقو زاتو قال لا عاش من يفصلنا ... وخشت معاي في مشروع حضن جامد بدون دراسة جدوي و شهادة أعفاء ضريبي وترعة الرهد وكنانة ..
تملكتني دهشة عريضة والزاد الطين بلة علبة الألوان التي بنات في وشي وووو ما عرفتني يا سجم ؟؟؟؟؟؟
لا حولااااااااااا وتاني لا حولا أيمان؟؟!!
أزيك يا أبو الشباب ... مشتاقون والله كيفك وحق الله وبق الله وعبد الله .....كيف حالك في هذه المدة الطويلة التي لم أراك فيها !!
صاحبنا كان شبه مزهول وقبل ما يخش معاي في صراعات و قسمة ثروة ... علمان لجؤ سياسي سريع في الأريكـــة وهو يرمقنا بنظراتهِ الأنقازية الصفراء ... ولكنه خشي من تدخّل أجنبي بجريرة التعدي علي الحريات......
أيمان دي كانت أخوي والله ايام القراية و كدة كانو بلقبوها بالجنرال بخطواتها العسكرية وصوتها الغليظ أنا كنت بدلعها بي (أيمن) ما كان عندها قضية بي حركات البنات لا في اللبس و لا سمعت بي أختراع أسمو الميك أب و الفستان دة كان في رأيها دعارة عديل كدة
كلامها وونستها كلها مع الشباب و الأولاد ... الجماعة قالو لي أيمان دي (ضكرية) وطبعاً لا حياء في الدين... عرفتني بي كتير من النساء المسترجلات.. أستغفرتك يا مالك روحي وكلمتني عن حبيباتها و صحباتها و كراهيتها للآخر... يوم جابت لي معاها واحد أسمو (حُسنة) أي والله البت تقول في قوات المارينز حتي السعوط دة بتسفو أجارك الله ...
انا جهجهتني الأعتبارات الأنقازية .. ومرقت من البلد وهي ماشاء الله تبارك الله هسة أنثي أنثي (مرة وباقي النسوان ورا) المهم انا لحدي هسة قصة عرسها دي ما مقتنع بيها...والغريبة انو عرست زول حايم بيها زي شنطة (تمكّــنا) والله الا كان تشبع في الخُمرة والدخان ...

مستقبل الحركة النسوية (الفيمنييزم)
كثرت الأقلام التي تتحدث عن الحركة النسوية (الفيمنيزم) مع ان الأبعاد الحقيقية لازالت محل نقاش و أختلاف فيري البعض ان الفيمنيزم حركة تهدف لتحقيق المزيد من حقوق المرأة و يشمل كل الأوضاع المتردية وحالات التمييز والأضطهاد و التهميش و قد مرت الحركة بثلاث مراحل بدايةً من المطالبة بالحقوق السياسية ومن ثم المطالب النسوية لتوفير مساحة أوسع من المساواة بين الجنسين في التعليم و فرص العمل و حتي توزيع المسئوليات داخل نطاق الأسرة ونهايةً الي الأقرار بحق المرأة في التحرر في العلاقات الجنسية....
تعرضت الحركة الي النقد بأعتبارها مبالغة في مطالبها و متطرفة أيضاً و أتهموها بالتمرّد علي القيم و الأوضاع السائدة ودعوا الي وقف الزحف النسوي بعد أن رفعت الحركة شعار أمكان الأستغناء عن الزوج تماماً بأعتباره نظاماً يفرض القيود علي حرية المرأة وان عدم الزواج لن يترتب عليه بالضرورة حرماناه من ممارسة حقوقها الجنسية وحتي أنجاب الأطفال....
وتري الناشطات ان الدولة ليست الا نظاماً ذكورياًبل ودعن الي نبذ الثقافة الذكورية و تصل حالة الرفض الي زروتها أزّاء بعض الجمعيات النسوية المتطرفة التي نشات في ستينيات القرن الماضي في فترة شهدت أزدهار الحركة النسوية و أطلقت هذه الجمعية علي نفسها (جمعية تقطيع أوصال الرجال) society for cutting up Men وقامت هذه الجمعية بجهود ناشطات متمردات وشرسات وميّالات للعنف حتي أنهن كن ينظرن ينظرن بأستعلاء الي غيرهن من أعضاء الجمعيات النسوية الأخري لأنهن يلجأن للدبلوماسية و الأساليب السلمية ... وهي أساليب لا تتناسب و أفكار الجمعية ... فالأضراب الحقيقي هو ضرب الرجال في مقتل والمقصود هنا ليس القتل الأدبي و أنما القتل الفيزيقي أن أحتاج الأمر ......
ويستمر المنفستو النسوي في فرض تعاليم الجمعية فيقرر انه الآن أصبح في الأمكان من الناحية العلمية العملية أنجاب الأطفال من دون مساعدة الذكراو من الممكن الأكتفاء بأنجاب الأناث فقط
والذكر ليس ليس سوي مصادفة بيلوجية عارضة كما ان الجينات الذكرية ليس في حقيقتها الا الا جينات أنثوية ناقصة فالجينات الذكرية يرمز لها بالحرف Y والجينات الأنثوية يرمز لها بالحرف X والجينات الذكرية بها مجموعة ناقصة من الكروموسومات ... فالذكر أذن أنثي ناقصة تم أجهاضها في المرحلة الجينية ...
لا تكتنف مسيرة الحركة الكثير من المخاوف لانها لا تخرج في آخر الأمر من حيّز المطالبة بالحقوق الأساسية و المساواة المطلقة وحرية التصرف في كافة الشؤون بمافي ذلك حق التصرف في الجسد وحرية العلاقات الجنسية و الأجهاض لان الجسد هو ملك صاحبهِ أو كما تزكر الكندية ( دوريس آرون) أذا لم يكن للفيمنيزم مستقبل .. فلن يكون للعالم كله مستقبل)))))

(الاستنســاخ)..نحـو عالم خالي من الضكور.."للكبار"

up

حبيب نورة


ازيك ياولد يامبدع

up

حبيب نورة

ما سون ان لو

ما معقول تااااني شاكوش؟

ياخي لما بتي تكبر وتبقى للعرس انت بتكون اتفطحت


بعيدا عن المزاح

كلامك دا كلام عايز نقاش وبيفتح افق عميق لحوار جاد عما تريده المرأة السودانية

بجيك صادة

مصطفي محمود
يرفعوك وليداتك يا أخوي

وين الفكـــرة!؟!

نادية الصديقة
كيفنك يا حبيبة القسـا
جواة الليالي وفي قلب المسا
تلقاني فاكر رجعتك
شايلة الأماني و سندسة
وجعك فيني حضن النيل لي أكسجينة بنت حرام
وسجارتي لم تبلغ من العمر مقدار الشوشاوة بعد
أزيك يا زولة
و أحترت فيك انا شن أقول
كل الحروف في اللحظة ديك صابة الزهول

نادية الصديقة
كيفنك يا حبيبة القسـا
جواة الليالي وفي قلب المسا
تلقاني فاكر رجعتك
شايلة الأماني و سندسة
وجعك فيني حضن النيل لي أكسجينة بنت حرام
وسجارتي لم تبلغ من العمر مقدار الشوشاوة بعد
أزيك يا زولة
و أحترت فيك انا شن أقول
كل الحروف في اللحظة ديك صابة الزهول

دكتورة بيان
كيفنك يا نسيبتي
بالمناسبة انا كلمت أمي
وقالت لي خلاس انا ما عندي مانع
بس خلي الجماعة يخففوا الطلبات شوية
باقي الحال محلك سر
.....!!!!!!!!!!!

أها
راجيك والله يا دكتورة
وبحاول أزاكر ليك عديل كدة

الحبيب حبيب نورة

سلامات

عارف ؟ ياحبيب انا من الناس الما بفوت ليك بوست ابدا
يعنى ادمنتك عديييييل كدا و بصراحة بتتمتع بظرف و خفة
دم و لك اسلوبك الخاص فى سرد المواقف مما تضفى عليها
نكهة رائعة لك التحية يا ظريف المنبر

Quote: يوم جابت لي معاها واحد أسمو (حُسنة) أي والله البت تقول في قوات المارينز حتي السعوط دة بتسفو أجارك الله ...

بس دى حلوة و العينة دى لاقتنى كتير ,,, يديك العافية

الفولانى

الفولاني
تحايا نواضر
وكل الأزاهر
نص المطرة بنده ليك
تعال يا زول
بلاك الجوف ضميرو نشاف
تعال أسقيني لو للحول
تعال فرح ليالينا تعال قبل السنين تجري
وانا الأحترت في أمري
وانا...........!!!!!!!!!!

اللهُ يا هذا
يا أيها المزروعُ في أحشائي
بكل مداخل الكتب السماوية
بكل مخارج الشهب الفضائية
بكل شوارع الغيم الصباحية

أحبك والله

نقف معك فى محنتك هذه ونؤازرك بعدد واحد سونق ..

trot
really i love you
thanxxxxxxxxxxxxx

والله صحي الأختشو ماتو!!!!!!!!!!!!!!