مـا كـذلك .... في الزمــالك!!

الشوق بطّال لي زولاً طبعوا شحيح وضنين ..... الوجع الكان جواي مستور
ما تكشفي حالو مرارة وخوف ... ما درتك الا تسكني الجوف... يا الصورتك
سرقت حد الشوف ... أخترتك لمّن شفت الطل يا زهرة ..يغسل وشّك
بالبسمات .....ناديتك تملي دريبي ...تشيلي عليك كل الخطوات...
وما كضّبتي كمان يا السمحة !!! شحدتي الخطوة الجاتك تزحف بي جنحات
مدّيت رجليني لقيتك هاوية !!!! بتكتم حس الفرحة الجات.....
وعاد يا أنتي بعد ما فتّي كيفن يصحا الشوق المات؟؟
تعالوا نغني ...الفات الفات...في قلبوا أكبر طعنات في قلبوا....


أنا ما مسؤول ....لو كسح الريح رايات الهدنة .. وجيتك شايل الشوق مسلول
انا ما مسؤول ...
صـامن عيني ما ندهن ليك .... ما فطرن دسـّن فرحن بيك ....ماهجعت صحوة
تفتش ليك ...بس قبل دخول وقت الاذاّن ..... مرقت دمعاتن لوعة شوق
وانا ما مسؤول.


جليد نيرانك ما بدفيني..... قصائد شعرك ما بتوفيني .... غشوات غيماتك لا بترويني ولا بتكفيني .... أرميني بعيد وعليك أنفيني ...ودي
أبلغ حاجة بتحكي الفيني...
ابعدي مني بتبقي قريبة
زيدي في هجرك ياكي حبيبة
كوني الشوق الامل الطيبة
هزمني عنادك ورغم بعاد أنتي سنيني وعمري التاني يا مافيشة ويا ساكناني


انا برحل ليك... ياسفراً ما أتعرفت ليه دروب... قسوة حنيتك...
مزاق الالفــــة الجفوة الهم... تركيبة غريبة....زي ما حضن النيل الازرق
أبيض مــويـــة!
وقال للناس ديك الخرطــوم ... بترجــف من قبلات النيل .. ولقيتك نيل!
وجيتك مركــب ... اتوكلت علي مجدافي.... شخبطت الجــزر الكانت رملة ..
وبتمسح خد الموجــة جفاف ... ورسمت خرايط الطين في الصحــــرة وصفق
النخـــــلة .... تاكيت النيل عبيت شرياني سماحة شوفتك في أحلامي ...
و أنا جيتك رويان حلقي سموم و مغــــــايس..

ولقيتك نيل يا فجر ألهامي ... لكن في الليل الناشف نام ... أتفرّع مات في البحر
المـالح.. دمياط ..و رشــيد.... ما ترجعي نيل...

يتوحــــــّم شوقي علي جياتك .... يا حبل الفـــــرح الســرّي !! وكتين تغشي
جنيـــن وجــداني ... أسقيهُ الروعـــة الرحـــم الفـــال .... ما تشيل منو
براءاة الاطـــفال ... بس أفطـــم فيه شقــاوة الحال ..زمن الترحال.

كذلك في الزمالك
وعادي في المعادي

طلعت شمس الصباح بالليل .. ملطخة بالوهج بدرى .. وجيتك ياحلم بكرة بيوت شعرى وعشم ممدود .. كفاي شيل حال سنينك يابلد يانيل .. سكات خشمك من الحجوات ..... يشق بطن الامل بالخوف ..


وجع ياناس وجع ياناس .. طعم جيتك يغش حلق الامل خطوات .. محطاتك مرارة سكة الميعاد .. وهمس الشوق مرق حفيان فى شوك الليل .. بعد ماغرقت الانوار تجابد فى وحل صمتك وتشهد بى زفير الهم ...


صعيد الامنية الطاهر قطع صلواتنا ليك ياخوف بعد تكبيرة الاحرام .. وضوك بالنية دمعة شوق .. تسابيحك .. تشهد عبرة الغنوات وقولة آمين .. معاك مابنخشى .. جور الناس .. كلام الناس .. ولا الضالين ..

بسلم وابتديك نافلة عشان ما ابقى ناقص دين ..

يا حبيبها...

ما حرام عليك...تعنون الكلام البقطر عسل دا بالزمالك...

انا وغيري كثر كنا مفتكرنك تكلمت عن الهلال والزمالك

...نلقاك تغني لها هذا الغناء الجميل..

فعليك الله اطلب تغيير عنوان البوست....وعادي في المعادي
يتغير...عشان الكلام الجميل دا ما يختلط بمزالق الرياضة...

أكيد تاج السر جاء تاوق هنا ورجع...

نزار حسين
والله دة السبب أسباب زعل صديقي النصف فلسطيني نصف سوداني من البورد دة!!
عشان مسألة التصنيف دي
عاملة لينا مشاكل كتيرة
انا مرات بحتاج أكتب في حاجات ما عودت الناس الاهتمام بيها
ولكن لا حيـــــــاة لمن تنــادي!!

ونأسف يا حبيب مرة تانية للعنوان المشاكس دية

Quote: طلعت شمس الصباح بالليل .. ملطخة بالوهج بدرى .. وجيتك ياحلم بكرة بيوت شعرى وعشم ممدود .. كفاي شيل حال سنينك يابلد يانيل .. سكات خشمك من الحجوات ..... يشق بطن الامل بالخوف ..

يا حبيبها....أكتب لتوثيق ابداعك...ولا عليك من أحد....كما قلتها في بوست
صديقك الفلسطاني...ولا تسمع نصيحته...فكثيرون هنا غيري معجب بهذا الابداع
المجنون...الذي تكتب....وأنا شخصيا...كنت دائما اتحاشي ان اكتب لك اطراءا
لأن كي بوردي دائما ما يصاب بالخرس...لما يصادف هكذا ابداع...


وبعدين معاك...

هل سمعت بي نقد لشعر الدوش؟

مش قال...كبرت كراعي من ال... نص في الارض ونص في النعال...

النعال دي قبال الدوش في زول قالا مش لابسنها نحن من بعد سيدنا آدم بي شوية

قول ووثق لنفسك...ولا تبخل علينا بجنون الابداع

حبيب نورة

Quote: وقال للناس ديك الخرطــوم ... بترجــف من قبلات النيل .. ولقيتك نيل! وجيتك مركــب ... اتوكلت علي مجدافي.... شخبطت الجــزر الكانت رملة .. وبتمسح خد الموجــة جفاف ... ورسمت خرايط الطين في الصحــــرة وصفق النخـــــلة .... تاكيت النيل عبيت شرياني سماحة شوفتك في أحلامي ... و أنا جيتك رويان حلقي سموم و مغــــــايس

كذلك .... نضميك دة جاب سر كل المسالك ..

تسلم يمينك يا رجل

مرسي يا أبو جهينة
الله يجبر بي خاطرك
دايماً سيد الذوق

نزار حسين
يكفيني شعورك الانيق دة
وانا بحاول أرتفع لمستوي الحدث

ربنا يعليك يا صاحب!!!!!!

حبيب النور يا عزيز
كتير الشوق لمثل هذا القول
أعيش الآن صنفا من المساسكة في سنتر الخرطوم
علمت بوجودك بين الكادحين الزاحفين إلى ...
هناك الكثير الكثير الكثير لكنه مقام حرير وسنة ناعمة وحلوين حلاتن
أغيب وأجيك والقاك باهي كما أنت لا تزيدك السنون إلا نوراً على نور
أشتاق المتوسط فهناك لا يزال في ركن الغرفة حسب إفادة صديقي جدو ترقد أشيائي ( أربعة كراتين كتب , شنطة هاندباك أشرطة كاسيت سودانية , ألبوم صور بجانب كيس رسائل أهلي الطيبين , وجهاز كمبيوتر بانتيوم 3 موصول إلى شبكة الإنترنيت ليصلني بها هناك عند ضفة الدنيا الأخري )
بعض السجون كانت عزلة ولكن انا الآن رغم أني حر طليق إلا أن القيود والأكبال تربطني إلى مركز في وسط هاوية لا قرار لها , كلما حملت أوزاري وجدتها مربوطة إلى القاع وكلما جررتها بقاعها ووصلت إلى عل إنهار جرف الهاوية إلى قاع سحيق , يقولون إني عاق عاق عاص
هناك ما جديد , فتحت لي نافذة للحب , أليس ذلك بجديد ؟
حتى الملتقى

أبنوسي

تبلدي


...........!!!

ابنوسي ؟؟؟؟

كااااااااااااااااااك


تفتكر انو ح تغيب و تلقاني لسة مجرتق بوليـّاً!!

لا وحياتك والله الا نتصل بخبير القصطرة
عفواً فما عادت المثانات قادرة علي أدرار البول!
نقطة سطر جديد

عايزك ضروري جداً
بطرفي اشياء و اشياء و البت مروة
تلفوني في هاهاهاها@ أبنوسي دوت شوق!!