أسباب زعل صديقي النصف فلسطيني نصف سوداني من البورد دة!!

صديقي النصف فلسطيني النصف سوداني !!
وهو من أم سودانية و الوالد فلسطيني شامي
متابع جيد لأغلب كتاباتي
وهو أشبه بي ( أبن جني )
الذي قال فيه المتنبي قولته الشهيرة:
أبن جني أدري بشعري مني !!
مرات كدة برسل ليه أيميل
عشان يرسل لي القصيدة الفلانية
و القصيدة تكون من كلماتي
لكن ما حافظ منها ولا حاجة
يلاقيه أكتر حفظـاّ وتجويداً مني
و بالمناسبة انا من بداياتي في الكتابة ما حصل تقريباً لقيت لي ناقد واحد
يديني رأيوا في كلام كتبتوا
بمهنية و تجرّد
الغالبية بتجي تبارك!!
تقول انا جبت جايزة نوبل
الحاجة العايز اوصلها
انو أبو ماجد كان بقول لي لو عندك قصة أو قصيدة أنت مقتنع فيها
يعني حاجة تكون عاجباني
ما تنزلها في منبر سودانيز اون لاين
وهو بري أنو مافي ناس تستاهل
وكم مرة سألني
اسهل طريقة ليكون موضوعك في الصفحة الأولي أيش ؟
و قبل ما أرد عليه بقول لي الموضوع يكون فيه ثورة حجارة او مصيبة
لكن غير كدة ما أعتقد!!
ايوة دة رأيو
مع أني بختلف معاه في حاجات كتيرة
لكن برضو هو متمسك شديد بي رأيو
دة غير أنو حدد لي عدة منتديات ودور نشر أنزل فيها بضاعتي
مع أني ضد حكاية النشر و الكلام دة

انا كمان لاحظت
في بعض الاقلام شديدة الأناقة
انا ما عايز أصنفهم علي أساس أدبي أو ثقافي
بعتبرهم شاملين جداً
لكن لو طلعوا من النطاق المحدد مسبقاً
ما حيلقوا زول يهببوا ليهم
يعني واحد زي منوت الناس أتعودت علي وسامة كتاباتوا الرقيقة
لكن لو عندوا رأي في الشئ البحصل في البلد دي
ما حيلقي واحد يجي يناقش رأيو
وفي أمثلة كتيرة
بحاول أتناولها في اقرب مناسبة!!

ماذا يحصل لو طوّعنا الكاريزما الأبداعية في نفسية ( الموصلي)
مثلاً لكي نطعن بطن الفيل السياسي ؟ او للخوض في بركة المعترك
الاقتصادي أو غيره !!
ما ممكن نطوّع الغناء لي قضايانا النائية عن ماهية الفن؟؟؟

لو


لو قلنا مثلاً !!

انو بكري ابو بكر كتب بوست بعنوان
دجاجي يلقط الحب ويجري وهو فرحان

ناس فلان وفلانات بجوك جاريين و بناقشوا (نونية) بكري أبو بكر
وما بعيد يقرروا تعليقها في حوائط كعبة مايكروسوفت
ويأمنوا بنبوّة كاتبها و يعلنوا الولاء

لكن لو مهند الجيلي بادي
نزف رحيق أبداعوا هنا
ما مسكين ما عندوا ضهر
وحاتك يا غالي الكلام الكتبوا يمرق في بلاداص أصلوا ما معروفة وين

ودة السبب الطفش صاحبي معتز تروتسكي
وقبليه أمير التبلدي ( أبنوسي) زينة شباب البورد!

الأنحيــاز الواضح للجنس الناعم!!
تقول كل جنس ناعم بقول كلام طاعم!
مافي أخوات هنا برتكبن فاولات فنية وضرب تحت القاش
ثيردباك في هلال أم صفقاً عراض ما يعملا!

لكن ناس قريحتي راحت
يديهم العافية و يغطيهم
يجيبوا علب الشوكولا الفاخرة و صناديق البارد
و بنكسروا عند ناس المناسبة
وهي تكون سماية ساهي!!
وكيلك الله في ناس هنا بلاعين زمة بشكل غريب
أها يا احلام مستغانمي
نجيك في السمح وفي جديد وليداتك!!

يا حبيب ..

Quote: انو بكري ابو بكر كتب بوست بعنوان دجاجي يلقط الحب ويجري وهو فرحان ناس فلان وفلانات بجوك جاريين و بناقشوا (نونية) بكري أبو بكر وما بعيد يقرروا تعليقها في حوائط كعبة مايكروسوفت ويأمنوا بنبوّة كاتبها و يعلنوا الولاء

Quote: أها يا احلام مستغانمي نجيك في السمح وفي جديد وليداتك!!

الله يجازي محنك يا كولومبوس ..
بتكتشف ليك حاجات كدا مجنونة عديل ..
ياخي خليتني أضحك زي التقول شمتون الجبار ..

صدقني أنا مقتنع بيك زي صاحبك الفلسوداني دا ..
و كان داير نصيحتي ..
شيل حبيب دي و بس ..
و بعد داك كان لقيت طريقة رد علينا ..

يا دهب
الشغلانة بايظة شديد
وحياة الله قبيل كنت زهجان جداً جداً
لكن هسة أحسن شوية
بس عليك الله ما حكاية غريبة البتحصل هنا دي؟؟


شوية كدة بستعرض نمازج أخري
وما ساعل فوق زول
كبير الله يا مان!!!

حبيب نوره ياخى ما شاء الله عليك إنت زول فى السلك قول يا لطيف والحال من بعضه وأكتب ومتع نفسك ومعجبيك ولا تهتم بالعرقوب وأبقى عشره على عوسك الفيهو والنسوان ما تبقالن فى تولا خلهن بنفعننا إيديك العافيه وأبقى زى ما قتليك أو ما قلت ليك


السلام


منصور

حبيب نورا
نسيبي

صاحبك الفلسطيني السوداني دا
المفروض يجبرك تجي كثير زول شغال ذي هلال رمضان
يصل في السنة مرة.
انت لازم تتواجد عشان تحصل ليك الفة وكدا
بعدبن يازول انت عدد القراء كبير شديد
وديل هم الفيصل موش ناس كومي وكومك

انا بفتكر احسن ناس بتكتب هنا وما مادينها حقها
انت وطيفور جازلوت وعلى الحلاوي
انا قلبي بينفجر لم اشوف كتاباتكم
لكن مشكلتكم عدم المداومة..
اسع انا ما جكس ليه بوستاتي بتبور بورديا وتنجح قرائيا..
الولد دكين اسع بقى صلاتي على محمد عنده معجبين برة وجوة..

انت لو عايز الناس تجيك
تكتب يوجد ساندوتشات وبارد..

مودتي واعجابي بك..

دكتورة نجــاة
والله انتي الرجــا و المرتجـا العمرو ما خيّب رجــا
والله صاحبي الفلوسوداني متكيف منك شديد
انتي و تروتسكي الغايب الحاضر
تقول دايرة تديه بنتك
لمن بقيت أغير منو يا دكتورة

منصور
كيفك يا قريبي
والله تقول شنو يا مان
لكن دي حالة أخير منها العرس
قلت شوية أفضفض مع الجماعة ديل
عشان ما نموت بالمغسة
لكن بالنسبة لي موضوع النسوان
أها يا شانتير!!
طيب ما تجيب شدّو معاك تضامنا!!

..
.

يا حبيبها؛
كيفكـ ونورا والفالنتاين..
هم حيجوك كيف
وانت ماشي حفيان

____________________

تدفق
وكفي؛

تبلدينا
أهو انت واحد من الناس البحرص علي وجودوهم معاي
سمح فهمك و سنين قلمك
وماك قاعد تقصر تب!!
ربنا يديك العافية يا حنييييييييييين