مجــانين وكُـفَّـار وكمان أولاد حـرام !!!

يا هناية !! أنتي أفتراضية و أفكارك مشتتة
وترتيبك فوضجي
يجمعنا أننا نحمل نفس الهوية
مجانين و كُفــــّار وكمان أولاد حرام !!
أتي بتمدي علي زمن منفلت وطائش .....
وانا بجابد في تاريخ ممزق نتيجة لي عوامل بيلوغرافيا سجمانة!
النيل يمصمص في صفق الليمون قرفان من ضفافو
والقمرة مادَّة شلوفــتها لي أي ثعلوق في الشوارع
كاتبة في اليافطة مومس عمومي !!
تماماً زي زمني دة
زمااااااااان كان السماء بيت أحرار !
هسة النجوم مرقت للريبا و التلاف
خلت الأنارة و قبّلت علي الجرارة وممارسة الدعارة !


يا هناية زكرتيني دفاتري القديمة قبل ما تهجم عليها عوامل التعرية
و تصيبها أعراض أنيميا السافنا الفقيرة !


كنا أتنين !
بعد ما ضهورنا أتكسرت من قعدة الضل
هو أتوكل علي شنطة هاند باق غبشة وبي كراع خدراء
وقطعت وضوهو مضيفة طيارة الساعة أربعة حزيناً
حسب توقيت الرحيل المحلي !
مهموم مصنقر في كنبة شكــرن !
والمضيفة نامت بي الباقي ونزل قبل المطار في محطة غربة !
قهر و فراق اهل !

أنا
انا بقيت كابتن الفريق في دافوري الكوتشينة !
ولبست الفنيلة نمرة عشرة في ماراثون دفار الألزامية العالمي
عالم أفتراضي قبيح
من غير زول يشاركك الوقوف في صف البول جمب عمود السينما الوطنية !
ومدارس الكمبوني وحائط المبكي المقابل لكلوزيوم
عالم أفتراضي ود حرام !
زينا كدة ومشاويرك مافيها الشايل معاك هم الشيرنغ وصحن البوش!

في مدينةٍ الله فيها ضابطٌ في الجيش !!!!
طوبي لنا نحن أولاد الحرام
وطوبي لست الشاي

يا هناية يا أفتراضية أنتي
غبشـــــة .... لكن حقتي !
البقرة التي يملكها صاحبها تدر من اللبن أكثر من البقرة التي تملكها الحكومة !
آيــة ماركسية كنا بنصلي بيها فريضة العشم
أيام تصوفنا الشيوعي !
أيام كنا فيها حيران في خلاوي أنبياءنا (لينين) و(ماركس) و(خروتشوف)
أيام كنا نصنع فيها من ثلوج موسكو كعبةً بيضاء !
ونختلف و لكن مذاهبنا كلها في حضرة (كامي) و (سارتر) و(كولن ولسون)

هسة
هسة انا حاسي أني براي
وانا آآآآآآآآه من كونك تشعر أنو اللمة الكبيرة دي كلها
حواليك ولا تسوي شئ !
المجموعة (فاي) دي لو بقت صغيرة واللا كان كبيرة
برضو بتفضل المجموعة ( فاي ) !
أنا آآآآآه
زولي كان بديني الترجمة الفورية لي أيي لوَّايـــــــــــة !
بعرف أني بتوحم علي صحن فول !
هسة بقي يغير ( الآي بي أدريس) كل يوم
ويحرق في باندويث محطات القطاري والسفن

وهانية الكانت أفتراضية !
قالت لي ما بطلع معاك الا بعد صلاة العشاء
يعني لو الأمام بتاعكم دة عايز يثبت لينا أنو حافظ سورة البقرة
أرجع تاني لي وجعي الأفتراضي ؟؟؟

وهويتي الأفتراضية ؟؟؟؟

مجنون وكافر و كمان ود حرام ؟؟؟؟؟

Quote: ]مجنون وكافر و كمان ود حرام ؟؟؟؟؟

مجنون ليس على المريض حرج
ليس بعد الكفر ذنب
ودحرام 0 يامافى الدنيا مظاليم
حبيب نوره رفيقى
ات طيب النعل ماك ميرود 0مرسل ليك
هدايا فى بوست الشيقوق0 عجبنى كلامك

خالد المحرب
فكني من القيد أبرطع في الورق
أسقيني من موية الصفق
أرتاح و أجيك جوايا عالم من ألق

كنتَ قايلاك خُنفُشاري يا هناي..

أتاريك إفتراضي؟؟!!!

حبيب نورة !!!

الجن بتداوة كعب الإندراوة !!!

هسة أنا طول عمري دة قايلاك بتحب واحدة إسمها نورة تطلع حبيبة إفتراضية و إسمها هناية تتجازى !!!

والله الولد المتفن في الواطه دي مبدع جنس ابداع
ومجنوووووووووووون عديل كدا يا اخي زد في الجن وابداعاتك

حبيب نورا
أنت ما كبيت الزوغة من دافوري الغربة ، وخليتنا شتات كايس الأكسنت accent
ياما بتعرف صليحك من عدوك ، يا مجنون حسب التوقيت العقلاني وكافر بأحلام العسكر
ود حرام شوية عليك تستاهل (هناية) تنحت في كهوفك مغارات ، وتتحسس جواك زي المطر
يا إفتراضي ومشتت في الهُلام ، وكاسر أركان الرحيل ومارق للربا والتلاف
أنت عليك الله كان ما مجنون وكافر وود حرام بتكتب كلام زي دا ؟؟؟ الله يقطعك ويولفك قصيدة قصيدة

Quote: أنا انا بقيت كابتن الفريق في دافوري الكوتشينة ! ولبست الفنيلة نمرة عشرة في ماراثون دفار الألزامية العالمي عالم أفتراضي قبيح من غير زول يشاركك الوقوف في صف البول جمب عمود السينما الوطنية ! ومدارس الكمبوني وحائط المبكي المقابل لكلوزيوم عالم أفتراضي ود حرام ! زينا كدة ومشاويرك مافيها الشايل معاك هم الشيرنغ وصحن البوش!

الحبيب / حبيب نوره

تحية من طه بعشر والتجاني الماحي وشيخ إدريس عبد الرحيم
عموماً جنك كلكي ولابس ملكي .. ولا يهمك كل المبدعون مجانين!!
كيف مع الشكينيبة!!
تحياتي ومودتي

والله مشكلة .. كلما أتعرَّف على واحد يطلع مجنون .. خلصنا من هاشم خلف الله طلع كمان حبيب نورة .. قلنا البركة في أمير الجمري قعد يكورك أنا عندي قاوت ... الحاصل شنو ما عارف .. الله يعيني !!! أها ياربي إسماعيل عباس كمان مالو ؟؟

عادل جبارة

يا أخوي عليك الله فلسفة القبل دي براها ما بتجنن
هاشم خلف الله دة سيبك منو
عشان عايز يحطم معنوياتي
قال انا شين
عليك الله شوف الحاقد دة

أبو بكر يوسف

Quote: جنك كلكي ولابس ملكي .. ولا يهمك كل المبدعون مجانين!!

جنون عاقل واللا لا !!؟؟؟
عشان لو ربطوهو أنا ح أخسر كتير مش كدة؟

امسك
الفرح الراحل
الزمن الراحل
البحر
البحر
وين الساحل
الزمن البغلي
نيران ومراجل
الشوق ما راجل !!
لو كان راجل
ما ودّي خطاي
لي هناية
اللسة
أفتراضية
لو سابني أواصل
لكن الشوق يا زول
ما بكون راجل !!

up

مرسي خالص يا دومة
ربنا يعليك و يغطيك و يخليك و ينجيك وكمان يهديك!!

صديق رحمة

انا كبيت الزوغة فعلاً
لكن مسافر طوالي
ما ضروري أقطع تزكرة
لكن سفري الجواي البشرط جوازو منو؟

Quote: إفتراضي ومشتت في الهُلام ، وكاسر أركان الرحيل ومارق للربا والتلاف أنت عليك الله كان ما مجنون وكافر وود حرام بتكتب كلام زي دا ؟؟؟ الله يقطعك ويولفك قصيدة قصيدة

!!!
ياخي عليك الله دة ما كلام مجنون يا صديق؟؟؟

جيتكم راجع
عدم القريشات
قطع كراعي

Quote: والله الولد المتفن في الواطه دي مبدع جنس ابداع ومجنوووووووووووون عديل كدا يا اخي زد في الجن وابداعاتك

تسلم يا دومة
القومة ليك القومة

يا هناية يا أفتراضية أنتي
أها نتفق ... ونقعد في الصقيعة دي ونشوف الحاصل علينا , وعشان تعرفي الريد , وزول أتمحّن كاتلا محنّة و.. داك يا الشوق الما خمج !! عاد يا يمة شوق اليابة و شوق التابة , دا الخلاني ألفح توب الحشمة , واخش في نبضك حافي الراس ,وينو غطاي ؟ وينا طريحة حاجة زكيــــــــــة , الكتبت فينا نداوة الحال وراحة البال فرح الاطفال . اها نقوم يا بنية والا نواصل قعدتنا ؟ونلز الشافعة القليصة دي تمشي تشحد ليها راس سكر من ناس ست النساء , وتجي تتحكر للجبنة المتنتنة , والله القعدة غلبتنا وكمان الوقفة غلبتنا , قهر وفراق أهل , وعلي العلينا بشتنة ورقاد واطة.


اّخر هـــام ,تعالي وشيلي من اساي , تعالي وأبقي ليا شعاعا للضلام غلاب , أمشي مني لكن ليك , أتدفقي وأبقي ليا الطل , أمسحي عني سجم الفكرة والاحساس , شخبطي فيني ,قصة جديدة في الخاطر ,بشتني همي بي شوفتك , أكشحي فيني روح الوردة تبقي ليا أرهاص زول كتب بالهم مساديرو ,وسرح بيك وسافر ليك , وعشمو يرجع ليك , زي النيل يفارق ضفة الميعاد , يجيبو مخاضوا بي المطرة ,يربي جروفو بي ضمّة وكلام فنان ,نشاف حلق الدريبات ديك , بسقيهن , نجيلة ريد جداول جارية حنية وبتسقيهن..

حرام عليك


يا نخلة

لساتك عاملة فيها نبية
النيل ما حيفهم الرسالة

موقوف من الخدمة مؤقتاً


حرام عليك يا نخلة!!

توفي
والله بحبك يا مانة!
وما تفهميني غلت
او بالأحري الشماشرة ما يفهموني غلت
لوجه الله كدة يا منقة

Quote: الجن بتداوة كعب الإندراوة !!!

والله الا جني بيك يا توفي دة ما عندو دوا

حبيب نورة !!!

من الحب ما قتل !!! هسة كلامك دة كلام نصاح ولا مجانين كلمني عشان أحدد موقفي وما ليك دعوة بالشامشرة!! دي على وزن كماسرة !!!!معزتي ,,,

توفي
طبعاً انا سمحت لي نفسي بي تدليعك من زمان
زكرتيني عدولي في فلفسة القبل
دة عمروا مافي زول دلعوا الا انتي
نسوي شنو غبيانة وممسحة وماشة حفيانة!
اها بالنسبة للحب العزري دة
خليه أفتراضي شوية
و سوقيه لي الواقع من أضانو في مرة تانية
بين بين كدة
أتعاملي مع أفتراضية جواك بي سياسة أمسك لي و أقطع ليك
بي جدلية معايير مزدوجة
وكيل بمعيارين
انا علي حق اللبن والهديمات
وهناية خليها تشرط فاتورة الكريمات
و نعلن تحرير السوق من قبضة أحتكار (التوفي )
أقصد العواطف بالدلع !!!!

حبيب نورة !!!

الحب العذري في الزمن الإفتراضي لزولا فايق وفاضي والفاضي يعمل قاضي ,, و نحن يا الحبيب في زمن الأولاد البخجلو من البنات القاهرات وفاجرات ومضيقات الاسكيرتات ,, عموما يا الحفيان والتقول جاي هسة من الدكان إنت عليك الحليب والهديمات وأنا علي الشاي باللقيمات
شو رايك ؟؟؟؟ وتسلم .

توفي

سماحة الجية
والله هن من ناحية يخجلن
مافي كلام
لكن القصة خرجت من حتة أنو العين ما بتعلي علي الحاجب
هسة في عالم نساء مسترجلات
انا مرة كدة كتبت عنوا
لكن ما أخد حقوا الكافي
عشان نسوان و رجال البورد
برضو خجلانين

ممكونة
انا خنفشاري أفتراضي !!

Quote: كنتَ قايلاك خُنفُشاري يا هناي..

ما سمعتي بي ( الخنفشوأفتراضية!!!)

Quote: !!!)لكن مسافر طوالي ما ضروري أقطع تزكرة لكن سفري الجواي البشرط جوازو منو؟

حبيب نوره ماقيش حد يقدر يشرط جواز سفرك

لان هذا الجواز من نوع تانى خالص
تحياتى

والله عايز أسافر لي بلاداً أصلو ما معروفة وين
بس تكون رفقتي المأمونة
شوية من حنينة
و شنطة هاند باق غبشة
غباشة روب
و كسرة رهيفة يا صاحب
وحجوات من الزمن البعيد و قريب!!

يا هناية

لسة منتظرة أمام جامعكم يخلص صلاة العشاء !!
شكلوا كدة عايز يثبت لينا أنو حافظ سورة البقرة!!


في أيمان أفتراضي ......!

شوية كدة و ح أجيك بي وجع أفتراضي!!


أنتظار !

Quote: كنتَ قايلاك خُنفُشاري يا هناي.. أتاريك إفتراضي؟؟!!!

بل هي قمة الخنفشارية وترابط قرب
الهناي الفاصل بين الافتراضية
وجنون الكفار اولاد الحرام

ولعمري وما عمري علي بغال
مالو لوصدح الغراب او نعقت البلابل
ماكلو مكسب افتراضي للمخاطب مش للشيوع
من غير زول يشاركك الوقوف في صف البول
جمب عمود السينما الوطنية
قال ليك كل الدايشين ديلك كانو راجعين؟؟

روحي كدة فاكاها في نفسك زي بتاع النبق
وليك علي دو الشيريا مابدفعو عربون ملاح
وستة الديناري كان كنكشتا فيها بتتلحس

لما جانا النوار قفلنا الابواب وقلنا
اعوذ بالله
وفتحناها لما جو يسلكو المستراح وقلنا
الحمد لله
وكل يوم من ده بالكوم

ماصلوا انتي راسك حجر ووشك فقر
تشبهي مضيفات يقطعن الحلم
ويمسكوك درب الله
لعلك تفلح بالنيل من غيرهن

ياهناية انتي لو عرفتي الكلام
كنت كتبتي عن جنوني وسنوني
عارفاهو كويس
ماكلكم
مجــانين وكُـفَّـار وكمان أولاد حـرام

وليد ثروت
انا من قبيل أقول شفتك وين
يكون كنت واقف معاي في صف البول
جمب السينما الوطنية؟
واللا لساتك مولود من رحم الاقدار الكافرة
وبنات حرام!!!

شكرن جزيلن!!