تظاهرة من الألوان يغلب عليها الأحمر والأصفر... البخور دة يقول يا واحد كمية كبيرة من الحريم والشواذ ... الأعمي شايل المكسر... جنبات المنزل تغلي من كثرة التدافع والأزدحام .... هجين من الأيقاعات الأفريقية والشعبية ... أحياناً يشحب الضجيج ويموت الهرج ومن ثم تحيا الصيحات من جديد أيذاناً بحضور أحدي الشيخات فيقام لها السلام وبعده تقوم بالواجب تجاه الأسياد.... وفي غمرة الفوضي يبرز الأستعراض بالذهب والمجوهرات والثياب بشتّي ألوان الطيف .... البوبار والفشخرة صناعة نسوية حتي في أحلك الظروف...... واحدة تتفاخر علي الأخري بي ثوبها أبو عشرة و تدّعي أنه منتج سويسري بعشرات المئات فيما ترد عليها الأخري وهي تكشكش غويشاتها ماركة ( أبو مرين) : بركة يا يمة الأتعلمتو الحديث و لبستو القميص فتصرخ فيها : هيييي نحن لمن أتعلمنا الحديث ولبسنا القميص البحر لا فيه حوتة ولا الحلة فيها شـ...موطة .. وحاة السارة بت عبد الله الما بحلف بيها .. وحاة القبلة الما طفت عليها أتي مرة مجنونة ساهي ...جررر يا يمة هوي ها.. جرارك مسـدّد نخرينو..... وتتداخل الصور في رأسي في أستباق و أسترجاع ... المكان يغلي كالبركان والشيخة في الوسط وهي ترش الحضور بقوارير العطر والخٌمرة كأنها الملكة بلقيس .... البخور دة يقول يا واحد.. حالات الهستريا و الفصام تظهر في شكل نوبات لآعتقاد راسخ بوجود قوي خفية خلاف الجن والشياطين تتغمّص أرواح الناس المزيورين .. فينشأ صراع داخلي لن يهدأ الا بتنفيذ طلبات الأسياد . و أصوات الشيخات تتعالي تزامناً مع أرتفاع حدّة الأيقاع من الدلاليك والشتـامي ( غنولك يا بشير دقولك يا بشير... دقّو الطبول طلقو البخور و قالو دستور....) وفجـأةً! تتظاهر واحدة وتقع علي الأرض شبه مغشيـّاً عليها وهي تبرطم بكلام أشبه بكلام الجن مع بعض الكلمات الأنجليزية ... وعندما سألت قالو لي دي نازل فيها الخواجــة ... ما علينا وبي دستورا و أيضاً واحد من الشواذ أخذ يتلوّي كأن به مس من الصرع فأحضروا له قارورة عطر كاملة ... وواحد تانس شرب دم التيس الأسود اليتيم ... و أظرف حاجة قابلتني واحدة جحظت عينيها وسالت الدماء من رأسها و كوعيها فجاءت لها الشيخة مستورة شايلة فتيل ريحة بت السودان وهي تصغي السمع لما تتفوه به الزولة وتقول سامعين وسالمين طلباتكم يا الأسياد دستور يا أولاد ماما الولية نازل فيها الريح الأحمر دستور يا الولاد ماما وبعد شوية كدة أفاقت المرأة و أخدت تتخلـّع كأن لم يكن بها شيئاً فوجدت الحريم يتغامزن في خباثة وعندما سألت قالن لي المرة دي نزلت ودايرة الرجال (قبٌلا يا يمة) وفي منتصف الضجيج جلست واحدة من بنات الشيخة لكي تعد القهوة فيما تراصصت الفناجيل كأنها في مصلّي للبن .. وفي الطربيزة مجموعة من فتايل الريحة والخمرة و الصندلية وفي شبه حلقة جلسن الحريم للقوايل والهوايل وهاك يا قطيعة : قالو ليك سعاد الساعة الراجلا أداها ليك كف وقعت تقول الخروف المضبوح آآآآي وحاتك يا غالية قالو بتدخّل الرجال من وراهو يا نسوان أتن جنّيتن ما تخلو المرة في حالا!! جن حسين يا يمة الأكلو نعلاتو!! يا مرة ما تقابليني تقابلك الصاقعة أجي يا قرع النقادة العشرة بي قرش و مية هوادة!!؟؟ وحاة الشاذلي ابو الحسن دة ( تحلف بفنجان القهوة) يشربو في بكاي لو ما فكيتو طاري سعاد دي أقوم أمشي فتدخل عليهم سعاد فجأةً بعد القوالات والصواطات دي كلها سعاااااد أزيك يا حبيبتي تعالي أقعدي جمبي أمانة ما جبنة زي الكونياك تستاهل خشمك فترفض سعاد الدعوة في أمتعاض وقبل أن تبتعد قليلاً تتوالي عليها الشتائم : بٍس تشربي السم يا الناقصة يا المتباقصة أمشي مشت عشة عمتي يا حشرة يا منتشرة يا أسكراتش أبو عشرة(شتيمة معاصرة وكدة) وهكذا هو حال بيت الظار الا ان تأمر الشيخة بتجهيز الأكل للضيوف والجبنات مدورة و روئح العطور والصندلية وكاسات الخمرة والضبايح وحالات الهستريا والأغماء المصطنع و بلاوي النسوان الغبيانات
في فذلكة ( أنثروبولوجية) نعرف الظار بأنه ظاهرة أجتماعية تتمركز في وجود قوي خفية تتغمص الأنسان فتحدث أضطرابات نفسية جسيمةpsychosmatic dis order لا تهدأ الا بتنفيذ طلبات هذه الأرواح وحسب رأي ( فرويد) ان العصابي لا يختلف عن الأنسان البدائي و أنا أري ان الظار فيه ما يشبه التخّلف المتعمد بالرغم من انه أحد وسائل العلاج الشعبي في كثير من الدول ...
ولا يوجد معني واضح لكلمة (زار) في اللغة العربية الا أذا أعتبرنا أن الزار سمي كذلك لانه من الزيارة زار يزور أي ان الجن يزور الناس. ويعتمد الظار علي الأغاني والاناشيد و بتصور (مثيولوجي) mythology ندرك ان الموجودات الخرافية سبقت نظام العالم الجديد في الوجود وتظهر لنا التحليلات النفسية ان الأعتقاد في الجن ناتج عن ميكانيزم الاسقاط projection في الشخص الذي تسيطر عليه مشاعر متضاربة للحب والكراهية وغيره...
يقال ان الظار دخل الي السودان عبر قبائل الهوسا او عبر القبائل التشادية او الأكثر ترجيحا قدومه من الحبشة..... ويقال ايضاً أنه دخل السودان عن طريق زوجة الحاكم العام التركي ( فاطمة) التي مرضت في قصرها بأسطنبول ... وسمعت غناءاً غريباً أقشعر له بدنها وعندما أطلت من النافذة رأت متسول نيجيري فطلبت أحضاره الي غرفتها فقال لها النيجيري أنه حضر خصيصاً بأمر الظار ليشفيها من مرضها وعندما حضرت مع زوجها الي السودان نشرت طقوس الظار كلها..
للظار مفهوم ديني في السودان فيقال أنه من جن سيدنا سليمان ظهروا له في شكل خيوط حمراء رفضت أن تتدلّي من السماء الا بعد ان تضرب لها الطبول وت يطلق لها البخور وتعزف لها الموسيقي وهذا هو الغطاء الديني لممارسة الظار في السودان حسب الأعتقاد الراسخ
من أقسام الظار الدراويش و الأشراف مثل الشيخ عبد القادر الجيلاني والسيد البدوي والستات ويقصد بهن بنات الاشراف و الأولياء والحبش و أشهر الشيخات ( منليك) والهانم ست البيرة والسحاحير و يشار لهم بالقبائل أكلة لحوم البشر .... والخواجات خاصة في فترة حكم الأنجليز في السودان... كل قسم من هذه الأقسام يمتاز بطلبات مختلفة عن القسم الآخر وكذلك الأزياء فتعرف الشيخة من خلال هذا التشخيص العلاج المناسب او ما يعرف بعملية( فتح العلبة) الذي يطلق فيه البخور للمظيور حتي يعرف خيطه حسب أنواع الظار مثل الطمبرة والبوري مصاحبة بالنماذج الأيقاعية او الخيوط وبعد ذلك تقام الكرامة وتذبح فيها الخروف أسود كالعادة او ديك أحمر بعض ان توضع له الحناء في زيل و جبهة و أرجل الخروف ويضع الزابح قطعة نقود معدنية في فمه و يضغط عليها بأسنانه حتي لاينسي البسملة ... فتأتي الشيخة ومعها صاحب الكرامة و تنط الخروف أيزاناً بتخطي العوارض وتخضب جبين صاحب الكرامة بدم الخروف وتردد الشيخة: سلامتكم يا أهل الدك مقبولة يا أهل الدم .... لترتفع أيقاعات الدلوكة والطشت النحاسي و الشتامي و الكشكوش وتتصاعد أدخنة البخوي وسط مجموعة من البروش الحمراء والملونة و عصـي الأسياد والقرع و السبح و الحجارة وهذه صورة مختصرة عن ممارسة الظار في السودان...
وبي دستوركم!!!!!!!!!!!
Post: #3 Title: Re: حبيب نورة في بيت ظار ناس مستورة ( أعـادة ) Author: mamkouna Date: 03-15-2007, 08:38 AM Parent: #1
جابتني ريحة الجاولي و العدني.. إنت يا ود أمي ...فيك ياتو خيت!
Post: #4 Title: Re: حبيب نورة في بيت ظار ناس مستورة ( أعـادة ) Author: حبيب نورة Date: 03-17-2007, 10:59 AM Parent: #3
ممكونة
يعفوا و يرضوا انا خيتي شاكر حلال المشاكل !! بس ما تقولي لي الاخت لولية!!
Post: #5 Title: Re: حبيب نورة في بيت ظار ناس مستورة ( أعـادة ) Author: حبيب نورة Date: 03-20-2007, 10:51 AM Parent: #4
دقولك يا بشير شن قولك يا بشير!!
Post: #6 Title: Re: حبيب نورة في بيت ظار ناس مستورة ( أعـادة ) Author: Nasruddin Al Basheer Date: 03-20-2007, 11:02 AM Parent: #5
يا حبيب نورة ربنا يديك العافية كتاباتك كالعهد بها قمة في المتعة والجمال سرد رائع وحبكة درامية محكمة ترتكز على كوميديا وسخرية ولؤم محبب وغير عادي من كاتب اسمه حبيب نورة تسجيل حضور وإعجاب وإشادة بما تكتب.. كن بخير يا مبدع
Post: #7 Title: Re: حبيب نورة في بيت ظار ناس مستورة ( أعـادة ) Author: حبيب نورة Date: 03-20-2007, 11:15 AM Parent: #6
نصر الدين البشير الف شكر يا غالي شكرن جزيلن يعفوا و يرضوا!!
Post: #8 Title: Re: حبيب نورة في بيت ظار ناس مستورة ( أعـادة ) Author: دورنقاس Date: 03-20-2007, 11:15 AM Parent: #6
حبيبنا حبيب نورة
Quote: انا خيتي شاكر حلال المشاكل !!
وأنا كنت قايلو سميرى الفى ضميرى
بس دا لزوم تحية أولاد ماما
Post: #10 Title: Re: حبيب نورة في بيت ظار ناس مستورة ( أعـادة ) Author: حبيب نورة Date: 03-20-2007, 11:33 AM Parent: #8
دور نقاس عاد رافع ليك عصا الاسياد وتحية ملوكية ليك من الجماعة شكرن جزيلن
Post: #9 Title: Re: حبيب نورة في بيت ظار ناس مستورة ( أعـادة ) Author: ملكة سبأ Date: 03-20-2007, 11:29 AM Parent: #1
حبيب نورة ياجميل
وشنو حكاية السبعة مراكب كلهم نصارى دي ؟
Post: #11 Title: Re: حبيب نورة في بيت ظار ناس مستورة ( أعـادة ) Author: حبيب نورة Date: 03-20-2007, 11:35 AM Parent: #9
ملكة سبأ تسلمي انتي اول حاجة خيتك شنو!! عشان أفتح ليكي العلبة! وبعدين حاجات الكشف تجيبيها في ما بعد اما بخسوس السبعة مراكب وكلهم نصاري دي الا اسعل ليكي حبوبة عشان هي شيخة ومشيخة !!!
Post: #12 Title: Re: حبيب نورة في بيت ظار ناس مستورة ( أعـادة ) Author: عاصم ابوبكر حامد Date: 03-20-2007, 11:36 AM Parent: #1
يا حبيب نورة كيفك
والله انا كل ما اقراء لك يزداد اعجابى بك ولكن اتمحن جدا فيك ....
انت بتكتب وراسك منعنش ولا حاجة ....
جدا انت جميل فى التعبير وخطير فى الوصف ....
مراكيب و ظار ....
نشوفك بخير
Post: #13 Title: Re: حبيب نورة في بيت ظار ناس مستورة ( أعـادة ) Author: حبيب نورة Date: 03-20-2007, 11:41 AM Parent: #12
عاصم أبو بكر يا أخوي ما تعمل لي سمعة انا تبت من الحاجات دي توبة نصوحة ما بعملا الا يوم الخميس بس !! ودة بس عشان جرت العادة الاسبوعية وبعدين البوست دة كتبوهو الجماعة انا بس بنفذ في طلبات الاسياد! شكرن جزيلن
Post: #14 Title: Re: حبيب نورة في بيت ظار ناس مستورة ( أعـادة ) Author: عاصم ابوبكر حامد Date: 03-20-2007, 11:53 AM Parent: #13
حبيب نورة
Quote: كتبوهو الجماعة انا بس بنفذ في طلبات الاسياد!
والله انت عليك جنس نجاض الساعة عاملة تلاتة ضهر حسب توقيت السخانة يعني الجماعة صاحيين هسة بكري بجيب لينا التلاتة تسعات و نصبح في الخور علي اليمين البوست دة ما بلقي ليها ضامن
Post: #30 Title: Re: حبيب نورة في بيت ظار ناس مستورة ( أعـادة ) Author: Mustafa Mahmoud Date: 03-20-2007, 01:47 PM Parent: #29
