عصر الدهشة.....عصر الموسيقى الكاسوليكية

أسايلي، لوترابي، مزارعي
عصر الدهشة.....عصر الموسيقى الكاسوليكية

أميركا بلاد مدهشة !!
و لا أدهش من دهشتها، الا أندهاش البني كجة بها، دهشة نشأت و ترعرعت و نمت كما قرأنا سابقاً في سيرة السيد ( الطيب بيزا)، وهو يعود في أجازنه السنوية الأولى من أغترابه في السعودية، محمل بالهدايا و العطايا، لا يمل سرد نوادر المدهشات، و جلها تركزت في اشياء تنفعك ( دنيا وآخرة)، من العصائر المشكلة، سبحة الكهرمان، و حتى موية (زمزم) الأصلية المختومة المبرشمة. و غيرذلك و عدا ذلك، حظائر الأغنام التي حكى بأنها ( مكندشة)، حتي اذا كاد لنا الفقر و الجهل،سرح فينا ( قادل ، زى ملايكة علينا نازل) بمكائن هايلوكس ( بتنقط موية من العادم)، بسيرة الحنفيات التي تصب الماء في اللحظة التي تحس فيها استشعارياً بتواجد ( كوز) في الجوار.
اندهشنا الكترونيا في تلكم السنين، بمعجزة الصندوق السحري المربع الذي يشبه تلفازا صغيراً، ما أنا تضع عينك على ثقب فيه، مواجها للشمس، حتي تشهد صوراً ثلاتية الأبعاد ( لمكة مدينة)، كما يسميها أهلنا من غرب أفريقيا، و الذين في سبيل الوصول (الى منيً في غيابي)، كسروا ركبة في أطراف مدني و (القداري)، فاصطكوا الى أبد الأبدين، و لحقوا دون قصد بموسم لقيط القطن عوضا عن موسم الحج، أخترعوا ( فول الحاجات) و ( الدكوة)، و بسكويت ( النبق) الذي يشبه صحناً طائراً، في لحظات الأنتطار، و القورو و القودوقدو، غربلوا ما شاءت لهم الغربلة، الفتريتة ووزن عشرة و المقد وود عكر، أخدو الجنسية، وتاجروا في نشر الحصن الحصين، و الحجبات، و جزء عم، وروجوا لأفضل أصناف الكاموتا، ثم شاركوا في انتخابات الديمقراطية الاولى و الثانية و الثالثة، ترزية ستاتي، وريسايكليون لأكياس الأسمنت، ولا يزالون في انتظار الرابعة دون أمل، و كلما حركت غمازا صغيرا في الجانب الأيمن، تغيرت الصور بمعجزة تزيدك اندهاشاً على اندهاش، حتي الشيوعيين كانوا مندهشين من ذلك الفتح الألكتروني، فأدوا شعائرالعجب دون شكوي أو تذمر، حتى لحظة سماع صوت ( يوري قاقارين) وهو في سابع السماوات.
أمتدت حالة الأندهاش و تمددت، شملت دهشتنا ( الغاهرة)، و( الهابي لاند) و ( كازينو حماد العايم) و الذي حير أمره أهل الأقاليم و الأقانيم، وخاصة صديقنا الذي زار الخرطوم وهي ترفل في ذورة مجدها، فكان كلما ذكر أحد سيرة منطقة فيها، يهب متسائلاً
( الحارة العاشرة دي وين لسانت جيمس؟؟).
وحين قدر لي زيارة (بغداد) للمرة الأولي، لم انم ليلة وصولي، شوقاً و أندهاشاً الى رؤية بابل و حدائقها المعلقة، و لعلني الاقي السيدة ( أقبال)، زوجة الشاعر العظيم ( السياب) صدفة على الطريق العام، او في بص الدريشاب-علاوي الحلة، أو الصحافة- النجف، وهي عائدة من سوق بحري، قاتل الله ( الجت لاق)، وددت أن ألتقي بالسيد صدام، لأشكو له من ظلم أخيه النميري و عن تباريح الهوى، وعن كل ما يصعب وصفه، وسمى صديق لنا مولوده الجديد صدام بهجة و اندهاشاً، و غيره ياسر و عبد الله وفهد و خالد وفاروق و عبود وناصر تيمناً وحيرة واندهاشاً، و لم يسم أحد شارون، ولا ابايبان و لا موشي ولا حتي غولدا، برغم انتصارهم، ولكن لا بأس من لينا و دينا، و لعلني التقي بالقيان اللواتي اتى ذكرهن في الليالي الالف و ليلة، وفي (عودة الشيخ الى صباه) و حكايا كانتربري، و بساط الريح و جني الجرة و خاتم سليمان، و عبد اللطيف خضر الشهير بود الحاوي، بيد أنني لم أنس أن اضمن طلبي لأغنية ( مجذوب أونسة)، لبرنامج ما يطلبه المغتربين، ده ما سلامك، و لكني سمعت ساعة البث عوضا عنها، (فاضل عواد) يغني (هلو..أحنا نهل) فعظمت دهشتي و تكاثفت .
و في العراق التقيت بصديق بني كجة عراقي كردي اصيل، أسمه ( ابوجاسم) مثله مثل غيره لا يفرقون بينهم، كان مندهشاً من كل شئ أمريكي، حتى تمني أن يكون ( مارلون براندو) والده الحقيقي دون ( رعد)، و لا جده ( الحسين) السبط، خاصة بعد اداءه لدور والد ( سوبرمان) في نسخة الفلم الأولى، و التي عرضت بسينما ( السعدون)، وقد بلغ به الأندهاش الأمريكي حداً جعله يمحض ( البوني أم) و ( بوب مارلي) حبأ يفوق محبته للامة العربية الواحدة، ذات الرسالة الخالدة، فاضطررنا الى أخباء حقيقة كونهم غير أمريكيين، حتي لا يصاب ابوجاسم بالأكتئاب ، فيلجأ الى الأنتحار، وقد كان من أثير دعائه لنفسه، وهو يرفع كفيه كل صباح الى السماء
( يا علي، فد قمر صناعي امريكي ماكو؟، مو روسي لعد، يندق على أجري- رجلي- دا آخذ تعويظ مالي ماكو؟ هيشي أحسن من أنقس وظع – وضع- ك.....-كلمة نابية- أخت الشغلة).
لم يسقط قمر صناعي أمريكي واحد على اجر (رجل) السيد ابو جاسم، بحسب تصوره للقمر الصناعي في نفس مقاييس تلفاز مكة مدينة، (تمثالاً مصغر)، مثلما لم يتمن شاعر في وصف ( ماريا)، حتي نشبت الحرب العراقية الأيرانية، فداهمه في منزله من رجال الأمن من بادره بالقول:
( يا معود يا غمشمرجي هوى، انت زاتك مو عراقي، جدك فارسي، قوم اطلب الله، نعلا- و التي تعني اللعنة- على عرظك و شرفك يا مجوسي، زمال ابن زمال).
لحق ابوجاسم بالثورة الأسلامية في أيران، لا محبة في الأسلام، و لكن طمعاً في ان يسقط عليه قمر صناعي أمريكي، و لو طرف منه، يلامسه فتتغير حياته مرة و الى الأبد، و لكن القمر سقط مصداقاً لنبوءته، و تعساً لحظه في ( اوت باك) استراليا، و لم يصب عند سقوطه و لا ( كانغارو) واحد.
ولدت الدهشة حيثما وجد الفقر، و تعززت اينما ناء بكلكله الجهل، شملت من الأقوام، الأندي و السندي و الباكي و البنغالي، طوقت القارة الأفريقية، من كاب تاون لكاب الجداد، بقيد من الروك اند رول، وقد كان لنا صديق في سالف العصر، مغرم بالفكرة الأمريكية من أساسها، يحلو له اقحام كلمة ( الأستيتس) في كل شأن، ومن عجيب أمره، أنه كان على معرفة تامة بمداخل و مخارج مدينة ( نيويورك) التي لم يزرها ولو لمرة في حياته، أفضل من ( أجدع تكاسي)، بل أنه يعلم أضعاف ما يعلمه ( وودي ألن) في زمانه، عن المدينة التي خلدها في فنه السينمائي العظيم
( أها أول ما تخش كبري بروكلين، بلاقيك فندق دبل تري على يدك اليمين، تفوتو، الأشارة البعدو اتلانتيك افنيو، تعاين شمالك تلقى محل ايسكريم بن اند جيري، جربو رهييب، زمان كان محل سمك).
و كان أن قيض لنا الرحمن خلال عشرين عاماً أو يزيد قليلا، أن نندهش كما اندهش عباده من البني كجة، وان نشهد الدهشة في عيون غيرنا، و للدهشة الأمريكية وجوه متعددة، فاِذا سكنت في مناطق البيض أصابتك الدهشة البيضاء، و سكان ( الغيتو) تصيبهم الدهشة السوداء، و سكان الأماكن ( المانيفيستد) بالهسبان، لا محالة مندهشين اسبانياً، و عبدة خلصاء و حواريين للتويوتا وكل موديلاتها، و خاصة الكرولا موديل خمسة و تسعين ( استيك شيفت)، (مرغوبة)، يقول صديقي الأوكشنير ( صلاح منوسي)، وهي و يا للعجب مصنوعة في اليابان.
و لأننا و بسبب من (خدار) اللون الذي لا يخفى أمره على الجامة العربية، فقد اعجبنا بالأفروميريكانز منذ عهود قديمة، و تمنينا العيش في جوارهم، تماما كا جاء في أغنية ( أرحموني يا ناس و حنو علي، انا في جواركم لو تدرو بي)، ظناً كاذباً منا بصدق المثل القائل، (بأن من تشابه لونه و لون قوم، أمن شرهم)، حتي ادركنا ساعة ضيق ( الزومة) بالضربات الترجيحية، بأن القائمة تحوي غير اللون، اللباس و القدلة، و اللياقة البدنية، و حلاقة الشعر، و التمارين المتصلة على حمل الأثقال، و أتقان فنون الملاكمة، و فك رموز ( الأسلانق) والدخول في حومة (النيتي قريتي)، وغير ذلك حفظ العشر المنجيات و القنوت، فأن فاتتك النجاة فعليك ب (ابو مروة)، و هو العسكري، وقد لا يشفع، هو ولا حجبات الهوسا الأصلية، في منع الفتك الذي سيلحق بك ، وان خلت ان المنتأى عنه واسع، لا محالة تسليم بورتسودان.
ألا ان من متع الدنيا، أن تقابل ناجياً في ( الغيتو)، و الناجين من السحل و الأنقراض في الغيتو، فئة من القوم الذين يملكون قدرة على التحور الأميبي، فهؤلاء سرعان ما يبدأون في الذوبان داخل الكميونة، ذوباناً يصعب معه على سكان الغيتو تمييزهم، بغية الأنفراد بهم ( لسولبتهم)، الا في حال قولهم ( العاسمة) أو (دينكا حساحيسا)، أو حال أخراج (كيس التمباك)، و سماع كلمة ( ناااستي) من فتيات الحارة و فرقعة في الأصابع، وهموا دائمي الشكوى من ( الوايت مان)، فيكتسبون بأعلان ذلك الكره مناعة ضد الهجمات و اللكمات، و فيهم من يطلق لحيته و يؤم الجوامع، وبطحة العرقي ساكنة في جيب جلبابه، يرتل (الكوران) ترتيلا، و يسمى امام ( فلان)، يجبد لحيته طوال الوقت بداع من أصول ( الأبيل و الأستايل)، يحلل و يحرم و يجرم، و يسم من شاء بالكفر و الزندقة، ( قربت اقول اسمو).
و توسل بعضهم ببركات الشيخ ( بوب مارلي)، و رفدوا حديثهم بمقاطع منتقاة من خطبه السياسية التي تسمى أغاني، ولنا صديق كان لا يحفظ من كل غنائه غير كلمة ( سي اي ايه)، يوقت عقله و اعصابه حتي يجئ ذكرها، فيصيح بها باعلى صوته، ويدندن ببقية الأغنية حسبما اتفق، و(عزو) يؤكد لي دون أن أقدر على أقناعه بعكس ما يصدق
( الزول ده حافظ يا التاج).
و كان أن التقيت في البرونكس برجل ( من عندنا)، تحور الى جامايكي فذ، دون أن يخطر بباله انه انما يعيش في الأستيتس، ظل ( يامان مي) طوال فترة حديثنا، فتظاهرت بتصديقه، و أظنه شكرني بوصفي سوداني من ( الموذرلاند) ماما افريكا، في مرجعية ( بيتر توش)، محتجا بين الفينة و الأخرى على تعالي البيض، دائم الحض على الريفوليوشن، لا يمل استخدام عبارة ( بومبا كلاد) الشهيرة، فأدركت صدق غضبه و أكبرت ذلك فيه، و لكنني ( كان ما أخاف الكضب)، فأنه يشبه ( الطريفي)، وأن كان جيت للجد ياهو الطريفي زاتو.
وقد تداول الناس لفترة، قصة طريفة عن المهاجر النيجيري، و الذي ما ان حصل على جوازه الأمريكي، حتي خرج يقود سيارته في الطرقات، يسب و يلعن في السائقين من حوله
Those damn foreigners, they don’t know how to drive.
و البني كجة الذي احتد مع المسؤلين في أحد المطارات العريبة، فلجأ الى رقية ومعزوفة ( ايام ان اميريكان سيتيزين)، موقفا المطار ( على كراع واحدة)، فما كان من شباب المطار الا وأن اتوا له بامريكاني لابس (غطرة)، و بعد دقيقة واحدة، عزت فيها اللغة و تمنعت على البني كجة، ابتسم المترجم في وجهه بحنو قائلا:
( ليش من الصبح ما تقول سوداني وخلاص ... يا رجال، نحنا من قبيل بنشبه فيك على الطريفي).
و كذلك الذي عاد الى امه التي انتظرته عقدين من الزمان، خالي الوفاض، معدم، و حين سالته في رجاء و حياء عن حصيلة العشرين عاماً، أجابها في فخر و خيلاء ( يا حاجة خلاص ادوني الجواز)، كان بريطانيا هواها، و كانت ساعة النصرفوز ( مانشستر) .
وقد كان من أحب عبارات القشرة الى نفسي، عبارة يرددها صديق عزيز، حين قدوم مهاجر جديد، (قوم يا حبة النفسحك في ال land of plenty)، وكان مبلغ ما يصله في فسحته التعليمية، بقالة (السيف واي)، تسمعه يحدث كمن يحدث نفسه
(عليك الله شوف جنس الجبن دي و الخيرات دي، الجرجير زاتو كان اشتهيتو في)
لا متحف الفضاء و لامتحف الصحراء، و لا (سيتيزن كين)، ولا يحزنون، و لكنها تنويعات الموسيقى (الكاسوليكية)، و التي هي من أخراجات (شيخ محمد)، و الذي أقسم بالله ثلاثاً ، أنه التقى بالسيد ( جاكسون فايف) شخصياً وصافحه و ابدى اعجابه باغنياته، و لا نزال نحن في انتظار رؤية توقيعه له.
اميريكا يا صديقي و برغم افلاسها، لا تزال مدهشة، يلوذ بحماها أهل اليمين و اليسار من كل المناحي و الأمصار، و بقايا نازيين بعد توبة قيد النظر، قتلت اليابانيين، فعمروا ساحلها الغربي، ثم صنعوا السيارات والألكترونيات، و كوريا الجنوبية انجبت ( الفلات اسكرين)، بعد أن دقها ( اليانكي) دقا ً دقا، كيف حوت من كل زوج بهيج، الهندوسي و المسلم، الشيوعي و الكوز، خالطي الكيمان و فارزيها، النضال المسلح و الجالوص، الجار و المجرور، العاطف و المعطوف، الدائن و المدين، المسيخ و المسيح، هوليود و بالي وود، يتلاقحون أذا شاء الله تحت رعاية ( سوني)، فيلدون عماد الجيش العظيم، و كورال ( الفانتوم و الأوبرا)، التقيت فيها بقريبي الذي طال العهد بيننا، آتياً في زمرة المهاجرين ( اللبنانيين)، من ( صيدا) و ( سهل البقاع)، عبوراً بمطار ( اللد).
هذه البلاد مدهشة يا صديقي، و الأمريكان مندهشون مثلنا، و ليس ابلغ من دهشة امريكي، انتحى بي جانباً، و نحن في مقهىً عربي، متسائلاً
( الناس ديل بلقو الوكت ده، و القروش البقعدو بيها تمانية ساعات يدخنو في الشيشة... وين؟؟؟).
و كان في عجلة من أمره، للحاق بوظيفته الثانية.

مقعد لواثِقٍ من الامتلاء بـ (عصر الدهشة)
من (كاتبها)


أكيد محبتي وامتناني



ــــ
سأعود إن استلزم الأمر ثمة تعليق

بلة الفاضل العزيز

و مقعد امامي لك
وشكري على طوافك معي في النص
و المحبة اكيدة، لو صبرنا
الملك

دي كتابة عجيبة. دي كتب مضغوطة في صفحة او صفحتين. كتب ورسالات جامعية. وبحوث. تاريخ الهجرات واقتصادها السياسي وتعبيراتها الثقافية ومانيفيستوهاتها الاجتماعية. مدن وبلدان. ولغات. وكاموتا. هههههه. وصراع هويات. وانتحال ثقافات وشخصيات. من فلاتة مدني الكادحين، الى عصبجية هارلم وبروكلين. من مغتربي السعودية الى اللوتراب والاسايلاب في العالم الجديد. وبغداد في السبعينات كمان حكاية أخرى. كص وبيرة. وفاشية الاسماء تيمنآ بالعشرة العظام الذين عدموا نفاخ النار. وهذا الافتتان القديم بامريكا. التي غزت عقول الناس من زمان بافلامها الساحرة، ومغنييها الشواطين. وانتشار الاميركان انقلش. وكان لنا نصيب من الامركة في الخرطوم. في شارع رئيس من شوارعها قام مبنى ابيض جميل ومحروس. المركز الثقافي الامريكي في شارع القصر.

ويبدو ان للكاتب تاج السر الملك كذلك نصيبه من الهجرات والنزوح والديس-لوكيشن كما يقول إدوارد سعيد. يبدو انه عاش اكتر من نصف عمره في الهجرات والمهاجر والمنافي التي صارت اوطانآ بديلة. السودانيين ليهم الله وعيشة السوق غايتو.

الكص العراقي الشهي.

راودني خاطِرٌ
عن ماذا سيكون رد فعل من عبر
في دفات هذه الكتابة العجيبة





ولك أن تتخيل كمية (دقشمانات) من هؤلاء وهؤلاء
هههههههه



متعنا الله دائماً بعمق ما تكتب
بأن يحفظك ويحفظنا معك

محبتي واحترامي

Quote: ( أها أول ما تخش كبري بروكلين، بلاقيك فندق دبل تري على يدك اليمين، تفوتو، الأشارة البعدو اتلانتيك افنيو، تعاين شمالك تلقى محل ايسكريم بن اند جيري، جربو رهييب، زمان كان محل سمك).

ابو السُره ياخى سلامات
ياخى خلى بالك .. طولت
منك شديد ..
وقول لي ( شيخ محمد) لازم اجيب التوقيع
ضرورى من الضروى لانو عمك جاكسون الخامس
ذاتو مغرود فيهو

سلا م

بمبا كلاد ماي يووت

و الواح الكريستال تغطي واجهات عمارات القرية الظالم اهلها فتمتلئ بورصاتها اسهما ويشرب غيرها

كدرا وطينا وعلي راستا يحاحي ابصلعة في الجبسي كاب ( هجرة في الهجرة ) اتخذت من نواحي فلات بوش

مرتعا تحيته غيها وواب مان واق وان واقصي ترفها وجبة جيرك تشيكن

الدهشة عقدت لساني يا ابو السره

تسلم

يا ملكـ

الدنيا اخر دوام عندنا ياخ!

خلي النص دا يخمـّر شوية عشان نفرتقو ليكـ

تعال اقرا فرتيقتنا وما ترد زاتو ما ضروري،

الله يحيينا

محمد يوسف العزيز لك وحشة و الله

Quote: الدنيا اخر دوام عندنا ياخ! خلي النص دا يخمـّر شوية عشان نفرتقو ليكـ تعال اقرا فرتيقتنا وما ترد زاتو ما ضروري، الله يحيينا

في انتظارك
الملك

ابراهيم عدلان صديقي النيويوركي العتيد

Quote: بمبا كلاد ماي يووت و الواح الكريستال تغطي واجهات عمارات القرية الظالم اهلها فتمتلئ بورصاتها اسهما ويشرب غيرها كدرا وطينا وعلي راستا يحاحي ابصلعة في الجبسي كاب ( هجرة في الهجرة ) اتخذت من نواحي فلات بوش مرتعا تحيته غيها وواب مان واق وان واقصي ترفها وجبة جيرك تشيكن

هسة في لازمة بجيب سيرة الجيرك تشيكين؟؟
و القوت جيرك؟
و السنسميليا؟؟
المواجع يا شيخ ايراهيم، اقوم على القراي هاوند من دربي
تحيتي لك و لكل من بطرفك
النعوم ضارب السيكيوريتي ولابد
الملك

خطاب يا اخي العزيز
مشتاقين شديد شديد
و فراغ خلفته في المناحي المنافي
و حديقتك جابت بتين ما شا الله

العزاء في مريود ز بنياتي ناس ( فو حمر) و اخيتها

تاج السر

Quote: ولك أن تتخيل كمية (دقشمانات) من هؤلاء وهؤلاء

يا بلة يا اخي العزيز
رايناها بالعين المجردة ما دقشمانات نصاح و ما بتجلي

لك مودتي العامرة
الملك

يا عادل عثمان
و الله الما ضاق القص العراقي و معاو كباية لبن عيران ما اكل
جهجهتني بالصورة بالرغم من اني خليت اكل اللحم

هو شاروما في النهاية
لكن انما ايه
شكرا على ايراد الصورة

عادل عثمان
في عمر الانسان القصير، تنضغط المعارف و تنشك في الروح شك الامباز
منها ما نفترض فرضا انه لا يعنينا، و منها ما يؤرقنا و يمنع السكينة عنا
زمن قبل ان يخترع الانسان الحاسوب، كان للناس حواسيبهم التي يخزنزن
فيها الغناء و الشعر و التشكيل و الطب و الهندسة، و النوادر، وفي عصرنا الحديث
تعددت حواسيبنا، وتدفقت حكايانا، ز تمازجت الرؤى، فكان لابد من ان نجد سبيلا لأفشائها
وكان لابد من ان نضغط ( الفلايلات) حتي تسعها المساحة المتاحة، و الا فالكراش العظيم.
لا احتاج الى القول بأنني انتظر رؤيتك الخاصة الى نصوصي في امتنان و شكر.
تاج السر

يا تاج اكتب لك من بص متجه من شارلوت نورث كارولينا لواشنطون دي سي سعر تذكرته أونلاين خمسة دولارات و هو مكيف و نظيف و فيهو انترنت مجاني و بعد ده ما اندهش؟كيفن عاد؟ 

Quote: حتي ادركنا ساعة ضيق ( الزومة) بالضربات الترجيحية

حسي عليكـ الله كتابتكـ العجيبة دي ما بتجيب ( الزومة ) دي
ياخي دي كتابة صعبة يا تاج ، توهتني وسرحت بي في ستين حتة لامن نسيت البداية كانت شنو ؟
سخرية ومقارنات وأماكن وتاريخ وعييييييييييييكـ
شكلي تاني حا أبداها من الأول .

نختّ الطوبة عشان الزنقة .. جرعة لا يُمكن تناولها
في قراءة واحدة .. يمكن تعمل للواحد غيبوبة عديل!!

يا تاج
عندنا واحد صاحبنا تجميَّك، الله لا سمعك كلامو، وزاد الطين بله وعرس ليهو جامايكية، وعمل ليهو "راسطة"؛ كلو يومين تلاتة طارداهو من البيت..
___
شكراً يا تاج للمتعة..

يا ياسر ولد طيفور
شكرا ليك على حضورك و متابعتك و مشاركتك
الملك

والله يا تاج مافي أكتر من دهشتي بزيادة جودة الكبنقة في الإستيتس

علي اليمين دي غيبوبة عديل كده

إنشاء الله ما تنفعكم ياخ

Quote: ( ليش من الصبح ما تقول سوداني وخلاص ... يا رجال، نحنا من قبيل بنشبه فيك على الطريفي).

لوووووووووووووول

ممكن تمرق الطريفي من السودان لكن ما بتمرق السودان من الطريفي

بتاع الشيشة بالغ ما عارف انه شغال دوامين عشان ديل يقعدو 8 ساعات
في الشيشة..

شكراليك للموية الساااااااقطة في الهجيرة دي

Quote: وقد تداول الناس لفترة، قصة طريفة عن المهاجر النيجيري، و الذي ما ان حصل على جوازه الأمريكي، حتي خرج يقود سيارته في الطرقات، يسب و يلعن في السائقين من حوله Those damn foreigners, they don’t know how to drive

التاج سلامات
انه الاستلاب ، لعن الله الاستلاب ... هذا الذي تفعله الرأسمالية برسم جحيمها في صورة نعيم اقصى امال المهاجر فيه هي وثيقة الانتماء الممهورة بحماية الاسطول السادس فيما وراء البحار، دون ان ينتبه المسكين الي ان الاسطول السادس لا ينفعه في شئ لمغالبة الحياة و دفع خطوبها في بلاد من لا يملك فيه يُمتلك ...

الحياة دائماً هي مكان أخر (ميلان كونديرا)

(و لا أدهش من دهشتها، الا أندهاش البني كجة بها)

والله بالله الحق أدهش منك انت لا أنزل لا بقى

ياخ لما اتكلمت عن تكنلوجيا مكة مدينة أنا شعرة جلدي ######ت وقلت يايمة شيخ تاج السر يلحقني وينجدني

لأنو دا استدعاء عجيب لدهشة طفولية ماممكن تخطر ببال بشر لكن ممكن تكون واحدة من كرامات شيخي تاج.

تسلم انت وتسلم ملهمتك الكجة وبنوها والله يحازي اللكان السبب في هجرنها وشتاتها والمزيد من اندهاشها.

الأخت العزيزة سناء

من ناحية فكي دي صدقتي تتتتتتتتب
تاج السر اب غرة
بالله حضرتي مكنة ( مكة مدينة)؟؟؟
عليك الله شفتي الحاجة دي حلوة كيف؟؟ هسة تكون بقت ديجيتال، أنا ما متمني الا اعرف الزول
الكان ماشي جنب الكعبة داك هسي وين؟؟ في العراق و في شوارع بغداد، كان في رجال محترمين جدا
تلقيهم واقفين في الشوارع و كل واجد شايل ليهو لعبة زي دي و يكورك ( باوع باوع) و معناتا شاهد شاهد
بعشرين فلس الشوفة، و الغريبة الناس بكونو واقفين صف!! قربت ارجع السودان افتش مكة مدينة بتاعتنا القديمة
افتح بيها بيزنيس.
لك تحياتي و بخراتي
الملك

سلامات يا امجد

Quote: انه الاستلاب ، لعن الله الاستلاب

انت عارف قدرة الرأسمالية على التخلق و الحربائية، بتخليها اكتر أداة استلابية
لدرجة انك ما بتحس بالسلبة الا يلكزك زول، و الرأسماليين زاتم، بندهشو من
ثقافة الاخر و بلاوزو منها شديد، و الاخر دايما بيعاني من ضعف في السيلف استيم
و الحياء، فيسارع بتبني الثقافة الراسمالية، و محاولة ال fit in
و الكارثة دي بتعزز من تفاقما سلطات دول البني كجة القمعية، و مصادرتها للحريات
فما بيبقى قدامك غير انك تتبنى اي مشروع بيقدمو ليك نظام بيرعي الحريات حتي ولو كان صهيوني

الملك

اختي العزيزة دكتورة نجاة

سلام و شوق عظيم
زمن نمتع نفوسنا بالدهشة، راجين دهشة بلاد الملايو
سعيد بطلتك كالمعتاد
و الموية الساقطة ما نطيط قبور و لا شنو قالو؟؟


لك تحيتي و للاسرة
الملك

حبيبها

Quote: والله يا تاج مافي أكتر من دهشتي بزيادة جودة الكبنقة في الإستيتس علي اليمين دي غيبوبة عديل كده إنشاء الله ما تنفعكم ياخ

انتو اقعدو قرو
لمن تنعدم من السوق
الملك

ود الصايم
نزولا عند الرغبة، ومبيت كمان

و الله مافي صورة اتمنيت اصورا غير صورة بروفايلك دي.
الملك

عمران حسن
المودة و الشوق

Quote: حسي عليكـ الله كتابتكـ العجيبة دي ما بتجيب ( الزومة ) دي

الزومة مضايقي
الراس بقا دفتر جرورة و ربك يجيب العواقب سليمة
نحنا السودانيين انضربنا سوناميات تقيلة من الاستقلال لهسة
تحياني لك و للمعاك
الملك

Quote: يا تاج اكتب لك من بص متجه من شارلوت نورث كارولينا لواشنطون دي سي سعر تذكرته أونلاين خمسة دولارات و هو مكيف و نظيف و فيهو انترنت مجاني و بعد ده ما اندهش؟كيفن عاد؟

يا سيف
وصلت ولا لسة؟؟
اضرب لينا لمن تصل
نتم الدهشة
الملك

التاج
ياخي والله ما عارف أقول شنو . .
____________________________

لمن جبت سيرة (بسكويت النبق) والذي تسميه بائعاته ب(قراصة لنبق) بلعت ريقي إشتهاءا
يا ربي متين بيجي زمن (نكوضم) فيه قراصة النبق من جديد؟

سلام يا دكتور عزان

اسمها قراصة النبق بس انا حاولت احنكشا
لأنو القراصة شكلها مختلف ودي اقرب للكوكي

يا ريت تظهر علينا
نشوف الاسكاي لاين و خيراتو
الملك

Quote: بمكائن هايلوكس ( بتنقط موية من العادم)

يا جانكوف

سلام

وكاننى اسمع صديقنا الوسيلة يرد ... يا التاج هايلوكس شنو المن العادم بتنقط موية ؟

انت ما شفتا عربيات ( الدف اكتف )Defectives .. الفورد كروان فكتوريا ام عادمين .. على باليمين العربية مدوره ..واقفة فى بكانا ..

ما اتحركت اكتر من 8 ساعات لما كانوا براقبوا فى ( الجمايكيه ) .. علي باليمين الموية الطالعة من العادم تتوضا بيها عدبل كده ..

تقولى هايلكوس بالله شوفوا الزول ده؟

تسليم وتحياتى للوسـيلة ..

ورحم الله بروفسير عبيد كان بيقولينا يا اولادى اتجـاوزوا عصـر الدهشــة ؟ كلما قريبك دكتور محمود مسكنا اضنين المرفعين ؟




ملجوظة: Defectives عند الوسيلة تعنى Detectives

>
يلسلااااام ياتاج

ليك وحشه

Quote: لم انم ليلة

تصدق ده حالنا ونحن هنا لسه فى السودان !!!!!!!

محمد المعتصم

مسجل أختفاء من فليكر الزعلك منو؟؟؟

سعيد بشوفتك
و الحاميك النوم شنو؟؟

لك تحياتي
الملك

Quote: علي باليمين الموية الطالعة من العادم تتوضا بيها عدبل كده ..

هههههههه
و الله يا عادل ما بقدر ارد نسبة
لارطباطاطي
رحم الله الوسيلة حياً في شمبات
تحياتنا للاسرة

يا تاجو

Quote: ( الناس ديل بلقو الوكت ده، و القروش البقعدو بيها تمانية ساعات يدخنو في الشيشة... وين؟؟؟). و كان في عجلة من أمره، للحاق بوظيفته الثانية.

خليهم يجونا بس ندهش ليك حنانم هم و الروس ذاتو .. المافي شنو!؟

اما امريكان فارغين
مندهشين في التمانية ساعات دي!؟
ما جايب خبر اللساتك و عمدان النور ساااااااااي .. قعدات الكشتينة .. و القعدات البرا كشتينة .. الكنابي و و و و الخ.

نحن حكمتنا الاثيرة " لا تؤجل عمل اليوم الى الغد، طالما عندك فرصة تاجلو لبعد غدٍ "

المافي شنو بس!؟
الاستعجال لزومو شنو؟
قال ماشي شغلو التاني كمان؟
اها بعيشوا متين الناس ديل؟

Quote: خليهم يجونا بس ندهش ليك حنانم هم و الروس ذاتو .. المافي شنو!؟ اما امريكان فارغين مندهشين في التمانية ساعات دي!؟ ما جايب خبر اللساتك و عمدان النور ساااااااااي .. قعدات الكشتينة .. و القعدات البرا كشتينة .. الكنابي و و و و الخ. نحن حكمتنا الاثيرة " لا تؤجل عمل اليوم الى الغد، طالما عندك فرصة تاجلو لبعد غدٍ " المافي شنو بس!؟ الاستعجال لزومو شنو؟ قال ماشي شغلو التاني كمان؟ اها بعيشوا متين الناس ديل؟

قرقر على قول نجاة

و الله الا اكلمن ليك يا قيقا
سلامي للبنيات و امهن، هسة بعد الانفصال بتغير اسمك؟؟ ولا ديك الرنك ، ( رنكاوي).

Quote: و للدهشة الأمريكية وجوه متعددة، فاِذا سكنت في مناطق البيض أصابتك الدهشة البيضاء، و سكان ( الغيتو) تصيبهم الدهشة السوداء، و سكان الأماكن ( المانيفيستد) بالهسبان، لا محالة مندهشين اسبانياً،

سلام يا تاج السر.
عندي صاحبي حصل على الجواز وأظنه أصيب بالدهشة السوداء.
كان يحرص دائما على تأكيد أمركاناويته بقوله " We the Americans "ثم يعدد الصفات او الاشياء التي يحبها او لا يحبها الامريكان قبل يختمها بعبارة: يونو وا آم سيينغ؟.
وإن قلت له قولا يبعث على الدهشة فإنه كان يكتفي بعبارة Damn

تعبير بني كجة ده تعبير خرافي ياخ!
انا شخصيا ما عارف شنو يعني الواقعية السحرية لكن إذا كان المقصود بها السرد البسيط المموسق وسحر البيان، فأنت ساحر.

أحبك يا ملك

الفاتح ميرغني العزيز

الملاحظ في المتامركين دائما، انو لغتهم تعبانة شديد
عندنا واحد قام أهلو بعد عشرة سنوات، و لسه في فصل از وواظ
شبك الناس دراب قاليك، لمن أخوهو الكبير اضطر ساقو بجنبة
قاليهو يا عزو، الناس دي بتضحك عليك، كلهم بطقطقو انجليزي زى البلابل
ما تهبلنا، يقولو عليك جاي ما يوغسلافيا ، اتكلم عربي الله يهديك.

لك محبتي اضعاف
الملك

Quote: و الله الا اكلمن ليك يا قيقا سلامي للبنيات و امهن، هسة بعد الانفصال بتغير اسمك؟؟ ولا ديك الرنك ، ( رنكاوي).

لووووووول

انظر للنصف المليان من الكوب
كدا " قيقراوي " بقى اسم اجنبي ياخ!؟
ابدلو وين؟
لقد هرمنا في انتظار هذه اللحظة التاريخية
( شوف ليك جنس اثرياء حرب )

اها كدا بقيت زي الامريكان وااااحد

مرة واحد من عربان مدن الملح المستحيلة شرق الاحمر .. قال ( لا فض فوه ) :
ما عرب غير حنّا و الامريكان!
عليك الله بالمرة - تم جميلك بعد تنفذ تهديدك اعلاه - كمان كلمن بي بقيت اهلم الفي مدن الملح كلها من عربان-امريكان




------

الله يسلمك يا حبيب
ياخ التلفون بتاعك ما بشتغل معاي.. اتصل 911 ؟

القيقا
و الله في وحشة لا النفس راضية بها لتلفوناتك و لا الملتقي من شيعتي كثب.
امسك
0014439740304

الهرمان ما عندو ودوا الا تمسك في ناس الجفالي ديل و فقيه للدواجن و مخابز بدر الالكترونية
بجيك لثراء الحرب بالدرب
الملك

يا زول حيلك
إنتا قبل يومين تلاتة كنت مهكور هكرا جميلا......بسارة منصور كمان

Quote: يا زول حيلك إنتا قبل يومين تلاتة كنت مهكور هكرا جميلا......بسارة منصور كمان

يا حليلك انت يا دوب عرفت
ده كلو من تسيبك، محرسنك السايت، كسحت
الحاجة دي حصلت الصباح و انا داقي حنك خرافي مع ابراهيم عدلان، قالي عووووووك
بكري لحسن الحظ اتلافا تاقصة سريع، و سكينا الحرامي/مية
اهو نقول هكروك وين يا العنب.

الحبيب تاج السر
يا اخي قطّعت مصاريني من الضحك ....لابد من زمان وين بالكتابة الطاعمة دي ....ألف نور عليك .

تحياتي ومودتي

العزيز جعفر اسماعيل

سعيد بشوفتك و الله
ما انقطعت و لا لابد، نزلت مجموعة معقولة في الفترة الفاتت، ظنيتك مع مشاغل الحياة متناغم
برسل ليك لنكات في مسنجرك.
دمت بخير وعلى خير
الملك

مرة أخرى..

من الدهشة ما يلجم!

تحياتي يا عبقري

سناء خالد العزيزة

سعيد بحضورك رغم اللجمان الحاصل، سونامي ومفاعلات نووية، دي سلامة
كبيرة، انشا الله فرقتو البليلة، و اتمني للاسرة كل خير و سلامة، شكرا ليك على
الحضور و المتابعة و التعليق.
ز الى اللقاء
الملك

الكاموته
......... دي شنو يا ربي؟!!!!!!!

مصطفي المدثر العزيز
الكاموتا و قيل الكاموتة بحسب الساوندينق من اقليم لأقليم
هي سوفتير بتعمل ليها انستوليشن في العقل البشري ( طبقت نفس الفكرة في الحواسيب فيما بعد)
و تجئ موافقة لكل اوبريتينق سيستم و كاباسيتي، و راندوم ميموري الخ الخ
ماكان في ويندوز، لكن طاقة صغييييرة بناولوك ليها ملفوفة، ما كان في ( ابيل) لكن في دوم
هاردرايفك كان ما استيبل، بترجو ليك و بتفرمتو، لمزيد من المعلومات
الرجاء الرجوع الى مؤلف
بابيلون باي بص

Quote: لارطباطاطي

تخاف يا ج.ب.ا.ن

بالجد ابداع انتو والله

------------
ههههههههههههه ه ه ه ه كتلتني يا ملك دا ضحك خارج الفئة بتاعتي.

Quote: لكن طاقة صغييييرة بناولوك ليها ملفوفة

دا الباندويدث بتاع زمان الاصلي تمطوا كدا ما تعرف شنو يعني بكرة.
يجي بكري يقول لي أرشفة؟
الباندودث والبان كافوري والبان جديد كانت كلها إن سينك!

Quote: ما كان في ( ابيل) لكن في دوم

هههههه
ابيل ماكنتوش كان دوم (أمانة ماك تلوش).
ايوة دوم أمال الصقع دي كان بشنو؟ ما تقول لي كانت نبابيت!
قلت لي تبقى كيف بعد الفرمتة؟ غايتو الفرمتة دي كلمة جات
متأخرة في زمنها. ههههه سجلها لحسابك.

أهو نوعك دا بدي المكان طعم وريحه ولون وكلها في أقصي درجات الجمال
إفتقدنا حينا من الدهر كتابات بت قضيم وهترشات شيري وروائع أهل العوض والرحمابي وإبداعات النجم الكومديان بدر الدين شنا (أعاين فيهو وأضحك) والكبير الدكتور أبكر آدم بتاع المدن المستحيلة فعوضنا الله بعض إبداعاتهم بكتابات الرائع منصور المفتاح وهو أقرب للعاصمة من قريتنا الكائنة يعني لمن نصل إلى أمصارهم في إتجاه قريتنا بناخذ جمّه ، ويطربني ويفتنني أيضا ما يخطه النوبي الناطق بغير العربية الذي أخجل العرب زاتهم أبا جهينه جلال بن داؤود
الكاسوليكية كتبتها كما ننطقها أم يجب أن تكون الكاثوليكية ، أهو محاولة يائسة لإصياد خطأ ولو مطبعي في مقام كمٌل أدباً وإبداعاً. غايتو دا القدرت عليه في حضرة هذا المقام السامي .
لكل ولكل من مر من هنا التحية والتجلة وإتمني أن يزداد حضورك في منتدانا هذا. كثف الجرعات رجاء فالقده عطشانه.
الدخلني هنا القول المأثور
إن إستطعت فكن عالما ... فإن لم تستطع فكن متعلما
فإن لم تستطع فأحببهم ... فإن لم تستطع فلا تبغضهم

العزيز الملا عمر

النبدا من دي

Quote: الكاسوليكية كتبتها كما ننطقها أم يجب أن تكون الكاثوليكية ، أهو محاولة يائسة لإصياد خطأ ولو مطبعي في مقام كمٌل أدباً وإبداعاً. غايتو دا القدرت عليه في حضرة هذا المقام السامي .

المقصود من النجرة التي اتى بها شيخ محمد ، الموسيقى الكلاسيكية، و هي خلطة بين الكاثوليكية و الكلاسيكية، و هي اشارة الى الافتتان بالشئ دون العلم الكامل به، و يندرج العرض ده تحت مشهد الاندهاش، فتح العين و الراء، مافي اي صيد يائس، و لكن بعضاً من اثارة للفضول.
أقرأ لمعظم الاشرت ليهم و احني قامتي لبعضهم اجلالا، لا اصف كتابتي بالكوميديا فهي تراجيدية في عضما، تراجيكوميك بقولو ، او تراجكوميديا، حضوري في المنتدي من العام الفين و اربعة متواصل، و بيننا اصدقاء مشتركين، يصعب حصرهم.
شكرا لك على المتابعة و المشاركة بالتعليق، و انت من الاولي اسبغو على المكان لون و رائحة و طعم ايضا
و كلنا في حضرة العلم نتعلم
اتمني ان تعاود حضورك
الملك

يا نجاة
خفتي من كاروهات بكري؟؟؟ اسبليتيها؟؟
الارطباطاط، لها قصة يعلمها عادل صالح، واحد من اهم الفرد العريقة بواشنطن
وسوف يصل الدور الى قصها في موعد قريب، موثقة في رسالة بخط اليد وجدتها
( ملزقة) في باب بيتي، عمر الوثيقة خمستاشر سنة، بنوكليكا ( من ويكسي ليكس)
قريباً

مندهشة أنا لي هسة بـ همفري بوغرت ووليم هولدن









_______________
ضيوفك ديل كلهم ياتاج ماسمعوا الحكي منك ومتعته
يومداك لما (كوت ) كلام عمر الفاروق إتخيلتك بتحكيهو بطرقتك
وفتفت من الضحك
تاج السر لوحة جميلة وإنسان مرهف

راوية يا عباسي

الله عليك ياخي، و الله كلما اتزكر الاسباني القرب يدقشنا حمدت الله انو ما دقشنا
هسة كان الهيد لاين في سودانيز اتغير هههههههههههههه

اها كلام الفاروق ده، كان في حديث الاوزان، ومن القصص الطريف، لمن عركي جا امريكا
اول زول لاقاو بني كجة شغال في المطار، اول كلمة افتتح بيها زيارتو لامريكا ( يا الللللللللللللللللله يا عركي مالك بقيت كده
عيان ولا شنو، الحصل شنو، لا حول ولاقوة الا بالله، عجزت وووورررووك ووورررروك) و الله لمن عركي دبرس تلاتة شهور
اها قصة من تريد ان تشوف دي، خلو الناس فس صور بروفايلا و كان الله يحب المحسنين.
بالمناسبة انا قايل البوست بتاع اختنا منال محمد علي.

الكرفتة كانت كيف في زمتك؟؟؟؟


تحياتي لك يا جميلة الجميلات
الملك

سلام يا فاتح

وجدت رسالتك، و لا يسعني الا أن أشكرك شكرا جزيلا
و أتمنى أن اسمع منك قريباً

الملك ازيك ياخ انا لى زمن ما استمتعت بكتابه زى دى ...لكن بعد ما اتكلمت عن صندوق مكه مدينه شايفك (جليت) الضحاكه بتتذكرا ?والطواقى الريدى ميد والتى لا زلت اذكر الحمله الشعواء التى قادتها جدتى ضدها ... (طواقى السواد) وسط نظرات الدهشه والاستنكار باعتبار التطاول على برودكتس جايه من الحجاز وكده..الظاهر الحاجه الله يرحما كانت من انصار الهاندميد وهم وللغرابه كثر على ايامنا هذى تحياتى لك وصلاح الزين..

الملك ازيك ياخ انا لى زمن ما استمتعت بكتابه زى دى ...لكن بعد ما اتكلمت عن صندوق مكه مدينه شايفك (جليت) الضحاكه بتتذكرا ?والطواقى الريدى ميد والتى لا زلت اذكر الحمله الشعواء التى قادتها جدتى ضدها ... (طواقى السواد) وسط نظرات الدهشه والاستنكار باعتبار التطاول على( برودكتس) جايه من الحجاز وكده..الظاهر الحاجه الله يرحما كانت من انصار( الهاندميد) وهم وللغرابه كثر على ايامنا هذى تحياتى لك وصلاح الزين..

سلام يا د. محمد بابكر
الحبوبة تكون شعرت بالمنافسة لمنتجاتها، لكن صراحة طواقي الحجاز كانت مقلب
بتكش ياخ و بعدين كان في المصلاية و اشياء كثيرة لا تزال تعلق بالذاكرة


لك جزيل شكري و سلامك لصلاح الزين بيوصل الليلة قبل بكرة
الملك

up