شغال في مجالو

شغال في مجالو

التقيت أول مرة بمصطلح ( شغال في مجالو)، في مدينة ( نيويورك)، و كنت أعمل حينها في شارع منتزع من أعرق أحياء جهنم، أسمه ( أمستردام) أفنيو، كنت مثلي مثل غيري من أفراد فصائل ( البني كجة)، حريصاً على حياتي، حرصي على لقاء (الراجياني)، منتظراً في هذه المسافة اي سحابة تلاقي سحابة، مستتراً طوال ساعات دوامي، خلف لوح الزجاج ( الاكريليك) مانع الرصاص و القنابل اليدوية، سماكة عشرة بوصات، أقابل من خلفه الزبائن الأعداء بابتسامة وفائض ادرينالين، نتعامل تجارياً في أدنى الحدود الأنسانية الممكنة، استمع الى طلبات المستمعين عبر ميكرفون مثبت بالسلاسل، أردد السعر المطلوب مرتين، و عبر شباك يكفي بالكاد لمرور اطراف اصابع يد الزبون الصهيوني، تمتد اليد الغاضبة تدفع السعر المعين للغرض المعين، و تنتهي المبادلة التجارية الأنتحارية هنا و على الفور، لا سلام منك و ما منك تحية، الا أن الغالبية يتفضلون عليك قبل الأنصراف، بجملة واجبة، تبدأ بحرف ( الأف)، و تنتهي بماما.
و كان أن زارني في هذا الخندق الدكاكيني اليماني المفخخ، بعد أن سمع بوصولي الى بلاد العم سام، صديق من أيام الدراسة الخوالي، دعنا نطلق عليه أسم ( عزو)، فاجأني بزيارته و أنا ارفل في سياق شخصيتي التنكرية، البيسبول كاب، و الجاكيت ابو هود، و كل خيرات حرامية نيويورك، البوم بوكس ( ابو اتنين كابينة)، واحدة للكاشف و التانية لوردي، و كروت التلفونات المسروقة وارد ( الفورتي سكند)، و التي تمكنك بزمن مبذول، من رفع الفاتحة مع ( ناس الحلة) فردا فردا دون فرز، و في يدي كوب القهوة الورقي الشهير – آى-رسم قلب-ان واي، كنت بأختصار جريمة في شكل انسان، سبحان من صور.
أدخلت ( عزو) عبر باب سري، خاص بى و بالسيد عم أحمد، متربس حتي اليانق يانق، و في منطقة السلامة، وراء حاجز موت الغفلة، تعانقنا كصديقين عزيزين، شربنا نخب اللحظة من كل نوع من أنواع الصودا، كدي ضوق دي، و ابعدنا منها بكثير من التقوى و التقزز، كل نوع حوى مادة ( اف دي سي يلو نمبر فايف)، و التي سمعنا بأنها من مستخرجات دهن الخنزير، فقلنا مالنا و مال الحرام، و تذاكرنا قول بائعات الخمر في العيلفون ( يا شيخ ادريس، راجل الفدة و المدة، تلحقنا و تفزعنا و تبيع لى مريستي)، و تحاورنا بني كجياً ( سمنت مالك، ضعفت مالك، صلعت مالك) و اتينا على سيرة هنادي و شزا و اميرة، حتي حان الوقت لسؤاله عن الدكان الذي يعمل فيه، غير أنه نظرني يازدراء شديد و هو يجيبني:
( دكان شنو، و يماني شنو، أنا شغال في مجالي!!!!)
بيد أنني و لعبط متأصل فيني، أعتقدت بأنه يعني توزيع مجلة ( المجال) الأمريكية الذائعة الصيت، و التي تنشر بكل اللغات الهامشية، و لكني علمت منه و كله فخر، أنه يعمل في مجال هندسة شئ لا أذكره، و أنه يهندس مع الأمريكان كتفا لكتف، و كدت أسأله بسبب من عادة استوائية سودانية أصيلة
(جماعتكم ديل ما دايرين ناس؟؟)
ناسياُ تماماً أنني لم أدرس اي نوع من أنواع الهندسة، في حياتي، و لكنها خصلة ( البغارة) التي تسبق تلاشتها العقل الى اللسان.
و حين عودتي الي البيت في المساء، تباهيت بصديقي ( عزو)، أمام جمع بني كجة، المنهكين بسبب من مداورتهم لمهددات الحياة في الكوكب الأمريكي
( صاحبي طلع شغال في مجالو)
فما أعاروني أهتماماً و هم يتابعون في لهف مواقعات السيدة ( فانيسا ديل ريو) المتعددة، على شاشة التلفزيون، فشريط الفيديو، يجب أن يعود الى قواعده في نيوجيرسي صباح الغد.
سهرت تلك الليلة، أناقش بحثاً عقلياً باطنياً، تمحور حول اصول هذه الجملة ( في مجالو)، فلم أجد أقرب اليها منها غير جملة مصرية شهيرة، متدوالة بين المهاجرين المصريين، حين يقولون ( حمادة خد وضعو)، و التي تعني ببساطة، أن ( حمادة) وصل، و الوصول هو انسياب المال و الراحة التي تعقب ذلك، يليها فصل أما بنعمة ربك فحدث، فيظهر ( سنسال) الذهب، المتأرجح فوق الفنيلة ( اللاكوست)، مكتوب عليه اسم الجلالة، او اسم ( سحر)، و في حالات نادرة ( سناء) بهمزة مقدرة. وقد شاءت لى الأقدار، أن اشهد فصل تحولات السيد (سي مخلي) وهو يأخذ وضعه في اليونان، فقد تحول بقدرة قادر و في خلال سنة واحدة من العمل في البحر، من دمياطي زري الهيئة، الى راقص ديسكو معتبرفي ميدان ( بلاكا)، بل وأنه تحدث لغة يونانية، أعجب ما فيها، أنه كان يطلب حليباً، فيؤتى له بسمك.
صحوت باكراً في اليوم الذي تلى يوم ( المجالو)، و كلي أمل في أن يمن الله على بمجال من عنده، و طفقت أراجع شهادات كل اصدقائي قاطني مانهاتن، و بروكلين و البرونكس، كوني ايلاند و استاتن ايلاند، فلم أجد فيهم من يعمل( في مجالو)، فشعرت بالرضا عن نفسي، عدا أن معظم الذين استقصيت سيرتهم، كانوا عدا عدد قليل، طلاب طيران في فترة ما من حياتهم، ما أن يلتقون في السهرات العامرة، الا و حلقنا معهم دون رغبة منا ( كروس كنتري)، و هاك يا ( ارتيفيشال هورايزون)، حتي يصيبنا الدوار من ( لاندينق) عوض. و لا ازال اذكر ولع البني كجة في الثمانينات بفكرة الطيران، حتى اصبحت الكلمة صنواً للعطالة، و رمزاً للرجل لا يزال مجداً في البحث عن وظيفة، ازداد شغف الشباب بالكبتنة، فسافروا في البحث عنها الى كينيا و و انجلترا و اليونان و دول البلقان و البلطيق، و عاد معظمهم برخصة لقيادة طائرة المحرك ( السنقل)، و ناموا يحلمون بقيادة ( الجمبو) الى هذه الساعة.
وقد كانت امتع اللحظات عندي في حضرة الكباتن المرتقبين، جلوسي معهم نرقب السماء طوال ساعات الليل و النهار، و ما أن تظهر طائرة من طائرات ( سودانير)، في السماء، حتى يحتدم النزاع
دي سايقا زمراوي
لا ده كابتن سمير
كنت امتلئ أعجاباً بهذه الدقة في معرفة قائد الطائرة، و هي تحلق على ارتفاع عشرين الف قدم فوق سطح البحر، و لكنني لم أترك للحزن و الاسف فرصة يأكلان فيها قلبي، فهذا المجال ليس مجالي، فأنا امرء لا اقدر على تحديد سائق بص الحلفاية، علي خدرا رحمه الله كان، أم طيفور قباض التماسيح.
تغيرت ديموغرافيا المكان، و اطل الصباح الذي أتانا فيه مهاجراً، أول طبيب سوداني، دعنا نسميه ( عزو) أيضاً، أضافت رفقته ألقاً من نوع خاص، صباح الخير يا دكتور، مساء الخير يادكتور، أضاف بعداً جديد، توارت وراءه أقاصيص رجال أمن النميري السابقين خجلاً، كان حيياُ، مهذباً، نظيفاً، يحييك بابتسامة، حريص على ( الفلوسينق) قبل النوم و بعد النوم، قضى معنا قرابة الشهر، و مع ذلك لم يجرؤ أحد على نصحه بالعمل في دكان اليماني، حياءً و احتراماً، و ظل بعضنا يتبعه بالشكوى مثل ظله، الم في الحتة دي و الحتة ديك، ده من شنو يكون يا دوك؟؟؟؟ و ظل هو باريحيته التي لا ينضب لها معين، يجيب بمعرفة و دراية نادرين، لا تنقصهما الا قدرته على صرف الروشتة، و ما أكثر الذين يتوقون الى حبيبات (التتراسايكلين)، ففيها شفاء للناس، من المرض الدساس، في الجهاز الحساس، الذي يجئ من رفقة الوسواس الخناس، يا أعز الناس، صبراً و تعزية عن فراق أخلاص و ايناس.
طال عهد البطالة بدكتور (عزو)، و هو ينتظر يائساً المعادلة و أذن العمل، واوراق و تحقيقات للبت في أمر العمل في مجالو، تناقصت الدريهمات، و خف حماس البني كجة في شأنه، فصاروا يحيونه باقتضاب خال من لقب الدكتور (كيفك يا عزو)، و تفاقم الامرحتى تاكد سوء المآل بظهور تحايا من نوع (وين مختفي اليومين دي ياحبة)، و الكل يعلم بأنه جالس آناء الليل و أطراف النهار في مقابلة التلفزيون، من ( بارني لبارني)، و حينما أدركه اليوم الذي توهم فيه أن ( بارني) التفت اليه محيياً
(كيفك يا دكتور، رايك شنو في الحلقة دي)
جاءنا يركض لاهثاً من الرعب صائحاً:
يا جماعة الحقوني بدكان يماني...أنا خلااااااااااس.
أنعقد مجلس كبار البني كجة، في تلك الأمسية، في جلسة طارئة، و تقرر أرسال الدكتورالى غرفة عمليات (تمنية و تسعين مع برودواي)، الساعة الثامنة صباحاً، تلاتة و عشرين بتوقيت الجيش.
ازدحمت جماهير الكجة في الصباح المشهود، و أتى له البعض بالزوادة ( قدامك يوم طويل، تقل معدتك بالشباعة دي)، و الشباعة في تسميه الأمريكان هي ( المافين)، و جاء البعض يدفعهم الفضول، ليشهدوا بانفسهم ( معظمهم من خريجي المساق الأدبي)، ما آل اليه أمر الدكتور ( عزو)، و تفاكر البعض فيما بينهم و بالصوت العالي (ياخي هسة الزول ده كان قعد في السودان ما كان أخير، لو قعد في الميز عاطل، برضو الجكس بجوهو)، و قالوا أشياء حكيمة و أخرى أقل حكمة، و عزو يتصبب عرقاً و هو منكب على ( تعبية التلاجات)، و ( جاب الدرب) أناس من كل الأصقاع و حتي حدود كوستي، و تدخل علماء ( الموب) في توجيهه للطريقة الصحيحة لمسك عصا مسح البلاط، و أخيراً و صل صديقي عزو مجالو، فاختتم المهرجان بقوله:
و الله ما في احسن من انو الزول يشتغل في مجالو، فاجبناه مجتمعين و بالصوت الواحد:
( داااااا).
و قد عن لى خاطر اقرب الى التساؤل منه الى الخاطرة، متى كنا نعمل نحن في مجالنا؟؟ و لماذا نعمل في مجالنا اصلاً طالما أن الرزق يجئ من جهة معاكسة معظم الأحيان، لا علاقة لها بما تعلمناه في المدارس و الجامعات؟؟ فالذين اغتنوا من فتل العملة الصعبة و فتل الأقتصاد السوداني، و تسببوا في هجرتنا، لم يتخرجوا كخبراء أقتصاديين، و لا علاقة لهم من بعيد أو قريب به، و فكرة المجال في اصلها فكرة تقوم على اساس من حكمة تقول، بأن الأرزاق في السودان لا تجري على الحجا، و أن البهائم في امان من الهلاك، أما أعظم النصح الذي أتانا، فمفاده
(أعمل ما بدا لك لكسب العيش الشريف، لكن ما تخلي البني كجة يشوفوك)، و في التراث عبرأزلية لمن يعتبر، فالذي شافوه، غنت له البنات
( حبيبي فانتاستيك، بيضرب في البوماستيك).

يعني يا "تا" الواحد يقول شنو؟

LOVED IT

لكن إنت أولريدي عارف

تي ام

الدسكاونات و التاكسي شكلت مجالا مغنطيسا لبني كجة الاول ( الريكانيصاص )اما لوتراب ما بعد

التسعينات فلقوها بارده

البيتزاب و السيفن اليفناب لم تغمض لهم عين الا عندما تسلموا الكرت الاول


والله عندنا كترة عزو


رائع كالعادة يا تي ام رائع

ابراهيم عدلان أخي و صديقي النيويوركي العريق
و الله في نص كتابة المقال اتزكرتك
اتلفت لقيتك جيت هههههههه
الطثير كان يمكن سرده الا أن مواهين الحبر الاسفيري شحيحة
الباقي بنتم في الكتاب
لك السلامالملك

Quote: سهرت تلك الليلة، أناقش بحثاً عقلياً باطنياً، تمحور حول اصول هذه الجملة ( في مجالو)، فلم أجد أقرب اليها منها غير جملة مصرية شهيرة، متدوالة بين المهاجرين المصريين، حين يقولون ( حمادة خد وضعو)، و التي تعني ببساطة، أن ( حمادة) وصل، و الوصول هو انسياب المال و الراحة التي تعقب ذلك، يليها فصل أما بنعمة ربك فحدث، فيظهر ( سنسال) الذهب، المتأرجح فوق الفنيلة ( اللاكوست)، مكتوب عليه اسم الجلالة، او اسم ( سحر)، و في حالات نادرة ( سناء) بهمزة مقدرة.

لوووول

Quote: و طفقت أراجع شهادات كل اصدقائي قاطني مانهاتن، و بروكلين و البرونكس، كوني ايلاند و استاتن ايلاند، فلم أجد فيهم من يعمل( في مجالو)، فشعرت بالرضا عن نفسي،

i see this is as common as the flu...lol

ما عاوزين "نكوت" كل الكلام...

في السلك يا الملك

تعرف قصة مجالو دي اصلا جات من نظرتنا للعمل نحن ما بننظر لعمل كقيمة ابدا...

بنظر ليه كنوع من التباهي او كجزء من تباهي الشخصية....

وبننظر لاي عمل يدوي او عمل بسيط بعددم احترام
قبل فترة في متجر هنا تقدم شاب يعمل بائع لتحيتي وجهه يبدوامالوفا ولكن نسيت عرفته
وين.. قال لي اني درسته وسالته هل تخرجت قال نعم وهو الان في انتظار التعيين
وللك شغال بارتايم هنا..
تذكرت جيوش العطالة في السودان من كل تخصص ينتظرون المجال يجلسون في اللساتك وينامون النهار
حياة خاوية جد..

فقط لو بدأنا نحي قيمة العمل كعمل هل سيتغير الاتتيود تجاه الشغل والعمل في السودان..


طالما العمل شريف فهو عمل له قيمة عالية...

مع التحية لك ولميسون المفخرة

أختي العزيزة نجاة

Quote: طالما العمل شريف فهو عمل له قيمة عالية...

الافادة في الايجاز
و الله يا نجاة ما ضرنا الا اننا نعيب انواعا عديدة من العمل الشريف
و انتهز السانحة لأحي جموع الشباب المهاجرين في كل العالم على
صبرهم ومثابرتهم و جهادهم و صبرهم علةى المكاره في سبيل توفير
لقمة العيش الشريفة لاهلهم

لك محبتي العامرة
الملك

Quote: و انتهز السانحة لأحي جموع الشباب المهاجرين في كل العالم على صبرهم ومثابرتهم و جهادهم و صبرهم علةى المكاره في سبيل توفير لقمة العيش الشريفة لاهلهم

والله يا تاج السر

ما مقعدنا الا الكلام ده

اشكرك اخي العزيز

لك مني وافر الشكر والتقدير
seoul - south korea

أنس التوم

بالتوفيق بأذن الله

عندنا صاحبنا يا التاج (عزو) الظاهر زمان في السودان كان بتاع امن لمن جا هنا بس وقع في السيكيورتي صحبي بقول ليو والله ده السوداني الوحيد الشغال في مجالو!!
بعد التحية طبعا

والله ( بحليفتها) إنت زول كتاااب عديل كده

ممتعه ياخ

و عميقه

وأهم من هذا و ذاك

الإبتسامات التي ترتكبها عمداً/ عفواً / سهواً بين السطور ....


شكراً شكراً

_________________

ملحوظة في مجالو : مهما إمتد خيال القارئ الذي لم يسكن (نيويورك ستي) ما حيقدر يوصل لتصور لدكان اليماني هناك فهو لا يشبه في شئ دكان اليماني (اللِيلنا) ولا يستطيع إليه سبيلا..

دكان اليماني بروكلين او البرونكس - مش حتقدر تغمض عينيك..

الاخ التاج

سلام

عند امتحان الشهادة السودانية تجد الاسرة والاقارب كلهم يتكالبوا على الطالب/ة لتحديد وجهة الطالب المستقبلية في نوع الكلية المفترض التقديم والالتحاق بها, والقليل منهم من يعير صاحب الشأن برأيه عن مستقبله وماذا يتمنى أن يكون.. فيجد الطالب نفسه متخرجا بمؤهل خبره أكاديميا لكن وقت النزول به لمعترك العمل والحياة يلاقي صعوبات لا يمكن التكيف معها ولا يجد فرصة الابداع في تخطي مصاعب الحياة العملية.. فمنهم من يستطيع تمشية الامور وكثير من الناس لو عاد بهم الزمن للبداية لاختاروا طريقا مغايرا.. وكان من درسونا سابقا يستشهدون بالنابغة الراحل/ محمدأحمد محجوب.. رجل درس القانون, ثم درس الادب, وكان من أميز رجال الدبلوماسية السودانية والعربية..
من أسعد الاحوال أن يلاقي الشخص مجالو ولكن التعامل مع الواقع هو الاهم حيث ارتياد غير المجال والمثابرة للنجاح فيه..

كتّرت المحلبية في "عزو" الكلمة التي تحلو في فم الحبوبة عليها رحمة الله.. لكنها ما زالت عزو تتواصل معي عند اصحابي والمناداة بها حتى الآن..
ما احلاه سرد وحكي ...

تحياتي

Quote: دي سايقا زمراوي لا ده كابتن سمير

والله يا ابو السُره .. حسيت بالورطه والمتعه .. متباريات
يعنى انت .. ك تارقِت .. ما تقدر تفرفر ولا تنحاز لي فريق
كابتن زمراوى .. لا فريق كابتن سمير
هسى الواحد اعمل شنو !!
.
.

خطاب العزيز
عليك الله في قعدتك في الخرطوم دي اتحقق لينا من الكان سايق منو
لك تحياتي و ياريتك معانا في حفل عصام الليلة
الملك

.....






ممتع دوما ، كعادتك
تأخذنا لعوالم جميلة و مفعمة بالحياة

أحب مطالعتك كيفما إتفق
ولا أكتفى أبدن.






البنى كجة .. مصطلح يشمل منو .. و مِنُن؟


لك التحية.






.....

الوليد الصديق

ربنا يزيد الالهام

البني كجة مصطلح قديم سمعته من أخي الأكبر خالد
يحس و لا يشرح
لك تحيتي
الملك

عبد العزيز الشهير بعزو

سلام

Quote: عند امتحان الشهادة السودانية تجد الاسرة والاقارب كلهم يتكالبوا على الطالب/ة لتحديد وجهة الطالب المستقبلية في نوع الكلية المفترض التقديم والالتحاق بها, والقليل منهم من يعير صاحب الشأن برأيه عن مستقبله وماذا يتمنى أن يكون.. فيجد الطالب نفسه متخرجا بمؤهل خبره أكاديميا لكن وقت النزول به لمعترك العمل والحياة يلاقي صعوبات لا يمكن التكيف معها ولا يجد فرصة الابداع في تخطي مصاعب الحياة العملية.. فمنهم من يستطيع تمشية الامور وكثير من الناس لو عاد بهم الزمن للبداية لاختاروا طريقا مغايرا.. وكان من درسونا سابقا يستشهدون بالنابغة الراحل/ محمدأحمد محجوب.. رجل درس القانون, ثم درس الادب, وكان من أميز رجال الدبلوماسية السودانية والعربية..

أصبت أهدافا كثيرة قصدتها من المقال
أهم من كل ذلك أنني أفخر بالأنتماء لجمهور المهاجرين الذين تخلوا عن اي كبرياء زائفة
and did what the gotta do
سلامي و الاسم سالم
الملك

سـرد ممتع جدا يا التاج شكراً

Quote: أخيراً و صل صديقي عزو مجالو، فاختتم المهرجان بقوله: و الله ما في احسن من انو الزول يشتغل في مجالو، فاجبناه مجتمعين و بالصوت الواحد: ( داااااا).

دا اسمه عودة الوعى..

الذكريات كتيرة ومحتاجة لوقت لترتيب الافكار واستدعاء الاحداث والشخوص..
إنتو ناس البرانكس.. نحن ناس إيست نيويورك!! (كلكى لابس ملكى)
امانة ما حاربنا دفاعـا عن (أمجاد الشعب السودانى وعزته وكرامته..)!
وفى بروكلين سبنسـر بليس مع فولتون.. معلمة منطقة حمراء بواسطة الشرطة
ما تلقى بوليس ماشى برجلينو هناك.. والبراظرس ما يدوك الدرب (سلاماليكم)
(ولايكم وسلام) وهم كانوا يمثلوا بعبع دائم لعصابات المخدرات وينشرون جوا
من الامن والطمانينة فى المنطقـة..امن مدعوم بالرشاشات التى يخفونها فى قفاطينهم.
سبل كسب العيش هناك كانت فى العمل مع اليهود.. وكان اخف وطأة من شغل
ابواليمن.. (علا الشغالين مع اليمانية كانوا مستفيدين).. تلقى الواحد معلق فى السلم
يراقب 11 ساعة فى اليوم.. ما ينزل لأرض الناس إلا للغدا اقل من ساعـة.

واصل يا التاج واصل.. قلنا نديها دفرة شويـة

أخي ابو الريش

Quote: دا اسمه عودة الوعى..

دي الكي ويرد فتح الله عليك.
ايست نيويوركي؟؟؟ قطع شك اتلاقينا، كنت بمشي نواحي لينكس افنيو مش دي هي؟؟
انا كنت في هارلم و بعدين نورث برونكس، لكن الحوامة ودتنا بعيد
شكرا لك على السرد و الدفرة.
يا ريت تزورنا في فيرجينيا
الملك

الملك يا متعة .. يمين جنّنت الكتابة جن!!






_

Quote: عندنا صاحبنا يا التاج (عزو) الظاهر زمان في السودان كان بتاع امن لمن جا هنا بس وقع في السيكيورتي صحبي بقول ليو والله ده السوداني الوحيد الشغال في مجالو!! بعد التحية طبعا

خالد .. دا شنو يا زول!!



_
في عصر من العصور الغابرة لما مشيت (DCـيكم) .. دي أول سؤال يجيكـ:
* (البني كجة): أها .. ح تستقر في ياتو ولاية؟
ـ أنا: لا والله .. أنا راجع السعودية بس جيت أشوفكم على الطبيعة!
* (البني كجة): يا زول إت جنّيت؟ في زول بطلع من هناك وبرجع؟
ـ أنا: إنتو ما عندكم موضوع ولّ شنو؟ هسي في زول فيكم شغال (في مجالو)؟


الحمد لله الواحد لسع شغال (في مجالو) .. بينما الجماعة مازالوا (يتسكرتون ويتبّتزون)!

شيخي الباتع كيفنك

والله صنعت يومي زي ما بيقول الخواجة

بما اني أمر هذه الأيام بحالة عزوية جدا ( لا أدري ما هو مؤنث عزو لكن قطعا هو ليس عزة ولا أظنه عزيزة)

الحالة تتلخص في محاولة يائسة للاستعداد لامتحان لغة اجتيازه شرط لجلوس امتحان اخر يمكنني من العمل في (مجالو)
يعني الحالة العزوية دي ملازمة للبني كجة اينما حلوا بس المشكلة هنا ما عندنا دكاكين يمانية كان الواحد غير مجالو.

يازول انت اسحن زول قرانا وكتبنا كبني كجة

بعدين سناء البالهمزة المقدرة دي كيفتني كيف أول حاجة بتقلل الدهب تانيا الانجليزي ما فيهو همزة.

سناء بالهمزة البائنة على السطر
الفكي اونلاين

Quote: شيخي الباتع كيفنك والله صنعت يومي زي ما بيقول الخواجة بما اني أمر هذه الأيام بحالة عزوية جدا ( لا أدري ما هو مؤنث عزو لكن قطعا هو ليس عزة ولا أظنه عزيزة) الحالة تتلخص في محاولة يائسة للاستعداد لامتحان لغة اجتيازه شرط لجلوس امتحان اخر يمكنني من العمل في (مجالو) يعني الحالة العزوية دي ملازمة للبني كجة اينما حلوا بس المشكلة هنا ما عندنا دكاكين يمانية كان الواحد غير مجالو. يازول انت اسحن زول قرانا وكتبنا كبني كجة بعدين سناء البالهمزة المقدرة دي كيفتني كيف أول حاجة بتقلل الدهب تانيا الانجليزي ما فيهو همزة.

ربنا ينجحك في امتحانك ، تدقي انقليزي زى الحلاوة يا عزيزة
ههه
لك مودتي
الملك

ود الصايم الحبيب

Quote: الحمد لله الواحد لسع شغال (في مجالو) .. بينما الجماعة مازالوا (يتسكرتون ويتبّتزون)!

الله قال بقولك لو جيت تاني
بكسروك البني كجة ههههههههههههه
و الله بالجد لازم الاقيك اعمل ليك صورة
وعد
الملك

ود الصايم

Quote: الحمد لله الواحد لسع شغال (في مجالو) .. بينما الجماعة مازالوا (يتسكرتون ويتبّتزون)!

ليك يوم يا ظالم
هههه

توما
من اريحيتك و فضلك
ووالله اصبتي قي قولك، مافي زول ممكن يتخيل الدكيكين ده
انشا الله نفرد ليه مقال كامل
طبعا الاوضاع اتغيرت هسة و الناس بقت عندها اوراق رسمية و ازونات عمي
وانتهى عهد الاستغلال
لك الشكر
الملك

Quote: عندنا صاحبنا يا التاج (عزو) الظاهر زمان في السودان كان بتاع امن لمن جا هنا بس وقع في السيكيورتي صحبي بقول ليو والله ده السوداني الوحيد الشغال في مجالو!! بعد التحية طبعا

ههههههههههه
صدق و الله يا خالد
تحياتي
الملك

ميسون نجومي
الصديقة العزيزة الما بتسأل عن ظروفنا ههههه
و الله آخر مرة اتلاقينا كان في ( وأنا اقفز في ماء النهر) و أنا أبحث عن رفقة في الزمن الصعب
بركة في الفيس، و ساعي البريد، متابعين بلوقك بكل تفاصيلو

تزهري و تثمري تزدهي و تملي العش عصافير
دي دعوة صالحة
قولي امين
تحياتي الاولريدي مرقت
الملك

برى برى كان كدة من اللوترى!

مابنقدر على الجهجهة دى ...خاصة بعد راحات الخليج!


كتابة ممتعة وجميلة

تحياتى

ادمناك
.........
وكفى

يا ملك .....

إستمتعت بالسطور المجنونة (كالعادة) .... لحدي ما جيت لي دي:

Quote: ( حبيبي فانتاستيك، بيضرب في البوماستيك).

فتأكدّت من كلامك ذات مرة، لما قلت إنك (دفعة) من مدرسة الخرطوم القديمة ... ده كلام ما بيقولوا إلاّ زول حضر أيام (جرجس محارب) و(مصطفى بوستي).

الله يديك الفي مرادك.

Quote: الا أن الغالبية يتفضلون عليك قبل الأنصراف، بجملة واجبة، تبدأ بحرف ( الأف)، و تنتهي بماما.

لوووووول

حدثني من لا اشك في صدق حديثه، ان زميلو اليمني كل ما عصلج معاو كمبيوترو نهرو ليك بعدد واحد من الـ"اف ويرد" لمن تكون متبوعة بضمير المخاطب، زي السم! ..
فلما كترا صراحة - و الغضبة لصديقي و ليس لقيقاراوي دخل فيها، سو فار
فساله صاحبي : انت يا زول عارف الكلام دا معناو شنو؟
فرد اليمنقليشي القح دا و بدون تردد : اي.
سالو صاحبي رافع اربعة حواجب للدهشة( اتنين تخص الراوي): طيب ما عيب عليك ياخ! .. ما تتلفظياخ!
فرد محتجاً ( بعربية عربية راسا عديييل ) : ليش!؟ .. اش قلت انا؟ .. " تباً لك " ايش فيها!؟

طلع معتمد ترجمة انيس عبيد و اس اي مصرية ميديا ساي زولنا دا

تاج يا تاج..سلامات.. قال الحكّاي: شغال في مجالو وزايد في دلالو..و(صارف) عني مالو.. وقال المثل المعروف: الشغال في مجالو ربّى عيالو..
شكرا كتير على الإمتاع.. وزي ما تفضلت فقصص الشغالين في مجالهم لا تنتهي ولا بتتنسي لكن زي ما بقولوا: العبرة بالخواتيم؛ وكتير ما نتونس مع الأصحاب عن (فلهمتنا) داخل البلد وإنو ما ممكن أنا الخريج بالشهادة الكبيرة من الجامعة الكبيرة اشتغل في غير مجالي لكن برة، خاصة في الغرب ممكن اشتغل أي حاجة؛ أفتكر في حاجة مهمة بتفرق هي الدخل المادي؛ يعني في السودان ومهما كانت وظيفتي كبيرة من حيث الاسم لكن ما هو عائدها المادي مقارنة بما يحصل عليه الواحد هناك ؛ الناس في أوربا وأمريكا ومن الأعمال الما في مجالهم قدروا يعولوا اسرهم ويساعدوا أهلهم ويبنوا بيوت ويأسسوا لأعمال أخرى الخ..
من قصصنا صاحبنا كان في السودان شغال في مطبعة وهنا اشتغل في توزيع الجرايد، واحد من أهلو في السودان سألوا من شغلو قاليه شغال في جريدة، فرد عليهو بكل براءة: كويس والله، لقيت ليك شغلة في مجالك!..
هناك قصة أحكيها كتير عند الحديث عن طريقة اختيارنا أو أهلنا (للمجال)؛ أو: الطب والهندسة والمحاماة دون مراعاة ليست للرغبة الشخصية ، ولكن والأهم دون إعتبار لما يتطلبه سوق العمل من حيث سهولة الحصول على مهنة بسرعة وبدخل جيد، وهي ليست خطأ في طريقة تفكير الأسر بل في السياسة التعليمية ككل.. القصة هي، وقبل سنتين في هولندة حصل طالب في إمتحانات الدخول للتعليم العالي على الدرجة الكاملة في تسعة مواد، وعلى تسعة من عشرة في الأربعة أو الخمسة مواد الأخرى، ولأنها كانت تنيجة مميزة سألوهو في التلفزيون: عايز تدرس شنو.. تصوروا قال عايز يبقى سواق بص.. لكن المشكلة أو (تخصص) سواق البص لا يسمح فيه بطلبة اقل من عمر واحد وعشرين سنة، وهو عمرة 17 عشان كدة ح يمشي يقرا فيزيا في الأربعة سنين الجاية لغاية ما يتم ال21 ويعمل دراسة سائق بص..
الأزمات الإقتصادية التي تجتاح العالم (المنظم) مثلما هو حاصل من قبل سنتين ومثلما ما حدث قبل حوالي عشرة سنوات خلتنا نعرف أنو حتى أهل البلد: الشُقُر وابّان عيوناً خُدُر برضو ممكن يشتغلوا في غير مجالهم.. قابلت زملاء من لديه خبرة عشرة سنوات في الكمبيوتر واشتغل في سوبرماركت لامن فقد وظيفتو والتي عاد لها بعد تحسن سوق العمل، زميلة كانت خريجة جديدة قالت أحبت العمل في النظافة أكتر من شغل البرودكشن... وحتى لا ننس أنفسنا.. وسبحان الله ولأن الزراعة هي مهنة أبائي وأجدادي فلم أجد عملاً (ولا في مجالي حتى) أمتع من العمل في المزارع.. وأتمنى من كل قلبي أن أعمل مزارعاً محترفا في يوم قريب،، ولكن في وسط بلاد البني كجة أم خيرا برة!

ود الملك

ابداع ...معالجة رائعة
كل الود

صلاح اسماعيل
أخي وصديقي
مثال السوداني الذي نحتفي و نقتفي و نتشرف بك في كل العالم
بعض من ابداعك ، و عظم نفسك و سمو خلقك
لك مودتي الدائمة
الملك

Quote: و جاء البعض يدفعهم الفضول، ليشهدوا بانفسهم ( معظمهم من خريجي المساق الأدبي)، ما آل اليه أمر الدكتور ( عزو)

هههههههههههههههههههههههههههههههه
الله لا كسبك يا جانكوف, كتلتني بالضحك

بالبلدي كدا يا ملك
الواحد يتمنى كل ما يصبح الصباح
يستفتح بي نفحة من نفحاتك

فشنو
ما تطول بالله عليك
كتِر لينا
وما يهمك
إن شاء الله نفطس من الجمال


أكيد محبتي وعرفاني واحترامي

الأجمل أن تستفز كاتباً بعبارة ما تحس بيها وتمشي
ويقعد هو بعد داكـ يسوي سواتكـ الما خمج دي ...

_____
كوت وردة

ياسلام يا تاجو

ـــــــــ
أخص بالشكر هنا السيد ملاسي كونه نبهني لهذا البوست

البني كجة دي شنو؟ ما تحرقو روحنا ساكت...

أبو السرة, دايماً مبدع الله يديك العافية
غايتو مجالو دى بالغتا فيها عديل الليلة
بعد الإنتهاء من السطر الأخير فى مجالو
تذكرت أيام الدرش الصاح لكن أخير منك شوية
مافى نيويورك, فى ريشموند
أخوك فى أسبوع واحد بقى أحرف من بابا جونس زاتو فى الكلوسنق
والديليفرى بجميع أنواعو شى بيتزا وشى زهور وشى مابعرف شنو
أجمل حاجة فى أمريكاإنو تغيير المجال فيها زى تغيير القميص (عادى جدا)
والأجمل من ده كلو إنو الواحد فى النهاية جلا من مجالو وإشتغل مع كمال طيفور وجاورك

كل الود

فضلى البكرى

فضلي البكري أخي الولدتنا امهات مختلفات و متفقات

انتو ناس ساوث، ثاوس على قول الكجة ، و نحنا ناس نورث لمن لمتنا فيرجينيا في الوسط
و الله الشوق اطنان، ليك و للاسرة الكريمة، تركتو وراكم فراغ اشبه بالفراغ الخلفو بوب مارلي في الريقي، قصرت معاك؟؟
قضينا في الجيرة ستة سنوات من اجمل الايام التي قضيتها في امريكا، و لكن دوام الحال من المحال
سلامي لسمعة و ام سمعة و بنياتي الصغار
الملك

عزيزى .. تاج سر بنى كجة
تحياتى

متعة والله ..
التصوير بالكلمات فن راقى لمن يجيده مثلك ، يستمتع به المتلقى
مجال ياهو مجالك!

الهنود أو الباكستان ياتى لأمريكا ويسأل الماشى شنو، يفك ليك (مجالو) عكس الهواء،
ويدرس من جد يد فى مجال البجيب الدولارات . كما يقول المصاروة الرزق يحب الخفية!

ممتع جداً


شكراً يا تاج

سلامات يا تاج
اولا انا آسف انو الوكت ما سمح لي بمهاتفتك او زيارتك لما
كنت جايي من شارلوت لواشنطن-لو تتذكر- حيث اني كنت متوجه
للمطار لاحق السعودية عشان اشتغل في مجالي ههههه.
ياخي حقو تكتب عن ناس امريكا ديل بتوسع و تفكر جادي في أنو
المشروع ده يكون مشروع كتاب، لأنك راصدهم بدقة و مجننهم جن.

الجايات اكتر من الرايحات يا سيف

بعدين انا اولريدي نشرت كتاب في الحتة دي
و التاني في الطريق
تصل بالسلامة
الملك

و الشكر ليك اضعاف يا جدو
سليمان؟؟؟؟؟؟

Quote: و الشكر ليك اضعاف يا جدو سليمان؟؟؟؟؟؟

الملك الكتَاب

فهمت من الاستفهام أعلاه هل أنا سليمان؟؟
لا أدري من هو سليمان ولكنني لست سليمان
ولا اعتقد اننا تقابلنا من قبل

والحقيقة انني لم اكتب في البورد من سنين ولكن كتابتك الإبداعية انتزعتني من
جمودي فوجدت أصابعي تجري على الكيبورد لأسجل هذا الرد المقتضب لبيان الحضور وتأكيد المتابعة

تقبل محبتي الصادقة وإعجابي الأكيد

جدو

أخي العزيز جدو

Quote: فهمت من الاستفهام أعلاه هل أنا سليمان؟؟ لا أدري من هو سليمان ولكنني لست سليمان ولا اعتقد اننا تقابلنا من قبل

لي صديق عزيز اسمه سليمان جدو لم أحظ برؤيته لزمن طويل
أعتقدت لسبب ما أنك هو أو أنه أنت، و لكنني و كما يبدو
قد التقيت بصديق جديد، و اصبح لى جدان، أن صح النحو
سعيد بمعرفتك و أتقبل منك محبتك، متمنيا أن تتقبل تقديري و مودتي
وشكري لك على الدخول للتعقيب
و اتمنى أن أكون عند حسن ظنك دائماً
الملك

نادر الفضلي ناس القديمة الما بيخلص ودهم
الجماعة الزكرتهم ديل بجو مدعومين بشهادات في مختلف المجالات
ممضية و موثقة هههههههههه
الى ان نلتقي يا صديقي
الملك

عمران ود حسن ود صالح

كوت الوردة ده الا ستفزاز زااااااتو
لك محبتي يا ابن عمي
المك

أخي العزيز بله الفاضل
من هنا و لقدام تطويل مافي

نيران صديقة شديد
لك شكري و تقديري
الملك

خدر الفنان

انت بتموت؟؟؟ هههههه
مبروك الوافد الجديد ابن خالة وليداتك

مختفي!!!!!
سعيد بشوفتك في المجال
الملك

عيسى اخي العزيز

Quote: وإنو ما ممكن أنا الخريج بالشهادة الكبيرة من الجامعة الكبيرة اشتغل في غير مجالي لكن برة، خاصة في الغرب ممكن اشتغل أي حاجة؛ أفتكر في حاجة مهمة بتفرق هي الدخل المادي؛ يعني في السودان ومهما كانت وظيفتي كبيرة من حيث الاسم لكن ما هو عائدها المادي مقارنة بما يحصل عليه الواحد هناك ؛ الناس في أوربا وأمريكا ومن الأعمال الما في مجالهم قدروا يعولوا اسرهم ويساعدوا أهلهم ويبنوا بيوت ويأسسوا لأعمال أخرى الخ..

بيت القصيد

العيش في هذه الدنيا يستوجب المصاريف، ز طرق المصاريف صنعت عبقرية ستيف جوبس عبقري ( ابل)
الذي لم يكمل الثانوية، و بيل قيتس الذي لم يكمل هارفارد بل تركها متعمدا و بكامل وعيه، ليصنعوا لنا معجزة كل القرون
كل ما يهمني في الأمر، النظر الى العمل الشريف كقيمة عليا، والا فالناس سيجبرون على هكذا فهم

لك التحبة
الملك

القيقا راااوي العباسي ( حلوة دي) مش؟؟

Quote: حدثني من لا اشك في صدق حديثه، ان زميلو اليمني كل ما عصلج معاو كمبيوترو نهرو ليك بعدد واحد من الـ"اف ويرد" لمن تكون متبوعة بضمير المخاطب، زي السم! .. فلما كترا صراحة - و الغضبة لصديقي و ليس لقيقاراوي دخل فيها، سو فار فساله صاحبي : انت يا زول عارف الكلام دا معناو شنو؟ فرد اليمنقليشي القح دا و بدون تردد : اي. سالو صاحبي رافع اربعة حواجب للدهشة( اتنين تخص الراوي): طيب ما عيب عليك ياخ! .. ما تتلفظياخ! فرد محتجاً ( بعربية عربية راسا عديييل ) : ليش!؟ .. اش قلت انا؟ .. " تباً لك " ايش فيها!؟ طلع معتمد ترجمة انيس عبيد و اس اي مصرية ميديا ساي زولنا دا

ابراهيم عدلان الحي و موجود ده شال عكاز و سكا بيو زول داير يكسرو
تقولي يماني؟؟؟
عارف العراقيين لمن يقولو كلمتهم الكعبة ديك بيعتبروها قمة الدعابة و بيستغربو الزول بيزعل ليه؟؟
تحياتي للبنيات و امهن
الملك

محمد ابو العزائم الدفعة

أها ثبت شرعاً ولا لا؟؟

Quote: ده كلام ما بيقولوا إلاّ زول حضر أيام (جرجس محارب) و(مصطفى بوستي).

و حسن عبيد الشايقي عليه رحمة الله و عبد الرحمن دياب و الزهران و سفيان الرفاعي و اسكتش......
كم احن الى تلك الايام


لك مودتي
الملك

Quote: ادمناك

من قلوبنا و اخترناك

تسلمي يا نازك
لم مودتي
الملك

مهيرة

Quote: برى برى كان كدة من اللوترى! مابنقدر على الجهجهة دى ...خاصة بعد راحات الخليج!

لكن و الله فايتك جنس ديسكو
القصص دي بقت اساطير الاولين، الناس هسة في مجالات عجيبة.
تحيتي
الملك

ملك الكتابة المتوج لا تعليق يليق كل ما اري بوستا معلق وتستلفتني لغته اعلم انه لك يا اخ ربنا يحفظك وثمة طلب ارجوك وثق لنا ما تكتب واهدينا اياه . لك كل التقدير وعظيم الاحترام.

سلامات يا ملك
مر زمان طويل لم تجذبني اي كتابه ..
شكرا "يو ميد ماي داي "
واقعية التصاوير مفتاح حنكة الراوي ..
لك الود
هامش :
بما اني اني من الحلفايا رن هاتف الذكريات بما تناولت من صوره اعلاه فجلت بالعديد من بصات الحلفايا وشخوصها الاسطوريه العتيقه من بص "وديابا" الى بصات "الكرراب"
ــــــــــــــــــــــــــ
ايمن تابر

ِAs usual:Fit for a King
كتابة واخده وضعها آوي.
إلهي يفتحها في وشك يا كنج.

محبتي المعروفة

الفاتح ميرغني الصديق العزيز
و الله دعواتك دي براها بالدنيا
لك مودتي العامرة
الملك

ايمن سلام

Quote: فجلت بالعديد من بصات الحلفايا وشخوصها الاسطوريه العتيقه من بص "وديابا" الى بصات "الكرراب"

يا سلااااااام ياخي
النقوم اقالدك
مدينتان لهما في قلبي ما اتسع من الود و ما يقدر على حمله من الحب
مدني
و الحلفايا
أجمل سنوات عمري، و أعظم الأصدقاء و أحب الأهل، تعلمت منهما و فيهما كلما علمته في حياتي
و كلما صنع تاج السر الذي هو انا الآن، خيراً كنت أم شراً.
لك ودي
تاج السر

Quote: ود الملك ابداع ...معالجة رائعة كل الود

سلام يا صلاح خليفـة..

تذكر يا صلاح لما انت زاتك كنت شغال فى مجالك فى البرانكس؟ سنة تسعين وواحد وتسعين.. فى كشك
سندوتشـات فطور التلاميذ الكنت تعبيها بالليل.. والله جهاد عظيم وفى الويك اند ترص كتب الصيدلة وتقعد
كسـر للصباح.. توج الجهاد بنجاح وترخيص ولاية نيويورك ثم صيدلية خاصة فى شـارع 116 إيست.. معلش
سامحنا ففى ذكر مثل هـذا دفع لهمم الشباب والجيل الصاعـد ليحذوا حذو النجاح ومتطلباته من تلقى
الصعوبات..

مشاهيـر على مستوى الوطن كانوا شغالين فى مجالاتهم..





.

Quote: ملك الكتابة المتوج لا تعليق يليق كل ما اري بوستا معلق وتستلفتني لغته اعلم انه لك يا اخ ربنا يحفظك وثمة طلب ارجوك وثق لنا ما تكتب واهدينا اياه . لك كل التقدير وعظيم الاحترام.

الصادق أخوي العزيز
لك شكري و تقديري و محبتي
تواضعي يخجل أمام كلماتك كل مرة أقرأ لك فيها تعليقا على نصوصي
هذا البورد من صنيع بني كجة أمريكا و على رأسهم الكجة الأصيل بكري أبوبكر
صنعته المرارات و سنوات الجهاد الصعب و خطر الموت المحدق
التحية لك و لكل شرفاء السودان في كل انحاء العالم
الملك

Quote: و أنا ارفل في سياق شخصيتي التنكرية، البيسبول كاب، و الجاكيت ابو هود، و كل خيرات حرامية نيويورك، البوم بوكس ( ابو اتنين كابينة)، واحدة للكاشف و التانية لوردي، و كروت التلفونات المسروقة وارد ( الفورتي سكند)

لله درك يا ملك _ ملك ملوك عموم البنى كجة

اعدتنا للفورتى سكند عندما كانت الدقيقة للسودان من AT&T بثلاثة دولارات

ومحاولات فتح الخط أحياناً تأخد ساعات وساعات

وتمر المكالمة عن طريق اليونان قبل أن تصل الخرطوم حيث تكون الحاجة منتظره لأكثر من يومين لسماع صوت ابنها المغترب المكلوم

وتزرف الدموع ويتم السؤال عن كل ناس الفريق والشوق بحر ما ليهو حد

هذا الكلام طبعاً قبل اللوتراب واللاسايلاب ومن أتى بعدهم حتى صارت الآن الدقيقة بأقل من عشرة سنتات

وصارت المسكولات تصلك من ابودليق وودحسونه والعسيلات وعلى راس كل ساعة

وأمى زاتها بقت ترسل ليك مستش عادى وتقوليك اتصل بعد ساعة من الآن وبعد الفطور

وأنا منتظراك جنب الوسترن يونين بى نمرة الحوالة دحين يا وليدى ما تتأخر

شكراً ياملك

يا سلام عليك يا تاج.....والله إنت راجل كتاب...ودا وعكس لواقع حقيقي بمنظور فكاهي منمق

إنتبهت لبوستيك هذا بعد أن وجدت من هم أقل قامة ينتقدون كتاباتك



أغرب حاجة حسادك أجاويدك



تحياتي وواصل ياحبيب.....

بمناسبة يا ملكـ .. كل سنة وإنت طيب
(قبل الزحمة وكـدا .. إنت عارف البني كجة وطباعم الشينة)!

يا ملك

Quote: القيقا راااوي العباسي ( حلوة دي) مش؟؟

اهو دا التهجم .. و الشغل برّة المجال ذاتو

قيقا راوي = 1024×2 راوية
شرعاً الكلام دا طبعاً

ما بتدي حريف ... نحن اهل الشئ زااااتا ما متهجمين ساي.

بس نردد نداء الباعة في الملجات :

الشغلة ما شغلتنا .. لكن الظروف جبرتنا!

Quote: و جاء البعض يدفعهم الفضول، ليشهدوا بانفسهم ( معظمهم من خريجي المساق الأدبي)

شنو يعنى ياخ.......ما عصرت علينا وقصدتنا عدييييييييييل كده
يعنى ناس تالته على* ديل ما يشوفوا ناس تالته ابوبكر** لامن عم بابكر*** يدرشهم
وبراك عارف انه دى من الاشياء النادره انه ناس ابوبكر يدرشوهم

======
*فصل المساق الادبى فى الطابق التانى الجانب الغربى
**فصل العلمى الاديشنال فى الطابق الارضى اخر فصل فى الجانب الغربى
***عم بابكر صول الكديد فى الخرطوم القديمه


=====
لكن صحيح بكرى ليهو حق يعلق بوستاتك فوق فى المنبر

.
رائع ...ممتع..و أنا عاااافي منك و من ملاسي اللي "لفت نظرنا" للبوست الجميل و الزول الأجمل

محسوبك "زميل" سابق في دكان زلمة لمدة أسبوع و سيكيوريتي بوليص لسنة كاملة و تكاسي حافظ شوارع ميلواكي لسنة أيضآ و بتاع آييسكريم صيفين كاملينو أعرف كيف أصطاد الزبائن في عز الثلج..قبل أن يمن الله علي بمجالي ..لوول..
أنا فرحان بكتابتك دي و هسع ح أفتش باقي الكتابات القالها ملاسي دي..

تقديري..


.

العزيز تاج السر، يا "ملك"! (ورش - أو يا "مالك" – القلم؛ حسب رواية حفص)

عمل شيق ويراع متفرد، تجلى في لوحات انسيابية ومناظر درامية، ثم ماذا ... تفرد فيه إبداعوية الفنان التشكيلي وتجسموية المصور الرائع.

قرأت المقالات كلها ورقص قلبي طربا حينئذ، لكن لم يسعفن الوقت بأن أضع من الرد أجزله، ليكون نعم الجزاء الوفاق، ذلك أنني شغلت بأمور الدنيا ومناقشات بيزنطية، عزفت عنها الآن لأسباب عدة.

لقد وقفت على بعض أعمالك وكم تحسرت على أننا لم نحتس بعض من الصودا سويا، تلك التي عشقها عزو؛ آتية بكل لون بهيج.



(أنت تعال: عزو ده من أعضاء نادي البلح الرياضي؟)



لك مودتي ودمت لنا يراعا مصوِّرا ومدادا مشكِّلا...



أخوكم محمد بدوي



وعدتني بالكتاب – ووعد الحرّ دين عليه!

خيط إثر تنوير دائم بالجديد في هذه المجلة:

http://www.oudnad.net/59/aboutcover59.php


وقد كان غلاف المجلة الإلكترونية في نسختها الأخيرة على الرابط التالي:
http://www.oudnad.net/index.htm?utm_source=issue59&utm_...jadid59_announcement



نسخة من الرابطين أعلاه
إلى ملاسي
للتأمل

شكرا يا صديقي، عمل غير عادي،

أبداع، يا أيها "اللعين"!

ختيتك على الله يا تاج !

مودتي

أخوكم

م.ب.م

الاخ تاج

موضوع شيق وعميق

كنت متابع برامج تلفزيوني اسمو اي شئ من اجل المال ( اني ثنغ فور موني ) اها مقدم البرامج بعض مرات بيسال الشخص عن شغلو ومؤهلاتو فكان من بينهم سيدتين وحده عندها ماجستير كيمياء وشغالة بتلم في الزبالة والتانية عندها ماجستير في الكهرباء على ما اعتقد وشغالة سائقة شاحنة وكانت ضمن اجاباتهم انهم يحبون عملهم اكتر من مجالهم مع انهم امريكيون الاصل

مديرنا امريكي سي اف او زنجي يحب السودانيون اها قال لي مدير قسم عربي نجيب معاك واحد في المكتب وازيد ليك راتبك رفض مدير القسم وقال عايز مكتب منفصل بدون زيادة

فقام قال لي جادا ومازحا انو قال لي امو ماشي يشتغل مدير مالي في الخليج قالت ليهو (لت ذم كول يو اني ثنغ جست تيك ذا موني اند كم باك هوم )


تحياتي

زاتوووو

عيني باردة

Quote: الحمد لله الواحد لسع شغال (في مجالو) .. بينما الجماعة مازالوا (يتسكرتون ويتبّتزون)!

تاج السر الملك يا ملك، يا رائع يا مبدع.
أها، بعد دا نصيحتك شنو للناس القدو
لوتري العام دا ما عامناول؟؟؟

تحياتي ليك في نيويورك، ولود
الصائم في مجالو...

معاوية المدير العزيز

و الله نصيحتي الصبر و المثابرة، الريسيشن ضرب الدكاكين على كل
وقو ليهم يخلو بالن من الصورة، تلتماية في تلتماية، و يا ريت يرسلوها
لينا في الاستديو عشان ينفعونا و ننفعهم شفت النظرة الانتهازية دي ههههه

لك تحيتي
الملك

تسلم عينك يا ابراهيم موسى

سلامات يا زااااتو

ضربت المسمار بالشاكوش
شعارنا ( لو في فلة الشغل ما عيب)و كالما ان الرجل لا يتكفف الناس فراسه مرفوعة
الامريكان لا يسألون عن نوع العمل و لكن السؤال دائما يأتي في شكل ( عندك و ظيفة؟؟؟)
أن أجبت بنعم فأنت محترم بغض النظر عن نوع الوظيفة




تحياتي
الملك

Quote: أبداع، يا أيها "اللعين"! ختيتك على الله يا تاج !

هههههههههه
الدعوات عندك يا دكتور
شكرا ليك و بعض من ابداعك
الملك

ود البدوي الصديق

Quote: العزيز تاج السر، يا "ملك"! (ورش - أو يا "مالك" – القلم؛ حسب رواية حفص) عمل شيق ويراع متفرد، تجلى في لوحات انسيابية ومناظر درامية، ثم ماذا ... تفرد فيه إبداعوية الفنان التشكيلي وتجسموية المصور الرائع. قرأت المقالات كلها ورقص قلبي طربا حينئذ، لكن لم يسعفن الوقت بأن أضع من الرد أجزله، ليكون نعم الجزاء الوفاق، ذلك أنني شغلت بأمور الدنيا ومناقشات بيزنطية، عزفت عنها الآن لأسباب عدة. لقد وقفت على بعض أعمالك وكم تحسرت على أننا لم نحتس بعض من الصودا سويا، تلك التي عشقها عزو؛ آتية بكل لون بهيج. (أنت تعال: عزو ده من أعضاء نادي البلح الرياضي؟) لك مودتي ودمت لنا يراعا مصوِّرا ومدادا مشكِّلا... أخوكم محمد بدوي وعدتني بالكتاب – ووعد الحرّ دين عليه!

اشكر للزمن و لأخي صديقي أن تشرفت بمعرفتك و لقاء شخصكم الكريم
عزو ده بس اسكت ساي بوريك قصتو قريب
أما عن الكتاب فانشا الله مع صديق بدوي بيصلك باسرع فرصة
لك مودتي و انت ترفل في الديوان الشرغربي
و لا انسي شكرك على الديوانين و السي دي و سوف اكتب عن كا ذلك قريباً

السلام
الملك

الطيب بشير الزميل الدكاكيني العريق
أولا امسك عندك اقرا الحكايا السابقات


http://tajsudan.maktoobblog.com/


هههههههههه
ريزمي اخت الموت لاكين ههههههههههههه

الله يديك العافية و الله من قلبي ما اكلشيه ساكت
ويقدرك
الملك

Quote: *فصل المساق الادبى فى الطابق التانى الجانب الغربى **فصل العلمى الاديشنال فى الطابق الارضى اخر فصل فى الجانب الغربى ***عم بابكر صول الكديد فى الخرطوم القديمه

محمد ود زكريا

لا حولتن بالله، متذكر ده كلو؟؟؟؟
ناس ابوبكر زارنا منهم منتصر القدال قبل فترة و لا كان في عمر؟؟؟
لكن شفنا ناس (علي) في الزحمة اليوم داك و بعض من ناس (عثمان) و كان ما اخاف الكضب الشفيع أحمد الطيب
و جمال عبد الرحيم و محمد الأمين الخليفة علي مالك من علي
بكري قصر و الله هههههه

لك ودي و دامت القديمة منارأ يهدنا الى المحبة
الملك

ونت طيب يا صايم
ما تسمع كلام امير

أخي العزيز ياسر عبد القادر
و الله سعيد بوصولك للبوست وانك وجدت فيه المتعة، فالفن الخالي من المتعة فن ساقط
أنا ما من جماعة الفن للفن و الحاجات الصفوية ديك، نحنا غبش و بنظل غبش
كان ما ضحكنا من الكريهة، المغسة بتشرطنا
لك محبتي
الملك

Quote: لله درك يا ملك _ ملك ملوك عموم البنى كجة اعدتنا للفورتى سكند عندما كانت الدقيقة للسودان من AT&T بثلاثة دولارات ومحاولات فتح الخط أحياناً تأخد ساعات وساعات وتمر المكالمة عن طريق اليونان قبل أن تصل الخرطوم حيث تكون الحاجة منتظره لأكثر من يومين لسماع صوت ابنها المغترب المكلوم وتزرف الدموع ويتم السؤال عن كل ناس الفريق والشوق بحر ما ليهو حد هذا الكلام طبعاً قبل اللوتراب واللاسايلاب ومن أتى بعدهم حتى صارت الآن الدقيقة بأقل من عشرة سنتات وصارت المسكولات تصلك من ابودليق وودحسونه والعسيلات وعلى راس كل ساعة وأمى زاتها بقت ترسل ليك مستش عادى وتقوليك اتصل بعد ساعة من الآن وبعد الفطور وأنا منتظراك جنب الوسترن يونين بى نمرة الحوالة دحين يا وليدى ما تتأخر

فعلا يا حسن ده كان في زمن جماعة ورق المزارع
نحنا كنا بنشتري النمر المضروبة ( ما يكون في بوليس بعاين) ، بدوك النمرة في ورفة ######اااانة
بخمسة دولار، تقوم تمشي اقرب تلفون عمومي، و تضرب السودان، أنت و حظك، او اشتغلت، ممكن
يرسلو لخالك يجي من الحصاحيصا يتكلم معاك، بعد شوية شركة التلفونات تبلغ البوليس، تشوفو من بعييييييد
بفتش للتلفون، تتوكل على الله و تفك البيرق هههههه


يا زول هسة ابو الاسكايب حارق تش، عينك للحاجة تلايق في الخدرا

لك الود
الملك

Quote: يا زول هسة ابو الاسكايب حارق تش، عينك للحاجة تلايق في الخدرا

اسكايبك البزازى اليوم كلو دا؟ لا عرفناك داخل لا عرفناك مارق؟

دا الحاجة بتلم فيهو كيف؟

(انا طبعاً لو قلت ليك انا فهمت شنو لمن قريت "شغال فى مجالو" - بالنسبة للمجال الجوى وكدا - برفدونى من البورض)






... المهم ....

من الحاجات اللذيذة برضو في ناس امريكا من كل الانواع
موضوع القراية

اذكر مرة رجعنا السودان واحد ادانا قروش لاهله
جات امه واخته ومعاهم واحدة يشيلوها

اها الام والاخت دي تخت ودي تشيل قالو الولد بقرأ هندسة فضاء
ولا يقولوليك بيدرس هندسة جينات
حاجات غميسة ورنانة شديد
والغريبة الى الان الحاجة دي مدورة بشدة

طبعا برضو المشو كلهم واولادهم كبرو بقوليك اولادنا بيقرو طب
برضو دي يا الملك عايزة ليها بوست

الناس البدو معلومات غلط عن مهنهم ويعرسوا بنات والبنات يجو يعملو غاغات شديدة
واحدة قالت لي من حيث المبدا لو قال شغال في طلمية مافيها حاجة
لكن يقولو شغال في مجالو مهندس دا كذب

مع التحية

التاج مشتاقين والله
والله كتابة سلسة وممتعة

كدي خليك من مجالو شوف لينا دكان يماني ولا مطيعم إنشاء الله أصلو غسيل العدة محمدنا محمدنا الواحد كان اتحرفن في البيت بزوق من العدة دي يومين في الاسبوع!!

Quote: و الله بالجد لازم الاقيك اعمل ليك صورة وعد الملك

ود الصايم التاج ده بتكلم في مجالو لكن تعرف حاجة، ماسورة من أمها !!! أنا عندي صورتين عنده ما عارف ما عايز يرسلهم ليه يكون هسع بقشر بيهم هناك.. بس تصدق الزول ده مجضم (مجالو)

لك الود ود الملك ونتلاقى إنشاء الله

أمير

Quote: ود الصايم التاج ده بتكلم في مجالو لكن تعرف حاجة، ماسورة من أمها !!!

أمير يا عمكـ .. شنو النفسيات دي ياخ!
خلينا نقشر بالوعد دا شوية وبعدين نشوف الفعل!
ما ياهو الحكومة بتوعد فينا كم وعشرين سنة وتخلف .. بقت على الملكـ!!!!

يا امير سلام

صورك مكبرة و معلقة في الحيطة، و الباقي معروف، صفوف تقيلة ههههههه
ود الصايم زول مملكة قلنا نطلع بى ريال ريالين وعد مدفوع الأجر

تحياتي لك
الملك

يا دكتورة نجاة


ناس امريكا ناس سمحين و الله و انا اعني ما اقول
و مشكلة اسماء العلوم البدرسوها ما منهم من الأمريكان، الأمريكان هم المولعين بالأسماء الرنانة

بعدين راس السوط لمسني في قصة الطب دي
أشرف ولدي بيدرس طب، و الله دي ما مكنة، ناس فيرجينيا الفي البورد عارفين، أسألي الجزلوت
كان دايرين صور بنزل هههه و هسة في فيرجينيا تيك، ما شاء الله حفلة تخريجو من الأعدادي بعد اسبوعين
الحتة بتاعة الكضب في الوظيفة ما اظنها متداولة بين ناس امريكا، فاغنية البوماستيك كان موقعها مطار جدة القديم
و الله أعلم

لك محبتي
الملك

يا تبارك

اسكايبي من النوع الهزاز فليكري شديد، بجيب الخدرا

اضرب لى كلمني فهمت شنو من المجالو؟؟؟
سلام
الملك

تعرف يا تاج السر أنا متابعك من زمان وعندي إعتقاد شخصي أنو الرد على كتاباتك بإبداء الاعجاب
وأخوانه ممكن يزاحم قناعتي الراسخة جواي بأنك زول مبدع وممتع حقيقي عشان كدا قاعد اكتفي
بالتهام ما تكتبه وأنا في كامل شهيتي ..
هازول الله يديك العافية.

نسيت يا تاج أن أسألك من سر حبك لإسم ( عزو) هنا وفي راجل المراه ؟
وتاني حاجة يا ريت تهتم أكتر بالأخطاء المطبعية فهي على قلتها لكن بالتأكيد لها تأثيرها ..
وتالت حاجة ليك كميات مهولة من التقدير يا زول نجيض .

سلام يا طلحة

Quote: تعرف يا تاج السر أنا متابعك من زمان وعندي إعتقاد شخصي أنو الرد على كتاباتك بإبداء الاعجاب وأخوانه ممكن يزاحم قناعتي الراسخة جواي بأنك زول مبدع وممتع حقيقي عشان كدا قاعد اكتفي بالتهام ما تكتبه وأنا في كامل شهيتي .. هازول الله يديك العافية.

ها زول
أنا كمان غلبني ارد
اكتفي بالدعاء لك بالعافية

الملك

(عزو) ده زي ابحث عن فضولي زمان، مصدرو اخ عزيز اسايلابي توفاه الله في حادث حركة، أخي و صديقي ( محمود عثمان)
و الذي ستظل ذكراه عطرة الى ابد الآبدين، كان يستخدم الاسم مراراً تفاديا للدخول في تفاصيل الأسماء، و يمثل الأسم بالنسبة لى
رمزاً اشتراكي النزعة، فكلنا سودانيون متساوون في كل شئ، و كلنا عزو.

عندي صاحبي في فرجينيا قال لي امو سالتو شغال وين في امريكا يا ولدي؟ قال ليها شغال في مجال البترول.قال لي هسه دي مش الحقيقة؟ هو شغال في طرمبة طبعا.

خضر حسين سلام
شكرا ليك على الطله و المقدر لابد يكون
الملك

عماد حسن سلام

Quote: عندي صاحبي في فرجينيا قال لي امو سالتو شغال وين في امريكا يا ولدي؟ قال ليها شغال في مجال البترول.قال لي هسه دي مش الحقيقة؟ هو شغال في طرمبة طبعا.

موزعي الجرايد صحفيين
بتاعين الامن سيكيوريتي
الخ

لهم جميعا التجلة، العيب في الرجل العاطل.
وشكرا لك
الملك

تاج السر

بصراحة انت زول حقار
شكلك قاصد المتعافي

يا دكتور
و الله انا من البشير وانت نازل هههههههه
مجالات عجيبة
بتمجلجو فينا

تحياتي
الملك

سـالمتَك بالسبت يا ملك... لقيتك سـرحان!




ســـلامتك؟





.............

دحين الكلام الطاعم ده كُله في هارلم؟

محمد ياسين سلام
غنم ابليس يا رجل

كلو في هارلم و غيرها
الملك

ود الخليفة

بعد ما دمعنا فتشنا ليك سما أرض ما لقيناك

الكلام الطاعم في هارلم و البوروز الخمسة

سلامات يا تاج

تعرف القصة دي قصة عجيبة ،

الغريب انو السودانيين ديل يقولوا ليك شغال في مجالو وهم اكتر ناس ما شغالين في مجالهم ،

بالله شوف كمية السياسيين الفي البلد دي ياتو واحد فيهم قرا سياسة والا استراتيجية والا حتي علم الكلام ياخي !!!!!!!!!!!!

قبل فترة في واحدة من الاذاعات في برنامج بيقدموا د. فيصل سعد ، عبارة عن اتصالات بالتلفونات وونسة بعد داك ،

اها فيصل سأل المتصل شغال في شنو ؟

الزول قال ليهو مفتش بص !

مفتش بص دي هسه مافي ، فقام سألو كم مرة يعني شنو مفتش بص ؟

صاحبك كل مرة يزوغ لما في النهاية قال انو بيدي الناس التذاكر !

ايوااا انت الكمساري يعني ؟

ايوة فعلا نحن مفتشين البص !


اها من أدبيات العمل في السودان قصة الشغلة ما شغلتنا الا الظروف جبرتنا دي .

غايتو ، من كترة المفارقات الفي البلد دي ما تعرف تكتب عن شنو والا شنو !


- رسلت ليك كان لنك في الفيسبوك ، للقراءة وكدا -


ثم كن بخير .


مودتي .

الوليد يا صديقي

Quote: الغريب انو السودانيين ديل يقولوا ليك شغال في مجالو وهم اكتر ناس ما شغالين في مجالهم ، بالله شوف كمية السياسيين الفي البلد دي ياتو واحد فيهم قرا سياسة والا استراتيجية والا حتي علم الكلام ياخي !!!!!!!!!!!! قبل فترة في واحدة من الاذاعات في برنامج بيقدموا د. فيصل سعد ، عبارة عن اتصالات بالتلفونات وونسة بعد داك ، اها فيصل سأل المتصل شغال في شنو ؟ الزول قال ليهو مفتش بص ! مفتش بص دي هسه مافي ، فقام سألو كم مرة يعني شنو مفتش بص ؟ صاحبك كل مرة يزوغ لما في النهاية قال انو بيدي الناس التذاكر ! ايوااا انت الكمساري يعني ؟ ايوة فعلا نحن مفتشين البص !

الحالة دي عامة افريقيا و عربيا و مرات بيحصل تغيير للكارير في النص
أو أهمال كامل لجهة التخصص، أو أن يكون التخصص الشنو كده النووي، يكون اوفركواليفايد
لى دولة زي دولنا دي، القصة في النهاية أكل عيش ولا شنو؟؟ الجميل أن السودانيين لم يعرف عنهم
اللجوء الى الأعمال الأجرامية لكسب العيش خارج السودان على الأقل
أما داخله فحدث ولا حرج ، حاميها حراميها بالكوم و الردوم
تسمية الوظائف فيها كثير طرف بنرجع ليها يوم

شكرا على حضورك المتصل
قرأت المادة التي ارسلتها لي وهي جميلة فوق التصور
سأكتب عنها قريبا جدا
لك مودتي العامرة
الملك

يا كيف تأتيك العباره !!!

التحية لك ولبني كجة في كل العالم الذين امتهنوا كل مهنة شريفة بعيداً عن التخصص ستراً للحال وتحقيقالحاجات النفس التي لا تنقضي إلا بالفناء !
نروح ونغدو لحاجاتنا
وحاجات من عاش لا تنقضي ( نفس نظرية آدم سميث ( تجدد الحاجة )
تموت مع المرء حاجاته
وبتقى له حاجات ما بقي ( نفس كلام مصطفى سيد أحمد ( حاجة فيك )
ولحبنا لكتاباتكم لما فيها من سياحة فكر وصولة قلم معكم نسوح....

يا ملكـ .. شايف الهلال أمس اشتغل في مجالو!!

سلام
يا تاج


عدم المجال دا جهجنا زمان فى اليونان
اول حاجة قاعد فى البلد وخايف ما عندى اقامة

شابك ليك اى زول لابس يونى فورم
ياسو
كليميرا
كلسبيرا

وفى النهايةطلعو كلهم بتاعين السكة حديد وكماسرةفى البصات
وانا الغشيم قايلم كلهم من القوات النظامية

اشتغلت غسيل صحانة فى مطعم

حقارة اليونانية العجوز صاحبة المطعم
يكون مافى زبون وتشوفنى قاعد مرتاح
تجيب لى نصف شوال بصل اقطعو

شكرا تاج السر

مجالنا كيف بنصلو ((اتخيل علوم سياسية - وسفيرة امريكا في السودان )

- لابد ان تميل شوية لعالم آخر مميز السيدات والمجالات التي لايتخيلها عقل - لكنها شرف علي راس كلا منهن - خرجن من كف الذل المهين طفقوا ابتزازاً - يعملن في ((السكيورتي)) و((الدليفري)) ولاباس بوظيفة ثالثة - رغماً عن ذلك يرجعن يصوتوا ((اللقمة)) ويغشوا يجيبوا ((الشوبنغ)) . بني كجتك اكثر راحة .

حفزتني لسرد لااعتقد انه سيكون بجماليات سردك . لواقع امهات يعيشن اسرهن - مع او بدون رب الاسرة -

سرد رائع لك التحية.

Quote: تعرف يا تاج السر أنا متابعك من زمان وعندي إعتقاد شخصي أنو الرد على كتاباتك بإبداء الاعجاب وأخوانه ممكن يزاحم قناعتي الراسخة جواي بأنك زول مبدع وممتع حقيقي عشان كدا قاعد اكتفي بالتهام ما تكتبه وأنا في كامل شهيتي ..

سلام يا ملك،

أنا حاولت أن أشتغل فى مجالى لكن لقيت مجالى ماشغال فى مجالو ،شنو رأيك فى الغلوتية دى ، تسلم

اختي العزيزة نجاة بت سيد أحمد
شريكة اخوي فرحات الشغال في مافي مجالو لكن مروق ههههه
و لينا بحالو
قالو مجالك في السودان حارق ماشا الله
منتظرين السبح و الطواقي و تلفزيون مكة مدينة ههههه
لك مودتي الدائمة يا ام ايوب
الملك

انوار عبد الوهاب
الناشطة الفرجينية الدؤوب أختنا و جارتنا العزيزة
سلام و تحية

Quote: مجالنا كيف بنصلو ((اتخيل علوم سياسية - وسفيرة امريكا في السودان ) - لابد ان تميل شوية لعالم آخر مميز السيدات والمجالات التي لايتخيلها عقل - لكنها شرف علي راس كلا منهن - خرجن من كف الذل المهين طفقوا ابتزازاً - يعملن في ((السكيورتي)) و((الدليفري)) ولاباس بوظيفة ثالثة - رغماً عن ذلك يرجعن يصوتوا ((اللقمة)) ويغشوا يجيبوا ((الشوبنغ)) . بني كجتك اكثر راحة . حفزتني لسرد لااعتقد انه سيكون بجماليات سردك . لواقع امهات يعيشن اسرهن - مع او بدون رب الاسرة -

تصدقي الكلام ممكن يجر؟؟؟
تحسست و انا اكتب من الدخول في عالم بنات كجة في الغربة و الهجرة و هو بحر زاخر ملئ بالدرر و العبر
فكم من السيدات من احرزن قصب السبق في النضال اليوماتي حين عجز عنهن الرجال
لهن جميعا التحية
الملك

محمد سيد أحمد
ليك وحشة

Quote: حقارة اليونانية العجوز صاحبة المطعم يكون مافى زبون وتشوفنى قاعد مرتاح تجيب لى نصف شوال بصل اقطعو

انداكسي انداكسي
ونا اشبه فيك من زمان

هههههه

اها يا ود الصايم بقيت تلخبت في الاختساس

Quote: التحية لك ولبني كجة في كل العالم الذين امتهنوا كل مهنة شريفة بعيداً عن التخصص ستراً للحال وتحقيقالحاجات النفس التي لا تنقضي إلا بالفناء ! نروح ونغدو لحاجاتنا وحاجات من عاش لا تنقضي ( نفس نظرية آدم سميث ( تجدد الحاجة ) تموت مع المرء حاجاته وبتقى له حاجات ما بقي ( نفس كلام مصطفى سيد أحمد ( حاجة فيك ) ولحبنا لكتاباتكم لما فيها من سياحة فكر وصولة قلم معكم نسوح....

اخي عبد الرحمن الحلاوي

و التحية لك

احي محمد حيدر المشرف

تأتي منا جميعا و لنا جميعا
تحياتي