خشم.....خشمين

خشم..... خشمين

ابتلانى الله فيمن ابتلى من خيار عباده من ( البنى كجة) ، بحب الونسة ، اخرم و اتقريف دائما الى سياحة فى متاهة ( الرغى) والبحث عن رفقة من وهبهم الله فضيلة التناضم و الملاسنة ، تحللا من قبضة واقع معقد يزداد تعقيدا و كآبة ، و توسلا بالنعمة حربا على غربة تنأى بنا عن جذور انسانيتنا عزاءا و تسلية بين كل ( جكة) و أخرى، و قد قيض الله لى عصبة معاصرة من فطاحلة ( النقة) و النقيق ، عزوة كما يقول البدو يركن اليهم ، بينهم المحترف و المقلد و ذو البأس و المنعه ، و بعض مبتدئين و مدعين و بعض ممن يثير العطف و الرثاء و عدد غير قليل من الخبثاء .
و قد لحظت استشراء انفلونزا الدش فى السنوات الأخيرة بصورة مزعجة اسهمت في تعزيزها وسائط الأتصالات الألكترونية الحديثة ، فلحق بنا من فائض ( الدش) ما نود و ما لا نود علمه ، و ابتلينا بالصبر على سماع حديث الجوال و الثابت و الهابط ، و غرف دردشة و الدعوات المخلصة بالجزاء بالخير من لدن رب العالمين لمن يسرق ( السوفتوير) و يهبها الى اعضاء المنتدى بعظيم ايثار و كرم حاتمى فياض ، فكأنما الله يغض الطرف عن سرقات دون سرقات ، الا ان من اعظم ما يميز الونسة الألكترونية مع من لا تود قدرتك على ( بلوك) خياشيمه بنقرة على ظهر الفأرة فيسكت (ريموكس2000) عن الكلام المرقوم المباح الى الأبد ،بينما يصعب فعل ذلك فى حال ايناس الجوال الا بدعوى (يو بريك اب مان )، وهى حجة مكشوفة ، و غيرها ( ياخى انا بعد شوية حاخش نفق بواصل معاك بعدين ) أو ( مارى بقاعده عسكرية...الو الو..انعل ابو اى تى اند تى) ، و فى حال الأيناس وجها لوجه مع ثقلاء الظل فأنه ليس امامك سوى طرح السؤال الوجودى المتصل ( الساعه عملت كم) و هذه قلوبية ( تو بيك اب) الأولاد و هى قابضة لا محالة.
و للونسة اصول تداعت اعمدة حكمتها السبع فى زماننا الحاضرحيث برزت الى الوجود ظاهرة رغبتنا فى الحديث و عدمها للأستماع!!! و ازداد ولعنا بالمغالطة حتى و لو كان المتحدث تلفزيون البيت الأصم ، و المقاطعة فى اصلها بنت خالة المغالطة ، و هى اول دلائل نفاد الصبر و اشهر مقدماتها الموسيقية معزوفة ( لا لا لا لا انت ما ما عارف ) و اكثرها تهذيبا ( معليش..ما داير اقاطعك..لكن) ..و ذلك بعد مسير ثلاثة اميال من نقطة التقاطع الأصلية!!! ثم ( دقيقة..دقيقة) ، و(كدى كدى) ، اما اشد شراكها احكاما فكلمة ( يا حبة).
و قد غلبت على سمات حلقات الونسة،فردية ام جماعية ، على ارض الواقع ام على متن الشبكة العنكبوتية ، مؤخرا ظاهرة التوتر، وبات كل شىء متوقع ، لا تقدر بوصلتك تحيد ما سيجىء او من اى جهة يصفعك ، ثم ان ( فوليومات) الحلاقيم تحسنت تحسنا ملحوظا بفضل تكنولوجيا الدجاج الهسبانى المبهر و طائفة من الأغذية المتعددة ( البان وادى فاطنة و منتجات فقيه الخ الخ) ، فانفصلت الحلاقيم عن أجساد اصحابها و استقلت فى فجر يناير ، و كونت هيئة متحررة عن المركبة الأم غير ملتزمة بنظمها و أخلاقياتها و قوانينها و اعرافها، اكثر قدرة و اسرع الى الأستجابة و الشروع فى اللعلعة ، ولا تلبث ان تلحق بها العيون و الأفئدة و تنكمش مراكز السمع حتى لا يدرى احد من يسمع من. بيد اننا امة من اللا مستمعين اصلا فلا ضير و لا ضرار ، فقد اعفينا من فضيلة حسن الأستماع بقرار جمهورى عسكرى، مثبت ، لا يبيح لنا الأنصات الا فى حال انبعاث موسيقى المارشات العسكرية ووعد المذيع صاحب الصوت الألهى ببيان هام بعد قليل فترقبوه!!، فترة من الزمن كافية لترقية عقيد الى رتبة لواء!! و ليس ادل على لا استماعيتنا من المال و الجهد نبذله حرصا على حضور حفل الفنان الكبير لمجرد سماع اصواتنا نحن امام خشبة المسرح تماما مخالطا لصوت الكمنجات و السكسفونات و البنقز و الفنان فى رائعته الجديدة و العيال الذين كان من المتوجب بان يكونوا داخل اسرتهم فى تلك الساعة الباكرة من صباح التالى ، بمتعة لا تضاهيها متع الحياة جمعاء ، اولم ندفع عشرون دولارا لممارسة هذا ( الميس) ؟؟؟
و السكات ليس فضيلة و لا من ذهب فى اعرافنا ، فقد كانت جدتى رحمها الله ، تحثنى على طق الحنك ما استطعت الى ذلك سبيلا ، و ان الأسرار بلا قيمة و بلا معنى ان لم يطلع الناس عليها ، و كانت تثير الرعب فى دواخلى بقولها ( ما تقفل خشمك ...بيعفن) ، او ( امشى اخد ليك خشم خشمين مع ناس بيت البكا) فكنت البى امرها فكأنها (مهيرة بت عبود) تحض الفرسان على القتال . و قد عز على ان كل الناس اصبحوا يحملون ( خشومهم) حيثما حللت ، فأبتدعت خطة استئجار ( ديزيقنيتد) مستمع يصحبنى و يشبع رغبتى و جوع روحى الى فرد واحد يسمعنى حتى النهاية و ذلك بأجر معقول اتفقنا عليه فى زمن اصبح فيه الناس جميعا حملة لبطاقة ( كى نوت سبيكر).
و قد طققت الحنك فى مطلع صباى حتى كل متنى ، طققته فى حصة الدين و الرياضيات و الجغرافيا ، و بين الحصة و الأخرى ، رايت سمى على التختة مكتوبا بالفارسى و الكوفى و الرقعة تتبعه الصلبان الى ما لا نهاية و اسم زوج المطربة ( فيروز) السابق ( عاصى جدا) و كنت اظنه الرحبانى ، الا ان مجرد سماع صوتى كان عشقا لا يقاوم ، يهون فى سبيله عشر جلدات محمولا على اعناق اربعة من زبانية ( الصف الورا ) ، لا يستهوينى سماع صوت غيرى حتى و لو كان فى طلاوة صوت ( زنقار ) ، ادرب رئتى كل صباح على تمارين يوغا ( لا لالالالالالالالالالالا) ، و تكنيك ( اصلو ما ممكن) لسحب الكرة بذكاء من الخصم دون ان يشعر ، افعل بها ما بدا لكمال عبد الوهاب فى زمانه ..من كراع لكراع. و تطورت قدراتى بفضل تمارين الفحيح و الوحيح وابداء التضجر من غير سوء ، و تقاليد الكلام ( اب لمسة) وهو ابعد ما يكون الى اظهار الود و اقرب ما يكون الى اطفاء ( اللمبة) ، و مارست طقوس الضحكة العالية التى لا تنتهى الا بظهور صينية الغداء ، و كتبت ( اب) لرفع البوست ، و ظللت فى عنادى حتى تعب حمار الوادى من النهيق ، و اضفت الى رصيدى من الونسة حين جفت مستودعات الحكى ، كلمات المطاط من فصيلة ( آآآآآآ...شفت كيف....شفت شنو....و حكايات زى دى و المهم و عموما ) و قنابل عنقودية من فئة ( رب رب رب رب رب رب ....و ترررررررررررررر) و ايقاعية لا يضير تكرارها ( شيل خت شيل خت.. لخلخلخلخلخلخلخ)..لا مناص ان تحدثت فى الطب فأنا ابوقراط ، و فى الفلسفة فأنا ديميس روسوس ، ود عز و رب الكفر ، مقددها ، النميرى خطط لمايو فى صالون بيتنا و كان مفروض تكون فى مارس..انت كنت عارف القصة دى ؟؟؟؟
و قد اتفق الناس على تقسيم فئات المناضمية الى درجتين ..الصباب و البراى ، البراى يفتى فيما يعلم و ما لا يعلم ، و الصباب فيما يعلم و ما لا يهمنا علمه و لا رغبة لنا فى العلم به ، فبينما يمكنك التخلص بيسر من البراى الا انك لا محالة هالك فى حضرة الصباب و ابن هالك ان مكنته من توطيد السيخ و صب قدح مونة واحد عليه ، لا منفذ لك الا باتباع اسلوب الصب الموازى ، و ذلك يتم بالرش المباشر بمجرد بدء الصباب فى الكلام و تثبيت عينيك داخل حنان عينيه و تلك لحظة تاريخية نادرة يتحول فيها المرء الى متحدث و مستمع فى آن معا ، تأتى نتاجا لنفاد صبر لا يوجد اصلا ، و يتوجب فى لغوك ان ياتى نابعا من فجاج الأرض و من فوق سماك السماء لا رابط و لا يحزنون ..و الله امبارح...لالالالا انت ماعارف الحصل شنو ..عربية البوليس كانت..اصلو ما ممكن ..انت لكين ما ما لاحظت..الأمريكان ديل ...قام عمل مجنون...و هكذا و هكذا.
و قد طورت مؤخرا اسلوب المباغتة ، و تلك حيلة تبدأ بتحين الفرصة التى يجذب فيها الصباب نفسا مدربا استعدادا لجولة اخرى ، فما عليك الا ان تقول..يا جماعة ما تضوقو الخبيز ده..نجحت فى بعض محاولاتى و فشلت فى حضرة الصباب ذو القدرة على التكلم الباطنى و خبير رفع الأصبع السبابة مثل مايسترو عريق راسما علامة على الهواء تحفظ نقطة انقطاع الصبة حتى اشعار آخر..أقرب ما تكون الى لفظة ( هس) فى عرض للبانتوميم...أما صبة المتحذلق فتلك نرجئها الى يوم آخر.

تاجو
التحايا و السلام
الكلام دا عند الشفاته بيقولولو الرندوك
وكلامك بالرقم من انو رندوك حلو وعزب لاكنو كتر كتر
اتوارا لي كلام عبغري اسمو تاج الملك
لك الود

هاشم دبذ

Quote: الكلام دا عند الشفاته

ديل طبعا فريق الكوامر..ناس ابو كدارة مراية!!!

Quote: قد اتفق الناس على تقسيم فئات المناضمية الى درجتين ..الصباب و البراى

اسرٌت إليٌ صديقة عزيزة..بأن أخطر أنواع المناضمية هم الخنجارين...
و معظمهم من فصيلة الأزواج..!!

الذين كثيراً ما تُوصف مناضماتهم بأنها ..كالخنجر في القلب!

ممكونة
سعداء بحضورك
الخنجارين بيقابلوهم الخنجارات و الطعنه دى بتقع على حسب التنشين
حمانا الله و ايك من الخنجارة.

ـــــــــــــــــ
الاخ : تاج السر شكر ليك كثير

Quote: خشم..... خشمين

علي وزن منقار.... منقارين
لحدتهما
ولك الود

Quote: علي وزن منقار.... منقارين

بتاع مشاكل و تحريف يا عماد الطيب..تلاميذ دبس .

التاج إزيك؛؛
ياخي دي فرصة (أبراك) شوية وناخد خشم خشمين والتالت مـرّ،، و(براك) سويتا في نفسك؛؛ أول حاجة ما تجي سـيرة البري والبرايين إلا ويذكـر الحلاق وبتاع التكسي،، ديل مشكلتهم مافي أيتها طريقة في الدنيا تخارجك منهم ما دمت قد سلمت راسك ودقنك للحلاق،، والتكاسي قد ضمنك بمشوار كارب داخل عربيتو المن زمن النبي صبي ديك،، غايتو عندي قريبي أظنه الوحيد الذي نجح في إسكات بتاع التكسي لأنو عارف قصتو ح تكون بطالة مع مشـوار من الشعبي الخـرطوم إلى أرياف أم درمان النائية..والمفروض في يدخل يدخلوه غينس على طول: بدا الرجل كلامو بعد ما تحركوا: تتصور العربية دي ماشية بالبركة بس! فرد عليه صاحبي ببرودشديد: والله أحسن ليك من البنزين... سكت شوية ويبدو إنو مافهم الرد معناه شنو وربما افتكر إنو الراكب دا راسو ما نضيف.. بعد شوية قاليهو: تتصور سنة تمانية وسبعين اشتريت العربية دي ومعاه وحدة تانية زيها يعني الاتنين كانوا آخر موديل، واشتريت كمان البيت،، يوم الليلة ما عندي غير العربية دي والبيت.. فرد صاحبي مرة تانية وبدغالة مع سبق الإضمار: طيب ياخي ما تبيع دي والبيت عشان تشتري عربية آخر موديل تاني.. المسكين لم يزد على أن نظر إليه (شزرن)،، وإظنو إستعاذ بالله وحوقل وتمتم في سره: الله يعدي المشوار دا على خير.. أما قصتو مع الحلاق نخليها للبرية الجاية إلا كان لقيت ليك طريقة مع بكـري يقفل ليك البوست دا.. تحياتي..

Quote: و قد طققت الحنك فى مطلع صباى حتى كل متنى ، طققته فى حصة الدين و الرياضيات و الجغرافيا ، و بين الحصة و الأخرى ، رايت سمى على التختة مكتوبا بالفارسى و الكوفى و الرقعة تتبعه الصلبان الى ما لا نهاية و اسم زوج المطربة ( فيروز) السابق ( عاصى جدا) و كنت اظنه الرحبانى ، الا ان مجرد سماع صوتى كان عشقا لا يقاوم ، يهون فى سبيله عشر جلدات محمولا على اعناق اربعة من زبانية ( الصف الورا ) ، لا يستهوينى سماع صوت غيرى حتى و لو كان فى طلاوة صوت ( زنقار ) ، ادرب رئتى كل صباح على تمارين يوغا ( لا لالالالالالالالالالالا) ، و تكنيك ( اصلو ما ممكن) لسحب الكرة بذكاء من الخصم دون ان يشعر ، افعل بها ما بدا لكمال عبد الوهاب فى زمانه .. من كراع لكراع . و تطورت قدراتى بفضل تمارين الفحيح و الوحيح وابداء التضجر من غير سوء ، و تقاليد الكلام ( اب لمسة ) وهو ابعد ما يكون الى اظهار الود و اقرب ما يكون الى اطفاء ( اللمبة)

غايتو زمن زمان .. الزيك ده ما بنصاحبو ..
ده فصيل تالت نوعك ده : القدّاد ( القداد شيخ الدين ) , و دي ما بتحصل - حمانا الله - إلا للزول البيحاول يبتدع طرق مواجهة للبراي و الصباب ..
أها تقوم تبقى عليهو هو زاتو من كترة التمارين المضادة دي .
و القداد النوعك ده ما في طريقة إلا تقوم جاري منو لو بدا التخصص بتاعو .
يا كمان ترصعو كف أبو كديس و تقول ليهو بخلعة : أممممممممممك .. سوري ياخ , قايلك بانّقا .

Quote: و كتبت ( اب) لرفع البوست

Quote: تتصور العربية دي ماشية بالبركة بس! فرد عليه صاحبي ببرودشديد: والله أحسن ليك من البنزين... سكت شوية ويبدو إنو مافهم الرد معناه شنو وربما افتكر إنو الراكب دا راسو ما نضيف.. بعد شوية قاليهو: تتصور سنة تمانية وسبعين اشتريت العربية دي ومعاه وحدة تانية زيها يعني الاتنين كانوا آخر موديل، واشتريت كمان البيت،، يوم الليلة ما عندي غير العربية دي والبيت.. فرد صاحبي مرة تانية وبدغالة مع سبق الإضمار: طيب ياخي ما تبيع دي والبيت عشان تشتري عربية آخر موديل تاني

مبالغة....
سمعنا بأستاذ الفلسفة ..راكب التاكسى و قاطعين كبرى بحرى..السواق داير يفتح باب برية..قال للأستاذ الشهير ( الكبرى ده ضيق) رد الأستاذ الفيلسوف ( الكبرى ما ضيق...ضيقة جوانياتك)..سيد التاكسى زعل و حلف الا ينزلو فى نص الكبرى..
لك التحية و مزيدا من اقاصيص الدغالة


عماد عبد الله
جهز حالك جاييك بحلة زنقو

ياملك .. وينم المناضمية ؟؟؟ هنا هس ؟؟ الواحد بس شغل وبعدين هس لحد اليوم التاني الا ان يرحمنا المولي بواحد او واحدة عايزة تكسب اجر فينا واهو خشم خشمين ...؟؟؟ياخي الواحد نفسو في مسطبة او راكوبة فاتحة علي الشارع الرئيسي في اية حارة حلة يمرو بيهو ناس كتاااااااااار واخوك يناضم ...؟؟؟ اعمل لينا upload شوية منضامية بشان نعمل download ونشغلم نضم ساااااي .... قال مناضمية ؟.. انت ما شفت لسه برنامج "شباب النضم " . واسماء ونضم " " وما ينضمه المنضمون" و"انضام " و"نضم جديد " و "نضوم النضم "....
قال نضم قال ....

Quote: ياملك .. وينم المناضمية ؟؟؟

مناضمية رطانه ما عارفين سكتم بى وين
يا بابكر نحنا برية العربى ما قادرين عليها تسألنا من الكمشكا؟؟
شباب النضم ما شفنا علا شباب التاكا شفناهم
لك تحياتى
و يا عماد جاييك
نخلى كيكى يرتاح شوية.

ازيك يا فنان
غايتو دا مقاسي بالظبط

Quote: الصباب فيما يعلم و ما لا يهمنا علمه و لا رغبة لنا فى العلم به

وبكدا تكون انقذت الناس وانقذتني من كم (اب) كنت ناوية ارفع بيها بوستات الصب اياهاالمافي زول / ة طبعاً عبرها ومافي ليها طريقة لتشق دربها للصحفة الاولى الا بـ ( اب ) واخواتها الشهيرات.

تعرف ؟ الخلاني اتذكر البوست دا وانكتو ، صاحباً لي كنت بطق في الحنك معاهو في المسنجر
قال انه محتاج لخشم اضافي؟
لا تمحينا لا تبلينا يارب
لشنو يا ود الناس انت العندك دا هسي قادر عليه؟
قال الخشم الواحد لا يكفي وليس الزوجة فقط
لانه عندو تلاتة خطوط موبايل ما بتسكت خالص
واخو عمره 16 سنة و8 اعمام وحبوبة وخطيبة وامو وابو و 13 موظف في الشركة الهو مديرها

شكل مستقبل زراعة الخشوم في السودان حيكون مبهر
وحتكون الخشوم اغلى من الكلى
وعليه اعلن انني سوف ابيع خشمي بعد عمر طويل على ان يحول المبلغ مقدماً لحساب الورثة
وعلى ان تتم معاينة المشتري قبل الموافقة النهائية ، ما كمان يمشي يروح في وش نصيبة
ولبنات ما ببيع عديل كدا، ما ناقصين شبة كمان.

والله انا ما عاجبانى فى صور بروفايلات الدنيا
و العالمين الا صورة بروفايلك

Quote: شكل مستقبل زراعة الخشوم في السودان حيكون مبهر

يا مومن يا مصدق انا راجيانى فرصة تغيير تخصص.

كراون أوف ذا سيكريت ..

Quote: يا عماد جاييك

كتلوك ولا جوك جوك ..
تعال فكها فيني بدل شغلة نحرس و نرجا دي ..
هو شِن الفككان بلا مزيد من القدد و الانا جاهز ليها بعدتي و عتادي , نعم إني - في صباي البكر أبو سُكسُك - كنت زولاً مسيكين الغنماية تاكل عشاي , و حرام أهلي ما بيخلوني أباري أنواعكم التلاتة المخشمين ( البراي / الصباب / القداد ) ففي مباراتهم التهلكة و الدخول في الشبكات . لذلك كنت أباري الناس البرّاحه و ذوي الرزانة و الفنجريين أصحاب الحكمة , و المفحوصين من قِبل العايلة الكريمة عندنا ( يربي الناس الراحات الموقرين اولادهم كده .. بالفحوصات الدورية على الأصحاب ) فمرقني ربك رب الخير من كتير من الحفر التي يفحتها أنواعكم البني كجه بقداديمهم فيقع فيها الناس الطير طير و المواطنين الطيبانين الربنا رماهم في سكة العوجة اللتكم .. تلقوها في الغافل .
إتذكرت حكاية زولك المباري " دون كيشوطة " داك .. عمك بيدرو ..
هسه من وين قاعد تلقى ليك بيدرو في الصقطيبة العندكم ديك يباري محنك ( و همو كُثرُ ) , أكان لي منعم الجزولي داك هو براهو دون كيشوطتين إتنين , داير فريق بتاع بيدروات يساكك فيهو و يلم قددو و برياتو و صباتو الـ ( خاتفة لونين ) , و لله الحمد و المنة من قبل و من بعد الخلا شغلو ما مديهو فرقة يحك قعر أضانو .. و إلا كان شنقل ريكة السادة المستمعين و المشاهدين .
ثم تفكرت و قلت ان الشعوب الأخرى أيمان رحمن ماعندهم شغلة ماوث ماوثين اللتنا دي , و بيقضو يومهم خنق و حمرة عين , فحنيت على مدامكم يمين الله , و يا شلاقتا الرمتها طريقك و قد فزّ منك حسان الدنيا و العالمين لخشمك سريع الطلقات و شلنكباتك التي تودر الدرب في الموية , تاني قلت المسيكينة دي تحمد الله و تكون من الشاكرين الما بتعرف عربي أم درمان و لا حكاية صحبة ماجدٍ ديك .. فحمدت الله و زدته ثناء على جزيل نعمائه أن مرق منك بعض عباده سالمين في امانة الله رغم ضيق الشقة و وعثاء السنين التي كابدتها بت الناس في كنفكم أو كفنكم , أما العيال : فلهم رب إسمو كريم .. مخير الله عليهم .
عِلاّ لاكين ما بنقدر نفتو , و يا قول حبوبتك الزلال : كان نضمنا إنقلمنا .
ده كلو كوم و الفي راسي كوماً تاني ..
ملحوظة : أرجو ان لا تتخذ من مداخلتي هذه حجة عليّ فترميني بداء الصببان و تنسل .
سللان مافي .. لكن بما اني في طور النقاهة من الفقر الأيامات دي , و بما أنني أفتش خشم البقرة نعم إني زول صاحب رايحة , قمت مرقت من جخانين خشيماتك أمات محن ديل بفكرة إستثمارية سبقتني عليها صاحبتنا في المسغبة أماني الجندرية ( تسرق الكحل من العين ) هسع كمان داير أخش معاها في مشروعا الإستثماري داك , و بركة يا يابا السخّرك لينا تمدنا بهكذا أفكارن جهنميتن , كان يا الله يا مولاي بعد دا العمر ربك يقول كوني , و أبقى عندي مزرعة لتربية الخشوم و عيادة للزراعة , و الجندرية ما بنظلما , بنديها التوكيل العام و منافذ البيع المجهزة بتلاجات العرض و فرش الأسنان و الليب ستيك - إن تطلب الأمر - و أدوات الرياضة اللازمة للسانات مع الجونتيات حقاتا .
نكون إستفدنا من قددك في شيتا يجيب مريسة تامزين ..
قولك شنو ؟ ..
و زيك زي أي صاحب فكرة كحيان نديك حق حقوق الملكية الفكرية بتاعتك و نعشيك و .. طريقك أخضر .

و ( ما بتنشتل الزهرة في الأرض اليباب ) ..
يا قول الغناي .

......
تعديل في شكل ملحوظة :
إن داير ترد علي جنس ردودك السغيرونة الرباطابية ديك !! .. ده طرفي .
أنصحك ترد عليّ في الليل البهيم و مزاجك أرجواني , عشان الموضوع فيهو مواضيع .
- و بعدين شنو حكاية الردود النتشه البترميها للناس دي ؟؟ ..
تبرانا بتلاتة صفحات فلسكاب , و تجي ترد علينا بي حتة بخرة ؟ -

اولا بالتبادى
انت هنديك الأحمر ده..عرفنا يدو اليمين مقطوعه..ما قاعد يمشى يتبرز؟؟؟
و فى العهد القديم ان ابن نوفل قال
اياك و الصبلب التمتام و البراى اللاطش وأحذر قدادة اللئام
و انا اضيف البراى الذى تدرب علىايدى ابو الكيلك و سعد و اب زرد و سيف الدين محمد صالح
وشرب شاى العكارة و لقيمات البزارة و ما كمل قماش النصارى لضيق فى الزرارة
و يتهمنا التواتى بالقدادة و ايم الله ان خشمه -اى - عماد سيلتوى و انه لا محالة يرعوى
ما كتلونى و لا صلبونى و لكن الحرب خدعة يا عدو المال الزلال الحلال
اما عمنا المبارينو فهو فرناندو سانشو وفى رواية الدكالسة شانسو ( رواية النيلين) ، اما مدامنا فهى من اهل
البراهمة عندها ( كوبرا) تحت السرير للطوارىء و الحادثات ، و العيال بخيتين و سعيدين و هموا بالوراثة اسرع فى الطلقات و الحمد
من قبل ومن بعد الى الله...
صبة اولية فى مقام المزة
اها زراعة الخشوم دى دى دايرة دراسة ..
الجندرية حددت فى الوصيىة القانونية احداثيات البيع و الوراثة
علا ياخى القدوم اب سفة ده ننزلو فى اى باى و لا كيف؟؟
ياريت تسهب لينا فى مسألة نقاهة الفقر دى...الفقر بعنى قلة المال ولا الفقر من
فئة طباع ( كلنق اب صلعة)؟؟

Quote: لكن بما اني في طور النقاهة من الفقر الأيامات دي , و بما أنني أفتش خشم البقرة نعم إني زول صاحب رايحة , قمت مرقت من جخانين خشيماتك أمات محن ديل بفكرة إستثمارية سبقتني عليها صاحبتنا في المسغبة أماني الجندرية ( تسرق الكحل من العين ) هسع كمان داير أخش معاها في مشروعا الإستثماري داك , و بركة يا يابا السخّرك لينا تمدنا بهكذا أفكارن جهنميتن , كان يا الله يا مولاي بعد دا العمر ربك يقول كوني , و أبقى عندي مزرعة لتربية الخشوم و عيادة للزراعة , و الجندرية ما بنظلما , بنديها التوكيل العام و منافذ البيع المجهزة بتلاجات العرض و فرش الأسنان و الليب ستيك - إن تطلب الأمر - و أدوات الرياضة اللازمة للسانات مع الجونتيات حقاتا .

بادئاً ذي بدء ( واخد بالك )
قلنا نوثق
مش بكرة لمن تجد في الامور امور نبقى سبب التعديل ما بعرفو شنو

جاية راجعة للحتة دي
احسبها رفعة اصبع يا ملك

Quote: مش بكرة لمن تجد في الامور امور نبقى سبب التعديل ما بعرفو شنو

أفووووو ..
أعدّل أنا ؟؟ أنا أخوك يا عواطف ..
أنحنا الراجل عندنا بيمسكوه من لسانو ..
دي واحدة .

الشي التاني :
ما ياها فكرتك الما مؤسسة دي وللا شيتن آخر ؟ !!
أها ده طرفنا منها ..
قررنا نعملا مؤسسة بتاعت مساج للخشوم ..
البلد - ماشا الله - ملانة خشّامة من ساسا لي راسا .. و الكلام راقد قرش و نص ..
تدخل نعصّر ليك قدّومك لامن تقول بس ..
و تمرق من عندنا علي أقرب منصة خطابة أو أول لمّة تقابلك .
تقد الناس و تبراهم في أمانة الله .

.....
أماني هووي ..
خوّه فرتِقْ .

غايتو بس ربّك يصلِح الحال

التاج
تحياتي
اديك اطول برية في العالم
اتنين قاعدين يسطلوا، ضربوا السجارة بمزاج وغابوا في عالم الخسوف
جاهم واحد داخل وقال ليهم: السلام عليكم
عاينوا ليه كده، وطبعا ما ردوا، وهو لقي باقي القامشة لفاها وضربا
وقام قال ليهم: مع السلامة وطلع فات
واحد من الأتنين قال للتاني: كلامه كتير ياخي

Quote: أنحنا الراجل عندنا بيمسكوه من لسانو .. دي واحدة . الشي التاني : ما ياها فكرتك الما مؤسسة دي وللا شيتن آخر ؟ !! أها ده طرفنا منها

دا برضو توثيق

المرة دي ادرجها يا ملك تحت بند " دقيقة دقيقة "