صورة الفنان في شبابه .. (ليس ثمة شبه بدوريان جراي)

الخرطوم منتصف السبعينات
من تحت نفق بري ( مجازا)‘ نافذين الى شارع الجامعه و الى الجمهورية‘ وعبر ( البرندات) ‘ التي لم يكن الباعة المتجولين
فيها بمنأى من الملاحقة‘ وحتي ساحة ( اتينيه)‘ على ظهور الدراجات كنا نضيف الى ( فسحة الفطور)‘ كل زمن الحصة الثالثة اليتيمة‘ حتى يتسنى لنا
الوقوف امام ( استديو فون)‘ لسماع الموسيقى اولا‘ و للتنزه في اشراقات ( مونوكروم) المصور العظيم ( عصام)‘ غير أن
بورتريت الفنان ( دعنا نطلق عليه ملك البوب السوداني شرحبيل أحمد)‘ ففي تصنيف الجاز متاهة‘ نعود اليها مرة أخرى‘أقول‘ غير ان ذلك البورتريت
كان مدعاة للأنس البصري‘ صورة مكبرة في برواز موضوع داخل صندوق زجاجي على يمين المدخل‘ تأخذك نعومة الضوء يتدرج نحو ظلال داكنة بدهشة لا تنتهي
‘ و كان الرجل في قمة عطاءه‘ تحدث الى الصحف عن (الليل الهادى) في منتصف النهار‘ و كان قليل الكلام‘
غطى الأثير و ليل الخرطوم‘ بحضوره العاصف‘ لكنه رغما عن سطوعه‘ فأن نجمه ظل اقرب الى الخجل منه الى التوهج الأنوي
غلب عليه طبعه الأنساني المتواضع الهاديء‘ و احتفظ لنفسه بشكل رب الأسرة الذي يشرك اسرته حتى عتبات المسارح التي يؤدي عليها اغنياته‘ واتصل
عطاءه التشكيلي‘ فرسم للأطفال و ابتدع ( تنقو) فأضحك الأجيال من تعاسته ‘ وحب زوجته ( العازة) الحانق‘ غنى للطلاب‘
و كان يقول كما يذكر الذين انتدبوا لدعوته ( انا و خالتكم زكية دي ما دايرين قروش بس ادوا العازفين).
بالأمس و انا اتلصص على ملامحه‘ التقط صورا في عقلي لبورتريت حلمت به نيف و ثلاثين سنة‘ تحدث شرحبيل بأسهاب
عن محنة الأرشفة و التوثيق ‘ قال بأنه لا يملك غير مجلدين لمجلة ( الصبيان)‘ و تساءل اين يمكن للناس ان يحصلوا على اعداد المجلة
التي بدأت الصدرو في العام ١٩٤٦ و توقفت في عام ١٩٩٥؟؟؟ ذكر بأن حملة كرري اتت برسامين لتسجيل الأحداث‘ ( ياخي ما توجعو
قلبنا ساكت)‘ ( الخرطوم حصل فيها عمران غير مسبوق في تاريخها‘ هل عني احد بتصوير المباني القديمة قبل هدمها؟؟)
و قبل ان يهم بالمغادرة‘ ادركت انني امام احد امرين ‘ اما ان ادعه يذهب‘ او ان اوثق لوجوده معي ‘ البورتريت الذي تمنيت
أن اكون قد صورته و انا طالب يافع في منتصف السبعينات‘ ( لا بنتلاقى يازول بجيك آخد صور)‘ و شباب امل السودان يحيطون به
و لكنني كنت اشد عنادا من اياديهم القابضة على الموبايلات و مفاتيح السيارات‘ ( اقعد في الكرسي ده)‘ استجاب لدهشتي
( يمين‘ شمال‘ اديني بروفايل‘ قوم ‘ اقعد‘ )‘ و لكنه كان من غير ( الأفرو)‘ و بياض اللحية اضاف للضوء نعومة من عالم آخر‘
و حينما تسرب الصمت‘ علمت ان وقت مغادرته قد وجب ( الحمد لله صورتي اخدتها)
ضحك و قال لى ( هي اصلها فرصة واحدة)
في الطريق الى خارج المبني‘ سأله ( مرجان) بشقاوته المعهودة
( انت يا استاذ عمك تنقو ده فكرت فيه كيف ....... في زول فى الحلة........)
اجابه ( شرحبيل) مقاطعا
(فكرت فيه .. كده) و هو يكور راحة يده و اصابعه في الهواء‘ و انفجر ضاحكا.

تعرف يا تاج السر

زمان وانا في

سنة تانية اولية

كنت مغرم بشرحبيل

و لا زلت

بس ناس الاذاعة الفقاره

ما كانو يبثو اغاني شرحبيل

الا في نهاية حصة الفطور

و انا كنت بمشي افطر في البيت

بحكم اني ساكن شوية قريب من المدرسة

فكنت لازم اسمع شرحبيل للنهاية و بعدين

امشي المدرسة

وقلبي في يدي

خوفآ من العقاب

لكن كنت بقطع لي شعرة من روموشي

و اختها تحت اللسان عشان ما
اتجلد

او امسك صباعي الكبير مع الصباع الجنبو

ليكون كلمة الله , دي برضها كنت بنعتقد انها بتنجينا من الدق

وهاك اغنية شرحبيل
الرقص جميل
و ليهو نميل
تعاال يا كحيل
ما تبقى بخيل
الرقص قياافة
و فيك لطاافة
يا اللابس البمبى
يا نعسان
و غالبك نومك
يا مهموم
سرحاان فى همومك
قوم من نومك
و سيب همومك
و رينا فنونك
ميل شماال
ميل يمين
و دور...دور
يا اللابس البمبى






تحياتي

Quote: لكن كنت بقطع لي شعرة من روموشي و اختها تحت اللسان عشان ما اتجلد او امسك صباعي الكبير مع الصباع الجنبو

ياخي بتاعة الرموش دي جات بعد نحنا مشينا؟؟
جنس ابداع‘ الفكرة شنو كانت‘ اللسان بتذكر انو جنبو رمشة‘ بقوم بخلي الدموع ما تنزل؟؟
شرحبيل يا صديقي‘ يكفي انه أضاف الى الأغنية السودانية بعدا جديدا‘ و الغريب أن أحدا لم يزاحمه فيه
شكرا على حضورك البهي
الملك

سلام يا تاج
اناشفت الصورة بهناك وشفتها كيف اتعبت المعلقين
وقعدت كده اتمعن فيها يجي وقت طويل
وبعد فترة لقيت نفسي انا بتمعن في الذكريات والوطن
و
وليم اندريا ذلك العملاق الممتد
وكمال كيلا ( حاجة كولن كولن باشاكا )
وماعارف ليه جاء خليل اسماعيل واسماعيل عبد المعين
( يوم بيوم نبيع الكنبا)
ورمضان زياد وآه يازمن
اتمحنت في نفسي وفي الزمن
وفي عمك تنقو وخالة العازة
البورتيه خطير واعتقد انه من اجمل الصور التي صورت للعملاق جداً شرحبيل
وكم سعدت بزيارته ليكم في امريكا
واتمنيت لو يقدر يجينا هنا في استراليا
شرحبيل سفير حقيقي للثقافة السودانية
فهو يعكس تعدد متكامل للانسان السوداني
وياريت لو عندك ليهو صور وهو بغني او بعزف
وطبعاً حفلة ذي دي فاتت ابودومة
والله كان صور شرحبيل وهوبيغني
كان حيعمل عمائل
لك الشكر على مساحة الذكرى
والشكر عبرك لفيصل
وياريت يافيصل
لو تقدر تكتب اغنية (فوزية بت خالتي)

http://www.geocities.com/asa20052000/index12.htm




امين زوربا

ســـلام


في هذا الليل الهادي دعنا نسرح مع شرحبيل خطوة خطوة


http://www.youtube.com/results?feature=moby&search_quer...84&search_type=&aq=f

جد جد يا تاج مسيرة حياتو مثمرة .
الرجل طرق أبواب الفنون من بدرى بالحيل .
يرسم ويغنى بصوت صادق مفعم بالعاطفة والجمال .
يا سلام
يا سلام يديك العافية يا ( شيخ حبيل ) نعم شيخ حبيل
تحياتى .

Quote: وبعد فترة لقيت نفسي انا بتمعن في الذكريات والوطن

Zorba
I will comment on this point sooner
salami

Quote: جد جد يا تاج مسيرة حياتو مثمرة . الرجل طرق أبواب الفنون من بدرى بالحيل . يرسم ويغنى بصوت صادق مفعم بالعاطفة والجمال . يا سلام يا سلام يديك العافية يا ( شيخ حبيل ) نعم شيخ حبيل تحياتى .

اوفيت الرجل حقه يا عثمان
تحياتي

http://www.youtube.com/watch?v=7ZcarpyKs5E

.
.

فيصل خليل

ياخي أمانة أنا مامتلوم معاك لوم السواد شابكك عم فيصل عم فيصل ، أنا قايلك من سنة حفروا البحر:)

من يوم الليلة دي تاني بقول ليك الأخ فيصل أو الإبن فيصل :)

ياكمان شرحبيل ده يكون من عهد الأسرة الفرعونية التالتة:)

خالص المودة والتقدير
.
.

كتب ايه الله ازهري 2

Quote: فيصل خليل ياخي أمانة أنا مامتلوم معاك لوم السواد شابكك عم فيصل عم فيصل ، أنا قايلك من سنة حفروا البحر:) من يوم الليلة دي تاني بقول ليك الأخ فيصل أو الإبن فيصل :) ياكمان شرحبيل ده يكون من عهد الأسرة الفرعونية التالتة:) خالص المودة والتقدير

غرغرغرغر








إن أيامنا مثل أوراق الخريف تتساقط وتتبدد أمام وجه الشمس

















بس انا مبسوط منك

يعنى أيش لون تباريها من زمن العجلات
وبرتريهات واتنيهات ؟!
غايتو أنت والخردة الكرمبا ياكم اكالين
الخرفان كلها (جمع اخرفه ومفرده خريف)
- اوعه واحد يعمل فيها خريف ويجي يصلح
لغوياً-
المهم فتشته ليك صور قديمة شوف لقيت لينا
شنو !


اها قالو الكلام ده سنة 1958 شرحبيل احمد جتار وغنا
كامل حسين (ماندولين) حسن سروجي -بابكر- محمد عثمان (رقص)
ومن الخلف احمد داؤود (درمز).

اما دي ففرقة عمك تنقو في منتصف الستينات لما الخردة كوستاوي جاب الشيلة
وحسب البيانات شرحبيل معروف ،كامل حسين(الطو ساكس)
احمد داؤود (درمز) ذكية ابو القاسم-زوجة الاستاذ- (جيتار)
مهدي علي (باص جيتار)

ودى احتفالات شارك فيها شرحبيل شارك فيها ناس السمندل سنة 90
من اليمين خنساء الكارب ، ناهد شرحبيل، شهيرة شرحبيل، وعمنا السلطان
الملك شرحبيل ذات نفسه .


المصادر :-

http://images.google.com.eg/imgres?imgurl=http://www.dr...ar%26sa%3DG%26um%3D1

http://images.google.com.eg/imgres?imgurl=http://www.dr...6start%3D40%26um%3D1

ـــــــــ
انا شاكى انو عمك تنقو ده
صاحبك بتاع القصص القصيرة
الكلها زقاقات داك .

ملحوظة سغمبتوته :-
البوست ده كان انفتل
مافي زول يقول لي عدل
صورك او روابطك لاني لو
كنت عارف اسوى فيهن شنو
ما كنت ح افتل البوست زي
ما انا متخيل .

أخي سيف نابري
احييك على هذا الجهد العظيم
بعدين البوست اتفتل ما اتفتل ما عليك
بس كتر في شغل الأرشيف
تحياتي
الملك

تاج السر ..سلامات ..

شكراً لك وانت تعطي لهذه القامة الفنيه بعضاً من حقها .. فالفنان الانسان شرحبيل احمد من الذين احبهم لكونه فناناً يحترم فنه والاخرين ..احببت عمك تنقو والصبيان فيه ...

له التحيه ومتعه الله بالصحة ..


ودالقاضي ..

فايز ود القاضي
مودتي و شكري على الأضافة

التاج الفنان

زميلي في شركة الحبوب الزيتيه النوع الما بيظهر عليهو العمر اسمه صديق بركه من ابو حجار

قابل شرحبيل في السبعينيات فذكره بمعرض اقيم بمناسبة ثورة سبعطاشر نوفمبر

زمن عبود يعني...

قال ليهو يا شرحبيل في المعرض اياهو عملت لوحه جميله عن السودان نظام انوار موجوده علي المعالم

الجغرافيه تنور عند الاختيار الصحيح

المهم شرحبيل قال ليهو:

والله انت قديم جنس قدم ... انت من الزمن داك ؟

:- ياخي قديم انا ولا قديم انت العملت عمك تنقو...؟؟

الاستاذ الفنان تاج السر
حاولت جاهداً ان اكتب فى بداية هذه المداخلة
التاج الفنان
او الفنان تاج السر حااااف كده كصاحب face book وكده
فنظرت الى الصور والكتابة اعلاه واعدت البصر فتأكدت انك استاذ وفنان كبير جداً وكلام الصحبه الحاف ده ما بجى معاك
ياخ انت جميل جمال وفنان فن
والله يخلى ليك اولادك الظراف ديل
اما عن الفنان صاحب الصوره فده كوووم براهو
انا من الناس الذين تشرفت بان لمتنى الظروف بعم شرحبيل وعرفتو من قبل 11 سنه
وهو كل يوم مدهش اكتر وكل يوم super star اكتر وربنا يحفظوا ويطول فى عمرو
اقول ليك شنو عن ترتيبو ولا حكاويهو ولا ثقافتو ولا غناهو
هذا الرجل ظاهره صعب انها تتكرر
اول من يصحى وينزل للفطور فى الفندق بعد ما يصلى الصبح بطاقيته الخضراء
يحب المشى وينصحنا انو طالما الليله فى تسجيل حقو ترتاحو
ويحكى ليك الحكاوى بصوت اقرب الى الهمس وله طريقه ضحك جميله كالاطفال
وفى حضرتو( مهذب امامه يكون الكلام)
مره سألتو عن عمك تنقو قلت ليهو يااستاذ انتا عمك تنقو ده فكرت فيهو كيف ؟
قال لى رسموهو قبالى ناس كتار واحد منهم الاستاذ الصلحى
لكن عمك تنقو حقى ده
رسمت لى زول بيشبهنى وبشبه اى زول سودانى لكن فى صورة شمبانزى
لانو المستهدفين بالقصه دى الاطفال والقرد كائن محبوب ليهم.
طبعاً اجمل حاجه فى عمك تنقو الاشعار المصاحبه للرسومات وكانت من تأليف الاستاذ شرحبيل
كنا بنسجل فى غنا فى استديوهات ART فى القاهره
واجمل تعليق قاله مهندس الصوت بلهجته المصريه عندما كان الاستاذ شرحبيل يغنى
الاستاذ ده بس تسمع صوتو تعرف على طول انو راجل طيب
الحمد لله الذى جعلنا نعاصر هذ الفنان الطيب

Quote: انا من الناس الذين تشرفت بان لمتنى الظروف بعم شرحبيل وعرفتو من قبل 11 سنه وهو كل يوم مدهش اكتر وكل يوم super star اكتر وربنا يحفظوا ويطول فى عمرو اقول ليك شنو عن ترتيبو ولا حكاويهو ولا ثقافتو ولا غناهو هذا الرجل ظاهره صعب انها تتكرر

This is awesome
what instrument did you play ya Shabaka??
You need to tell us more about the experience
I am happy to see you here on this post
If you have any pictures , would you share
Thanks again
Elmelik

أخي العزيز طارق ميرغني
أهم سمات المبدع الحقيقي بالنسبة لى شخصيا...... القدرة على الأستمرار و القدرة على العطاء
الأصيل‘ الكلام ده في ظاهرو و اضح‘ و لكني اعني بيه تحديدا‘ التماسك الذي يتوفر لبعض الناس
دون أناس آخرين‘ فكم من فنان سطع نجمه و خبا‘ و تلاشي و تلاشت معه سيرته و توقف عطاؤه‘ ليست
العبقرية عندي أن تصيب الهدف مرة‘ و لكن ان تواصل التهديف‘ و العمل الفني الحقيقي يظل أخضرا
في كل الفصول‘ و الفصول قد تعني كل الأجيال‘ و قليلون هم من تحيا و تحتمل اعمالهم عوامل تعرية الزمن
و قسوة التاريخ.
شرحبيل قدم شكلا فنيا فريدا‘ قدم اغنيات تخصه وحده‘ مثله مثل ( جيمي هندركس) الذي اخترع طريقته الخاصة
في عزف الجيتار‘ لذا يجوز تسميته بال (innovator) وهذه درجة عليا في الفن‘ كل الأعمال التي تأتي مندرجة تحت
أطار اسلوبه من اى فنان‘ تحسب لصالحه‘ يعني مسألة تطاول بعض الناس عليه في السابق ( لو شرحبيل ملك الجاز انا امبراطور الجاز)
لا معني لها‘ لأن الأسلوب الذي ابتدعته عبقرية شرحبيل ‘ خاص بشرحبيل‘ و الغريب في الأمر أن اسم الرجل‘ لم يعد اسمه‘ بل تحول الى أسم المشروع الفني نفسه
يتغير الأفراد العازفين (side men) او (Line up)‘ و يبقى المشروع الفني كما هو ‘ يصدر تحت توقيع ( شرحبيل)
مثلما حدث في حال ( كارلوس سانتانا)‘ فالأسم رمز لمشروع فني لا يشبه الفكرة السائدة عن موسيقى ال (Chicanos)
وهو مستمر خلال خمسة عقود‘ يتطور و يظل في الوقت نفسه محافظا على اصالته و تفرده.
سنكمل
تحياتي

Back in the day.

Quote: وهو مستمر خلال خمسة عقود‘ يتطور و يظل في الوقت نفسه محافظا على اصالته و تفرده

هذه اخي التاج سمة المبدع الحقيقي والذي قل وجوده في هذا الزمن المستعجل...!!

صديقى هندسة

وانت دائما تاتينا بالجميل الراقى

وحتى صورة شرحبيل لها بعد تانى من خلال كاميراتك العجيبة ياهندسة

ويتميز الاستاذ ، شرحبيل بالتفرد فى كل اعماله الفنية وله صوت من الصعب جدا تقليده او مجاراته

التوفيق والامنيات الطيبة لك والاستاذ/ شرحبيل

يا ياسر ساسل
تحياتي
وشكرا على مجهوداتكم في الترحيب بالعملاق شرحبيل
و تمنياتنا بنجاح حفله القادم
الملك

شكرا ياتاج السر،
أستاذنا الكبير شرحبيل أحمد أحد كنوزنا القومية.
نتمنى له دوام الصحه.

Quote: أستاذنا الكبير شرحبيل أحمد أحد كنوزنا القومية.

التشكيلي خالد ولد كودي
كيفك و الأسرة
شرحبيل كنز قومي ‘ اتمنى ان نوفق في الحفاظ عليه و على ارثه الفني
ياريت يكون عندنا حاجة زى ال (Rock and roll hall of fame)
عشان نحفظ فيها ارشيف بأعمال العظماء امثال شرحبيل و غيره للأجيال القادمة.

تاج السر الجميل...رمضان كريم.....بالرغم من أني أعرف الملكات الفنية لشرحبيل أحمد....إلآ وكأنني قد أعدت إكتشافه من خلالك....إنه ثروة قومية ...ولكنه وكما الحال في بلادنا....لا إهتمام من جانب المسئولين لتخليد هؤلاء العظماء....اللهم إلآ الإحترام والحب والتكريم الذي يجدوه من أبناء شعبنا الطيبين....لك الشكر والتقدير وأنت تنثر حفنة من نور علي هذه القامة...

راشد

راشد
كل سنة و انت طيب

Will post captured moments from Shurhabil's final concert last night in Virginia, soon

Comics