لم يحدث ان رأيت الترابي بهذه الجدية ابداَ

قبل قليل شاهدت الترابي يتحدث في فقرة ضيف المنتصف علي قناة الجزيرة.. بدي لي بوجه مغاير جدا لما عهد علية.. كان جاداَ جدا بلا بسمات (غياظة) و لا ضحكات استهزاء.. حديثه فيه قدر عالي من الاحساس بالمسؤولية و تحمل عبء المرحلة المتردية.. بسماته وضحكاته كانت دائما تجعل المستمع له انه يريد خلق واقع موازي.. كان ذلك عندما كان عراب الانقاذ يسخر من محدثه الذي يريد ان يستوضحه عن تدهور الاوضاع.. فيصف له حاله هو علي انه حال العامة الذين يأكلون الجاتو و يحلون بـ (السمرقع) (موش اسمه كدا يا وهبة؟).. يبقي الترابي هو الترابي لكن هذا الظهور المعبر عن حالة لحظية يقول الكثير..

Quote: لكن هذا الظهور المعبر عن حالة لحظية يقول الكثير..

من المكر والخبث.....

سلام اخي نصار وينعاد عليكم بكل الخير

Quote: جدا بلا بسمات (غياظة)

هى غياظة وبس,, الحمد لله لقيت زول يشاركنى احساسى تجاه تلك البسمات الصفراء التى لاتسر ناظر.

اللهم اجعله خير.

مخطئ من ظن يوما ان للثعلب دينا!
لا للدولة الدينية
جنى

Quote: قبل قليل شاهدت الترابي يتحدث في فقرة ضيف المنتصف علي قناة الجزيرة.. بدي لي بوجه مغاير جدا لما عهد علية.. كان جاداَ جدا بلا بسمات (غياظة) و لا ضحكات استهزاء.. حديثه فيه قدر عالي من الاحساس بالمسؤولية و تحمل عبء المرحلة المتردية.. بسماته وضحكاته كانت دائما تجعل المستمع له انه يريد خلق واقع موازي.. كان ذلك عندما كان عراب الانقاذ يسخر من محدثه الذي يريد ان يستوضحه عن تدهور الاوضاع.. فيصف له حاله هو علي انه حال العامة الذين يأكلون الجاتو و يحلون بـ (السمرقع) (موش اسمه كدا يا وهبة؟).. يبقي الترابي هو الترابي لكن هذا الظهور المعبر عن حالة لحظية يقول الكثير..

عزيزي نصار

سيكون هذا هو حال العديد من الكيزان (الحالة الوصل ليها الآن قائدهم وملهمهم الأول)

حيفهموا الناس بتقول في شنو

لكن للأسف

بعد فوات الأوان
وإنعدام الثقة

يمكنه خداع كل الناس بعض الوقت

يمكنه خداع بعض الناس كل الوقت

لا يمكنه خداع كل الناس كل الوقت

ابراهيم عدلان
كل عام و انتم بخير
الترابي الشفته الليلة دا يا دوب فكت سكرته
المن زمن جبهة الميثاق
الزول دا اصلا من ايام مظاهرات اكتوبر ما
كان جزء من المين استريم بتاع السياسة
السودانية
الان بعد ما اعتقد انه خلق بديل لقوي اهل
السودان يكون هو فيه الكل في الكل
اترمي فالتصق بالارض الكان طاير منها
باجنحة الزهو و الافتتان بالذات و احتقار
الاخر
الزول دا كان جادي بالجد
لكن مشكلته في زمن عزه ما فكر في يوم
يخسر فيه كل شئ
ما خلا لي نفسه صليح

الطيب العريس
عيدك مبارك
هو بالضبط كدا دا ح يكون حالهم

شفت كيف يا جني
المحصلة انه عمل دولة دينية
بلا دين
قاليهو حالتا بلا وضو

العزيز الفاضلابي
كل سنة و انت بخير
حكمة الله الشي النفرنا منه فتن شباب لا عد لا حصر
كلامه الملولو و ضحكاته الخلت صحفي ايام الديموقراطية
يكتب _ما الذي يضحك الدكتور_

بكتاش العزيز كل ايامكم اعياد
ذكرتني عادل امام في وصفه للمستثمر الاسلامي
قال من شدة الايمان تفتكره عاوز يبكي
و نفس الوصف دا قال واحد اخونا في واحد
اخونا تاني في بونا لو سمعت القصة ح تضحك
لمان تقع و كان ما سمعتها الا اديك ليها
تحت تحت

الأخ الـحـبـيـب الـحـبـوب،
نـصـار،
تـحياتي ومـودتي،

*** - تعرف يانصار، الترابي ده الناس العاقلين بتعاملو معاه بالمثل المعروف " لايلدغ المرء من جـحر مرتين ". انا شخـصيآ بعرف الترابي من سنة 1964 وعندنا ملفات عن سلوكياته ومصائبه وخبائثه، وموضوع وجوده بجـوبا سؤال حـوله ألف علامة استفهام?،

*** - الترابي الموجـود في جـوبا الليلة ، مـش هـو بتاع الجهاد ضـد الجنوبيين الكفرة الاجناس، وبتاع أسلمة الجنوب شاءوا اهلها ام رفـضوا ?، ومش هو مخترع فتاوي الحور وبنات الجنة المنتظرات الشهداء ... ولا واحـد تاني?!!

*** - بكرة تشوف حيقول شـنو عن مؤتمر جـوبا .... حـينقلب علي مؤتـمر جوبا ويشـتم الاحزاب المشاركة فيه?!!

*** - لك مودتي نصار.

Quote: تحت تحت

قرط علي كدا واجدع

مباشرة قفزت لذهني قصيدة الديك والثعلب في المرحلة الابتدائية والتي يقول مطلعها

برز الثعلب يوما في ثياب الواعظينا
لى آخر القصيدة
جربناه كم سنه ؟؟؟؟؟؟؟؟؟؟

نصار .. يمسيك بالخير ياخ .

كدي خلينا من جدية الترابي هسه ..
إنت ده .. جادي ؟؟


........
( قلتُ : هل يبتنى الطير أعشاشه في فم الأفعوان .. ؟
هل الدود يسكن في لهب النار، والبوم هل يضع الكحل في هدب عينيه ؟
هل يبذر الملح من يرتجى القمح حين يدور الزمن؟ ) ...
- أمل دنقل -

عماد
الخير يعم ايامك
اصلو ما داير اكون معاه علي حال
واحد تحوطا كدا اخترت الهزل

هو كان جادي دي ما فيها كلام
لكن هل في جده ولا عبسه ولا مرحه
خير؟ دا السؤال الاجابته اسهل
من لو هو جادي ولا لا

عبد الدين سلامة
هو زاته ضحية تجريبه لنفسه علي نفسه
اكمل الدايرة يا صديقي

سلام يا بكري
اريت حالك زين
الترابي بعد لدغ لمان فتر ارتد ليهو سمه القدر غداهو
و بفتش لمصل
ان لقاهو بتاوره نايبة علي اللدغ تاني
الثعبان بغير جلده بنفسه في الوقت البكون قام ليهو
جلد جديد لكن الدكتور معطوهو في غفلة من امره
و لبسوا جلده مركوب يصعدوا يصعدوا بيه سلالام السلطة
الختاهم في اول كتباته
يبقي يا عرف الله واحد
يا حزنه علي الذي كان اكسبه مظهر جاد
يا بردان لانه جلده انسلخ
مكر و حيلة مافي ليهو تاني

لقيتك خطييييييييييير يا نصار....

نصار كل عام وانت بخير
باقى لى ما اتلاقينا فى العيد..

هذا جناة ابى على وما جنوت على احد
كانه اراد ان يقول هذا

ولكن نقول له
البلد المحن مجبور يلولى صغارها

اخ من هذا الشيخ الكذوب
فقد اورد البلاد موارد التهلكة،،،

أخوي نصار الله بيغفر لكن جمهور السياسة في السودان لا كأنه الواحد فيهم مبرأ من العيوب

أنا بكره الترابي عمي لتاريخه الكعب

لكن الراجل من سنوات عديدة مواقفه اشجع من مواقف نقد والصادق والميرغني

والوحيد البنسجن فيهم

والوحيد البشجاعة ايد قرار المحكمة الجنائية ضد البشير

والوحيد البقول للبشير انت دكتاتوري وكضاب

عاوزين تقولوا مسرحية...ممكن بس كل الدلايل بتشير لعكس كدا

لأنوا كل المشو مع التراب بعيشوا اوضاع مزلة الليلة في السودان

بنكره الترابي أيوي....دا يعمينا نكون منصفين غلط

مواقفه جيدة وبتصب في صالح المعارضة أكتر من النظام

هل خايفين يعود بقوة للساحة السياسية ...مستحيل

لأنه السودانيين ما كرهوا زول زي ما كرهوا الترابي

دا الناس بكرهوه أكتر من البشير

شكرا نصار علي كلمة حق ولو علي عدوك

العزيزة صباح
كل عام و انتوا طيبين
نعم رأيت في كلامه و طلته انه احس بألم الجرح الذي اصاب
الوطن بسسبه لكن للاسف لانه اناني ما واتاه الاحساس
دا الا بعد ما اصابه في جلده هو
نعم الله يغفر و الناس لا
عشان كدا ربنا بيغفر لمن اشاء ما شاء لكنه لا يتجاوز
عن حقوق الناس
يعني سيك سيك معلك فيه العباد بطالبوا بحقوقهم
و ربهم ينصفهم في الدنيا قبل الاخرة

ود الموج حقق الله الاماني
المشكلة انه عادي يشوف انه الحركة الاسلامية
جنت عليهو لكن المصيبة انه حتي هي بعتبرها
بنت و حقته دغري
اساء تربيتها فاذاقته من الكأس الذي كان
يملاه لها لتسقي غيره
فكيف يبتسم؟ و قد ارخي السم عضلات وجهه
و عزمه

تلقي ناس كمال عباس و بقية شباب الهند مسكتهم كاروشة يا بكتاش
علي السيرة العطرة دي و الشغل الغمتي

Quote: مكر و حيلة مافي ليهو تاني

الترابي في قبره ما تضمنو !! ممكن يكون عامل ليه مصيبة تظهر من باطن الارض .

الترابي ساط البلد بي عود ,,,

فرجع يسوط تاني بس المرة دي بالعكس الاتجاه .



الرائع و المفرح و إن اختلفنا معه في الاسلوب لكن اتفق معه في الهدف إسقاط الكيزان

كما اتى بهم فسوف يذهب بهم .

الاستاذ الفاضل نصار


لك التحية

Quote: ).. يبقي الترابي هو الترابي لكن هذا الظهور المعبر عن حالة لحظية يقول الكثير

الترابى هو الترابى , حقيقة .

سلام يا نصار
سلام يا نصار
لو جاز لنا أن نسمي رجلا واحدا كالاكثر تخريبا للبلاد و العباد لكان هذا الترابي !
كدي تخيل قبل عشره سنين كان ممكن تكتب أي كلمه و لو بسيطه و في جانب الهزل في صالح الترابي ؟ لازم يغير ادواتو كلها عشان يجينا تاني من الأول ! لازم يعرف متين يبقي جادي و متين يبقي المطر و متين يصبح حريق ، عشان يحرق ميتينا ذاتو !!!!

الاخ نصار,
انا تابعت لقاءت الترابى فى جوبا منذا زيارته الاولى و مشاركته الاخيرة فى مؤتمر جوبا, و لقد حاولت جاهدا معرفة خطفه للاضواء اينما حل فى الجنوب و انبهار اشرس الصحفين على نـطاق السودان به, (الفرد تعبان و نيال بول و فارس ريتشارد- اوع يجينى واحد يسالنى الناس ديل من وين!!!)
فى رآى الشخصى, اعتقد ان الجنوبين يريدون ان يجدو سببا واحدا من الساسة الشمال يجعلهم يصوتون لصالح الوحدة, اى, a cry for help, امل, جدية, الامانة, الاحترام,اى شئ يثبت بان الاخوة فى الشمال سيتركون الالعاب السياسية فى حقوق الجنوبين. للاسف الشديد, هذا المجرم الترابى قد اصبح, و بقدر قادر, من القلة من الساسة الشمالين الذين يعرفون مخاطبة الجنوبين, فهو لم يخفى تاييده لانفصال الجنوب حين تكونت حركته الاسلامية منذا الستينات لاسباب برغماتية باعتبار ان الجنوب ستكون عقبة لمشروعه الاسلامى و حاولت حركته الابادة و الاسلمة للجنوبين منذا مجيئهم للحكم لان الانفصال كانت تعنى كارثة لبقية السودان. الكلام دى ردده الترابى عدة مناسبات فى جوبا و اضاف ان المشروع الاسلامى لم يكن له علاقة بالايمان, يعنى الحكاية كلها كانت سلبطة فى سلبطة لان المرجعية الاسلامية لا تضمن "Fundamental human rights " للاقلية الغير مسلمة فى دولة مسلمة و قال, "I know it because I taught constitutional law, lagislatuer and authored many of these laws", الكلام قاله فى تلفزيون الجنوب فى زيارته الاولى قبل سبوعين و كان قد شارك فى صلوات فى احدى الكنائس فى جوبا و قام بخطبة المصلين و لقد كانت الخـطبة كلها, Mea culpa و طلب المغفرة و الحب المتجسد فى تعاليم المسيحية. الزول دى كان قد سخر ببعض القضايا الفقهية فى الاسلام قبل سنتين و دى جذب انتباه الجنوبين لان الجنوبين يعرفون اسباب استخدام الايدلوجية الاسلامو-فاشعربية و يعرفون كذلك نفاق من يقفون وراها و لمن يطلع واحد و يقول الحقيقة النحن نعرفها, فغالبا ما بجد الاحترام و هذا ما انجزه الترابى.
الترابى إنسان زكى جدا و يبدو انه يريد ان يبول فيما صنعه قبل ان يفارق هذا العالم, يعنى على و على اعداءى.

العزيز زكريا
في زمن عزه و مجده، ظن انما امره بين الكاف و النون، اصله ما كان بشبه نفسه باقل من احد الرسل اولي العزم و جماعته بخلصاء الانبياء، كنا لمان نتكلم عنه مع المفتونين بيه بضحكوا علينا، كيف نتجرأ و ندعي اننا نملك القدرة علي مجرد فهم ما يقول و هم نفسهم يعتزون بانهم حضروا له محاضرة لساعات لم يدركوا منها شئ، نعم و الله يعتزون و يجهرون بذلك.. كثيرون منهم اخاتروا ذهب المعز الان و تركوا شيخهم مع قلة يصيبهم فجور الخصومة التي ربي عليها ابناءه العاقين.. ايام الديموقراطية سمعته يقول ما معناه، كل جيل سوداني يأتي يجد واقع اسود من الجيل السابق له و الاجيال التي لم تشارك في صناعة الواقع الان سوف لن تجد شئ.. بعد ذلك انقلب علي السلطة و حقق ما قاله علي ارض الواقع.. موش برغماتية بس دا الانتهازية الميكفلية تمشي علي قدمين.. الم يذهب للامريكان في عز ايام تزويج (الشهداء) علي الحور العين ليقول لهم ان حرب الجنوب ليس للدين دخل بها و هي لا تعدو كونها حرب اهلية.. الكيزان عموما لا يعرفوا الحياء.. كان يعرف ان في عالم اليوم لا يخفي علي الداخل و لا الخارج قول يذاع.. لكنه لا يستحي من.. قس علي ذلك ما يلهث وراءه اليوم في الجنوب.. ايام تسييره امور الدولة و اعلامها الفاجر بشعوا بفاطمة احمد ابراهيم لانها زارت معسكر لقوات الحركة الشعبية في الجبهة الشرقية.. انتزعوا حديثها من سياقه و طفقوا يذيعونه بتكرار و حمولة دراماتيكة تقول للناس ان فاطمة كافرة و عميلة و تلميحات لا حصر لها و لا ترد الا في خاطر مريض..

هلا امين
هو يا دوب ح يعرف؟ من ما شاهدته بتردد في راسي
كلام الحجاج لاهل العراق خاصة قوله لهم
ان الحزم و العزم سلباني سوطي و ابدلاني به سيفي
زولنا دا الظرف سلبه ضحكه و تبسمه و فرض عليه
جدية فماذا تبقي له ليضحك؟

العزيز الطيب رحمه قريمان
هو قلة من اتباعه لم يستوعبوا
انهم في الاصل مثل اخوانهم الذي
بقوا في السلطة و ان خلافهم يخصهم
و لا يخص الشعب
مافي طريقة لاعادة تغليف و تسويق

Quote: كما اتى بهم فسوف يذهب بهم

لو عمل دي بنقايطه في الباقي

نعم والله شاهدته كان جادا جدا على غير عادته المعروفة
ويبدو الحالة التى يمر بها الوطن والمسائلة التاريخية
وحرارة المواضيع التى يعيشها السودانيين , وفعلا كره
السودانيون الترابى , ولكن لايكون حالنا كحال الجمل
كن وقع ....., فالسؤال الذى يطرح نفسه من الذى جعل الترابى
يفعل ما فعله فى سنوات ماقبل المفاصلة , من جعله هكذا من
كان حوله بداية من البشير ومرورا بعلى عثمان ومصطفى عثمان
, الذين يتحكرون فى السلطة حاليا , ويقتلون معظم الشعب السودانى
بالبطىء والبعض الاخر فى مذابح الموت وشلالات الدماء هناك, اذن
يهمنا فى هذة المرحلة من هم على السلطة وعلى اعناقنا ليل نهار.
فقطع شك الترابى لن يتولى زمام الامور بعد ما راى الشعب الاعيبه.