Post: #1
Title: ملخص الايميلات المابتنفع معاي .. ( الرجاء التقيد بالتعليمات ) ..
Author: humida
Date: 09-21-2009, 06:07 PM
Parent: #0
أولا: المقاطعة:
قاطع المنتجات الأمريكية لأنها تدعم اسرائيل.
قاطع المنتجات البريطانية لأنها تدعم أمريكا.
قاطع المنتجات الدينامركية عشان الكاريكاتير.
قاطع المنتجات الهولندية عشان الفلم.
قاطع المنتجات الألمانية لأنها جنب الدول السابق ذكرها.
و في النهاية نحن بنرسل لى بعض بعض مستخدمين الاجهزة كومبيوتر و اتصالات والشبكة و البرامج الامريكية، و كل واحد فى بيتو مركب مكيف امريكى و سخان امريكى و تلاجة امريكية .... يعنى بس حبكت على البيبسى و الشوكلاتة.
|
Post: #2
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: humida
Date: 09-21-2009, 06:10 PM
Parent: #1
ثانيا: الصحة:
ما تشرب البيبسي لأنه يحتوي على مواد تنظيف و عصارة خنزير.
ما تشرب ريد بول لأنه يسبب العقم..
ما تشرب شامبوين لانو غير خالى من الكحول ( فيهو كم خط) ..
ما تشرب عصائر طبيعية لانو فيها مواد ملونة
ما تشرب عصير طبيعي لأنه يأتي على شكل عصارة مركزة
يعنى بالعربى كدا الناس تشرب عرديب و كركدى و تعتمد على المريسة كمشروب روحانى
لا تأكل لحم البقر لأنه يسبب جنون البقر.
ما تأكل الجداد بعمل انفلونزا الطيور
ما تأكل سمك بعمل بواسير السمك
ما تأكل خضار و لا فواكه لأنها كلها هرمونات
ما تأكل معلبات لأنها تحتوي على مواد حافظة
وما تشرب عصير غير طبيعي لأنه كله ألوان
طيب يعني ناكل هوا؟!!! لأ طبعا اوعك من الهوا , اساسا الهوا دا ملوث بعوادم العربات و المصانع.
ما تدخن و ما تشرب شاي و لا قهوة علي الريق
لا تأكل مباشرة بعد الاستيقاظ من النوم
اشرب ثلاث اكواب من الماء على الريق لاذابة الدهون
شراب الماء على الريق يرهل البطن
لا تمارس الرياضة بعد النوم الا بنصف ساعة
يعني أحسن حاجة .... انك تقوم من النوم و تنتحر
ما تخلي الموية في الثلاجة داخل علبة بلاستك لأنه مسرطنة
ما تخليها في قزاز لانو ممكن ينكسر بدون ما تعرف و تشربه و تموت.
و ما تخلية برة التلاجة لأنها ممكن يتلوث.
و اياك تشرب من الماسورة لانها ما صحية
ما تشرب موية من الحنفية لأنها معالجة بالكلور
ما تشرب موية مفلتره لأنها تسبب نقص فيتامين
و ما تشرب موية صحة لانها مكررة و فيها مواد مسرطنة.
ما تشرب موية الزير لانو فيهو طحالب
ما تشرب موية بعد الأكل بتعمل غازات.
يعنى احسن اننا نشتغل بى نظرية السمك و نشرب الماء المذاب فى الهواء
ما تتكلم علي الموبايل بدون سماعة اضان عشان الموجات بتقتل خلايا المخ
و ما تتكلم عن طريق السماعة عشان الكهربا الساكنة
و ما تتكلم عن طريق البلوتوث عشان الموجات برضو بتقتل خلايا المخ
ما تتكلم بالتلفوت الثابت لأنو ممكن يوصل الصواعق و يحرق ابو اهلك
ما تتكلم بالماسنجر لأنو بيضعف البصر
احسن حاجة انو لو عندك كلام مع زول تلاقيهو فى حدائق ستة ابريل و تتكلموا على راحتكم
ما تشغل التكييف بتاع العربية اول ما تركب لأنه مسرطن
وما تخلي الهوا يجي من بره لأنو ملوث
ما تلخبط الفريون بالهواء الجاء من برة لأنو بيعمل التفاف الوجه
احسن حاجة تركب مكيف موية فى عربيتك
و اطلع في الشمس عشان فيتامين "د"
و ما تطلع في الشمس عشان الأوزون بيعمل سرطان
واطلع فى الشمس عشان تروح البهق و تحرق الدهون
وما تطلع فى الشمس عشان ما تتلف اهداب الشبكية
احسن حاجة تطلع لمن يكون فى كسوف و خسوف بس
|
Post: #3
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: humida
Date: 09-21-2009, 06:11 PM
Parent: #2
ثالثا: الدين و ما ادراكا ما الدين
اخخخخخخخخخخ انا من الرسائل الدينية
قم بإرسال هذا الايميل لجميع من عندك وتكسب 258649735 حسنة ....
ما علينا شوف المغصة الجاية دي لانها ورمت لي قلبي من كترة ما جاتني
حارس قبر الرسول (صلى الله عليه و سلم) اسمه احمد حلم ان الرسول (صلى الله عليه و سلم) قال ليهو انه لازم يوصل الرسالة دي............. ياخ هو الغفير بتاع الحرم متين سوا ليهو ايميل
اذا لم ترسل هذا الايميل ل100 شخص بقرتك حا تموت فى الولادة و خروفك صوفو حا يتحتا و ابوك حا يطلق امك و حبل الغسيل بتاعكم حا ينقطع و يوقع الهدوم المغسلة .. و بالمناسبة فى واحد كان محكوم بالاعدام و رسل الرسالة دى و طلع براءة وواحد تانى مدير شركة ابا يرسل الرسالة و الشركة بتاعتو حرقت
ياخ انعل ابو دا تفكير زاتو ..
و ايميل يقولك دعاء من دعاه حققت له 100 أمنية
دعاء الامتحانات, دعاء المرة الدايرة تولد , دعاء فتح اللابتوب, دعاء ركوب الاصانصير, دعاء طهى البيتزا
بتجبوا الكلام دا من وين دا مصباح سحري ما دعاء
و بعدين فتوى تحريم الكوكاكولا
و فتوى تحريم "البوكيمون"
و فتوى تحريم "البلايستيشن
فتوى تحريم سماعة البلوتوث
فتوى تحريم ايسكريم الشعلة"
و أحلا فتوى فيهم .. فتوى قتل "ميكي ماوس" دا يلقوهو وين.. و الله لو لاقانى بقتولو طوالى
يعني أحسن حل ....
انه الواحد لا ياكل و لا يشرب و لا يتنفس و يركب الحمار بدل العربية و يشتغل فى فرن و يلبس ريش نعام و يرسل جوابات بالبوسطة
ملاحظه: اذا لم ترسلها الى 35 كديستك حا تتزوج عرفى و تجيب ليك كدايس غير شرعيين
|
Post: #4
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: محمد عبد الماجد الصايم
Date: 09-21-2009, 06:13 PM
غايتو حلتكـ مني الـ  دي!
|
Post: #5
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: humida
Date: 09-21-2009, 06:19 PM
Parent: #4
لو ما فاطر ما تخاطر ..!
|
Post: #6
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: محمد عبد الماجد الصايم
Date: 09-21-2009, 06:23 PM
Parent: #5
| Quote: انه الواحد لا ياكل و لا يشرب و لا يتنفس |
الجملة دي ناقصة حاجة .. ولا جاتكـ النسخة بتاعت تحت 16 عاما!
|
Post: #7
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: Ishraga Mustafa
Date: 09-21-2009, 06:24 PM
Parent: #5
ولاّ ايميلات توتو كوره او فى الحقيقة بت عمها..
كسبت دشليون وكمين كضبة
بالله مره دست على يس بالغلط وعينك ماتشوف الاّ النور
قمت شطبت الايميل ذاتو وارتحت
غايتو مرات بحلم بانى بنيت لىّ عمارة- شيتا يعقد لعيالى
كل سنة وانت طيب يا حميدة وربنا يحقق ليك امانيك واللى فى مرادك
|
Post: #12
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: humida
Date: 09-21-2009, 09:38 PM
Parent: #7
شوشو هانم .. كل سنة و انتي طيبة ياخي .. و الوليدات بخير ..
و العمارة حاولي تبنيها كرتون .. ما معروفة الظروف .. امكن تحتاجوا ترحلوا ..
|
Post: #8
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: محمد زكريا
Date: 09-21-2009, 06:28 PM
Parent: #5
بوست خفيف الظل وهادف في نفس الوقت
انا نوع الايميلات دي بوديها التراش علي طول من غير ما افتحها زاتو
جني وجن الفوروارد البكون بالعربي , بعرف طوالي انو في ناس فايقه بتصدق اي كلام وتستاهل الدق
كايس لي شكله مع اي واحد منكم
عيد سعيد
|
Post: #9
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: محمد زكريا
Date: 09-21-2009, 06:29 PM
Parent: #5
بوست خفيف الظل وهادف في نفس الوقت
انا نوع الايميلات دي بوديها التراش علي طول من غير ما افتحها زاتو
جني وجن الفوروارد البكون بالعربي , بعرف طوالي انو في ناس فايقه بتصدق اي كلام وتستاهل الدق
كايس لي شكله مع اي واحد منكم
عيد سعيد
|
Post: #10
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: motaz
Date: 09-21-2009, 07:49 PM
Parent: #9
يا حميدة
والعجب ناس الـ Forward
بالرغم من إنو مرات بتكون الرسائل حلوة
كل سنة وانت بخير
|
Post: #11
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: داليا الكباشى
Date: 09-21-2009, 08:56 PM
Parent: #10
يا حميده ...
البوست دا انصرافي ... و انا افتكر تمشي تشوف ليك شغله نافعه تشتغلها غير الشف والنقل من الحتات التانيه .. لوووووووول ..
انت ما شفت ناس كوبي بيست هناك عملوا ليهم شنووو؟؟؟ كااااااااك ...
---------------------------
بالمناسبه انا قريت البوت دا كلوووو بصوت عالي لي امي واخواتي ... اقسم بالله يزحوا بالضحك لحدي اسي .. امي قالت ليك الله يجازي محنك ... لووووووول
حميضه يا صحبي ... كل سنه وانت طيب ..
|
Post: #13
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: humida
Date: 09-21-2009, 10:19 PM
Parent: #9
محمد زكريا ..
انت تمتام .. مالك بتردد الرد مرتين ..!!
|
Post: #14
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: أحمد الصديق
Date: 09-22-2009, 00:35 AM
Parent: #13
حميـ ده
كل عام وأنتم بخير " دي أظنها ما داخلة في الممنوعات "
والله يا حميدة الواحد قرف نفسو
من محظورات البريد .
تقبل مرورنا .
|
Post: #16
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: د.نجاة محمود
Date: 09-22-2009, 05:53 AM
Parent: #15
وناس شهادة جامعية في تلاتة اسابيع
وناس ممكن نخلصك من ديونك للابد.
ممكن نصلح ليك قوامك
وكل سنة وانت بالف خير مع نصفك الحلو
|
Post: #17
Title: Re: ملخص الايميلات المابتنفع معاي .. ( الرجاء التقيد بالتعليمات ) ..
Author: haroon diyab
Date: 09-22-2009, 08:27 AM
Parent: #16
احييييييييييي انا.......
لو ما كان ود الصايم سبقني......!!!!
حميده ياعمكـ
كل عام وانت والاسرة الكريمة بالف خير
|
|