مكاتيب نفيسه بت كرمــوش

كيف يالراسي عوافي حباب
ود أب حُـوَّه اليوم ما أغتاب
دابي الخُشش النمر أبناب
أسداً قاهِر حجر الغاب
طامِح نيلك ما هو سراب
مطر العِينة اليوت صبّاب
صادق القول المو كضاب
عيش الدالي المو بُتّاب
كارم ضيفو بشوش رحّاب
عارف فرضو المو سبّاب

كيف آزين ؟
وكيف أصحابك ؟
نحن عوافي وكل عقابك
إلا وحاتك فوتَك قاسية
يوت نطراكَ ونتحجابك
خمسه سنين في قلب الغربة
يبقي أكيد زادنك كُربة
خمسه سنين في نار الكُربة
يبقي أكيد زادنك دُربه
أمك عارفه مآسي الغربة
أصلو الغربة شقيقة التُربة

كنا البارح نتونس بك
وإنت المطْرِي من غير شك
قال بابكير بالجد مشتاقلك
كل ما ليل في النوم يحلم بك
أختك تبكي وديمه تدّمِع
وسِيرتك منها ما بتتفك
كل الفِجة وحاتك تسأل
وإنت ضراها عليك الرك

والله بلدكُن ما بتِتفات
إلا العسكر والظُباط
والأحزاب الناسه عُباط
يات مِن جانا وقلنا بِيصلِح
باكر يطلع زول مِنساط
كل من قلنا حبابو العادِل
يمرق ظالم وكم لهّاط
يشرب زير البلد البارد
وباقي الشعب كفا النُقّاط
فِكنّا منها هادي السِيرة
سِيرة الدردرة والإحباط

ماك جايينا آبنتره قريب؟
بكره وحاتك خامس عيدك
عارفة الغربة الحالة صعيب
وعارفه بُعادك مو بي إيدك
داكي الليلة جوابك جاني
شالني عليك وكم وداني
وكُت بدعيلك ربي يزيدك
ما بندورلنا منك حاجه
بس تلفانا وتلقي جديدك
كيف أخبارك وأخبار نمّك
قولو وحاتك بفرج همك
عارفه الغربة بتحرق دمك
إلا الخالق بطلق قيدك

ما بتتوصي عليها صلاتك
وآصل رحمك وكل صِلاتك
ياخي اصحابك يسألو عنك
شوق الحِلة علي إنجلاتك
كل ما اشوفن أشوفك فيهن
ربي يجيبك وتلاقيهن
وكتفك ترمي منو عصاتك

كل ما اصلي وحاتك بدعي
ربي يزيدك ويعلوكْ
شاحده الخالق ما يضروكْ
تلقي مرادك يالمبروكْ
عافية عليكَ دنيا وآخره
عافية وحاتك وبرضو أبوكْ
عافية عليك
عافي عليك
عافية عليك
عافي
عليك.


والدتك :
نفيسة بت كرموش

بت كرموش آ وآلدة وطيبة
والله جوابك قطّع قلبي
يا مبروكة وقولك هيبة
طاعم نمك خفف غلبي
شايفك يمه يوت في نومي
لافحة سماحةً بيها تحومي
تالا سبيقةً ما ها قِريبه
حاكره معيزتك وليها تحلبي
يا مبروكة عوافي عوافي
كيف شاهيك مقنن يومي
مافي وحاتك زيك مافي
إلا فراقك أصبح تومي
لاني الصاحي ولاني الغافي
بس كاريهُ وحاتِك دومي
بس مزروع في غربة سوافي
إلا العافية ماليه هدومي
ساتر حالي وتب متعافي
حامد ربي عليها همومي
والله دعاك للغايب كافي
حافض فرضي
وحافض صومي
شايل هماً فوقك أكتافي
كيف بِتقومي وكيف بتنومي
كيف أبنتره البحر الصافي
كيف بابكير الكبّر كومي
والله الشافعة الحنها وافي
شوقه وحاتك كتّف عومي
مو بي إيدنا نفوته بلدنا
بس جابِرنا الحال المايل
العسكور الحاله جلدنا
والأحزاب الشوفه قبايل
شفتي براكِ لما صمدنا
للجهجهنا وبدري نجهنا
للعبرات .. العوج الزايل؟
كلو وحاتك بكره يرَوِّح
ونلقي بلدنا الضرع الشايل
ما تنسيه دعاك يازينة
هو الساترنا ومغتينا
الله الخالق هو بنجينا
من غربتنا واي ضغينه
لما تهون القاسية الشينة
نرجع ليكن لي وادينا
الجنيات أصحابي صوابح؟
شوقُن طالق نارُن فينا
الصابرات آ طيبة روابح
الدعوات لروحنا سكينه
إنتي حبيبة وغالية عليا
زينه وطيبة وبيضة نية
أسأل جارا وكل الحارة
بت كرموش العالي مزارا
هادية رزينة بتعرف دينة
أمي نفيسه اللينا مدينة
الدعوات
الصالحة
متينة.
والدعوات
يا صالحة
رتينة.


ولدك:
فاروق أبوحُــوَّه

اللخو


كلامك سمح بالحيل

Quote: اللخو كلامك سمح بالحيل

حبيبه:

كل سنه وإنت طيب ياخ..
وربنا يحقق أمانيك يارب..

ما تضوقنا خبيز خالتك دا يا حاسد..



كل الود

عيدكم سعيد
وكل سنة وإنتو طيبين

العيد مبارك عليكم
علينا وعليكم يتبارك
أعفو مننا وعافين منكم.



كامل المحبة

(*)

.