Post: #1
Title: يا أمة جهجهتها المحن !!
Author: ست البنات
Date: 09-18-2009, 08:54 AM
مكتومة فى قلبك أسية
وهيين هموم
عشعش بنى
**
سهراجة المجمج ضحى
كتكوتة العشرق بكى
خطوات صغير دابو مشى
عترة كبير يضلع عضير
سانداهو قولة يا لطيف
وفقشة عصا
***
يا ليلنا يا دقشا عصى
يا ناس مشتتة فى البلاد
لا عيد صغير لا عيد كبير
لا رحمتات
لا رحمة لا مترحمنه
***
ياأمة جهجهتها المحن
دون الخلوق لمك أبا
جلادها مزروع فى القفا
رضرض قفاها الأنتظار
لبكره للأمل القسا
****
كل يوم جديد
يلقاك غم
ألم الفراق
مر الوداع
تتمنى بس خاتم المنى
يفك سوجرها
يزيح عارضا
يكف البلا
من وشها
****
وترجع تكون
يا هاالقبيل
مسنودة
بطيب خاترها
وتملك زمام كل أمرها
***
تشرق شموسها
وتنبلج فوق ثورتا
زغرودة الفرح الكبير
سيرة عرس
لمة عديل
مجمع شتات ناسنا الغبش
تتم فرحتها
إن قام وقف يوم صايحها
كورك جهر
يا ناس خلاص
قراقوش كتل
يا ناس خلاص زال البلا
******
ست البنات.
|
Post: #2
Title: وآآآآآآآآ شريري!!!
Author: حبيب نورة
Date: 09-18-2009, 09:12 AM
Parent: #1
ست البنات لاحدّهِن
يا ستهن
يختي الدقاشيم والهجايم
ونصايب زماناً
داقشتنا فوق وشينا
حمتنا العشم
وجنس النضمي دة
بغرز فوقنا نشابو
والدنيا سفر
Quote: يا ليلنا يا دقشا عصى
يا ناس مشتتة فى البلاد
لا عيد صغير لا عيد كبير
لا رحمتات
لا رحمة لا مترحمنه |
من زمان عودتيني علي غشوة البكانات الفرايحي
لكن الليلة وآآآ شريري
بكانك صباب لي الدموع
والدنيا قبايل عيد
عصرتي علي شديد
وانا من قبيل بحَوي من الدريب الفيه سيرتك
لكن ضلمتيها علي
تاني القاطوع دة يحرم علي !!
هسة لو قسمت ليك تصدقيني !!!
بس رجعيني تاني للبكانات الفرايحي
Quote: تتمنى بس خاتم المنى
يفك سوجرها
يزيح عارضا
يكف البلا
من وشها |
وآآآآ شريري!!
|
|