برنامج التلاتة عليك في العيد مع مازدا

يعود برنامج التلاتة عليك والذي يقدم من قناة هارموني في العيد ويستضيف محمد عبد الله مازدا المدرب المريخي المعروف وسيقوم بتقديم البرنامج الإعلاميين "خالد عز الدين" ، "محمد عبد الماجد" و المذيعة نادية عثمان مختار.

إليكم بعض ما جاء في الحلقة

يبدأ البرنامج بلقطات من ثلاثيات ولجت شباك الفريق القومي والمريخ في عهد مازدا مع مقطع من الفنان المرحوم أحمد مصطفي "سميري في الضميري" يقول واليوم كان جمعة والأمة مجتمعة وجن أقوان تلاتة .. الي آخر الاغنية.

أبتدرت البرنامج المذيعة نادية عثمان بأحقية “Ladies First” وقدمت المدرب مازدا للمشاهدين بقولها: يسرنا أن نستضيف اليوم المدرب المشهور محمد عبد الله مازدا مدرب المريخ والمشرف علي المنتخب القومي في هذه الحلقة من "التلاتة عليك" .. وبنقول لمازدا كل سنة وانت طيب بمناسبة العيد ونبدأ الحلقة ببطاقة المدرب مازدا

مازدا: أنا من مواليد تلاتة .. تلاتة وتلاتة مارس عيد يوم وحدة السودان "أغنية غناها صلاح مصطفي إبان الاتفاقية الأولي للسلام العام 1972م"

أجيد تلاتة لغات .. العربية اللغة الأم والإنجليزية والفرنسية

أقود سيارة مازدا حمراء بالرقم 333333

نادية عثمان: تلاتة دول في خاطر مازدا؟

مازدا: الأردن .. غانا .. الجزائر

تلاتة محترفين؟

كلاتشي قبل ما يجي المريخ وأيفوسا بعد ما جا الهلال وكرت سادومبا

يتدخل الإعلامي محمد عبد الماجد .."تلاتة محطات في حياة مازدا"

ماردا: المريخ كلاعب .. المريخ كمدرب .. المنتخب كمدرب وكرر الثلاثية دي بمعني يشيلوني من تدريب المريخ يخلوني في تدريب المنتخب .. يشيلوني من تدريب المنتخب أعود لتدريب المريخ يشيلوني من الإتنين .. يستعين بي المريخ "بدل فاقد" لغاية ما يجيب مدرب أجنبي .. يجي المدرب الأجنبي .. ينتكس المريخ يشيلوه يجيبوني تاني وهكذا

يسأل الصحفي خالد عز الدين مازدا بثقالته المعهودة .. طيب ما تركز علي حالة واحده يا خي

مازدا: أركز كيف وأنا زي الحبة عند اللزوم!!

المذيعة نادية عثمان مختار لمازدا: ممكن تطلب اغنية

مازدا: أطلب أغنبة البلابل "نحن التلاتة أخوات أحبة" ... يدخل المخرج بمقطع من الأغنية ويبدو ود عبد الماجد طرباً مع الأغنية ..

محمد عبد الماجد يسأل مازدا: شنو حكايتك مع التلاتات دي يا مازدا؟

مازدا: التلاتة رقمي المفضل

المذيعة نادية عثمان .. طيب يا جماعة نشوف الإستطلاعات دي ... يدخل المخرج بمجموعة من الإستطلاعات

يبتدرها سايق ركشة: والله يا مازدا أنت أفضل مدرب بس العيب في اللاعبين الما قادرين يستوعبوا توجيهاتك وتكتيك وخطة اللعب وكدة وبمجرد ما يدخلوا الميدان يقعدوا يسمعوا في جدول تلاتة ..

أحد المدربين يقول رايه في مازدا: والله يا جماعة نحن عندنا عقدة المدرب الأجنبي وزمار الحي لا يطرب أهله .. ومازدا راجل مثقف ويحمل شهادات عالية في علم التدريب بس المشكلة ... المشكلة في صلاح مشكلة ترررا ررا را..
أحد الإعلاميين الرياضيين ويبدو أنه وصيفابي جناح الوالي: مازدا راجل مخلص للمريخ وللوالي .. وهو يعمل في تلاتة جهات: مدرب للمنتخب الوطني ورئيس للجنة التدريب المركزية في الاتحاد العام ومدرب للمريخ بالتكليف يعني يتقطع .. العيب ما في مازدا ... العيب في الإعلام المريخي السالب .... يدخل المخرج بمقطع أغنية للكاشف "سالب فؤادي وما علي ..."

يدخل خالد عز الدين بتعليق علي الإستطلاعات:والله قبل ما يقول مازدا رأيه في الإستطلاعات دي .. أحب أتثاقل شوية .. يا مازدا أنت لو بتحمل كل هذه المؤهلات وعلي درجة عالية من الذكاء كيف تسمح لنفسك بتدريب فريق يطلق عليه الدلاقين؟ "ياخي فريق زي دي أي مكوجي يمكن يكويه .. آسف يدربه.

يرد مازدا بحسرة ومعاها نفس طويل ... : تلاتة لا أمان لهم: فريق تدربه ولا يعطيك نتائج قول واحد ... اتنين: صحفي في سوق الإدارة رأيه هو الرائج ... تلاتة: وجمهور يقول بأنه صفوة ويهجم عليك كالتور الهائج!

المذيعة نادية: طيب نستمع للحن تاني: يدخل محمد عبد الماجد ويقول لنادية .. طالما المريخ أصبح فريق من الأمس أقترح نسمع أغنية "ماضي الذكريات" .. ويدخل عثمان مصطفي بماضي الذكريات " ولما أنت خلاص جفيتني ليه بتحكي ذكريات" تارارا را .. تا را ريرا را تريرا ررا

محمد عبد الماجد لمازدا أريد رأيك في التلاتة ديل في كلمات

وارغو؟

مازدا: لاعب فالصو

السعودي؟

مازدا: يجنسوا في الأول بعدين ألعبوا

أبراهومة؟

طلاق تلاتة ما ناقش حاجة

خالد عز الدين بثقالته الما تديك الدرب: يا جماعة الدنيا عيد .. وعايزين بالمناسبة دي نشوف مع المخرج أقوان الهلال التلاتة يليها أقوان مصر التلاتة وبعدين اقوان غانا التلاتة يعدها عيدوا قون سكواها في سيكافا تلاتة مرات
يتم عرض الأهداف المطلوبة

ود عبد الماجد: والله يا جماعة بصراحة مازدا ينفع والي للخرطوم قولوا ليه كيف؟ أول حاجة عمل بني تحتية للمريخ شوارع في الدفاع مسفلتة أحسن من شوارع الخرطوم .. وتصريف قون المريخ للأقوان أحسن من مجاري أمدرمان

سؤال من نادية لمازدا: ليه دخلتوا العجب في آخر تلاتة دقايق
مازدا: عشان يعمل تلاتة حاجات: يوقف الأقوان علي تلاتة .. يدعم الهجوم .. ونطمئن عليه في دور الأربعة

باقي الحلقة تشوفوه في العيد

وكل سنة وأنتو طيبين