حمي تكفير الشيوعي تنتقل لقناة النيل الأزرق

في سهرة النيل الأزرق أول البارحة علي ما اعتقد والتي يقدمها
سعد الدين ** وزميلته ، كان الضيوف مجموعة من الجالية الهندية في السودان
وبعض السودانيين من لديهم علاقة بالهند ، في واحدة من مداخلاته
حكي الضيف السوداني (بكل أسف لا أذكر اسمه) نكته عن واحد ملحد زار
الهند وفي نهاية الزيارة عند المطار قال الشيوعي لصديقه الهندي
وهو ايضاً شيوعي بأن زيارته للهند أثببت له أن الله موجود ...
المهم النكتة نفسها بايخة وليس فيها ما يضحك ، وكأنما حكاها هذا
الرجل ليقول أن الشيوعيين هم ملاحدة ..
الغريبة قال في بداية النكتة واحد ملحد ، وفي نهايتها قال الشيوعي
حتي يرسخ في ذهن المتلقي أن الشيوعية والإلحاد هما شئ واحد ...


السهرة من تقديم سعد الدين وليس أمجد كما كتبت في المرة الأولي

يمكن أن نجد العذر لقناة النيل الأزرق بأن الحلقة
كانت علي الهواء مباشرة ، إلا ان مقدمي البرامج
كان لا بد لهم من التصدي للضيف ، وتصحيحه بدلاً
أن تمر هذه النكتة السمجة دون رقيب او حسيب




يجب علي قناة النيل الأزرق الإعتذار للشيوعيين
وسحب هذه النكتة من الحلقة المشار إليها....

Quote: إلا ان مقدمي البرامج كان لا بد لهم من التصدي للضيف ، وتصحيحه بدلاً أن تمر هذه النكتة السمجة دون رقيب او حسيب

مافي ضمان مقدمي البرامج يلقوا نفسهم في مهب الريح
الشيئ السيئ يا زهير الموضوع لا يستاهل كل هذه الضجة
المتزمتين يعجبهم جدا انتشار الجدل ده لانهم اضعف من ان يجاروا الاخرين في تدحيضه
ً

يا حيدر لازم الناس تقيف وقفة جازمة في الموضوع دا
عشان ما يبقي الموضوع عادي وبعد شويه يعلقوا لينا
المشانق في نص الخرطوم .... المذيع يتخيل لي لمن
الزول دا بدا الكلام حول الإلحاد ريقوا نشف وعمل نائم
يمكن الموضوع يعدي دون أن ياخد أي زول خبر ...

Quote: حكي الضيف السوداني (بكل أسف لا أذكر اسمه) نكته عن واحد ملحد زار الهند وفي نهاية الزيارة عند المطار قال الشيوعي لصديقه الهندي وهو ايضاً شيوعي بأن زيارته للهند أثببت له أن الله موجود ...

شيوعي = ملحد


لن تستطيع اقناع اي جاهل بعكس ذلك


ضيف الحلقة اجهل من مواطن عادي لانه تحدث بسذاجة الاطفال في قناة يشاهدها شيوعيين وغير

شيوعيين..


لكن ماوريتنا العلاقة شنو بين الهند والله موجود(وش بليد)

يا عبد اللطيف الزول حكي قصة طويلة وعريضة وقال دي نكتة ما قدرت
اتابعها زي الناس ، من بياختها ... انا ذاتي ما عارف الرابط بين الإثنين شنو
أظنوا كان بيتكلم عن التنوع الثقافي والأثني في الهند بشكل فطير

زز



الإحترام والسلام


ورمضان كريم





بالله عليك بلغهم إنه:


من المحال قفل باب الإتهام بالإلحاد


والمعترض يورينا كيف؟

ومنوا الحيقفلوا الباب ؟

زز



يا بطل.... عليك الله خليهم يذيعوا واحد بس من الأفلام الواردة في اللنك أدناه:



ولو إنت كمان شديت الحيل بواحد تكون ما قصرت


الجامع المنير

يا زناتي سلام
يا سيدي قناة النيل ألزرق دي مديرها حسن فضل المولى
ورغم كدة
هي سعاد حسني بالنسبة للقناة السودان

خلينا نعتبرها دقسة من ضيف سمج وجاهل
لكن النصيحة لله سعد ده زول كويس يكون هو زاتو انحرج وأنهجم من هبل الضيف

كلامك بخصوص التصدي صحيح المهم الكيفية تكون سليمة

زذ1

إزيك يا حبيب وشكراً علي اللنكات ، والناس ديل نحن ما سألناهم بس هم الهبشونا

يا شادية سلام

قناة النيل الأزرق زي ما قلت بالنسبة لتلفزيون السودان ما فيها مقارنة
بس إشادتك بسعد الدين حا تجيب ليهو الهوا ... أصلوا الناس ديل أي
زول نقول كويس بيدوهو الشارع ....


قبل اسابيع كنت أشاهد برنامج نجوم الغد الحلقة الغني فيها شول بوت
، وبرضو نكتة والمرة دي من بابكر صديق شخصياً ، بعدما أشاد أعضاء اللجنة
بمخارج شول ، قاليهم في واحد حلفاوي جا لسيد الخضار وقال ليهو عندك
ملوهية ، في جنوبي جنبو قال ليهو ملوكية ، قام واحد قال ليهم لا يا جماعة
إسمها ملوخية أو شئ من هذا القبيل . مباشرة قام قال لي شول قول ملوخية
والود المسكين رد ليهو ملوخية ، فضحك مقدم البرنامج وقال ليهو إنت تمام
النكنة دون أي شك موغلة في الإستعلاء الثقافي , كأنما من لا يجيد العربية
لا يجيد الغناء وأشياء أخري ، لمزيد من التفاصيل التي سقطت من الذاكرة
الرجاء مراجعة الحلقة ...

ولك ودي شادية ...

النيل الأزرق فيها نكن تجيب الهواء ...

Quote: قبل اسابيع كنت أشاهد برنامج نجوم الغد الحلقة الغني فيها شول بوت ، وبرضو نكتة والمرة دي من بابكر صديق شخصياً ، بعدما أشاد أعضاء اللجنة بمخارج شول ، قاليهم في واحد حلفاوي جا لسيد الخضار وقال ليهو عندك ملوهية ، في جنوبي جنبو قال ليهو ملوكية ، قام واحد قال ليهم لا يا جماعة إسمها ملوخية أو شئ من هذا القبيل . مباشرة قام قال لي شول قول ملوخية والود المسكين رد ليهو ملوخية ، فضحك مقدم البرنامج وقال ليهو إنت تمام النكنة دون أي شك موغلة في الإستعلاء الثقافي , كأنما من لا يجيد العربية لا يجيد الغناء وأشياء أخري ، لمزيد من التفاصيل التي سقطت من الذاكرة الرجاء مراجعة الحلقة ...

الاخ زهير .

دي نكتة في قمة السخف والعنصرية وكان يجب على قناة النيل الازرق بأن لا تسمح بمثل هذا العبث ، ولكن يبدوا أن هذه النكتة العنصرية كانت شئ طبيعي بالنسبة لهم ، خصوصا الطريقة التي سأل بها صديق شول .

حقيقي يا دينق في حاجات الناس بتشوفها صغيرة
وبتمر فيها عادي ، لكن تاثيرها لا حدود له
لذا يجب الوقوف امامهاحتي ينتبه الجمبع لها ...

زهير الزناتى سلام كبير
ورمضان كريم
ياخ الجماعه ديل ما حيوقفوا اسطونتهم دى
الا يشوفوا حاجه.
لكن الشعب السودانى ما ساهل
وهو كفيل بذلك.
بعدين فى ظل سيطره حزب ظلامى زى ده
ما على اجهزه الاعلام الا ايراد مثل هذه النكات
التى لا تضحك الا هم.

خالد جادين

مولانا خالد جادين رمضان كريم
وليك فترة مختفي ....

موضوع النكات دا انا اقترح يمنعوه في التلفزيون
لانو بيجيب الهواء دائماً وتاريخياً ....

**




**

Quote: موضوع النكات دا انا اقترح يمنعوه في التلفزيون لانو بيجيب الهواء دائماً وتاريخياً ....

بالإضافة لى أنو بتور حاجات إجتماعية ماحلوة
والإستعلاء على مستوى محددات الثقافة (لغة ،دين ،فن إلخ )

أستاذ/زهير رمضان كريم
كل الود
محمد كابيلا

اكبد في عدد كبير من الناس بتلقي الكلام علي عواهنه دون فهم ، ودون أن ينظروا إلي
مدلولاته الخطيرة ، وتبقي عليهم حكاية لو ما عارف معني الكلام دا مصيبة ولو عارفها
تبقي المصيبة اعظم

محمد كابيلا الله أكرم شكراً

زهير ..سلامات ..

الناس ديل بقدموا خدمة مجانية للشيوعيين ويمكن من خلال التصدي لهذه الهجمة وبطريقة سليمة كما قالت الاخت شادية اظهار الوجه الحقيقي للشيوعيين وفك الارتباط مابين الشيوعية والالحاد ...فانا شخصياً كان جدي قاضياً شرعياً وابنه - والدي - (رحمه الله) كان شيوعياً ملتزماً بالشيوعية حتي مماته ولكنه كان مرافقاً لوالده في الصلوات الخمس بالمسجد ومؤدباً بآداب الاسلام ، لم يكن كذاباً ولا منافقاً ولم يأكل مال احد ...قيل لجدي كيف تسمح لابنك ان يكون شيوعياً وانت قاضياً شرعياً ؟!! فقال لهم إن كان الشيوعيون هكذا كإبني فنعم الناس هم ؟!!!

يازهير صحبك بتاع ......الالماني مزاحم السلفيين في الصف الاول وعمرة كل خميس ...ده بكون ملحد كيف عليك الله ؟!!!


ودي ،،،

يافايز التكفير والغتهام بالإلحاد ينم عن شخصية مريضة ودوماً أصر
علي أن التطرف الديني في الأساس يأتي للشخص غير السوي نفسياً
إضافة للظروف والبيئة ونظام التعليم والظروف الاقتصادية والاجتماعية
إلا أن أهم عامل في الأمر هو الشرخ النفسي ...
شيبخ الهدية رحمة الله عليه في لقاءه الشهير مع عمر الجزلي وبرنامجه
أسماء في حياتنا تحدث عن إبنه الشيوعي زميل دراستنا بمصر الدكتور
عبد الملك الهدية ، ولم يصفه بكافر أو يطرده من المنزل ، بل تحدث
عنه بفخر وإعتزاز رغم أن شيخ الهدية هو شيخ جماعة أنصار السنة المحمدية
في السودان ، هل رأيت هذه السماحة ... لذا أقول أن التطرف والآراء الحادة
وتكفير الآخر تنم عن شخص سايكوباتي ...
رحم الله والدك ووالده القاضي السمح وكل إنسان تأتي فطرته تجريم الآخر لمجرد
إختلاف سياسي ... ويمكن أن أسرد لك آلاف الأمثلة المشابهة ...
شكراً ودوداً ...