Post: #1
Title: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراويح!
Author: بريمة محمد
Date: 08-26-2009, 04:16 AM
الأسيويات .. أثناء راحة صلاة التراويح القهوة مدورة والسندوتشات .. واحد قال تناول الكافيين يزيد نسبة التركيز فى الصلاة ..
لكن لم أعرف ما هو سر الأكل أثناء صلاة التراويح!
أفتونا .. هل يجوز؟
تحياتى ..
بريمة
|
Post: #2
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-26-2009, 04:28 AM
Parent: #1
وهنا لا أقصد الأنسان يذهب إلى البوفيه أو الكافتريا .. بل أقصد النساء جالسات فى سجادات الصلاة والقهوة والسندوتشات فى المصلاية .. وحينما يقوم الأمام .. لا يتممض الأنسان لا يحزنون .. طوالى يندرش فى الصلاة ..
ذكرتى هذه الحالة .. أن شخص رعوى من أهل الغرب كان يضع السمسم فى مصلاته وأثناء ركوعه يسف السمسم ويستقيم وفمه مليان وبدل القراءة يظل خلف الأمام يستمع ويمضغ السمسم .. رأه شخص وقال له يازول صلاتك باطلة .. قال له لو صلاتى (باطلة) نسمنها .. وكلمة (باطلة) بلغة أهل الغرب معناها الشيئ الضعيف .. البهيمة باطلة يعنى ضعيفة .. وإنسان باطل معناه إنسان ضعييييف.
فهل الأكل هنا من باب تسمين الصلاة ولا شنو؟
بريمة
|
Post: #3
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: سيف النصر محي الدين محمد أحمد
Date: 08-26-2009, 06:06 AM
Parent: #2
انت يا بريمة ما تصلي صلاتك قاعد تتلفت مالك..؟
_______________________________
رمضان كريم.
|
Post: #4
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: وجن
Date: 08-26-2009, 06:23 AM
Parent: #3
كل سنة وانت طيب ورمضان كريم
تصوم وتفطر على خير
عادي تعيش طتير تشوف أكتر
يا ما شفنا عجائب في الحرم
واحدة من أخواتنا المصريات تنادي أخته
يا أم محمممممد
أم محمد في وسط صلاته أيواااا تعالي أنها هنا يختي وتكمل صلاتها بعد ان تأخد معها خشم خشمين
وغير البنوموا شوية أثناء صلاة الإمام وعادي الواحدة تصحى وتقشقش عيونه وقدر ما تحاول تقنعها إنها تمشي تتوضأ تقول ليك أنا ما نمت
وهي تكون آذت الناس عديل بشخيره
|
Post: #5
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-26-2009, 12:25 PM
Parent: #4
سيف
رمضان كريم
الكلام النقلته دا من شهود عدل يصلى وسط الحريم .. وقبل الصلاة تأكدت من حكاية "ثيرموسات" القهوة .. وأشياء أخرى كلها تراها "محنطرة" قدام المصلى ..
للعلم حتى السودانين عادى يدخلوا المسجد ومعهم باغات الموية الصغيرة .. كلما توقف الأمام تشرب وتقف باغتك ..
إذا شرب الموية سليم ماذا عن القهوة.
بالجد أنا جادى سؤالى دا .. هل من يفتينا.
بريمة
|
Post: #6
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-26-2009, 12:32 PM
Parent: #5
وجن
رمضان كريم
Quote: وغير البنوموا شوية أثناء صلاة الإمام وعادي الواحدة تصحى وتقشقش عيونه وقدر ما تحاول تقنعها إنها تمشي تتوضأ تقول ليك أنا ما نمت
وهي تكون آذت الناس عديل بشخيره |
الأنسان الجالس لو دقس دقستين فى الصلاة ممكن لا تبطل وضوءه ..
لكن الحكاية لما وصلت مرحلة الشخير دا معناها نوم عدييل ..
والمشكلة الثانية: صلاة التراويح هنا الناس يصلوا حوالى 20 ركعة .. لما تضيف عليها صلاة العشاء والشفع والوتر وتحية المسجد تكون صليت فوق الثلاثين ركعة ..
نحن السودانيين نصلوا عشاءنا وتراويح 8 ركعات فقط .. ونتخارجوا والأمام قائم .. دى ذاتها ما عايزه لها فتوى.
بريمة
|
Post: #7
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: ombadda
Date: 08-26-2009, 12:47 PM
Parent: #5
بريمة
رمضان كريــم
للتذكير
فرائض الصلاة (ترك واحد منها يبطل الصلاة ويجب أن تعاد الصلاة من جديد):
1- النية
2- تكبيرة الإحرام
3- القيام فى الفرض (إذا كان قادراً عليه)
4- قراءة الفاتحة
5- الركوع
6- الرفع من الركوع والإعتدال قائما
7- السجود
8- الجلوس بين السجدتين والطمأنينة فيه
9- القعود الأخير بقدر التشهد
10- التشهد الأخير
10- الصلاة على النبى صلى الله عليه وسلم فى التشهد الأخير
11-السلام مرة واحدة
12- ترتيب الأركان
|
Post: #8
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: ombadda
Date: 08-26-2009, 12:55 PM
Parent: #7
من مبطلات الصلاة:
1- الأكل والشرب عمدا (أثناء الصلاة طبعا)
2- الكلام عمدا
....
......
.....
من مكروهات الصلاة:
1- العبث القليل بثوبه أو ببدنه إلا إذا دعت الحاجة
2- الإلتفات يمينا أو شمالا لغير حاجة
3- تشبيك الأصابع فى الصلاة
4- الصلاة بحضرة طعام
عن عائشة رضى الله عنها : أن النبى صلى الله عليه وسلم قال:(إذا وضع العشاء وأقيمت الصلاة فأبدؤوا بالعشاء)
رواه أحمد ومسلم
....
...
|
Post: #9
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: سيف النصر محي الدين محمد أحمد
Date: 08-27-2009, 01:57 AM
Parent: #8
بمناسبة طلب الفتوى في كل صغيرة و كبيرة يا بريمة اهديك الكاريكتير ده من جريدة الوطن
السعودية:
|
Post: #10
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-27-2009, 04:49 AM
Parent: #9
دكتور أمبده
سلامات ..
Quote: من مكروهات الصلاة:
1- العبث القليل بثوبه أو ببدنه إلا إذا دعت الحاجة
2- الإلتفات يمينا أو شمالا لغير حاجة
3- تشبيك الأصابع فى الصلاة
4- الصلاة بحضرة طعامعن عائشة رضى الله عنها : أن النبى صلى الله عليه وسلم قال:(إذا وضع العشاء وأقيمت الصلاة فأبدؤوا بالعشاء)
رواه أحمد ومسلم
....
... |
هذه الحالة لا تنطبق علينا .. مافى زول جوعان .. كل زول شبعان لما يدشع ..
أظن أن شرب المكيفات حتى يطردوا النعاس أثناء الصلاة.
المهم .. كما يقول تبارك شيخ الدين .. الحاصل فى شرب قهوة.
بريمة
|
Post: #11
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-27-2009, 04:56 AM
Parent: #10
سيف
يا أخى مافى زول عايز يفتى فى الموضوع .. بالمناسبةالأمام زاتو قاعد يجى ب "ثيرموس" قهوة ويضعه جواره .. وأنا شفته شرف شرفات فى وقت الفاصل ..
يا أخى يبدو الباكستان متعودين على المكيفات فى المسجد.
واحد جالس خلفى أثناء الراحة فى الصلاة طلع الموبايل وقعد يتونس وفى خطيب كان يتحدث عن سورة أل عمران.
بريمة
|
Post: #12
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: Dr.Elsadig Abdalla
Date: 08-27-2009, 05:01 AM
Parent: #10
| Quote: انت يا بريمة ما تصلي صلاتك قاعد تتلفت مالك..؟ |
سلامات ورمضان كريم
ياسيف الراجل قال ليك الزولات ديل بياكلوا أثناء البريك ...يعني ما أثناء الصلاه ...عشان كده ممكن يديهم كحله في النص كده ...
أنا لامفتي لاحاجه ...لكن أرى انو اذا حصل الأكل أثناء الصلاه تكون هنا العله لانو هذا يدخل من ضمن العبث واللف والدوران أثناء الصلاه ..أما اذا كان بين الركعات ..أنا ماشايف فيها حاجه...والله أعلم ..
انتو وين شيخنا الطقي الله يطراه بالخير ...
|
Post: #13
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: خالد العبيد
Date: 08-27-2009, 05:17 AM
Parent: #12
| Quote: وقدر ما تحاول تقنعها إنها تمشي تتوضأ تقول ليك أنا ما نمت |
وجن؟
بتتونسي معاها في التراويح
سمح كان ما كلمت خالتك منى !!
|
Post: #14
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: خالد العبيد
Date: 08-27-2009, 05:40 AM
Parent: #13
Quote: الإثنين, 16-أكتوبر-2006
المؤتمر نت -
مشاجرة نسائية حامية في صلاة التراويح !
تسبب سرقة هاتف نقال من إحدى النسوة في مسجد الصفا والمروة بشارع السودان بالقاهرة في وقوع مشاجرة هائلة بين النساء أثناء أدائهن صلاة التراويح في المسجد تسببت المشاجرة في ضرب النساء بعضهن بعضاً فضلا عن ارتفاع أصواتهن داخل المسجد بالصراخ والعويل
ولم تمنعهن مطالبة إمام المسجد لهن بالتوقف أثناء الصلاة مما دفعه إلى إيقاف صلاته الأمر الذي أدى إلى إثارة الهرج والمرج داخل المسجد. كما تسببت هذه المشاجرات بين النسوة في بعض الطرائف بين المصلين من الرجال الذين حرصوا علي مخاطبة النساء بقولهم “أنتن شياطين في البيت والمساجد! أنتن ناقصات عقل ودين.. صلاتكن في البيت أفضل يا شياطين.. يا سيدات هل تأتين الجوامع للصلاة أم للحديث في المحمول”
وعلى الرغم من توقف الصلاة لأكثر من 15 دقيقة بسبب المشاجرات ومحاولات البعض إخراج النساء من مصلاهن ومطالبة الإمام والمصلين لهن بالتوقف عن الصراخ والخروج بهدوء إلا أن ذلك كله لم يمنعهن من استمرار مشاجراتهن إلى أن أرغمهن الإمام على التوقف باستئناف الصلاة
*(الراية) |
|
Post: #15
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: doma
Date: 08-27-2009, 06:25 AM
Parent: #14
غايتوا يا بريمه من ملاحظتي
الاسيويون عموما يحبون الاكل المستمر طول اليوم وبكميات قليله عشان كدا ما عندهم وقت محدد للاكل متلنا نخبت تلاته مرات كل خبته تشبع علي الاقل خمسه منهم
اسه تقوموا تعملوا ليهم فيها حرام تاكلوا وبتبطل الصلاه
يقوموا يتركوا الصلاه البتمنع الاكل دي . اصلوا التراويح دي ما فرض بس زياده خير ساكت
|
Post: #16
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: وجن
Date: 08-27-2009, 08:27 AM
Parent: #15
الله أكرم يا بريمة
والله صدقت
محتاجين لفتاوى عشان الزول يعرف راسو من كرعينو
المهم
ربك يهون القواسي
خالد
الونسة دي بتجي في نهاية التراويح لكن الفي النص دا بتعتبر تذكرة بنذكر بعضنا فقط
ومنى زاته صحبتي ما بتعمل لي حاجة تصدق زمان كنت بخاف منها عديل كده ايام بنمشي اجازات
صاحبتك كانت شرسة بدق عديل لكن بعد جابت الوليدات بقت تقول لينا هم بفهموا انتو اتفاهموا معاهم
غايتو الدنيا دي فيها محن
ذكرتني بمناسبة الشكل بين الحريم ياما شفنا بس أغرب حاجة مرَّت علي
صديقتي بتها بكاية وطبعا عادي هنا الواحده بتخمخم شفعه وتمشي تصلي والصلاة خشم بيوت طبعا
بس دى بتخلي اخوها الأكبر سنا يحرسه
المهم في نهاية أحدى الصلوات جاته ليك سعودية
السعودية :أسمعي لاعاد تجين المسجد بنتك أزعجتنا وما سيبتنا نخشع
صاحبتي: العاوز يخشع ما بركز مع صوت الأطفال
بعدين أنت بأي حق تمنعيني أجي المسجد
السعودية: إيوه المسجد هادا حقي ماأبغي أشوفك إنت وعيالك هنا تاني سامعة
صاحبتي : إن المساجد لله
السعودية : هاذا حقي أنا بنيتو
صاحبتي : أعوذ بالله أنت شيطانة
السعودية : والله لو جيتي مرة تانية أوريك شغلك وأريك من الشيطان فينا
طبعا كانت مصرة في اليوم التاني تمشي بس زوجه منعه
وقال ليها ماعاوزين مشاكل
المهم تعيش كتير تشوف العجب العجاب
|
Post: #17
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-28-2009, 01:55 AM
Parent: #16
******
بريمة
|
Post: #18
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-28-2009, 04:13 AM
Parent: #17
سلامات د. الصادق
ورمضان كريم
| Quote: لكن أرى انو اذا حصل الأكل أثناء الصلاه تكون هنا العله لانو هذا يدخل من ضمن العبث واللف والدوران أثناء الصلاه ..أما اذا كان بين الركعات ..أنا ماشايف فيها حاجه...والله أعلم .. |
الأكل طبعاً بين الركعات .. لكن المشكلة داخل المسجد.
بريمة
|
Post: #19
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-28-2009, 04:16 AM
Parent: #18
خالد العبيد
رمضان كريم ..
| Quote: تسبب سرقة هاتف نقال من إحدى النسوة في مسجد الصفا والمروة بشارع السودان بالقاهرة في وقوع مشاجرة هائلة بين النساء أثناء أدائهن صلاة التراويح في المسجد تسببت المشاجرة في ضرب النساء بعضهن بعضاً فضلا عن ارتفاع أصواتهن داخل المسجد بالصراخ والعويل |
والسودانين شارطين عينا فى كل مرة .. يا أخى سرقة داخل المسجد وفى شهر رمضان .. دى كتيرة عدييل كده ..!!
بريمة
|
Post: #20
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-28-2009, 04:23 AM
Parent: #19
دوما
سلامات ورمضان كريم
Quote: غايتوا يا بريمه من ملاحظتي
الاسيويون عموما يحبون الاكل المستمر طول اليوم وبكميات قليله عشان كدا ما عندهم وقت محدد للاكل متلنا نخبت تلاته مرات كل خبته تشبع علي الاقل خمسه منهم
اسه تقوموا تعملوا ليهم فيها حرام تاكلوا وبتبطل الصلاه
يقوموا يتركوا الصلاه البتمنع الاكل دي . اصلوا التراويح دي ما فرض بس زياده خير ساكت |
ديل يا أستاذة ناس شدة .. شوفى ناس القاعدة أتلموا من الدنيا كلها ومشوا سكنوا عندهم .. ديل مستعدين يصلوا الليل كله .. أنا ما لقيت ناس شديدين مثلهم .. نحن قدر ما نجتهدوا معاهم فى النهاية نجرجروا أذيال الخيبة وشتات .. وهم لا يزالون يقوموا ويقعوا.
بريمة
|
Post: #21
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-28-2009, 04:30 AM
Parent: #20
وجن
سلامات
Quote: السعودية :أسمعي لاعاد تجين المسجد بنتك أزعجتنا وما سيبتنا نخشع
صاحبتي: العاوز يخشع ما بركز مع صوت الأطفال
بعدين أنت بأي حق تمنعيني أجي المسجد
السعودية: إيوه المسجد هادا حقي ماأبغي أشوفك إنت وعيالك هنا تاني سامعة
صاحبتي : إن المساجد لله
السعودية : هاذا حقي أنا بنيتو
صاحبتي : أعوذ بالله أنت شيطانة
السعودية : والله لو جيتي مرة تانية أوريك شغلك وأريك من الشيطان فينا
طبعا كانت مصرة في اليوم التاني تمشي بس زوجه منعه
وقال ليها ماعاوزين مشاكل
المهم تعيش كتير تشوف العجب العجاب |
دى بالغت عدييل ..
دا مش ياهو الذين يبطلوا صدقاتهم بالمن والأذى ..
أها يا وجن .. اليوم فاعل خير جاب لينا طش كبير مليان عنب .. seedless .. ما عنده أىّ بذور .. وطعمه من شدة السكر أيدين الواحد يتلصقوا ..
الأسيويات كل واحدة شالت صحن بلاستيك وتعبيه لما يقول بس .. وتعال شوفى فى فترة راحة التراويح .. الجماعة ضربوا العنب ذى ما حصل حاجة!
بريمة
|
Post: #22
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: Abuelgassim Gor
Date: 08-28-2009, 09:51 AM
Parent: #21
رمضان كريم
نقول فى متن العشماوى
مبطلات الصلاة
حدث وسهو وزيت المصلى .....قهقة عند شرب أكل
لكن سأعود ليك
كل سنة وأنت طيب
قور
|
Post: #23
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: أحمد التجاني ماهل
Date: 08-28-2009, 10:38 AM
Parent: #22
الرائع ول أبوك بريمة
لك التحية والتجلة ورمضان كريم، والقهوة دي شكلها مزنكلة بكمبة.
تحياتي
أحمد التجاني
|
Post: #25
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: خالد العبيد
Date: 08-28-2009, 10:50 AM
Parent: #23
Quote: والسودانين شارطين عينا فى كل مرة .. يا أخى سرقة داخل المسجد وفى شهر رمضان .. دى كتيرة عدييل كده ..!!
بريمة |
عرفت كيف انهم سودانيين؟
عينك براها مشروطة!
|
Post: #24
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: Abuelgassim Gor
Date: 08-28-2009, 10:43 AM
Parent: #22
الحبيب بريمه
سؤالك ب ( أفتونا يا أهل ألفتية ) وضعنا فى حرج كبير، فكاتب هذه العبارات ليس بمفت ولا بفقيه ولا متفيقه ، ويخشى أن يكون موقعه فى الحكم أقربكم الى النار أسرعكم الى الفتوة..اذ لا تجوز الفتوة أصلا ولا يؤخذ بها الا أذا جاءت من جهة معلومة أو من مَن بلغ فى أصول الفقه شؤا كبيرا، لكن هذه مداخلة :"يكره ألنوم فى المساجد على تفصيل فى المذاهب وكذا يكره الاكل فيه لغير معتكف على تفصيل المذاهب" (عبد الرحمن الجزيرى : الفقه على المذاهب الأربعة العبادات) واليك الاجابة على سؤالك وفقا للمذاهب الأربعة :
أولا:
ألحنفية قالوا: يكره تنزيها أكل ما ليست له رائحة كريحة ، أما ماكان له رائحة كالثوم والبصل ، فانه يكره تحريما ويمنع آكله من دخول ألمسجد، ومثله من كان فيه بخر تؤذى رائحتهأألمصلين ، وكذا يمنع من دخول المسجد كل مؤذ ولو بلسانه
ثانيا :
المالكية قالوا: يجوز للغرباء الذين لا يجدون مأوى سوى المساجد أن يأوو اليها ويأكلون فيها مالا يقذر ،كالتمر ولهم أن ياكلوا ما شأنه التقذير ، اذا أمن تقذير المسجد به يفرش سفره أو سماط من الجلد ونحوه ، وكل هذا فى غير ما له رائحة كريهة ، أما هو فيحرم ، أكله فى المسجد
ثالثا:
ألشافعية قالوا : الأكل فى المسجد مباح مالم يترتب عليه تقذير المسجد، كأكل العسل والسمن، وكل ما له دسومه والا حر، لأن تقذير المسجد بشيئ من ذلك ونحوه حرام وان كان طاهرا، أما اذا ترتب عليه تعفيش المسجد بالطاهر لا تقذيره ، كاكل نحو الفول فى المسجد فمكروه
رابعا:
الحنابلة قالوا: يباح للمعتكف وغيره أن يأكل فى المسجد أى نوع من أنواع المأكولات بشرط أن لا يلوثه، ولا يلقى العظام ونحوها فيه : فان فعل وجب عليه تنظيفه من ذلك .هذا فيما ليس له رائحة كريهة ، كالثوم ولا بصل ، والا كره ويكره،لآكل ذلك ومن فى حكمة كالابخر دخول المسجد ، فان دخله أستحب اخراجه دفعا للاذى ، كما يكره اخراج الريح فى المسجد لذلك
الاجتهاد والله زدنا علما:
أرى أن يتبين السائل عن هؤلاء النسوة مذهبيا ، لكن فى ما أرى وفقا للمالكية هو ما تحته خط
والله أعلم
كل التعديلات فى تصحيح اللغة
|
Post: #26
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-29-2009, 04:48 AM
Parent: #24
يا سلام البوست منور
الدكتور قور
والشاعر الكبير الأستاذ أحمد
مرحب بكم ..
ألف شكر يا دكتور قور .. ما شاء الله لقد أفدتنا كثير ..
ونسألك السؤال التالى: نحن هنا فى مسجد واحد تصلى فيه الملل والنحل .. المالكية والشافعية والحنابلة والحنفية .. وغيرهما ..
الوسط شنو بالنسبة لينا .. مثلاً أثناء الصلاة صلاة الشفع والوتر قاعدين نصلوها ثلاثة ركعات فى صلاة واحد .. أشبه بصلاة المغرب .. لكن كل الركعات جهراً ..
الأخ أحمد التجانى
ألف شكر .. وصلت الفكرة .. ونشوفكم بعد الفطر فى الملتقى ..
بريمة
|
Post: #27
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-29-2009, 04:50 AM
Parent: #26
خالد
Quote: عرفت كيف انهم سودانيين؟
عينك براها مشروطة! |
تسلم وألف شكر على التصحيح .. الحمد الله طلعنا مستورين.
بريمة
|
Post: #28
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-29-2009, 04:56 AM
Parent: #27
ياأخوانا نقول ليكم حاجة ..
أخواتنا الأسيويات .. خلوهن يشربن قهوتهن ساكت .. اليوم أنبسطت منهن أربعين قيراط ..
فتحوا باب التبرع للمسجد ثلاثة منهن كل واحد وضعت 5 ألاف دولار كاش ..
أنا أفتكر هن عارفات بعملن فى شنو.
بريمة
|
Post: #29
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: Abuelgassim Gor
Date: 08-29-2009, 08:04 AM
Parent: #26
| Quote: ونسألك السؤال التالى: نحن هنا فى مسجد واحد تصلى فيه الملل والنحل .. المالكية والشافعية والحنابلة والحنفية .. وغيرهما .. |
يا أخوى صل صلاتك ...
لغاية ما نراجع ونذاكر ثم نعود ليك
مع حبى وتقديرى
|
Post: #30
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-29-2009, 03:10 PM
Parent: #29
مرحب بالأخ الكريم دكتور قور
ومنتظرين عودتك ..
هنا يا دكتور قاسم سؤال أيضاً مازال يتردد ...
Quote: والمشكلة الثانية: صلاة التراويح هنا الناس يصلوا حوالى 20 ركعة .. لما تضيف عليها صلاة العشاء والشفع والوتر وتحية المسجد تكون صليت فوق الثلاثين ركعة ..
نحن السودانيين نصلوا عشاءنا وتراويح 8 ركعات فقط .. ونتخارجوا والأمام قائم .. دى ذاتها ما عايزه لها فتوى.
بريمة |
لو صح أن نتحدث كمقلدين فإن المالكية هم أقل الناس فى صلاة التراويح .. وربما الشافعية أو الحنابلة هم أكثرهم ركعات .. هل يجوز لنا نحن كمالكية نصلوا عدد ركعات المالكية خلف إمام شافعى .. ثم نتخارجوا.
ذى ما شفنا فى مسألة الأكل أنت قلت وردت فيها أراء .. ما هو الصحيح فى مسألة خلط فقه الأئمة الأربعة فى بوتقة واحدة .. ويصبح هناك خيار وفقوس للمصلى فيما يختار من ركعات ..
بريمة
|
Post: #31
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: أحمد التجاني ماهل
Date: 08-29-2009, 08:41 PM
Parent: #30
الأخ/ بريمةوالأخوة المتاخلين
لكم التحيةعلى هذه السياحة الرمضانية، ومن خلال هذا البوست شفنا أخونا الدكتور أبو القاسم قور والذي لي منه 10 سنوات بالتقريب آخرها أيام مؤتمر الحضارة الأفريقية بجامعة الخرطوم وأيام بيته قرب الاذاعة حيث تناولنا غدا كردفاني كارب ومع الأخوان بشير سهل وشمس الدين يونس.
تحياتي الحارة لك ولدكتور قور.
وهذا بريدي الإلكتروني عاوزك ضروري يا ول أبوك
[email protected]
أخوك
أحمد التجاني ماهل
|
Post: #32
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: أحمد التجاني ماهل
Date: 08-29-2009, 08:41 PM
Parent: #30
الأخ/ بريمةوالأخوة المتاخلين
لكم التحيةعلى هذه السياحة الرمضانية، ومن خلال هذا البوست شفنا أخونا الدكتور أبو القاسم قور والذي لي منه 10 سنوات بالتقريب آخرها أيام مؤتمر الحضارة الأفريقية بجامعة الخرطوم وأيام بيته قرب الاذاعة حيث تناولنا غدا كردفاني كارب ومع الأخوان بشير سهل وشمس الدين يونس.
تحياتي الحارة لك ولدكتور قور.
وهذا بريدي الإلكتروني عاوزك ضروري يا ول أبوك
[email protected]
أخوك
أحمد التجاني ماهل
|
Post: #33
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: أحمد التجاني ماهل
Date: 08-30-2009, 08:54 PM
Parent: #32
الأخ/ بريمة
شنو يا ول أبوك جاءكم القيام في العشرة الأوائل ولا شنو؟ أظنكم وأنت ودكتور أبو القاسم ضربنتوا السربة والعجال لاقن.
أحمد التجاني
|
Post: #34
Title: Re: أفتونا يا أهل الفتية: نساء أسيويات يصلين ويشربن القهوة ويأكلن السندوتشات أثناء صلاة التراو
Author: بريمة محمد
Date: 08-30-2009, 09:23 PM
Parent: #33
الأستاذ أحمد التجانى
سلامات .. لم أر المداخلة ..إلا بعد ما رفعت أنت البوست ..
تحياتى
بريمة
|
|