مملكة البادوبا ......... ( قطع اخدر )

قالوا ( والله يكفينا شر قلنا قالوا )
زماااااااااااااااااااان زمن كانت السيطرة انثوية
كانت في زمان ما ومكان ما مملكة كبيرة اسمها مملكة البادوبا
وكانت الملكه الجودلية بت ام رحطين من اشهر الملكات
كانت الجودلية دي مرتا قاهره وجنها عرسان
وكان الملك امحمد ودالخديرا راجلا الاولاني هو الملك بحكم الاعراف عندهم
حيث كانت الاعراف بتقول انو راجل الملكة الاولاني يظل هو الملك
وطبعا المرا يحق لها ان تتزوج ما تشتهي من رجال
وطبعا الملك دائما بكون قاعد طرطور ساي لا بودي لا بجيب
وطبعا كل الشثؤن انثوية زي ما قلنا والشخص كان بينسب لامو
والميراث برضو عن امو
والحكم بيورث لي بت الملكة الكبيرة .

ونواصل

اها الملكة الجودلية دي كانت سمحة سماحة شديدة علا كانت عينا طايرة
وجنها رجال .
في صباح من صباحات البادوبا الجميلة لمحت الجودلية بين رقراق العنقور
(العناقير بيوت من البروش والوبر كانت السكن الشائع في منطقة البادوبا )
لمحت الجودلية العطا السقا كان شابا وسيما فارع الطول قمحاوي اللون كثيف
الشعر ذو شارب كبير ( يربط قبيلة كما يقولون )
وقعت الملكة الجودلية في غرام العطا السقا وقررت تعرسو فوق احمد ود الخديرا
بعد ان تطلق التلاتة الباقين
فارسلت وصيفتها ام حطيم بت التاية في طلب العطا السقا



نواصل

كان العطا السقا يحمل الجوز الزي كان يجلب به الماء من النهر قرب القرية الملكية
ام حطيم : هي يا العطا سجمنا والهكر هجمنا
العطا : مالك يا بت الناس
ام حطيم : جلالتا قالت دايراك تجيها ضروري
العطا : ياساتر دي مالا كمان من صباح الرحمن
ام حطيم: ُآ بعرفا والله إت يالعطا نعل ما مسيلك عوجة
العطا : عوجة شنو يا بت الناس . غايتو كدي النوصل مويتي دي وامشي عليها




نواصل

وبعد ان قام السقا بتفريغ الجوز الذي كان يحمله في جر بت العريجا
رجع البحر اخدلو عومة كاربة
وحدر طاقيتو واتوكل علي الدائم ومشي علي الملكة

وفي عنقور الملكة كان يدور الحوار التالي
الجودليه : تعالي هنا يالمسنوحه العطا وينو
ام حطيم : قال جايي بي قفاي
الجودلية: مخليا بي قفاكي لي شنو ..؟
ام حطيم : شايلو جوز الليل موية قال بوصلا وجاييكي
الجودلية : كدي امرقي عاينيلو ما ظهر من بعيد
ام حطيم : انت مالك شفقانة كدي اصبري



نواصل

وظهر العطا السقا يضرع من بعيد
ام حطيم : اها مقطوع الطاري تراهو دااااااااااااااك
الجودلية : يللا يغوري من قدامي خلاس

وعندما اتي السقا باب العنقور جلس علي ركبتيه حسب اعراف المملكة
الجودلية : قوم يا عشاي زول شايفك غيري مافي
( وكانت هذه اول مرة يتم فيهاتجاوز الاعراف ) لشئ في نفس الجودلية
العطا ( مندهشا ) : كيف يعني ... ؟
الجودلية: قوم يا عشاي بدور انضم معاك في شيتا مهم
وقف السقا وهو غير مصدق عينيه


نواصل

الجودلية : العطا يا ود الحلال انابدور اعرسك رايك شنو ....؟
بهت العطا من الكلام الجا واقع زي الدراب دا
وماكان عامل حسابو ليهو كلو كلو
وبيني وبيكم العطا كان كا قافل علي الرزين بتعلوية المشاط

اها الرزينة دي براها قصة اول حاجة الزولة دي سمحة سماحة تحت تحت كدة
الراوي ذاتو باكي فيها ياخ دي عيونا شدة ما كبار في اليوم عندها رمشتين بس
وبعدين شعرا من شدة ما طويل لمن حاميها المشي وعييييييييييييييك نوصف شنو
ونخلي شنو ايي حاجة فيها سمحة
والعطا دا كان بريدها ريدة شديدة ياخ لو عترت ساي هو بقع بدلها

المهم كلام الملكة الجودلية بقي ليهو زي الصاقعة وماعرف يقول شنو
قعد يطنطن براهو
الجودلية : اها يا عشاي ما وريتني رايك شنو ..؟
العطا : في شنو ..؟
الجودلية : في نضمي القلتو ليك دا
العطا : نضم ياتو ..؟
الجودلية : اجي يا ودالناس ما قت لك بدور اعرسك
العطا : كدي النفكر واجيكي صادي

نواصل