Post: #1
Title: ستنا وعبد الجليل - مسلسل سوداني رومانسي
Author: ALZOLZATOO
Date: 08-03-2009, 12:55 PM
نسبة للنجاح الكبير الذي تحققه المسلسلات التركية واللاتينة المدبلجة في الشارع وداخل المنزل السوداني احيطكم علما بانني كتبت مسلسل رومانسي سوداني 98% طبعا 2% لانو تم كتابته خارج السودان
باسم ستنا وعبد الجليل
مطلوب واحد يخرج لينا العمل الرومانسي ده في مسلسل طبعا الممثلين لازم يكون في مستوى الرومانسية ماتمشوا تجيبوا لي فيهو فايزة عمسيب عايزين الشباب يعيشوا المسلسل بي كل حواسهم يعني لازم الممثلة تكون اقل من 24 سنة وعبد الجليل مايكون اكتر من 35 سنة . طبعا المسلسل ممكن يتم بثه في رمضان لانو نحن رومانسيتنا عذرية ومحترمة شوية مابتجرح الصيام
تحياتي
زاتوووو
|
Post: #2
Title: Re: ستنا وعبد الجليل - مسلسل سوداني رومانسي
Author: سلمى الشيخ سلامة
Date: 08-03-2009, 01:19 PM
Parent: #1
يا زاتو
وين النص؟
ادينا عضم المسلسل زاتو والمنتج والباقى علينا
|
Post: #3
Title: Re: ستنا وعبد الجليل - مسلسل سوداني رومانسي
Author: اميمة مصطفى سند
Date: 08-03-2009, 01:26 PM
Parent: #2
يازاتو
من البداية كده الموضوع ما حيجيب متابعين
الأسماء ما فيها أي رومانسية
غيرها بالأول وبعدين نشوف عضم المسلسل
تحياتي
|
Post: #8
Title: Re: ستنا وعبد الجليل - مسلسل سوداني رومانسي
Author: ALZOLZATOO
Date: 08-03-2009, 02:40 PM
Parent: #3
اختنا اميمة
الاسامي ليست محل خلاف ممكن تختاري اي اسمين بس تكون اسامي سودانية يعني ماممكن تسميهو ميرنا وخليل نفس المسلسل التركي عايزين اسامي من عندنا
نحن عشان نعمل جمهور كتير ح يتم بث المسلسل في الداخليات اولا لوووووووولز
تحياتي
زاتوووو
|
Post: #4
Title: Re: ستنا وعبد الجليل - مسلسل سوداني رومانسي
Author: منال
Date: 08-03-2009, 01:27 PM
Parent: #1
والله ضحكتنى يا زاتو
منو قاليك السودانين بعرفو رومانسية
حتى لو كان تمثيل
الروما نسية والسودانيين زى الحراز والمطر ما بتلاقو مع بعض
|
Post: #5
Title: Re: ستنا وعبد الجليل - مسلسل سوداني رومانسي
Author: سلمى الشيخ سلامة
Date: 08-03-2009, 01:58 PM
Parent: #4
منال الحبيبة
ياخ منو القال ليك انه نحنا ما رومانسيين يا جميلة ؟
وحات الله بنبكى فى المسلسلات
"زمان كانوا بجيبو لى المناديل للمخاخيت والجرسة ولغاية الان ببكى فى الافلام "
يا حبيبة القسا
التربية الغلط
الولد يقولو ليهو "ما تبكى البكا عيب "
والبت كان مسكينة ضحكت بصوت عالى
ـ يا فتا اقعدى فى بطن الواطة الضحك البلاعجب قلة ادب
وهى مسكينة يكون عاجباها حاجة وضحكت
وكان الناس ساكت الله فتح عليهم بضحكة
طوالى الرد حاضر
ـ اللهم اجعله خير ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لكين رومانسيين بعد دا
قولى كيف ؟
قولى يا السمحة جيتى مسافرة بالله البيت دا يقيف قرون قرون من البكا
وتحلفى تقولى مشيعيين جنازة
لكين ياخية الرومانسية زاتا خشوم بيوت
اجمل الناس الانتى بتكونى ما عشتى معاهم اهلنا الريافة
تعرفى ديل شدة ما روما نسيين لمن تقولى ياربى الكلام دا وين ؟
كدى اقعدى ليك مع ناس من القرى يوم واحد شوفى الحب الحتلاقيهو ؟
لمن تااااااااامنى زاتو
يا زاتو متاسفين على النضمى الكتر
استلم ورديتك وجيب لينا النص وخلينا نشوت التصوير
|
Post: #6
Title: Re: ستنا وعبد الجليل - مسلسل سوداني رومانسي
Author: ALZOLZATOO
Date: 08-03-2009, 02:15 PM
Parent: #5
اخواتنا اللذاذ
ح اعقب على كلام استاذتنا سلمى عن الرومانسية السودانية
في راي هي رومانسية محسوسة وغير ملموسة يعني ممكن زوجك طول عمرو مايقول ليك ياحبيبتي لكن لو مشيتي لي اهلك ساكت طول اليوم تلاقيهو يتقلب في السرير ومايجيهو نوم يعني بالعربي كده ممكن ينطبق علينا بيت الشعر البيقول
نسرق الدمع في الجيوب حياء وبنا مابنا من الاشواق
بعدين قرات فيما قرات في ماضي الزمان ان بعضهم كان يعشق الواحده ولا يصرح بحبه لها ولا تعرف حبه لكن اذا قدر الله وماتت هذه المعشوقة بعد يومين بالكتير يتوفى العاشق عليك الله يامنال في رومانسية اكتر من كده
الرومانسية موجودة بكثرة في السودان بس الظروف المحيطة مابتخلي الواحد يعكس دواخلو او يعبر عن شعورو
مرة دخلت فيلم هندي اها البطل مكسر في واحده وماخلى اغنية حقيبة ماغناها واي نجيلة ادردق فيها في النهاية اتزوجها ويوم الدخلة شاف وشم في ضهرها نفس الوشم الموجود في ضهرو اها طلعت اختو الغائبة عنو طول الفترة الطويلة دي اها وحاتك نص السينما دموعهم جرت .
فالرومانسية يا اختنا منال موجودة بس ربنا يكتر البطاطس
تحياتي
زاتوووو
|
Post: #7
Title: Re: ستنا وعبد الجليل - مسلسل سوداني رومانسي
Author: منال
Date: 08-03-2009, 02:23 PM
Parent: #5
ياسلمى انا طبعا بقصد رومانسية نور ومهند
ياخ العالم دى بتابع المسلسلات دى بصوره مبالغه
ده كلو عشان فافدين الروما نسيه البشوفوها
كثير من الرجال السودانيين لايتعاملو مع زوجاتهم برومانسية
وكمان بعض من النساء السودانيات
فيهن غلظة وحدة كبيرة جداً وليست لهن اي صلة بالرومانسية.
يعنى مثلا انا دائما بقول لزوجى انت ليه ما بتقول لى بحبك
يقول لى يعنى انا لازم اقول طبعا هو بقول الحب فعل
نعم فعل لكن عايزين نسمع نعيش اللحظة
لكن منو البعرف
|
|