بحتـــار !!!...

[بحتـــار !!!...] هي واقع مشاهدات قد تكون مرت بي أو غير ذلك فرأيتها من خلال الآخرين ، وكان القاسم المشترك إنها ادهشتنى واحارتني!!!...

بحتار في شخص يحمل مكنون من الكراهية للبعض بدون أدنى سبب مبرر ومنطقي لذلك !!! ...

بحتار في شخص بمقدوره تقديم المساعدة للآخرين ويضن بذلك ، حتى أن لدي صديق قال لي بالحرف الواحد [عايز تخرب علاقتك بزول (حاول) أدين منو]) !!!...

* المساعدة هنا ليس مشروطة على المساعدة النقدية...

بحتار في إنسانة مثقفة ومتعلمة وتعمل على تسويق نفسها أمام الآخرين (ذكر أم أنثى) بشكل غريب!!!...
وبحتار أكثر أن الذين يسوقون للهم هذه البضاعة يعلمون تمام العلم فتشعر وكأنهم منومون مغنطيسياً في لحظة ما !!!...

يا صديقي اللدود معتز تروتسكي
حلوة جداً فكرة هذا البوست لأنها ممكن -فعلاً- تفك لينا الحيرة
وتفكفك لينا شويّة مفاهيم وظواهر زائفة على أرض الواقع المُر جداً

وفعلاً بحتار في شخص كان ممكن يقول الكلام الدُغري ويختار الكلام العوج
وبحتار (أكتر) في صاحب بيطعنك من ورا ظهرك ويسعى لتشويه صورتك دون سبب
أو ربما في سبب ولكن أكيد لا تعلمه أنت!!!


تحياتي ليك


.

ياخ أنا عايز اضحك أول شي لكن خلينا جادين
أبو الشوش هشام أزيك
الفكرة بالجد ما عندي زول في راسي حتى لايتوهم البعض، لكن بصورة أو أخرى إذا كان في المنبر أو بره من واقع مشاهدات ومعايشات هو رصد لاشياء تُحير!!!
أنا الحياة دي اعتقد طحنتي بما فيه الكفاية...
رغم ذلك لم تقف حيرتي جراء ما يحدث من أشياء تُحير...
حاولت أن ارسمها بصورة ، ربما هي نوع من المعالجة حتى لشخصي (تروتسكي) ..
حيث سيستعصى على ممارسة أفعال قد حيرتني كلما حاولت أن ألج ليها..
لانو هنا بكون في تناقض في الشخصية..
عموما ممكن نسوق الموضوع ده إلى الأرشفة ، أساسا المشاهد البتحير ماحتخلص يعني البوست ده أنا ما مستعجل عليهو وممكن يمشى معانا للقيامة..

التحايا النواضر...

Quote: بحتار في شخص كان ممكن يقول الكلام الدُغري ويختار الكلام العوج وبحتار (أكتر) في صاحب بيطعنك من ورا ظهرك ويسعى لتشويه صورتك دون سبب أو ربما في سبب ولكن أكيد لا تعلمه أنت!!!

يا معتز...ازيك
وعلك بالف خيــــــــــــــــــــر

زيك انا محتار...محتار..محتــــــــــــــــــــــــــــــار!!
لما الحيرة زاتها...محتارة من حيرتي!!!!



الحال فعلا.....يدعو..للحيرة..
واهو محتارين..معـــــــــــــاك,أكان نلقي حل...للحيرة!

لك كل الود
هواري

خالص التحايا
العزيز كتير
هواري نمر
ياسيدي يديك العافية ، وصيتك تجي تسجل ملاحظاتك المحيرة لعلنا نستفيد منها ، وتكون الجانب الاخر من الكوب بالنسبة لنا...
استاذنا على جميع الأصعدة لا مفر من الحيرة يا هوراي يا عزيزي ولكن بقدر ما وجدته بأسلوب تعامل الجنس السوداني مع كل الظروف الحياتية يستطيع أن يلون السوداني نفسه كالحرباء ، حيث لا مبدئية ولا ولا ....
الناس تسافر تتعامل مع أرقى الشعوب هي هي ، تعمل فيها بتاعين مجتمع مدني وديمقراطيين وبرضو هي هي !!!
زي مابقولوا لا خلق ولا أخلاق...ينقص مجتمعنا الفلسفة الاجتماعية في التعامل مع الجنس الآخر على الصعيد الإنساني ...

التحايا النواضر...

وانا بحتار من اللذين لايفهمون ما اعنيه بكتاباتى (البعض)
نكتب لتتنفس ارواحنا من ضغط الحياة والملل ولكن كتاباتنا
هى من تنعش حياتنا وتبدلها من الكدر الى الفرح

فقط ..... بحتار

دمت بكل الروعة اخى معتز .

تصدق يا معتز .. أنا بطني طامة عديل
شقيش تقبّل تلقى ناس وشوش ساي
لا تعرف صاحبك منو، لا عدوك ده كيفنّو

غطيني وأعمل نايم بس

هشام آدم

أشفق عليك وعلى أمثالك فأنت لا تتعامل مع سذج ومن المحير سيرهم في طريق السذاجة وهم دون أن يدرون هؤلاء!!!...
اعمل إلى التصالح مع نفسك ، وإلى إعادة تقييم شامل لجميع تصرفاتك وسلوكياتك لتعيد بناء علاقتك بشكل يستوجب أن تعرف على أساسه صليحك من عدوك ، بدون أن نفقد الخير في الكل..

* في مثل أو مقولة بتقول [السابك رادك] أو أحياناً تكون ناجعة ، بس الحيرة ستظل !!!...

خالص التحايا
الغالية
منال
موضوع مهم عزيزتي .. لان البعض يتعمد أن لا يفهم أو يتحايل على الفهم !!!
ولا أدري لما يعتبر البعض أنهم في حاله حرب دائمة وعلى كل طرف أن يحسب تصرفاته بمنطق نصر أو هزيمة...
لما لا يتعاملون كبشر متحضرين وإنسانيين بالدرجة الأولى؟!...
لذا نحتار صديقتي!!!

رسالة من زولة صديقة جداً جداً جداً...
من واقع هذا البوست ، يبدو انها حاولت ان تُخفف من حيرتي...

Quote: معتز الغالي...سلامات أهم شيء يا معتز إنك تعمل كل حاجاتك بمحبة...وتختار خياراتك بحرية.. الدنيا دي بسيطة بس الزول ما يتلفت كتير...يعني تحدد أهدافك وتمشي في طريقك... ما مهم الناس تثق فيك..المهم تكون مؤمن بنفسك.. ما في كلمة إسمها فشل بس تجارب ناجحة أو ما ناجحة لكن بنتعلم منها... إستمتع بحياتك في حدود إمكانياتك المتاحة... وطور نفسك بحيث ما تكون محتاج لحد ... أفرح..الحزن لو صاحبتو بيصاحبك ولو فارقتو بيفارقك... صاحب أقل عدد من الناس لأنو طاقة قلبك ما ح تستحمل ناس كثيرين... ومافي زول في الدنيا دي بيهمو مصلحتك غيرك أو أمك.. باقي الناس كلها مجاملين او منافقين خلي بالك من روحك ...

بحتار لمن تتودد لشخص لإقامة علاقة معه وهو يترفع عليك وكأنه خرق الأرض أو بلغ الجبال طولا ، وفي النهاية أنت أفضل منه بمليون سنة ضوئية وعلى جميع الأصعدة !!!...

أخشى
أخشى ... أن أفقد الرؤيا وأضل الهدف وسط زحام الحياة.
أخشى ... أن تمر الأيام والسنون خاوية بلا نفع.
أخشى ... أن أعيش باحثاً عن الوهم ، أو عاشقاً للسراب.
أخشى ... أن أفقد حبي لمن حولي ، أو أُحرم من حب الآخرين لي.
أخشى ... أن ضياع كلمة الأمل وفقدان معنى الرجاء من قاموس حياتي.
أخشى ... أن يأتي اليوم الذي نودع فيه جثمان "القيم" ونشيع جنازة "الأخلاق".
أخشى ... ضياع الحب .. وفقدان العاطفة أمام جبروت المادة.
أخشى ... أن يبيع البشر آدميتهم من أجل رغيف خبز.
أخشى ... أن أفشل أصنع بسمة على شفاه الآخرين.
أخشى ... أن تصبح الحروب ألحاناً تعزفها الأمم ، وتسمى المعارك سيمفونيات يرقص على أنغامها أعداء السلام.
أخشى ... أن تموت في داخلي كل القيم النبيلة ، فأصير وحشاً كاسراً يبحث عن فريسة يلتهمها.
أخشى ... أن يأتي اليوم الذي لا أخشى فيه شيئاً.



إستراحـــة ...

ازيك ياخ

طارق جبريل
يا زعيم وحاتك مشتاق ليك ولي ناس ريم ومحمد ياخ عليك دينك بلغهم تحيات عمو تروتسكي شديد شديد ومدامكم الفاضلة ...
وكذلك بقية الشباب..
ونقول ليك..
واسال عني طيفك وزكراك هم شهود
وياما اشتقت ليك ورجيتك لو تعود
وحشتني الابتسامة عيونك بي كلامها
تداري في اشياقها وتفضح لغرامها
***
ظلموني القالو عني و غيرني البعاد
وحيات نور جمالك زاد البي زاد
واصبح شوقي اكتر حبك عندي اكبر
املي في هواك نامي ولسه اخضر


---------------------------

ممدوح أبارو
صديقي الذي لا نساوم عليه ...
وصدقني كم هو جميل أن أراك هنا مع عاصفة رقيقة هي الموسيقى لأننا ظللنا نجرى تعديلاً دورياً على أجهزتنا العصبية لتتناسب مع الجرعات الروحية المقررة علينا بطريقة (حبة عند اللزوم)..


أعزائي جميل ان تشاركوني كذلك ما أخططته صديقتنا التي لا تقل عن مكانتكم مكانه وصاحبة الرسالة الأولى ، ها هي تواصل كلامها الموزون بماء الدهب...
جزء من رساتها.. في ميزيد من الدوران في عالم الحيرة!!!

Quote: معتز الغالي...سلامي ومحبتي وأشواقي تعرف..الظاهر في توارد خواطر بينا.. أنا قبل فترة نشرت الموضوع مقارب لموضوعك هذا في مدونتي .. قد تكون إجابات لأسئلتك أو محاولة للخروج من الحيرة... قريت موضوعك وعجبني شديد... قريت كلام هشام آدم... دي رسالتي لكل احبابي إنهم يجتازوا النفق بكل ظلمتو ويحاولو التحليق في آفاق أرحب.. كن بخير يا زول يا جميل .... Psychological Freedom كثيرة هي لحظات الوجع في حياتنا... نحزن على احبة فارقناهم أو إرتحلوا عنّا... عندما نفتقد أصدقاء رائعون تفرقت بنا سبل الحياة.... تصيبنا خيبات امل كبيرة عندما نمنح شخص ما ثقة لم يستحقها.... عندما تسرق أحلامنا الطفوليّة وتغتال خيالات صبانا... عندما يترصدنا الآخرون محاولين البحث عن عيوبنا وتلميع أنفسهم على حسابنا... عندما يزيد الضغط الخارجي وينتشر التلوث في الهواء المحيط بنا.... عنما نفقد السيطرة على ذواتنا ولا نستطيع التحكم في ردود أفعالنا... يوم بعد يوم تتسع بقعة الألم بداخلنا ..تذبل براعم الفرح وتتغلص مساحة الأمل... تصبح قيم مثل الصدق...النقاء والأمانة في التعاملات من المفردات الغريبة في عالمنا... تكون البراءة سذاجة... الخداع ذكاء.... ترتفع أبواغ الزيف ويسود قانون الضلال... لحظة إنهيار.... تفقد الثقة في ذواتنا والآخرون...

... الخ..

التحـــايا النواضـــر ...

بحتار في شخص يبدلك عندما تُسدي له نصيحة في صالحة أو تتعامل معه بصراحة ومصداقية عالية؛ وهو كان في يوم الأيام لا يستطيع حتى أن يتنفس بدون أن يستشيرك !!!

بحتار في أن يكون الشخص متسلقاً ، حتى بدون أن يراعي للذوق العام "يتمسكن حتى يتمكن" أو حتى بدون مسكنة !!!..
بس لدي صديقي ذكر لي في هذه النقطة، يعجبني في البعض الذي يطرح نفسه متسلقاً بكل صراحة وما داسيها !!!

بحتار في التعدي على معرفة الشخص بالأشياء وكان يا دنيا ما فيكي إلا أنا ، وهو حدث ولا حرج ، تنظر إلى ما يقوم به تشفق عليه أكثر من أي شي آخر أو تحنق عليه!!!

بحتار عندما تصمت ويعتبرك البعض انه انتصر ، بل تعداه إلى أن يتضخم لدرجة الانفجار"مسكين هذا الشخص"!!!...

بحتار في أشخاص من المفترض إنهم مستنيرون يفرزون القضايا ويتعاملون ويتضامون معها على أساس شخصي !!!

بحتار في كمية الرياء الطافحة ومستفحلة هذه ، لشنو وليه ؟!؟!...

بحتار في أشخاص كل ما لديهم هو تبخيس ما يقم به الآخرين وتقليله متذرعين بان هذا نقد وهم لا يفقهون شيئاً عن مبادئ النقد، ليس لشي سوى انهم يعجبهم "التشنيف" ان لم نقل انهم "شنافون"!!!

تروتسكي ..

الود يا جميل ..

وانا بحتار في الزول البيلوك الكلام بدون ما يفهمو ويبلعوا ساكت مسبب للآخرين سوء هضم ..
وبحتار اكتر من الآخرين البيجو يأكلوا كلامو دا تاني بعد يطرشو وبنفس الطريقة ..
وتكون دائرة هكذا .....©

تحياتي

وبحتار كمان معاك من زول تكون طالبو حاجة .. موقف .. طالبو ان شاء الله شدت قميص ..
ويتحاشاك .. يتزاوغ ويخلي ليك الشوارع والمسنجرات ..

صلوا على المحتار!!

بحتار....فى الناس البتختار الطرق الملتوية لطعن المختلفين معهم..
ومن ضمنها التطاول على الاسر والنبش فى اعراض الناس ..

سلام يامعتز

وبحتار كمان في هكر يسُوط ويجُووط ....

ولا نعف أساس تكتيكه ومنطلقه ،،،،،،،

وكمان بحتار فيك إنت يا تروتسكي .. ليه بتكتل بوستاتك بالغياب ...( وجه مُحتار )

يا معتز.......
أنا بحتار الزمن..ده..تقييم الناس بقي بي عندك شنو؟؟وقروشك كم؟؟
وسايق ياتو عربية؟؟

اها موش لي حق احتار!!

أسوأ حاجة في الدنيا دي يا تروتسكي
إنك لا تكون موجوداً عندما يحتاج إليك أصدقاؤك
والأسوأ من كده إن يكون عدم وجودك مش بإيدك!!

Quote: بحتار عندما تصمت ويعتبرك البعض انه انتصر ، بل تعداه إلى أن يتضخم لدرجة الانفجار"مسكين هذا الشخص"!!!...

_____________
صورة للشايلين حسّ البولة!

بحتار فى زول عامل فيها مقطع المعرفةوالوعى ويسقط فى اول ريل تست على ارض التجربة*













_______________________________

المسافة بين النظرية والتطبيق

بحتار فى زول فى ممكن يجتهدويجتهد بس شان يطلع ليهو عيب او غلط (حسب شوفو طبعا)فى الاخر وفى نفس الوقت
ماقادر يشوفو مشاكلو وين(ولا بشوف وبعمل ماشايف ماعارفة)

بحتار فى زول مابشوف ولا بحس بالجمال* الحولو .. لانو متابع نقائص الاخرين









______________________

الجمال فى عين الناظر

بت الشيخ
شايفكـ بقيتي محتارة شديد!

Quote: بت الشيخ شايفكـ بقيتي محتارة شديد!

شدييييييييييد يا ودالصايم...

لو تابعت البورد دا بس والله الحيرة تمسكك لما يجيك اكتئاب..

البورد دا نموذج كويس ..

بعدين محتار في شئ ...

الرسول دا حق زول ؟؟

يعني يحق لزول انه يقول انا بتحدث باسمه واسم الدين والاخرين يصمتوا ؟؟

مآظنيت لاني انا نفسي رسول كلمة لمن هم حولي .. بس الحولي ديل ااااتهم عاملين رُسل ..

بحتار فى زول بستغل اى فرصة للنيل من زول مختلف معاهو فى اى زمان ومكان

وانا نحتار في الحيرة ذاتا

وتسلم ياصديق

تروتسكي و في صدره غيفارا..
..
يا صديقي.. رمضان كريم و كل عام و أنت و الوطن بخير..
..
.. لينا طُولة...

Many Rivers to Cross my friend

شنو إتداخلنا أمبارح والبوست رب دق الدلجة

Quote: ظلموني القالو عني و غيرني البعاد وحيات نور جمالك زاد البي زاد واصبح شوقي اكتر حبك عندي اكبر املي في هواك نامي ولسه اخضر

معتز يا صاحب

بحتار شديد فى الناس اللى بيفاجروا فى الخصومة وتشويه سمعة الاخرين

حبايبي الحلوين سعيد بيكم ..
فالمشترك بينا من حيرة ، معناتو في خلل بغض النظر عن شكل الحيرة ومضونه..
انا كل يوم بل كل ساعة بتظهر عندي حيرة ...
كمان عايز عايز اعتذر ليكم لعدم المواصلة ، النت الايام دي طشاش طشاش الا اخش من حتات تانية فلكم العتبى ولا تحتاروا..
بس يهون كربتنا مع الخدمة الشغالين بيها دي ولا شكلنا تاني حنبدا موسم الانتقالات..
حاجة حتير..

التحايا النواضر..